رواية الشيهانة الفصل الخامس والعشرون 25 - بقلم Shaqraa

مساء العافية

الشيهانة
الجزء الرابع والعشرون

باجر الصبح انا جاي اخذ امينة واكعد وي
ابوج واكله هذا الخميس اخذج..
حيادر يعني هلاسبوع؟؟حجيت بقلة حيلة..
لو بيدي يوم واحد مااخليج بعد..الظاهر امج
ماتعرف تفرق بين حيدر وحيادر ..

شنو هالحجي..
هذا الصدك..شايفتني قليل اصل لو مخنث
وخاف ادك بيج الناقصة..
باجر الي وياها حجي ثاني..اراويها
الخايفة منه وعالكة عليه حربها ياهو..

وشنو حجيك تخلي زواجنا هالاسبوع؟مامحضرة
نفسي ابد وماقبل حيادر ..
تقبلين ماتقبلين ما اتاني رايج..حجاية
ورد غطاها..روحي نامي هسه..انسدت
نفسي عن الدنيا كلها بعد..

سديت الخط منه وقلبي معصور وموجوع..
موقف ماما صدك قلبي من صدك..
بقيت سهرانة وشكد تعبت بالنهار وجنت نعسانة
ورايدة انام..
بس احس نومتي طارت وراسي صدع
كلشش..

لحد الفجر انا ع كعدتي..مقرفصة
نفسي بفراشي وابجي..
استرجع كلشي صار..واحجي وي نفسي
العراقيل الصارت من حبيت حيادر
لليوم..كلها تحاول تبعدني عنه..ليش!!!
احبه ويحبني وحقنا نعيش..ليش محد رايد
ننجمع..

بقيت ع فد بجية..
لحد مادخت ع كعدتي طحت ع الفراش..
بين فقدت الوعي وبين نمت..
فزيت وانا ماكدر افتح عيوني..نايمة بلا
غطا وبردانة..صح شهر الثاني بس الجو
كلش بارد..
باوعت للساعة سبعة الا ثلث..

كعدت جسمي مكسر وعيوني احسها
منفوخة ..وجهي يحركني..
بلعومي احسه مجرح عبالك كزاز
مكسر بي ويبزني..
كمت باوعت للمراية..منظر عيوني يخزي..
الجفن وكلها هالة العين حمرة دم..
وخدودي منا لطخة حمرة ومنا هم..

بجيت بقهر واحس عيوني وجعتني..بقيت
اكح اختنكت..
رجعت كعدت بالفراش تغطيت وابجي
مسطورة ودايخة فد مرة احس جسمي
طاقته صفر..

مر وقت شوية صارت ثمانية الا عشرة..
وانفتح الباب..دخلت ماما..
كومي رجلج هنا يريد يحجي وياج..
حجيت وانا صافنة ولا باوعتلها..اي هسه..
بس صوتي مطبك كوة طلع..احس من حجيت
شاغت روحي..
استغربت من وضعب هه..طلعت وهي تستغفر..

وانا كمت اخذت روب قطني
طويل لبسته فوك ملابسي..
ورحت غسلت وفرشت ..حاولت شوية
اصحصح بس عبث ..احس نفسيتي ماتسندني
مو جسمي..

مشيت للاستقبال..الباب مسدود..
دكيته ودخلت وانا لازمة الروب
بيدي وشبه ارجف..صباح الخير ..حجيت بصوت
مخنوك وانا مدنكة..
صباح الخير شنو هالوضعية مالتج؟؟حجه حيادر..
باوعتله بس خفت من عصبيته وشكله
ضايج كلش وعيونه نظراتها ماتبشر بخير..

كعدت وجانت ماما كاعدة..بس امينة ماموجودة..
هو باوع لماما ويفرك بسبحته..
الله بالخير حجية..
الله بالخير..حجت بلا نفس..
ترى انا جاي احاجي عمي ..بس كبل لا
امشي بفالي اريد احجيلج شوية..
خافنج ماتدرين ..بعد هاي الكعدة يصير
الحجي مكشوف..

حجيج البارحة وللاسف يطلع منج بس سمعته..
ماهمني الحجيتي علي..لني رجال والرجال
عيبه بجيبه..وهم كلت يمكن المايعرفك
مايثمنك..وادري تعرفيني كلش زين ..
بس تبقى يمج تثمنيني لو لا ..

وخاااف عبالج ادوس بيتج وانكث بيج..
تراني رباة شيوخ..وعار يضل مبصوم
بكصتي لو سويتها..
احنا رباة الدواوين المرة تلوذ بينا دخيلة
مانردها..الهدية نستحي نردها..
وهذا كله مايهم ان اعترفتي بي لو لا
وادري بيج تدرينه..

بس سوايتج وي مريتي طيحت عكالي..
شني حاسبتني خنيثة كيكي لو جاهل؟؟
حشااك..
لا حشا ولا حشيمة ..منظر مرتي هسه منظر؟؟
وجهها ملبگ واحمر وصوتها مايطلع
وعيونها حمر..
عليش بلة؟؟
علة صوته وكام..

انا بادن رجليه من شفته هيج تعصب..
تقرب يمي وكمل حجيه..
شني ذنبها وهيج تعاملينها؟بس لنها عاقلة
وتطيعج؟؟
لو صلفة هم جان كدرتيلها؟؟

سمعيني عدل حجية..الصار البارحة بتج
مالها غرض بي..
واذا انت حاطة ذانج ع الباب وتسمعين..
يمكن سمعتيها ماحجت غير كافي وخجلت!!
طاوعتني ووصلتني لراحتي بس
طاعة الي وبس..طاعة لرجلها الحارمتها منه
وغاضبة ربج بسب هالشي..

مايهم حجت لو لا ..اليهم طاوعتك
وحجت..حجتها وكامت وهي متعصبة..
طاوعتني لني حلالها..واذا انت شايفتها خفيفة
وتنطي روحها ..
تراني اكلج انت ماتعرفين بتج عدل..ماتعرفينها
مثلي..

لو تريد تمشي ورا الحجي الحلو جانت سابت
بالجامعة وهي ماضل واحد ماحاول وياها..
خمس سنوات وانا ماشي وراها مثل ظلها..
ماحصلت منها غير الحجاية النظيفة..
والنظرة الخجلانة..
ولا انا الردت اغضب ربي وياها ولا هي
الانطت مجال..

لو خفيفة مثل ماشفتيها جان لعبت وي كرابتج
الداس بيتكم بغيابكم..
وبلسانه يكول حاولت وياها شكد وسمعتها
حجي اشكاااال..
بس مايكدرلها..لانها شيهانة معدلة..
بس ماعرفتي تحوينها..وابشرج طيرتها
منج جريبة ..

مو حيادر الينشك بغيرته ورجولته...
ولا ابن شيخ رسن التنهان مرته ويسكت..
خاف ببالج وادرييي كلش زيين..شنو ببالج..
عربي ماشام ريحة مرة وشاف كدامه مدللة
وخاتونة وراد يشبع بيها..
غلطانة كلش..نحمد الله عيونه مليانة ونفوسنا
ماترغب غير الحلال..

محد كال هيج..ادري بيج تحبها وتريدها..
بس الشيطان شاطر ومحد يدري شيصير ورا الباب..
اليتعوذ من الشيطان ما يهمه انسد باب لو
جان مفتوح..
من خدذيتها منج بيوم الطهور مو انسد علينا باب؟؟؟
شسويتلها خذيتها؟؟كسرتها؟؟

استغفرالله العظيم..
انا مالازم احجي وياج والحجي وي ابوها..
بس جم حجاية وردتج تدرين بيها..
وامبين من سكتج تدرين انج ظالمتنا ثنينا..
من رخصتج هسه صيحي عمي..
وشاها تبقى يمي ماتطلع..

انا خفت اذا شافني بابا شلون ماريده
يعرف السبب..
هزيتله راسي واشرت بيدي لاا..
اريد اطلع..حجيت بغصة وصوت مبحوح..
ماتطلعين..الحجي كدام والدج يصير..

ماما عافتنا وطلعت..
وهو رجع كعد..يباوعلي بخزرة ..
متعودة تطكج هيج ؟؟؟
هزيت راسي لا..
يعني ماطاكتج كبل؟؟
اول ..اول مررة من خابرتني امينة من وصيتها
انت قبل كم سنة..حجيت بالكوة وصوت
كوة ينفهم..
اي يعني ماتطكج كبل..هسه بسببي..
يصير خير..

هسه خلي امينة تطكلج بلاعيمج وتطيبين..
باوعتله بعيون مدمعة..لا تحاجي بابا
شي وخليني اكوم..عفية..
انت ليش مارايدة نتزوج عود؟
مو مارايدة بس نفسيتي تعبانة وماكدر الزواج
غير واحد متهيأ نفسيا اله..
اذا نبقى ورا امج عمرنا مانتهيأ..خليني احطج
يمي وافضها..
الله يخليك عفية اجلها..وخل اكوم لا يجي
باباب..

قبل لا يحجي دخل بابا وسلم..هو كامله
وسلم عليه وكعد يمه..
انا مدنكة..بابا سالني شاها بابا شبييج؟؟
رفعت راسي وسكتت..
راد يكوم حيادر كله اسمع مني بالاول عمي..
شسمع شبيها بتي؟البارحة خليتها ونمت
جنها وردة شبيها هسه؟؟

حجي..انا ماريد المشاكل ولا اريد ضيجة
الخلك..
بس امها سمعتها تحاجيني بالتلفون ودخلت
وكتلتها وانا وياها جنت ع الخط واسمع..
شنووو؟؟حجه بابا وهو مامصدك ..
هي مانعتها تسهر وياي ونحجي بالليل..
بس انا اضغط عليها بحكمي رجلها..
ورايد اعودها علي..

وامها تخاف عليها مادري عبالها انا ناقص
بعد مادري..
بس حرصها الزايد خرب ماعمر..
انا ماهمني منعتها تكعد وياي وماخلتنا
لا نطلع لا نحجي لا نتونس..
كلت امها وحكها وحيدتها..وكلت اتاني
اتزوجها ونستقر..

ولعيونك خليته يطول
شهرين ثلاثة
بس بعد ماصار شهرين والبنية شبعت طك..
وانا مرتي رايدها يمي..شوف عمي انا مكمل
كلشي..
غرفة جبت وجهزتها من احسن الاشياء..
والحمدلله حالي ميسور واكدر اعرس اليوم
كبل باجر..
بس رايدك تدري..الخميس الجاي اسوي
العرس وانا ارتاح وامها ترتاح..

طبعا بابا وجهه احتقن وشابك ايديه
ببعض ويستمع لحيادر..
من خلص كلامه كله..الله يسهل عليكم ابني..
مرتك هي وبعد بينكم هالشي شوكت
ماتقررون براحتكم..
ومدام متفقين الله يكملها عليكم بالخير..
واعذرنا..بس تعرف الامرتصير حريصة.

لا عاذرها..حجاها وكام عدل عكاله..
انا اترخص..وبامانتك شاها بعد..لا تزعلونها
تراها بس هالايام يمكم..
ابتسم بابا وهز راسه..وهو طلع وبابا
طلع وراه..

انا كمت اريد اطلع ولاكتني ماما وامينة..
تعاي تدهن بلاعيمج..حجت وهي تدخل
للاستقبال..
امينة امبين حيادر حاجيلها لان بس
تباوعلي بقهر..
دهنتلي بلاعيمي وانا طكيت من البجي..
منا وجعهن والخنكة ومنا وضعي الزفت
والموقف الانحطيت بي مااتمناه لعدوي..

كملت تدهين وكامت سلمت وطلعت
لان حيادر بقى ينتظرها بالسيارة..
ماما راحت وراها..
وانا رحت لغرفتي..قبل لا ادخل خليت
فوني يم مراية المدخل..
دخلت قفلت الباب وتغطيت وغمضت..
ماريد افكر بشي ابددد..لهنا وكافي
اريد اريح اعصابي..

بقيت ادلك بلاعيمن من فوك ليجوا
لان الدكتور ناصحني بهالشي
يخفف الاحتقان..
شوية شوية هدات..بعدها غفيت..
نمت نومة طويلة كلش..
كعدت ع صوت الباب يندك وبابا يحجي..
شااها..بابا كاعدة تسمعيني؟؟؟

فتحت عيوني بتعب..باوعت للساعة بالخمسة!
عزا شكد نايمة انا..
كمت فتحت الباب لبابا..باوعلي وجرني
لحضنه..
باس راسي وهو يحجي..قلقتيني عليج..
عبالي صار بيج شي..
حجيت بصوت مبحوح..لا بابا بس جنت
نعسانة وتعبانة ونمت..

نوم العافية ..تعاي يلا غسلي واكليلج
لكمة ..
اخذني ويا طلعت من الغرفة..غسلت وانتظرني
برا..من طلعت اخذني للمطبخ وهو حاط
ايده ورا ظهري..
رحت للمطبخ صبيتلي اكل وكعدت
اكل بس كوة ابلع..
هو كاعد كدامي..يباوعلي وصافن..

زعلانة من امج؟
اي..
حقج بس هم غلطانة انت..
اعرف انا غلطانة بابا..بس ماما قست هواي
علي..
اعرف وتصرفت غلط..وحاسبتها ع هالشي..
لا بابا..حجيتها بخوف..تعاركتو بسببي..
هه لا مو عركة..بابا الازواج كل مايكبرون
يكثر التفاهم..

ويتوصلون للغة حوار..حتى باصعب المواقف..
سوالف العرايك وغيرها للطايشين..
بس الي يوصل لعمرنا وهو يعارك هذا
ارعن هههه..
ياا هههه..
بعد ابوج فدوة لضحكتج..

رجلج اجه العصر
ماتدرين..
لا ليش اجه..!
جاب اهل هاجر وانطاني فلوس البدلة وهالسوالف..
اممم..اي باجر لازم احجز كون احصل عدها..
خابرتها امج مساع..
اي زين..اشو ماكو احد؟

عدنا خطار بالاستقبال يمهم امج واخوج
ومرته بالغرفة..
ومحمد ..كالعادة..
الج خلك تطلعين؟
وين..
افرج شوية ونتعشى ونغير جو..
لا بعد فد مرة باجر..اروح اشوفلي بدلة..
براحتج..

بعدها رحت توضيت جاي اصلي..
وبطني مغصتني..كطعت الصلاة ورحت
للحمام..
شفتها الشهرية ارتاحيت..رغم ماصارلي
وقت من خلصت..بس خفت تجي بزواجي
وتتعبني..
دفيت نفسي زين واخذت علاج..واخذت فوني
وكعدت بفراشي..

ماكدر اطلع برا الغرفة اخاف يشوفني
احد من الولد لو هاجر والاضرب خاف
يشوفني خطار بهذا شكلي..
بقيت بالغرفة..فتحت الفون..شفت حيادر
مخابر هواي..تالي كاتب..من تكعدين
خابريني..

دكيت عليه ..رد بصوت ثكيل..
هلا ..شلونج؟
الحمدلله..
صوتج بعده ماشربتيلج شي دافي..
اي شريت جاي قبل شوية..
اي زين الج..ليش تلفونج برا؟

شون عرفت؟
دكيت عليك مارديتي..كلت لهاجر تطمني
عليج..
كالت نايمة بغرفتها وتلفونها بالهول ناسيته ..
اي جنت تعبانة ونمت هواي ماحسيت
بنفسي..
اي من اجيت كالت هاجر بعدها نايمة..

خو ماحاجوج شي؟
لا ماكو..
خوش..دربالج ع روحج ولا تخلين
امج تمد ايدها عليج بعد..
اممم..
صوتج فد نوب صاير؟مو بس بحة وياها
ونة جنج؟
اي شوية تعبانة..
شكو شعندج يعني مريضة؟شكلج مساع
ذبلان شيوجعج؟

لا مايوجعني شي بس نحلانة..
لو سابحة حتى جسمج يرتاح وتتنشط
الدورة الدموية..
مابية اكوم ..
صدك تحجين؟اجي اخذج للمستشفى؟
لا لا شسالفة..قصدي متعاجزة..
ها زين..

طلعي كملي مسواكج والتحتاجينه
هالايام..
تردين اجيج اخذج ؟؟
لا ..وياي ماما وهاجر اذا احتاجها..
خوش من تحتاجين شي كولي..
اي..
اخذي راحتج..
اوكي باي..

سديت الخط منه وبجيت..نبرته جافة
كلش ويحجي بثكل..
انقهرت منه هواي..رغم خابر وتطمن
ويحجي بقلق..بس ماتعودت عليه
هيج اسلوبه..

بقيت بالغرفة شوية واجت ماما..دكت
الباب ودخلت..
كومي تعشي ويانا..
ماصارلي هواي من اكلت..شبعانة..
كومي عيب مرت اخوج ويانا تتعشى..
كاعدة اول يوم الها..
ماما استحي من الحمارت البوجهي...
استغفر الله..حجتها وطلعت وسدت الباب..

انا استحيت من هاجر حتى ماباركتلها هي
وحسن لو شفتهم اصلا..
بس ماريد اطلع حتى لا انحرج
وهم ماريد الموضوع ينفتح بعد ..
بقيت بالغرفة مايلعت منها..
حيادر ماخابر بالليل ابد..بس دز رسالة
شلون صرتي؟
جاوبته زينة..ردلي تصبحين ع خير..

زادت كآبتي ووجعي..بقيت لحد
مانمت..
يوم ثاني ع كد الاكل..اطلع وارجع للغرفة..
ماشفت اخواني ولا اشوف الخطار اليجي..
ع اساس اطلع اشوف بدلة..
بس موجوعة هواي ونفسيتي تحت الصفر..
اجلتها ع يوم ثاني..

يوم الاحد شوية وجهي خف الاثر..
خليت كريم وخفيته اكثر ..
هاجر اعتقد عدها علم وحتى اخواني..
لان محد سأل ليش ماشفناج صارلنا
ثلث ايام ولا احد لمحلي..
مادري شنو كايلين الهم بعد..
شوية نفسيتي احسن صارت ..كعدت وي
هاجر وسولفنا وهي حبابة وطيبة
حلوة الكعدة يمها..

حيادر ع كد الاتصال ويسال شخبارج
وشمحتاجة وبس..
بالليل ابد مااتصل ولا حجه..
بقيت اطلع اشتري الاشياء المهمة..
حجزت بدلة وكملت احتياجاتي..
ماما حاجتني كالت نسويلج حنة بقاعة
وانا حجزتلج عد الحلاقة حنة وعرس..
رفضت رفض قاطع..واكتفيت بحجايتين..
تعبانة وماريد ..

اليوم خميس..بداية شهر الثالث..الجو
حلو منعش..
خلصتني الحلاقة من وكت..حسب طلب
حيادر..
كعدت انتظر شوية وخابرني..
حضروني وطلعت..
صعدت ورا ويمي ماما وهاجر كدام..

لحد ماوصلنا للمصور..انا ابد
ماباوعتله ولا شفت شي وجهي مغطى..
نزلنا للاستوديو..
من نزعت البرنص وشفته..قلبي خفق..
لابس دشداشة بيضا تلمع..وفوكها بشت
ابيض مطرز بذهبي..
جفيته بيضة مرتبة وواكفة.. وعكال اسود ..

صارلي كم يوم ماشايفته..وهسه شفته
بهيج لبس..صفنت بي وهو صفن بيه..
يمكن لحظات واحنا واحد يباوع للثاني..
دكت الباب البنية..دخلت حتى تصورنا..
احنا ساكتين بس روحنا تسولف..بحيث
ماهتمينا لا لتصوير ولا لقطات
جنت انا احجي بعيوني وهو يجاوب..

كملنا وطلعنا..اخذني للبيت مالتنا وراح..
شوية واجه هو واهله..
تحضرت وهم دخلو بهلاهل وهوسات
وصوت الموسيقى يسد الاذن..
دخل ابو وهو وياه..
سلمني بابا اله..وانا لازمة بيد بابا قوي..
ماشوف شي كدامي بس مدنكة وماريد ابجي..
ماريد شكلي يخرب حتى محد يكدر يحجي
عليه شي..اريد اطلع باحلى صورة..

اخذوني وطلعت..صعدت ورا وماما يمي
وهو كدام ويمه خاله..خاله نفسه الخطبني..
حط اغنية محمد وعلاها..
وخاله يدندن وياها وكل شوية وتشاقى وياه..
وصلنا قبل الاذان..جان اكو ضوا ..

من ردت انزل كال صبري لا تنزلين..
نزل قبلي ونزع البشت مالته..
واول مانزلت من السيارة خلاه ع ظهري..
وكامو يرمون حيل..جلبت بدشداشته واعت بيها
من الخوف..
بس هو لزمني عدل وكال..خلب لا تخافين..
ودخلنا جوا..

كعدت وكعد يمي..نزعت البرنص من راسي بس..
بقى ظهري مغطى بالبشت مالته ماقبل انزعه..
بعدها كام طلع ..وماما كعدت بصفي..
اجت حنين يمنا وتهلي وتجامل..
لابسة بدلة فضية بيها مثل طش تلمع..
ومنفوشة وطويلة..
وشعرها مخليتهرمفتوح لان كلش قصير..

تقربت يمي وحجت..اي عمي شتردين بعد
حيادر لبسج عباته..
جاوبتها ماما..شفتي شكد يحبها..
كفو من الشيخ حيادر..

للحكاية بقية
بقلم شقراء(قمر كانون)

تدرين كسرتي خاطري😕😂😂

هلا ولله حياج طبعا اكول حسابج وين راح ضيعته وهسه لكيتج😊
شيقنعهم لازم الفون خية شعب عنده عمق بالقراءة😂