رواية الشيهانة الفصل الثالث والثلاثون 33 - بقلم Shaqraa

مساء الخير

الشيهانة
الجزء الثاني والثلاثون

حجه حيادر بعيطة..انا من باجر طالع ادور بيت ويطبكم حمام..
بقو اخوانه يحاجو ويريد يهدون بي بس هو
يمكن عافهم يريد يصعد لان اسمع ابوهم عاط..
هدووو هدو خل ينگلع..اخو مريته صاير
عبد ل... بت الدلال..
عيب عليك حجي استحي انت رجال جبير ..حجه حيادر بهدوء..

وانت تحشم جبير زغير..
حاير بيها وتريد تطلعها..
يلا اخذها وتكسح يلاااا والا اذبك من العشيرة..
بعد هالحجاية سمعت صريخ نسوان وعيطة زلم..
طلعت ركض شفت عمي طايح بالكاع
وملتمين عليه..

خفت بالزايد لا صارله شي وبسبب حيادر
هسه يتخبل..هو رغم شكد مأذي اهله
وامه وابوه بالذات كلش يحسنلهم حتى ع حساب
نفسه..
شفته كعد بس يدفع بحيادر ويكله ولي ماريد
اشوفك ..رجعت بسرعة للغرفة..

بقيت اتسمع بس سكوت ماكو حجي..
رجعت كعدت بس مختنكة ميتة احس شي
وكاتم انفاسي..
ورا هواي وقت مر..انفتح الباب ودخل حيادر..
اخذله جكارة وشمر الباكيت ع الميز..بقى
واكف ويدخن وصافن..بقيت اباوعله بقهر..
يدخن ولازم راسه يعصر بي من الوجع..

كمت يمه تقربت وهو صافن علي..
حطيت راسي ع صدره وبسته..حط ايده ورا ظهري
وجرني لحضنه..
شاها ورطتج بيه ورطة ..
رفعت ايدي وخليتها ع حلكه..اسكت حبيبي كافي..

انت كتلي هذا وضعي..ماشرحتلي نفسياتهم لان
ردت تحصلني بأي طريقة..وهم البشر
بالعشرة ينعرف..
انا متوقعة هذا الشي وماما نصف رفضها لهذا
السبب..
بس مدام انت حبك موجود وباقي نفسك..انا
باقية وياك..
مو ذنبك نفسياتهم خبيثة ولئيمين..

انا بت عمي
وربت وياي بنفس الماعون اكلنا بس طلعت شيطان..
وهذا ماخلاني اتراجع او اندم واكول شلون قبلت
بيك..ومدام حبك الي موجود ماندم..
بس تعبتي وراح تتعبين اكثر..شاها ماكدر
اطلع منهم..شفتي ابوي شسوا وخبص
الدنيا..بس هو لسانه عام عليه..بس لسان وبسرعة
يطيح..

تدرين نزلت وانا اكلهم انا من باجر ماخذها وطالع..
بس حجاية ابوي كرهتني بروحي وبعيشتي ..
توة من طاح وكعدناه وشوية جر نفس..باوعلي
بعتب..كلي انت ذخري وكل ولدي..اذا طلعت
كول ابوك مات..ومارضى عنك حتى من يوسدوني
بگبري..

ياساتر من الموت..ميخالف حبيبي خطية هو
يبقى ابوك..
وطاعته اهم مني ومن كل واحد..
انا اتحمل لحد ماتفرج ماراح تبقى هيج انا متأكدة..
يعني مستعدة تتحملين اكثر من هالضيم..
اي اتحمل..ومدام يردون نبقى ومانطلع وحدنا
وهيج يسوون ويانا ويخبثون..راح اعاملهم بالمثل..
حتى اكدر اقاوم واعيش.:

انا بظهرج وساندج بكل شي..اليأذيج اذي
واليتجاوز لطمي على حلكه..
كتلهم توني كبل لا اجيج..انا ظال يمكم
بس مرتي اليدنالها لو ياذيها بدون مااحجي
بعد بس اطلع روحه بيدي..
وهم كالو مالنا غرض بيها وماناذيها ..لان خافو
صدك اهدهم واطلع..وانا ايدهم ورجلهم..

وانت اريدج تطلعين قوتج وانسي خاطري
وانسي زحمة وعيب..اخذي حگج بيدج
واستخدمي وياهم اسلوب شيهانة بت الجامعة
الجانت يخافون يحاجونها..وجانت تقلد على
بهادر وتخلي يشيل روحه ويدكها بالكاع..

ههههه عزاا شمدريك..
هذا هو حجالي..من اول مرة ردتج وكتله ختحاجيها
بت عمها وانتن جنتن مرحلة اولى..
جنت رايدلي فرصة احاجيج بس من بهادر
صار عنده علاقة بحنين كتله ساعدني..
كال تولي مكروهة ولسانها طويل..يومية
مقلدة عليه وع لبسي..

يااا يعني حنين طلعت توصله الحجي..
صدك انا جنت احش بي حش دوم..قابل مجذبة
ملابسة تلوث بصري..
بالنسبة اله احلى لبس هذا..
امم زين اكلك ليش يضوج مني؟
بعد بت عمج موصلة صورة سيئة عنج وهو بهادر
بي طبع مظهرجي كلش..عباله بلبسج انت خفيفة
حشاج..

وهم لان يضوج مني..يضوج من اي شي يخصني..
تدرين بي يتحسس مني ويعتبرني عدو اله وشنو
اسوي يكول ويحجي عكسي..
هو خرب ع نفسه بطبعه ...يشوف الاهل
يعني العشيرة بصورة عامة..
يقدروني اكثر ويحترموني..لان انا حاضرلهم دوم
باقل شدة يلكوني..هو ماله غرض ومخلصها يم خوالي..

وحتى بالبيت يكرهونه لان ماعنده اسلوب ..
البنات شابعهن طك وماخذ عليهن رغم كل مايأذي
وحدة منهن نصير انا وياه ملاحم واخذ حكهن..
وهالشفتي بعينج بعد..مرته مثله اذا مو اتعس بعد..

صح يعني هسه  انت اساس الحقد مالته تجاهي..
بسببك كرهني وشوفني ايام سودا
ابو كذلة قاتلة كلها كمل وصواب..
هههههههههههههههههههه يلعن ابليسج ولج منين
جبتيها..
مادري سامعتها من جهال بالشارع من جنا صغار..

شبكني حيل وباس راسي..ضحكتيني ونسيت الصار
كبل شوية..
صدك انت اعظم رزق اجاني..انت الرزق البشروني بي..
منوو بشرك ..
هذا رجال من فلحنا  هو فقير من الناس ع فطرتها
كلش..
فد يوم جنا رايحين للبستان بيتنا وبيت عمي صمد..
صدك اكلك شوكت تاخدذني مو كلت..
اي منا وغاد اخذج وهم اوديج يم عمامي تونسي..

اي ياريت ..كمل كمل عن الرجال..
اي كتلج جنا هناك وبعد نسوان وجهال..
الفلح اليشتغلون من نروح هم مايجون خطية..
بس بيومها اجه هذا الرجال..جان ناسي جيس بامية
وجاي عليه..
كايل هيج وهيج ناسي الجيس مامخلينة الولد يدخل..
بس بجيتي وشفته كتلهم خلو شتردون منه..زلمة
جبير وجاي ع رزقه..
اخذته ورحنا كتله حجي انا جاي وياك..
مشينا وهو شاف اهلنا والجهال..يمشي ويحجي
الله يزيد الرزق من مال ومن عيال..

وانا اكله يرحم اهلك حجي..
لحد ماوصلنا وراد يشيل جيس البامية ماخليته ..
خابرت وليد واجه شاله وياه..
من راد كام يدعيلي..الله يرزقك باليتمناه خاطرك
ويترس ايدك وكلبك من كل رزق..
ضحكت كتله ادعيلي حجي ادعي بالي يرتاح..
جنت توني محاجيج ورا ماخطب بهادر وانت رفضتي
كلش..
فأنا طلبت منه يدعيلي وانا متوسل منه لان فقير
وطيب..

بس هو وكف عبالك واحد ووكفه..باوع بوجهي
وضحك..
ياشيخ راح تنرزق رزق..لا شايفة
بحلمك ولا بعلمك..اخذها من لساني وتذكرني..
راح يجيك رزق ماله وصف..
حجايته بردت كلبي صدك بس كلت يمكن
رزق فلوس وهيج لان بالفترة التقربت منج
خيري زاد والحمدلله صار مضاعف..

بس من تزوجتج عرفت الرزق مو فلوس..
لا الرزق كلبج الابيض ونفسج النظيفة..
والف حمد وشكر على هيج رزق..لازم
اشوف الفلاح واكرمه..
لن صدك حبج ووكفتج وياي وتحملج ماتوقعتها
لا بحلم ولا بعلم..
غير احبك لعد مو بس حجي..
جسر حسرة قوية وحجه..يابعد طوايف هلي
ياهرش كلبي..

بعدها تمدد بفراشه تعبان وراسه كلش مأذي
كتله نام وارتاح..
صدك شوية وغفى ..انا ماما تراسلني وتسولف وياي
بس ماحجيتلها..
رغم هي بكل محادثة او اتصال تحقق وياي وتكلي
احجيلي اذا احد اذاج لو تعبانة..
بس اكلها كلش مرتاحة..

صار العصر بس ماكعدت حيادر كلت خلي اليوم
مايروح للشغل اخوانه موجودين مو اله هو..
تمددت غفيت شوية..
ورا شوية كعدني وهو يندهني..شيهانة كعدي
وكت اذان ..
فتحت عيوني وتثاوبت..ها حبيبي شلونه راسك..
لا زين ..
الحمدلله..انا ماكعدتك كلت خلي نايم الولد موجودين
مو اله انت تروح..
اي عشتي لان تعبان وارتاحيت بهالنومة..

بعدها كمنا صلينا ونزلنا جوا سوا..
كلهم موجودين بالصالة..هو سالهم عن ابو..
كالت خالتي بالديوان يم خالك..
باوعلي وغمز ع السريع وطلع..امه باوعت بس
ماحجت شي ولا اي وحدة من الكاعدين حجت..

ومر اليوم ويوم ثاني والورا شوية بدو يكفون عني..
اشتغل شغلي بس ماكالت خالتي بعد ع الطبخ ..
وحنين ماتحجي وياي ابد بس تخزرني ونظراتها
تبين مدى حقدها..
بيوم صادف جمعة..اخذني حيادر لبيت عمه
يصيرون اهل ام عادل..
تونست وي جناينهم وبنات صغار هم بكدي..

تعرفت على زوجة ابنهم اكبر مني بسنة ..
اسمها دلال وخوش بنية وهادئة..واصلا هم بيت عمهم
مثقفين وتعاملهم كلش حلو..صح جنت اعرف
هالشي بس من دخلت الهم عرفته اكثر..
بقيت كاعدة يمهم ورا الغدا..حيادر هم وياي
بس كاعد يم الرياجيل..سالت دلال..اكلج حيادر
بعده موجود..
اي يمكن يم الولد ..بس لا تريد ترحين..
لا بعد هو شوكت مايكلي نروح انا اروح..
لا هو هنا ينسى نفسه لان جماعته ولدنا..
اي اعرف بي ..

ورا شوية راسلته لان صار العصر وتعبت اريد ارجع..
ماجاوب...
خابرت عليه مارد..
كلت مشغول وي الولد وعيب احرجه..
بس صار المغرب..خابرت مرتين
ماكو..
سالت البنات كتلهم خل الولد ينطو خبر اريد ارجع..
ورا شوية كالو رايح بشغل هسه يجي:.

بقيت الوب خفت...لا جاوب اتصالي ولا جاوب
مسجاتي..
صبو عشا وكوة اكلت لكمتين بالي كله يمه..
ورا العشا بشوية خابرني..
الوو وينك حبيبي؟
هلا بيج..خابروني بشغلة وطلعت هسه راد..
اذا ماعندج شي تحضري ارجعج..

اي جاهزة ماعندي شي..
سديته منه بس احسه ورا شي لان اعرفه
اذا ضام شي من نبرته يحجي متقطع..
عدلت نفسي وانتظرته..شوية وكالو ينتظرج
برا..
سلمت عليهم وطلعت..
لكيته ينتظرني بالباب..

هلاوو..هواي طولت وين جنت..
رايح بشغلة..امشي للبيت وهناك نسولف..
شكو حيادر؟؟
ماكو شي ولج شبيج..باجر اخذج للدكتورة مو؟
مادري مو من ادخل الخامس هذا الاسبوع الجاي نهايته..
لا روحي هسه ترى جاي الوب اريد اشوف
شني بيج  صدك علاوي لو اخت علاوي..
ههه مو كالو علاوي باول سونر..
اي ذاك جان صغير ومجرد شك..بجر نتاكد..
اي انشالله..

وصلنا للبيت ودخلنا..سلمت جاوبو من ورا خاطرهم..
بس مابقينا جوا كال حيادر نعسان وراي شغل..
صعدنا للغرفة هو راح للحمام وانا بدلت وطفيت
الضوا وتمددت..
وانفتح الباب دفر ..تبارك تركض وراها
حفيد خالهم بس مادخل بقى برا..هو بيتهم بصفنه ودومه عدنا..

باوعتلي وانا تغطيت بالفرشة..شلون تدخلين
بلا ماتدكين الباب تبارك عيييب انت جبيرة..
ها عمة هذا يركض وراي..حلو شعرج وحجرتج
باردة هنياله عمي حيادر..

تريد تكمل ولزمها حيادر من كصيبتها..اليدخل لغرفة
بلا مايدك بابها شيسووله؟؟
ها ها عمي اعذرني بس..
قبل لا تكمل عت كصيبتها ولزم اذنها..بعد سنة سنتين
يدورولج رجل ..يعني لا جاهلة ولا ثولة..
اذا عدتيها ودخلتي للغرفة بلا اذن هاي الاذن اشلعها..
فاهمة؟؟
هزت راسها وهو عافها وراحت ركض..

قفل الباب ورا وينفخ..خرب بروح اهلج نهاية
ع هيج تربية..
ولج شلابسة خو ماشافتج..
شوية بسرعة تغطيت..
تقرب يمي وجر الفرشة..اندهرت ياحيادر
ولك مطلعة الضيم كله وتكول ماشافت شي..

ههه هسه بس لا تنزل تشرحلهم عزا..
شتشرح ولج حتى لو شرحت محد يفتهملها..
شتكلهم لابسه هذا اليلبسونه ع الشط تلبسه
سعاد حسني..
عزاا هههههه طلعت انت هم ماتعرف تشرح..

انا اعرف املخ بس..حجه وهو ياخذ شفتي
بقوة وشغف..
ايديه تتسلل ولسانه ترك شفتي وبقى يتغزل..
وي كل كلمة منه ازيد غرور وازيد بحبي اله..
بعد وقت مر ..نمت ع ايده مستسلمة ونعسانة..

شيهانتي ..مدللتي..سلطنت هههه..
اممم ههه ..
اكلج باجر اوديج لاهلج الصبح والعصر امرلج
اخذج للدكتورة..
صددددك حجيت بنعس وفرحة..
اي حبيبي صدك..
حضنته اكثر وغفيت فرحانة..

يوم ثاني من الصبح كعدنا نظفت وصعدت
سبحت وتحضرت..
ونزلنا انا وحيادر..امه وابو كاعدين بالصالة..
الظاهر عدهم خبر وين رايحين..لان من طلعن
كالو سلمونا..

طول الطريق حيادر قليل حجه..
من وصلنا
لزم ايدي كال دربالج ع صحتج لا تتعبين..
لا وين تقبل ماما اتحرك..
ادري بيها..
يلا ماتنزل.؟
اي ..

نزل وياي بس وضعه مرتبك ماعجبني..
وابعد الشك من راسي واكول مامعقولة صاير شي..
دكينا الجرس وفتحلنا الباب بابا لان اليوم
سبت عنده عطلة..
فتنا جوا ورا ماسلم ع حيادر اخذني لحضنه
ويبوس بيه..شلونه حفيدي خو مامتعبج..

ضحكت وانا ادخل ويا للاستقبال..
لا تمام بس شوي خانكني..
كعدنا وهو كعد يمنا..بس هالفترة بابا..
ووجه نظره لحيادر..شلونك ابو علي..نعمة نعمة..
شلون صار محمد حجه وهو يباوعلي..بهتت وانا اباوع لبابا..

الحمدلله ازمة وعدت وانت ماقصرت..
حجيت برجفة..شبي بابا؟؟
اسم الله بابا شبيج خايفة..
حجه حيادر وهو يباوعلي..انا ماكتلها حتى ماتنهبط
كلت تجي وتشوفه بعينها كلشي مابي احسن..
اي عشت زين سويت..
باوعتلهم ثنينهم وكمت..محمد وين وشبيي؟؟

كام بابا وياي..تعب شوية واليوم كلشي مابي
بس العافية..امشي وياي شوفي..
من رخصتك ابو علي..
مرخوصين ..انا هم رايح بشغلة..شيهانة يواشج تهدي..
اندار عليه بابا كله ماتطلع اليوم وياي تتغدا
مو كل مرة تتعذر هالمرة ماكو طلعة..
وصدك رجع كعد..

طلعت وي بابا..
اخذني لغرفتي استغربت..بابا وين
اريد اشوف محمد..وماما وينها..
اي هم هنا بغرفتج..
دك الباب وفتحه..اباوع ماما كاعدة يم محمد
ع سريري تنطي دوا..
وهو متمدد ووجهه اصفر..

ركضتله بسرعة ونزلت دموعي..شبيك
محمد بعد عمري شبيك..
هو جرني لحضنه وحجه بتعب ..اصحى منج
شبيج خايفة شاها..
رفعت راسي واحاجي..يعني شصار وياك
ليش هيج ممدد وتعبان..
دخت واخذوني للمستشفى وبس..ليش خايفة..

يعني هسه زين؟
كلش زين بس ماما مو زينة..باوعليها شلون
مغوركة عيونها عليج لان ماسلمتي عليها..
درت لماما بشرعة وشبكتها..اسفة ماماتي
بس محمد خفت عليه..
وهي تشم بيه وتبوس..اهم شي لا تنهبطين وطفلج
مو زين عليه..
خل اجيبلج عصير شربي ترد روحج..

كامت هي وبابا رجع يم حيادر..
انا باوعت لمحمد وسالته..شنو عندك بالضبط..
انا حيادر يعرف وماكلي خاف لا انهبط..
اي كتله لا تحجي كدامها..ادري بيج بسرعة
تخافين..
يعني وضعك يخوف!حجيتها بقلق..
لا هه مايخوف..صارت عندي ذبحة كاذبة يسمونها..
صخااام..

ليش منين اجتلك وانت شاب ياربي دخيلك..
باوع للباب وحجه..
انفال انخطبت..
شللون؟هي مو ماتريد تتزوج بعد..زين شون عرفت..
خابرتني اختها..
كالت الحك هاي مخبلة وتريد تتزوج تكول
حتى انت تشوف حياتك ليش باقي منتظرها..
خاطبها رجال ارمل وعنده ثنين اطفال..وهي موافقة
بحجة خاف مايصير عدها جهال.. تربي جال زوجها..

وليش مايصير شنو علتها بالضبط..
بالعملية السوتها قبل كم سنة..
شايلة مبيض والثاني مو تمام وضعه بس بعده موجود..
بس مادري ليش هيج يائسة..وعذبتني
وتعذبت..

الله يساعدها ويساعدك..بس شلون هسه
شنو الوضع..
اختها كالت انت اخرب الخطبة وماتصير..وانت
اذا تريدها تعال اخطبها بلا ماتدري..
اي وحاجيت ماما؟
اي كالت باجر تروحلهم..
الله يسهل..هيج تحيها محمد..زين مامتت بسببها..
شاها من تلكين نصج الثاني..تجازفين بنص الاول..
ههه عجبتني..

بقيت كاعدة يمه شوية وتالي كمت..رحت
للمطبخ هاجر موجودة سلمت ووكفت
وياها جاي تحضر الغدا..
وماما جاي تغسل التمن وهي تحجي..شغلكم
سوو كعدة لا توكفون ماما مو زين عليكم..

وكل شوية وانطتني شي اشربلو اكل وهاجر
تكلي هاي معاناتي يومية عمتي توكلني لحد ماختنك
ههه..
باوعتلها ماما وعضت شفة..انت شتاكلين
غير الخبز والخضرا اموتتني..
يا ليش واللحوم..
ماكو ماما شكد اسوي بس ماتقبل..

مو نساوتي كرهت اللحم كلة خية..بس ينطيها العافية
عمتي مشبعتني عصير وفواكه..
فديتها ماما عصيرها يخبل..
باوعتلي ماما وابتسمت..اعصر عيوني الج
بعد عمري هالوجه شكد مشتاقتله..
باوعتلها بنظرات بيها هواي معاني..واولها لو تدرين
شصار وياي جان شسويتي ..

تغدينا سوا ورا الغدا تجمعو الولد بالاستقبال عدا
حسن لان يرجع بالسبعة..
وانا تمددت بغرفة ماما وهي يمي تسولف..
سالتني شخبار حنين..وضحتلها هي كشفت
نفسها وسوءها بس ماكتلها اجت عاركتني..
بس باختصاار وصلت الها الفكرة..
كالت تولي معليج بيها واذا حجت شي كليلي
اجي ادوس ببطنها..
وهم طلعت تكذب وتكول بيوضها نشطة
بس امها كايلة لماما عدها تكيس ع المبيض
وجاي تتعالج..

قريب يصير العصر..طلعنا منهم للدكتورة..
دخلنا بالبداية اول مااجت..
هي نفسها دكتورة ماما وتعرف العائلة لان
كلها تروحلها..
بقت تسولف وياي وتسالني ع وضعي..
بدت تسوي السونار وتباوع بتركيز..
تالي ابتسمت وحجت..كعدي عيني ام علي
وضعكم ممتاز انت ويا..

كعدت وانا امسح ببطني..يعني صدك علي
ههه..
اي صدك مشوفين رجليناته شطولها رح تطلعنا
من الجهاز...
هههه ضحكت بفرحة..واحساس يجنن وانا
احس بي ينبض بداخلي..
بعدها طلعت وحيادر برا واكف..تمشيت اله
ومبتسم..ها ابو علي..

ياالله لك الحمد..يعني ثبتت..
اي ههه..وتكول رجليناته طويلة..يعني هم مثل
حضنك يصير ..
اي غير هذا الشبل من هذا الاسد..
امشي خل نرجع اشتاكيتلج..
مااا عفية اريد افتر..
اي افرج بالسيارة واجيبلج عشا ونرجع ها؟
اي هيج حلوو..

بقينا نفتر بالسيارة واحنا ناكل ونسولف..
خابرت ماما طمنتها وهو خابر امينة كلها..
سمعتها هلهلت وهو يكلها رحت فدوة الج ..
لان هي دوم تنصره وتسوي الاشياء الي المفروض امه
تسويها..

سالته ليش ماكلي ع محمد ومن شوكت يعرف..
طلع امس بهادر سامع من حنين وكايلة..
وهو اخذني لبيت عمه حتى لا اسمع من حنين وانهبط
ورايح متطمن ع محمد وعافني ببيت عمه
ومن رجعنا صعدني بسرعة لان يعرف بحنين
خبيثة وخاف تجفص..

تونست وتغيرت نفسيتي رفم قهري ع محمد..
بس الحمدلله عدت سلامات..
وصلنا للبيت وباركولنا ..وامينة هلهلت مرة ثانية..
وام عادل وبناتها باركولنا بفرحة..
بس نهاية كالت يوم لحنينة ولو جنها حبلى لان مصوفرة..
خالتي كالت اي كريب تحبل هي ظهرها قوي ..
جاوبهم حيادر..الله يرزق الجميع..امشي شيهانة كلش
نعسان ودايخ من الطريق..

صعدنا للغرفة وصدك تعبانين ونعسانين..
بس هو عنده طقوس خصوصا من يفرح
لازم يأديها وبكل جوارحه يتقنها..
وبنهاية المطاف ضحك وحجه..انا من افرح
عذريني بس مو بيدي انت تشجعين..
ههه ع اساس اذا مافرحان انت مقصر..
اي مو دومي فرحان مدامج وياي..
وانا دومي مطبعة ع كولة نهاية شنو ذن دوالي هههههههه..
دوالي بشيب الخلفها ...
عزاااا ..هههه..

ومرت كم يوم والحمدلله وضعي زين..
وعمي كلش فرحان وكلساع وكال بس تخلفين
هذا حبلي بثاني..احنا نريد نكثر نسل..
وانا اجاوبه ادعيلي اكوم بسلامة بالاول عمو الشيخ..
تكومين بوية كلهن خلفن وكامن وانت كدها انا عارفج..

خليتهم كاعدين جوا وصعدت للغرفة قريب
المغرب..
اريد اتوضى واروح ادعي واقرا قبل الصلاة
اليوم خميس..
دخلت للحمام بس ريحة الكلور خنكتني
قوية بصورة مو طبيعية..
باوعت بطل الكلور فارغ..توقعت الجهال مفرغي..
احس اختنكت ومعدتي كلبت..
لزمت المغسلة كوة ووكفت اتقيأ..

ارتاحيت شوية وغسلت..بس حيلي باد
وطلعت للغرفة امشي كوة..شافتني تبارك
اجت تركض..شبيج عمة عمة..
حجيت بتعب..مابيه بس اريد اوصل للغرفة..
لزمتني من ايدي وحطت ايدها ورا خصري
انا اعاونج لا تخافين..

للحكاية بقية
بقلم شقراء(قمر كانون)

هههه تعليقج صدك ضحكني ولله..بس امنيتي مثلج يكون عندي
وقت واسويلكم بارت ابو خمستالاف كلمة🥺

فدوة حسيتها دعوة كيوت لهجتكم تونس يعني اذا تعاركيني تلكيني هيج مسوية😍😍مستمتعة بالكلمات وعايفة العركة😍