رواية "الــيـل الـدامـس فـي الـجـحـيـم" الفصل الثاني عشر 12 - بقلم ايـڤـانـي

بسم الله الرحمن الرحيم

اللهم صل على محمد وآل محمد

______________________________________

الحياه اخذ وعطاء وهناك اشخاص حياتهم جميله والبعض حياتهم سوداء وهناك البعض حياتهم جميله لاكن؟  تحولت الى جحيم، جحيم في عتمه اليل ليل دامس في الجحيم لنرجع في الزمن قليلاً في أراضي البصره………

- صهيددد يمه تعاللل

جنت ألعب ويه ولد عمي ولمن صاحتلي امي رحتلها ركض أمي حامل وراح تجيبلي أخ فرحان حيل ، رحتلها ركض

صهيد- ها يمه رايده شي؟ 

- حبيبي انتَ خابرلي ابوك شوفه وين صار

صهيد- أيي هسه

رحت اركض اتصلت على أبوي جاوبني بسرعه

- ها انغام

صهيد- لا بابا هاذ اني صهيد

- ها صهيد اكو شي امك بيها شي؟ 

صهيد- لا بابا زينين بس ماما تكول وين صرت؟ 

- ههههه كلها بالطريق جاي

حجيت وياه شوي وسديت الخط رحت لامي

انغام- ها يمه وين صار؟ 

صهيد- گال بالطريق

هزت راسها ورجعت ألعب ويه ولد عمي

سلطان- صهيد انتَ تلعب بفريق منو؟ فريق حمزه لو فريقي؟ 

ضربت على جتفه

صهيد- أكيد بفريقك سلطان

حمزه- مو اني ابن البطه السوده ما تلعبون وياي

اجه سالم الاخ الاكبر لسلطان وحمزه

سالم- اني ألعب وياك حمزاوي عوفهم هذول زعاطيط شتسوي بيهم اني اقوه منهم

فرح حمزه لان سالم وياه،  سالم الجبير وأول حفيد لعلوان جدي ضلينا نلعب طوبه اني وسلطان واكو من ولد المنطقه وحمزه وسالم وهم اكو من ولد المنطقه نلعب سوه يوميه جنت ألعب وفرحان لحد ما اجه أبوي رحت علي اركض

- ها صهيد

صهيد- الله يساعدك بابا

سلطان- عمو عمو خلي صهيد يلعب ويانا بعد

- لا حبيبي سلطان لازم يطب جوه صارت دنيا الغروب يلا روحو لبيوتكم عود باجر تعالو

راح سلطان زعلان لان ما قبل أبوي ، اخذني وطبينا جوه لگينا امي گاعده على التخم وتتنفس بسرعه راح عليها أبوي بسرعه

- انغام انغامم بيج شي؟ 

انغام - جايي اطلگ ماتحمل الوجعع اخذنيي للمستشفى

شالها أبوي بسرعه ورحنا للمستشفى ودخلوها لغرفه الولاده بقينا ننتظر وأبوي خابر على عمامي يجون اجتي عمتي رقيه رحت لحظنها ابجي خايف على أمي

رقيه- لاا حبيبي ليش تبجيي؟  هسه ماما تصير زينه وتجيبلك اخ حلو تلعب وياه

صهيد- اخاف على أمي عمه ادعيليها تصير زينه

سعاد- تعال بيبي تعال حبيبي ان شاء الله امك تگوم بالسلامه،  يمه خالد سكت ابنك خطيه يبجي على امه

خالد- صهيد حبيبي اسكت بابا هسه ماما تگوم وتصير زينه

صهيد- لعد ليش تصرخ؟ 

خالد - هههه لان اخوك يريد يطلع من بطنها

صهيد- ماريده ليش يخلي امي تصرخ وتتوجع؟

خالد- صهيد حبيبي ميصير هاذ اخوك

حضني وضل يطبطب علي مرت ساعه وطلعت الدكتوره وهيه شايله اخوي شافه أبوي وكبر على أذنه

خالد- الله اكبر الله اكبر،  أشهد ان لا الاه اله الله واشهد ان محمد عبدهُ ورسوله وأشهد ان عليا ولي الله أسميتك " وهبان " 

باوع علي وضل مبتسم اخذته الطبيبه وراحت علمود تسبحه وتلبسه ملابس راحت وياها عمتي رقيه وبيبي رحت گعدت يم أبوي

صهيد- ليش سميته وهبان؟ 

خالد- لان وهبان مثل كمله موهوب أريده يطلع موهوب

صهيد- وهبان خالد علوان حلو الاسم

خالد- صهيد خالد علوان هم حلو الاسم

ضحكت وگام لزم أيدي ودخلني جوه يم امي شفتها وحضنتها حيل لان جنت خايف عليها

خالد- هل ولد صالح يحبج هواي

انغام- واني هم احبه تعال يمه تعال ابوسك

باستني بخدي وأبتسمت بتعب

انغام- وين الطفل؟

خالد- اخذته امي ورقيه يغسلوله

انغام- شنو سميته؟

خالد- سميته وهبان

انغام- حلو الاسم بس ليش ما سميته علي؟ 

خالد- اختاريت أسم وهبان لان اريده موهوب وهم اريده يكون مميز بين الكل مثل صهيد

ابتسمت أمي وجابولها وهبان حضنته وجانت حيل فرحانه بي صرنا عائله من اربع نفرات اني وامي وابوي وهسه شرفنا وهبان رجعنا للبيت سوه واني وابوي اهتمينا بيها وبالبيت وعمتي رقيه تجي وتساعدنا عمتي رقيه جانت بعدها صغيره تقريبا عمرها 17 سنه مرت الايام ووهبان صار عمره 7 اشهر اهتميت بي بغياب ابوي وامي لان أمي تشتغل طبيبه وأبوي ضابط شرطه اني اهتم بوهبان وتعلق بيا حيل صرت اني احفظله واشربه مميه وما انام اذا ما اخلي بحضني وهو هم تعود اله ينام يمي تعلقت بوهبان حيل وصار جزء من حياتي جنت ازعل اذا يروح ينام   اهتميت بي وجانو امي وابوي معتمدين علي بيوم جنت اريد اروح لبيت جدي زلعب ويه سلطان

انغام- صهيد نوم اخوك وودي يم رقيه

صهيد- اي يمه صار

رحت ضليت العب وياه واشربه مميه لحد ما نام شلته واخذته لبيت جدي وخليته يمهم ورجعت للبيت  ورحنا اني وسلطان وسالم وحمزه جان صف أول واني وسلطان صف ثاني بس سالم صف سادس ابتدائي نروح للمدرسه سوه ونرجع سوه واحنه راجعين شفت بنيه صغيره تلعب بالشارع وانتبهت على سالم يباوع على هاي البنيه ولمن نفوت من يمهم ينطيها ككو لو جبس لو كيك وعصير ويهتم بيها هواي

سالم- فرح تعالي جبتلج اليوم ككو

فرح- سالم كم مرا كتلك مراح احبك بحياتي؟  ليش تتعب روحك؟ 

سالم- فرح بعدنا صغار ترا بس اوعدج لمن نكبر اتزوجج

فرح- ههههه روح سالم لا يشوفوني اهلي انوب

راحت فرح طبت للبيت سالم رغم جان صغير بس يحب فرح حيل مرت الايام وسالم بقى ويه فرح ، رجعت للبيت ورحت اخذ وهبان من بيت جدي لكيت عمي باقر يشغل السياره وعمتي رقيه بحظنها وهبان ويركضون ركضت عليهم بكل قوتي

باقر - صهيد شجابك اهنا؟ 

صهيد- عمو شبي وهبانن ليش هيج يتنفس بسرعه ؟ احجووو

رقيه- امشي ويانا

صعدت وياهم وجان وهبان يتنفس بسرعه جنونيه

صهيد- احجي عمه شبيي اخويي

رقيه- مابي شي بس شوي اختنك

باقر- رقيه كم مراا كتلكممم لممن تشغلونن الصوبهه تطلعونهااا برااا؟ ؟؟

رقيه- طلعتها برا وداعتك بس مادريت بي زحف وراح يمها

صهيد- احترككك؟ ؟؟؟؟

رقيه- لاا

باقر- يمكن اختنك من ريحه الصوبه

وصلنا للطبيب وفحصه خلاله اوكسجين وانتظرنا دقائق ورجع يتنفس طبيعي

- لازم تعرفون شبي گلبه اخذو لطبيب القلب حتى يعرف شبي گلبه

تشكر منه عمي باقر واخذت أخوي اني شلته ضليت ابوس بي واهدي هو حضني ونام بالسياره مخلي بحضني ونايم وهبان جان شوي سمين وخدوده صاريات حمر وصلنا للبيت ولگيت أمي موجوده سلم عليها عمي باقر وگالها على الصار امي ضلت تلطم واخذت وهبان مني وضلت تبجي. مرت الايام وامي وابوي اخذو وهبان للطبيب واكتشفو عنده فتحه بالقلب ولازم عمليه انصدمت وضليت ابجي على وهبان

خالد- عمليه حبيبي لازم يعني مو بيدي هل شي

حجيت واني ابجي واناشغ

صهيد- ماريد يموتت اريده يبقى وياي

خالد- ما يموت ان شاء الله وهيه ان شاء الله تخلص بسرعه

حضني وضل يطبطب علي مرت الايام وسوو العمليه وبقينا ننتظره بالساعات جنت ادعي ربي تنجح العمليه أشوف امي لازمه سبحتها وتدعي وبيبي وعمتي هم يدعون طلع الطبيب وبشرنا العمليه نجحت فرحت من كل گلبي ولمن شفناه بست خدوده وحضنته وخرت منه جنت حيل خايف علي ولمن صار عمره سنه ونص بديت اعمله على المشي وصار يركض بأتجاهي واني اضحك على سوالفه لان ماينفهم منها شي

وهبان- ثهيد ديبلي مثاثه وياك هاا؟  (صهيد جييلي مصاصه وياك هاا) 

صهيد- اجيبلك ليش لا

رحت للمدرسه وجان اول يوم وصرت ثالث ابتدائي وبعدها علاقه سالم وفرح نفسها ما تغيرت رغم كلمن صار بمدرسه سالم بمدرسه الولد لان صار اول متوسط وفرح صارت بمدرسه البنات هم اول متوسط جنه لمن نرجع سالم يرجع ويانا لان على طريق بيت فرح وجان يشوفها بس ميحجي وياها جان اكو محل بصف بيتهم رحت علي واشتريت مصاصه لوهبان واشتريت دعابل حتى العب بيهن لمن طلعت لگيت سالم يحجي ويه فرح

سالم- فرح ما بقى شي بس 6 سنوات اتحملي

فرح- سالم صارلك سنه تحبني واني ماحبك سالم انتَ تحبني من طرف واحد بطل حبك ألي

سالم- تحلمين فهمتي فروحتي؟  تحلمينن

فرح- بس اني ماحبكك،  صهيد اخذ ابن عمك وروحو حبابين

اخذت سالم ورجعنا للبيت جان كلش زعلان وراح لبيتهم واني طبيت للبيت اجاني وهبان يركض طلعتله المصاصه وانطيتها اله امي جانت بالمطبخ تسوي غدا اوه بالمناسبه امي تركت الشغل وصارت تهتم ألنا اكثر وها هيه حامل بشهرها الثامن بس يا فرحه ما تمت بيوم الولاده نورتنا بنيه وأبوي سماها

خالد- سميتك شام

جنت اني ووهبان فرحانين بيها لان اول بنيه بالعائله وجانو كلها فرحانه بيها مرت ثلاث ايام وبيوم امي گعدت علمود تبدل لشام لكيتها ميته زعلنا حيل وامي دخلت بحاله اكتئاب ضلينا نهديها اني وابوي لحد ما طلعت من حالتها النفسيه مرت السنوات

" ملاحظة اني دا اكتب بس الاحداث المهمه وشنو صار ويه صهيد من ولاده وهبان لحد وفاه امه وابو"

مرت السنوات وصار عمري10 سنوات ووهبان صار عمره ثلاث سنوات

سلطان- متخيل انتَ سالم راح يخطب فرح؟ 

صهيد- صدك ؟

سلطان- اي ولك

صهيد- احس بيهم تراب صارو قديمين

سلطان - تعذب اخوي وعلي

صهيد- يلا هسه المهم راح ينخطبون

ضلينا نضحك وبالفعل صارت الخطبه وانخطبو سوه فرح وسالم صارو لبعض فرحانين بيهم سالم جان طاير بفرح لان صارت خطيبته بس لاحظت فر ح جانت تتصنع الفرح والسعاده غلست گلت يمكن متوتره،  سالم طلع وطلعت ورا

صهيد- مبروك سلومي

سالم- صهيد انتَ متخيل وياي؟  هاي الجوه صارت ألي؟  وما بقى شي وتصير مرتي؟ 

صهيد- حبيبي الله يتممها على خير

شوي ورجعنا للبيت وجانو كلهم فرحانين بهاي السنين الراحت عمامي الباقين تزوجو عمي مصطفى وعمي باقر وحتى عمي عصام حب وحده وتزوجها
وعزل ببيت وحده بعيد علينا شوي  عمي عصام وأبوي جانو حيل مقربين من بعضلمن وجاب عمي عصام ولد ورحنا نتباركلهم

صهيد- عمه مبروك الولد الصالح ان شاء الله

- حبيبي الله يبارك بيك

عصام- خالد ابنك كبر ماشاء الله

خالد- بعده صغير

ضلو يضحكون ويسولفون لحد ماجابو طاري الشغل

خالد- والله اني اريد اترك شغل الضابط لان جاي يتعبني اريد ابلش اشتغل بالمعمل مال ابوي

عصام- معمل؟  بكيفك خالد ليش ما تجي تشتغل وياي؟

خالد- عصام. محد يدير الشغل وابوي تعب اني بداله وهم سالم او صهيد راح يورثون هاذ المعمل

عصام- ليش يورثونه؟  المفروض أبني علي هو الوريث

خالد- انتَ عندك معمل بأسمك عصام

عصام- امم اي مبروك اشتغل انتَ بي خالد

سدو الموضوع حسيت اكو شي غلط بعمي ماهتميت وطلعت برا ضليت انتظرهم برا استحيت ابقى جوه لان كلها تسولف سوه بقيت برا لحد ما طلعو لمن رجعنا للبيت امي صارت تتقيء وبطنها توجعها اخذها ابوي للطبيب واني بقيت اقري بوهبان

وهبان- صهيد ماما بيها شي؟ 

صهيد- لا حبيبي مابيها شي هسه تجي،  يلاا عادد اقره اني هم وراي قرايه

وهبان- صهيد

صهيد- ها

وهبان- احبك

صهيد- واني هم احبك

ابتسم ورديتها اله ورجعت اقره رجعو بعد ساعه وطلعت امي حامل فرحنا حيل امي اخر حمل الها جان قبل سنتين تقريبا وفقدنا الامل ان ترجع تحمل بس شاء القدر وحملت وجابت النا مولد ولد وسماه ابوي "كرار" صرت اهتم بكرار وبوهبان بغياب ابوي،  ابوي صار يشتغل بالمعمل مال جدي وجان شغله ماشي تمام بدت امتحاناتي وأمي تقريني وركزت على دراستي بحيث هملت كرار ووهبان كرار اهتمت بي امي ووهبان صار أبوي يودي لبيت جدي يلعب ويه الولد سلام ومسلم ومرات يلعب ويه حكيم لان اثنينهم تقريبا نفس العمر بدت امتحاناتي وامتحنت وعديت الامتحان بالنجاح أبوي جان فرحان حيل بيه وهديتي جانت بايسكل

وهبان- اكلك صهيد

صهيد- ها

وهبان- ليش كرار مايگدر يوگف

صهيد- حبيبي بعده صغير عمره 10 اشهر وين يگدر يوگف

وهبان- اني هم جنت هيج؟ 

صهيد- كلنا جنه هيج

وهبان- صهيد

صهيد- ها

وهبان- خلي العب وياك طوبه

صهيد- لا

وهبان- ليش؟ 

صهيد- طالع اني

طلعت من البيت ورحت على بيت عمي عصام شفت علي وهو صار عمره سنتين علي اكبر من كرار بسنتين

عصام- ها صهيد

صهيد- عمي اجيت لان ابوي مدري شراد منك

عصام- هاا اي تعال طب جوه

صهيد- لا عمي منا انطيناها حتى اروح بسرعه

راح عمي عصام طب جوه وبقيت برا العب ويه علي جنت احبه مثل اخوي اجه عمي وانطاني علاگه بيها ادوات تصليح ومدري شنو اخذتها وسلمت علي درت وجهي اريد اروح لگيت رجال جاي ينزل بالغراض ومرته بيدها طفل حديث الولاده تباوع علي

صهيد- الله يساعدك عمي تريد مساعده؟ 

- ويساعدك الواه بس تگدر تنزلي هذني الجنط

صهيد- اي عمي بعيني

نزلت وياه الجنط والغراض وساعدته لان جان وحده ومحد وياه طببتله الغراض وجان بيتهم قريب كلش على بيت عمي عصام

- مشكور أبني تعبتك وياي

صهيد- لا عمي تعبك راحه

- شنو اسمك انتَ؟ 

صهيد- صهيد

- والنعم منك

ابتسمتله ورجعت للبيت انطيت الغراض لابوي وراح للمعمل بقت امي تسوي غده

صهيد- يمه

انغام - هاا

صهيد- رايح يم سلطان

انغام- روح بس مو تتأخر

اجاني وهبان يركض

وهبان- حبابب اخذني وياك

صهيد- لا حبيبي اني طالع اروح بعيد

انغام- ودي وهبان يم بيت جدك

فرح واخذته وياي لبيت جدي سلمت عليهم

علوان- شعجب منورنا؟ 

صهيد- وهبان يريد يلعب ويه حكيم

مصطفى - حكييممم تعال اجه وهبان

اجه حكيم يركض

حكيم- صاحبييي

وهبان- عزيز گلبي شلونك؟ 

صابرين - ولا عبالك البارحه جانو سوه

ضحكنا عليهم واجه سالم سلمت علي وهو گعد انتظرت سلطان يكمل سبح لان طب يسبح بقى سالم گاعد وورا شوي اجاه اتصال على التلفون

سالم - أبوي وينن! 

صهيد- عمي برا

طلع يركض ورحنا ورا اني وعمي مصطفى

عباس- ها سالم شبيك؟ 

سالم- بويه بويه فرح

عباس- شبيها

سالم - فرح تريد تعوفني

عباس- جا خلي تعوفك قحط نسوان؟ 

سالم- لا ابوي انتَ مجاي تفهمني اكلك تعوفنييي يعنيي متريدنيي.

دار علي واجه علي

سالم- صهيدد راح تعوفنيي ليشش؟ 

صهيد- سالم أهداء عليك الله

سالم- لا لازم لازم اعرف شبيها وليش هيج فجاء متريدني

طلع بسرعه يركض واني طلعت ورا جان يركض بسرعه وما منتبه وگفت لان تعبت ورجعت اركض ورا،  بس أجتي سياره سريعه ودعمت سالم بقيت صافن مصدوم من الصار تجمعت الدموع بعيوني وصرخت

صهيد- سااللمممم

ركضت علي وجان دمه سايل بالگاع

صهيد- سالمم سالمم فاتح عيونك لتغمضض سالمم

حجه بتعب

سالم- صهيد… فرح عافتني … أريد فرح قبل لا اموت

صهيد- ماتموتتت! !!!! سالمم افتح عيونكك

ركضت على بيت فرح لان جان قريب دگيت الباب بكل قوتي وطلعت ام فرح

ام فرح- صهيد؟  شجابك اهنا وليش ملابسك مدمره؟ 

صهيد - وين ابو فرح خلي يجي بسرعههه سالمم سوهه حادثثث جيبووو السيارههه نودييي للمستشفى قبل لا يموتتت

دخلت ام فرح بسرعه واجت فرح تركض

فرح- سالمم وينن؟ 

باوعت عليها بكل حقد

صهيد- بسببج انتِ الصار ويه سالمم انتِ السبب فرح أذا مات سالم ماتلومين أله نفسج

توترت حيل واجه ابو فرح واخذته لسالم بس تأخرنا سالم مات بالطريق بلغ ابو فرح الاهل وكلهم اجو جانت عمه علياء مرت عمي عباس منهاره من البجي اني بقيت گاعد ومصدوم ملابسي مدمره دم سالم اجه أبوي يمي

خالد- صهيد روح هدي حمزه وسلطان خطيه

باوعت عليهم وسلطان جان متجي على الحايط ويبجي وحمزه يبجي بالختلات رحت على سلطان وحضنته ضل يبجي بحضني سالم صار الاب والاخ  والصديق لحمزه وسلطان سوينا الفاتحه وجانت الوقت يمر ببطء عمي عباس ومرته يبجون من كل گلبهم خصوصا عمتي علياء جانت تدگ وتطلم وتصيح

علياء - بسببب فرححح كلهه من وراهااا هيههه الدمرتتت ابنييي

سعاد- كافي يا يمه كافي موزين عليج

علياء - خلونييي خلونييي بضيمييي خلونييي ولكمم شلوننن راححح هيججج شلونننن

مرت أيام الفاتحه بكئابه سلطان ماصرت اشوفه هواي لمن كملنا الاربعين مال سالم رحت لبيت فرح ودكيت الباب طلعلي زلمه ماعرفه

- تفضل؟

صهيد- بيت ابو فرح؟ 

- لا شالو صارلهم شهر

صهيد- مشكور

سد الباب وانصدمت عافت البصره بكبرها لان دورت عليها اريد اعرف ليش هيج سوت بسالم وما انتظرت بس10 ايام وشالو لغير محافظه حقدت على كل البنات وحلفت ما اتزوج أي بنيه وكرهت كل البنات بسبب فرح رجعت للبيت وجان بعدهم مامتخطين سالم زعلت حيل ورحت لغرفتي

صهيد- مات صاحبي وعزيز روحي بهاي السرعه؟  انتَ أبوي الثاني ليش تعوفنا هيج سالم؟  وحق روحك ماخلي اخوانك يعيشون نفس التجربه. اوعدك راح احمي اخوانك

نمت واني حلفت وگطعت وعد احمي حمزه وسلطان مهمه صار ، مرت السنين وكبرنا اني وسلطان وها ابشركم امي جابت بنيه قبل خمس سنوات سموها ورده وعلي كبر وصار بـ الرابع   الابتدائي بيوم رحتلهم علمود اقري علي لان جان عنده امتحانات أني صرت جامعه قسم هندسه 

علي - اكلك صهيد عوف الدراسه اريد العب ويه شجره

صهيد- ههه شجره شنو؟ 

علي - صديقتي اسمها شجره لقبها لان اسمها صعب

صهيد- اقره هاذ حتى اخليك تروح ويه صديقتك

بديت اقري الرياضيات لان جان عمي عصام ميعرف زين بالرياضيات واني شاطر بيها وگال ادرسه كملت دراسه لعلي وضم كتبه سلمت على عمي وطلعت برا ادخن طلع علي وراي وراح دگ الباب على جارهم ابتسمت لان نفسه البيت الي ساعدتهم   فتحت الباب بنيه صغيره شعرها اسود طويل ومسويته ضفيره جانت ملاك صغير بهذاك الوكت جان عمري تقريبا 22 سنه هيج. شافتني البنيه واجتي علي تركض

- عمو ميصير تدخن لان موزين عليك

صهيد- يا بعد عمج وانتِ شمدريج؟ 

- عمو دائما اسمع ماما تكول لبابا مايدخن لان موزين علي وهم اليوم بالمدسه كالو الدتخين يضر الرئتين

صهيد- اهاا بيا صف عمو انتِ ؟ 

- عمو اني ثالث  ابتدائي

اجه علي سحبها حتى يلعبون

علي - يلا شجره خلي نلعب

- اسمييي مو شجرههه كمم مراا كتلكك

نترت ايدها وگعدت بصفي مجتفه ايديها وتبجي

صهيد- علي ليش هيج خليتها تبجي

علي - اهوو اسمج صعبب ماعرف الفضهه

- اسميي سهلل بس انتَ متعرف

صهيد- شنو اسمج بالله؟ 

- شُجان اسميي سهلل

صهيد- شجان حلو الاسم علي الفظ اسمها عدل

علي - اهوو شجره احسن من اسمج

شُجان- علي مالعب وياك بعدد مزاعلتك

صهيد- تعاي شجان

شجان- حتى انتَ ماحجي وياك

صهيد- شعلي اني؟ 

شجان- ما مزاعلتك

صهيد- انطيج الف وترضين؟ 

شجان- اريد اشوفه

طلعت من جيبي ألف هيه ابتسمت واخذته باستني بخدي وگعدت يمي مدت لسانها لعلي

شجان- هاذذ حسنن منك

علي - هاي شنو اني هم اريد مو بس هيه

ضحكت علي وانطيته وگمت منهم واني اشغل جگارتي الثانيه

صهيد- يلا بيباي شجونه

شجان- باي عمو

هل طفله دخلت گلبي رغم صغر عمرها بس تنحب بسرعه واني اتذكر تصرفاتها اضحك عليها

خالد- صهيد راح نروح اني وامك عدنا شغله بسرعه ونجي دير بالك على ورده

صهيد- اگدر اعرف وين؟ 

خالد- بسرعه نجي صهيد دير بالك على اخوانك واكو اكل بالثلاجه حمي الهم خلي ياكلون ولمن يجي وهبان كله ياكل لان مماكل

انغام- ورده لعبها بغيابنا ووكلها مو تنسى وها لا تنطيها هواي حلويات لان بطنها توجعها تضل خوش؟ 

صهيد- هههه يلا يلا روحو اعرف شلون اهتم بيهم

اجه ابوي وخله ايده على جتفي وابتسم

خالد- انتَ ابوهم بغيابي خوش؟ 

صهيد- طبعا حجي اعتمد علي

راحو أمي وأبوي واني جنت العاب ورده لحد ما نامت شلتها وخليتها بغرفه امي وابوي ونزلت جوه لكيت وهبان جاي

صهيد- وهبان تريد اكل؟ 

وهبان- شمسوين؟ 

صهيد- ماعرف برياني يمكن

وهبان- هسه اصب كرار وين؟ 

صهيد- راح ويه حكيم للطوبه قبل شوي

وهبان- اها خوش

راح وهبان صب لروحه اكل وگعد ياكل جنت اباوع على التلفزيون واتصل احد بتلفون البيت استغربت رقم غريب؟  جاوبت وجان صوت رجال غريب وخشن حيل

- امك وابوك بالمستشفى **** تعال بسرعه

انهبطت ورحت ارگض لورده شلتها ونزلت

وهبان- صهيد شكو !!!

صهيد- امي وابوي بالمستشفى بسرعهه روح جيب كرارر تلگاه بالملعب الورانا مابين اودي ورده لعمتي رقيه بسرعهه

طلع وهبان يركض واني ركضت وطبيت للبيت جان جدي ما موجود وكتلهم على السالفه واني جسمي كله يرجف خايف على اهلي لا يصيرلهم شي اخذت عمتي رقيه ورده مني عمتي رقيه تزوجت وتطلگت وعدها بنيه اسمها "كنان" ركض عمي عباس لسيارته وصعد بيها صعدت ولفنه اخذنا وهبان وكرار وكرار ما مفتهم السالفه كرار جان عمره تقريبا 10 سنه ووهبان 16سنه

كرار- شكو صهيد صاير شي ليش اجاني وهبان يركض؟ 

صهيد- ماصاير شي حبيبي مصاير شي بس لازم نروح بشغله

ساق عمي عباس السياره ووصلنا للمستشفى دخلت بسرعه اركض ولگيت زلمه جبير بالعمر عرفته هاذ يشتغل ويانا بالمعمل لمن شافني اجه سلم علي

صهيد- عمي شصاير بأمي وابوي؟ 

- والله ماعرف اجيت اريد اروح للمعمل ولگيت سياره مسويه حادث ولمن اقتربت منها لگيت امك وابوك مسوين حادث وجان الدم يسيل منهم وبسرعه جبتهم اهنا

صهيد- حادث ؟ ويم المعمل؟ 

- اي وداعتك

التفتت على كرار والدموع بعيوني وكرار جان يبجي

صهيد- لا تبجي هسه يصيرون زينين

عباس - مشكور ما قصرت

- لا عادي عود طمنوني عليهم استاذ خالد ورده ميستاهل هيج يصير وياه

راح وعافنا استغربت من سالفه الحادث ماكو يم المعمل اشجار او فد شي يخلي السياره تسوي حادث عرفت الحادث مقصود واكو قصه وراه هل حادث

عباس- صهيد خابرت عمك عصام ومايجاوب خابره انتَ

خابرت عمي عصام ومايرد بقيت انتظر مرت ساعتين وطلع الطبيب رحت علي اركض

صهيد- ها بشرر ابوي بي شي؟ 

جانت ملامح الحزن على وجه

صهيد- أمي … أمي بيها شي؟ 

بقى ساكت

- الباقي في حياتكم

صاح كرار وهو يبجي

كرار- منووو بيهممم دكتوررر احجييي

- أبني هاي سنه الحياه وكلنا نموت

وهبان- احجييي دكتوررر! !!!!!

- اثنينهم

انصدمنا كلنا گام كرار يصيح ويريد يدخل جوه الابوي لزمه وهبان وهو مدنگ وهبان شخص كتوم حيل بس ضل يبجي رحت لكرار وحضنته

صهيد- كرار كرار اسمع حبيبي لتبجي لتبجي خوش؟  اني اهنا اني يمك ماعوفك كرار

كرار- اريد ابويييي وامييي اريدهممم انييي

حضنتهم اثنينهم ومن هذاك اليوم صار ثلاث اطفال برگبتي وهبان جان مراهق وكرار بعده 10سنوات وورده يا حبيبه اخوها بعدها عمرها خمس  سنوات عملت وهبان مايدخل بالعلاقات الحرام أو يحب بنيه علمته على الطريق الصح بالفاتحه جنت اني المستلم الشغل كله استقبل الناس التجي وانطيهم الاكل والشرب ووهبان وكرار جانو ما مقصرين وياي جانت الفاتحه هاي اسوء فاتحه اسوء من موت سالم لان خسرت كلشي حسيت بالضعف اول شي خسرت سالم وبعدين خسرت امي وابوي حسيت اريد استسلم للحظه اجاني كرار

كرار- صهيد انتَ ابوي لتعوفني وحدي

صهيد- ماعوفك حبيبي ماعوفك انتَ بگلبي شلون اعوفك

كرار- ورده تريدك ضلت تبجي تدور عليك

صهيد- يابعد حيلي وينها جيبها؟ 

كرار- ماتقبل تكول اريد صهيد

طلعت من الجادر وطبيت جوه شفت ميسره بنت عمي مصطفى عمرها 8 سنوات

صهيد- ميسره حبيبتي روحي صيحيلي اختي ورده

ميسره- صهيد اي هسه اصيحلها

طبت ميسره ولمن طلعت جانت لازمه أيد ورده الي تبجي لمن شافتني رگضت علي وحضنتني شلتها وضليت اهدي بيعا

ميسره- صهيد

انتبهت عليها واشرتها ها

ميسره- لا تعوف ورده واخوانك

صهيد- ماعوفهم حبيبتي

ميسره- حتى اني؟ 

ابتسمت وگرصت خدها وطلعت من بيت جدي ورحت لبيتنا

ورده- صهيد اريد ماما

ماعرف شكلها بعدها صغيره مو مال اكلها امج ماتت دخلتها للبيت ووديتها لغرفتي وشغلتلها وشغلتلها الابتوب مالي وطلعتلها فلام كارتون

ورده- صهيد ماريد هاي اريد امي

صهيد- ورده حبيبتي أني أمج وأبوج واخوج وصديقج خوش؟  لتضمين علي أي شي اني اهنا اعتبرني أبوج وكلشي اعتبريني مخزن اسرارج ورده انتِ مراح تفهمين الي جاي احجي

ورده- ماتو؟

تجمعت الدموع بعيونها وحضنتني وضلت تبجي بحضني گعدت بالگاع وخليتها بحضني تكمل بجي لحد ما نامت شلتها وخليتها على الجربايه وغطيتها وطلعت من الغرفه گعدت على الدرج وضليت ابجي صعب صعبب الشعورر صعببب بيوم وليله يروحون صعبه علي افقد امي وأبوي بيوم واحد،  نزلت ورجعت وياهم اشتغلت وضغطت على نفسي حتى ماشوف اخواني واگعد ابجي من هذك اليوم صرت اني الاب والام والصديق والاخ لاخواني مرت الايام والسنوات دخلت بعمر الـ30 وكلهم كبرو ودخلو جامعات اله ورده جانت سادس اعدادي وبطلت. وهبان صار ملاكم بس ترك الملاكمه ودخل جامعه الهندسه وتخرج منها وكرار بعده مرحلة ثالثه جامعه القانون محامي بهذيج السنوات صرت ألهم السند وكلشي واني افرح لمن اشوفهم يكبرون گدامي شوي. شوي اشتغلت بهواي شغل بس علمود ماخليهم يحتاجون احد اوه بس لحظه خلي نرجع بالزمن شوي لمن جان عمري 25 قبل عشر سنوات .

اركض بكل قوتي وعمامي وراي يصيحون بس ماهتميتلهم اركض والغضب مسيطر علي دفرت الباب. وصار گبالي علي دفعته ودخلت جوه رحت لعمي عصام ولزمته من ياخته واني اصيح علي

صهيد- ليشششش !!!! اخوكككك لككك واخوووككك لييييشششش هيحجج سويتتت بييي! !!! عصامم وحق السموااتتتت ماخليككك عايشش

دفعني ورجعت اضربه صار فوگاي ولزمني من ياختي وهو يضحك

عصام- تعرف ليش؟  المعمل الي بأسمك اريده ألي اني التعبتتت بيي انييي التعبتتت بيهننن مو انتتت لووو ابوككك جانن علموددد اخلصص من ابوك هو اموته وأموت سالم وصار دورك واخوانك وحتى اختككك

ضل يخنگ بيه ودخلو عمامي عمي عباس سمع انُ عصام الي كتل ابنه سالم راحو على عمي عصام ووخرو مني بقيت گاعد بالگاع مصدوم هاذ أبليس مستحيل يكون عمي علي جان يباوع علي ويبجي طلعت برا امشي على كيفي عفتهم وجان عمي عباس صاير عصبي ويضرب عصام صارت عركه جبيره عفتهم وطلعت برا حسيت اريد اوگع كعدت على الدجه ( مثل الرصيف بس صاير گدام باب البيت)  خليت أيدي على راسي مامستوعب عصام سوه كل هاذ لان عرف اني وسالم راح نورث هاذ المعمل قرر يقتل سالم بعدها أبوي ويريد يقتلني اني اجتي نفس البنيه جنت ناسي اسمها بس اجتي علي وانطتني كلينكس

شُجان- عمو شبيك تبجي؟

صهيد- ابجي على روحي

شُجان- شبيها روحك

صهيد- تريد تموت

لزمت وجهي بأديها الصغيره

شُجان- عمو لا تستسلم الحياه هيج يوم الك ويوم عليك

أبتسمت الها ولزمت ايديها وبستهن جانت اديها ناعمه دمعت عيوني

صهيد - بيا صف صرتي؟ 

شجان- راح اصير خامس

صهيد- اوو عفيه

ضحكت ولمن شافت عمامي طلعو خافت منهم وصارت بصفي خاتله

صهيد- شبيج؟

شُجان- اخاف يكتلوني

صهيد- لا مايكتلونج لتخافين

گمت واريد اروح لزمتني من ايدي

شُجان- انتَ بطل تذكر هل شي عمو

ابتسمتله ورجعت للبيت گلت لوهبان ولكرار على الصار وحقدو على عمي عصام ورده جانت تكره عمي عصام من زمان بس انطيتها خبر وصارت تكره اكثر
رحت لبيت جدي وگعدت بديوان علوان گعدت گباله واجتي كنان انطتني الجاي ابتسمتلها وراحت

علوان - عصام سوه هيج؟ 

صهيد- ابنك أبليس مو بشر ابنك شيطان

علوان- ابني ميسوي هيج وهاذ عمك عيب تحجي علي

صهيد- عمي؟  من هسه اتبره منه ماريد لا اعرفه ولا يعرفني

عباس - بويه انتَ شايف روحك شجاي تحجي؟ 

علوان - لدوخون راسي سالم وخالد ماتو الله يرحمهم

صرت عصبي وصحت

صهيد - انتَ تعرف بالسواه موو؟ !!!! لهاذه انتَ ساكتتت على عمايللل ابنكك

علوان- صهيد !!!!

صهيد- وجعهههه بگلبب صهيددد

علوان- عباس اطلع برا اريد احجي ويه صهيد على انفراد

طلع عمي عباس وهداء جدي

علوان- أسمع كلش زين عصام يوصلك تهديد أذا ما تنطي المعمل راح يدمر حياتك،  صهيد انتَ شلك بالمعمل شو مهندس والحمد الله عندك خير تنازل عن المعمل وأوعدك اخلي عصام يشيل لغير منطقه بعيده كلش علينا

صهيد- افكر

طلعت بدون ما انتظر الجواب من جدي رجعت للبيت لگيت وهبان جاي يدرس هو وورده وكرار اجتي ورده تركض

ورده- صهيد كول لكرار خلي يقرينيي

وخرت منها وصعدت فوك بدون ما ارد عليهم رحت لغرفتي اجتي ورده دگت الباب

صهيد - مو هسهه اريد انام تعبان

ورده- صهيد

جانت تبجي بسرعه ركضت فتحت الباب لكيتها تبجي شلتها خليتها بحضني

صهيد - شبيج حبيبتي ليش تبجين؟ 

ورده- بطلت تحبني صهيد

جانت تحجي وتبجي ابتسمتلها وبست خدودها

صهيد- لا حبيتي ماكرهج ولا بطلت احبج انتِ حبيبة صهيد شلون ابطل احبج؟ 

ورده- جا ليش ماحجيت وياي لمن كتلك على كرار

صهيد- تعبان حبيبتي تعبان والله

بقت شوي يمي وجابت كتبها قريتها وراحت لغرفتها تنام ، نرجع لمن صار عمري 30 علاقتي ويه جدي تحسنت والمعمل تنازلت علي وعصام اخذ عائلته وراحو شالو لغير منطقه بعيده علينا من اخر مرا شفت بيها البنيه الصغيره. قبل 8 سنوات ودائما اني افكر بيها ماعرف صارلي سنين مشايفها ماعرف بيها شنو اخبارها بيوم مليت من البيت وحسيت راح اختنگ من البيت طلعت ورحت للبستان مال العائله رحت لبيت صغير بي حصان أسود "الكسندر " صار سنه من اشتريته وتعلقت بي الكسندر صار جزء من حياتي دائما افضفضله واذا اختنگ اروحله واگعد افضفضله صار مخزن اسراري بس بهذاك اليوم صار شي مختلف واني جنت افضفض لالكسندر اجتي بنيه لمن دققت بملامحها عرفتها نفس البنيه الصغيره الجانت يم بيت عمي عصام بس جانت خايفه واجتي علي تركض

شُجان-عمو الله يخليك احميني

صهيد- منو انتِ وشجابج صوب البستان وانتِ بهيج عمر؟

سويت نفسي ماعرفها لان ماريد تعرفني

شُجان- عمو بس احميني وانوب اوخر وداعتك

صهيد- من منو تخافين؟

شٌجان-من مرت ابوي وابوي والشيخ

صهيد - طبي جوه ولطلعين لحد ما اكلج اطلعي

طبت حسيت بگلبي يدگ بسرعه ماعرف جانت حلوه لمن جانت صغيره وهسه صارت احلا سمعت خطوات وراي خطوات رجعت لملامح البرود

سناء- باوع لك اذا عرفت البنيه عندك متلوم اله نفسك

صهيد- واني شمدريني؟ محد گرب صوبي اهنا مثل ما تشوف ماكو احد بس اني والاسكندر الحصان بتكم حصان؟

نعمه- بويه متأكد البت ماموجوده يمك؟

صهيد- عمي وداعت شيبات هاذ الشيخ ماكو

الشيخ علي - والله اذا البت يمك ادفنك وانت حي

صهيد - توكل خالي ماكو احد اهنا هيه گوه؟

نعمه- اريد افتش بنفسي يمكن طبت للمخزن؟

صهيد- المخزن هستوني جنت بي وقفلته قبل لا اطلع ماكو احد عمي توكل

نعمه- بس..

صهيد - اها؟ عمي كتلك توكل لا تضل تبسبس

جانو واحد يباوع للثاني رفعت حاجبي وراحو
رجعت للبنيه فتحت الباب

صهيد-طلعو تگدرين ترحين

شُجان- وين اولي؟

صهيد- چا تبقين اهنا؟

شُجان- لا مو قصدي

صهيد - چا شقصدج تعالي اطلعي اهنا راح تموتين من الحر

ومن هذاك اليوم ضميت على شُجان انُ اني نفسي الولد الجانت تجي تگعد يمه لمن جانت صغيره وهيه كبرت وصارت مرتي حبيتها حيل واهتم بيها ماخليتها بيوم محتاجه شي عاملتها مثل معامله بنتي صح فرق العمر بينا 15 سنه بس الله شاهد احبها حب مامعقول اكو احد يحب شخص هل گد شُجان اعرفها من لمن جانت طفله رضيعه ولحد ما كبرت وصارت مرتي بالصدفه يمكن جانت مساعدتي لابوها وامها بهذاك اليوم مو صدفه ربي جمعني باهلها واني مراهق حبيتها رغم جنت اكره البنات وجنت اكول مراح اتزوج واعوف اخواني بس هاي اني تزوجت وعندي شجان تسوه كل البنات،  لمن تزوجت مريم جنت ماطيقها وتزوجتها لان جنت عبالي شُجان ما تحبني بس لمن عرفت بيها تحبني بالصدفه سويت كلشي بس علمود اطلگ مريم رغم مريم جانت تحبني بس اني ماحبها گلبي ويه شُجان عقلي ويه شُجان هاويها اني. …

وهنا كانت حكاية صهيد خالد علوان ألذي تعذب جدا في طفولته ومراهقته وحتى في شبابه لاكن ربي عوضه بشُجان وابنهم الراح يجي بالطريق حُب صهيد المبالغ لـ شُجان هو افضل شيء بحياه صهيد
تعرفنا على سالم الشاب الذي كان يحب فتاه فرح لاكن غدرت بسالم واختفو من البصره سالم الذي ذهب ضحيه لأجل الحُب وهنا يكون نهايه البارت انتظروني بالبارت الجاي. 

________________________________

يتبع…

رأيكم؟  هاي قصه صهيد وسبب كره لعمه عصام اتمنى عجبكم البارت؟  تصويت لنتسون 🤍

قناتي على التلي اشتركو بيها