رواية امقت اعرافهم لكنها حيتني الفصل الحادي والعشرون 21 - بقلم نور الشمس

ثاني يوم الصبح گعدت فرحانه شعوري غير احس بنفسي انتمي الهذا المكان اكثر من قبل اكو شي بداخلي مااعرف شلون اوصفه

طلعت بس خجلانه مو مثل كل مره احس نفسي مراقبه من الكل
سمعت صوت
..بسس بسس ياحلوه صباحچ خير تعالي هنا
چان واگف اباب غرفته خلاه مفتوح ع النص ودخل للغرفه ينتظرني

.. ترددت اروح بس اكو شي خلاني اروحله بليه شعور ابتسمت صباح النور ..هاي انت اليوم شعجب مو طالع

..اليوم حبيت اضل  بالبيت ردت اصبح بهذا الوجه الحلوو تعالي اريدچ بشغله أشرلي اگعد على طرف الچربايه بصفه
بقيت متردده اشرلي اگعد
احس گلبي يدگ بقوه
گتله شنوو

..اكو شغلات نتفق عليهن انه وانتي حته نعيش براحه وكل شخص منه يعرف الأله والعلي

بلعت ريگي خايفه من طريقة كلامه رغم هوه كان يتكلم بهدوء واعصابه مرتخيه عكسي اني الي احس نفسي متشنجه وگوه گاعده يمه واسمع كلامه احس اكو شي وره هذا الهدوء
گتله اسمعك اني

..ماضي اهلي واهلچ ننساه لاتذكريني بأمي ولا انه اجيب سيرة اهلچ

..شلون يعني اكوو شغلات مو عارفتها مو لازم اعرفها

..لا مو لازم ابد انه وياج ننسه الماضي وعلينه بالحاضر

..مو وعدتني ادورلي عن امي

..انه عد وعدي بس اسمع خبر عنها راح اگلچ واحاول تشوفيها ماراح امنعج انه بس لااطلبين مني محبه وتعامل خاص وياها ع ابو نسيبه انه اذا سمحت تشوفينها الخاطرج اكيد گلبي مو من حجر حته امنع بنيه من شوفت امها

..اذا هيچ اني موافقه ضحكتله

..وانه بهالضحكه اضيع ..شغله ثانيه اي واحد يغثچ بحچايه او يحاول ينتقص منج انطيني علم بدون مشاكل انه احل كلشي

..أنت تدري جاي تخوفني

..ابتسمت انتي اتخافين انتي تخوفين هههه

..اصلا ماكو اجبن مني

..موحلوه منچ اريد مرت الشيخ مره حوك ماريدها جبانه وتتختل الي تخافين منه طگي بالوجه وهيه تنحل كل ماشردتي من خوفج كل ما زاد خليج قويه بس مو وكحه لا قويه

..شنو الفرق

..هواي فرق بين القوه والوكاحه القوه تكون من دافع الثقه بالنفس والوكاحه تكون من دافع الخوف والضعف تشوفي يتهجم بدون تخطيط هذا معناها خوفه دفعه بس القوي خطواته ثابته وواثق من كلشي يگوله ويخطي

..مو احسك مدخلني دورة تأهيل

..شلون مايعجبج فسريها المهم توصلچ الفكره هسه اني اشوف الحجيه اريد اتريگ من هالأدين الحلوات حته احس مريتي بالبيت هيه التهتم بيه

..ضحكت غالي والطلب رخيص
..حبيبه خليچ هيچ وياي دوم فهميني حته ارتاح واريحچ وننسه كل الفاتنه

وصدگ بديت افهم شيريد او احاول افهم
اعصابي چانت دائما مرتاحه حسيت العيشه هنا احلى جو العائله العزايم والطلعات كلشي حلوو
مرت فتره على خطوبتنه وكلشي تمام چان يعبرلي عن حبه بكل فرصه واكثر المرات يحب يحرجني احسه يرتاح من يشوفني مرتبكه وياه ومبيين عليه حبه وضعه بالبيت نفسه يدخل على بيبيتي يحچي وياها وتتونس على سوالفه بنات عمتي يعتبرهم خواته ويهتم بيهم كلش وحته افياء يهتم بيها ودائما يوصي رافع عليها
رافع منتظر تدور السنه ويتزوج واعتقد يتزوجون كلهم سوه مجرد ماافكر بالزواج احس گلبي ينخمش مگايله قصة زواجنه وخايفه من طرح الموضوع دائما نحچي وفترة خطوبتنه حلوه بس مااگدر احچيله هيج موضوع وهذا الشي قالقني
استمريت بالدوام واكثر الأوقات هوه مشغول من يكون متواجد هوه يوصلني ومرات اذا قريب علينه اني وزينب يتصل بيه يگول انتظروني
بيوم زينب مريضه ممداومه ورحت وحدي
من نريد نطلع من الدوام واني انتظر الخط
اجه زميل الي يسأل عن صديقتي همه بينهم شي ويمكن متزاعلين راد مساعدتي وياه واني هم گتله صار
واني واگفه مبايلي رن شفت رقمه ارتبكت بدون وعي اني ممسويه شي ليش خفت يمكن لأن اعرف بي ميقبل
جاوبته
..الوو
.. هلا
..هلا بيك
..ليش واگفه تعالي متانيج انه
..احس گلبي انخمش من دريت بي موجود اكيد شافني وهذا الهدوء اليسبق العاصفه گتله جايه
..رحت من خوفي اتمشه سريع ابتسمتله وسلمت
ردلي السلام مو مثل كل مره
حركت السياره واحنه ساكتين انتبهت اله يحرك اصابعه ع الأستيرن بتوتر
..ريت نفس ردت اهدأ مااريد يبيين عليه گلي
..أي
..شنوو
..هذا منهوو الواگف وياچ
..ولد منو يعني
..انه گتلچ بزون ادري بي ولد بس شنهي وگفته
..يسأل على زميلتي وهوه خطيبها بس زعلانه وراد مني اساعده
..وانتي مصلح اجتماعي صايره
..انت ليش ضايج
..هاا..ولچ ربع ساعه عيني عليج وهوه على وگفته وياج ولو مامخابرج مايتحرك ولا انتي تترخصين
ولو نازل اله بوكتها موحلوه ماحبيت افشلج اعرف نيتج شنهي بس مو الكل مثلج الناس تدور الحجج انتبهي الروحچ انوب اعتبري هذا تحذير
..من سمعت حچيه ارتاحيت المهم عنده ثقه بيه گتله صار اذا هذا الشي يضوجك بعد ماتنعاد بس اني هم انحرج شنو اكلهم يعني
..گليلهم ماخذه واحد همجي وخلي اللوم بيه
..ضحكت انت ولاتنسه
..وهاي تنسي ..لا احچي صدگ اذا وياكم بنات بنفس الوگفه عادي انه هم چنت طالب كليه واعرف هيج وگفه موحلوه وبمكان معزول
..ماتنعاد والله
..هذا هوو ماصار شي
من رجعنه حچيت للبنات وضحكن گالن علي لو غير وحده منه يگلب الدنيا گتلهن بحسره يجوز يدري بيه موصاحيه ويخاف انصرع عليه يحاول يداريني
گالت زينب شيلي هالفكره من بالچ صار شگد مجايتج هذي الحاله وع العلاج كلش زينه لتفكرين بي بعد
مرت الأيام والأمتحانات بدت ودورة سنة جدوو بالعطله تصير بهذي الفتره علي مشغول بين شغله والطلايب على گولته وبين البيت بس ميأثر علي يبقه مهتم بكلشي
بالأمتحانات گلي افرغ نفسي اني اخذج لأن زينب امتحاناتها صارت مو نفس اليوم اني وياها بيوم الأوف عندي هيه عدها امتحان
صدگ چانت احلى أيام الطريق كله يتغول ومرات الگي نفسي متجاوبه وياه ومتغزله بدون شعور ليش وياه انسه كلشي مااعرف
خلصن الأمتحانات واجن عماتي من البصره يمه احس گلبي قبط شلون شيحملها الي
شغلت نفسي بالتحضيرات اني والبنات وحاولت مااتصادم وياهن بالليل الكل اجتمعوو وعلي صاحني اگعد بصفه يمكن چان متعمد
عمتي گالتله شوكت بسلامه تزوجون
گلها ماباقي شي عمه
هيه ردتله اي عمه كافي حته گعدتها بينكم مو حلوه ولو هيه مطلگه بس لو چانت مامتزوجه گبل جا العالم حچت وگالت ماضلت بنيه

عيني صارت علي حسيت عيونه طلعن
..شلچ بهذا الحچي عمه ياناس الي تگول خافي الله انتي تغثيني لو تغثينها بحچيج هذا شوكت يصفه گلبچ مو راح تخسريني وانتي تعرفين غلاتچ

..مو انه الأكول گتلك الناس

..يطبها طوب الناس محد يهمني والشهر الجاي العرس نتزوج تلاثتنه انه ورافع وعباس هذا الموضوع مااريده ينفتح
گام وصاح علياء تعالي

رحت وراه
گلي لتضوجين والله اگدر اسوي اكثر من هيچ واگدر اگلها لاطبين بس عمتي دارتني حته وهيه متزوجه مانستني طفولتي كلها وهيه تشتري وتودي ادري التسوي يضوجج بس من حبها الي وحقد الماضي ضال بگلبها واني مكانتي هم ماتسمحلي اتصرف بعواطفي لازم اكون حكيم والحكمه تگول مادام هذا البيت بيه امها موجوده بي وابوها مات وهوه بيته معتبره  وجايه علمود مناسبه تخصها هم مااگدر اتصرف بغير تصرف قدري هالشي بس انه هم مااسكت وشوي هم احاچيها ولاتضوجين من حچيها متزوجه مطلگه انتي بعيوني ملاك واحلى عروس
زين حبيبه
گتله عادي تعودت عليها ليضل بالك لعيونك كلشي اتحمل
قرب عليه جر راسي عليه وباسني
رجعت يمهن شفت عماتي الباقيات يحچن عليها
سويت نفسي مسمعت شي
وگعدت يم البنات شويه وگمنه نحضر اغراضنه لأن الفجر نطلع للنجف نزور
ثاني يوم طلعنه اني وعمتي ام ريم بسيارة علي وافياء وي رافع وياها ريم وخالد وباقي المجموعه توزعت
طول الطريق مرت عليه ذكريات جيتي وزواجي الأول زيارتي الأولى للنجف
كلشي حلوو ومو حلوو انعاد عليه
فززني من صفنتي صوته
..حبيبتي خو ماتعبتي قربنه نوصل
..لا بس دخت شويه
..ننزل ترتاحين انتي علاجج ماخذته ؟
..تذكرت اني ناسيه من هوسة البارحه مشاربه العلاج واني اصلا صار العلاج هوس بالنسبه الي اذا مشربته حته لو ماحاسه بشي اتخربط گتله لا ناسيته
باوعلي بنظرة ملامه وقلق وفر السياره ورجع
عمتي گالتله وين يمه مو وصلنه
گلها علاج علا ناسيته واخاف من نوصل هناك تتعب وتتخربط تردين اخابر رافع لو عماتي ترحين وياهم وانه الحگكم
گالت لا يمه انه وياكم براحتك وين تروح روح ورجعت حاچتني ليش عمه ناسيه علاجج شلون هيچ
گتلها التهيت البارحه بالهوسه
..لاتخافين عمه ماكو شي هسه يشتري ابو حسين
واشربي
هوه طبگ السياره واشتره لفه الي والعمتي گلي اكلي هسه بين مااشوفلي صيدليه اخذ منها
اكلت شلون ماكان چنت دايخه بس حسيت روحي طفله بوقتها وابويه محتار بيه كأنما حمل ولازم اجازي بطاعتي حته لو گوه عليه
جابلي العلاج وبطل مي اخذته
گلي بعد لتعيديها هاي اهم شي علاجج يعني لو انه بيدي انطيج لو تعوفينه البارحه هواي عدنه ناس ماگدرت اخذ راحتي واجي الغرفتج بس والله عللجج على بالي وكل شويه ارد اتصل عليج اذكرج واكول لازم اخذته
گتله ماادري شلون نسيته والله
طلعنه من المدينه ورجعنه على طريقنه زرنه الأمام وبعدها نرجع للمقبره
وصلنه وچانت وجوه عماتي ثگيله اخرناهم والي يگول مو طفله هوه ومحتاره بيج بس شنو الكلام بس يسمعونه الي وعمتي ام ريم گالت كافيلايسمعجن علي تردن تخسرنه انتن صبره هم اله حدود تره
كملنه هذا اليوم بتعب والأجواء مشحونه رجعنه للبيت انيمن التعب نمت ماگعدت الا ثاني يوم
دورت على علي چان طالع شويه واتصل بيه
..الووو
..هلا حبيبه شلونج
..الحمدلله هسه زينه وين انت
..اجيت الصبح شفتج تعبانه مبينه ماهان عليه اكعدج بس حبيت اودعج عندي شغله انه هسه بالبصره شغلة كم يوم وارجع
..احس گلبي انعصر وضجت بيين على نبرة صوتي گتله شگد يعني
..حبيبه احاول ماأتأخر اهم شي علاججلاتهملينه بس اكمل شغلتي انه يمكم اكدر على فراگج انه
..والله ضجت من هسه
..مجبور وعيونج
..اعرف اعرف على راحتك حبيبي بس تعرف جي متعوده عليك اني
..اي وانه هم بس شسوي مكانتي تطلب مني كل هذي الفتره الراحت انه احاول مابات بره البيت هسه اهم شي وعديني علاجج ماتنسي وجهازج على طول يمج حته اخابرج بكل وكت من افرغ زين عمري
..ان شاءالله حبيبي ليضل بالك والله ماانسه العلاج الخاطرك مو الخاطر نفسي واني هم عيني راح تبقه ع الجهاز انتظر منك اتصال
غلقت الخط واحس بفراغ گمت الم بالبيت وي عمتي وعمتي گالت من الأسبوع الجاي نبدي نجهز للعرس عدنه جهاز تلث عرايس وكلهن انه المسؤوله عنهن چانت فرحانه كلش گتلها عمه نتعبج ويانه
..لاعمه تعبكم راجه فدوه العينكم ولد الغالي وماخذين الغوالي من ولد اخوتي وعاد اغلاهم احسه وليدي الكاطلع من بطني علاوي ورافع هذا حبيب عمته من زغره وعبوسي المدلل ولد اخواني كلهم مافاركتهم يحبوني واحبهم بس علي لا غير عن الكل
گتلها عمه انتي گلبج طييب وتحبينهم كلهم اكيد همه يحبونج يعني اني هسه انتي عندي اغلى وحده وبعدج يجن البنات
ماحسستني بغربه رغم چنت منطويه على نفسي بس ابالي سؤال
..شني عمه كولي
..ابوي شعجب بقيتي انتي تحبي
..وليش اكرهه عمه الصار صار من سنين كلنه زعلنه منه فتره لأن صدمنه بالسواه وچانت گلوبنه بعدهي محترگه والدنيا زاهيه الخوالج مو مثل هسه مكسورين وشويه نار گلوبنه بردت لا چانو كلش طاغين وظلموو هواي عالم وهوه دك الا ياخذ منهم بعد الصار كله شلون وشوكت صارت بينهم علاقه مانعرف
بس بعد مامرت السنين واجه هوه وانتن كبرتن الكره شيفيد يبقه اخوي المدلل بس ابوي سوده عليه تأذه بفراگه وذب اللوم بخوالج گال خذوو مني ولد اثنين
يوو عمه اشكال ضروف مرت علينه وضوجه وقهر بس الدنيا ماتبقه على حالها
عوفينه من هذا وشوفي روحج شني تحتاجين حته نبدي نجهز
صدگ اني والبنات بقينه نسجل شنو نحتاج حته نشتري بس افياء ورافع اكثر شغلاتها جهزوها سوه هوه ياخذها چان اني وزينب بقينه وي عمتي مرت تلث ايام واجه علي
تلگيته بلهفه وهوه عيونه تحچي وابتسامته الي تخليني احس روحي بعالم ثاني
..شلونچ علة گلبي
.ضحكت هاي انه
..اي انتي واحلى عله ولج ولا ارتاحيت بهذي السفره چني اول مره اطلع بره البيت شكم يوم
..اني هم اشتاقيتلك والبيت بدونك مينطاق
..حبيبتي عمتي گالت بديتي تجهزين
..اي البارحه بديت اسجل الأغراض ونشتري على كيفنه
..العندچ يكفن لو تحتاجين بعد
..لا كافيات
..انه هم وصيت عمتي بس تحتاجون تگلي
..ان شاءالله كافيات
..لاتقصرين بالشرايه اشتري وجهزي احلى شي اريدج مرتاحه وفرحانه بكلشي تختاري
..ان شاءالله
مرت الأيام وصدگ بدينه نخلص تجهيز وچان يريد يشوف وعمتي تگلي لتشوفينه شي خلي يشوف كلشي عليج بالعرس صدگ چنت مااخلي يشوف ومابقه للعرس اسبوع  بس وانتهينه تجهيز بقت بس عمتي خطيه تحضر الكلشي واحنه نساعدها بشي قليل بس ريم وباقي البنات ماقصرن وياها
زاد التوتر كل مايقل يوم من اللأسبوع خوفي يزيد اخذني للطبيب قبل يومين وگله تبقه ع العلاج ميأثر عليها الزواج بشي
چنت اريد افهمه طريقة زواجي الأول بس احس الساني ينربط ومااگدر احچي شي
بيوم الحنه گعدنه الصبح واحنه حاجزين تلاثتنه بصالون واحد ولازم نروح من وكت والصالون كله الحجز النه چنه ماخذين راحتنه البنات فرحانات واني هم بس الي بگلبي ومحد يعرف بي وترني وتعبني
بدت بيه لأن حنتنه اول شي وبعدها يرحون البيت عمامي هنه هناك اثنينهن زينب وافياء
خلصت من وكت واجت عمتي وعلي اخذوني
چنت لابسه بدله ماروني قصة التفاحه صدرها حجر ناعم ومنشفه من جوه والمكياج هم كلش حلوو وبارز لون عيوني
طلعت لابسه برنص ومخلين عليه قماش ابيض مغطيني وحته مغطي البرنص عمتي گالت هذا بيرغ العباس عليه السلام همه هيج عادتهم يمكن نول هوه وفتحلي الباب وگعدت يمه عمتي ماقبل تگعد هيه بالصدر گعدت وره
تلگتنه الهلاهل اني دخلت وحدي وبدت الحفله وره فتره يلله دخل وحنه ايدي بعد ماباسني براسي وخدي همسلي بصوت ناصي
..يايابه شيصبرني انه والماروني يكتل
..نصيت راسي مبتسمه
..خلي اشوفچ عينچ بعيني
..رفعت راسي وباوعتله
..فرحانه علا
..بدون شعور گتله هواي فرحانه
..مو گد فرحتي والله
..ربي يديمها
..ان شاءالله .يارب
بقه شويه يتغزل ويضحك ويسولف حته وي عماتي حسيته مرتاح طلع ووصه عمتي تكون قريبه عليه گلها مااريد احد يضوجها ماطولت هواي الحفله لأن البنات اخذوهن البيت عمامي وكلها راحت انه رحت ارتاح وابدل والعاده عدهم مايصير اطلع لازم هذي الأيم ابقه بالبيت گلت العمتي روحي اني ماعليه شي
گالت بالليل حنة الولد هنا كلهم حنتهم سوه
اجي من وكت انه والبنات
المغرب اجن من وكت وعلي هم دخل غسل وبدل اتحضر للحفله
حفلتهم هوسات وجمعة شباب وهم صياني حنه وجماعتهم يحنوهم
خلصت الحفله مالتهم
واندگ باب غرفتي گلت فوت
شفته علي مبتسملي تعبان وردت انام ماگدرت گبل مااشوفچ ارتاح
..ابتسمتله وانه هم تعبانه بس ماجايني نوم
..لييش لاتخافين ولاتقلقين انه اهم شي عندي راحتج لاتتصورين احملج اكثر من طاقتج هاي الأيام حلوه لاتخلصيها متوتره
..ردت احچيله الصراحه مگدرت گتله ان شاءالله باسني براسي وطلع
بيومها عيوني ماخذت نوم وگعدت الصبح وجهي تعبان من السهر
بس كلشي بالمكياج يتغطه علاجي اخذته وياي للصالون وكل شةيه يأكد عليه اشربه والمشكله من اخذه ادوخ واني بأيامي العاديه شلون هسه
نفس الشي بدت بيه بس هالمره الزفه تطلع سوه
وراي افياء چانت كلش حلوه وكل شويه تصور وتدز صورها الرافع اخر شي خابرها گلها راح اجيج هسه اخذج مااتاني احد ضحكنه كلنه عليها
وزينب وعباس هادئين بس لهفتهم مبينه
كل وحده منه تفكر بيومها وشلون يخلص الكل جان متصور اني شغلتي سهله لأن متزوجه قبل وهذا العرس شكلي
واصلا الكل حاجوو البنات وفهمنهم الي يصير واني محد گلي يمكن مارادوو يحرجوني بقيت متوتره كلش
احد ماكملن وسمعنه اصوات السيارات
احس گلبي طلع من مكانه فرحه برهبه بقلق كلشي انجمع بوقتها

يتبع

حبايبي اشكركم على دعواتكم كل التعليقات اقراها وافرح بيها بس وقتي ميسمحلي ارد عذروني
لأن اقراهم بفترات متباعده البارت بدون مراجعه
اذا اكو اخطاء هم عذروني هذا الگدرت اكتبه الكم حبايبي