تحميل رواية «الصعيدية المجنونة والدكتور الأمور» PDF

ليله واقفه يوم فرحها علي السرير ودخلت امها ومعاها الدكتور وبعدها قالت ليه

الام

ارجوك يا ولدي شوفلي البت دي الله يخليك آني جلبي هينط من مطرحه النهارده كان يوم فرحها وكانت كيف الفل لحد ما دخلت الأوضه مره واحده وجامت واجفه فوق السرير وتضحك لحالها وتتكلم بكلام ما ينفهمش وآني خابره بتي زين وعمرها ما كانت بالطريجه دي ابدا

مازن قرب من ليله وهو باصص لها باستغراب وقال

مازن

سيبينا لحالنا دلوك يا حاجه وآني باذن الله هفهم ايه اللي جرالها وما تشليش هم ولا تخافي من حاجه خالص

وفجأه ليله نطت من فوق السرير وبصتله من فوق لتحت وهي مبرقه عينيها وقالت

ليله

يا نهار ابيض يا خلق الله هو فيه حد حلو اكده في الدنيا كلها بقولك ايه يا دكتور ما تسيبك من العريس اللي جاي يتجوزني النهارده وتعالى خدني انت ده وشك منور كيف البدر وعيونك دي تخلي الواحدة تنسى اسمها كمان

الأم قربت منها بسرعه وشدتها من دراعها وقالت بغضب

الأم

اتحشمي يا بتي انتي بتجولي ايه عاد مالك النهارده انتي عمرك ما اتحدتي بالطريجه دي انتي شكلك اتلبسك عفريت ولا ايه

ليله بصتلها بضيق وقالت

ليله

جرى ايه يا حاجه في ايه هو احنا هقطع على بعضينا ولا ايه الدكتور ده مز حديت وعاجبني وآني عايزه اتجوزه ماله يعني ولا الحلاوه بقت حرام

مازن كان واقف رافع حاجب وبيبصلها باستغراب وبعدين قال

مازن

جولتلك اطلعي بره يا حاجه وآني هفهم الموضوع ده لحالي وما تشليش هم خالص

وفعلا الأم خرجت وهي بتكلم نفسها وقفلت الباب وراها

أول ما الباب اتقفل ليله قلبت على الناحيه التانيه

ليله

بقولك ايه صحصح كده معايا للكلام وآني مش مجنونه ولا حاجه انت هتطلع دلوك بره وتجول لهم اني مجنونه رسمي وما ينفعش اتجوز وخلصنا على أكده

مازن قرب وجعد على الكرسي اللي قدمها وقال

مازن

وانتي بقى عامله الفيلم الكبير ده كله ليه وبتعملي روحك مجنونه ليه

ليله اتعدلت في اقعدتها وقالت وهي مضايقه

ليله

هو انت شوفت شكل العريس من الأساس جبل ما تدخل وتحقق معايا ولا داخل تهبد وخلاص

مازن

لا والله ما شفتش حاجه ماله العريس يعني عاد

ليله فتحت عينيها بصدمه وقالت

ليله

ماله ايه بس يا خويا ده ودانه مطرطجه كيف الطباق وماشي بجلاليب شكلها واخده خناجه مع الكلاب من كتر ما هي متشججه ومعرفش كيف ابوي مصمم اني اتجوزه وآني ليله فخر الدين اللي نص شباب البلد كان نفسه يشوف مني بصة

مازن

طيب بدل الفيلم اللي انتي عاملاه ده خلي عندك شويه شجاعه وواجفي جدام أهلك وجولي لهم انك مش عايزه الجواز من الأساس بلاش جو العبط ده

ليله قربت منه وبصتله بمكر وقالت

ليله

بقولك ايه آني ما بحبش الرغي الكتير هتطلع دلوك وتجول اللي جولتلك عليه وتاخد بعضك وتمشي وآني هديك قرشين حلوين كمان

مازن

الله يسامحه ابوي وابوكي اللي عمرهم ما عرفونا على بعض من بدري انتي ما تعرفيش آني مين يا ليله

ليله

مين يعني تكون ان شاء الله وزير الصحه

مازن قرب منها وهو مبتسم وقال

مازن

آني مازن فخر الدين ابن عمك يا بنت عمي

وفجأه ليله شهقت وفتحت بوقها وبعدين وقعت من فوق السرير وهي بتقول

ليله

يا نهار اسود يا فضيحتي آني طول الحوار اللي فات كنت بعرض على ابن عمي الجواز يا مرك يا اللي هتغرقيني النهارده وبعدها سكتت شويه وقالت

ليله

شكلك كده بتشتغلني والكلام ده مش حقيقي اي اللي يثبت ليا كلامك

مازن طلع البطاقه من جيبه ومدها ناحيتها وهو بيبتسم وقال

مازن

لو مش مصدقاني خدي البطاقه اهي وابصي فيها زين وآني مش من النوع اللي يهزر في حاجه كيف دي

ليله خطفت البطاقه من إيده بسرعه وبقت تبص فيها مره وليه ومره عليه وبعدها ضحكت ضحكه صغيره وقالت

ليله

يا ساتر يا رب طلع حظي كيف الزفت لا عرفت اهرب من العريس اللي تحت ولا حتى لقيت واحد حلو اتغزل فيه طلع ابن عمي في الآخر بقولك ايه عاد اكيد يعني مش هتجول لحد على اللي حصل بيني وبينك ده علشان لو عرفوا اني كنت بعمل روحي مجنونه هيجوزوني طبق الدش اللي جاعد تحت ده وهيربطوني في الكرسي كمان

مازن ضحك وهو بيهز راسه وقال

مازن

ما تشليش هم وسيبي الموضوع ده عليا وآني هتصرف فيه بطريجتي

وبعدها نزل لتحت وكان عاصم قاعد على الكنبه ووشه كله توتر والأم قاعده جمبه وهي تاكل في صوابعها من الخوف وسيد العريس قادد عامل فيها شيخ العرب

أول ما شافه سيد جري عليه وقال

سيد

ها يا دكتور خير طمني البت مالها دلوك واجول للناس تحضر العربيه علشان اخد عروستي ولا ايه علشان نخلص الفرح دي الليله

مازن بصله وبعدها بص ل عمه وفاق

مازن

لا يا عمي الجواز مش هينفع يتم الليله خالص حالتها النفسيه تعبانه قوي ودي محتاجه راحه وكمان كتبتلها على علاج لازم تاخده بسرعه وآني اللي هجيبه بنفسي علشان الحاجات دي ما تتجابش من أي حته

عاصم وقف مره واحده وقرب منه وقال

عاصم

بجد يا ولدي آني مش عارف اشكرك كيف والله ربنا بعتك لينا النهارده في الوقت الصح الحمد لله انك كنت جاي تحضر الفرح وطلعت دكتور نفسي كمان

مازن

مش بس أكده يا عمي آني ناوي استقر إهنه في البلد كمان وهفتح عياده في بيت ابوي الجديم وهنشوف خلق الله ونعالجهم

الأم

يا ضنايا ربنا يفتحها في وشك يا ولدي بس والنبي محدش يعرف اللي حصل فوق ده آني مش عارفه هنجول للناس ايه على الفرح اللي اتأجل

وفجأه سيد خبط بإيده على الترابيزه وجام واجف وقال بعصبيه

سيد

فرح ايه اللي يتأجل هو لعب عيال ولا ايه آني هجوزها يعني هجوزها سيبوني اطلع لها وآني هعجلها بنفسي

ولسه طالع على السلم مازن شده من دراعه جامد وقال وهو باصص في عينيه

مازن

هو انت مش شايف رجاله جدامك ولا ايه بطل طريجة الكلام اللي انت بتتكلم بيها دي

وبعدين بص لعاصم وقال

مازن

هو ايه يا عمي طبق الدش اللي انتوا جايبينه ده يتجوز ليله كيف يعني

سيد

انت شكلك كده اتجنيت ومش عارف انت بتكلم مين

مازن

بقولك ايه يا شاطر خد جلابيتك وروح على داركم مفيش جواز الليله

سيد شد إيده من مازن وهو بيكز على سنانه وقال بغضب

سيد

ماشي يا دكتور لما نشوف آخرتها ايه اخركم معايا اسبوع كامل وبعدها هاجي اخد عروستي وساعتها اللي هيحصل هيحصل

وبعدها خرج من البيت وهو خابط الباب وراه جامد

وفي نفس اللحظه كانت ليله واقفه فوق عند السلم مستخبيه وسمعت كل حاجه وحطت إيديها على قلبها وقالت بصوت واطي

ليله

هتعملي ايه يا ليله في المصيبه ان انت فيها دي اكيد مش هتقدري تعملي فيها مجنونه طول عمرك

وثاني يوم الصبح كانت ليله واقفه فوق السرير ورابطه طرحه على دماغها بشكل غريب ومعلقه ملاية على كتفها وبتبص في السقف وهي عامله صوت غريب وكأنها بتكلم حد مش موجود

وفجأه الباب اتفتح ودخلت كوثر وهي باصه لها باستغراب وقالت

كوثر

يا نهار مطين على دماغك يا ليله انتي عامله في روحك اكده ليه هو انتي ناويه تطلعي جنانك عليا انا كمان ولا ايه عاد

ليله لفت وشها ناحيتها ببطء وبعدين فتحت عينيها جامد وقالت

ليله

كنت فاكراكي أمي يا اختي جولت يمكن الحاجه جايه تجيبلي الفطور وتدلعني شويه بس طلعتي انتي يا وش النكد اللي بيظهرلي في كل مصيبه

كوثر قربت منها وحطت إيديها في وسطها وقالت

كوثر

بلاش لعب عيال يا ليله وآني جايه اعرف انتي ناويه تعملي ايه سيد مش هيسكت لابوكي وكده كده هيتجوزك يعني هيتجوزك وآني من رأيي تتجوزيه وطلعي عينه وبعدها اطلبي الطلاق وخلصنا

ليله نزلت من فوق السرير ووقفت قدام المرايه وعدلت طرحها وقالت وهي عامله نفسها متغاظه

ليله

فشر يا حبيبتي بقى ليله فخر الدين تتجوز طبق دش لا والله ما هيحصل ابدا ومشاكل ابوي بقى هو يحلها بنفسه وآني ماليش صالح بيها هو حد قالو بالله عليك روح شارك اللي اسمه سيد ده وخسر فلوسك وفي الآخر يجي يدبسني آني

كوثر قعدت على السرير وقالت باستغراب

كوثر

طيب انتي ناويه تعملي ايه دلوك آني روحت امبارح وسبتك وما عرفش ايه اللي حصل بعدي

ليله بصتلها وبعدين قربت منها بسرعه وقالت

ليله

حصل مصايب سوده يا بت ما تعرفيهاش اقعدي وآني هحكيلك من أولها لآخرها

وبعدها قعدت جنبها وفضلت تحكيلها كل اللي حصل من أول ما دخل مازن الأوضه لحد ما طرد سيد من البيت

كوثر كانت فاتحه بوقها وهي سامعه وبعدها قالت

كوثر

يا ساتر يا رب يعني الدكتور الحلو ده يطلع ابن عمك في الآخر لا والله دي مصيبه تقصم الضهر بقولك ايه خلاص بقى يتجوزك ويستر عليكي من الفضيحه

ليله بصتلها بذهول وخبطتها على كتفها وقالت

ليله

هو انتي بتجولي اي كلام وخلاص ولا ايه فضيحه ايه اللي يلمها يا مجنونه هو آني عملت حاجه عيب يعني فكري معايا زين بس والنبي هنتصرف كيف وآني عايزاكي تروحي للدكتور ده ضروري

كوثر

وانا مالي يا اختي اروحله اعمل بيه ايه ان شاء الله اروح اكشف على ضرسي مثلا

ليله

لا يا روح اختك آني هجولك على كل حاجه بس ركزي زين

وفي الوقت ده كان مازن قاعد في العياده الجديده بتاعته بيرتب الورق بتاعه ويحط السماعه على الترابيزه

وفجأه الباب اتفتح براحه ودخلت كوثر وهي باصه له من فوق لتحت وساكته مازن رفع راسه وبصلها باستغراب وقال

مازن

في ايه يا بنت الناس مالك واجفه تبصيلي اكده ليه هو فيه حاجه على وشي ولا ايه

كوثر فضلت باصاله كام ثانيه وبعدها قالت وهي بتبتسم

كوثر

طلع كلامها صح والله ده انت طلعت مز حديت كيف ما جالت بالظبط

مازن

هي مين اللي جالت وايه الحديت الغريب اللي انتي جايه تجوليه ده

كوثر قربت وقعدت قدامه وقالت وهي سانده راسها على إيديها

كوثر

لا شكلنا هنحكي حكايات كتير النهارده يا دكتور مازن واصل الليله باعتاني في مهمه سريه خطيره قوي

مازن

يا ساتر يا رب شكلي من يوم ما دخلت البلد دي وآني داخل على بلاوي سوده مش آخرها انتي مين يا ست انتي وعايزه اي مني بالظبط

كوثر

انا كوثر بنت خاله ليله وهي بعتاني عشان خاطر اقول لك على حاجه

مازن بص لها وهو رافع حاجبه وبعدين سند ضهره على الكرسي وقال

مازن

اه يعني مجنونه زيها برضك خير عاد البت دي عايزه ايه مني دلوك هو انا من يوم ما رجعت البلد كلها قررت تتسلى عليا ولا ايه

كوثر

لا لا والله يا دكتور ما تفهمنيش غلط آني خابره كل حاجه وخابره زين قوي ان ليله عاقله ومش مجنونه ولا حاجه دي كانت بتعمل روحها اكده علشان تهرب من سيد واصل الراجل ده يخوف لوحده

مازن

كملي وآني سامعك اهو وشوفي آخرتها ايه معاكم

كوثر

ليله عايزاك تيجي دلوقتي وتجول لأبوها انها لازم تنزل القاهره شويه تغير جو علشان خاطر نفسها تعبانه ومخنوقه جامد ويمكن لما تبعد عن البلد كام يوم حالتها تتحسن

مازن

وانتي اتجننتي في مخك يا بت انتي ولا ايه هو آني دكتور ولا مهرب خلق الله من بيوتهم روحي لها وجولي لها لو ما عقلتش هروح لعمي واجوله على الليله كلها من أولها لآخرها

كوثر

لا بالله عليك اوعى تعمل أكده انت ما تعرفش سيد لو عرف انها كانت بتضحك عليهم هيعمل فيها ايه ده هيحكم عليها بالإعدام وهيفضل وراها لحد ما يتجوزها غصب عنها

مازن سكت شويه وبعدين اقعد على الكرسي وهو بيبص لها باستغراب وقال

مازن

هو ايه بالظبط الموضوع ده وآني مش فاهم حاجه خالص حاسس اني داخل مسلسل طويل وآخره مش هيعجبني

كوثر أخدت نفس طويل وجعدت قدامه وبعدها قالت

كوثر

طيب خلاص آني هجولك على كل حاجه من أولها بس ما تجاطعنيش لحد ما أخلص

فلاش باك

كوثر كانت جاعده مع ليله تحت شجرة الجميز اللي ورا الدار وليله كانت ماسكه ورقه وتكتب فيها حاجات وهي متغاظه

كوثر

بتعملي ايه يا مخبوله من الصبح جاعده تشخبطي في الورق دي

ليله بصتلها وقالت

ليله

آني بكتب مواصفات جوز المستقبل يا اختي علشان لو أبوي فكر يجوزني تاني أبقى جاهزه

كوثر خدت الورقه من إيدها وقرأت الكلام

كوثر

لازم يكون طويل وحلو وعيونه عسلي ولازم يبقى دكتور ولا مهندس ولازم ما يكونش ودانه مطرطجه كيف طبق الدش يا نهار اسود يا ليله انتي داخله على جواز ولا رايحه تشتري عريس من السوق

ليله شالت الورقه من إيدها

ليله

آني ليله فخر الدين يا بت ومش أي حد يخش يمد إيده وياخدني أكده لازم اللي يتجوزني يبقى حاجه كده تخلي الناس تجول يا محاسن الصدف

كوثر كانت لسه هترد عليها لكن فجأه سمعوا صوت عربيه كبيره داخله الدار ووقتها ليله قامت من مكانها وقالت وهي مبرقه عينيها

ليله

يا ساتر يا رب ابويا رجع الدار انا لازم امشي دلوقتي يلا سلام ابقى اشوفك بالليل

ولما ليله دخلت الدار لقت أبوها عاصم واقف في نص الصاله وشه مقلوب ومكشر بطريقة عمرها ما شافتها عليه وكان ماسك راسه بإيده وكأنه شايل هم الدنيا كلها

ليله

مالك يا أبويا في ايه عاد آني اول مره اشوفك بالطريجه دي من يوم ما وعيت على الدنيا وانت عمرك ما كنت تكشر في وشي اكده خير حصل ايه

عاصم رفع عينه ناحيتها وبص لها بحزن وقال

عاصم

ما جداميش غيرك يا بتي علشان راس أبوكي ما تنزلش في الأرض وما نبجاش مضغة في بوق الخلق كلهم انتي هتتجوزي سيد الأسبوع الجاي

ليله

سيد مين يا أبويا هو سيد طبق الدش اللي ودانه بتتحرك جبل ما يتحرك هو بنفسه لا والله ما هتجوزه ايه الحديت الفارغ اللي انت بتجوله ده

عاصم

ابوكي هيتخرب بيته يا بتي لو الحديت ده ما حصلش آني شاركت سيد في مشروع كبير وحطيت فيه كل اللي ورايا واللي جدامي وخسرنا كل حاجه وما سابليش حتى جروش أجيب بيها كيس سكر وهو جالي وجالي ان هو مستعد يعوضني عن كل اللي راح بس بشرط واحد بس

ليله

وايه هو الشرط اللي يخليك تبصلي بالنظره دي

عاصم

الشرط انه يتجوزك يا ليله

ليله رجعت خطوتين لورا وكأن حد ضربها على راسها وقالت

ليله

يعني ايه يا أبويا يعني تضحي ببنتك علشان خاطر شوية فلوس هو آني رخيصه للدرجادي لا والله نعيشها بدقه وملح ولا اني اتجوز واحد كيف ده

وفي الوقت ده خرجت أمها من المطبخ

الأم

في ايه يا خلق الله الصوت عالي اكده ليه خير حصل ايه

عاصم

تعالي يا وليه تعالي اسمعي بتي اللي مش عاجبها الحديت

الأم

في ايه يا بتي مالك واجفه تبصي لأبوك اكده

ليله بصتلها والدموع متجمعه في عينيها وقالت

ليله

تعالي يا أما شوفي أبويا عايز يحكم عليا بالإعدام بيده عايز يجوزني سيد طبق الدش

الأم

يا ساتر يا رب يا راجل هي البت ناقصه مصايب

عاصم قام مره واحده وقال بعصبيه

عاصم

ما كانش بإيدي والله ما كانش بإيدي غصب عني يا بتي وآني لو جدامي حل تاني كنت عملته

وفعلا جرى الوقت بسرعه وجا يوم الفرح وكانت ليله واقفه جدام المرايه بالفستان الأبيض لكن ملامحها كانت كلها غضب وقهر

وفجأه لفت ناحيت الستات اللي جوا الأوضه وشخطت فيهم وقالت

ليله

امشوا اطلعوا بره كلكم مش عايزه حد يفضل جدامي هو آني بعمل ايه هنا اصلا وآني مين وايه اللي جابني للمكان العجيب ده

الستات بصوا لبعض بخوف وطلعوا بسرعه وفي اللحظه دي دخلت أمها وقالت بقلق

الأم

مالك يا بتي صوتك عالي اكده ليه

وفجأه ليله وسعت عينيها وبصت للسقف وقالت وهي تشير بإيدها

ليله

شششش اسكتي ما تسمعيش صوت البط اللي بيطير حوالينا

الأم

بط ايه يا بنتي احنا جوا أوضه

ليله قامت نطت فوق السرير بسرعه وقالت

ليله

ابعدوا عني يا خلق الله العفاريت الخضرا جايه تاخدني

الأم

الحقونا يا ناس الحقونا احنا في مصيبه سوده بتي عقلها فوت واتجننت

وفي نفس الوقت كان مازن لسه داخل من باب الدار وواقف مع عمه عاصم بيسلم عليه

الأم جريت ناحيتهم وهي وقالت

الأم

الحق يا عاصم الحق يا ولدي احنا في مصيبه سوداء بنتك عقلها فوت واتجننت

عاصم

اهدي بس يا وليه علشان الناس ما تاخدش بالها يلا طلعيني ليها وآني هشوف الحوار ده

مازن

اهدى بس يا عمي وانا هطلع اشوف في ايه علشان خاطر ما حدش ياخد باله

وبعدها طلع ليها

باك

مازن بص لكوثر شوية وهو ساكت وبعدين خد نفس طويل وقال وهو بيهز راسه

مازن

طب روحي انتي دلوك وطمني ليله وجولي لها ان آني جاي الدار بنفسي علشان أحاول ألاجي حل للمصيبه اللي انتوا حاطيني فيها دي بس والله لو طلعت البت دي بتلعب في دماغي تاني آني هربطها في سرير المستشفى بنفسي

كوثر قامت من على الكرسي بسرعه وقالت وهي فرحانه

كوثر

والنبي يا دكتور ربنا يكرمك ويجبر بخاطرك آني كنت خابره ان جلبك أبيض

مازن

يلا يلا غوري من جدامي جبل ما أغير كلامي انتم شكلكم كلكم عيله مجانين ولا ايه

كوثر ضحكت وخرجت تجري من العياده وهي بتقول

كوثر

يا نهار أبيض شكله بدأ يقع هو كمان

مازن سمعها وبص للباب وقال

مازن

ويقع ايه يا مجنونه انتي كمان يا ساتر يا رب

وفي بيت عاصم كان سيد واقف قدامه

وماسك ليله من دراعها جامد وهي بتحاول تبعد إيده عنها وعاصم واقف جدامه متوتر

عاصم

يا ابني ما ينفعش اللي انت بتعمله ده سيب البت انت شايف حالتها النفسيه عامله كيف دلوقتي

سيد شدها أكتر وقال بغضب

سيد

انت مش عارف تعجلها وآني هعجلها في داري وآني

اخدها دلوقتي على داري ويحصل ايه اللي يحصل يا اما تسد كل فلوسي دلوقتي

عاصم

يا ولدي بالله عليك ما تعملش اكده الناس كلها هتضحك علينا

ليله بعصبيه شدت إيدها منه بالعافيه وبعدت وقالت وهي بتزعق

ليله

بعد يدك عني ما تلمسنيش انا لا يمكن اكون مرتك ابدا انت فاهم ولا لا

سيد

لاه يا بت يعني انتي عاقله اهو وبتعملي فيها مجنونه مش أكده

ليله

امشي اطلع بره دارنا مش عايزه أشوف وشك هنه خالص انت سامع ولا لا

وفي اللحظه دي دخل مازن من الباب وقال بصوت قوي

مازن

هو فيه ايه بالظبط اللي بيحصل هنه وانت ايه اللي جابك يا سيد

سيد

جيت أخد مرتي دلوك يعني هاخدها والله هي من حقي انها تكون في داري النهارده

مازن

مرته كيف يعني يا عمي هو كان كتب الكتاب

عاصم نزل عينه في الأرض وقال بحرج

عاصم

ايوه يا ابني كتبنا الكتاب

وفجأه ليله بصت لأبوها بذهول وكأن الأرض اتشالت من تحتها

ليله

ايه… ايه اللي انت جلتو ده يا أبويا كتبت الكتاب ازاي من غير موافجتي آني مش عايزه الجوازه دي ويحصل اللي يحصل

سيد قرب منها وقال وهو بيبتسم بتشفي

سيد

غصب عنك يا حلوه انتي مرتي على سنة الله ورسوله وهتيجي وياي الدار دلوك يعني هتيجي سامعه ولا لا

مازن

الجوازه اللي بالغصب دي مش هتروح معاك بيها مطرح واعمل اللي انت عايز تعمله

سيد جز على سنانه وبص لعاصم بغضب شديد وقال

سيد

ماشي يا عاصم لما تتشرف في السجن بقى ما تجعدش تعيط وتزعل

وبعدها خد جلابيته بعصبيه وخرج من الدار وهو خابط الباب وراه جامد

ليله

كتبت الكتاب كيف يا ابوي من غير ما تقولي حرام عليك والله اللي بتعمله