رواية الرعناء والأشيب الفصل الثلاثون 30 - بقلم زهراء العراقيه

أسميتٌك
من جهلي وطناً ،
ونسيتُ أن الأوطان تُسلب...!

ٓ محمود درويش

سما حنضل لساني من فتحت خط و بعد كلمة هلاوي منها كالت
- سمعت رضوان متقدم لخطبة لينا .

- لهفة اسمعيني حبي ، ترة اني

- ترة ادري من شهر ، قبلج !

اندهشت  خليت قلمي على الميز و شلت كتب من غير دارية واهتمام خليتهم ع الميز و علامات الاستفهام طغت على ملامحي
- شنو تدرين من شهر؟
حسيت بصوتها نبرة حزينه
- لينا كالت الي ، تدرين قريت كم رسالة الها وهو يوعدها بحياة طيبة وياه
احتقرت نفسي حيل لأن غرت من خالتي وصديقتي ، الي اتراويني اسرارها .

-لهفة ، كله مني اني أملتج بيه
-اي انت أملتيني من كلتي الي يسأل عني و مهتم اوووف واني الي ما سيطرت على أعجابي بيه

- لهفة حبي مجرد اعجاب ، تنسيه مو حب هذا انتم لا حاجين مع بعض ولا اتعرفون بعض عن قرب ،

ردت بصوت باجي
- لج اتعلقت بأمل كاذب ، امل يوعدني اني راح احضى برجل حقيقي ، يحميني ويخاف عليه غيور ،
- حبي لهفة
- سما اسمعيني اكمل اترجاج لأن حطك والله
-احجي حبي فضفضي
اخذت نفسها و انطت مجال لشقهاتها تطلع لا نختنك بيها
- اخوية الي جان بمثابة درع حماية الي سافر ، سافر وبعد ما رجع حتى بالعطل يجي كم يوم ويرجع حب حياة الخارج

والدي مشاكل وماكو توافق بينه وبين ماما يم وظيفته ما يريد يتسقر يمنا وظال يوم يمنا  وعشرة لا ، اني وماما فجأ لكينا نفسنا وحدنا و بركبتنا اختي المراهقة
تعبت من كوني المساعد الاول لماما بتحمل المسؤولية تعبت واني ادعي الصمود ، تدرين اوت البارحه رجعت للبيت بتكسي وحدي ، تدري السايق من عمر جدي ، اتحرش بيه

اخر كلمه كالتها و بدت تبكي  بعدها بصوت
ما هانت عليها نفسها ، سكتت مكدر اتكمل واني بودي هسة يمها واسيها ،
اعتذرت هي وسدت الخط ، رسلت الها رساله بأني حتصل عليها الصبح اطمن عليها ، واتركها مع نفسها افضل ، اهنا طلعت من غرفتي شفت بابا بالهول بودي انحني وابوس رجلة بهاي اللحظه كومة احاسيس اجتاحتني ، وهي الرضا و الارتياح عندي اب حنين و يباوع لعيونا قبل ألسانه ما ينطق الطلب يجيبه حاضر النا ، عايش النا و يمنا ، مكدرت اسيطر على رغبتي بتقبيل ايده بهاي الثواني
رحت اله وفاجئته من كعدت على يدة الطقم الخشبية و اخذت ايده الي جان لازم بيها الرمونت و لابس مناظرة الطبيه بأطرهم الاسود وفانيلة بيضة ام ربع ردن مع سروال حليبي  ،بستها و بست راسه
-بابا احبك
باوع الي بنظرة متفحصة وكال
-شرايده خير ؟
-ما
قاطعني
-لا اكولين ما كفاني المصرف ، كافي شصير اني ، اقتصدي اشوية ، الزمي ايدج بابا
وكأن امي تشتم ريحة الفلوس من يجي طاريهم ، اجتنا و صحن الشلغم بيدها حطته كدام والدي على الطاولة
وكالت
- روحي اخذي من اخوج عوفي ابوج الراتب خلص على اسوالفج
- منو كال الكم اريد افلوس
يعني بابا ما ينباس الا ناخذ منه افلوس غمزت لماما ،وبابا اصلا ممنتبه يباوع الاخبار المملة ماما صار وجها احمر و عاطت بيه اروح اقرة

كمت و وكفت يم باب الهول ، واخذتلي نظرة اخيرة على بابا وكعدته من اروحلة فدوة هو كرشه ، من شفت مرة اب لهفة كلت هنيالها محافظ ابوها على ليقاته ،
اثاري والدي محافظ على الاهم وهي لمتنا ، ما فرط بواحد بينا ، اميرة لحد الان كل راس شهر الها مبلغ يساعدها رغم هي الحمدلله حالها افضل من قبل ، رضوان من طلق احلام شال ايده من المصرف حتى يسدد ديون القطعه الي اشتراها بالعكس ساعده ، علي واني وايمن ما علينا قاصر ، و نوفة رغم هي الوحيده بينا أحوالها المادية مستقرة و بيتها اصلا من حجم بيتنا بمطنقة ارقى مع هذا يسوك لأطفالها ويروح الها ، وما نساها بيوم هذا شي لازم اذكرة الكم ولا بأخس حق والد فاضل مثلة امين بعملة و بيته ،
نجي لموضوع لهفة كانت محتاجه لرجل مثل رضوان تنسند عليه و اتوهمت بيه امل يجي يوم ويلتفت الها ، رغم هي كانت فاتحه باب التواصل بس هو حذر وياها ، من سال عنها كم مرة قليله كلت الها وهذا اغبى شي سويته عشمتها ، وهو سؤاله عابر ، المهم خطبة رضوان صارت بيها عراقيل اشوية اهلها مو بسرعه الا دزو خبر موافقين بعد ما راحت الهم امي ، نوفه اتكول رائد حيل راغب لهذي الزواجه بس اخوه وامه مو هلكد راغبين ، بس لينا و والدها مقتنعين جدا صارت الخطبة والحمدلله ، لهفة شفتها متماسكة بيومها لكن ما ظلت اشوية وراحت ، نوفة اضاهر حيل اتحب لينا يمكن فرحانه اكثر من رضوان ،
المهم ما طولوا اقل من شهر اجر رضوان شقة ، و بدأ يأثث بيها وحاولنا نساعدهم بالهدايا ،
نوفه جابت اله ثلاجه ، اميرة مدات
ماما زولية ، بابا طباخ ، ورائد من ذاته جاب غسالة ، اخوها الثاني هم جاب و اختها كريمه حتى لهفة جابت هدية ، اني هم من راد يروح للشقة يوضبها ، رحت جبت هديتي و ركضت اله
-رضوان رضوان
بتملل
-هاااا
شرايده
-ها هاي هدية بيتك الجديد
باوع الها والي وكال
-هاي هديتج ؟!
رفعت تك حاجب وكلت
-اشبيها ؟
-جدرية خبز ،؟
ضحك
-بس عمي انعم الله عليج
تدخل علي جان يريد يطلع واحنه بالكراج
-ههههههه ولج لو مغلسه ولا هاي الهدية بوزت عليهم
-اخذ جدريتي  اشرف الي
-تعالي تعالي ولج منيتي بيها جيبيها خوش هدية والله محد فكر بخبزاتي وين احطهم
اخذها وهو يضحك
-اي لعد اشعبالك غير گلبي عليك بعدين ترة صغائر الامور هي اعظمها اخذها مني
-عفية احسن من بعض الناس
أخذها حطها بالسيارة الي جنا واكفين يمها وكال افتح علي الي الباب

،
وتم زواج رضوان من لينا ، ولبست لينا ثوب ابيض مع طرحة محجبات و حفلة بسيطه ببيتهم الكبير التيمنا احنه وعائلتهم ،

***
نوفة
رحت لصالون هاي لاي سوتني شي ثاني حلوة بس مو تطليخ لا صدوك تجميل نحتت وجهي نحت و لفت شعري و لبستني هي الشال بطريقه تليق بوجهي مع بروش ، بس قبلها لبست فستان وردي للمحجبات من فوك بيه ضيق و منفوش ، اريد اشرف رائد بين اهلة ومقررة ما اتحنط واخذ راحتي ، الاطفال يم تمارة هي بدلت الهم لأن جنت يم اهلي والصالون بعيد رحنا اني وسما واميرة ، اميرة جانت بس على مودي راحت و اني عزمتها على كرسي تعديل خطية شفتها انعجبت بالبنات الي قبلنا طلعن منه ، اما سما رادت تركع راسها بالحايط و ما قبلت ادفع الها ههههه سوت منكير و كعدت تتحصر ،
-عابت نوفة اي والله عابت
واني دا اتبوش جاوبتها
- انجبي ولج والله ميلوك الج ما حافة احواجبج
-اي تاخذ الي منهم اشوية نحيسة
-حتى تمارة تشنقج من غير شي هي هليام حاطتج ببالها
هزت ايدها ومثل العجوز ادردم
-ضحكتن عليه على مود هاي الشخبطه الي بيدي جبتني تهي بي
سرحت بخيالي برأي رائد من يشوفني هيج شكل جديد ، هو بالدوام صارله ١٥ يوم و بيوم العرس كال اجي ومناك ياخذني حضرت جنطي اخذهن لبيت اعيالي وياي ، و من رجعنا اخذنا تمارة والجهال اخذناهم ورحنا لبيت اعيالي ، دخلنا من الممر كبل لغرفة لهفة واستقبلتنا عمتي طبعا ، نزعت العباية و عدلت نفسي و طلعت تاركه اهلي يعدلون ،
رضوان قبلنا بشوية واصل هو وبابا داخلين   وعلي  وصلنا بسيارة بابا
شفته كاعد و لينا ابصفه ، اويلي اشكثر حلوين ولايقين على بعض طبعا الحفلة بس اهلها واهلي مقتصره ع خاله وحده منهن هي وكنتها واحنه بس احنه اجينا ،
وبت لينا منسق وياها رائد ابني ،
من اجت تمارة الا دخلت كلي جنت يم الباب ، هلهلت وسوت اجواء عرس عراقي بحت و دخلت اميرة طكت هلهولة و رضوان وكف النا والعروس سلمنا ،
اتحنطت اشوية و غاب عزمي بأني اكون على طبيعتي من شفت زوج كريمة و شاب ما اعرفه ،
اجتني لهفة جرتني
-تعالي اعرفج على اخوية
اهنا اعيوني ادور على رائد ، وسلمت على ابوها ، وعرفتني لهفة على اخوها
-هذا اخوية سيف طبعا مصارت فرصة تتعرفون من قبل ما ادري شايفين بعض بأجايز سيف لو لا
-اهلا وسهلا  سيف
-اهلا بحضرتج ، الي الشرف
مد ايده الي ، صفنت عليها مترددة ، مديت ايدي بسرعه خاطفة جريتها
سمعت ترحيب  اثاري رائد توه اجه سلم على والده وباس ايده  وسلم على والدي وهم باس ايده ، اووف اشكد احب تفاصيل هالرجال ، كمل سلامه على العرسان واني ظليت واكفه يم لهفة الي كعدت ابصف  اخوها ، انتظرة يخلص واسلم عليه ، سيف لاحظني واكفة
وكفلي متبرع بمكانه
-اتفضلي مرت خالي ليش واكفة ،
 
-لا اكعد ،استريح اسلم على رائد
كلتها بخجل وابتسمت هو بادلني  وكعد
رجعت اشوف رائد بنظراتي خلص لو لا
لكيت اعيونه اصد ناحيتي ، من فوك لجوة و هو يتقدم ناحيتي راسم بوجهه  تكشيرة عكس قبل اشوية ويه العرسان ،
-اشلونج ؟
- الحمدللة مدامك بخير،
تدخل سيف واخته سلمو على خالهم
توتو شافه ،راح لرائد شال و صوفي وهاشم اجووه بوسهم وراح طالع من الاستقبال ، رحت وراه
شفته  دخل لغرفة امه
- روح حبيبي هاشم اهذ اخوتك وروح العب
صرف الاولاد واني اجيت يمه كعدت على السرير ابصفه انفرش ثوبي على حضنه
-  اشلونك حبيبي شكلك تعبان
مررت ايدي على خده اتحسس لحيته الي بيها كم شيبة عزيزات عليه  و زايتني تهيم وضايفاتله وسامه خاصه ،درت وجهه عليه جان يباوع لكدام ،
-اشبيك
-اشعندج اضحكين ويه سيف ؟
- يا سيف ؟
خزرني و وخر ايدي عنه ورجع يباوع للفراغ
- ما ضحكت والله
-و من اشوكت انت اصافحين رجال ؟
اوووه طلع لاكفني من سلمت عليه جاوبت والبسمة انرسمت على وجهي!
- والله هو مد ايده خجلت ارده ، ما يعرفني ويعرف عاداتي

كانت اكو مسافه فاصلة بين رجليه شابك اديه عليهم و دنك راسه و التفتت عليه
رد عليه بأنفة وزجر
- طالع انت العروس اليوم !
رغم حدة لهجته  لكن طربني غزلة حطيت ايدي على كفوفه
- كومي البسي شي فوك هذا الثوب
-هاا ليش اشبيه
- ضيق منا
اشر على صدري
- عادي انت مو متحب العباية بعدين بوسط اهلك ما اريد اتحنط
- حبيتها ، هسة حبيتها ارتاحيتي ، اكول الج صح  انزعيها بس مو قصدي احصري نفسج بهيج لبسج هذا مفصلج من فوك اتفصل   ،
امرني البس شي فوكه وطلع ،بداخلي شي تحرك فرح و احاسيسي بأنثوتي جاشت حبيبي واخيرا شفته يغار  ، بس عاندت ما لبست عباية محلوة اتكعبع واساعد  بالتقديم ، عمتي اعتمدت عليه، واشوفه بس يخوزر بيه وينفخ ، العرسان راحوا لشقتهم تاركين بنت لينا يم بيت جده،والعوائل بدت تنصرف بابا اخذ تمارة وسما وراح و علي اخذ اميرة لبيتها بتكسي ، واني رحت نزعت ثوبي وقللت المكياج واعزل البيت ويه لهفة و اختها وبت عاصم ،وعمتي اسوي عشى وهم ساعدتها بشي قليل  ، اتعشينا وياهم ورجعنا لبيتنا اطفالي بس بدلت الهم ذبوا نفسهم نامو ، رحت اله شفته يباوع لعبة بالتليفون تركته بالصالة ورجعت لغرفتي
فتحت الكنتور ادور على ثوب لحبيبي
، اخذت ثوي متموج بالبنفسجي الغامق قماشة جورجيت ، ذبة كلوشة وصله وحده يجي وبيه تعلاكات بسيطة تلزمه ،  مشطت شعري الرطب و حطيت مكياج حاولت يكون طوخ طبعا واخير ضبطت الايلاينر . دخل وهو واني اعطر جسمي ، راح للسرير و كانت عينه على تليفونه ، اتمشيت ببطئ ناحيته و وكعدت ممده رجليه وحده على وحده جنبة مديت عنقي اشوف بشنو مشغول
جان يراسل واحد لابس عسكري وكل ذاك يكله امرك سيدي ،
-مممم رئودتي
كلتها واني امرر ابهامي على رقبته
- ليش ما مشتاق الي
-مشتاق بس ثواني
كالها من غير اهتمام   ،
بصوت مملوء دلع
-ممم سلامك بارد و زمخت بيه وين مشتاق
بوسته على لحيته ابتعد كعد اكعود يراسل بنتباه ،
ذبيت نفسي على ضهره و ابوس و اعقج بوجه وكعت الجهاز من ايده
و وكعته هو و صعدت عليه
-ما تكدرلي هههه شفت ، اي اعترف ليش ما مشتاق الي
-دقايق  والله
تركني وهم رجع اله،كمت انفخ  هوى بحلكي ورحت
-رايحه انام يم الجهال ، اجاني لزمني من زندي وراسه مرفعه عن الجهاز
-باجر الانضباطي ينزل مجاز والغبي ما مسوي الي اريده
-جان خابرته مو رسايل ساعه.
-ينسى غبي
رجعني وكعد ورجعت اخبث
- بوسته على اذنه و لو احجي اشاورة منها منا من خلص و جرني و وكعنا 
بوسط السرير بالعرض ، حط راسة على صدري بحيث صوته طلع مخنوك كثر ما دافن راسه بجسدي ،
- اااااه ، نوفة ، اثاري الرجعة للبيت جنة وين اهناك مهما كثرت وسائل الراحة و الخدمة ما تعوض لحظة ترافة من هسة ،
احسه يحجي بصوت ناعس منا من سكت وهدات انفاسه وراسه صار ثكيل علية بس احاسيسي جانت موقوده نار بقربة يمي
-رائدوتي .
مجاوب ، بالشقة كلت
-شو نمت 
هم ماكو جواب و اتضح صدوك نايم
-زين بس عدل نومتك ترة نايم بالعرض
جان رجليه طالعات منها بالكوة اتحرك انطرح عدل وكال تعبان يومين ماكو نوم اهناك ، تعبت من القلق
تثاوب وكمل
بالكوه حضرت الحفلة اجيت اوكع من التعب انوب اكلت حلويات دخت بالزايد ،
غمض ونام ،
الفجرية كعدت صليت ، وشفته كام راح للحمام ، جنت مخلصة من طلع وتاركه اله السجاده ، وكف يصلي من ركع الا انتبهت لنفسي ناسية التربة عليها ازاحها عنه وكمل ، شالها وهو يدورها كدام عينه ، وقربه على حلكه وباسها
-ريحتها حلوة ، حطها بالمجر و لف السجاده و اجه يمي مدد
- ها ابو الحب اشلون صرت هسة

- والله بعدني تعبان ، السكر هلكني ، مو مثل قبل ، نوفة اعترفلج من يجتمعن كلهن السوة الضغط الجسدي والنفسي ما ما اكدر ما اكدر حيل اتعب
فهمت قصده و اكتفيت بوضع راسي على ايده ونمت ،

الصبح صبحنا على عركه جهالي ، وسويت ريوك الهم وهمه يهوسون يم رائد الي يلعب وياهم  ، ركض هاشم ع الميز من شافني اجهز بيه الريوك
وكال راح اكعد قبلكم سبقة رائد جان اقرب عليه وكعد وبحضنه رائد الصغير
-توتو سبقك
ضحكت مصبرت
-توتو هههههههههه حلوة بحلكك اضحك
-جيبي البيض
وهذا بيتنا ما يخلوا من صياحات الاطفال وهرجتهم
،
رائد مكنك بالصالة واني اجيت دنكت انضف جبس توتو الي تاركه مرمي ،
حسيته باحد لمس خصري
-فززتني رائد
-تعالي نضفي گلبي عليه غبار اهواي
دخلنا لغرفتنا
-الاطفال حبيبي
اتعزز واني بقمة شوكي اله وهاي عادة تتبعها كل النساء للرضا من انشوف مدى التمسك واللهفة !شال كذلتي عن اعيوني وكال
-طولانه  هذي بذرة اخبالج
ابتسمت
باسها وحطها خلف أذني  واخذ يبوسني  وكالعاده احسها بكل تفاصيلها وكأنها اول بوسة الي ،

***
ثاني يوم رحنا للعرسان وصادفت كريمة يمهم بس هي وبتها الصغيره لهفة معتذره عدها امتحان، لينا جانت لابسة قفطان اسود بشذر ذهبي وحاله شعرها تخبل ، و رضوان وجه يضوي سعاده وفرحه بعروسته  ،
كامت لينا و اخذتني وياها نحضر الكيك والعصائر ،
سالتني ليش ما اراسها صارلي مده طويلة تقريبا من اخر عركه بيني وبين رائد
- بصراحه كمت ما افكر بشي يغثني ويرجعني للخلف ، كل تفكيري برائد واشلون املي عينه ، وهمين اكلج شغله ومو مدح لأنه اخوج ، هو بس تجيني حاله الاكتئاب واراسلج كلبه يعلمه و يرضيني بتصرفاته و تعامله كله حنية صرت مكتفيه بيه وما افكر بالفات
- اكلج  هاي كافية الصحون
قاطعتني بسؤال وغيرت الموضوع ، عبالي راح تنطي تعليق ع كلامي احسه مهم وتطور كبير لكن عاذرتها عروس المرة ،
واني اكل اخذت راحتي و واوكل توتو كيك بأيدي
بت كريمة علقت
-دكلي بشوكه مثلنا دمرتي روحج
ياااه اشلون نسيت نفسي خرب .حرجتني باوعت لرائد اكيد ضاج من تصرفي ابتسم وهز راسه وابعد الشوكه و اخذ القطعه بأيده  ياكل كام !
رضوان
-دذبها من البداية ورطتوني بهاي هم ذبها واخذ القطعه وحطها كلها بحلكه دفعه وحده
خرب رائد ولينا ضحك طلع مصنع مثلي ههههه

،
الحمدلله حاسة برضا كبير و اعيش يومي بيومه من غير ما التفت وراية واحاول على كد ما اكدرانتبه لتصرفاتي ولبيتي اسوي الي يرضي رائد  حتى لا يباوع لغيري ، خايفه من تهديده الي  لا يسويه ويزوج هو مقتدر ،احاذر واجي على نفسي بطريقه كلامي لبسي دقتي بالنضافه لاجله ، وبديت اعود نفسي ، وحسيته حيل صار يميل الي و كاسبته ، سفرني لتركيا رحلة سياحه فقط اسبوع سبب عمله وخلينا الجهال يم اهلي ،
جان ياخذ سلفي النا على اليخت بملابس صيفيه هو، واني بمانتوا و بنطلون ،
-هاي تذكار النا للسنة الجايه نجدد الرحله ويه الاطفال
-لعد اخذلنا واحد ثاني
ويه ما التقط عيبت وصارت الصورة اتضحك
،،،،

٢٠١٧ شهر العاشر

جنت كاعده بزوية غرفتي ابجي واني اتذكر عشرتي مع ام فيصل الله يرحمها اليوم الصبح اتوفت ومشاعر الحزن اتحيط بيه ، راسلت اميرة وسألتها عادي اروح لفاتحتها ما ردت  ،
سألت لينا برسالة
-حبيبتي عادي اروح لفاتحه والده فيصل الله يرحمهم اليوم اتوفت ، لو صعبة على رائد يتقبل اروح ؟

؛؛

صار الليل الا ردت لينا
-البقية في حياتك ، عادي عزيزتي  رائد متفهم كولي اله ،
قررت بس يجي اخذ منه اذن ،

خلصت العشة الا دخل هو ، اتلكاه هاشم يبجي متعور راضاه وانطاه تليفونه وراح يسبح  ، جان الايباد عند صوفي ، جايب بس واحد حتى لا يأثر عليهم سلبا ،
كعدت ابصف هاشم ، بفكر سارح ايقضته الرسائل المتتبعة لرائد
-هشومي جيب ماما خاف شي مهم
مكتوب على الرقم لينا2
رسائل واتساب هذا رقمها مو مال العائلة مال شغلها ،
لفتت نظري اخر رسالة كايلة
كولت الها اتكولك رائد
شنو منو شنو اتكوله هي منيه دخلتها واكو شي بداخلي متخوف ،

فتحتها

شفت سكرين لكلامي وياها !!!!

يتبع
حبايب  قلبي التأخير غير مقصود الضهر انتهى وانحذف كوله وعدته رغم التعب لعيونكم ❤ بس مكلت الكم وما حملتكم ضوجتي كتبته بزعم مرة لخ ونزلته

و
والوردة الاخرى
user05357506