ياسين- رجعت نمت والريحه علمت بانفاسي من اتنفس تنترس حنه وهيل غمضت اريد انام وفرح ترفرف بعقلي. اتخيلها تفتر بفرح بالبستان شنو عدي وانطيها بعد صفيت علحديده.
ياعمر ابوج انتي وفرحته الحقيره جابرتها اثاري واني اكول معقوله حناني وحبي الها ماغزر متذكرتلي. فد ذكرى حلوه
اعوذ بالله من الشيطان الرجيم. كمت حتى النومه طارت افتريت عالمنضومه جان الضوه توه يطلع
الجو يخبل بينت معالم البستان النظافه والتنضيم والترتيب والبط يمشي برهاوه. مجاميع مجاميع. افتر وايدي وره ضهري وصوت الديج من يصيح يعلن صباح جديد صباح بامل
اخخخ بابا فروحه شون حتكون رده فعلج عالعيشه هنا حتككون. نفس من جنتي صغيره لوو. متعجبج. بس كون اشوف وجهج شون صايره حبيبتي
بقيت افتر بهدوء شفت النوك بالحضيره محلوبات توهن والحليب مرتب بالمعمل محضر لشغل المكاين ماعدي شي بلشت شغلت المكاين وبديت. طلعت الجبن لفيته وحضرته للبيع رتبته بالبيكب مال ابو عوف وحدي يمكن الولد ابن خالته. يودي للاسواق اليوم
طلعت دهن الحر والزبد وترست البيكب ومسحت بيدي كاع المعمل بطريقه لف الوصله عالماسحه النضافه اهم دور بمعمل الالبان مكرع راسهم بيها. عفن اللبن يروب وطلعت افتر مادري شوكت يرجع السيد يمكن يكمل الفاتحه يله
شاهينه واكف على خوص السياج مال بيتي يفر براسه والبركع مشيول صوت ورايه سمعته
الله بالخير عمي ياسين
التفتت واحد من الفلح
هله يابه صباح الخير
هله عمي تفضال ويانا تريك
باوعت للصينيه الشايلها كلاصين جاي وجبن عرب وخبزه تنور وخضره. وبيض مسلوك راس بصل ابتسمت بالعافيه يابه
لالا مايصير هسه ابوي يكلبها سوده علي امشينا عمي امشينا
مشيت وراه بهدوء لكيت الاب كاعد عالساكيه وكعدت بصفه ابتسم وجر المخده وره ضهري وبدينا ناكل
كال
البارحه مالحكت عالسيد
طلع من الصبح خطيه مستعجل كال خالي توفى
عمي مافهمنا نحوشهن كلهن لو نخلي التمر ابو السكري حتى ابو عوف مالحكت علي
هسه شوي واخابره خاف نايم واخرعه
جا خوش انه. بنهايه البستان حوشي عمي بله امر عليك بس عودك كلي
انت بيتك هنا
اي انه بنها يه البستان حوشي ضهره على بستانكم بيت صقيرون بس انه ولاهل ولدي زوجتهم وكلمن اخظ هله وراحو اللي توضف واللي اشتقل بشغله حره وهاي انه روحي بين النخل والطين
الله. يعزك عمي اباوعله ب٦٠ من عمره بس والله الله يحفضه اقوه مني ابيض احمر ولاف عكاله بترتيب والدشداشه تلمع كال
هذا الولد ابن اخوي الشهيد استشهد بالحرب وهو توه جاي للدنيا الحمد لله وصارلي ونس وهسا كبر وصار رجال مدوزن
الله يخلي لالا سبع شسمك باشا
اسمي محيسن
عاشت الاسمامي محيسن وعليك. اسمك
زاد مكدارك عمي
عمه كال
وانه محسوبك ابو محمد انت ماتذب جرش وي الناس اشوفك
يس- اي طبيعتي مااحجي هواي
عمي الناس لاهلها همك تاكله ببحيدك
بقيت صافن عليه مبتسم نصيت
انت من الولايه كالو
اي من بغداد
اي شلونها بغداد يكلون الوضع الامني ما زين
هه شفتك وماشفتها ابو محمد
اي بالله عساك مريح هنايا
اي كلش الحمد لله
الله يديمك عزوه وسند لسيد عبد الله انه من سالت كالو عنك نسيبه
اي بالظبط
ينيالك بيهم من نسبان عمي اشرف نسسب اشر بايده
نصيت راسي مبتسم ادري بيهم محضوظ بيهم اني
اي بالله حضيضان يله عمي نكوم على شقلنا ونسولف
يله كول يا الله
عفته وكمت لشغلي وكمت اعرف اسم واحد واحد بيهم محيسن سبع حيل ميخاف يجيت بس اصيح تعال منو اكو هنا علمود الحصاد لو علمودنخله سعفته نازله كمز كدامي وصعد عدلها شجرها ونزل
صار بس اكوله على شغله فز سواها وصار اسم محيسن بحلكي كلسا صايحه تورط الولد بس هم اداري فوك اجره
كمل يومين بالبستان واني بس بليل ابو عوف. يسويلي درب افوت لامي متلهف اشوفها لان النهار كله مو يمها
ها ننه حبيبتي
هله امي ها حبيبي شسويت اليوم
هو شغل عادي انتي شونجج
زينه الحمد لله
خو ما عينج نزفت بعد
جرت نفس كالت
يمه يس هو. اني داموت تصالح وي روحك لتضل شبيج وشبيج واموت بعدج ماموت كافي من هالحجي
بقيت صافن تقربت منها يوم شبيج
اهووووو شبيج وشبيج يعني متدري شبيه هو داموت لتضل تموت بنفسك انت رجال عيب يمه هو داموت اني يعني شبيه
يمه فدوه لتكولين هيج
هم كال لتكولين هيج. شوف اكولك تلزم خوفك وتامن بربك وهذا امر الله ويا محلاه عيب يمه صير رجاللل ضم حزنك بكلبك مو عيب ام عوف تكول اجاج ابو كلب الرهييف
بقيت صافن عليها
والقران ياياسين ان متت وكعدت تتبجبح عليه حتى روحي مترضه عليك
هزيت راسي منصدم
اررريدك قوي وتامن بربك
خاف يوكف كلبي واموت وراج فرح منو الها
لااا يوكف كلبك ولاابد جان متت وره عمك علي لو ابويه. بس عادي مضت كم يوم وتصبرت بيك وبرب العالمين الزم بنتك يمه ودير بالك عليهااا. لتضل كلسا ها شبيج ها شنوو هو. اني دااموت مزين من حالتي بقيت لخد الان مميته لو ماهالهو اء النضيف. لتخليهم يكولون عليك مثل النسوان يبجي عيييب كلشوي واريد اشوف امي ومااكدر بلياها ومااكدر ابات ادري شنو شبيك مو وياك الزلم هنا شوفهم شوونهم
صافن عليها تحجي بعصبيه ادري الالم كاتلها واني اعرفها من تعصب شي فاق الحد كمت جبت الدوه المسكن وكلاص المي قربته الها
شنو هذا
دواج همست اخذته بلهفه وشربته وايدها ترجف لزمتها وبستها جرت راسي لحضنها بسرعه وحضنتني
ربي لا اعتراض لحكمك بس نضره لوليدي وبنته
غمضت عيني بشده كلت بداخلي يكون اجر المج كله واشوفج الرجال الميتحمل شيتحمل
شوي شوي هدات وتمددت دانام يمها نترت
كوم من يمي لتضل مجلب بيه ماارتاح شنو رجال جتافك هالعرضهن تنام يم امك
كمت مصدوم من يمها نمت بالكع بصف الجربايه وغفيت الصبح حسيت جانت كاعده اني مكتلها على سالفه فرح خاف متصير ولهفتها تروح ردت افاجائها. المقرر اليوم اروح كعدت ب٦ الصبح بست راسها كالت
رايح على باب الله
اي يمه ليضل بالج اذا تاخرت
الله يسهل دروح يمه ماوصيك بعد روح دتجي ام عوف
ماشي رجعت بستها وحضنتها بس محضنتني تركت البيت وطلعت بدلت هدومي بالمضيف وطلعت عالشارع مكمل كل شغلي البارحه خلصو حصران الخوص بدلت حصران البستان كلها الماكوله سياج البيتين الحبير والصغير سيجته من جديد بعدما حصرانه تعبت ولونها تغير وحصران الكعده عالساكيه هم بدلتها افتر بالبستان احسه جديد حتى الطين يلمع قهري مطلعه بالبستان واني محاس على روحي حتى الاشجار مقلمها اكو شجره رمان بحديقه بيتي مورده ورد احمر تجنن قلمتهن كلهن بترتيب اللبارحه. حتى شغل المعمل خميته قبل لااطلع وطلعت اخذت فلوس وتوجهت لبغداد وصلت لبغداد ب١١ الصبح لبيت عرفان اللي تلكاني بالاحضان واني جنت متسوك مخضر وفاكهه ولحم كومه من السماوه حتى جبن ودهن حر هم جبت خطيه ضل فشلان ليش هلكد وليش هلكد
يول بس انت الوكفت ويايه
عمي شوكفت شو هي الحاله وانت ادره بيها
جهالك شونهم
حسون نجح من السادس بمعدل يرفع الراس وعلى صار ثاني. معهد صيدله الحمد لله
الله يحفضك الهم بشر مخابرت بعد
دزت رساله وينها رفاه صيح امك يابه
شدزت طبت اختها وكفت تسلم شكد محترمه بله لو دعاء مثلج مجان حالتي بيها خير وكفت وسلمت بقت منصبه وطت التلفون لعرفان وترخصت
اباوع علرساله كاتبه
ب١ يجيني واني اطلعله راسن نروح
الموقع عرفان شون
هاي دزته باوع
اباوع موقع بخارطه صفنت كال
طي لبو التكسي هو يعرف امشي ويايه اني اعرف
بيش الساعه هسه احجي وكلبي يدك سرريع
تقريب الثناعش ونص كوم كمت راسن اخذني بسيارته عرفان ونمشي ونسال حد ما وصلنا لا نكدر نراسل لان التلفون عد امها اباوع الساعه وحده الاخمسه باوعت لعرفان
خاف مو هذا البيت
يابه علموقع هو هذا كنكت عالرصيد وكتب وصلت
يارب صبرك بقيت اباوع عالباب يربي كون تفتحه وتطلع واكفين عبر شارع واحد من البييت للوحده والخمسه صبري خلص وعيوني احس لزكت بالباب وعرفان يستغفر بسبحته
واشوف الباب انفتحت بنيه وبيدها جيسين زبل تباوع منا ومنا ولمحت سياره عرفان عيوني كامت متشوف من الدمع عبرت بصايه خليجيه وحجاب مرتب نزلت من السياره كالت بنتره
اصعد اصعد طلعني منا طلعنيي
صعدت ليوره وتكول بسرعه بسرعه طلع عرفان راسن واني عيوني على داير مدايري التفتت شفت رجال بيده علاكه رجع للبيت لكه الباب مفتوح بقه يتلفت واحنانبتعد بالسياره طب للبيت
عيوني تشخصت على بنتي الميته خوف واندارت عليه بجيت وهي بجت ركضت لحضني صايره مره متكامله يعمري انتي يافرحه كلبي
شتاقيتلك بابا مشتاقيتلي
متت بابا متت هذا عمج اسالي بين يوم يوم اخابره وممليت صار سنتين الا وينج يابويه وينج
رحنا لاربيل بابا متت من اشتياقي بيبي بس لا ماتت
لالا بابا لحكتي عليها لحكتي جريت وجهه اباوعلها وعرفان يردد
لاحول ولاقوه الا بالله
باوعت بوجهاليبجي وصاير احمر ورجعت بستها بابا حبيبتي شونج
موزينه ابد موزينه نسيتني بابا مجيت تسال يوميه من يندك الباب اكول هذا هو
حبيبتي ضيعت اثرج مخليت لا دائره امج لا بيت خالتها محد ينطيني جواب
بقينا معاتب وبجي حد موصلنا بيت عرفان عرفان كال
ابو فرح لازم تروح متبقى هنا لان اول مكان حتدوركم بي هنا
هزيت راسي ماشي كومي بباتي كومي ويايه
وين نروح وين انت عايش-----
اني فرح اللي مشفت من اسمي غير العكس.
اني فرح اللي كضيت سنين عمري واني بخوفه خاف بابا يطلك ماما
كل الحولي صديقاتي بنت خالتي اشوفهم عايشين وي اهلهم بحب
الا اني عشت لا اني اليتيمه ولا اني العدي اهل مثل الناس
كلما اروح بيت خالتي واشوف لمتهم عالميز وكت الاكل لو وكت رجعه ابوهم من الشغل وتتلكاه خالتي بلهفه وهو يبتسم
كل الجنت اعيشه عراك وناس شايله على ناس وناس تحجي على ناس جنت احير ويامن اصف اوكع بحيره اريدهم ثنينهم اريد امي وابويه
احبهم ثنينهم بس همه مكدرو عالعيشه سوه
جنت اروح لامي وتضل بس تكرهني بابويه ابوج بخيل ابوج يريد ينزوج بوج عده علاقات واني مجنت اشوفه هيج جنت اشوف دلاله وحبه الي وخوفه عليه
واروح لابويه ميكولي الي بس اسمعه يتبشبش بليل وي بيبي بكلام اذني الصغيره متتحمل تسمعه امها حراميه امها تغذر امها وي ابن خالها عده سندات تزوير ومجنت اعرف المن اصدك
مرت هالسنتين عليه بتعب امي مقصرت بس حسيت روحي وحدي من الصبح للسته العصر وكل الموجود بالبيت جوارينه الحارس بالباب
جان بيتنا باربيل بالبدايه بعدها انتقلت وره هالسنتين جانت مانعتني كل المنع عن والدي وبس اجيب سيرته تتخبل وتهدد اذا جبتي سيرته اطردج لا حافضه رقمه ولا رقم خالتي تركت الدراسه لان مكدرت افلح بيها مع العلم حاولت ويايه كوه طلعت من الثالث وبعدها رسبت بالرابع سنتين وبطلت
تعبت من كلشي لشتياقي لوالدي واذيتي من تكول
اعتبري مات
اشترتلي تلفون وبي نت حتى تخلص مني تريدني اعيش مثلها بله اهلها مرتاحه واني روحي بابويه بقيت ابحث بالفيس اسمه ملكيته بحثت اسم خالتي رحل خالتي حسين ابن خالتي واخيرا لكيت صفحه بنت خالتي بمعجزه من رب العالمين
بعدد بحث مطول
تراسلت وياها وعرفتني وتخابرت لحد هاللحضه اذكر كلشي مفتهمو مني بس ابجي واحجي جنت وحدي بالبيت من اللهفه تخربطت ورحعت كعدت ورحعت اتصلت وحددت موعد وخابرو ابويه
اني سيم كرت ماعدي مجرد عالفيس اتصالاتي وي خالتي
وصار الموعد وهياته ابويه كدامي بعد عذاب سنتين صح بشوفته معناه امسح امي من قائمه حياتي لان ميت مره كالت
لو اني لو ابوج وابوج ماعده حتى بيت يلفيج
واني اجاوب بسكوت
اباوعله ضهره عرضان ووجهه ضعفان والشيب تارس راسه التفت بعدما حان يباوع عالطريق شافني اباوعله واضحك
بس وصلنا بيت خالتي اخذنا تكسي وطلعنا ضل ساكت بالتكسي واني دموعي مكدرت اسيطر عليها كلسا يندار مبتسم ابو التكسي انتبه كال
خو مبيها شي البنيه
لا يابه شوي مشتاقه لبيبيتها هسه تشوفها. وترتاح مو باباتي
اي هزيت راسي وشهكت ابجي نمت بالطريق لان قبل بيوم مكدرت انام بليل اوراقي كلها ويايه مثل موصاني عمو عرفان الذهب اللي اشترته امي الي خليته عد خالتي مقبل بابا اخذه.
وصلنا لطريق بي زرع وبابا ياشر منا ومنا قريت الشاميه باوعت اكو شط يمها التفت بابا يبتسم بس اشوفه تخنكني العبره
مشينا بعد شوي وصلنا كال
هاهي يمك حاسب واشر
نزلي حبيبتي فتح باب السياره ونزلت اباوع بستان شكد حلو والهوا اختلف بقيت اباوع باوع لمكان نضري مبتسم راح ابو التكسي وطبيت بحضنه ضحك حضنني ومشه يباوع داير مدوره
كومه ناس اكو ضلو يباعولنا همس
امشي عدل بابا عيب شال ايده سلم ومشه سريع واني اتلفت بطات يفترون منا ومنا واكو جملين صغار وجمل بطنه جبيره بقيت صافنه بابا
كال
ها تذكرتي المكان
هاه لا ماعرفه وين احنا
هاي بالحرب جينا هنا
ماتذكر طببني لبيت صاح يا الله فوتي انتي بابا روحي ببيتج هنا طبيت بلهفه لكيت نسوان يمها طلعو من الباب اللخ وحده وكفت من شافتني جانت مبوشه وكملت مشيها لبيت ثاني طبيت للبيت امشي بهدوء وادور اخاف اطلع صوت وحتى صوتي راح من كثر اللهفه على بيبي سمعت بابا ورايه
هنا هنا حبيبتي بهاي الغرفه فتح الباب طب كدامي واشرلي يضحك صاح
هاا ننه الله يساعدج
يمه وين صرت محد يعرف بيك وين رحت التفتتت على فرح ابتسم وهي ميته بجي ايدها على حلكها امي ضعفانه حيل والعمى مبين بعيونها ورجلها ضعفانه حيل لان ميته متشتغل متغيره حيل مالوم فرح وصدمتها بقينا ساكتين كالت
يسوني ماما زعلت مني من حاجيتك
لاامي اني ماازعل منج جريت فرح وقربتها الها تقربت نصت عليها و حضنتها كالت
منو منو هاي
وتتلمس بيدها وفرح تبجي بهدوء كالت بصياح
لج يمه فرح وحضنتها تبحي يسوني جبتلي فرح
اي بيبي اي اني فرح
يايمه خفت اموت قبل لا شوفج يايمه يريحه الجنه لج فرروحه
اي بيبي اني فرح
تحجي وتبوس بيدها وراسها متت بجي وهمه هم ماتو بجي امي احس رغم تبجي بس طايره من الفرح
ساعات صعبه بعدها كعدنا فرح نزعت لبسها الخليجي وكعدت يم رجل امي اللي جرت راسها لحضنها وتتلمس بي
احجيلنا بابا شوونج شون كضيتيها عافيتج اهم شي
كلشي مابيه حبيبي بابا
دراستج
بابا كوه طلعت من الثالث وبطلت مالي واهس كلش
يس- استغفر الله احجيلي وين رحتو
رحنا لل واندكت الباب
يس- منو وكفت ام عوف جاوبت
هاي الغده
اي الله ينطيج العافيه ام عوف
بالعافيه على عافيتكم يباركلكم رده بنيتك لحضنك
الله يخليج حجيه
راحت وسديت الباب امي كالت
ماما ياسين فاطم هنا
لا يوم شتبقى هنا واني موجود
ماما ميصير هاي مرتك. واليوم حجيت وي ام عوف كالت من يجي السيد وتحاجي وبعد هنا تبات شنو ميصير
فرح- شنوو بابا تزوجت. يعني نسيتني وكملت حياتك وتزوجت صدك بابا صدك
بابا علمود ببيتج منو يبقى يمها
اني ابقى يعني هاهي تزوجت
لج بابا شبييج بس عقدت تعايضض احجيلي كلشي من يوم الرحتو
بس لتجي هنا اني ادير بالي على ببيبي
نسرين- هاهي بيبي حبيبتي انت داريني بيدج الحلوه يمه دتعاي بحضني مشبعت الحمد لله ربي والشكر
يس- بقينا لليل للفجر حجينا على كلشي نطيتها اولويات على مكان سكني وعملي لبسج وحجابج وميصير احد يشوفج وحد لباب البيت ودير بالج
بقت صافنه حايره كالت
ليش ميصير افتر بالبستان
لا بابا ميقبلون هنا
وياك اطلع
لابابا حتلو
سكتت حايره كالت
زين يصير اخابر ماما
بقيت صافن عليها
بابا اني حفضت رقمها بس اخابرها اطمنها وهذا هو
كيفج خابريها بوكت متردين
اوك. نمت بيومها بم امي وبليل كلسا احس عليها توديها للحمام جانت متعرف وامي تعلمها تتوجه على تك رجل والتك الثانيه على جسم فرح وتطب وياها للحمام اسمع ضحكهم وسوالفهم
بيبي شبيج قبل موجنتي تغسليلي هسه اني اغسلج
انزول عليج فروحه
يس-فرحت بيهاحيل ملعبت نفسها مثل متوقعت ثاني يوم الفجر طلعت بالي يم البستان تركته البارحه. بست امي واباوع لفروحه نايمه جوه رجلها بستها وشميت راسها باوعتلي حست مبتسمه
بابا خبيبي وين حتروح
لشغلي باباتي ديري بالج على ببيتج
بعيني
موتطلعين
لالا ابقى هنا ارتب واداري بيبي
سباعيه حبيبتي من اجي نحجي بسالفه الدراسه بلكن احولج هنا اشوف شون
الله كريم وتقريني مثل قبل
اي طبعا كم فرح عدي
طلعت من يمها مرتااااااح حيل كبل رحت للمعمل يعني ابو الصنعه اذا موفوك راس العمال الشغل يكعد عايفين المكاين وصخه وره التجبين غسلتهن اباوع الحليب بعد مجايبه ابو عوف خاف بعده مجاي من كربلا معقوله طلعت وره مكملت المعمل وهياته طلعت للبستان بحافه الساكيه اباوع للحضيره شفت ابو عوف ديفتح القفل مال باب عرفت النسوان جوه بقيت واكف بعد ماكو داعي اتختل من عيونهم المره حلالي.
صحت شايل ايدي
ها ابو عوفي
ها عمي الله يساعدك
هله يابه احجي واباوع بوجهه ابو عوف اخاف ادير صفحتي خاف يكولون عينه تلصلص
مشو من يمي منزله الوشاح فوك البوشي دارت عينها ونصت ومشت سريع وي ام عوف اللي كالت منداره
الحجيه عسى مامحتاحه شي
لالا ممنونج رحمه الله والديج
عينك عليها
اي اي يمها رحمه الله والديج تعبناكم
كلتها وعيني صارت على فاطم اللي التفتت من كلت تعبناكم باوعتلي نضره كلبي انفض ونصت راسها مشو وراحو وانداريت لبو عوف كال
عمي البارحه ماكوش
اي والله صارت عدي شغله جريت نفس كال
چاشني البستان معيد كالبه كلاب
والله التهيت بي وشغلت الفلح خطيه ويايه
السيد باجر يصل
بسلامه انشاء الله
خير كاصدني بشي
يابه الحليب وين
هسا اذز محيسن والويلاد يشيلونه ويجيبونه لجاي
يله يابه المي بالمكينه ديفور
جاخوش
رجعت للمعمل شوي واجتي صينيه الريوك واني داامسح طبو العمال وتحفو تعلمو يغسلون رجلهم يله يفوتون حفايه طلعت اكل عالحصيره بالباب وي ابو عوف كملنا ورجعت عالبستان رجعت نضفناه وعدلنا السعف بالنخل بقينا بس الجديد والتمر ديكبسو والنوه جمعو بعلاليك خوص علف للنوك والشاهين فو ك راسنا يدور على صاحبه
لليل رجعت لبيتنا كلام امي قواني لتضل ها يمه شبيج وهايمه شبيج. كمت اخجل افوت واسالها
طبيت يمهم واشوف فروحه عصبيه دتسوي عصير برتقال
هابابا شونج
زينه باستني ابتسمت مثل قبل كالت
ولد جاب المسواك خلاه بالباب وطببته ام عوف
ايي عكدت حاحبي كالت
هاي مسواك فركي مدري شنو كلشي مفتهمت منها
هههههههههههاي اي خلي بالثلاجه يعني
خليته وداسوي عصير لبيبي
عفيه باباتي تغديتو
اي جابت ميساء السحاره
لج بابا عييب
ايدبابا بس ترزل اني ماريد بعد تجيب شي اني اعرف اسوي
اي كوليلها بادب
كتلها اذا جبتي بعد مناكل
صاحت امي من يمها
يسوني
ها ننه
تعال يوم
جيت رحت يمها اشرت اتقرب تقربت يم شفافها كالت
يمه هاي فرح رزلت فطم كالتلها بعد منحتاجج لحد يوصل والبنيه فشلت وراحت كالتلها تدللي
فركت وجهي عضيت اصبعي خجل شيكولون هسه بله شيكولون بطل عن الزواج لان بته جتي رحت لفرح
بابا شمسويه
بابا شنو علويش.
حجيت وياها وفهمتها شكد وكفولي وشون نقذوني من الجنت بي سكتت كالت
ماريد احد يداري بيبي
اي هاهي بس عيب لزمي حدودج لتخزيني باباتي
اي بس ليجون
فرررح نترت اندارت عليه متفاجاه كالت
بابا انت تريدمرتك
بابا اني بعدني ممتزوج بس عقد
دريت من بيبي
اي بعد شكو بس لازم اتزوج عيب ميصير شيكولون شبيهاالبنيه وعفتها وره العقد
بابا هسه عود من يصير حجي الله كريم اني داريد. اداري بيبي واذاريك محد اله علاقه بيكم انتو مسووليتي ممحتاجين مداراه من العالم عود من تتزوحون الله كريم
استغفر اللللله زين بابا زين عفتها وفتت اسبح طلعت وتعشيت ونمت عيب من السيد الله اليعلم شحيكول عليه يابه زعطوطه شتريد تسوي خلي تسوي ولاافشل من السيد
خلي يجي ويصير خير غفيت قبل ال١٢ من تعبي وراحتي نفس الوكت فشلان من بيت السيد
فرح- للوحده بليل مكدرت انام بابا وبيبي نايمين بقيت افتر بالحديقه واباوع من فوك سياج الخوص عالبستان حان منضره يخبل مرررتب ونضيف وابطات متسطرات نايمات شكد كومه هواي تقريب ال٣٠ وحده لكيت كتكوت يكمز والكل نايمين البستان سننطه كل احد ماكو لبست صايتي وحجابي وطلعت كلت بس اخذ الكتكوت
مشيت شوي واتلفت ضوه واحد اكو. مابين لحكت الكتكوت مشيت وراه واتلفت ماكو احد كلها نايمه طب الكتكوت وره تنور طين ويمه شجره ختل وره الشجره مهزوم مني طبيت وراه ونصيت مكنفده داشيله مكيفه مااسمع الا صوت ورايه
منهو انتي التفتت فازه ضوه خفيف يبين ملامح شاب طويل وضهره بي عرض لابس عكال لافه مثل البرم على كصته كله اسود باسود ايده على محزم سلاحه عبالك ديريد يطلع سلاحه
فزيت رجعت ليوره تقدم يهمس
ويتلفت
من بنته انتي من وين شارده
مفهمت لغته سريع يحجي وصوته رغم يهمس بس عصبي خفت حيل
دادااخذ المتكوت وارجع---
يتبع
بارت طويل لعيونكم
باجر البارت الموعود عبالي يرهم اليوم
تره البارت ٣٠٩٠ كلمه
مريم السعدي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!