رواية الشيهانة الفصل السادس والثلاثون 36 - بقلم Shaqraa

الشيهانة
الجزء الثالث والثلاثون

سندتني تبارك ووصلتني للغرفة..تمددت بالفراش
وهي تباوعلي بخوف..
اطيج ماي تردين اصيحن امي ..
لا تصيحين احد بس انطيني ماي عفية كون بارد..
ووياج فوني جيبي..
اي عمة..جابته واحت تركض..
هاج هاج..انا رايحة اجيبلج سراحية ماي..

طلعت تركض ووتردد خطية شيهانة..
انا فتحت الفون وخابرت ام عادل لان خفت
يصير بيه شي..
دكيت ماجاوبت ..ثلث مرات خابرت ماكو..
وتبارك تأخرت كلت اكيد التهت تلعب ونست..

وانا مستمرة اخابر دكت الباب ام عادل ودخلت بسرعة..
اجتلي بوجه قلق وفحطانة ..خيرج حبيبة شبيج ؟
صبتلي ماي وانطتني..

شربي وغسلي وجهج اسم الله ياستار ..
جريت نفس وشربت الماي ..بلعومي من التقيؤ
احسه تخدش ويحركني..
رشيت  وجهي ماي بارد ارتاحيت شوية..
وام عادل مددتلي ايديه عصرتهم وهمزتلي راسي..
وهي تسألني..

شجرالج حبيبة مساع جنج ورد شو غوربتي فد مرة..
حجيت بتعب ..مادري شصار بيه من شميت
ريحة الكلور اختنكت..
كلش حاشرة بالحمام تخنك..
لو تدخلين هسه تختنكين ماتتحملين ثواني جوا..
ياااع جا شطببج ليش ماطلعتي بسرعة..

كولي زين وطلعت وهم تبارك صارت بطريقي
ساعدتني اوصل للغرفة..
اي غير منها دريت وصعدلتج..
لن نزلت ركض احنا كاعدين بالهول .. تكول شيهانة تخربطت
رايحة اخذلها ماي..
وتورشعتها امها ماخلتها تصعد ..
عاد خليتهن يتكامشن وجبتلج الماي واجيت
شايطة كلت شصار بيها..

فدوة لعينج مشكورة ماقصرتي..خطية تبارك
بس لا تضربها بسببي..
هههه خايبة هي تهد وامها تهد ..ههههه صدك..
حجيت وحسيت بنبض قوي ببطني..نزلت دموعي وسالتها..
باعي هنا جاي يرف ..اشرت ع جهة بطني اليسار..
اللهم صل على محمد وال محمد..كرت عينج
وليدج حاس ..مدام هيج ارتاحي لا تكومين
لحد تحسين مرتاحة..

لا لا مااكوم ابد..مامصدكة توقعت صار بي شي..
حجيتها ومسحت دموعي..
عداج الشر انشالله وشوفي روحج لباجر اذا مامرتاحة
ناخذج للدكتورة..
الله يسهل مشكورة صعدتج وانت تعبانة..
عفو عليج اخيتي الزغيرة انت ام علاوي..انا نازلة
لو اعتازيتي شي دكيلي..
اي انشالله ينطيج العافية..
يعافيج حبيبة..حجتها وطلعت وسدت وراها الباب..

غمضت عيوني وايدي ع بطني وكلساع تصير رفة
ببطني واضحك بفرحة..
ورا شوية كمت صليت ع كيف ورجعت تمددت
بفراشي..
خابرتني ماما وحست بصوتي تعبان وحجيتلها..
واصرت الا تجي وتاخذني افحص بس طمنتها
وكتلها تحرك طفلي هواي وارتاحيت..
يلا اقتنعت ..

حيادر تأخر لان كل يوم هيج وقت جاي..خابرته
كال رايح وي عمه وابوه عدهم كعدة او مشكلة
صايرة بواحد من العشيرة ورايحين يحلوها..
رغم سألني شبي صوتي بس ماكتله شي ماردت اهبطه
وهو تعبان..

وانا جاي احجي ويا صعدت امينة خطية مهبوطة
سامعة من ام عادل..
سديت الخط منه بسرعة حتى لا يسمع..وحاجيتها
كتلها الحمدلله عدت سلامات وهي خطية حلكها نشف
واحتاريت بيها انوب خاف يصير بيها شي..
لان اصلا ماخابرتها اعرفها صحتها مو شي وخاف تتأذى..

بقت كاعدة يمي شوية وتسولف ..اندك الباب صاحت منو..
سارة كالت انا ..
بعدها فاتت سارة ووجهها مخطوف عبالك احد راكض
وراها..
باوعتلي بنظرات قلقة وتقربت..عدج العافية شلونج
هسه.؟
الحمدلله احسن..تعاي شبيج واكفة كعدي شكلج
تعبان امبين مگلية اليوم كونية باذنجان ههه..
لا اذا ع الكلي سهلة..حجت وباوعت لامينة بحيرة..

كامت امينة كالت رخصني انا نازلة..راح اسويلج
صينية وادزها بيد نغم ..
لا خطية انا انزل..
نامي بفراشج ولا تحوسين عيوني انت..
يسلم عيونج تعبتج صعدتيلي..
حاسبتج بنيتي..

طلعت وسدت الباب..سارة كعدت يمي ع الجرباية..
لزمت ايدها حارة وترجف..سارة الابالي صح؟؟
حجت بخوف..اييي كليلي شلون بيه..
نصيت صوتي وحجيت..بصوت هامس..شوكت اجت؟؟
مساع العصر..

اي هذا هو بعد شي طبيعي..
تروحين لغرفة امج تاخذين حاجاتج واذا ماكدرتي
صعدي لغرفتنا..ولا تخلين احد يحس بيج ابد..
سوي نفسج طبيعية ..ع هذا وضعج وارتباكج الكل
تكشفج..
انا اساعدج بكلشي تردي لا تترددين ابد ..
ابتسمت بفرح..الله يكومج بسلامة ويكفيج شرهن بجاه
كلمن عنده جاه يم الله..

هههه خنغير الموضوع خاف احد يصعد..
بقينا نحجي ع العشا وشنو سوت..انفتح الباب بسرعة..
دخل حيادر ووكف..ها سارة بوية مادريج هنا..
كامت هي وكفت بسرعة..لا هسه نازلة ..
ظلي وين رايحة ..
لا رايحة اجيبن عشا لشاها..
اي عاشت ايدج..

هي طلعت وهو باوعلي بنظرات قلقة..شنهي السمعتة
شيهانة ..
حجاها واجه كعد يمي..يباوعلي بتفحص..
ماكو شي حبيبي منو كلك..
بعد تدرين اول مادخل يبشروني عزازي واجد..
اي عود امينة كالت احذرهم بس ماكو فايدة..

اي هي طمنتني كالت مابيها شي بس شمت كلور..
اي فتت للحمام وكاش قوية الريحة واختنكت ..
وهسه شني اخذج للدكتورة شتحسين..
كلش زبنة..تعال شوف الحركة من مساع خبلني ابنك
ودي ابوسه..
تغيرت معالمة وابتسم..يعني يحوس..

كلش هواي تعال خلي ايدك وشوف هههه..
حط ايده ع بطني وقشعرت..ضحك بصوت عالي..
هسه شفتهمنا انت كشيتي لو هو حاس..
لا لا انا ههه..
باوعلي بنظرات تعبانة..بعد كلبي انت ويا واحد
وثنينكم مامخلين عندي هوش..
هوش !مو بقر يعني ..
هههههههه لا يعني تفكير ههه ام لسان..انا نازل اجيبلج
عشا..
لااا وين..
مالج غرض..

نزل شوية وصعد صينية العشا..اكلنا انا ويا وخلصنا
صاح من الدرج ع سارة صعدت اخذتها..
وبقى طول الليل سهران كل شوية يسألني ها تحرك؟
وانا اكله ماكو..وامي مسجاتها ماوكفت كل شوية تتطمن..

يوم ثاني كعدت الصبح حالتي افضل والم ماعندي..
نزلت تريكت وراح حيادر للشغل..ام حيادر شافتني
كالت ها نزلتي مابيج شي جا شبيج امس..
الحمدلله مابيه شي..حجيت وياها باسلوب جاف..
بدل ماتكلي حمدلله ع سلامة تحجي بشماتة..

صعدت نظفت الفوك وخلصت..خابرتني ماما
كالت جاية الج بالطريق..
فرحت ورحت للغرفة ركض..اخذتلي ملابس سبحت
ونزلت جوا..
كلت لابو وحيادروامه رح تجي ماما..وهم طفرو اي هلا
بيها وينها وصلت..
لاا بالطريق بعدها..
عمي كام كال هلا بيها كل الهلا ..يلا انا رايح للديوان..

انا عفتهم ورحت للمطبخ..اول مادخلت ام عادل ابتسمتلي..
ها حبيبة شونها صحتج ..
لا الحمدلله زينة..باوعتلي حنين وهي تنظف الخضرا..
حديد مايصيرلج شي هههه..
جاوبتها نهاية..اي بعد فرخ حيادر هذا مچلب زين
تلكينه ..
مشكورين الله يسلمكم..اي اكيد مدام حيادر ابوه يطلع
حديد مثله لان حيادر شييخ بيت رسن..

صدك ام عادل..ماما جاية بالطريق انا رايحة للديوانية
نظيفة لو انظفها..
ياهلا بيها لا نظيفة ومبخرة..روحي انت خاف تجي وماتدرين..
وانا ازهب صينية واجيبها..
كفووو ماتقصرين ام البيت انت..حجيتها وطلعت من المطبخ..
رحت للديوانية فتحت الباب ودخلت..
شوية وخابرتني ماما..
راحت ام حيادر دخلتها ..

اول مادخلت تباوعلي بقلق..ابتسمت بعيون دامعة
وشبكتني..بقت شابكتني هواي وتشم بيه..بعدها كعدنا
وهي شابكتني لصدرها وتحجي..
خو مايوجعج شي ماما ..؟
لا الحمدلله تمام..شلونهم بابا والولد وهاجر..
كلهم زينين ويسلمون عليج..ومحمد نعمة وضعه زين..

كامت ام حيادر طلعت..هي تعدلت بكعدتها وحجت..
خو محد اذاج.؟احجي مدامني هنا حتى اعرف شتصرف..
لا ماما بس ريحة كلور بالحمام يمكن الجهال
لاعبين بي..
يعني مو حنين ذابته؟

لا ماعتقد لان الجهال جانو بالممر يلعبون..
لا تضمين شي شاها احجيلي..
لا ماما ابد لو شاكة بيها جان كتلج وحتى حيادر
سالني وحقق وياي ..
يعني لو عارفة هي اكله وهو يعرف شغله وياهم..
اي لا تضمين عليه حتى لا يصير الحق عليج تالي
لان ساكتة..

اي ماما اعرف لا يضل بالج..
يعني ماخذج للدكتورة؟
لا خل تعدي كم يوم ماكدر اكرر سونار بفترة متقاربة اخاف..
صح ..هذا هو فد اسبوع واجيج اخذج دربالج ع روحج عدل.:
وجبتلج كم حاجة شالتهن مرت حماج..
ربي يحفظج الي ماماتي ابقي شوية ..
لا الولد ينتظرني كتله مااتاخر عليك..

ها جيتي وي صديق محمد..
اي ماخليت محمد يسوق ..
سلمي عليهم وبوسيهم الي هواي..
يوصل يلا رايحة..
ماشربتي حتى ماي ماما..
عندي بطل بجنطتي ومستعجلة مو مال ابقى..
يلا سلمينا...

راحت وانا دخلت جوا اريد اشوف ام عادل تاخرت
ماجابت الصينية..
دخلت للمطبخ لكيتها كاعدة وجاي تداوي رجلها نغم..
استغربت الدم بالارض ومتجمعات يمها..
هاا سلامات؟؟
سالتني بخجل ..عذريني اجيتي تاخذين الصينية عود
طالعة اجيبها الج وطاحت السراحية وانكسرت
فوك رجلي..

يااا بس هذا شكله جبير الجرح خاف يحتاج خياط؟
لا لا مهو هسه اجبسه بكبسوله ويطيب..
ماعلى قلبج شر..بعد ماما راحت لان مستعجلة ..
يااااع صخام الوجه ماشربتلها كطرة ماي..
لا قابل تجربكم هي وبعد معذورة انت..
حجت خالتي..يلا نغمة لفيها عدل وكملي الغدا عنها
خل تكعد ترتاح..
جاوبت نهاية..خل شاها تجي تكمل..

هزيت كتفي وحجيت وانا مركزة عليها..
الا اذا ناوين تبقون جوعانين..
حجت خالتي..لا حبيبة لا نريد ناكل شني مانريد معادينا..
كملي نهاية نفسج حلوة وطبخج ماينشبع منه..

بعدها طلعت من المطبخ وام عادل كعدت بالهول
ترتاح..
باوعت لسارة جابت لامها ماي..هي باوعتلي ..
اكلج سارة عفية تصعدين فوك تجيبيلي حباية نسيت اشرب..
ها تدللين انطيني المفتاح..
انطيتها المفتاح وصعدت..
وانا بقيت كاعدة يمهم بس امينة بغرفتها مو يمنا..

ورا شوية سارة نزلت جابتلي حباية اخذتها لان هي
موعدها باي وقت باليوم تنشرب عادي..
امها تباوعلي بنظرات ممنونة..وانا مكسور خاطري
عليهم حتى ببيتهم خايفين ومن شغلة طبيعية ..

قريب الاذان صعدت للغرفة..توضيت واجيت..
تبارك تلعبفوك شافتني بس ماحجت ..اكيد امها
مهددتها وهي طفلة ماعليها لوم خطية..
دخلت للغرفة اخذت صبغ اظافر وطلعت ..
صحت عليها..اجت تباوع من جوا حواجبها..
هاج هذا صبغ هدية الج..
جرته من ايدي وضحكت..صددك جا ماعدج ظافير تطيني..
ههه لا مالبس اظافر اصطناعية..

يلا انعم الله بعد شتردين كليلي وانا اعاونج..حتى تطيني
منج هدايا..
ميخالف شنو تردين كليلي..
اخذته ورجعت تلعب وتكول للجهال على عناادكم اطتني صبغ..
رجعت للغرفة مبتسمة ..هنا كلشي مختلف..لا الطفلة
عايش طفولتها..لا الشابة حاسه بشبابها..
وضع البنات هنا مأساوي..

صليت وخلصت..اجيت انزل..صار عندي الم
ببطني..بس خفيف..
رحت للحمام..شفت دم قليل رجفت بخوف..غسلت وطلعت..
بس محتارة شسوي..
خابرت حيادر..بس سمع كال جاي هسه اخذج للدكتورة
لان جمعة والصبح يكعدون..
لبست وكعدت..شوية ودخل امبين جاي ركض ينهت..
اخذني ونزلنا..امه سالت ها شكو ويين..
هو كلهم بطنها وعدها الم راح اخذها للدكتورة..
اي عدها العافية..حجت ورجعت تاكل ركي بيدها ماعون..

انا كتله خل ناخذ سارة ويانا خاف احتاج احد وياي..
راحت سارة بسرعة لبست عباية وبركع واجت ..
طلعنا وطول الطريق انا احساسي ماينوصف..
احس باي لحظة يزيد عندي الم او يصير شي سيء..

وصلت للدكتورة والبنية تعرفني بس دخلتني..
دخلت وياي سارة..
استغربت جيتي كتلها اعراضي..كالت خير انشالله
يجوز فطر بالمشيمة..كومي اشوفج بالسونار..
لا بالاول شوفي سارة..هي اول مرة تجيلها الشهرية..
بس تاكدي منها وضعها تمام ماعدها شي خطية
لان اول مرة خايفة..

باوعت لسارة وابتسمت..
فدوة الله يحفظها ماعليها شر انشالله..نامي ماما خل اشوفج..
كامت سارة وعيونها تتلفت..يعني مايعور السونار؟
هههه لا ابد اصلا يدغدغ ...جاوبتها الدكتورة..
سوتلها سونار وكلساع تفز من تمشي الجهاز ع بطنها..
كلتلها كلشي مابيج ووضعج كلش زين الحمدلله وجسمج نظيف..
نزلت وباوعتلي وابتسمت..يحفظج الله ..حجتها بصوت هامس..

بعدها كمت انا صعدت ع السرير..بس صدري احسها
ضاق..
متت من الخنكة مادري شصارلي..
بدت تفحص..نظراتها ماتبشر بخير...ابد ماتوحي
بذرة اطمئنان..
غمضت عيوني ونزلت مني دمعة..شالت الجهاز من بطني..
حطته ع جهة..باوعتلها بيأس..

كامت ولزمت ايدي كومتني..كومي ماما ..
عصرت ايدها حيل..باوعتلها بتوسل..
كليلي ابنج بخير..
نزلتني وجرت ملابسي..ليش ماجت وياج امج..؟
احجي فدوة..حجت ودموعي تنزل..اجتلي سارة لزمتني..
الدكتورة عضت شفتها بقهر..للأسف المشيمة مفصولة
و..الله يعوضج بغيره..ميت ..

بقيت فاتحة عيوني حيل ودمعي يصب..مادري شتصرف
بس بقيت مثل الجماد..
سارة تربد تكعدني مااقبل..
دزتها الدكتورة تصيح لحيادر..وكعدتني ع الكرسي كوة..
دخل حيادر بسرعة..يباوع بوجهي بنظرات ماتنحجي..
وجهها صار اصفر وكوة يبلع ريكه..شبيها شاها؟؟

كامت الدكتورة وحاجته..سلامتها مابيها شي..
الله يعوضكم ماما..بعدكم
شباب واكيد الله ماقاسمة..
يعني شنو دكتورة..حجه وهو يتقدم يمي..
يعني الطفل ميت ..
جر نفس قوي..كومني وحط ايده ورا ظهري..

نحمد الله ونشكره..هذا امر الله..ودام امه سالمة
يتعوض انشالله..
اكيد يتعوض هواي حالات هيجي ابد لا تخافون..
بس هو جبير مانكدر ننزله..لازم عملية..
ليشش حجيت بخوف..عفية خلي بلكي يعيش..
ماما لا تقهرين نفسج بعد قضاء الله مابي رجوع..ولازم ينزل
لان يأذيج ابد مايصير يتأخر..

بس هو جبير حرامات..حجيت وانا انحب..
حيادر جرني لحضنه ويحجي بهدوء..مكتوبله يروح..
انشالله نعوضه لا يصير بيج شي وتزيدين علي ضيمي ..
حيادر اريد ماما..
هسه اخذج الها..
دكتورة هسه شنو الاجراءات؟
تعالو العصر لمستشفى(..) والافضل تجي وياها امها
لان تحتاج مرة وياها..
صار..مشكورة دكتورة..حجه ولزم ايدي ومشاني
امشي كوة حتى جنطتي واوراقي سارة شالتها..

صعدنا بالسيارة وانا انهاريت..كمت ابجي حيل
اليشوفه عباله خاطفني..
شكد حجه شكد يهدىء بيه بس انا فقدت ..
وصلنا للبيت كوة لزمتني سارة من جهة وهو من جهة..
بس دكو الجرس طلع بابا ركض وجهه مخطوف لان
شايفنا بالكاميرا..

حتى ماسلم بس جرني لحضنه ويباوع بوجهي
شبيج باااابا شبييها؟؟
دخلنا للطرمة وانا فقدت بيد بابا ..بعد ماحسيت
بشي..
اخر شي اتذكره..بابا وحيادر نفس الصرخة..

للحكاية بقية
بقلم شقراء(قمر كانون)