رواية الرعناء والأشيب الفصل الثاني 2 - بقلم زهراء العراقيه

تصويت وإشارات لصديقاتكم بلازحمة🌷

الصراع الثاني

نيوفر

كإن من كنت تكون أخرجني من الظلامات للنور

بعد اسبوع

ما اعرف وين موديني  ظنيتهم راح يودوني لصحراء وانقتل بيها واندفن لا من شاف ولا من درى ، سابقا و شفت هذا الحدث بفلم دعاء الكروان من انقتلت اخت فاتن الحمامة من قبل خالها والسبب مشابه ،اشكد بذيج الايام تمنيت الموت ودعيت لنفسي اموت  واخلص من الالم لكن بالحقيقة النفس جبانة تحب الدنيا ومن يصير صدك تتوسل بفطرتها  الروح  تظل اكثر اهنا ولا اتروح لعالم تجهله عالم الاموات ؛ بذيج اللحظة من خوفي منه اجيت اروحله من غير جهد منهم بقتلي
الخوف من الشي يرعب اكثر من مواجهة 
؛وكفت السيارة واني ايدي مجبسة و راسي اللفاف شالوه قبل يومين واخوية رضوان هاج من البيت هو وعلي . بابا وصلنا بسيارته و وكف ينتظرنا . ونزلنا اني و مرت عمي ابو منال و مرت ابوية

رجلية تهتز هز على الارض وحدتهن لزمتني من ذراعي وكانما سحلني بالمشي

-وين وين ماخذيني

ماكو جواب كعدتنا . ارتاحيت من شفتنا كعدنا ننتظر دورنا عرفت احنه بعيادة طبيب.. ركزت اكثر بالصورة الي معلكه كدامي وحده لازمة بطنها و ايدها الثانية على خصرها حامل . و ابصفه ورقه مكتوب عليها ممنوع دخول مرافق مع المريضة  .

انتبهت كلها نسوان والزلم تنتظر بالممر كأنها عيادة طبيبة نسائية ؛ بشنو احتاج طبيبة  نسائية واني ايدي المجبسة ما شاكية من شي مرض نسائي
ردت أسال بس الوجوه ما تتحمل مني كلمة  وحدة ابد
صاحوا بأسمنا ورة ساعة . دخلنا و عارضن كلام السكرتيرة ودخلن وياي اثنينهن . قلبي نذرلي بشي من الخوف من كعدن كدام الطبيبة  وشاورت امي الدكتورة .. الدكتورة طلبت من المريضات
الي ادخلن ويانا فد ثلاثه يطلعن
لأن همه يدخلون اربعة اربعة سوة . طلعن وبقينا بس احنه . ما أجرأت اكعد بس صافنه عليهن و تمارة تبسبس لطبيبة . باوعتلي الدكتورة و بعينها نظرة احتقار ما انساها طول عمري فركت جبينها وكالت بصوت مسموع لتمارة
حقكم . خالة اني حكتب شنو يطلع بالفحص بتقرير ومعلية رجائا لا ادخلوني بعدين  هاي سالفة كبيرة  بس راح اتصرف بما يرضي ضميري والشرع افحصها لا تنظلم البنية 

توسلت تمارة بالطبيبة

-حبابة ما اريد فحص اكتبي التقرير خطية ما اشوفيها اشلون خايفة
واشرت عليه

اني لزمت الحايط ارتكز علية و اعيوني اشوشت الرؤيا بيهن صرت ارفع وانزل بيهن وافرك حتى اصحصح . عرفت راح اتعرض لكشف عذرية  . تذكرت من شفت فلم مرة  اسرار البنات عندا بأميرة تابعته واعرف بعض السوالف من صديقات ومنا ومنا صارت عندي خلفية بسيطه عن هالموضوع .

الدكتورة  رفضت ومرت عمي هم رفضت

ام منال
-ام علي عيني (تمارة ام علي اول طفل الها علي ) ما اتفقنا على هيج خليها تفحصها ونتأكد منها  لا اصدكين بكلامها هاي
واشرت علية

ظلت تفرك بأديها تمارة اتباوع عليه بنظرات اشفاق
كامت الدكتورة وكالت

تعالي ع السدية

كالتها بمنية
رحت خاضعه الهم نمت على ضهري ودخلت مرت عمي
- لازم اشوف بعيني دكتورة

صحت مذعورة
-لا انت شعليج برة روحي

خزرتني مرة عمي والطبيبة اعترضت و طلعتها برة الستارة واني ابجي والطبيبه اصيح علية . الخجل مع الذل امتزج وصار بداخلي لون واحد للحياة .السواد بسبب هوان النفس  غمضت اعيوني على امل ما اشهد الي راح يصير ويمكن يقل احساسي  . فتحت من كالت الطبيبة خلصنا .
طلعت نزعت الكفوف وطلعت من خلف الستارة اتبغلهم النتيجة .
هاي اللحظة ما تشبه ابد يوم النتيجة  اجة ع بالي يوم الي استلمت بيه نتيجتي واعلنت رسوبي
لهلي وحصلت دمغة من تمارة وغمه من علي . وملامة من اميرة  رحت وراها لغرفتنا .

اميرة والله ما افهم اني ترة اقرة

باوعت الي بملامة
- ولج اشحال اني عايشة وياج واعرفج
النهار كله مكابلة التلفزيون  ودك افلام ع روتانا سينما  . لو اشوية مركزة اتنجحين

-يووه عادي اعيد سنة شنو يعني اتقوة

- عمرج صار ١٦ يا ست هانم وانت لساج بالاول  متوسط 

دك تلفونها باوعت للشاشه بمكر وهو بأيدها خزرتني وطفته
غمزت الها
-هذا حبيب الروح
-عيب ولج شنو قصدج هاي مياده
اطلعي برة خل اخابرها بلكت طلع تعيني

هزيت ايدي وكلت
-كولي بلكت طلع تعينه هو
ضحكت و شمرتني بالكوشة مالتها وكعت ع الباب
مديت راسي وكلت
-اذا تردين اراقب الج الجو
-انجبي ولي
ضحكت ورحت احب الاشيها . بس خطية صار عمرها ٢٥ سنة وبعدها بلا زواج ما تقبل باي احد يتقدم الها ومنتظرة حاتم
الي ما يقبل يتقدم خطوة الا يحصل شغل  او تعين يضمن اله حياة كريمة عرفت هذا الكلام من مخابراتها الليلة .

.
دخلت اتخنس  غافلتهم يتغدون و سديت باب غرفتنا . طلعت تلفوني من جوة ملابسي وكلبي يدك يكلك راح ينفتح الباب عليه وهو مقفول!
كان دفتري سنغافوري . دكيت ولطمت حتى أشتري  واحد ما قبلت تمارة ع ابو انت مراهقة وماخلت والدي يشتري الي  ورة شهرين اشترة علي صدك فار دمي والله شنو هو ولد  جن جنوني وقبلت اخذ من مختار جهاز هو جان يلح عليه يشتري الي . بمتحان الكيمياء اخذته منه وضميته  استخدمه بالختلات وبرهبة  حاط بيه سيم ورام  رغم الخوف لكن شي بداخلي احسة مرتاح احس نفسي منتصرة عليهم منتصرة على رضوان الي انتفض من كلت لبابا اريد جهاز  ؛وعلي هو راح اشتراه اله وهو اصغر مني لو هو خطر عليه و عادي لعلي . اما علاقتي هم نفس الشي حالي حاله هو مو ٢٤ ساعة ياخبر بنات وكل البيت يدري ومغلس بس اني ما اقلده . كانت مثلي الاعلى اميرة و علاقتها نظيفة بحاتم حبيت اكون مثلها ولو هو شي مو بايدي بعد حبيت مختار و انسان طيب  و يحبني ما فد يوم زعلني اتعرفت عليه بالصدفة  هو ابن خالة صكار  صديق الطفولة الي حتى سلامنا انقطع عن بعض   حبيته بعد محاولات منه . ودوم اشوفه واكف ع الشارع العام من اعبر للمدرسة  . ورة فترة شو هذا كام يداوم بالمدرسة الي جنب مدرستنا . 

وبدت بينا الكلمات السريعة و النظرات . وعرفت هو نقل نفسة مخصوص حتى يشوفني . هو صف خامس ادبي واني صف سادس  . واستمرت علاقتنا الى ان نجحت للأول  بطلاع الروح .  خطية اميرة تكعد تشرح ساعة الا افهم حجارة وكاعده .بالي مو يمها يم  مختار وتصرفاته الحلوة مرات يمشي كلش يمي ابسرعه ينطيني لفة ويشرد ابسرعه مرات جبس  او حلويات وبنص الجيس الكة رسالة بيها رسم يخبل مال قلوب و و هيكل بيه ورود رسمه غريب بس حيل حلو ومتقن . بيوم شاورني  انو لازم يشوفني هو راح يجي لبيت صكار واني لازم اطلع اله . سوالف مراهقة يمكن غلط واعترف حتى بوقتها ما اقتنعت وما اجيت اطلع الساعه خمسة بالباب اشوفه بس كلبي ما انطاني طلعت ارش الباب وشفته اشر على قلبه ودخل ..  واني هم دخلت . شي تافه مو ؟ بس هو حب يشوفني بملابس غير مال المدرسة .

نرجع واني  بعمر ال ١٦

جنت اشخبط واحاول ارسم رسوم مثل مختار بس ما لحكته . اجتني تمارة

نوفة اليوم انروح للخياطة جبت قماش الج نخيط عباية

-ما البسها والله لو طلي ير......ب طلي

-شنو شنو ولج امنين جايبة هاي الكلمة ولج عيب

عوجت حلكي واجاني الراشدي مفاجئ

-كلبة شنو هاي الالفاظ الا يجي ابوج واكله يا طايحة الحظ
مع اني كلت الكلمه و ما اعرف اصلا المعنى بس ثرت من داخلي وكمت على حيلي

-لا اضربيني اني مو اصغيره اني راح اكل لبابا والله

-هااا ولج طلع الج السان
من سوء حظي رضوان بالبيت من سمع صوتي طلع من غرفته هاد علية

-اشبيها هاي  خالة

صوتها نصى وصار هادئ وطيب
- رضوان عوفها مالك علاقه بيها لا يجي ابوك ومايرضى عليها

اتمشت كم خطوة عني واني اخزر بيها

-  الله يعيني والله عليها هاي اميرة وردة ليش ما طالعه عليها .الفاظها و اتصرفاتها مال وحده ما متربية

جر شعري

-هد شعري لا اكول لبابا والله

-اتهددين  ولج موو

-ولي

-ولج لا اتغلطين

دفعني حيل طبعا الدفعة صارت مو بقصده قوية لأني حيل نحيفة و ضعيفة صحة هم اقل عثرة اوكع . وكعت على طاولة كدام القنفة كزاز صار راسي على الحافة وللمرة الثانية يسبب رضوان بأذيتي من غير قصد  انضربت المكان فوق اذني  لزمت المكان و ايدي انترست دم .
-دم دم يمة دم
التفت رضوان عليه . و بالبداية مثل الي ما مصدك   . كمت ابجي واتوجع اتقرب يمي وكعد

-ولج شكو . شاف المكان . والطاولة بحوافها دمي .

-نيوفر .  نيوفر
خاااااالة
ولج نيوفر انت زينه

سؤال مو بمحلة كمت ابجي بعلو صوتي
شالني وركض بيه للحديقة ..انوب رجع دخل للبيت و تمارة تركض ورانه وتضرب بخدها واتكول عزة ولك شسويت واتلوم بيه . وهو دخل وهم طلع ويكول الها شسوي خاله بالحقيقية حسيت الالم بدأ يخف لكن الدم ما زال يطلع مني ترس اذني بس  مدري من شفت خوف رضوان عليه ويروكض بيه ويبوس بجبيني خايف لا مأذيني ويضم راسي ع صدرة كمت ابجي بالزايد متأثرة بالموقف .  دخلت اختي جانت برة ادور خطية تعيين ويه صديقاتها من الصبح كالت الهم اخذوها للمضمد لا اضلون هيج .
اخذني رضوان و اميرة وياه  .

المضمد شاف شغلة خيطني خياط واحد وكال لا تخافون سطحي الجرح مو كلش قوي لو قوي يغمى عليها الراس خطرة ضربته . 

ضمدني وطلعنا وعباة تمارة تسحل لابستها  وطبعا من غير ربطة  وكفنا ع الشارع العام وكال
-شفتي ولج شصار من ورة عنادج
برطمت اجيت ارجع ابجي
-لا تنعين    حط ايده على متني
-والله مو قصدي انت ريشة
بس طول فرعة .. 

اميرة
-امشونا نرجع يمعود محلوة  وكفتنا . مشينا ووصلت للبيت  قبل لا ندخل رضوان راح . واحنه ندخل لجوة سمعنا عياط وصياح بابا ..
اول ما شافني لزمني من وجهي
-اشبيج بابا .  وجهج بيه شي . شو اشوف راسج .. هذا الكلب والله لاندمه
شاف اللفاف واخترع واتحلف برضوان و اميرة تهدي بيه هي وتمارة

-بابا ما بيه شي والله ..

كلتها من كلبي لأن ادري بيه مو قصده وشفت الندم بعيونه .
بس ابوية ما برد .. كعدله بالهول ينتظرة

واني واميرة يمه نهدي بيه .. حسيت بتعب عفتهم ورحت اسطحت بنص الهول

تمارة علقت
-شوف دشوف تصرفاتها مال وحده جاهلة اشكبرها مددت كدامك هيج

ما رد عليها وعينه ع باب الحوش من الشباك يباوع للي دخل . 

دخل علينا رضوان ومحمل شغلات

قبل ما يحجي ابوية
-بوية والله شتكول اني استاهل . حتى اضربني اذا ااتريداتوجه الي حط العلاليك يمي وراح يم ابوية الي سكت من شافه ندمان كعدت فتحتهم حلويات و كرزات و دوة و العلاكه الاخيرة فتحتها بيها كارتونه... مدري ليش اخترعت من شفت بيها تليفون ...رضوان جايب الي شكو شي احبه . بس متوقعت بيوم هو يجيب الي بأيده تلفون !!!!
حسيت بضوجة كبيرة ما ادري ليش .
تذكرت يوم دعمي هم وراها حن وخلاني على راحتي وهسة همين .  ضجت كلش وكلهم لاحظوني اخذتهم وبسكوت ما حجيت شي .
دخلت للغرفة ابجي .. عرفت نفسي اسرعت من اخذت تليفون من مختار ..
بحلظة حقد وتحدي لرضوان
دخل رضوان وبوراه اميرة

-اشبيج ولج . 
كعد يمي واني دنكت

-شنو كلش متأذاية ؟

أميرة  كالت
-عبالي راح اتركصين من الفرح التلفيون واجاج .

بجيت اكثر عبالهم ادلع و حيل متأذاية نفسيا من الي صار .  عافني رضوان بعد ما كال لأميرة
-راضيها

هو ما يعرف يراضي ابد . حضنتني وسكتتني   . و تمارة دخلت اخذت الكزرات وطلعت

-اميرة كرزاتي  ما عليه

-ههههه ام بطن حتى وانت زعلانه

-اميرة اني ما احبها

-لعد ليش ضجتي من اخذتها خالة

اني جنت اقصد تمارة ما احبها وفهمتني اميرة عبالهاما احب الكرزات

سكتت وثاني يوم سويت حجة و اتواعدت وية مختار يم محل الانشائية مال ابو صكار يوكف و امرمن يمه اشمرلة علاكه التلفون اعترض و ما قبل بس اصريت . هذا الكلام مراسلات مو اتصال .
اكومثل يكول  ما شافوهم وهمه يسرقوا شافوهم وهمه يتحاسبو    .. شمرت العلاكه عود واكعه مني و هو واخذها  اني طالعه بوقت ال١١ ونص الضهر تقل حركه الناس . لكن بهذا الوقت طلع صكار من المحل وشافنها  خليت ومشيت ابسرعه شارده والرهبة سرت بكل اعضاء جسمي . 

*

تمارة بشري دكتورة شنو طلع وياج

ام منال
هادكتورة مو ابنية ؟

لا الحمدلله البنية باكر !

يتبع

حاليا ماعندي وقت  محدد للنشر اول اسبوع من انشرها اظل اوافيكم بكل قصصي هيج اسوي حتى ادخلكم بجو القصة
الاسبوع الثاني وهو نزول زوجي اظل انشر بين يوم ويوم تحياتي احبكم .🌷🌷🌷
هاصدك بالنسبة للي اعترضوا على نيوفر لان الاسم الحقيقي للبطلة من غيرته اختها الها سوته هم غريب وما متوفر لهذا اني همين حطيت  مستعار غريب