رواية الـرياش نَهج مُغاير الفصل الثاني والأربعون 42 - بقلم اسـاور حسين 🦢✨

_____________________ الــريـاش
﷽

𓆩 اســاور حــسين 𓆪
بقلمي رواية : الــرياش

واضم عيوني لعيونك
وانت عيونك لغيري

لطفا لا تنسون التصويت والتفاعل بين الفقرات

⊰ شهد  ⊱

تلمست الوشم بيده بلا عقل مني ومشيت اصبعي بخط مستقيم
ارسم شكل الوشم وهوَّ يتبع ايدي بصدمة لان لزمت الوشم
شهد : اني حبيتك من شفت الوشوم بجسمك اذا تمسحهن
لوووو تموووت ما اصير الك  .

شهگ مو بس مصدوم يحير شلون يتصرف ويعبر وجامد
بيدي يخاف يتحرك وانتبه وابتعد صافن بوجهي وكان اني اكبر احلامه
حتى النفس ما اسمعه بعد يتنفس ولأول مرة اشوف رجل بطول
وعرض وضخامة يرجف رفعت عيوني ثبتتها بعيونه تلمع لمع
ابتسمت ورفعت ايدي ابتعدت عنه بشوية وهوَّ يهمس
انــور : حبيتك حبيتيني انتِ تحبيني شهدهد ؟

بلعت ريگي واني اشوف الجرح شلون يجري دم
اشرت على صدره وهمست بخوف
شهد : جرحك .
_ متخدر اني ماحس .
_ خابر احد يجي ياخذك موزين .
_ جاوبيني بس جاوبيني ؟
_ وين تلفونك اني اخابر ريــان ؟
_ تحبيني يعني مو بس اني اريدچ انتِ تريديني .

رفعت حاجبي اشوفه شلون يتلمس مكان الوشم الي جنت لامسته
انــور : واهلچ ، ابوچ ، اخوانچ رافضي كارهيني بسبب هل وشوم ؟
شهد : اي روح شيل الوشوم وخليهم يتزوجوك .
انــور : يعني اذا اشيلهن ما تتزوجيني ؟
شهد : باحلامك اووووععععع تصير رجال عادي حالك حال الكل .

نزل راسه وفاتح عيونه وساعه يقلّصها ويأشر
بيده ويشمر بيهااا ما مستوعب كلش ما مستوعب
انــور : اهلچ يريدون تتزوجين شخص عادي .
شهد : ما يستهويني ولا يخليني التفت وانت بكيفك روح صير منهم .
مد ايده اثنينهن ورفع راسه على تبين رگبته
_ يعني تحبين هاي الوشوم ؟
_ خابرررر اخوك .

تركته ورحت اعدل بالأوراق وهوَّ جامد بنفس مكانه
من شاف الدم يزيد واني اوزع اوراق لا ارادياً درت
بكل عصبية ورافعه حتجبي وبنبرة امر صحت
_ خااااااابررررررر اخووووك اخررر مرة اعيدهاااااا .
هز راسه عبالك جان نايم وصحّى طلع التلفون واتصل دقايق وحجه
_ الو ريــان وينك بالبيت ، اني بالمدرسة وجرحي ينزف
اي دخت تجيني انتظرك لا ما انضربت، ويامن اتعارك يمعود دتعال .

بس سد الخط شفت الطلاب خفت يرن الجرس
شهد : لملم روحك ويلة طش الغرفة المديرة خليها أداريك .
انــور : تعالي داريني انتِ .
_ تطلع لا والله افضحك واشهرك بالمدرسة هسة اطلععععع .
_ من تحجين اتعلمي شوية بلطف عبالك علي الآكبر گدامي  .
_ اخوية العلم ، لازم ما يعجبك علي الآكبر ؟
_ هوَّ مايعجبني بس ..
_ ما يعحبك شنووووو هذا اخوية تعرف شنو اخوية قطعة من روحي
اذا ما يعجبك لا تجي يمي ولا تشوفني وجهك .
_ يعجبني وانعل ابوية لابو اهلي اذا ما يعجبني .

ابتسمت وكملت بدون ما انتبه عليَّ شبي ما بي وين
يباوع وين راح بس هوَّ بعده گاعد خلصت الأوراق
وعطرت الصف مثل ما متعودة بصفي ارتب صفّي وأعطره
رن الجرس وقبل لا يدخلون الطلاب شفت ريــان اجه من بعد
من شافني عرف انــور وين منعت الطلاب يدخلون رجعتهم
للساحة ورحت بعيد دخل يفتح بدگم قميص انــور
ريــان :  شلون صار هيج مو طبت .
شهد : رجاءً اخذ اخوك وتفاهم انت وياه بالمستشفى
عدنا درس وامتحان اهم من هل مشاهد الدرامية .
ريــان : درامية؟ نعم ؟ اختي ما تشوفين الدمممم .
انــور : لا ترفع نبرة صوتك عليها لا انطيك براشدي امطلك مطل بالصف .

وكفت بصف الباب واشرت على ساحة
_ اتفضل استاذ اخذ اخوك .

ريــان : حتى تشوف بعينك انــور وتبطل منهاااا البنية ما تريدك .
انــور : اي تكرهني .
ريــان : لا هيَّ ولا اهلها لو مو تشيل وشوم لو تنزل بيك اية .
انــور : اي لا وشوم نوكف بعينهم ولا توبة .
شهد : اتفضلوا عيني .
انــور : عينچ شنو عينچ عيب .

ريان لزمه ساعده يوگف ويسد بالدگم يعدل بي لان عيب
انــور : اكدر امشي وحدي امشي قبلي .
طلع ريــان وانور يمشي وراه واني بصف الباب
انــور : شهدهد .
_ ها .
_ احبچ المدگدگ يعشقچ ومنتظرچ

نزلت راسي بخجل عزا معقولة اني اخجل من المدگدگ
_ المدگدگ مالتچ يتحلم بيچ تكملي انا اكمل بيچ شهدهد .
عدلت حجابي وابتعدت حتى لا اسمع اكثر وجهي انطعن احمر
هم طلعت اخجل والله ما مجربة هل شعور صخام .

رجع ريــان اخذه من مد ايده انــور لزمه وطلعه بقيت اشوفهم
شلون يمشون وابتسم هوَّ بيا حال وابتسم شنو هل مشاعر المعوقة
استوعبت نص الوقت طار اشرت للطلاب يرجعون للصف
وحتى ما يرتبكون من الامتحان اخدتهم دقيقتين احجي وياهم
ويجهزون نفسهم بنفس الوقت والأوراق شرحتها حتى يستوعبون اكثر
بدا الامتحان واخذت وقت زايد من الفرصة يكملون ، بعد ما خلص
الوقت اخذت الأوراق وطلعت الغرفة المدرسين گعدت ارتب بيهن
وفاتت ست وسن تهز براسها وتذب حجي الخايسة
_ شلون نضرب استاذ انــور خطية ما يستاهل .
گعدت وهيَّ توجهه الكلام اليَّ مباشرةً
وسن : استاذ انــور جان ويايَّ كلشي ما بي
راح يشوف ست شهد بصفها طلع حالته حالة ودم وجرح و ..

ضحكت الطف الجو لان كلها مثبته نظراتها عليَّ
شهد : اي مو صفي بي أدوات جارحة .
وسن : الموضوع مريب .
شهد : ماكو داعي لتعظيم وتكبير الأمور خلونا مركزين بالدراسة وخلص .
وسن : مركزين بس مصدومين بالصار بـ استاذ انــور .
شهد : شدعوة عليچ اكل عقلچ استاذ انــور يا انــور ويا استاذ انــور .
وسن : زميلي .
شهد : زميلنا كلنا بس ما نحجي بي مثلچ شنو تعرفي ؟
قلبت الطاولة عليها وعفتها بفشلتها تريدهم يشكون بيَّ خليتهم يتهموها .

كملت الدوام على اعصابي طلعت شفت سيف الدين منتظرني برا
رجعت اني وياه نمشي وعلى شارع صعدنا كوستر لان السيارتين
عند اخواني وكلهم مشغولين ، وصلنا للبيت سيف الدين من النوع
كتوم مايحب يحجي لو يعبر هواي بس عنده خصله من جــود يضحك
واكثر من جــود ، دخلت للبيت سلمت على امي ما جاوبتني
دخل جــود هوَّ وفلك وياهم دُر راحت بوجهه لبيتها
آم حسن: شبيها مرت اخوك ؟
جــود : مثقفة تتزعل هواي وابنچ متونس .
ام حسن : لا والله صدك شبيها ؟
فلك : يمكن لان علي الآكبر ما اجه آخذها .
ام حسن : چا غير طالع هوَّ وابو معزومين .

فتت بدلت وطلعت احجي اني وبتول والعب اني ولد اخواني
بين ما يصبون الأكل ، طلع جــود للمطعم واني والبنات كلنا
فرشنا سفرة نريد ناكل وامي صاحت
_ امشي روحي صيحي مرت علاوي تاكل .
بعدها تحجي وفات ابوية واخوانهم ومن ضمنهم علي الآكبر
بس وكف بالباب سلم مستعجل .
ام حسن : علاووووي يممممه .
رجع عليها يأشر شكو
_ يمه تعال اكل اخوانك راح ياكلون .
_ بعدين .

عافها وراح وابوية فات كعد على كرسي
ام حسن: شبي هذا عبالك الدنيا تركض وراه دايخ دوم دايخ .
ريمان : يلهط عليها بس يريد يشوفها عبالك مخدرات .

ابو حسن : وكلي ابنچ بنتي لا تدخلين بين رجال ومرته وانتِ ام حسن
عوفي براحته ياكل ما ياكل يركض يلهط بكيفه مرتاح عليها .

واني اسمع واكل عقلي وين راح وين وصل وابوية فززني
_ شلون دوامچ بوية شهد .
_ الحمدلله .
حجيت على دوام ونظامهم والامتحانات ورحت اغسل
فتت للغرفة وابوية فات عليَّ
_ بوية محتاجة شي ؟
_ بوية تلفوني مرات اريد اخابركم بس اني
ماعندي من المعلمات استحي .
_ ليش وين تلفونچ ؟
_ امي اخذته .
حجيتها ونزلت راسي ما خليت عيوني بعيونه خايفة من رد فعلها .

عافني وطلع يحجي هوَّ وبيبيتي وجود يمهم يشرب جاي ويضحك
وساعة ينعي الها لو يتعارك هوََ وسيف الدين
جــود : بعلي طگ كلبي على علي الآكبر .
جاوبته جدتي من سمعت
_ ياع چا وينه اخوك .
جــود : اخخخخ يا جدة إجت المثقفة وآخذته مني .
علي الآكبر: اي اي ظل حش براسها .

ضرب جــود على رجله وينود بجسمه بحركه دائرية
جــود : هاااا المثقفة اجيتي اخذتي ارتاحيتي .
گعد علي الآكبر بصف ابوية رحت يمهم ودُر تصب اكل الهم
وترتب بالمواعين عبالك كاعدة بمطعم  آني مركزه وياها من بعيد
حابت الصينية جــود من شاف التمن مكبوس بكاسة وصاير دائري
ضرب على وجهه ويغطي بوجهه وجدتي مقهورة عليَّ عبالها
على الخوة وصلة الرحم مايدري على ترتيب المثقفين الصاير بالصينية .

الجدة : هيَّ شسمها مرتك عليوي .
علي الآكبر: دُر جدة .
الجدة : دُر چا انتِ ليش تگطعين صلة الرحم بين علاوي وأخوانه .
دُر : اني ؟
الجدة : صار ساعة يبجي خطية هذا جــود على اخو حرام عليچ
باجر الله يحاسبچ شكو بيها يشوف اخوانه يحاجيهم يگعد وياهم .

جــود : يااا جدة شوفي شمسويه بنعمة الله يمممممه استغفر الله .
لبست المناظر حتى تركز وعلي الآكبر وجهه احتقن احمر هوَّ وابوية
ام صفوان : يا يا يمه شوف شلون هذا شبي التمن ملموم .
دُر : احب اكل هيج اسكُت انت جــود والنبي ترا اخذ علي الآكبر
وارجع للبيت لا تخليها تحجي عليَّ .

كعد علي الآكبر وياها يريد ياكل وصاح بجود
_ عوفها تاكل .
دار جــود وجهه على جدتي
_ بعينچ شوفي شسوي يندفع منها بكلمة .
علي الآكبر: إكلي دُر عوفي .
دُر : يخليها تضوج مني .
الجدة : شلون خليتي هل ابو رجفة  جوا ابطچ وسيطرتي عليَّ .
ضربت دُر على شفايفها وكلها تضحك بعلو صوتهم
دُر : شنو جوه اباطج مانع تعرق لو رجال شنو هل كلام بيبي .

اخذ علي الآكبر الصينية وشالها راح بالاستقبال
حتى ياكلون ، واني كاعدة بصف ابوية اشوفهم
يوكل بدُر بيده شكد جنت اتمنى اتزوج رجال مثل
حب أبويّة لآمي واهتمام علي الآكبر بدُر وحب
اخواني لزوجاتهم اجه ذاك المدگدگ خرب كل احلامي وفرض نفسه .

نزل سراج الدين هوَّ وأطفاله نايمين بس گعد ابوية
طلع محفظته ينطيهم فلوس وصاح بسيف الدين يروح يشتري الهم كلهم
بس طلعوا ابوية ضرب رجل سراج الدين يلفت انتباهه
_ بوية رجع مرتك مو جهالكم تبهذلوا .
سراج الدين : ميثاق بعد رجعه لهل بيت ما ترجع .
_ تريد تطلعون اخذ مرتك وجهالك واطلع .
_ لا بوية انا فكرت بيها وحسبت حسابها من كل الجهات
انا وميثاق اثنين بعد مانرهم ننفصل احسن تاخذ حاضرها والغايب والله وياها.

ضربت امي على خدها وصاحت بي
_ وجهالكم يممممه شلون تبهذلهم .
_ چا يعيشون بنص بيت ابوهم كارهه امهم بي .
_ يمه انت مو تحبها بينكم عشرة عمر مو سنة وسنتين .

_ من ايدها خلتني استحقرها واكره حتى اسمها ما اريدها .

طلع علي الآكبر يغسل بيده ويستمع للكلام بدون مايعلق
رحت صبيت كلاص جاي ودُر بالمطبخ حسيتها تخاف من اسم ميثاق
بقت بقلق وتغسل بالمواعين يوگعن من ايدها ، اخذت الجاي ورجعت
ابو حسن : مشاكل تصير الخاطر الجهال تتنازل وتفكر
الجهال بلا امهم يتبهذلون بوية والله لا تقنعنب بغيرها .
علي الآكبر: شلون ام ينحلف براسها الي تعلم ابنها
يسوي عمايل خايسة هاي هم تعتبروها ام ؟
ابو حسن : ميخالف بوية هاي غيرة هيج سوت بيها
اذا تجي لقبل ميثاق شالتنا وزينة .
سراج الدين : لا تحاول بوية ما اتقبلها كلش ما اتقبلها .
ابو حسن : والحل ؟
سراج الدين : اطلك واتزوج واطلع منا اني اربي جهالي .
ابو حسن : هذا تفكيرك ؟
سراج الدين : اي بوية .

اخذ كل واحد بيهم استكان جاي يخوطون بيهن
ابوية شرب شوية وبنبرة صوت واثقة جاوب
ابو حسن : انا رجال صاحب حظ وبخت البنية ما اسعي بطلاگها
انت طلگتها شيخ وانا مارضيت وهسة تكمل وتصدق الطلاك
ما اقبلها ولا أرضى عليك صاحبة جهال تهدم بيتك وجهالك
بالشوارع تسيب والله محد بحالهم انت رجال مشغول مو مثل الأم.
سراج الدين : بوية ما اطيق اعيش وياهااا دقيقة تعرف شني
الدقيقة ما اتحمل اشوف وجهه ما اريد احجي اكثرررر دخيلك
الخاطر الجهال والعشرة ما اكدر اكمل واحجي بكلبي حجي هوووواي
خلي يذبح بگلبي ولا يطلععع ويعيرون بي جهالي بيوووم .

امي بقت بالعيون هيَّ ونسوان اخواني ودُر تأخر بنفسها بالمطبخ
ابو حسن : تزوجت وطلعت مو خوش وضربت جهالك شلون ؟
ظل سراج الدين ساكت ويشرب الجاي من العصبية ايده ترجف
طبطب علي الآكبر على ايده استدار سراج على علي ما ادري شنو همس
بحيث علي الآكبر تنرفز وصار يحجي وياه
علي الآكبر: بوية گال ما يريدها يعني مايريدها كافي سد الموضوع .
ابو حسن : وجهاله مدرسة وامتحانات محد بحالهم خطية تبهذلوا .
ام حسن : زين اخذ الها بيت هيَّ وجهالها ورجعها و...
سراج الدين : عجيب مااااا اريدهااااااا .
علي الآكبر: اخذ العا بيت هي وجهالها وانت تزوج هنا بغرفتك .
ابو حسن : شنووووووو ؟؟؟

كلنا على نفس الصدمة مصدومين صافنين بعلي الآكبر
رجع ظهره ويكمل برهاوه ولا عبالك مترررهي على اخير
_ اذا ما يطيقها شيسوي يجبر روحه ، ويخاف يبهذل الجهال
يروح يحجي وياها قبلت ترجع بيت وحدها وياها جهالها
وما تدخل والشرط الوحيد يتزوج اهلاً وسهلاً ما تقبل الله وياها .
ابو حسن : بطل شيطنة بطل واسكت .
ام حسن : شني مرتك تقبل تتزوج عليها .
جــود : وين المقارنة اكو واحد يتزوج على مثقفة ؟

سراج الدين : اني صار فترة براسي اتزوج وخايف على جهال
وهذا الكلام حلو يناسبني تريد ترجع اطلعها بيت وحدها
ما تريد الله وياها ومحمد وعلي هيَّ اشترتها لنفسها .
ابو حسن : تتزوج منو ؟
سراج آلدين: اكو بنية صار سنة اعرفها بنت ناس اوادم تصلي وتصوم
ومؤدبة تخاف الله اخذها اريد واخذت مني كلمة اتزوجها رايدها .
ابو حسن : بنت منو ؟ تدري بيك عند 3 جهال ؟
سراج الدين : كلشي تعرف بوية والبنية تريدني .
ابو حسن : وانا ما اقبل تكسر ام جهالك .
سراج : چاااااااا هي موووووووو كسررررتني وبهذلتني
وبهذلتنااااا كلنا مووووو بس انااااا نزلت راسي خلتني افشل امشي فشلان .

عافهم وصعد بعدهم يحجون ورن تلفون علي الآكبر جاوب
واول ما جاوب ضحك بصوت عالي وطلع يحجي برا
ورجعوا يحجون بس دُر تركز وياه وفلك ونسوان اخواني مركزين بيهم
واني على واهس انتبه بقيت شوية عليهن وشوية على امي وابوية
واخواني يتجادلون بزواج سراج الدين ، طلعت دُر وكفت
قريب من علي الآكبر وهوَّ من يشوفها عيونه تضحك قبل شفايفه
مال روحه صار قريب منها وفتح صوت عالي بقت هيَّ هم تاخذ وتنطي
بالتلفون واثنينهم يضحكون وصوت ضحكة علي الآكبر خلت الكل
يلتفت عليهم گرص خدها رجع يحجي بدون صوت وبعده يضحك
ولازم أصابعها مثل يدلك بيهن بهدوء ويجاوب بالتلفون .

دقايق وراحت دُر للبيت وعلي الآكبر دخل علينا خصم الكلام كله
_ ميثاق بهذا البيت ما تدخل كلنا رافضيها مو بس سراج الدين
خلوها تربي جهالها وسرتج الدين ما يقصر لا وياها ولا على جهال .
حسن : ويتزوج ؟
_ يتزوج ليش لا براحته ، وهذا مصير كل وحدة تريد تهجم بيوت الناس .

اخذ جــود وطلعوا للمطعم بعد ما شفتهم واني فتت اصحح
تعبت ونمت لليل جــود فات بيده باكيت
گعد بصفي يجر بشعري ما قبلت اگعد ما تحس روحي
غير انرفعت من الأرض وشمرني على سرير بقيت ازاگط
كلبي صار برجلي خفت لا عرف بالصار بالمدرسة طلعت روحي بهل دقيقة
_ شبيك شكو شصاير والله ما سويت شي والله هوووووَّ هذا هوَّ .
_ منو ولچ ههههههههه هاچ هاچ .

شمر التلفون ايدي ترجف اريد اتنفس ما اكدر اتنفس
والدموع تنزل من عيوني اريد احجي افهمه
_ اني جنت بالصف وهوَّ دخل يتعارك .
_ منووو هذا ابن الـ**** .
_ ها ؟
_ منوووو هذا يتعارك وياچ .
_ يعني انت مو ..
_ اخذي هذا التلفون الجديد .

لزمت التلفون اشوفه وارفع راسي على جــود
_ منو متعارك ؟
_ هذا الطالب شبيك بصف جبير .
بلعت ريگي من شفت جــود راح قفل باب الغرفة واجه بصفي
رفع راسي وبجدية سألني
_ بدون جذب جاوبيني منو ؟
_ انــور .

راد يروح وهوَّ يغور من العصبية وكفت بوجهه اتوسل
والله تذا يروح يموته وهوَّ مناااا ينزف يعني يروح بيها
_ خليني احجي ابوس ايدك الخاطري اذا تحبني جــود اني مو اختك
مو گلت اعتبريني صديقچ وابد لا تخافين مني واذا غلطتي اني احتويچ  .
_ صديقچ انتِ اخوچ مووو اخووووو ما اضربچًكا احاسبچ أحاسبه .
_ لاااا دخيلك والله والله العظيم ما سوالي شي بالعكس اني خليته ينزف .
_ شنو ؟
_ ينزف .

مال راسه بعلامة مافهمت لزمت ايده بتوسل احجي
_ اگعد افهمك اگعد .
گعد مجبور حجيت اله من وگعت ومن اجه ورزلته وبعدين من اجه
وضربته وطردته هوَّ واخو مقتطفات اختصرت شگد ما أكدر اختصرت
خلصت يفتح بالباب بجيب طلع عصبي ركضت برا واني اتمنى امي ماتشوفني
دگيت الباب على علي الآكبر حيل طلع مستغرب لزمني يتفحص بيَّ
_ شبيچ امي وابووووية بيهم شي جــود اخواني شككوووووو ؟
اريد احجي خفت بالزايد نبلع لساني اشرت على بيت وجبرت روحي انطقها
_ دُر وين دُر .

سحبني من ايدي فوتني من طلعت دُر من الغرفة تلبس روب النوم
وملابسها قصيرة لمش شعرها على كتفها واجت مفزوعة
سحبت كرسي گعدتني وهمست
_ عفية علي الاكبر مي من الثلاجة .
بس راح لزمت ايدها وهمست
_ اليوم صار بيني وبين انــور حجي وجفصت وجود عرف وراح
يمكن راح يضرب انــور وأنور اصلا مريض ينزف والله .