رواية النوك الحمر الفصل الثاني 2 - بقلم مريم السعدي

 
اهل قبل كالوا ------الروح تحس بعذاب الروح القريبه منها  
نوبات تحس روحك متضايق وماكو  شي مضايقك  هنا لازم تتاكد واحد من اعزاز كلبك. بي شي
نسرين ----

مخنوكه حيل من صارت المغربيه لحد الان روحي مفرفحه

عللي -- علي -- وينك

ها نسرين هنا بالحديقهه دارش الزرع التفتلي عكد حاجبه ذب الصونده من ايده وراح سد البوري يباوعلي مستغرب هو بنص الحديقه واني واكفه يم سياجه ايدي على كلبي

ها نسرين شبيج.
علي فدوه خل نطلع

شبيج اليوم شو باعيلي اووو باجيه  هم ---يمعوده شكو

مادري مادري مختنكه حيل

استغفري ربج صليلج ركعتين ياعيني
اي واللله صح كلامك
طبيت صليت سبحيت بعدها الخنكه ودكات كلبي تسارعت تبشر بنذير شؤوم

دك التلفون الارضي---خليت ايدي على كلبي اسمع علي يحجي
الو اي تفضل منو حضرتك وسكت والسكوت طول
عللي منو

كال بصوت مليان خوف

نسرين لبسي

شكو احجي ركضت عليه بجادري وكفت كباله
احجي فدوه شبيك
فرك وجهه وباوعلي

ابوج مسوي حادث

وكعت بالكع وايدي على كلبي صفنت حسيت بي والله حسيت بي نصه عليه كومني

لبسي عمري وقوي كلبج اروحلج فدوه

هزيت راسي ووكفني حيل مبقه بيه. وكفت ومشيت وياه  لبسني. اني انقطع تواصلي باللي حولي كمت بس اتخيل شكل ابويه
يابه حبيبي باوعت لعلي
شكالولك

ما ما.  كالو  شي يله فضيها 
اخذني وطلعنا بس سمعت صوت الاذان  قشعر جسمي اليوم كانه مختلف  عبالك مو مثل كل مره من ياذن بجيت الطريق كله ابجي وعلي يمشي سريع ويباوعلي ويستغفر ربي. ويردد
رددي انا لله وانا اليه راجعون عمري لتسوين هيج

اني كلي هيج لو تخبلت

ابويه  ماات ؟؟

لا والقران لا بس اذا اصابتكم مصيبه
اسكتتتت كافي الله يخليك كااافي

يله يله زين هاهي اهداي

وصلنا المستشفى وهو يسحل بيه حجه وي الاستعلامات واني نفسي بده يضيق وكلبي وجعني  كلش طبينا للردهه والاطباء الكاهم متكومين عليه تبنجت ابتعدو كالوا

العلينا سوينا بعد الباقي بيد الله اتصلتوا باهله
جاوبت ممرضه
اي دكتور اتصلنا
هاي هي  طلعو وعلي اسمعه يحاجيهم تقدمت على ابويه  كلشي ممبين منه  ملفلف فتح عينه وسدها الممرضه همست
انتي من اهله
ببببنته احجي ودموعي تجري. هذا ابويه صدك هذا هو عقلي مصدك وكلبي رافض

احجي برجفه بلساني صارت كالت

وكلي الله والحمد لله على كل حال ولتبقين هواي تتعبي موزين

كمت مااسمعها. وكفت كباله فك عينه بتعب حرك شفته مشككه سوده عليه حبيبي اجهشت بالبكاء ومدااكدر اسيطر على روحي

يابه عمري انت لتعوفني قوي روحك لخاطري امي عافتني انت هم تعوفني  

رمش بتعب همس بثكل بلسانه

امانتي  عدج. بابا لتعوفي

كلمتين او اربعه كوه طلعها وغمض عينه  الممرضه جرتني كالت تفضلي ديرتاح طلعت وبس شفت علي انشمرت بحضنه ابحي ويهدي بيه
قدر  الله وماشاء فعل ياروحي انتي

علي بابا ديموت
اللي يريده الله يصير

التفتت شفتهم ديركضون للغرفه باوعت الممرضه تصيح
دكتور المريض

ركضوا بداخل الغرفه مديت راسي بخوف واشوف عداد القلب طوط عطت متحملت الدكتور  صاح

طلعوهااا وصوت الكهرباء بجسمه والضربات مالتها ليهسه ترن باذني واصرخ يابه لحد ماعلي سد حلكي وحضنني واني ميته بجي ومداارتاح بعدها محسيت بشي  غير واني ببيتنا وصوت قران وصوت حمواتي يمي يجرشن ---

اي لج هو ومره وياه بنفس السياره ماتو بحادث الله اليعلم منو هاي المره. هو هم رجال ارمل ونسرين مقبلت  يتزوج وهو كلش يحب نسرين. فاكيد تزوج بله علمها

تخبببلت كعدت واني عبالي حلم كمت اصرخ واملخ بروحي علي دزو عليه تحملني هواي كسرت طردت العالم ملخته اله وهو حاضني يتوسل

نسرين مالي غيرج عمري لتسوين هيج بروحج

٣ ايام الفاتحه خلصت الصدمه اخذت مني  ثلثين حيلي بس هدات مابقالي  احد غيره عمامي سافروا واكو اتصال بيني وبين واحد منهم كان صديقي وقريب مني قبل ليسافر وبعد لحد الان كل فتره اتصل مستقر بالكويت بس.  ولاعدي خوال ولاخالات منو الي بعد من اهلي عافلي هالبيت وراح بديت اهدا واستوعب الامور  مرت سبوعين بعدها علي حاجاني

نسرين ابوج مجان وحده من سوه الحادث وتوفى

منو جان وياه تذكرت حجي حمواتي يعني مجنت احلم فكيت عيني بغضب---

ابوج جان متزوج صارله سنه
شنوو
التوفت وياه بنفس السياره زوجته لازم تعرفين هالشي

ليش هيج يايابه لييش رجعت ابجي كانما تجدد حزني نتر بي علي ---

شنو الليش مغلطان بشي عشر سنين وره امج صابروانتي تزوجتي والج حياتج حرام عليج

سكتت ودموعي تجري. وهو هم سكت بس احس اكو  حجي بكلبه خافي ويخاف يحجي كمت اخاف اكوله  احجي بعد شكو اكتفيت بالكاله. ---مرت اربع اسابيع وطلعت اربعينه ورحت زرته ورجعت ذبيت روحي هناك عتب والم وفراك حيل اذاني  فراكه و بعده الجان يوميه العصر يمرلي ساعه زمان ولو يلعب وي علي طاولي ويروح. متوقعت منه متزوج بس حقه الشرعي هذا
مر شهرين  واني نوعا ما حالتي استقرت وكدرت اتالف وي صدمتي وبيوم ---واني اغسل بكراج بيت عيالي واندكت الباب طبيت

عمه الباب تندك
اي يمه شوفي منو
علي ميقبل  افتحها والله
ها زين هسه اشوف اني
طلعت عمتي ورجعت كالت
نسوان عليج يمه

توقعت احد من منطقتنا يعزوني بابويه طبو نسوان مااعرفهم لابسين اسود وبيدهم طفل يرضع  ابن خمس ست شهور صفنت عليهم اخذو من خاطري وكعدو يحجون

ذكرو مصاعب اهل البيت وعذابهم وصبرهم وذكروا  على صله الرحم واني مثل الاطرش بالزفه بس حمار خدود الطفل جذبتني ولاعبالك ابن هالعمر نضراته تخبل اخر شي حجت البنيه البيدها الطفل

حبيبه اني قبل اربعين يوم توفت امي

صفنت عليها لزمت ايدها المره اللي بصفها حجت

نسرين انتي تدرين والدج جان متزوج قبل وفاته بسنه
اي دريت باوعتلهم متفاجاه كالوا 

زين تعرفين المره الماخذها منو
هزيت راسي لا

زين تعرفينا منو
لا والله

حبيبتي احنا نسوان عم المره وهاي اختها الجبيره
صفنت هزيت راسي اهلا وسهلا
كالو

احنا هم فكدنا مرت  حمانا وام مرت ابوج قبل شهر
هزيت راسي البقاء بحياتكم

حياتج الباقيه حبيبه متحملت راحت وره بنتها
اي الله يرحمها
بقيت صافنه شيردون ذوله. كالوا

زين تعرفين انه والدج عده ولد منها

هنا وكف شعر راسي شنوووو

وكفوا وي وكفتي يهدون بيه اجتي البيدها الطفل كالت هذا اخوج واني  عيالي مديقبلون ابقي يم جهالي وماعدي والقران لو عدي ابقي هذا صار ابنج تردين تذبي بدار الايتام تردين تربي معلينا

بوسته وخلته بايدي  تبحي وطلعت والنسوان طلعن وراها بقيت شايله الطفل صافنه
عمري ١٩ سنه متزوجه من سنتين وماعدي طفل وكاعده عد عيال بقيت صافنه كلبي وجعني  منضر الطفل البريء ملين كلبي لا بالعكس زيدني حقد ذبيته عالقنفه وصرت اعصاب مدي اخنكه. مفرحانه ابد كون عدي اخ ابد ابد طب علي على صوت البجي مال طفل اشرتله بغضب
اخذه وجوره بالشارع لا اقتله والله

اذكري الله حرام طفل صغير

داكووولك ودي دار ايتااام ماريدددده

اوك ماشي اهدي اهدي هاي هي مودي علكيفج

اخذه علي وراح ورجع بالليل من راح لحد مااجه اجي واتذكر كلامه امانتي عدج يابويهههههه شسويت بيه شسويت
مر شهر ومافد يوم متذكرته حتى بليل اسمع بجيه باذني ورجعت عمتي لنفس الاسطوانه

متحبل عاكر سنتين ونص ماكو طفل وعلي يتخبل اخر شي كتله
وديني دكتوره خل اشوف روحي مو طلعتها لروحي وفعلا رحت واتفاجا بانسداد القنوات عدي تشوه خلقي زعت الدنيا وعلي تاذى ميدري يصبرني لو يصبر روحه بيومها رحنا بتنا بكربلا وبقينا الموضوع بيننا مكلنا لاحد بس ضل ببالي الطفل اللي ذبيته بدار الايتام.

شهر وخابرتني خالته ماعرف منين ماخذه رقمي  رديت مستغربه

شتردين

حبيبتي بس كوليلي ابن اختي وين فدوه لعينج
تحجي وتبجي

ذبيته بدار الايتام

صدك جذب يمه يكلبي لج شون انطاج كلبج. اخوج هذذا اخوج

مااعرف شسوت بيه حجايه وحده بس صدقا اثرت بيه. بقيت ساكته سالتني عن اسم الدار وسدته بقيت اتصفن اجه علي وحجيتله محجه بس يباوع بعيني وبلشت ضغوطات امه وخواته.
تزوج بت خالتنه هاي متخلف والدكتوره شكالت مكالت خبصوها للدنيا  وعلي يوميه متعارك وياهم ويطبون عليه من يطلع. صياح وعياط واني تعلمت اسكت كلشي مااحجي لان اطلع الخسرانه الوحيده تالي يطلعون ويسكتون. مر شهرين والثالث ويادكتوره اروح يكولون مااكو امل الي بالحمل ايست ابجي وعلي يبجي ويايه لحد ماتعبت وكلمه اخوج تروح وتجي ببالي تالي زهكت منهم ومن مشاكلهم وصلت لحال امه تضربني لان مااخذ بنت اختها ومن اصفن لحاله علي شنو ذنبه يصبر هاي ٣ سنين على زواجنا مرت وهو عمره ٣٠ سنه يحبني ومعتبرني بنته ومو مرته واني من صغري حبيته حيل وبس خطبني كلت لبابا اريده موافقه وان كان اكبر مني وهو هالواحد على خمس بنات   بس مااتحمل وقع زوجه ثانيه عززه اموت تعبت من عيالي  اخر شي كتله
وديني بيت ابويه

وين اوديج مخبله انتي 
حبيبي تعبت ارحمني

نسرين حبيبتي انتي بيت ابوج فارغ وبي كومه ذكريات شون تكدرين اني لو شفت دمعه منج اتخبل

لا ماراح ابجي بس وديني هناك اهلك ميتحملوني. بعد ولا اني الاكدر اتحملهم ارحمممني

بقه ساكت صافن بوجهي كال
وامي وخواتي وين اعوفهم
جريت نفس بتعب هزيت راسي

باوع ابقى يوم يمي ويوم يمهم

شون تباتين وحدج شون اعوفج مااكدر
الجيران  يمنا ومثل اهلي خاله رجاء يوميه تكابلني وتكعد من وفاه ماما معافتني

خليها هسه خل افكر بيها
ماشي

مرت شهرين وكبت مشكله جبيره راحت امه خطبتله بدون متكوله حجت وي اختها وكالتلها اجيبها ببيتي حالها حال ذيج وهي ام البييت اني عقل مضل براسي تخبلت عياطي وصياحي وعركه مرتبه وخواته ضربوني واني طلعت قهر ابويه وعقمي ملختتتهم دميتهم ولبست عباتي واخذت ذهبي وطفرت من البيت  لبيت ابويه اجه علي مفرفح. بس شافني كعد بالكع من الهبطه جنت  منضفه البيت ومحضره اكل اله وتلكيته بهدوء وهو جسمه يرتعش حضنته
عمري شبيك

متت نشف دمي توقعت ماالكاج بعد شيسوون يسوون ماريد غيرج اني نسرين
ابتسمت بوجهه جاوبت واني بحضنه احبك

مو بكدي والطفل يجي وموجود بس منتضر كلبج يبرد

رفعت راسي عرفت على شنو يقصد

كال ويهز راسه مبتسم

تكسبين بي اجر وتلتهين

نصيت راسي وكانما كان بعقلي جاوبت

شوكت نجيبه

اليوم اذا تردين.  جاوب بلهفه
رفعت راسي مرتبكه
خاف خاف مااعرف وماعدي حليب ممتحضره
بسيطه نجيب ونخلي هنا الغرفه مالته وهنا غراضه وهيج اسوي ضل يعدد وكانه ابنه واني سرحت وياه واخذتني اللهفه وركض بدلت وطلعنا للدار وانصدم بعدم وجوده كالوا  اخذته خالته واخذت رقمها من الدار لان خابرتني من ارضي وحتى كواشف ما عدنا جانت وخابرتها واخذت عنوانها ورحت عليها بلهفه طبيت واشوف البيت مليان ناس يباوعولي بعين الصغيره عيالها وهي ميته خجل وجهالها كومه رجال  عاط اللي فهمته حماها

انطيهيااا خل نخلص فوك كوم اللحم العدي جايبتلي نفر جددديد اخذي يله وروحي
ماشي ماشي  اخذته وطلعت واختها تبجي اباوعله ترس ايدي دبدوب حبيبي اسمراني  اشكراني مثل خالته  وخدوده دم اسمر حنطي بس هلكد ينكرط وعيونه رصاصييي يا الله باوعله علي
اللهم صل على محمد واله ولج ابوج اجكم هذا طالع لامه يله باعي الله يرحمها اخذ حسنها هذا يكبر يسطرهم يمنه ويسره

ههه وصلنا البيت وصارت عدي حياه جديده عيالي ماوصلت الهم بعد وخاله رجاء جيراننا مره جبيره ب٦٠ متركتني يوميه جايه وبيوم العلي يبات عد اهله تبات عدي كام كل اسبوع يبات عد اهله ويجيني ثاني يوم واني تعلقت بهديه رب العالمين اللي اجتني واشوف ابويه بالحلم مرتااح  سميته ياسين.    لان ابويه اسمه طه.   صار كل حياتي ومن يجي علي حد مايروح احجي بي زاد تعلقي بي وبعلي اللي حس تجاهه بالابوه اهل زوجي مسالت عنهم بعد ولاعلي  جاب سيرتهم كبر يسوني واني للكع ماذبه وخاله جاء تصيح

لج يمه ايدج وووكعت ذبيي صار رجال

وهو بعد السنتين مكامله واجاوب
خاله عوفي ارتاح وهو ميقبل لسانه طويل ياشرلها اش  علي ميقبل بس اشيله يكول يجي يوم يكبر يتعبج
ابد مااتعب منه
يمشي واكزكز واركض عليه واحضنه  واشيله مو شغله عطف لا والله اعشقه ياسين بكوم وكللل الدنيا كوم هذا عطيه  ربي ووالدي نسيت كل حقدي لان تزوج اصلا صرت ممنونه وياهو اليشوفه يتخبل على حسنه وجماله . --------

يتبع

كل عام واسطوره العاطفه المفعمه بالامل والمواعظ بالف خير
كل عام وانتي بعافيه وصحه وونظافه قلب مليان امل حبيبتي ام مريوم ❤️❤️❤️❤️❤️❤️❤️❤️❤️

حبايبي القصه حتكون نشرها بين يوم ويوم. اتمنى تتفهمون

ساره علي

الكاتبه
مريم السعدي