رواية النوك الحمر الفصل الخامس 5 - بقلم مريم السعدي

يس- عفتهم لان مللو مني كامو ميدزون عليه. لعبت نفسي من البيت ردت اشتغل وانام واكعد بس اريد العطله تخلص حتى اداوم كليه وفعلا لكيت شغله. مكوي وننه تخبلت
شون ووين وشمدريني الولد بي خير مابي خير

لج يمه خليني اطلع دااحس روحي بعد جم يوم احبل

خربت ضحك وبقت تباوع بوجهي شافتني عصبي مدااضحك كالت
اخاف عليك يمه وداعتك ماعدي غيرك

لتخافين ننه هو كله الدوام ب٧ المغرب اني يمج

خوش
وفعلا داومت وابدعت باخلاقي كلها كامت تحلف وانعرفت بالسوك كلها كامت تصيح ياسين الاشيكر. ولانني خدوم مارد احد كهربائيات اعرفها الله يرحمه عمي علي بوكتها علمني بواري شد دكسن كلشي تعلمت عليه كلسا صايحين عليه
فدوه بس شوي سوي هالواير فده بس هاي الجوزه طكت بله زحمه بلكن تسويلنا البوري
وعلى هالرنه

مجنت اكول لا ابد وبيهم الينطيني علاوه وبيهم اليكتفي برحمه على ذاك الاب الطيب وبيهم اللي حتى اخجل اخذ منه لان الحاله صعبه حصار والناس ميته جوع وكامت كل فتره يدزون صواني اكل للبيت عالخدمه السويتها لو فاكهه وننه تتخبل
ليش ديدزون شنو قابل جواعه وافهمها تبقى صافنه بوجهي وتردد
نعم التربايه ياروح امك انت

جنت كلما اكبر كلما احس روحي احتاجها اكثر استغل اي فرصه احضنها بيها وهي حبيبتي متقصر تلمني جنت دوم افكر لو عايشه امي هل راح احبها بكد ماحب ننه هل راح اخاف عليها بمد ى. خوفي عله ننه كل همي هي وشاشتغل افكر شنو اجيبلها بي وهي تتخبل لتصرف اجمع لجامعتك. وفعلا لزمت ايدي بهالفتره ورجعت كونت شله ثانيه من شباب السوك هالمره ناس ثكال اصحاب محلات صاغه . بيهم وبيهم اصحاب مكاتب صيرفه جنت اسويلهم خدمه لو اصلح قفل باب لو بوري طاك لو اعدل رصيف محفر وكذا وكمت اتقصد مااتقاضى اجر اتذكر كلام عمي علي الله يرحمه

اشتري عالم باخلاقك يوكفولك بعازتك

كل خوفي لا تفرني الدنيا واعتاز احد وداومت جامعه وبدت حياتي الجديده ناس من كل مكان محافضات من كل العراق مجموعين بفد جامعه تعرفت تقريبا على نص الجامعه الفقير والغني صاحب السياره واللي جاي من البصره كاعد بحرم الطلاب دراستي تفوقت بيها وبت خالتي مااجتي بعد. لان سادس واني مدرسها بالعطله فاكتفت بس بقت زيارات خالتي على طول كمت احب شوفتها كامت من تجي اضل كاعد يمهم ساعه اكثر من تحجي اتخيل شكل والدتي هيج جانت تحجي هيج جانت لهجتها هيج جان شكلها وهي تباوعلي وتبتسم. وانتبه على روحي كملت اول وثاني وثالث واني متفوق ومصادف فد يوم وحده جذبت نضري رغم كومه ذبو روحهم بس اني مااهتم وفجاه صادفت شاب وتعرفت عليه جان من السماوه من حي الحسين تحديدا. صادقته حيل حبيته بسيططط للاخير وفطير واعي وفاهم كان سنه ثالثه هندسه كيميائيه. طبتي وطلعتي صارت وياه راعي صلاه وصيام وزيارات وجلبت بي وين ميروح اروح وياه عرفته على ننه وكيفت بي بس جان يصدمني بس بالامتحانات يداوم. ويرجع يداوم وراها ينقطع

وسالته

يمعود وينك شو انت تغب تغب وترد تضهر

والله يس شسوي اوكف خل اشوف الحك لروحي خاف انفصل

روح داانتضر شوف هنا قااسم

اي اي راجعلك تانيني

اتانيك ليش ماتانيك اتانيك اتانيك اذوب على الدرب شمعه.

شوي ورجعلي واني ادندن ضحك يفر بيده كال

طاك وتغني شنو سالوفتك

شتاقيتلك والله طكت روحي

موبيدي الضروف قست
يحجي ويطبك  الورقه ويهز راسه متحسف
شنو السالفه احجيلي

يول فلوس اجار الغرفه ماعدي فد نوب وشللت وامي مريضه فلوسي خلصت عال الدكتور والعلاج

بقيت صافن عليه وهسه شحتسوي
رايح راد لاهلي شسوي
وكليتك معود هاي سنه ثالث انت
شسوي يابه بيدي شي ماسويته
اهلك عدهم فلوس
تفاعد ابويه كوه وي خواتي اجي اخذ منه للجامعه ماترهم. يله اشوفك بخير اخويه انت الله يشهد
بقيت صافن يبوس بيه ديودعني واني كلبي انعصر لزمته من ايده
اوكف اوكف تعال اكلتني حاصل فاصل

شنو شبيك ههه جا ماتصدك بيه
اوكف دمشي للبيت نتفاهم نتغده
لالا يابه داروح مالحك عالكراج

ياكراج ابقى اليوم باچر روح
وين ابقى باع هاذ لك يابه ماعدي اجدد اجار هالشهر
اوكف ويايه بروح ابوك

استغفر الله لاتحلف يول خلني اولي بروحي طايح من روحي روح غادي لاتعورض براي طريق
استغفر الله الله عليك ارجع ويايه تغده وروح ولو اخر مره   صفن جر نفس
دمشي اخابر من عدكم على امي
ديله رجعت وياه لبيتنا وننه خطيه صبت الاكل مكيفه بي وصار الحجي بقت ننه صافنه مقهوره وهو مسويها عادي بس اني اعرفه ميت قهر بس راد يتخرج ويتعين بسامرا معمل الدوه وي خواله مرهمت وامي جرتني اشرتلي اخذتني على صفحه

ها ننه شبيج.

يمه ليش ميبقه عدنا شو لاعدي احد لا بنيه وانت وياه ترحون وتجون والمصرف هالنكدر عليه جدريه شوي نكبرها والرزق على الله ويبات هنا بالصاله بغرفتك

بقيت صافن ابتسمت اي ننه والله خطيه

رجعت يمه وفتحت الموضوع وهو ميقبل اتوسلت بي وطلعت ننه حاجته وهو قافل ميقبل لحد ماكالتله

يمه اني رايدتك وي يس ماعدي غيره. بس كمل هالسنه وروح حرام عليك امك تحس بتانيب الضمير من وراك كمل واوصل عينهم لاهلك

صفن منصي راسه ورفعه باوع بعيني كال

جميلك ماراح انساه يسوني

معود اني المكيف بيك بس اقبل
لعد اني اتسوك وياكم نتقاسم بالمسواك
سهله عود سهله
خليت ايدي على كتفه مكيف وفعلا انتقل بغراضه يمي وكال لامه امه بقت متخوفه لحد مافد مره اجتي لبغداد وجتي لبيتنا ومحمله كومه شغلات طرشي ودبس ولافه دولمه وكبب كومه والاكل يخبل وتطمنت من تعرفت على ننه وراحت وكملت وياه سوه سوه طبتنا وطلعتنا عرفت عنه كلشي جان ابد ميحجي بخواته. بس بوكتها عرفت انه عرس وحده من خواته وراح ورد رجع عرفت عده خمس خوات وماعرف اعمارهن ميحجي بيهن ابد والده متوفي من صغره متكهرب وعايشين عالتقاعد مالته وهم يطبخون ويخيطون اهله. وهو الوحيد لاهله وخواله بسامراء يشتغلون بمعمل الادويه والباقي كل معرفتي بي عن الجامعه ودراستها. جان يطب ويطلع من باب الصاله وبالصاله حمام ابد ميقبل يطب للهول لو لغرفتي وخطيه ننه تغسل هدومه وتكويها وتعلكها. هو يتخبل ليش تتعبها كام يتسوك ويايه تعلمت عليه حيل وتعلقت بي وهو هم لحد ماتخرجنا روحتنا  وجيتنا سوه طلعت روحنا لحد ماتخرجنا وصار وكت الوداع تاذيت حيل وهو صلب ممتاثر مبتسم يحضن بيه ويكول
يولل اثكل ولك ماعايفك كل سبوع امر للولايه

واني ابجي من كل عقلي حتى ننه بجت راح وعافني كلشي بالغرفه يخنك حتى تخرجي مفرحان بي. محسيت روحي فرحان كد ما مخنوك بفراكه. من يومها وامي بدت تلح عليه بموضوع الزواج
لج يوم شتزوج واني مكرطف غرفه ماعدي فلوسها

يمه بت خالتك موجوده تتحمل وتحبك
هم رجعت على دعاء غير مستجاب لج يوم مااهضمها

ولك صار كم سنه ابتسامات وضحك
اييي صح وياج اني وياج بس مادري والله يمه مادري دخت اني مااحس روحي جاهز

لا تخرج  وتخرجت شمنتضر. بعد ارجع لشغلك للمكوى وخليها على الله واني وياك. هم بالمصرف
اباوعلها وجهه بدت علامات الكبر بي وصلت الاربعين حبيبتي كون يوكف عمرها ومايكبر باوعت بعيني ابتسمت كالت
يمه اني تعبت اريد وحده تعاونني بالبيت

ننه اني وياج فدوه اساعدج شيلي هالسالفه من راسج لتجلبيلي وتورطيني

ازعل عليك وماحاجيك
بقيت صافن عليها مهتميت كلت يومين وتفك ---
٣ ايام ومفكت واني بده النفس يضيق عدي بليل مااكدر. انام شتاقيت احاجيها. اضحك وياها. اصدقاء ماعدي  وره مسافر صاحبي كم مره اتصل وبعدها انكطع  فتره وبدت المشاحنات بيني وبين امي عرفت بت خالتي هالسنه ثالث  وامي مستمره بالنكوىصلت لحد هدومي متغسلها على انه مابيه حيل تزوج وخل مرتك تغسلهن وكمت اني اغسلهن وجهه ثكيل واني كلبي فرفح  اخر شي صيحت عليها ولاول مره

يوووم اهج من البيت وبعد متلكيني والله هيج كارهتني  لتجلبيلي بسالفه دعاء البنيه حتى ممتخرجه

ها يعني من تتخرج نمشيلك عليها لك يمه مدام قابله بوضعنا
وعننها مقبلت يمه لتلحين بروح عمو علي تعبتيني
اني التعبببت اريد ويايه احد يعينني
مو كتلج اني اصيرلج عشر نسوان ورجال بس شيلي سالفه دعاء. من راسج
ابد انت لازم تتاهل جوارينه اصغر منك زوجو

لا حول ولا قوه الا بالله
جريت نفس مايس عرفت ميفيد الحجي. سكتت كتلها
يمه التردي سوي
انت ليش تكرهه
ومن. كالج كارهه معودهه بنيه عاديه   وحلوه بس مابيه حيل زواج والله ياهو الاشوفه متزوج مشلوع كلبه
لاماما هاي بسيطه مثلنا وضعها واني اخاف عليك من السوك اشكال الوان شباب خاف يحرفوك حتى تبقى لبيتك باجر  يصير عدك طفل تشوف الدنيا بعيونه شون مااني اشوف الدنيا بيك حببيبي

صار ننه التردي يصير بس خل اتعين
هاهي ماافتح الموضوع حدما تتعين
اي والله هاي هي اتزوج بعد شعدي

فدوه لكلبك الله يفرحك نفس مفرحتني اروح اسويلك تشريب ابيض يلزم كلبك
هااا ههههه هيج صارت الله لايحرمني منج يا اطيب كلب لج اني شعدي غيرج انتي امي وابويه واختي واخويه وكل حياتي ماريد غير وحده تاخذني منج
اني اريد افرح بيك اريد جهال يترسولي البيت

الله يسهل ننه دكوم سوي اكل مو متت جوع

تعال ساعدني

ومشت الايام. والراتب مال تقاعد انكطع ومكلت لننه خاف يضل بالها كمت اشتغل اي شغله حتى عربانه ادفع  عماله كمت اطلع ياهو الجاب شغله ركضت بيها السوك علمني عالشغل السريع النضيف كامو يسموني هبه ريح وبيوم من الايام دااشتغل  بالكهرباء بعماره من عماير سوكنا طابق ارضي جوه الكاع نزله درج ومسوين محلات جديده. وداشدلها كهرباء وي ولد صاحبي دااشتغل ونزل ابو العماره صاحبها ضل يتفرج على طريقه شددي للكهرباء والترتيب مال كابينه سالني ولاني ماعرفه صاحب العماره جاوبت باختصار

هاي شغلك

اي شدتشوف يعني

انت شنو تحصيلك الدراسي
خريج نفط رفعت راسي باوعتله
انت منين

هنا من المنطقه

مشايفك

ولا اني الشايفك شنو يسموك

يس الاشيكر

هاذ انت هبه ريح

اي بالضبط ههه
بعدك ممتعين

لا والله صار اربع سنين مطالع تعييني

زين اذا عينتك  شكد الي علاوه
باوعتله كبست الكابينه  بالحايط ابتسمت واني اباوعلها فتحتها وسديتها واني ساكت اتاكد من طبكتها المضبوطه وباوعتله

ولا فلس وعفته وصعدت فوك دااحجي وي الولد اللي دز عليه اسويله الكهرباء وصعد ابو العماره الولد كال
معرفته صاحب العماره
فكيت عيني اعتذرت منه
يابه الميعرفك يجهلك

لا عمي انت محترم على شنو تعتذر بس علمودك اني احسن مدايخ بالسوك تتعين يصيرلك راتب

جريت نفس شكد تريد

كال

راتب شهرين وبعدها  الله وياك
وششتغل ومنين اعيش
ابقى وره الشغل بالسوك شون هسه لحد ما تكمل الشهرين ووراها التزم وارتاح من السوك

هزيت راسي اوك
جيب اوراقك باجر استنساخ كلشي بطاقه تمونيه هويات جناسي صور سته

اوك
ياسنه متخرج

سنه____
ماشي الوياك تعينو
والله ماعدي اخبار عنهم

هاهي توكل بالله

ماشي وفعلا ثاني يوم جبت اوراقي سالت عليه كالو عده معارف بديوان الرئاسه بذاك الوكت  وشهر وتعينت من اجه خبر تعييني ردت اموت من الفرح بت خالتي تخرجت كمت ماشوفها لخالتي من تجي لان من الصبح لليل بالسوك حتى اكدر ادبر العيشه ولنص الشهر موشل فلوس وخياط ننه ويايه ساندني شكد حاولت ارجع التقاعد ماكو  راح  بس من سمعت بالتعيين روحي وردت تعينت وارحع من الشغل اكرب بالسوك شهرين طيته الراتب واخيرا خلصت واستقريت وبديت اشتغل براتبي اعيش براحه

نوعا ما. مرتب محترم الويايه كلهم محترمين حسيت بتقدير لشهادتي ودراستي وتعبي مضاع ورحعت امي تنك على سالفه دعاء وحسيت روحي فعلا بعد اريد اتزوج  وتقدمنا وخالتي فرحت حيل كالت كلشي ماريد منك اخذها بعبايتها  بس امي جهرت الجهاز بيدها الخياط واخذت غرفه امي  صاج مستعمل جددتها هالاكدر عليه  طلعت جديده هاي كلها كعده وي بت خالتي مكاعد ابوها ميقبل الا وره العقد. ذهب من ننه كلاده نازكه وحلقتها جنت توني فاك عيني مااكدر اجهز اي شي يله الراتب مكفي مصرف البيت. مدري شون جهزت ننه

وعقدت. وكعدنا وحدنا جانت هادئه وعيونها تاكلني ومجنت اكدر اضم ابتسامتي من تباوعلي  حجينا حجي بسيط  جنت خجلان حيل منها  وهي اجرا مني حبيت جراتها الخلتني اخذ راحتي بالكلام

شونك بالشغل

زين لله الحمد

زين هم امو موضفات
اي طبعا اكو
اتمنى اتعين اني هم

بقيت صافن عليها مبتسم كالت
حتى نتساعد

الله يسهل انتي قدمتي
اي كومه بس بعد مطالع
بهالفتره الداومت بيها بتعييني الحديث  بوزاره النفط هم كومه صارت عدي معارف لان اركض للكل ماكول لا ابد  كتلها

هسه اشوف ولد صاحبي بلكن يعينج بس ماواعدج

اي حباب حتى اروح واجي وياك
ميهم بس ردت اكولج شي
نعم

تره زواجنا حيكون بعد شهرين
اي عادي

يعني ماعدج اعتراض
لالا ابد
زين وواني تره على كد حالي خاف اقصر وياج بشي
لالا اني هم مو متطلبه

اوك جريت نفس باوعتلها مبتسم ووببالي هواي شغلات اسويها وياها بدايه حياه اريد ابديها بدون نقص بحياتي المليانه نقوصات ولزكتها ننه الي حتى ماحس بنقص

كالت
ليش هيج تباوعلي

تدرين داانتضر يوم يوم نتزوج ويصير عدي عائله مثل الناس كامله مابيها نقص
انشاء الله ااني من اول كلش احترمك لانك محترم

هه شكرا -------