رواية اماً لهن الفصل السادس 6 - بقلم مريم السعدي

بارت ٥

#أماً_لهُن

#مريم_السعدي
.
.
.

رافد!!!
شجابه عليه

صار كومهه
صار سنين شجابك عليه شذكرك

وصل عني واسمع حجيه وياه عمو يخاف من الفضيحه يتوسل بي كوم روح

وهو يترسل بصياح
- صيحهااا احاجيها بس اكوللها كلمتين واروح

رافد؟!!
شعده بره
شيريد؟!!!
كم سنه فاتت غصب برضايه فاتت من عمري
واخذت مني عافيه و وكت وتناسيته
وتناسيت حرگته بگلبي

ديبجي يا الله
اسمع عمي يحجي وياه بالباب وهوو يصيح
اختزينا كدام العالم و البنات يمي صافنين

رسل: شيريد جاي بعد هالوكت هسه تذكر.. بطران على ربه هذا النوب سكران يا الله وبيت بي اربع نسوان شون سمعه حيجيبلنا

تباوعلي وتحجي باستهزاء للموقف كله واني اتهرب من عيونهم طب عمي دك باب المطبخ الداخليه
العم : فتحو عمي ماكو شي

الهام...
فتحت اله وعيوني حايره باوعلي عمي طمني يهز براسه

العم : مي مي جيبي ماكو شي شوي مشاكل عده

رسل : جدو واحنا شعلينا بجيبلنا سمعه هذا

العم : اني واكف جدووو سمعتيش واني حاضر امشي فوووتي لتوجججيها

الهام....
بقيت اباوع لعمي رافد اقاربنا من بعيد وعمي من اول يعز اهله حتى اخويه الله يرحمه ورغم كل الصار بيننا رافد كان كلش ادمي وابو خوش انسان كان

اخذذ عمي مي وطلع لرافد
كاعد بالحديقه وياه
والبنات طبو غرفهم
واني تختلت منهم وطلعت من غرفتي للصاله
وكفت وره شباكها اسمعه
اسمع ندمه

شي بيه يرجع اللي انفقد من كرامتي وارتاح اني شي ثمين ضيعه و ندمان راجعلي يريدني يمكن
والكه روحي اشفق عليه من جديد من سمعته

رافد : عمي اخذت جهالي
تعاركت وي امي للمره المليون
تهددني اخذهم وانهزم ومتعرف وين ماوين
وسوتها صار اربع ايام ادور عليها ماالكاها
لا اهلها لاخواتها ماكو فص ملح وذاب جهالي عمي بناتي وابني

العم : بابا رافد من اول مشكله واعزل
امكانيتك زينه اطلع بيت وحد

رافد : عمي شون اعوف امي وخواتي منو عدهم نسوان اعوفهم وحدهم شون

العم : اي لعد ابقى من مشكله لمشكله وليش جاي لهنا ليش تاذيها تره للومه حايره ببنات اخوها

رافد : اعذرني عمي... من شربت فصلت اول وجه تذكرته هي .. شكد تحملت منهم وسكتت
ردت منها تقويني نسيت بهالتصرف حجيبلها حجايه اعذرني عمي وتعذرلي منها كايم اروح اني اترخص

العم : الله يصلح حالك ابني الله يصلح حالك. ويهدي امك وخواتك

الهام...
باوعت من وره البرده كام نفض هدومه وكأنما نفض وياها اخر ايامنا وذكرياتنا الجانت تصير بنفس المكان بهالركن بالحديقه رفع عينه لمحني بقه نظره وارتبكت عيوني

دنك خجلان وطلع يجر بروحه جر وعمي وراه طبك الباب زين سديت البرده
ومدري ليش بجيت

على حضي
على گلبي اللي رجع دك من شافه وانعصر من سمع ونينه على جهاله

شكد حبيتك ووكفت وياك وعاونتك
و شكد استخفيت بيه وبمشاعري
فززني صوت عسل همست

عسل : للومه
التفتت
الهام : ها عسل
عسل : منمتي
الهام : لاهسه حكوم
عسل : راح هذا الرجال
الهام : اي راح شتريدين طلعتي

عسل : رسل صارت عصبيه وكسرت التلفون وكامت تغلط وكامت تبجي

صفنت عليها
الهام : ازل وين

عسل : جوه نايمه مهتمت

الهام : هسه شسوي اطب احجي وياها لو اسوي روحي مادري

عسل صافنه لصفنتي

الهام : عسوله معليج
عسل : عادي انام فوك يمج
الهام : امشي

صعدت نمت صح بالي يم رسل بس اللي يجمعني بيها مشاكل اكثر من كونها مشاعر

خاف اطب احجي وياها وتكولي انتي شمعرفج خلك عانس اذنها مكچيه محد يباوع بوجهه

الصار انه فقدت السيطره على رسل وتركت الوضع على ماهو عليه بس مكدرت انام

قلقي عليهم صار لا اراديا مو بديه صرت اندعي يدفع عنهم كلشي ياذيهم ومن افكر اتخيل اذا وحده منهم احد اذاها شيصير بيه

شراح احس
بلحضتها احس كلبي يوكف
وانفض عن راسي هاي الافكار
الله حافضهم

كوني موظفه وكلمن بمكان وممرتبطه بيهن كلش قوي

ساعات لقاءنا تنحصر بست ساعات باليوم
من اجي من الدوام وهمه يجون وكلمن عدها اسرارها الخازنتها بصفنتها
عدا عسوله التحجي كلشي يمر عليها واني انتظر رغم ماكولها ولااسال

بس وكت المسلسل اللي من يبدي حدما ما يخلص هي تحجي عن الصار بالدوام و صديقاتها

المسلسل اللي مااعرف اي شي عن احداثه غير الاحداث التحجيها عسوله الي

صلاتي اللي اقضيها دوم ولافد يوم علمتهم عالصلاه وشجعتهم عليها

ازل الوحيده اللي تصلي والحجيه علمتها بيبيه اساور وكت بوكت متأخر فرض

وخواتها يتفرجون عادي
لافد يوم كتلهم صلو او علمتهم مااعرف شون اوصلها الهم واكول بنفسي خل اعلم روحي اول

جنت احس روحي ورقه يابسه وبإبتسامه عسل وضحكها وتصنيفها تتخضر روحي واضحك من گلبي لتفاهه الحديث او انه فعلا يضحك
مااعرف المهم انتظر حديثها دقيقه دقيقه

ازل الها عالمها الخاص
نقيه
شاطره حيل
وذكيه وموضوعيه
وصاحبه مبدأ ونضره ثاقبه
مختلفه عن اختيارات بنات هالوكت
اجمل وحده بين البنات وارقهم واكثر حساسيه

رسل بليلتها الظاهر غلطانه بحق حبيبها غلط جبير مداومت ثاني يوم صخنت وتهذي باسمه مكدرت اطلع للوظيفه بسببها

راحو البنات للجامعه وعسل للمدرسه وبقيت يمها
ولاول مره كان يجمعنا حديث
دخلت للغرفه اشوفها
ولكيتها تحجي بالتلفون وتتوسل وتبجي صدمني منظرها

رسل
......
- والله بس هيج سولفت وياه
.....
- هيج بس ردت اتعرف عليه موقصدي شي
....
- لا والله مطلعت وياه
.....
- لا لا كذاب لتصدكه

الهام...
مهتمت لوجودي وكملت تلفونها تبجي بحركه
وصوت المقابل عالخط الثاني يشحط عصبيه
- خنتيتتتتي كذذابه لتكذبين شفت محادثتكم

وهي تنكر تكوله مفبركه
اخر شي دزلها صوره وختمها
- اذا اتصلتي بيه بعد اشلفج
وحتى من الجامعه اخليج متفوتين تنسين عدج حبيب حبج بگلب صافي تنسينيييي نهائياً

وسده بوجهه
شافت الصوره وضربت على خدها وماتت بجي
مكدرت لزمتها اهدي بيها ماعرف شسوي ترجف وتضرب على كصتها وتردد

رسل : راح من اديه راح والله احبه مادري شون سويت هيج مجرد صداقه مخنته

الهام : اهدي رسل خل افهم

رسل : للومه شتفهميييين هم حابه انتي وتفهمينهم بعمررري وتعرفين الداحس بي
اوووف يايمممه ياحركه گلبي
راح من ايدي متواعدين بعد شهر يدز امه مجهز حتى الشقه لللوووومه

الهام : ليش خنتي لعدددد
نترت بيها بغضب ولزمت من كتفها اهزها

صفنت ورجعت بجت غطت وجهه وتعض باصابعها طلعت عفتها
مكدرت ابقى بعد شصبر بيها وهي طامسه بالغلط انانيتها وغرورها ودوها تهلكه خسرت الي تحبه ويحبهاخاطر سياره راقيه وهم ياريت حبيبها مقصر فلوس اهله متروسين وكوه قبلو عليها لان يحبها

اخوته كلمن شركات قطاع خاص بره وجوه القطر وهو المدلل شتردين بعد
وتالي ابن عمه وصديقه جاي للجامعه
وشايفها سئل عنها

اصلا مبين الموضوع تدبير من اهله
حتى هو مكلها ابن عمي كلها صاحبي
وضل يلحكها وهي انسطرت بسيارته وكونه انبهر بيها متدري كومه بنات حلوات تتخيل بس روحها حلوه غرورها جرها لادنى هاويه

٣ ايام ممداومه والتلفون موكع من اديها ومتحجي وي احد ابد
تالي ازل حاجتها جنت استمع الها بامعان رغم مابينا الباب

ازل : رسل مناويه تداومين

رسل : ماريد محد يتدخل بيه
ازل : اي اوك ماشي مااتدخل بس انتي غلطتي ولازم تتحملين نتيجه غلطج
ومو معناه تتهربين
لا خليج صلبه وقويه
اعتذرتي و بررتي الانسان خلق عجولا وخطائا هذا طبع البشر
هو ميريد يسامح مو بلازم خلص اطوي صفحته توقعتج اقوى من هالشي واقسى

كانت منصيه راسها ونظرات الحقد تارسه وجهه هزت راسها موافقه همست
رسل : صح كلامج وشنو يعني اني اخلي اهله يتشمتون بيه ويكولوله شوف موكنالك موخوش الا اخليهم يتوسلون بيه بسيطه خلي بيد اهله خرخاشه

ازل : بس انتي الغلطتي رسل اتركي

رسل : لويموت لااخلي يتوسل مثل متوسلت لااخلي نار بينهم

ازل : رسل يكفي التفتي لروحج ودراستج كافي هي شنو الحياة مسابقه

رسل : اي لعد شنووو خاف ترديني اضل مثل عمتج عاانس ومحد مگلبني
بابا احصلي رجال يصرف عليه واشبع سفر وفلوس وانتي ابقي بعالمج الوردي
بس دير بالج لتوكعين من سيارة عمو رائد

ازل : فزيت من ذكرت اسمه وعوجت حلكها شنو دتشوف بداخل گلبي دتحس بيه
لالامستحيل هيج ذبتها الحجايه لا مستحيل
تهربت منها وطلعت صدك رجفتني

دك تلفوني اسو
ازل : الو
اسو : ها ازوله دزيلي محاضرة اليوم فدوه

ازل : ادري انتي مو كتبتيها.. اني شون بيج
اسو : اي مو واضحه

ازل : وهاي هسه يله راح تقرين الامتحان بالقرآن حتخبليني انتي حدزها واريد من الله باجر تاخذين جوه ال١٤ اگلب الدنيا عليج

اسو : لا والله راح اقره

ازل : خل اشوف

دزيتها وفتت حضرت هدومي لكيت رسل تحضر ملابسه باتقان ازيد من قبل وصفنتها بالف وعد وانتقام يحلف تندمه محجيت بعد ولا فتحت وياها موضوع

وهيج مشت ايامنا
عده شهر الامتحانات
وبيوم من الايام واكفه انتظر اسو تطلع من الامتحان لمحت ابوها طب الجامعه

نظارته الشمسيه رفعها من لمحني وابتسم توجه ناحيتي كان بذيج الفتره غايب اسبوع سفره لعمان

ولهي بي تصالحت وي نفسي عليه لاطلع سر ولاعيوني تطلع نظره
بيني وبين كلبي وعيني وسهر ليلي كتمنا سرنا وقصه حبنا في سبيل مااخسره

وصل عمو رائد يمي كال
رائد : يابه الله يساعددهم
ازل : هلو عمو شونك

رائد هله ازوله وينها تكج
ازل : بعدها جوه اساله مطوله

باوعلي بعمق مبتسم باعجاب كال وبينت لمعه اسنانه
وكالعاده ازوله الشاطره مسيطره و سباعيه

ازل : اي هههه وشنو الماده اللي متسيطر عليها ازوله. موعيب عمو قابل متعرفني اليوم البارحه

رائد : لا والله سبعه ولان اعرفج داكولج سبعه الزرع زرعي وانه اعرف بي مو

ازل : اي عمو مو

رائد : شكو ماكو سولفيلي مدام ست اساور بعدها تعاي بالكافتريا تعاي ريوك ممتريك اني

ازل : لاعمو هنا موزين اكلهم والله ذيج المره بطني ملختني من اكلت منهم

رائد : لا بس جاي
مشه ومشيت وراه
كعدنا جانت الجامعه كلها تعرف عمو رائد ابو اساور ويعرفونا اقرباء اني واساور مو بس صديقات

حجيتله مقتطفات عن حياتنا بهالاسبوع شون كضت ومن بتنا بيبي الحجيه شوي تخربطت وهوميدري مضميت عليه

وختمها يهز راسه بهمممم
رائد : لازم ماسافر بعد هاي اخر سفره اكضي الشغل بيها واصفي واستقر

ديحجي ودك تلفونه نظراته تغيرت واني دكات گلبي وي نظراته هم تسارعت

يمكن المقابل عالخط من جنس حواء الخربطتله. ملامحه رد بثكل

رائد : الو
.....
أهلاً
.....
اي اي بالعاصمه اني
......
العصر امر
.....
محتاجين شي
......
ماشي فيماللا

رفع عيونه شاف نظرتي وركز بين عيوني واني مكدرت اسيطر بقيت بتركيزي

حبيبته يمكن
ليش لا
اربعيني ومو ناقصه شي
شخصيه وهيبه شتريد بعد اكيد محتاج انثى بحياته
نصه راسه وضم التلفون

عمو جان يخاف علينا اني و اساور كلش ميحجي حجي موزين يبعدنا عن اي اخبار بيها فساد غلط غلط ميغلط كدامنا

لمن ركزت نظرااتي عليه تهرب مني خوفا لا الزم عليه لزمه تعيب اخلاقه كدامي

نصيت راسي بس كلي تساولات وفضول جارح قاتل اختنكت نقذتني اسو من دكت

رديت رأساً
تعاي بالكافتريا وي عمو رائد
احجي وحنجرتي ترجف اجتي اسو وبوسته بلهفه تضحك

رائد : شونج مجاوبه بابا
اسو : اي كلش زينه اذا ازوله درستني

رائد : عفيه بابا عفيه يله كومو دنروح عدكم شي بعد

اسو : لالا خلصنا يله ازوله تباتين عدنا اليوم مو

ازل : لالا للومه متقبل
رائد : ليش عمو اني احاجيها امشي عازمكم على غده لتكوليلها عمي اجه اني وعمتج حيه ودرج ههههه

ابتسمت و اركز بعينه غابت ضحكته وبعد عينه منحرج مني ليش منحرج
يعني تره من حقك تعيش بس مومن حقي احب واحد كد ابويه
عيب وغلط على كلبي وعقلي عيب انسان شايفني بنته واشوفه كل دنيتي ورجل احلامي

مشيت وياهم ونتأكد من الحل اني واسواحاول الهي روحي الحمد لله تعبنا مضاع مجاوبين

بقينا ننتظر عمو يجيب السياره من الكراج اساور غمضت صاحت
- خرررب خضي نسيت الدفتر عالكرسي بالقاعه انتظروني اجيبه واجي راحت ركض وخلت كتبها يمي

اني بره الحرم انتظر وفات ولد كان من فتره يحومي واني هاملته وكف كبالي
كال
- اوصلج
باوعتله هزيت راسي باستصغار
- لااا
- زين اساعدج بالكتب شايله كومه
- وانت شلك غررض نترت بي درت وجهي

- وشبيج تصيحين ممعلميج اهلج عيب تصيحين عالزلم لو ماعدكم زلم

خزرته وتقدمت ابتسم باستصغار كال

- شنو حتضربيني

البنات واكفات يم القسم الداخلي صفنو علي من عله صوته خجلت والولد يضحكون

ورد كال
- ضربيني يللله

درت وجهي غير يولي غير يسكت
وحجايه للومه تدك براسي من يصير موقف وي ولد اسكتي وسوي روحج متشوفي وشيحجي ابد لتباوعين عليه ولا تردين لان الحجايه تجي عليج لان جاوبتي

وضل يرادد ويعلي حسه واني اتلفت بس ردت عمو يجي

ولمحت نزل من السياره مغضب نزع نظارته خلاها بجيبه وتوجه بغضب ليمي

نتر

- تفففضل رايد شي
الولد فش والتفت رافع تك حاجب
- ومنو حضرتك انت استاذ بالجامعه ويانا

وكفت وره عمو همست
- عمو صار فتره يحومي وهسه ديسوي هوسه حتى يخجلني

جر ايدي عمو ودفعني للسياره همس
- صعدي عمو الظاهر معوز تربيه صعدت ركض للسياره

وترزل الولد فشل كدام جماعته وفيكته انهزت كل الكدر يسوي يصيح وعمو مقصر لزمه من ياخته وطببه للجامعه للعماده

ابداً محسيت بخوف رغم اساور خافت كالت خاف باجر يتعرضلج
جنت مامنه حيل

شوي وطلع. عمو صعد بالسياره وطلع كان عصبي بغير عادته يمكن مرات تنعد عااالاصابع هو بيها يصير عصبي

باوعلي بالمرايه كال
- لتخافين ماكو شي

جاوبته وعيني بعينه
- مخايفه لان انت موجود

كلتها من كلبي وعقلي وكل خاطري كلتها بثقه وسلاسه بقه يباوعلي هز راسه وباوع لاساور

- انتي وين جنتي
- كتبي نسيتها بالقسم... شسويتله

حاجيت العميد وترزل الولد وتعذر كال مااتقرب بعد من تهدد انه ينفصل

ازل...
نوبات احس روحي انانيه وغداره غدرت بصديقتي بمشاعري وي ابوها

لذلك كان سري الكبير عمو رائد
عمو !!!!
اكبر كذبه كذبها گلبي على گلبي

بيومها طلعنا تغدينا للومه تعبت من رفضها لطلعاتي وياهم وكامت من ارجع واكوللها متعلق

تغدينا بواحد من المطاعم كان واضح عليه انه متضايق واني نفس الشي

اسو تسولف تغير جو تحاول تلطفه واحنا حتى مجامله منجامل

ضل عمو رافع حاجبه ومدلغم بغير عادته حتى مااكل هواي ولااني الكدرت اكل شي اختنكت

باوعلي كال وهو يورث جكارته
- اكلي عمو ماكلتي شي
- مااشتهي نصيت راسي اتصفح بفوني

اسو تقربت مني كانت تصرفاتها طفوليه غرغرتني وتتشاقه دفعتها خزرتها

- اسو احنا بالمطعم
حضنتني وتبوس بيه

اسو : حبابه لتضوجين خيولي بابا مورزله بابا كوللها

رائد : اساور كعدي عدل بابا مو صغيره انتي تره العالم تتفرج علينا.

اسو : يله كعدت

ازل...
بقيت ضايجه موبيدي صعدنا للسياره ورجعوني للبيت.. اليووم يمشي ثكككيل حيل ثكيل

جنت احسه محملني ذنب هالولد وصياحه وفشله الفشلها الي

اكثر شي ضوجني انه ضل گالب وجهه
مثل ابويه من جان ينغث ويدلغم واتخبل اضل اونسه حدما يضحك على تصرفاتي ذاك الوكت ارتاح

للومه انتبهت عليه جتي سألتني
للومه : صاير شي بالجامعه
ازل : لا ليش
- لعد شبيج ضايجه محتاجه شي
- لا ممحتاجه اريد انام
- كيفج

الهام....
- لاول مره اسو بس ساكته من دخلت حدما فاتت نامت وعسل تسولف

مدرسه العربي هيج كالت
مدرسه الحاسوب رزلت بنيه واني عين عليها وعين على ازل

وبالي يم رسل اللي تأخرت

الهام : ازل خابري رسل تاخرت

ازل : بعد مصايره الاربعه

الهام : ميخالف بس شوفيها وين صارت
ازل : اوك
خابرتها كانت بالطريق للبيت

دخلت رسل وجهه ميكصه السيف حتى متغدت ومحجت ولاسلمت كبل نامت

ازل...
- دخلت للغرفه وره رسل مخليه المخده على راسها وخرتها باوعتلي رافعه تك حاجب بغضب

سألتها

ازل : ها شفتي
برطمت وغطت وجهه بيدها وجرت الغطه وتغطت

ازل : احجيلي اني مواختج
رسل : روحي ازل اريد انطططمر تالي وكت تريد تصير حنينه

ازل : رسل احجيلي والله ترتاحين
رسل : شحححجي بابا شبيج
ازل : شفتي

رسل : اييي ومباوع بوجهي وابن عمه الجلللللب واكف ويااه ويييضحككك عللليه

كالتها وضربت على وجهه
رسل : لج اني شوون تقشمرررت شوون

ازل : ميخالف خيولون
رسل : لج يباوعلي بشماته ويضحك ابن عمه. وهوو ميباوعلي وكانما مشايفني

ازل : وليشوفج وانتي هم لتشوفي خيولي
رسل : وج البنات. تشمتو بيه اني اني رسل عمران يتشمتوون بيه. انييي بس بسيطه اذا مندمته مو بت ابويه

ازل : كافي رسل
رسل : موكااافي خلي يصبرولي.
ازل : رسل شبيج عوفي اهتمي بدراستج

رسل : هو منو عايف الدراسه بس خليته ببالي بعد عوفيني اريد انطمررر

ازل : براحتج
تركتها وطلعت

وهاي كانت اخر جلسه مصارحه بيني وبين اختي
من بعدها انشنت الحرب بيننا
فلوسي كامت تنشال من جنطتي

لبسها ترقى صديقاتها تغيروا وحتى كروبها شباب موشي من امر لجامعتها اشوفهم واكفين يلمعون من الفلوس وهي بنصهم جنت اخاف عليها كلش
ومن احجي للومه متعرف شسوي

بعد وفاه خالي مكدرنا نستوعب رسل وتصرفاتها بس كل هذا ومن اسأل عنها بالجامعه
سمعتها ليره محد يجيب سيرتها يكولون بس تدرس

طلعاتها وي غير جامعات وغير كروبات
للومه كامت تقفل باب غرفتها وعسل اكثر من مره تنشال من عدها فلوس ومني هم ومن اساور من تبات عدنا

جنت اخجل حيللل منها بس هي تغلس مرادت تخسرني

اسو : اجي ابات يمج ازل
ازل : تعاي هله بيج
اسو : اريد اخابر راكان من فونج حبابه بس اسمع صوته

ازل : وج خاف يعرفني
اسو : لالا منين يعرف رقمج
ازل :والله اساور اخاف
اسو : يله كيفج انتظريني
ازل : اوك

اجتي اسو يمنا باتت وضلت تتوسل لل٢ بس تسمع صوته وتسده وراها نسوي بلوك وافقت على مضض
دكتله وتاكل باضافرها وتعصر بايدي رد والنوم تارس صوته

راكلن : الو

وهي شمرت الجهاز عليه وتكمز سديته رأساً ولا كأنما صف ثاني كلية

ازل : اذا بعد كتيلي اخابر
اسو : لالا والله ماخابر يمه كلبي يمه لج احبه احببببه

ازل : حبتج حيييه توني اضربه بلوك ودك تلفوني
عزه بعينج اسو لج خابررر

اسو : عزه عزه عزه فصلي فصلي

تحجي وتكمز تكول حيطلعلها من التلفون ضربته بلوك رأساً

وجهه صار اصفر اساور بريئه حد بياض الثلج.
طفله ومدلله حيل نوبات اصفن عليها هاي ليش هيج والكه الجواب بداخلي

اليتم..
لو يسوي گلب جلمود من الماكو
لو يسوي وحده مثل اسو من كثر الدلال ولكون عمو وفرلها كلشي ظناً انه بهالشي يعوضها

اساور الجانت متعلقه بيه بشكل واني جنت احس روحي اختها الجبيره اكثر من كوني قرينتها ومن عمرها

الشي الوحيد اللي ممتشاركين بي هو .. راكان

كانت تعشقه لدرجه من يجي تنهزم وتختل بالغرفه خاف يقره حبه بعينها

ايام انكضت
وبيوم
جنت احجي للومه عن راكان وحب اساور اله وتفاجأت بوجود رسل ورايه كاعده تستمع بامعان

ازل : للومه هو لازم شركه عمو ابن ابن عمه يصير بس كلش ادمي اني مشكلتي خايفه عليها لان هو ديحس بيها هي ولو ماكو اثبات انه هاي هي الدتتصل بي وذاله روحها وهو لو تشوفي من يلتقي بيها فد رزن رغم عيونه اني منتبهه عليه وين متروح تروح وراها ويضيع اطراف الحديث من يحجي وهي تفوت بس ابد مبادر

الهام : وليش هي الدتبادر شناقصها غلط تصرفها لو شكد ميحبها اذا صارت اله حيعيرها باجر عكبه انج انتي الخابرتيني وبديتي

ازل : والله صح اني اريد اكوللها واخاف اجرحها تكدرين تحاجيها بس بطريقه غير مباشره تره تعرفين اسو رأساً تتأثر

الهام : اي بسيطه سدي الموضوع عسوله جتي
ازل : وانتبه لرسل صافنه

نظراتها مركزه حيل ويايه سكتت كطعت الحديث وللومه غيرت الموضوع متريد عسل تتأثر بهالسوالف

بيومها جتي اساور عدنا باتت وضلينا سهرانين وللومه نصحت بطريقه غير مباشره اسو بترك هالسالفه وجابتها على انه تجي حجايه لابوج وابوج ميستاهل حجايه تهينه

اساور ببرائه عقلها ادمعت عينها وكرهت نفسها من طبينا للغرفه بجت وتحلف متخابره بعد وتتوسل بيه ان امنعها منه ان شفتها رجعت حنت

للومه باسلوب حلو فهمتها. انه هو الرجل اذا راد هو ينزل نفسه. الج ويجيج يتوسل حبج ويطلبج من ابوج يكون هو صاحب المبادره مو انتي اول من يبادر

والحمد لله قنعت وفهمت رأساً متعبتني رغم موتتني دموعها وكلسا وكالت

اسو : تتوقعين عرفني اني
ازل : لاماعده اثبات اسو
اسو : اي ماعده فاذا صرت نصيبه ميعيرني واذا مصرت ومفتح موضوع ماذب روحي عليه على شنو شناقصني بس ابويه يسواه

ازل : عفيه اسو فدوه لوجهج

اسو : ازل عمتج كلش حبابه قهرتني من حجت عن خطيبها شفتي شون دمعت عينها بس الحلو بيها تكول المهم عايشه بكرامتي اختاريت الفراق عالذله.

ازل : اي صح اني دائما اصفن عليها هاي شون كدرت شون كدرت تعيش وراه لا والنوبه الله بلاها بينا

اسو : شمدريج يجوز الله عوضها بيكم
ازل : الله اعلم بس مو ذنبها تضل طول عمرها عازبه علمودنا ياهو اليتقدم يريدها وحدها ترفضه

اسو : خطيه هاي شون باجر عكبه اول وتالي تتزوجون وتعوفوها

ازل : الله كريم هسه منعرف باجر شيصير

اسو : يعني ازل اني ابويه مو صغير واعرف عده يعني علاقات بس مو بالحرام يمكن
بس ابد ممصارحني بيها نوبات اني احس عليه يحجي بالفون وهم من يجي بالبيت احسه رغم هوستي اني احسه وحيد

ازل : صح فعلا

اسو : شبيدي عليه. اووف استغفر الله نامي نعست
ازل : الحمد لله ربي حتنام اخيرا

اسو : هههه

ازل.... بليل كلش نومي الخفيف حسيت على رسل تاخذ فون ازل من الشاحن كلبت بي ورجعته وره شوي

تتوقعت حتاخذه او تضمه بس مسوتها الحمد لله والا جان كمت اخذته منها

فتره مرت اساور فعلا شالت راكان من عقلها بس متكدرر تسيطر على دكات گلبها من يجي لبيتهم تدخل لغرفتها ركض وتتصل بيه الهيها حد ميروح

كملنا ثالث سنه وعمو طلب منه نبدي نطبق عده بالشركه هالسنه عسل دخلت رابع علمي شطوره كانت بمعونه عمه ورسل تخرجت

كانت تلفونات الليل متخلص عدها ومن كعدت بالبيت رغم لزمت البيت والطبخ بس للومه كانت جدا متخوفه من بقيتها ممأمنه بيها

اما اني فغير
اعرف اختي
ونظرتي ثاقبه
اعرف بيها تخاف على سمعتها كلش وممثله بارعه. ونظرتها مستقبليه تحرث وتزرع وتحصد

كذب بكذب
واهمه التحجي وياهم بصفات مو صفاتها حتى تصيدهم
واكيد مو اي احد تحاجي
الا اصحاب النفوذ القويه اساسها ثاابت رغم سراب

عطلة الثالث قبل لنطبق عد عمو فاجأتنه للومه بخبر يخبل جننا نتغده كالت :

الهام....
حصلت علاوه وتقاعد ابوهم هم صار خوش مبلغ عسل اكثر من مره رادت مني نطلع واني اخذهم مطعم هي وازل ورسل

صديقاتي بالدوام شفتهم يتفقون على سفره لتركيا
واعدت عسل اذا طلعت معدل بالثالث اسفرها لتركيا حلمها هذا وفاجئتهم عالغده متوقعت هالردة الفعل منهم

للومه : بنات شتريدون هديه نجاحكم؟

رسل : اني فلوس كالعاده واذا عدج اكثر لان حسبي حساب تخرجت تره

الهام : وانتي ازوله

ازل : لتكلفين نفسج للومه التكدرين عليه

الهام : ها عسوله
عسل : للومتي الحلوه بيش واعدتني
الهام : هه صح مواعدتج. اذا طلعتي معدل
عسل : عمي ٩٣ مو معدل احجن بنات للومه بغيرتج. سويها لله وتصير صدك افيييش يعني هاي اليوتيوبات واصير بنصهن ايبااه

ازل : شتردين لج

عسل : تركيااا اخخخخ واشوف مهند اوف ربييي

الهام : صار بيها مهند لاروح ولااوصل.

عسل : جذب عمي جذب حريم السلطان.

الهام : باوعت للبنات ابتسم صفنوا بوجهي

ازل : صدك تحجين. للومه

الهام : نصيت راسي على صحني ابتسم
عسل : لا صدددك يافللق صدددك نرروح عدج فلوس
الهام : ههه هسه اني كلت اي

عسل : دتضحكين للومتي دتضحكين وانتي متضحكين عبث للومتي بغيرتج صدك

الهام : لج اني كم مره اكولج لتحجين حجي شباب هاي صديقتج العدها تسع اخوه عوفيها

عسل : يابه اعوف الدنيا بس اخذيني لتركيا
الهام : هاهي حضروا روحكم بس يطلع الجواز نروح

واشتغل التكمز مال عسل وازل بس رسل كاعده صافنه كتلهم وتورطت كلسا عسل جايه اخلي هاي بالجنطه

الهام : لج امي الجواز بعد مطالع
عسل : وين يروح يطلع يطلع بس صفي النيه اروح فدوه لعيونج الجنها زرف جفجير

الهام : استغفر الله ربي واتوب اليه حبطل تره
عسل : لا لا اني عيوني بربريه والله وج ازوله خيطيله البنطرون الكابوي بربج كصري

ازل...
يومين مرت وبلشنا معامله الجواز صدك سوتها للومه وصدك حنسافر محد سألها منيلج فلوس محد تجرأ يستفسر خاف تبطل

جننا متحمسين حتى اساور كالت تجي ويانا وعمو رائد والحجيه

كملت المعامله وحجزت للومه بكروب عمو رشحه كلها خوش كروب وخوش شركه.

رغم كان اغلى من البقيه بس للومه وافقت

وبليلة السفره واحنا مثبورين نحضر جنطنا طبت للغرفه كالت

الهام : بنات كل وحده اربع اوراق صرفياتها موتحرجوني تره ماعدي اكثر

سكتنا موافقين ومكتفين اصلا منريد نشتري شي بس نريد نطلع

من طلعت من الغرفه رسل كالت
ريل : هي شراح تلبس خاف تخزينا هناك بلبسها الاسطوري

ازل : شبي لبسها ستره وتنوره وبدي عادي رسمي
رسل : بابا. هناك راقين شنو تنوره وشنو ستره بنطرون وعلي شي طويل بس ويامن تحجين

ازل : معليج منها عوفيها براحتها
رسل : شسويلها عشتوو عجوز البيت.
ازل : تره. عيب عليج فوك متسفرنا

رسل : هي رادت تسافر ومتكدر تعوفنا كل عقلكم علمودنا

مردينا عليها كملنا. تحضير وضبضبنا الجنط. عسل طايره واني هم متشوقه اساور رغم ميت مره رايحه وي ابوها بس كلسا تخابرني. متشوقه لان سوه

حضرنا كلشي ونمنا حسيت فجريه دافوت للحمام كالعاده سمعت همسات رسل تحجي بالفون
استغربت من طريقه كلامها وبقيت اتصنت

رسل : وانت عليش مدوخ نفسك منو خلينا اصدقاء.
.......
شنو ضجت اذا تريد ماخابرك بعد بس والله تعلقت بيك
........
اني موصاحبه علاقات بس شفت صورتك بالفيس وانعحبت بيك كلش
.....
لتسالني منين جبت رقمك
.........
لا والله مو اخت واحد من جماعتك اصلا ماعدي اخوه حتى ابويه متوفي
......
لامشايفني
.........
انت ليش دايخ خلينا هيج
........
تعلقت بيه ؟
.........
اني هم والله
......
لا ماكدر اكولك اني منو
.......
لالا تجيني حجايه على اهلي
.........
موكتلك متخرجه متصدك. تره ماكو داعي اكذب
براحتك روح
.........
اي طبعا اختار انه انهي العلاقه ولاتعرفني وتجي حجايه لاهلي بأنه اني اركض وراك واخابرك اني مادري شون طلع من هالتصرف موطبعي بس
مجرد ردت اسمع صوتك
ردت اتعرف عليك شكلك كلش شخصيه ردت اشوف شكلك نفس طبعك فضول واعجاب
.......
تريد تشوفني يعني
......
ادزلك صورتي بالحجاب بس تمسحها راسا
.........
اوك ماشي
.......
ازل- صفنت واحد جديد شنو زين منين جابت رقمه بقيت ساكته شوي ورجعت حجت

رسل : الو
ها وصلت الصوره
.....
شنو رايك
......
ههه اتطمنت يعني متعرفني
......
شنو رايك بشكلي
......
اي فعلا هي موبالشكل بالطبع والاخلاق صح كلامك
.......
لا ابويه توفى بحادث سير
عمي متكفل بينا ماكدر انطيك تفاصيل اكثر
......
انت هم حاب بحياتك
......
زين ليش متتزوجها لعد
.......
ها اوك يعني مخليها ببالك
......
اي عالخير شتصير منك
......
همم
......
لا عادي كتلك اعجاب وتعلق مو حب
.....
بس المعجب بيها انت هاي اني اعرفها. وحده مدلله وبس تتدلل على ابوها. ولوكيه شون تتحمل
.....
ها تحب تدلل عليك شكو منها زين هي تحبك
......
وشون عرفت وتأكدت من حبها
......
انت شكلك وسيم اي وحده تنعحب بيك. منو كلك بالجامعه ماعدها علاقات
.......
اي اعرفها حق المعرفه عدها علاقات بالجامعه ومتاكدة من هالكلام
....
براحتك
.....
تحب انطيك قسمها وعنوانها واسمها الكامل
داكولك اعرفها
......
هممم يتيمه الام هي مو؟
......

ازل : من سمعت صعد الدم براسي وجمد جلطه صابتني راكان هذا راكان دتحجي رياه وتذكرت من اخذت فون اسو
.
.
.

يتبع
.
.
.

ملاحظة تم الإعلان عنها سابقاً
النشر يكون يومين بيوم استراحة

مريم السعدي