رواية الندم مابعد الخطيئه الفصل العاشر 10 - بقلم رونق

مساء الخير ع اجمل متابعين اتمنى لكم قراءه ممتعه

❣️❣️البارت 10❣️❣️

❣️❣️الندم ما بعد الخطيئه ❣️❣️

❣️❣️للكاتبه رونق❣️❣️

دازه لاحمد باجر مراح نسافر وياكم للشمال

راح نرجع ع الاكثر للعراق

لان روان خطيه حيل ماذيها صديقك وضاربها

وتكول لازم اقنع اهلي وارجع مااروح للشمال لو تنطبق السما ع الارض

طلعت السفره من عيني

اتخبلت شنو ترجع

احمد فدوه قنعها لديما هي تاثر عليها

لتخليهن يرجعن

لازم اصحح غلطي وياها

ماعليه بيها ابد والله

كللها لاازعجها بعد ولا ادخل بيها

انت راسلها وشوف

واني هم راح اراسل روان

جن جناني مااريدها ترجع ابد

دزيتلها الوو

كاعده لو نايمه

دزتلي كاعده

شنو تردين ترجعين للعراق

منو كلك

معليج منو كلي بس كولي صدك

اي راح اقنع اهلي وارجع

ليش شنو السبب

حيل ضجت مااريد ابقى ولا اريد اسافر باجر وياكم

روان رحمه للحسين لتصعبين الامور اكثر

اهلج خطيه دافعين فلوس كامله ميصير ترجعيهم وانتم بعدكم

وثانيه وبعد لتعاندين وثقي بالله وبالرسول ماعليه بيج ابد

انت تريد حجه عليه ومتعجبك تصرفاتي

اني احب اكلك شي واحد

انت ممجبور تتزوجني ولا مجبور تتقبلني لان اني وحده ساقطه ادور نضرات من الشباب وممربايه ابد

تسكتين لو اطلعلج من الشاشه ولسانج اكصه

بس لتعاندين وراح اختفي من يمج

لا ازعجج ولا اعرفج ولا تعرفيني

ماعليه بيج ابد

اهم شي لتلبسين ملابس حصر ع جسمج

الله عليج لترجعين

حتى بعد مااباوع بوجهج بس اذا تصرفتي تصرف مو حلو لا احاسبج

ماكو جواب

ها شكلتي جاوبيني

ارجع يعني ارجع كافي هواي اذيتني وطلعت روحي من السفره

اني جايه حتى اغير جو واتونس مجايه حتى انضرب وانهان

وعد مني مراح اتقرب يمج ابد ولا ااذيج بس غيري رايج

مجاوبت شي

ها روان فدوه جاوبي لتسكتين

الله كريم

بس دير بالك تحاول تستفزني وتذب ع ملابسي شي

والنبي هالمره مراح اسامحك

اوك وعد مراح اذب شي ع ملابسج ابد

بعد مجاوبت

دزيتلها تصبحين ع خير

هم ماكو جواب

نمت لان الوقت حيل اتاخر

كعدنه ثاني يوم سبحت وبدلت ونزلنه كلنه

صار موعد انطلاقنه للشمال

المنشأه اباب الفندق كالوا كبل للشمال

يعني مو للكراج وبعدين غير منشاه مثل من اجينه لمشهد

عيوني تراقب روان غصبا ماعليه

شفت لبسها حلو وهالمره معقول

بس لاحظت الولد نفسه الي اشرلها تكسي

عيونه اكلتها اكل ويوزع ابتسامات بوجها

حيل ضجت وروحي طلعت

بس هي ولا كانو

كلت لاحمد خل نصعد قريب عليهن

فعلا صعدنه وراهن كلت لاحمد وين يكعدن نكعد لو مقابيلهن لو خلفهن

حصلنه مكان مقابيلهن

اهل ديما كدامهن واهلها مقابيلهم يعني نفس المستوى

وهنه واحنه بنفس المستوى

انطلقنه وحسيت نفسي فرحان حيل

بعد يومين للعيد راح نقضي بالشمال

كل شويه وعيني وحدهن يباوعن عليها

عينها ع المناضر

هم كمت اباوع المناضر

طريق الشمال مينوصف ابد

جمال مو طبيعي

جانت هادئه بشكل

تسولف وي بنت خالها وتضحك

من دون الحمله معزولات

البقيه اندمجن سوالف وضحك سويه بس هنه لا

نزلونه يم استراحه اتغدينه

مااعرف ليش عيوني تراقب كل تفصيل بيها

خلصت الاستراحه ومشينه

وره فتره نزلونه يم محلات خاصه بس بالكرزات انواع واشكال

حتى قسم اول مره اشوفهن

الكل نزل واشترينه ابد مضايقناهن

بعدها هم صعدنه

نزلنه بالليل للصلاه والعشه

لاحضت نضرات متبادله بين احمد وديما

سالته احمد

لك شصاير من ورانه

مصاير شي ليش شكو

وهاي النضرات

لك لحكتني ع النضرات الله وكيلك ماكو شي

مجرد اعجاب

بس اذا ترجع للواقع والله البنيه مبين عليها مؤدبه واخلاقها عاليه

لعد متشوفني البنيه عجبتني

تدري ابطبعي كلش صعب

مااحب اضحك ع بنات الناس

بس هاي اشو احسها مختلفه

متلهف اشوفها وحيل عجبتني

اني جنت متردد من شغله بس اتاكدت منها

هي شنو شعورها اتجاهك

واني شمدريني

ماحجيت وياها اي شي

بس نضرات بيناتنا

ان شاء الله يتحول لحب واضحك عليك مثل مجنت تضحك عليه

بده الجذب ولك وين ضاحك عليك

دمشي اصعد الكل صعد

اشو هالمره ماكو لا ببسي لا عصير

دمشي واسكت

صعدنه وبعدها انطلقنه

شويه وكامت روان يم اهلها

كعدت يمهم تحجي

اهلها كدامنه

اسمع حجيهم وياها

مبين عليها مدللينها هواي

كالت هذا عمار يدك عليه

كلتلها امها راسلي عيب الناس نايمين

بقت فتره يمهم

بعدها رجعت

الكل تقريبا ناموا

احمد يراسل

محجيت ويا ادري بي ديراسل ديما

شفت روان كاعده وتكلب بجهازها

دزيتلها رساله

هلوووو

مدزت شي

متحبين تسمعين اخبار صديقتج

دزتلي ماعندي اي صديقه ولا احب اعرف اي شي عنها

بس ظالمتها اتمنى تسمعين قصتها وشصار بيها

رجاءا لتحجي شي لان مااحب اسمع اي شي يخصها

بس والله خطيه والرضا الزرته متدري بيه شجنت ناوي اسوي

واكثر من سنه متحجي ويايه

وقبلت تواعدج بس ع مود اخوج يطلع من السجن

ضحت بكلشي بس ع مود اخوج

عفيه سد الموضوع مااحب اسمع اي شي

انتوا دمرتوني دمار

مااعتقد يجي يوم واسامحكم اثنينكم

اني الج حق متسامحيني بس شهد لا خطيه

والنبي هواي ظلمتها اني

وانت همين كاعد اظلميها

لو تدرين شصار بينه من وراج

اني مراح احجي شي

بس اذا حابه احجيلج كولي انطيج التفاصيل كلها

لا مااحب اسمع شي

بس جان عندي سؤالين مدوخاتني  جنت امنيتي اعرف جوابهن

شنو اسالي

اول سؤال شنو الي استفاديته من دمرتني

والله الصراحه كلشي مستفاديت بالعكس خسرت هواي اشياء بسبب غبائي

جنت عبالي انتقم من اخوج

والي جان ابالي انتوا مقشمرين اختي

والمصيبه يتواعدون ابيتكم

يعني من حقي اشك ومن حقي هيج اتصرف

لان جان ابالي العين بالعين والسن بالسن والبادي اظلم

مجنت اعرف علاقت اخوج وي شهد بالضبط

وهسه عرفت شنو جانت علاقتهم

اي اعرفت بس بعد فوات الاوان

بس اني الي اترجى منج تنطيني فرصه اصحح خطئي

راح انطيك اياها من الاخير

من المستحيل اني وياك نتزوج

وليش من المستحيلات

شنو يعني معقوله انت من كل عقلك

اهلي يوافقون بيك

لتنسى انت الي طردتهم من خطبو اختك

لو لتنسى انت نفسك الي خليت عمار ينام بالسجن وهواي اتوسلوا بيك حتى تتنازل

ولتنسى انت نفسك الي دمرته لاخويه وخليته يبيع الاول والتالي ع مود الفصل

والاهم من كلشي لتنسى انت متزوج يعني من المستحيل يوافقون عليك

اني ميهموني الي ذكرتيهن اهم شي عندي موافقتج

والباقي عليه اني اقنعم

ادز مشيه واثين و3 ومراح امل

راح اخذلهم ساده ومعممين واحاول اخليهم يوافقون

اني مستحيل اوافق ع عدو اخويه

ولا اوافق ع الي ذل اخوي وذل بابا

ولا راح اوافق ع واحد متزوج

مااقبل ع نفسي اصير ثانيه واكسر بخاطرها لزوجتك

انت مفكرت بيها

بس زوجتي اتوفت الله يرحمها

شنو اكيد تشاقه

لاوالله احجي صدك

خطيه الله يرحمها

اكيد ماتت من وراك يجوز خنكتها خنك الله يساعدها

وليش اخنكها جانت تسمع الكلمه وابد متعاند

وجانت محترمه نفسها

لابسه عبايه ومحتشمه

والاهم من كلشي جانت حبيبتي

زواجي جان عن طريق الحب

احبها وتحبني

لعد اذا تحبها ليش متوفي الها

شلون تريد تتزوج مره ثانيه

اني خطأت بحقج خطأء مينغفر ابد

لازم اصحح غلطي

ادري بيج تكرهيني وتضوجين مني

ماالومج ع هذا الشي

بس لازم نتزوج ع مود سمعتج وسترج وع مود اهلج خطيه

بس اني مااريد اتزوج ابد

اريد ابقى حره مااحب القيود ولا احب واحد يتحكم بيه

اي عادي ماكو مشكله نتزوج فتره معينه ونطلك

اهم شي تنسترين

اذا اهلج دروا بيج شتتوقعين ردة فعلهم

مستحيل اخليهم يدرون

بابا اول شخص يموت والله

عليك الله وبداعت امك للموت لتجيب طاريها لاي شخص

ولتفكر بلي صار مو مهم اتزوج

اني ارفض الزواج من اي احد يتقدملي

لا ميجوز هيج تفكرين

اني اتقدملج مره مرتين حتلو الف مره مراح استسلم ابد

واواعدج وعد ماالي علاقه بيج ابد

لمن تبرد السالفه وتنسه اطلكج

وبعدها تشوفين حياتج

هيج بكل بساطه عندك

لاوالله ابد مو بسيطه عندي

بس والله العظيم اني مو طبعي الغدر ولا طبعي العب باعراض الناس

بس جنت معمي ع وجهي بذيج الساعه

مدزت شي

كتلها وسؤالج الثاني شنو

كلتلي اريد اسالك من انتقمت مني واخذت شرفي شفكرت بوقتها

يعني حلوه بحقك تنتقم من بنيه بهاي الطريقه

المفروض اذا انت صدك رجال شهم تفكر تنتقم من اخويه ع تفكيرك الوسخ بساعتها مو تغدر بيه وادز عليه لبيتك

الصراحه ماعندي جواب الها

رجعت كتبت تدري انت لان تفكيرك وسخ ومستعد تغدر بصديقات اختك

عبالك الناس كلها مثلك

لان الظاهر من صدك كلمن يشوف الناس بعين طبعه

كتلها والله اذا اكول شي مراح تصدكيني

بعمري وحياتي ممسوي علاقه وي بنيه ولا حاجي وي  وحده

بس بنت عمي حبيتها لان نيتي صافيه وياها

وهم مقللت احترامي وياها ابد

بس اني اتخبلت من عرفتها شهد عندها علاقه وي اخوج

وانت الواسطه بيناتهم اتخبلت اكثر

فكرت انتقم منج

روان : اتخبلت من سمعت صوته اباب غرفتنه

اتوسلت يروح

فتحت الحضر واتراسلنه

طلب مني يشوفني هسه

واني صعبه عليه حيل

بعدين رحت لماما وكتلها نروح نزور

رفضت هي وبابا

بس هذا خبل شيقنعه

كوه قنعت ماما وبابا

كتلها ويانه بنات من الحمله وياهن امهاتهن

رحنه وهذا كام يضربني ويتجاوز عليه

حيل ضجت منه بس مااكدر احجي ويا لان لازمني من الايد التوجعني

رجعنه للفندق وقررت ارجع للعراق وخلص

كمت ابجي وكلت لديما راح اكل لماما وبابا اتخربطت ونرجع

ماقبلت ابد وكالت معناها نرجع سويه

اني ع واهسج اجيت شنو ترجعين

كتلها والله طلعت روحي من هاي السفره

ولا اتهنيت ولا اتونست من وره هذا الهمجي

كالت شسوالج

كتلها ضربني

ليش لازم اتجاوزتي عليه

اي دزيتله رزاله ناشفه وغلطت عليه وكتله انت كلب

ضربت ع خدها

عزه لج روان شلون هيج تسوين

شلون تتجاوزين عليه مايصير هيج هاي شبيج

منو يتحمل ينغلط عليه ويسكت

خل يولي بس يعرف كل يوم وذاب عليه شي

والله كاعد يحرجني هواي

هسه اخابر صديقه وخل يحجي ويا

لازم واحد يسويله حل

سكتت بقت تراسل

لحضات وراسلني

وطلب مني ماارجع

وكلي ابد معليه بيج

كلت اهلي هم خطيه

ثاني يوم سافرنه وكعد مقابيلي

ابد ماعليه بيه

جان وجها يضحك

راسلني وبدينه نحجي اني ويا

اول مره بدون مشاكل

حيل ضجت من كلي مرتي شريفه ومحترمه نفسها

يعني قصده اني مو زينه

بس اتفاجأت من كلي زوجتي اتوفت

جنت رافضه الزواج محبيت اخرب عائله

صحيح كلامه لازم نتزوج ع مود اهلي خطيه

ميجوز ابقى هيج

واني متاكده اذا انخطبت اهلي ميعارضون

يعني اذا كملت دراستي اول وتالي اتزوج

بس مرتضى مستحيل راح يوافقون علي

اني متاكده وواثقه

بس كلت شعليه بي خل يحاول

بعدين نمت وكعدنه الصبح

بكد ماهي حلوه الشمال بس خطره حيل

جنت لازمه كلبي وبس اقره ايات الطريق حيل طويل

بقينهلثاني يوم  العصر يله وصلنه وجان الجو حيل بارد

اخذونه لمنطقه نسيت اسمها ابعد من جالوس بهواي

بس بالجبال موقعها

بحيث الڤله بنص الغيم

دخلونه شلون المنطقه المنعزله

داير مدايرها سياج

وزعونه حسب العوائل

احنه ڤلتنه بيها 3 غرف

اهلي بغرفه وبيت خالو بغرفه واحنه بغرفه

فتحنه صوبات لان الجو ثلج ورطب حيل

گلونه متروح الرطوبه اله تفتحون صوبه

دخلنه سبحنه وارتاحينه

اجو دكوا الباب كالو الي يريد يروح يتسوك خل يجي

راح ياخذنه ابو الحمله

مجان اكو مطعم قريب يعني لازم يتسوك واحد

راحوا بس خالو وبابا احنه بقينه

اذن صلينه وخلصنه

رجعوا جايبين عشه النه من المطعم ومتسوكين

اتعشينه ونمنه من وكت لان ام الحمله كالت باجر انزلكم للبحر

كعدنه الصبح بس اهلي اتريكوا احنه لا مااشتهينه

طلعنه وجان المنضر رهيب

احنه بالجبل وانواع الزهور والورود

الحديقه جنه وجبيره

اخذنه فره اني وديما

طلعت ڤلتهم مقابيلنه معقوله صدفه لازمااصدك

طلعوا وضحك بوجهي مرتضى

سلموا علينه كلنه

رحنه للسياره

بعيد البحر علينه

وصلنه وجنه بانين امالنه اني وديما

ناوين نرسم ونكتب ع الرمل

حتى نصور

وصلنه والكل كعد سوه

الي طلب جاي والي اكل والي نزل للبحر واكو شباب دخلو سبحوا بالبحر

اني وديما ابتعدنه شويه وكمنه نصور ع راحتنه

رسمنه بالرمل وكتبنه اسماء صفحاتنه وهم صورنه

شفنه الولد نفسهم الي صعدوا ويانه بالعباره

اجوا اتجاهنه سلموا علينه

ردينه السلام وباللحضه رجعنه

لاگونه مرتضى واحمد والعيون حمر

رحنه كعدنه يم اهلي

اجه مسج هم ضوجوجن

لا بس سلمو احنه ابتعدنه

لاتنزلين للبحر ابد

لان مو حلوه بحقجن من ملابسجن ينترسن مي والملابس تلزك بالجسم

هو اصلا مننزل بدون متكول متشوفنه كعدنه

البنات الويانه لعبن طوبه  نزلن للبحر لنص جسمهن فعلا منظرهن مو حلو ومو لائق

اني وديما الوحيدين منزلنه البحر ابد

حسيت عيون الكل علينه

مااعرف هل مستهزئين بينه او غير شي

مهتمينه

كالت ام الحمله اكو مطعم قريب الي يحب ياكل خل يروح

دلونه بي وكتبت النه الاكل بالعجمي بالموبايل وكالت انطوهم الهم وهمه راح ينطوكم الاكل رحنه

الشمال ميحجون ولا حرف عربي ابد

انطيناهم الجهاز وفعلا جابولنه الاكل

وره لحضات اجوي مرتضى واحمد ووياهم بعد اثنين

كعدوا مقابيلنه احمد ومرتضى

بدت الناس هم تجي

عينه عليه ابد منزلها

حتى ارتبكت كوه اكلت

بعدها رجعنه ومررونه باسواق

اشترينه حاجياتنه

رجعنه العصر وقت متاخر للفله

سبحنه وسوينه عشه

طلبنه منهم ياخذونه للمحلات نشوف شكو ماكو

كالوا تعبانين مانكدر

باجر العيد كلنه خل انام ونسكت

رحنه كلمن لغرفته

شفت ديما تراسل وتضحك

كتلها خيرج شبيج تضحكين

كالت هذا احمد يكول والله الصراحه بس انتن الوحيدات العجبتنه بالحمله

كل وحده جنها ثور وداخله للبحر ويلعبن بالمي

هاي من كل عقلهن

يكول لو داخلات جان سحلناجن اني ومرتضى

وره شويه كالت يسالني هم اطلعون

كتله لا

كال ديرن بالجن لطلعن بوحدجن خطره هنا

كتلها صدك تخوف وعبالك مكطوعه المنطقه

خليتها تراسل وردت انام

اجاني مسج من مرتضى

هلو

مجاوبت

عفيه لطلعن بوحدجن ابد والنبي خطره

هم مجاوبت

ياعيني ليش متجاوبين

هم غلست

نمت كعدنه تقريبا ب8 موعد البرنامج مالتنه ب9

لكيت مسج فتحته

بي تهنئه من مرتضى ع مود العيد

جان اول شخص يهنيني

هم غلست

رحنه لاهلنه لكيناهم متريكين ومبدلين

هنيناهم كلهم

وانطونه عيديتنه مثل ممتعودين

رحنه بدلنه

ضحكت ديما

كالت هم مرتضى هنأج بالعيد

ليش

كالت احمد هم دزلي ويكلي خطيه مرتضى بنت عمتج متجاوبه

كتله راح اتجنبه ومعليه بي

لبست مااعرف هم راح ينزعج لو عادي

اتجمعنه والحلو واحد يسلم ع الثاني وواحد يهني بالثاني

هالمره سلمنه ع البنات والنسوان كلهن لان ماما وخاله كالت عيب

الشباب هم سلموا ع النسوان وع الرياجيل الكبار

هالمره مرتضى يضحك بوجهي

مااعرف ليش فرحت همزين يعني قابل ع لبسي

صعدنه بالسياره

دزلي مسج

شعجب هالمره معاندتيني ولبستي حصر

مجاوبت

لج بابا ليش متجاوبين

عفته

نزلونه بالطريق اكو محلات كلش حلوه فرينه واشترينه

بعدها اخذونه لمدينة العاب صايره بالجبل نعكب الغيم تجنن ولا بالاحلام

وين منصعد الزوج ويانه يصعدون

اخر شي تعبنه

رجعنه يم ماما وخاله

هالمره غير حلوه وبدون مضايقات

اجواء العيد حلوه

بعدها اتغدينه ابمطعم ورجعونه للبحر

حسب طلب الاغلبيه

اني وديما اكتفينه بس بالمشاهده

محبينه ننزل البحر ابد

بعدين سالنه ام الحمله ع موعد رجوعنه

انطتنه الوقت

عفناهم ورحنه نفتر بالمحلات القريبه

مجانت اكو مولات قريبه

بس سوبر ماركت وفواكه ومكسرات

اشترينه ورجعنه

كال بابا خل نكعد بالسياره لان تعبوا

فعلا كعدنه

دزلي مسج انتوا وين

مجاوبت

رجع احمد سال ديما

كلتله بالسياره

لحضات واجوا

صعدوا يمنه

كل شويه وكلي جاوبي

لج شلعتي كلبي جاوبي خل نتواصل عفيه

خليت راسي ع السياره وسويت نفسي نمت

بدت الناس تجي للسياره

رجعنه للبيت هالمره من وقت

من نزلنه من السياره

كلنه لاهلنه راح نفتر بالمنطقه هاي

هي هاي المنطقه الي ساكنين بيها مو جبيره وبيها حدائق وورود

بس امان ومو مالت واحد يتيه ومسيجه

بدينه نفتر وجانت جنه

احنه بالجبال الغيم يمشي ويانه

بقينه ناخذ صور

منحس اله احمد ومرتضى فوك راسنه

كلت لديما اخاف احد يشوفنه وتصير سالفه

احنه جنه كاعدين يم الورد وناخذ صور

كعدوا يمنه

سلمو وهنونه ع مود العيد

جاوبناهم

يله ديما خل نرجع

لا وين ترجعون بعد وقت

خل نبقى شويه وارجعوا

لااخاف احد يشوفنه

لتخافين محد يجي لهنا

وحتى اذا اجو ممسوين شي غلط

ليش متجاوبين

ماعندي شي اجاوبك عليه

هم اطلعن بالليل

ماادري يجوز نطلع

يكولون كلها سكاره وهذا بار قريب ع السكن ديرن بالجن لطلعن بوحدجن بالليل

ان شاء الله

يله ديما خل ندخل

بعد وكت وين

لا ندخل بالفله احسن

رحنه سوينه عشه من وكت اني وديما

وسالنه ماما وخاله

كالن وره العشه نروح

بس خل نشوف شكم وحده تروح ويانه لان منندل

راحن سويه ماما وخاله مااعرف وين

صلينه وبدلنه وكملنه

اجن كالن راح نروح احنه وعوائل 3 ويانه

ماما هم اكو رجال ويانه

لا ماعدهن رجال نروح وحدنه

اوك

صار الموعد وطلعنه

من ضمن العوائل ذني المو راحه

بس معلينه بيهن

مشينه مسافة ربع ساعه او اكثر بعيد عنه

الصراحه خفنه وكل شويه تمر سياره سكاره

كالن خل نرجع احسن

بس قسم عارضن وكالن ماعلينه

ملكينه سياره

وصلنه للشارع الرئيس

احنه تقريبا 15 وحده

كلنه لو ناخذ كيه ونرهم شلون مجان

لو ناشر شكم تكسي

بعدين اجتنه كيه صعدنه بيها وكوه كفت

كتبنه بالمترجم للسايق

كناله مولات ملابس

اتفق ويانه هم يرجعنه فرح

وصلنه لشارع كله مولات يجنن

لكينه محل يبيع ورود طبيعيه تجنن

يسويها بشكل باقه بس احنه لازم نختار نوع الورد

ردنه ناخذ اني وديما مقبلت ماما وخاله

كالت منا لباجر يذبل الورد ميفيدجن

فعلا صدك

دخلنه لمولات هواي وعجبنه ملابس اشترينه

الملابس بالشمال غير جمال

نمشي سويه منتفارك لان نخاف

اكو مثلجات قريبه علينه

رحنه اكلنه وخلصنه

كالوا اكو سوبر ماركت فوك كلشي بي وحتى مكياج وعطور

صاير فوك نصعد بالمصعد لازم

النسوان الكبار كالن منصعد هنا نبقى ننتظرجن

ماما وخاله همين بقن

صعدنه جان يجنن واشكال بي

هواي عجبنه اشياء اني وديما

البنات الويانه همين

بس ذني ابد مو راحه بس يضحكن

السوبر ماركت بي موضفات وموضفين شباب

بدينا نختار ان وديما هواي اشياء

وكل شويه نتصل بماما وخاله ونسالهن عن اشياء وهنه يكولن اي

اكثر شي احنه اشترينه

وصلنه للمكياج وبدينه نختار

سالتهم عن عطر زغير بس يجنن عطره

كلي بوقتها ب40 تومان عجبني حيل

التمن البنات كلهن وبدينه نختار كل وحده اخذت 4 منه بالذات لان عطره يجنن

كاموا يضحكون علينه مستهزئين

كالو سعرهن ب80 تومان

من شافونه اخذنه هواي

ضجنه بوقتها

بقوا يضحكون وياشرون الموضفين والموضفات

بما معناه مشوهات واحد ياشر عن الثاني

حيل ضجنه بس سكتنه لان منعرف لغتهم

البنات تحاسبن ونزلن

بقينه اني وديما ووحده من ذني المو راحه

بده يحسب الي

يحسبون  ويضحكون

هواي ضحكوا واني متاكده علينه

كامو يزودون بالاسعار هواي

همه عدهم لافتات للاسعار

ثار انتباهي اكو اقلام حمره يمي مكتوب سعرهن

من حسبوهن زودوا بالسعر

كملت طلع السعر خيالي حيل مزودين

كلت لديما لج شنو هاي كلهن مو نفس الاسعار زودوهن

كالت اي لاحظتهم

كالت خل نرجعهن

ذوله كاعد يضحكون علينه

رجعناهن

بس المشكله ليفتهمونه ولا نفتهمهم

كامو ياشرون شنو

كمنه نطلع بيهن ونرجعهن

هم اتخبلوا

كامو يصيحون ني ني يعني لا

احنه كمنه نحجي ونغلط وهمه كذلك

بس اكيد محد يفتهم ع الثاني

اني الضوجني يضحكون علينه

كلت هو احنه مابينه خير ونجيهم ونشتري منهم

هم لوما العراق جان حال الظيم حالهم

ردنه  ننزل لزموا الطريق علينه منعونه

الصراحه حيل خفنه لان المول بطابق ثاني ماادري ثالث

ومابي بس احنه وهمه بيهم 4 بنات و5 شباب

كامو ياشرون رجعن كلمن لمكانها

احنه رفضنه

وكفوا كانو سيطره

كالت ديما خل نخابر بوليس

همه سبقونه واتصلوا بالامن مااعرف بالشرطه صدك

هاي البنيه اتصلت مااعرف بيمن

لحضات وجان يجون شباب اثنين ذوله الي يمشون وي مرتضى واحمد

واجه وياهم امن

الولد اجو وعيونهم نار

سالونه شسوولجن اذوجن لا

كناله لا بس حجي

البنيه حجت وياهم وفهمتهم

كالتهم يضحكون علينه وكانو يكولون مشوهات

مااعرف شلون اجوا ومااعرف مرتضى واحمد وياهم لا

اكيد هسه يسولنه سالفه شكبرها

اجوي الامن وبدوا يترجمون الهم بالقاموس بجهازهم

همه يقرون وذوله يحجون همين

كلمن كام يترجم بجهازه

كالوا احنه هيج نضحك مو يمهن

وهنه اشترن هواي اشياء

كنالهم كاتبين شكل وحسبونه شكل

كلولهم هسه بطلنه منريد الغراض

همه اتعصبوا كالوا رجعوهن نفس ماهنه

واحد منهم لزم العلاليك وطشرهن بالكاع

كللهم راح اخابر البوليس وهمه يتصرفون

حيل خافوا

كاموا يحجون ويانه

هم  حيل يخافون من الشرطه

وهمه الظاهر مستغليجن

اشروا روحوا

حسينه بنصر عليهم كمنه نضحك ونزلنه

بس بالحقيقه ميتين خوف

كتلهم الله يخليكم لحد يحجي كدام ماما وخاله

انتن شمطلعجن وحدجن بدون رجال

كالت البنيه هواي احنه جايين وجنه صاعدين سويه

نزلنه لجوه ولكينه الجو محترك حرك علينه

وجان اتفاجئ .........

توقعاتكم حبايبي بشنو اتفاجأت روان ؟؟؟؟

هم راح تصير مشكله لروان لو لا ؟؟؟؟

احمد راح يعرف بلي صار لو لا ؟؟؟؟

لتنسون التصويت حبايب كلبي 🥰🥰🥰

تحياتي للجميع 😘😘😘

لمره الثانيه انبه اذا شفت تصويت ماكو راح

اوقف القصه لان متشجعون ابد