رواية امقت اعرافهم لكنها حيتني الفصل الأول 1 - بقلم نور الشمس

مثل كل يوم جمعه مجتمعين ع الريوگ الي يكون طعمه غير لأن والدي هوه الي يحضره بنفسه بس بذاك اليوم المطبخ تكون حالته يرثى لها عبالك مفجوره بي عبوه
عائلتنه صغيره اني واختي أفياء وابويه وامي
طبعا والدي موضف حكومي تابع الوزارة الكهرباء شغله بي خطوره لأن هوه الي يسوي صيانة المحولات الرئيسيه بس هوه دائما يگول اني اخذ حذري وربي هوه الحافظ
امي ربت بيت الي اعرفه هيه ووالدي متزوجين عن حب بس شلون التقوو منعرف لأن ميحبون نفتح هيچ موضوع وياهم
بعدنه شگد راجعت ماصار اطفال وچانت متخوفه من زواج بابا بس هوه كل مره يطمنها اني مرايد زواج ولا اطفال هالوردايتين يكفني
علاقة بابا وي اهله مقطوعه ابد ماكو تواصل بينهم ومااعرف شنو السبب
بذاك اليوم الي هوه يوم جمعه اندگت بابنه واحنه تونه بدينه نسمي ع الأكل صح الوقت متاخر تقريبا دعش ونص الضحى بس لأن يوم جمعه چنه متأخرين بالنومه على راحتنه
طلع بابا يشوف منو شويه واجه مخبوص
فتح الخطار وگل الأمي حضري الأكل اخوتي جايين يشوفوني
امي تفاجأت واحنه مو اقل منها بانت على وجوهنه الصدمه اخوانه شنوو وشجابهم بعد كل هذا العمر
انخبصنه وبدينه نساعد امي وكل وحده منه تفسر على كيفها
شويه واجه ابوي گال حضروو نفسكم باچر نروح الأهلي ابوي حالته خطره ويريد يشوفني
امي گلتله واحنه شكوو انت روح شوفهم وعمي شعجب رادك مو مقاطعك هوه
جاوبها حضرو نفسكم بدون نقاش الوالد حالته خطره ويريد يشوفني ويشوف البنات واخاف ارفض وياكلني الندم تالي تعرفين كلش زين اني صار سنين اريده يرضا عني
سكتت امي بس حسيتها متوتره
ردت اسألها ليش متقاطعين وكل هالفتره احنه عدنه جد ومشايفي ولاهوه شايفنه ليش من نسأل يگولون حالنه حال هواي ناس ماعدهم احد مقطوعين من شجره واهلنه الله يرحمهم هذا چان جواب الوالد
اما امي چانت تتواصل بس وي خاله وحده من خالاتي واعرف علاقتها مو شي وي البقيه وخوال اصلا ماعندي
هذا الي اعرفه
واني افكر قطع افكاري صوت افياء
..ماما عمامي منوو بيت جدوو شنو تعرفين شكم سنه عمري امي مرحله ثانيه كليه اني يعني ١٩سنه وهمه وين عنكم وانتو ليش متحچون فهمينه شنو القضيه
جاوبتها امي وهيه متوتره
..بلا اسئله هسه اني وين وانتوو وين اني اعرف شذكرهم بأبوكم ومن وين اندلونه صدگ جذب شجابهم علينه
..ماما انتو ليش مقطوعين عنهم

حسيتها ترددت وجاوبتني
..مچانو رايدين زواجنه وابوج رادني واصر يتزوج ومن ذاك اليوم جدج غضب عليه وطرده لان رايدله بنت عمه
..يعني كل هذا جي ابويه رفض يتزوج بت عمه
..اي ماما لأن مقبل يتزوج على مرامهم
..عوذه شگد اكرهتهم هيچ عالم شلون بابا يقبل نروحلهم شلون يخلينه نشوفهم
..اني اعرف شذكرهم بينه صار سنين مرتاحين

احس گلبي انقبض شلون عالم هذي شلون نروحلهم الي اعرفه همه محافضات اهل والدي بالناصريه واحنه ساكنين بغداد عمري وحياتي مشايفه الناصريه ولا اعرف شنو طبيعتهم وشلون عايشين
بس من كلام امي عنهم اخذت فكره انو همه تفكيرهم محدود وقبلي
يعني اكو بشر تقاطع ولد الهم سنين لأن متزوج باختياره ياربي ان شاءالله منطول عدهم وهذي الفتره نحسبها خطار او تجربه اتحده بيها نفسي

اني اسمي علياء السنه انقبلت كليه تربيه مرحله أولى واختي افياء تدرس كلية هندسه مرحله ثانيه
حياتنه حلوه مستقره بس هواي شغلات تنقصنه ينقصنه اخوه چنت اتمنى يصير عندي اخ
وينقصني الجوو الحلوو واللمه الي تكون بين الأقارب صديقاتي يحچولي عن اجوائهم واني احن وافتقد الأحساس الي همه حاسي

فچنت كلش احب الأختلاط والمجامله وحيل حبيت جوو الكليه والگروبات بس محترمه نفسي صح اضحك واتشاقه بس بحدود
يعني اني طبيعتي اجامل وخاصتا افتقر الهذي الأجواء بس اعرف شلون احمي نفسي واعرف نظرة الأشخاص يعني عندي حدس تقريبا الي اشوفه عنده شي رأسا اصده وماانطي مجال

باليوم الي اجو بي عمامي امي متوتره كلش ومتتحاجه حضرنه اغراضنه گالت اخذوو شي قليل لأن مراح انطول
صار عندي فضول اشوف عمامي طبعا لو ماالكلام الي گالته امي وحسيتهم ناس متخلفين چان اخذتهم بالأحضان لأن حلوو بعد سنين يطلعولي اهل واني ضاله بحسرتهم رجعت حچيت وي نفسي اني ليش متحمسه هوه اكو بشر يقاطع اخو كل هالسني

حاچيت افياء
..فيفي لچ اني اموت بدونچ بربچ هم يجي يوم واتركيني سنين طويله لچ شنو من بشر اهل بابا شلون يقاطعونه كل هذي الفتره

..لا حبيبتي اني اگدر من دونچ والله اني هم محتاره مااعرف شنو الي يخليهم هيچ يسوون

..مو ناما گلتلج لأن متزوجها بدون رضاهم

..مو معقوله احس اكو غير شي يعني اذا صح مموافقين يزعلون سنه سنتيين مو اكثر

..والله مااعرف قايل ماما تكذب

..لا حاشاها بس مااعرف احسه مو سبب عوفينه منهم بس قلبي ممرتاح الروحتنه

..يمعوده كلها يومين ونرجع نخلصهم شلون مكان اكيد مناطقهم ريفيه شلون راح نتحمل هاليومين

..والله مااعرف بس ممبين عليهم من الريف شفتي عمامي مبينين ولد مدينه

..عزه وين شفتيهم الفضول دمرني واتي مشايفتهم

..من الشباك شفتهم چانو طالعين يغسلون

..بربچ شگد اعمارهم

.. تقريبا مواليد ستينات هيچ شي

..أوووف غير تكليلي اشوفهم وياچ

..شمعرفني اني صدفه صارت چنت اغسل مواعين ع السنك وشفتهم من الشباك

وره شويه ابويه گال سلموو على عمامكم
رحنه وحده تدفع الثانيه حته تكون هيه بالمقدمه
اني طبيعتي شويه أجرأ من افياء
رحت اني سلمت وچنت مركزه حته اشوف ملامحهم بيهم شبه البابا لو لا

..ألسلام عليكم

..وعليكم السلام ياهلا بحبايبي تعالن بويه تعالن اني عمچن ابو احمد وهذا عمچن خالد ابو وليد
رحنه بوسناهم وگعدنه بس كلش مستحيات
كل شويه اتصي راسي وارجع اباوع عليهم
عمو ابو احمد اسمر على حمار طويل وشكله شخصيه لابس بنطرون وقميص يعني صدگ عايشين بالمدينه الي اعرفه اهل الريف ميلبسون هيچ
وعمو خالد ابو أبيض عنده لحيه خفيفه ولابس قاط رسمي تقريبا مواليده تجي نهاية الستينات بي شبه هواي من والدي بس والدي بياضه على حمار مااعرف همه بشرتهم الشمس مغيرتها لو همه يختلفون عن ابويه
عمو ابو احمد گال باچر ناخذكم تتعرفون على اهلكم جدكم رايد يشوفكم واحنه من زمان متلهفين الشوفتكم حسيته يريد يحچي بس والدي قاطعه متعمد حب يغير الموضوع مااعرف احس اكو شي ناقص بكلامه

سأله والدي عن امه وشلون صحتها اول مره ابويه يجيب سيرة امه
عمو گله زينه الحمدلله وبعد محچه شي توقعت يكله تريد تشوفك مشتاقتلك هيچ شي يعني بس مگال شي
شنو هالأهل ياربي الحمدلله اهلنه ناس يخافون الله بينه

التهينه بيومها بين افكارنه الي تودي وتجيب وبين تحضيرات الغده والعشه والضيافه اشوف بابا فرحان بجمعتهم زين ليش محاول وياهم قبل
واشوف امي عكس بابا متوتره وضايجه كلش احسها مو طبيعيه ابد
ثاني يوم رحنه بسيارة عموو ابو احمد وعمو خالد رجع بسيارته وحده لأن ابويه حب يبقه ويانه
بس كل شويه نشوف سيارته قريبه النه يعني يمشي نفس المستوى
الطريق طةيل وكل شويه نسأل بابا شگد بعد ونوصل يگلي ماضل شي
ونبقه نمشي فتره طويله الي عرفناه همه مو بمركز ذي قار همه باحد الأقضيه والنواحي
اني مااعرف طبيعة الاقضيه مالتهم بس رأسا فكرت همه بقرى وارياف اويلي شراح يفضها
شوكت ارجع المدينتي حته صديقتي علا مابلغتها بالي صار ولاتعرف بيه مسافره علا رفيقة دربي من الأبتدائيه للمتوسطه واعداديه واخر شي دخلنه جامعه سوه عبالك اني  وياها توأم والله لو تدري اني وين جايه وعمامي الي طلعولي تالي وكت
وصلنه بعد محسيت نفسي تكسرت من الطريق
والدي متحمس كلش
واحنه احساسنه مخربط داخلين المكان مجهول والناس مجهولين منعرف شنو وشلون نتصرف
ركزت ع المنطقه زينه بيوتهم حلوه وبنيان جديد مو مثل ممتوقعه همه ساكنين بمدينة مو بريف
بيت جدوو جبير تقريبا ستمية متر مبيين ينيان جديد واجهة البيت حجر ومصمميها تصميم حلوو
الباب سلايت بس هواي شباب واگفين يم الباب لاكوو بابا وعمامي بوسوهم والبيت بي خمس نسوان كلهم بالطرمه بيهم بعمر امي وبيهم اثنين شابات اكبر منه وحده اصغر
جنه متحيرين سلمنه واحنه منعرف نتصرف بس هنه مستغربات لبسنه چنه لابسين مانتوات والدي طلب منه منلبس بناطير ولا تنورات وقمصان احنه هيچ نلبس اكثر شي بس هوه يمكن يعرف طبيعة اهله
يعني احنه هيچ لبسنه وبيينه نشاز
امي لابسه جبه هم بس احس مستغربينه عبالك داخليهم لابسين خلع جانن ملهوفات يشوفنه بس اتعاملن وي امي ابرود وامي عبالك اتعالت عليهم او محابتهم مااعرف بس احنه لا حسيناهم فرحانين بشوفتنه دخلتنه مريه چبيره بس حلوه بيضه وملامحها كلش حلووه وهادئه گالت تعالو عمه فوتو حبوبتجن تشوفجن
رحنه وراها شفنه مريه مو كلش چبيره بالعمر وجهه بي دگات زرگ على حواجبها شلون التاتو هسه بس لونه ازرگ وبحنچها نقشه هم بس چانت مقعده يعني على كرسي گاعده تفاجأت لأن الي بعمرها بعدهم نشطين ممبين چبيره كلش
دمعت عيونها من شافتنه حضنتني اني وافياء وضلت تمسح بدموعها
وضلت تنعه بصوت حزين

ساعة السوده البيها تنسيت
وتحت الضلع يالولد رفيت
هنا يياسر هنا ييمه
عرفتها تقصد بابا

گالتلها المريه الي فوتتنه يمه وكت نعاويج هسه
مو اجوو بالسلامه وراح تشوفي شتردين بعد عوفي الراح يولي انتو محتاجي وهوه محتاجكم مو كافي بناته كبرن وهنه بغربه

اني عين عليهم وعين على امي احسها شويه وتنفجر
واني وافياء اطرش بالزفه
شويه وسمعنه اصواتهم دخلوو شباب اكو وعمامي
هم وياهم
من دخل ابويه ضل يشهگ من شاف بيبي
بچه بصوت عالي وعمري وحياتي مشايفه بابا بهالشكل وهيه هم ضلت تبجي وبچيتها متقطعه من گد ماشهگت وردت الكلمات الگالتهن اول مادخلنه وزادت عليهن بصوت حنين كلش اول مره يأثر بيه لكيت نفسي ابجي اني وافياء وكل الموجودين حته امي
والولد هم
ضلت تردد
ربيتكم بدموع العيون
وماحسبت بيوم ترحون

وضلت تعاتب وهيه تشهگ
ليش هيچ ولك يمه شلون هنت عليك كل هاي السنين
ولك ماحنيت الأمك هذا الغذاك ماصخ اشرت على صدرها وابويه گعد مقابيلها وهيه ع الكرسي ودنگ يبوس رجليها

ياربي شنو اني وين وشنو الي جاي يصير

شويه وسمعنه صوت هورن قوي
عمي ابو خالد صاح الواحد من الشباب
أمجد بسرعه اطلع عفنه سياراتنه بالگراج طلعهن اكيد الشيخ وصل ويريد يدخل وماكو مجال
اجه أبالي اكيد هذا عمي الچبير يعني هوه الشيخ مطلع جدو من المستشفى
امجد اخذ سويچ السياره وشمر الثاني على ثاني وگله وليد تعال وراي طلع سيارة عمي هسه علي صاير نار اكيد

ماهمني الموضوع شنو علي شنو شيخ
بيبي من عرفت جدوو وصل سكتت وهمه هم كلولها الوالد تعبان اكيد لتزيدوها عليه

يتبع ..