رواية الرعناء والأشيب الفصل الثاني والثلاثون 32 - بقلم زهراء العراقيه

تم تعديل البارت

احبك في الوجع ،في الضعف ،في الالم وفي الانكسار. احبك رغم الحروب والنزاعات ،رغم القيود ورغم الظروف. احبك رغم انكساري وخوفي. احبك لانك لا تمحي ولن تمحي. احبك لانك وطن واعلم ان الوطن قد يحتل لكني احبك. لا علاقه لي بالدولار والسولار. فأنا احبك رغم احتراق الكون ورغم انهزام المدن. احبك مع فيروزتي ولم ولن اكرهك مثلها في الشتاء. احبك ان لم تكن لي وان كان الفراق سبيلي بك. فسأحبك لان النسيان لم يخلق لك يوما. فعينيك مازالت نقطه ضعفي الخالده..!
اترقب بجفون مرتجفة و گلب ملچوم خايف لا هاي نار ثانية دتتقرب منه تحركه
اقرة بس رؤس اقلام حديثهم ، اريد افهم ليس مسكرنة محادثتي . وشنو قصده هو من كال صارت زينه لا ترسلين بعد كلامها؟ ؛ شنو قصده ابحث عن قصده وما اريد افهمة؟ بس من وصلت لصورة محادثتي الها ، جانت لأخر عركة بيني و رائد ، لهنا انتهت المحادثة ماكو شي بيها ،
التلفون انجر من ايدي واني على غير انتباه ولا دارية بالعالم الي حولي ، ايدي على حلكي و وراسي راح يطك من الدوخه وزحام فكري ، رائد يقرة رسايلي . متفقة وياه لينا !؟ يقرة كلشي لو بس عن خصامي وياه ؟ ؛ انحنيت بكعدتي على القنفة ، انحنيت حيل على حضني واديه مكتفتهم ببعض ، رقمها الثاني الي تراسلني بيه ، الرسائل مبينه ممسوح مكاملة وهو حاذف ؟وطالب منها ما ترسل بعد ، كافي يا نوفة اتفكرين مراح تفهمين غير شي واحد رائد متورج على كل أسراري ،  يااااالله ليش هيج ؟
يكول الها لا مابيها شي ولا مريضه بس سوء تربية و توجيه خاطئ وهي الثانية مدري ادافع عني مدري تديني اكثر بأصرارها اعاني من عقد نفسية باوعت لهاشم ردت اخذ الفون منه مرة لخ
بجى ما قبل ،
دخل رائد ينشف بشعره
- صبينا عشا حياتي
ما اتحملت الكتمان مو طبعي ردت انفجر بوجهه
فاجئني من حاوطني من خصري ،
-اشبيه الحلو يصفن ، تعال يا تايه بفكارك تعال .
اخذني للمطبخ كعدني على الميز واخذ اكفي باسه بنعومه  ، ادور بعيونه أسباب هالعطف والحنان الي نزل عليه من غير مناسبة ، و اراقبه وهو يباوع للأكل داخل الفرن
- ما مسوية زلايط ؟
حطيت ايدي على خدي وصافنه عليه، هو اخذ تخته و طلع سلة الخيار  ،
مرة فضفضت الها عن حبي لزيارة قبر ماما ، ورة كم يوم اخذني رائد الها للنجف !؟ ، مرة كلت الها عن رغبتي بمساعده بيبي الله يرحمها واشتري الها هدية بيوم عيد الام ؟ الغريب هو سألني اذا احب اطلع اشتري لتمارة وبيبي هدية ؟ اهواي زحام افكار توارت عليه وكمت اربط الاحداث الي من البديهي هي راسلة اله الاول والتالي ، بس يا ترى لأي حد ، غمضت اعيوني ومدنكه على الطاولة بالي مو وياه ، اسمعة يسأل عن واجبات هاشم ، بس عباله مغلسة ، باوعت لعيونه تذكرت مرة الحديث جر بعضة وسولفت الها عن علاقتي بيفصل
واشلون كنت وياه ما احس برغبة،بالعلاقة غير انها تأدية واجب ومفتهمتة غلط كونها طاعة للزوج وشي محبب اله ماكنت اعرف اني الي حقوق من هاي الناحية الا بعد زواجي الثاني ، هذا الشي مو بس محرج واحسة جارح لذكرى المرحوم ، هذا الكلام من زمان ، اختل توازني و حركتي صارت من غير قصد  ضربت على صدري وشهكت واباوع اله بعيون جاحظة و تتسأل لأي حد هي مسولفه اله عندي اهواي امور حرجة
اتخلص منها بالحديث و سمع اي نصيحه ،
ابلع بريكي واحس بشرايني راح تنفجر من راسي ما كان الم غير هو انتفاضه بكل قطرة دم بجسمي احسها تغلي و يوجعني النفس الي اخذه  
هو كايم من كدامي ويمي يفرك بضهري ويسأل اشبيه اون  ،هو اني اون ؟ 
مسحت وجهي بوصلة كدامي
جرها مني وسأل
-نوفة اشبيج خوفتيني عليج . اتمسحين  وجهج بوصلة الطباخ ؟،شنو صاير ؟
- اتوفت ام فيصل
- اها الله يرحمها
حط كدامي كلاص ماي ، باوعت للطاولة هو جان كاعد يثرم الي زلاطة الي ، هه يعرف بوفاتها ويمثل كدامي بعطفة
لا طبعي اعرف امثل واكمل وياه ولا كدر اتحكم بعصابي عفته وشردت منه ومن نفسي  ، كعدت على الارض بغرفتي و تليفوني بأيدي جان بودي اكسره و اريح رغبتي بتكسير اي شي بس مكدرت جنت محتاجته اهواي ،واني ارن للينا وهو دخل و توتو ملزم بيه يطلب منه يشيله خطفت نظراتي صور الهم ورجعت اباوع لشاشة التليفون ،   فتحت خط ، شغلت مايك وحطيت الجهاز يم حلكي، بينما رائد سالني ليش كاعده اهنا هي كالت ، -ها حبي نوفة كولتي لرائد ، اشوكت ترحين ،
- البركة بيج حبي
-شنو؟
اهنا رائد كعد على مقعد ميز المراية كان خشبي دائري من غير مسند من الخلف ابيض بلون الغرفة ،
- نيوفر تردين اروح وياج  ، ماعندي مانع بس اشوف رضوان
كمت وكعدت كدام رائد الي نظراته ارتكزت عليه وكأنه دا يفكر بشي بيه ،
- لا ما يحتاج ،المهم بس عندي  سؤال الج
سمعت صوت رضوان.
كالت ممكن بعدين اتصل بيج رجع رضوان
- بس سؤال واحد ، اعرف اني عندج اكثر من حالة نفسية دتعالجيها او تتطلعين عليها من خلال شغلج ، كلهم تجين تنطين لاهلهم تقرير بيهم لو بس لأخوج يتقدم ،
سكتت مدري سدت الخط ، رائد كأنه كان شاك ما تفاجأ اخذ التلفون مني وكال بعدين اخابرج وسده ، وكفت و حطيت اديه على خواصري هو ابسرعه شال توتو وطلع ، واني اعيوني تمشي وراه ، دخل وحده وسد الباب ،
- نوفة افهمي بالاول لينا  اني ضغطت عليها ضغط مو طبيعي الا قبلت وما قبلت الا بعد ما عرفت لمصلحتج اعرف ،

اتقرب عليه و حاوط خدودي بكفوفه  
-حبيبتي
وخرت اديه
-اكره الشخص الكذاب ، اكره النفاق ، سابيني اسباية الصراحه اهم شي بالعلاقه و بعد محاضرات انت استاذ بيها طلعت بس كلام ،،
ليش رائد اشلون حضرة جناب الإخصائية هيج اسوي ،

كعدت على السرير لأن راسي بدأ يفتر بيه
- بس اني معبالي هيج من امنت بيها معبالي يصير الاهل يعرفون ، هي كالت حرف ما يوصل لأميرة ، 
- نوفة هسة ليش اترجفين عصبية ،   بس اتعوذي من الشيطان وافهميني اترجاج ، الي سويته حتى افهمج، صدكي لو لا علمي المسبق بسبب ترصافتج عمري مراح افهم ويمكن ما يجمعنا سقف واحد لهسة ،

- شنو تكول الك ، اقصد كلشي عنا لو بس الشي اليخصك ؟. اقصد من نتعارك ، اني ترة مو دوم اسولف الها الخصام بينا اجنبها مرات ،
سكت وزاد شكي
- احلفك بالله هم حجت الك عن زواجي السابق و احداثة هم حجت عن طفولتي 

كملت بصوت يبث ضعف وقلة حيلة من شفته ساكت وبس متلعثم ما عنده اجابة!
-اني امنت وسولفت الها كلشي ؟ 
اووف ياربي ولا توقعتها هيج اسوي
امنين اجتني هاي السالفة .
كمت ابجي وانحب و اضرب على رجلية
حط ايده على متني و لزم ايدي وباسها
- نوفه سبب التامسي العذر الج وتمسكي بيج هو معرفتي بيج من خلال لينا ، يعني هسة انت عرفتي اني اعرف عنج اكثر بس ترة علاقتنا تعدت هذي الحدود ، انت اتعرفين عني كلشي حرج ، محد يدري بيه غيرج خليني مثلج ، وستر عليج ، اتركج من اي احد و خليني الاول بمعرفة كلشي يخصج ،
انتزعت ايده عن متني بقوة بكد رفضي بعري افكاري كدامه
-لا ما اكدر اكو امور الاحسن ما تعرفها ،
اصلا ، اصلا اني اتعالج عند اختك قبل لا ازوجك ،

-ادري يا حياتي ، بس هسة انت مرتي واقرب شخص الج المفروض اني ، اعرف الي صار خطأ بحقج ، بس شسوي مرات الخطأ يساعدنا
قاطعته
- يعني هو بالاصل ما يصير مو ضحكتوا عليه انت واختك مووو.
مسح بأيدة وجهه وازعجته دكات هاشم يكول جوعان
-عشي الجهال وبعدين نكمل
-ما اريد زقنبوت
-نوفة رجائا
- عوفني بحالي ، عوفوني كلكم ،
رجعت كعدت على السرير بعد ما وكفت قبل اشوية منتفضة وهو راح للأطفال ،
ورة  دقايق مطولة الا رجع ،
- نوفة ، خل اسولف الج
-اش ما اريد اسمع .
جنت منتكأة على السرير وعيني على الكنتور
- بس اكلج ، ترة لينا ما راضيه ابد اني اجبرته بحكم الاخوة الي بينا و وعدتها ما تاثر على علاقتنا الرسائل ،بالعكس اثرت بشي ايجابي ، .
كعد يمي و استرسل بالكلام بحب و بنبرة تبث الهدوء و السلام الداخلي
-عرفت من خلالها انت كل الي اتكوليه الي ما اتقصديه ، كل تصرفاتج غير مقصوده ، عرفت انت روحج ملاك بشواك ،.صدكي لولاها ما جنت كملت ، لو اني مفاهم نواياج
حط راسي على صدرة و غمضت اعيوني ، مستلسمة للواقع بعد هو عرف شفيد الزعل بالعكس يأذيني البعد عن حضنه وهو بعد كم يوم يلتحق ويتركني
- ارضي عليه وسامحيني الله يرضى عليج .
بعد تفكير طال دقايق جاوبته بصوت ما بعد البكاء فكان بيه بحه بسبب البلغم
- ارضى بس بشرط
-امري
كان يمسد على شعري و يطبع بوسات عليه 
اخذت نفسي طووويل و بروح جوعانه كتمت انفاسي ضامه جواها ريحة جسمة
وحبستها داخل ريتي ، عدت الحركة مرتين الا حجيت
-اريد طول الليل اتنام يمي ، مو بس اتنيمني واتروح تنعزل بنهاية السرير

باوعت اله برفع اعيوني علية من غير ما ابعد راسي عنه ، شفت بلاعيمه تتحرك واضحه كلش ببلعومه ، جان مبتسم
-اي تدللين
- تذكر من اخذت فترة اتسويها ، وحتى تشغل قرأن .
دفنت راسي دكمل كلام ، وكفت من اجت ومضة استذكار  ،  وتذكرت مرة شكيت للينا من احلام وكوابيس بمختار ،  لو يريد يغتصبني  ،  لو جايني لبيتي و كدام رائد يريد يضربني ،هذا الحجي قبل مدة طويلة ، يا سبحان الله ، رائد صار يحضني رغم رغبته بنومه على جنبة الايمن وايده جوه وجه لكن اخذ فترة ما يتركني حتى من تتعب ايده يوخرها بس يضل قريب مني ؟ لو بالصدفة ننام اثنينا على سورة قرأنية بصوت عبد الباسط !
صدفه لا اكثر ! ، لا مو صدفة غباء مني ، زين هي شنو  مسولفة اله عن مختار !!
انتفضت مفزوعه
- لينا كلشي مسولفة الك عني ؟
مراهقتي طفولتي ؟

اتوقعت احتمال جبير لا والدليل هو بعده مرتبط بيه ،
- اي
هذا الكلمة خلتني افقد الاحساس و ضربتني الدنيا  ضربة   طشرتني اطشر ما خلت ذرة فكر براسي اتعقل بيها، لكيت نفسي اشرد عنه ، رجليه ودتني للحديقة ، كعدت يم السندانات على الارض الباردة ،
واجاني ، من جوة ابطي كومني بالغصب ودخلني تحت انظار اطفالي ، الي حسوا بشي مريب بينا عادته الطفل قوي الملاحظة ، اخذني للغرفة وحاول يهديني حتى انصي صوتي، جنت اصيح و منفعلة حيل لدرجة احس حسي راح ينكطع لو دموعي تعميني ،ما اذكر شنو كلت اله وطلع واختفى من انظاري ، لنص الليل واني بين اطفالي النيام حابسة روحي ، وما داخله لغرفته ، الا رجع الي وعيي وفكرت باا لي اني بيه ، دوم انصح دينيا بيه واذكره اني من عائلة محافظة ،
ضربت على وجهي وكلش مستحقرة روحي ، هسة اكيد هو عبالة استشرف براسه ، الله ياخذني ويخلصني ، ما اشوفيه يا غبية يكول لاخته ما بيها شي تربيتها غلط هسة الا فهمت ، عزة عزة عزة ،اضرب بوجهي وحاسة بالالم  بس ما توقفت ، كمت من يمهم ،وظليت لمدة يومين اجنبة وما ارضى احجي وياه اتهرب منه و اذا اصر يحجي وياي تجيني البجية والصياح يتركني، الى أن حل وقت التحاقة ، الغروب كال اوصلج لهلج ، جنت اغسل ملابس وجانت الساعة عشرة الصبح ،

***
رائد
وزاد البعد بينا مهما كلت واعتذرت ما اكون سويت شي ، من جهه اكول لازم تاخذ وقتها و تصفى وحدها ومن جه اخاف المشكلة تكبر اكثر وتزداد تعقيد بالبعد ، احاول وياها وعلى الله المستعان
رحت الها جانت تغسل ملابس واكفه يم الغسالة تگلب بيهم وتحط ،
شافتني واكف يمها مبين على شنو ما انتطتني مجال طلعت من المنور و تركتني امشي وراها ، لزمتها من خصرها بايد وحده و ما خليتها اتروح للصاله يم الاطفال الي مسويها هرجة ، دخلتها لغرفتنا
احتضنتها على امل توقفها نقطة ضعفها ،
وتردعها عن الزعل ما حبيته يظل حاجز بينا واني ملتحق  بعيد عنها ،
ابتعدت عني كاني مجرب بحركة بشفاها تدل على القرف ،
- اتصل برضوان ياخذني من هسة احسن
اتغاضيت بقهر وكلت منسند على ميز اي يسند العرش
- نوفة لا اتكبريها

**
نيوفر
فتحت اعيوني على وسعهم اجن يطلعن من محاجرهن
- ما اكبرها   لك انت اقل شي تكبره واتظل ايام تحجي بيه واني ، اني ما اكدر اباوع لوجهك ، من ورة اختك الناقصة
- لا تغلطين  ،
- ما كلت شي غلط  اختك والله بس الكاها وجه لوجه اذا ما امسح بكرامتها الارض ،
انطاني ضهره وكال كافي سديها

-شنو كافي اسدها ويكلك انت صاحب حق واني باطل ، شو كلبتها عليه ؟

- طلع من الغرفة واني وراه
- تعال ، راويني وجهك ، من الاخلاق الشي الي سوته اختك اسكرن كلام ، اقل هفوة تجيك تركض ، وانت مكيف

-كافي اسكتي ، انت قافلة ما منج رجا ابد ،
لزمته من كفة
-اوكف
جان ضهرة عليه، واني حيل مستفزني البرود والجحود مالته ،
- انت شو مستهزء بمشاعري ؟ هاااا ليش
دوم اني مهما سويت بيه انت وغلطت بحقي لازم كلمتين واسكت ، وانت ايام

- نوفة من تهدأين نحجي، لا تتخبلين عليه والله راسي يوجعني   
كالها بعنجهية مو قلة صبر حتى تأفاف ،
وكعد اخذ الريمونت والاطفال يتراكضون بالصالة ،
ابتعدت عنه خطوة وكلت
- ما ادري على شنو شايفين نفسكم فوك العالم ، هاي اختك هم تسولف اسوالف صاحبتها لو بس اني مستصغرتني
-كافي اذكرين اختي
جنت يم الطباخ واصلة
- هو انت رجال بس يمي اتصير ، حطيت الجدر ع العين ودفتحها ، اجه يمي
-لا اتمخرطين اسكتي ،
اشر بأصبعه على جبيني . كانه حفرة
وخرت ايده
- وخر عني
- نوفه ، زعلانه فهمنا   بس لا تتجاوزين
- وخر عني ، شايف نفسك عليه انت واختك ، والله العظيم ترة روحي طاكه منكم  حموت  حرام عليك ،ليش هيج سويتوا
كعدت على الميز ، شو تركني وندار

-الله يكملج بعقلج شكول بس تعبت
احجي وابجي
-هو انت دومك تعبان يمي ،
- نوفة تعبت والله صارلي ايام احاول بس اخليج اتقدرين الموقف ، انت لو ما معرفتي بيج ما جان تحملت ترة اني.....

قاطعته واني الشرر يبث من گلبي الملتهب ويطلع من اعيوني
   -متحملني ،! لك اني متحملتک انت واحد مو  رجال و عقيم وساكته !
____________________________
كلام وهذر و معاتبة و محاسبة و ذم و حتى غلط كنت اسمعة من تمارة لكن كأن على أذني عجينة من طين الكلام ما يوصل لقلبي ولا اثر بجوارحي ، لأني ميتة والميت ما يتأثر بالظروف من حولة
- ولج وين تلكين منه
جاوبتها بسؤال
- خالة يعني اني هسة انحسب مطلقة لو شنو !؟
- اي يا قهر عمري مطلقة رمى اليمين عليج يا خوثة خواتج ،
ياربي شمسوية اني وتجيني المصايب هيج شمسوي يربي ،

تركت الهول الها ولنحيبها و رحت لغرفة سما وهي اتبعتني بسكوت ما نطقت ولا كلمة ،
اكتفت بأخذ رائد وطلعت ، ورجعت ورة ثواني وما اعرف وين ودت الاطفال،
- احجي الي الصار ليش طلكج رائد
ما كدرت انطق الصدمة كانت اكبر من ذنبي ، غرگانة بماي الذل والهوان والكبرياء مثل الاحتضار بين الحياة والموت مثل شجرة ميتة نامية بأرض مخضبة بدم العزا ،جدار ردة فعلة اتحركت فجاة وصدمني حطمني و اتكسرت أضلاع گلبي لقطع صغيره غير صالحة للأعادة ، حطيت راسي على السرير وتوسدت بوسطه و رجلية نازلة على الارض اضرب على حلكي اكتم بواجيي الي تحولت لنحيب وعويل ،

يتبع