رواية الـرياش نَهج مُغاير الفصل السادس والثلاثون 36 - بقلم اسـاور حسين 🦢✨

انتظرنا ساعتين وطلعوا وجهه متعوب الى درجة العدو يبجي على حالته
الدكتور : خلال اربع وعشرين ساعة نحدد وضعيته
حالياً صعبة لان المريض يعاني من مضاعفات خطيرة .
ابو حسن : مثل شنو هل مضاعفات .
الدكتور : رسلنا عينات دم ننتظرها كم ساعة وتطلع .
دُر : ريــان شنو قصده .
بس راح الدكتور ريــان اشر لجود راحوا ورا الدكتور
ما اعرف شنو يحجون وياه ويقنعون بي الظاهر اكو شي يحاولون يخفونه.

علي الآكبر ...

خمس ايام بخمس ساعات كفيلات آصحى بيهن على نفسي
وأرجع الطريقي نفسي قبل اشتاقيت الروحي القديمة
كافي فقدت نفسي بما فيه الكفاية ، خلص لا اصفي حسابات
ولا احاول ابرر الي يريدني يدورني حتى يبرر تصرفاته ويايَّ .

جنت اشوف احلامي تنهدم گدام عيني مابيدي احافظ
عليهه احل مشاكل العالم واني مشاكلي اعجز احلها
تصعب عليَّ اضعف وانكسر وارخص كافي بعد يا روحي كافي .

فتحت عيوني وحجيت بتعب مهدود
_ بوية بعدني عد كلامي اريد ارجع .
_ باجر تطلع وبيدي أوصلك بعد ما ارد كلمتك .
_ اليوم اريد اروح اليوم .
_ اشوف الدكتور وارجع .
طلع وربع ساعة ورجع هوه والدكتور كشف على جرح وجاوب
_ تگدر تروح بس ما انصح تسافر هل طريق الطويل .
علي الآكبر: ضروري دكتور ضروري .
_ بس ارتاح كُل ماتحس بالتعب .
وصف العلاج ساعدني ابوية بدلت وطلعني وهوه ساندني
وصلني للسيارة يسوق بيها بنص الطريق نمت وبراسي هوسة
تتسابق الأفكار براسي دمرتني ، گعدت على صوت عم ابوية
يحچي هوه وياه ويعاتبه لان جبرني ارجع بالايام الفاتت
سلمت عليه ونزلني ابنه بدر للبيت اخذت العلاج ورجعت نمت
وخلصت اسبوع بين اكعد اكل وارجع انام ماعندي طاقة .

بس بديت أتحسن ابوية رجع وعافني طلعت وياه
الحد ما راح واختفت السيارة لزمت صدري
مكان الجرح ومشيت للبستان كعدت على شجرة
گاطعيها من نصها صايرة مثل الكرسي
دقايق والتفتت على صوت مو غريب ابتسمت
_ فلك .
_ هلو عمو الحمدلله على سلامتك خفت عليك .

شفت الگلاص بيدها وعلى نفس ابتسامتي وجاوبتها
_ الله يسلمچ هذا شنو ؟
_ سويت الك نومي بصرة اشرب طيب والله بيدي سويتها .
اخذته منها شربت شوية راحت شالت ارنب واحت يمي
_ شلونها دُر .
_ ان شاء الله زينة .
_ شفتها ؟
_ اي .
_ حجيت وياها .
_ وياريت ما حجيت بساعة عصبية .
_ انتوا الزلم ما ادري شبيكم من تصيرون اعصاب تحجون شيش بيش .
_ شنو هاي شيش بيش .
_ اندري ابوية يحجيها اي وبعد سولفلي حباب عمو .

رجعت الگلاص واشرت بيدي الها
_ فلك شنو طلعتي ؟
_ احممم محسوبتك طلعت صيدلة مثل دُر .
_ شاطرة عفية عليچ .

عفتها ورجعت للبيت وهيَّ عبرت على بيت الثاني فاتت
ابو بدر : ها عمو علاوي دوختك فلك ؟
_ لا عمي وردة فلك .
_ طالعة على امها تحجي هواي بناتي من الأولى على امهن مو اجتماعيات.
_ الله يحفظهم الك عمي .
_ شلون صرت ؟
_ الحمدلله بلغت بدر باجر اطلع وياهم اشتغل ما اريد اكعد بالبيت .
_ اي والله عمي اريدك تبني غرف اخزن بيها المحصول .
_ تدلل عمي .

لليل رجعوا الولد سبعة اولاد ابن عم ابوية
متزوج اثنين الأولى عدها ست بنات والثانية
سبع ولد على بنية الي هيَّ فلك ، طلعت وياهم بالمزرعة
نتفق على شغل باجر وندخن نرگيلة ، رجعنا للبيت متاخرة
والثاني يوم من الفجر طلعنا على شغل اريد بس التهي اشغل تفكيري
بديت اني وبدر وتقي وحارث نبني بالغرف والباقي يشتغلون بالزرع
بلشنا من الصبح المغرب رجعنا بس غسلت بقيت بفراشي
النوم محارب عيوني كلهم اكلوا وناموا بس انا اتحرك بمكاني
طلعت برا شربت جكارة وبقيت افتر بالنص ساعة ورجعت
اختنكت فتحت تلفوني واتمنى ما دخلت شفت حساب دُر نشرت
رجعت طلعت حتى اشوفه براحتي كعدت على نفس الشجرة
فتحت التلفون شفته أيدها بيد غيري بقيت صافن بس
گلبي يلجمني بدلت على ستوري الثاني مقابيل الجامعة
مالتها ومكتوب بداية جديدة غلقت التلفون ورجعته بجيبي
ومشيت ما ادري رجلي وين تاخذني گلبي ينزف روحي رافضة
الصار وين جنت اني وياها وين وصلنا معقولة هاي دُر ..

قفلت التلفون وحلفت ما ينفتح بعد مثل قبل
خليت روحي بالشغل عيد عليهم كلهم
يوم ويومين واسبوع واسبوعين وصار شهر وشهرين
وانا بعيد عنهم كلهم لا اعرف عليهم شي ولا يعرفون شي عني .

بدر : علي الآكبر هنااا هاي الغرفة تسوي الها سقف ثانوي .
_ جيت .
ركبت نص وصحت
_ بعد وينك بدر انطيني الباقي يمعود .
جــود : تريد ابيض لو الرصاصي ؟

نزلت راسي مصدوم بالصوت يابووووووية شگد
مشتاق الصوت الخايس كمزت من الدرج وحضنته
شهگ بصوت عالي يبجي من كل حيله
_ صدك تحجي علي الآكبر لك تعوفني انا جــود تعوفني ؟
_ شلونك شلون عرفت مكاني ؟
_ شردت منهم والله صار اسبوعين افتر ادور عليك
ابوية مايقبل يگول وينك ريــان من مكان يدور واني من مكان ثاني  .

طلعت برا الغرفة شغلت جكارة صبيت جاي شربت شوية وسألت
_ ريــان شبي ؟
_ يريدك غير صاحبة .
_ جــود ما اريد احد لا تنطي عنواني .
_ اول ما عرفت موجود خابرته بشرته اعذرني يعني وانجب .
رفعت ايده وغميته وصحت
_ من كووووون غمه تغمككككك غمممم يا اغم على هل مصيبة.

لزم راسه يلوب من الوجع ودفرني من الوجع
_ يا حيوووان دايخ ولك دايخ .
بعدني احجي وياه وسمعت صوت من بعيد
بدر : علي الآكبر صاحبك هناااااااا .
رفعت راسي شفت ريــان داخل المزرعة بكامل اناقته ابن الرياش
ضحكت على منظرة ولزمت عيوني دنكت راسي وضحكت
ريــان : اي اضحك العار اضحك طيح الله حظك .

وصل يمي دفرني رجلي وضربني على ظهري
_ شتحسسسسسسس ابن الـ***** عايفين شغلنا
وندور عليك ماعدنا شغل وعمل غيرك .
علي الآكبر : مجبورين انت وياه ؟
ريــان : غير مشتاقين لسوالفك الطايح حظهااااا .
علي الآكبر: امكم خلقتكم ونسيتكم ؟
ريــان : استلم ويگلي اخووووووو لا تضربة .

نزع السترة وكف ردن القميص ولزمني من ايدي لواها ورگعني
بالحايط بكل قوته يدفع بوجهي ويضرب
ريــان : اذا ما ارجع اخليك تصحى على زمانك يعاااار .
_ راسي لككككك ريــان كافي بشرفك كافي .
_ تعيدهاااااا .

دفعته برجلي وصحت بي
_ بعد عرفت مكاني ما اكدر اعيدها .
_ يعني بعدك تريد تعيدها .
جــود : بس أعصابك خليني اضربة وياك .
علي الآكبر: بشرفكم كااااافي .
ضربوني هوه وياه وشمروني على زرع
ريــان : حلفت وين ما اشوفك اضربك اطلع قهري بيك .

عدلت ملابسي واستندت على شجرة
انا ساكت واثنينهم ساكتين بالساعة
عيوني من التعب ادمع فركتها وجود قطع الصمت
_ صار شكد ما نايم ؟
_ مو هواي اسبوع قبلها عشر ايام بديت اعود روحي .
ريــان : صاير ضخم شنو تلعب حديد ؟
علي الآكبر: اشتغل هنا وبليل نروح اني وحارث نتمرن .
جــود : المكان هنا عبالك جنة .
علي الآكبر: لهاذا السبب احبة خضار وماي وحيوانات
كلشي هنا صافي حتى الناس كلهم طيبين .

رحت اكمل شغلي وبعدهم بمكانهم يحجون ويايَّ
جــود : المعنى ؟
علي الآكبر: ما ارجع مرتاح هنا .
ريــان : ترا درستك انت ما مرتاح .
علي الآكبر: ترا هاي كلمة اختك لا تعيدها هووواي .
ريــان : علي الآكبر ارجع الخاطر الله ترجع ليش عفتني بنص الطريق .
_ تعبت اسوي بالزين وأنفهم غلط .