رواية الـرياش نَهج مُغاير الفصل السادس عشر 16 - بقلم اسـاور حسين 🦢✨

_______________________ الــريـاش
﷽

𓆩 اســاور حــسين 𓆪
بقلمي رواية : الــرياش

تتذكر من گتلي شما كُبر حزنَك
أظَل يمك؟أشو هسة الـ يوجعَني
أسبابهن منَّك !

لطفا لا تنسون التصويت والتفاعل بين الفقرات

⊰ دُر⊱

والتفت على نرجس وهو يحجي : شبيها شصار و..
يريد يكمل وصار وجهه بوجهه نرجس حسيت بريان
بدقيقة ايده صارت قالب ثلج والرجفة هزتني هز
ملامحه كلها صدمة وتنفسه صار عالي مخربط
همست بخوف : شبيك ريان تسمعني ؟

نرجس : اخي بيك شي ؟
ريان : لا اعتذر .

التفت عليه وهو مصدوم نرجس طلعت تخابر اهلها
تريد تروح ويايه ماتكدر تعوفني وحدي
_ شبيك ؟
_ كلشي يذكرني بيها صديقتچ نفس طريقة لبسها
للعباية حتى المعاصم بيدها نفسها  .
_ حبيبتك ؟
_ خطيبتي .

جر حسرة ومسح وجهه يحاول يبين ثابت وما مهتم
رجع نظراته اتجاهي قلقان يسألني شبيه
_ ريان احنا بمصيبة اخذوا شهد اخت علي الآكبر
عمامك اخذوها ويهددوني بيها واحتمال هددوا اهل علي الآكبر
لك راح تنهجم بيوتنا البنية فقيرة شنو ذنبها .

فتح عيونه ضرب على رجله وكف دايخ
يفتر يحير شيسوي ضرب على الحايط
وصاح : شنو هذولي وين عايشين عيب خرب بيهم عيب .

اتصل على انور اكثر من مرة ما يجاوب
كتب اله رسالة تهديد ورجع يتصل جاوب
_ اخت علي الآكبر عدكم .
_ اي .
_ وسم لك اذا ألزمك افصل راسك من جسمك يعار
عود انت الجبير شوكت يصير براسك خير حيوان رجعهاااااا عيب .

انور : أوامر عمامك، العيب من علي الآكبر واخوانا
يضربون بينا ويخطفون ويحركون بيوتنا بالمولوتوف .

ريان : خليها نظيفة بيناتكم زلم بزلم ولو مابيكم زلمة
بس طلععععع النسوان من المصيبة هاي البنية شنو ذنبها
يضيع مستقبلها فكر انور بس هل مرة اطلب منك تفكر
لك انت مسلم ياااا بني ادم حرررررررررام هاي هتك عرض
لا الله ولا أنبياء يرضون على هل فعل .

انور : وعلي الآكبر مو هتك عرضك .

ريان : لك حافظ عليهااااااااا وين هتك عرضي يا *******
ما تقرب منها والله ما تقرب منها ويحبهااا لك يحبها واختك
مرتاحة وياهم عوضها على حرمان اهلك انت عشت الحرمان
لازم تفتهمهاااا ليش تريد تكسّر اختك تزوجت على سنة الله ورسولة
انور هذولي ناس طيبين اعز شي عليهم شرفهم
لا تكسرهم هل كسرة وحق هدم كلبي يا انور والله اذا تسويها
بيدي اموتك تعرف شنو بيدي اموتك تعرفني اذا حلف انفذ  .

بدون ما يجاوب سد المكالمة بوجهه
وكفت ارجف اخذت جنطتي وامسح بدموعي
_ قبل لا يخلص الوقت اروح اطلعها منهم ما اقبل شهد هيج
يصير بيها لك ريان شهد ملاك وعلى ارض نازل ماتستاهل .

ريان : لا تروحين ديري بالچ دُر تخسرين كلشي .
دُر : تريد اعوفها تدمر البنية بسبب اهلي ؟
ريان: لا بس لازم نفكر قبل كل خطوة نخطيها .

شهد ..

ضياع ، خوف ورهبة من المجهول ، تلاشي لرغبتي بالحياة
لمجرد اتذكر اخواني شنو يصير بيهم اذا يعرفون أني مخطوفة
بنية وتنخطف بعاداتنا وتقاليدنا هل شي من الكبائر السبع
لزمت راسي يوجعني بس شفت واستوعبت اني وين
خليت ايدي على كلبي وصحت : علي الآكبر جود خلصوني وينكم .

غرفة باردة ، خسارة واضحة ، جو بارد غيوم سوداء
واضح شكلها من الشباك ، باب خشبي مقفول نايمة
على سرير كبير قاسي الملمس والإضاءة من كل مكان
تتوزع بكل جزء بالغرفة ، كعدت اريد اروح للباب
الدنيا بكبرها تفتر بيه قويت روحي لازم اصير قوية
وادافع على نفسي لأخر نفس مني احارب .

مرت ساعة ودخل شخص شايفته واعرف اسمة من تعارك
هو وعلي الآكبر اسمة ياسين وابو دُر يمشي وياه وابو يسار
أخيرهم دخل انور الحيوان كتف ايده واستند على حايط
يشاهد من بعيد بطولات عمامه العاريه .

ياسين : اخت علي الآكبر .
_ اخت تاج راسكم كلكم اخت زلمة شريف يحافظ
على عرض الناس مثل ما يحافظ على عرضه .

ياسين : فخورة بـ أخوج تدرين بسبب اخوج راح تنكسرين .
شهد : اخت علي الاكبر تكسر ما تنكسر يا حيوان .

هز راسه وابتعد وهو يركز برد فعل اخوانه كلها
ثواني وصار فوك راسي ضربني براشدي وهو يصيح
_ منووووووو حيوان ؟
بقيت ساكتة عيني بعيونه تركز بكل حقد وكره
بس ملامحي جامدة اول مرة بحياتي انور ضربني
والثانية عمهم رفع ايده عليه وضربني ، رجع ضربني راشدي
بظهر ايده فر وجهي رجعته نظراتي بسرعة وخليت عيني
بمستوى عيونه ما نزلتها دقيقة
_ منوووووو حيوان لچ منووووووو .

سمعت حركة التفتت على مصدرها كلهم واكفين
يعني اذا اضرب لو ادافع على نفسي يمكن اخسر
ضعف خسارتي ، لزم وجهي وصاح
_ تعرفين شنو راح يصير بيچ ؟
ضغطت على نفسي وبكل هدوء عكس عاصفة الرعب بداخلي حجيت
_ اذا طلعت منا سالمة او ميتة بالحالتين اعرف اخواني راح يدمروكم .

رجع ضربني بوكس فر وجهي وجسمي وگعت بالگاع
شاغت روحي عدلت نفسي وكعدت اباوع بوجهه
بحقد وكره اريد املخ هل عار تملخ من العصبية
صرت ارجف ماتحملت بس ضربني راشدي
هجمت على وجهه خرمشته تخرمش بـ أظافري
شالني من ايدي يريد يضربني بالحائط قبضت
ايدي وضربته بكل قوتي بوكس وخلي شيصير
خلي يصير هجم اخو وياه الضرب ما ادري منين
يجي على راسي وجسميّ وگعت اريد اجر النفس
حسيت انسحبت من ايدي شمروني على جرباية
وصاح : انوووور تنتظر هنا نص ساعة اذا اختك الـ***
ما اجت شوف شغلك بيها ونرجعها لهلها وشرفها بيدها
هاك هاي وصلتها البيضة هنا اريد شرفهااااا .

لچم كلبي دموعي صارت تجري على خدي
شوكت يخلصوني اخواني صرت اتمنى دُر تجي
طلعوا وبس الحقير باقي يفتر بالغرفة بعشوائية
فتح الشباك شرب جگارة من خلص سد الشباك
وگعد مقابيلي ومر الوكت واني اون من وجع ضربهم
ساعة ودخل الكلب عمهم ياسين : نفذ انور هل حيوانة
باعت اخت زوجها بنت الكلب لا تنرد ولا تتهدد اذا الزمها
والله والله اشرب من دمهاااااااااا .

انور : دقايق ويكمل كلشي .
طلع وقفل الغرفة صرت بس اني وياه ولو اموته لو يموتني
سحب الغطوة مني دفرته وشمرت روحي من الجرباية
من خوفي ركضت بزاوية الغرفة : عليك العباس لاا احلفك بأخو
زينب عوفني والله اذا تسويها اطلع منا واموت نفسي وذنبي
يظل بركبتك للموت اني شنو ذنبي بالصار  .

_ اخوج استخدم اختي حتى ينتقم من عدنا وتعودت اعامل بالمثل .
شهد : علي الآكبر يحبها والله يحبها ودُر تحبه اني حتى ماجنت
اعرف بموضوعهم ، انور انت دارس وفاهم فكر المغتصب يعتبر زاني
ورب العالمين ذكر الزاني بالقران
(وَلا تَقْرَبُوا الزِّنَى إِنَّهُ كَانَ فَاحِشَةً وَسَاءَ سَبِيلاً) .

نظرات الغضب تحولت لحيرة تقرب وهو متردد
_ لا تكثرين كلام .
_ اذا تكسرني اموت نفسي وما اسامحك اليوم الحساب
حوبتي ادور عليك وتسود حياتك اكثر من ظلماتها ما تتوفق
بكل ساعة ودقيقة تمر وبكل مصيبة تذكرني گول حوبتها
هااااي حوبتي راح تكسر ظهررررررك ، راح تصير مصيبة
بدقايق بس راح تظل كابوس بحياتك كلهااااااا .

لزمني من ايدي شمرني على سرير لزم قميصي
وشگگه ضربته على وجهه وصرخت بعلو صوتي
_ باجر من تنزل بحفررررة وحدك ومحد يمك غير اعمالك
لا عمامك ولا عمامي لا اهلك ولا اهلي يفيدددددوك عوفني
لك بس عووووووفني شلون ربك راح يرحمك شلووووون
وانت ظالمني خااااف لك خاف من الله لا تخاف من اخواني
شلون يطمك التراب وانت كاسرررررني . 

دفعني وسحب الغطوة غطاني ولزم راسه مصدوم
سحب بطل مي شربه كله وگعد بالگاع يكرر بالكلمات
_ كافي اسكتي لا تحجين كافي اسكتي .
لفيت روحي استرها طلع وقفل الباب هسة يفوتون كلهم علية
راح يدمروني ربي لا تعوفني اني بشدة ياعلي ادركني
ياااا حاضر الشدات ياعلي ادركني يا حاضر الشدات ياعلي ادركني .

رجع قفل الغرفة وذب القميص على جرباية
_ بدلي بسرعة وبدون صوت يلة .
دار وجهه وفتح كاميرات الباب الخارجي بتلفونه
شغل جگارة يشربها واني البس بالقميص جسمي ينفض نفض
وكل شهگة تطلع من صدك تشگ كلبي ومابطلت وانا اردد
يا حاضر الشدات يا علي ادركني لزمني من ايدي ويحجي
وهو يأكد على كل كلمة يحجي بيها
_ راح تطلعين منا بس اي صوت تروحين بيها واني
ما اكدر اساعدج ديري بالج تغلطين بتصرف .

طلعني وعافني راح للدرج يشوف المكان
كعدت بين مايشوف المكان رجلي وجسمي
نمل من الهبطة رجعني للغرفة ورفع اصبعة
_ اششششش ولا حرف لا تحجين اجه .
_ عليك الله طلعني لا يبدلوك .
_ يبدلوني شنو .
_ يجيبون غيرك  .
_ اشششش ما اخليهم .

رجع طلع واشر من بعيد اجي رحت اركض ايدي على
خاصرتي من ضربهم احس بوجع ودمار ضارب بطني
نزلت الدرج اتعثر وادعي ما يبدل رأيه صرت بنص الصالة
راح للشباك رحت وراه يمشي للمطبخ ركضت وراه
فتح الباب الخارجي وطلعني للكراج صعدني بالسيارة
وقفلها ورجع للبيت دقايق وطلع يعدل بالسلاح  .

يمشي سريع ويتلفت صعد عصبي تلفونه يرن ويغلق
بالمكالمة طلعها يسوق بكل سرعته من شفت منطقتنا
قبل لا تنتهي جانوا اخواني كلهم مجهزين روحهم يريدون
يصعدون سياراتهم وكفها بعيد بس اشوفهم قبل لا انزل
حجيت وانا اشهگ وكل كلمة تطلع مني احجيها بگلب محروگ
- لا محولل ولا موهوب لا بدنيا ولا بالأخرة وعسى كسرتي تصير بيك
وكل دمعة نزلت مني تتضاعف بعيونك وبصحتك وعافيتك
لا تشوف يوم حلو ولا مستقبل وتطلع بمرتك وبناتك وتتلوع عليهن
وتظل عمرك كله مصايبك تذكرك بيه يا ظالم حيرة اخوتي
وكسرة ابوية ولوعة امي بيك تطلع بيك تصير حقير انت احقر بشر قابلته .

نزلت وهو شخط السيارة طلع منها صوت مخيف
ودخان عصف بكل الشارع وكفها مقابيلهم
_ علي الآكبر رجعتلك اختك .
ركضوا على سيارة حرك بكل سرعته صعدوا
يمشون وراه بس حسن وابوية ركضوا بتجاهي
فوتني حسن جوة من شاف قميصي رجالي عرف
ملابسي مشگگيها گعد بالكراج ايده على راسه
اخذتني امي وهي تصيح : اسكتوا لا تحجون اسكتووووووووا .

فوتتني للغرفة كعدتني ترجف رجف تتفحصني
اندفع الباب ودخلوا اخواني انهاريت من الطم والصراخ حضني
ابوية وهو يصيح بعلو صوته حسبي الله ونعم الوكيل .

علي الآكبر: اطلعوا عوفوني وحدي وياها .
جود : انا ما اطلع .
يحجون وعيونهم تجدح من العصبية بس مسيطرين على اصواتهم
من طلعوا گعد على الآكبر بصفي حضني يمسح على راسي
وجود لزم ايدي بس يهز بروحه بس يريدني احجي
علي الآكبر: شهد احجيلي شصار كلشي احجيلي ؟

جود : وحقج ما انام ليلي اذا مايرجع احجي .

هزيت راسي مصدومة خجلانة احس كلشي انتهى بحياتي وخلص
صوت البجي صار يعلى على صوتهم خليت ايدي على اذني
وصرخت : عوووووفوني والله اريد اموووووووت عوفووووني .

علي الآكبر: شهد صا ..
ما كدر يكمل طلع ورجع هو وامي كعدت امي يمي
خايفة علية شصار:  فدوة يمه شهودة احجيلي شصار وياج .

بس تذكرت معدتي گلبت ركضت للحمام اذب من راسي
وعلي الاكبر ويايه يغسل بوجهي : عوفوني بس عوفوني .

حضني جود بكل قوته ودموعه تنزل من شاف دموعي
من رجعت للغرفة احجي وابجي احجي وابجي فقدت
نمت على رجل امي وانا اتراجف اهز براسي واملخ بروحي
رن تلفونه فتح خط مستعجل
_ لااااا لك لاااااااا مصيبتين على راس بساعة وحدة ما اتحملهااااا .
طلع مستعجل اسمع صياح جود وهو يبلغ ابوية .

جود : بوووووووووية اخذوا دُر من علي الآكبر.

دُر ...

حلم والحلم لازم الإنسان يصحى منه ويظل حلم حلو نتمنى نعيشه
هذا حال أيامي اللي خلصت بين حب ، اهتمام ، امان علي الآكبر
بنيت سعادتي على اساس تعاست ناس ما الهم ذنب اختاريت
نفسي وخليت الناس كلها تتذابح وعلى اي ساعة واحد بيهم
يموت واظل طول عمري متندمة وألوم بروحي والناس تلومني .

مصيبة بعد مصيبة خلصوها اهل علي الآكبر من يوم دخلت حياتهم
من حرق المطعم وابن حسن ، وقتل اخوانه ، وختامها شرف شهد
ما اسمح نفسيي تعبت واني عايشة بقلق على اي ساعة انتهي
اروح للموت برجلي وخسارة وحدة ولا العالم تخسر احبابها بسببي.

صحصحت واني بالمستشفى نرجس يمي خايفة بعد
ما فقدت الوعي بالجامعة دخل ريان بيده علاجي
نرجس : اشربها هسة .
ريان : اي .
نرجس : ساعدني اعدلها حتى تشرب بلا امر عليك .
تقدم واشر الها وصوته يرجف
_ اني اعدلها وحدي .

ابتعدت شهد وهي تمرّد باصابعها مرتبكة من نظرات
ريان سحبت العباية على ايدها كعد على كرسي لازم راسه
سودة علية كسروا گلب اخوية والذكريات دمرت روحه
وتهشمت ضحكته وفرحته ، غمضت عيوني لدقايق
لازم اطلع أساعد شهد قبل لا تخسر وبرگبتي حوبتها تصير

دُر : نرجس اخذيني للحمام عفية .
اجتني بسرعة ساعدتني لزمت ايدها وريان حامي ظهري
يمشي وبعيونه خوف وقلق بس دخلت الحمام صحت
_ نرجس عفية اريد جنطتي بالغرفة .

طلعت وريان راح وياها تجيبها لان ما تندل وحدها وتخاف
عدلت ملابسي وصعدت مصعد ونزلت لو على ريان لو اموت
مايخليني اروح الهم طلعت اجرت تكسي لمحت ريان طلع مستعجل
ويركض ونرجس وراه تحجي وهو التفت يأشر على سيارة
صعدوا وصرت ما اشوفهم رحت على بيت عمي ياسين
طلعت خدامتهم دخلتني وزوجته كاعدة هي وصديقاتها
عبالك نسخة مستنسخة من امي بلا اهتمام اتصلت على ياسين
وهو قام بالواجب دخلوا اربع شباب على اساس ولد عمي
واني بعمري ما شايفتهم ، لزموني بقساوة وحقد شمروني بالسيارة
وصلوني البيت بدايته مزرعة بس بعيد عن بيوتنا بس شفتهم
انسحب الدم من جسمي قويت نفسي ونزلت
ياسين : اجت الصلفة  الي نزلت راسنا .

شجعت نفسي حاولت والله حاولت وكلام علي الآكبر يرن براسي
" اريد تصيرين لبوة اصيلة قوية مثل زلمتها "

دُر : اذا احب واتزوج على سنة الله ورسولة انزل راسكم ؟
ياسين : اهلج وعمامج راضين على زواجج ؟
دُر : ظلام كلكم ماجنت اعرفكم بعمري ما شفتكم
بس گالها ريان من أخالفكم قوانين ظلمكم تطلعون
من نلتفت على حياته وبعد ما نحتاجكم تحاسبون وتضربون .

من سمع اسم ريان وعبالك سبيتهم ماذكرت اسم اخوية
مايضرب راشديات بوكسات يعاملون جسمي معاملة جسم الزلم
انضرب بكل قوة وگعني بالگاع يضرب بوكس ويرفع ايده يضرب بالثانية
بخبال ويصيح : اخت ريان تعلوم اخوووووووووج الكلب
تعاندينا موووو تهدددين بينا لچ اوصل الچ ولا علي الآكبر ولا اخوته
يفيدونچ اليوم اني وياچ للصبح اطلع روحچ والله روحچ اطلعها .