رواية امقت اعرافهم لكنها حيتني الفصل الخامس عشر 15 - بقلم نور الشمس

أضمهن بالگلب بس عيني تحچيهن
يلچمني العصر بالليل اغنيهن
كلها الناس تدري عيوني بيهن شي
بس محد سألني جروحك شبيهن

بعد ماطاحت وشلتها بس سيطرت عليها وشفتها انتبهت انه طلعت احس روحي مخنوگ ليش الرجفه البيها تصير بگلبي احسها حته النفس اگطعه منا لمن تصحا يلله انتبه على روحي واتنفس طبيعي بس مو نفس عادي لا اجر النفس گوه احس روحي تتعلعل وياها
الأحساس البيه عطف على حالها لو اني حبيتها
احس روحي بصراع صار اكثر من شهرين من تحاچينه وبعد كمت اتحاشها كل ماتبعد احس روحي تريدها
يمكن عاقبتها ويمكن عاقبت روحي علاجها عندي يوميه بيد افياء اوديلها العلاج وماارتاح لمن اعرف هيه شربته
بيوم من الأيام سافرت للبصره عدنه طلابه واجب نحلها انه بنص الديوان وتذكرت علاجها اي هذا وكته خاف ينسونها
ترخصت من الگاعدين وطلعت خابرت امي وگتلها انطيني افياء ذكرتها بعلاجها وماسديته لمن شربته
اعرف حالتها اذا خربطت بعلاجها راح تتأذه
بعد مارجعت للديوان انه استغربت روحي شنهي الي يخليني هيج اهتم انه ابوي مامسويله هيج ومن اسافر اعرف غيري موجود ويتكفل علاجه ليش وياها مااقتنع اكو من يداريها غيري
انه افكر وگطع افكاري رنة جهازي رافع اتصل بيه خجلان منه اليوم المفروض انه وياه جاوبته وطلع يعرف بعلياء تخربطت سألني عليها ونهينه الأتصال بعدها قررت ارجع للبيت بس صورتها ماتروح من بالي مو چان اعجاب بيها وبس لا احس روحي انجرحت والوجع الي بگلبي غطه على صورتها الحلوه البعيني ليش توصل الهالمواصيل شنهي السوته هاي البنيه وهيج تعلعلت زين انه شفتها اي شفت كلشي شلون امسح صورتها من بالي لمحه هيه ماطولت بيها بس انطبعت بذاكرتي بوكتها لو مو انه موجود منهو يصير بمكاني ويشوف الأنه شفته صعبه كلش صعبه عايشه ويانه بنفس البيت وحالها مايسر ابد
قررت اخذها الغير طبيب وهالمره اسافر بيها للبصره اكو طبيب زين اختصاص جمله عصبيه
الاطباء انطونه امل اكو علاج اذا مو نهائيا تدريجيا يعني مو هالكد تجيها بفترات متقاربه

رجعت للبيت واحس هموم الدنيا كلها بيه
سألت امي شلون صارت گالت تبچي من صحت الهسه
..اكو احد مضوجها سامعه شي گبل لاتتخربط النوبه ليش اجتها
..لا يمه ماكو شي جانت تتحضر تروح للحفله بس ماادري شجرالها
..هسه هيه وين نايمه گاعده
..بالغرفه وگاعده تبچي ..سألت عليك ورادت تشوفك
..اغير واشوفها چنت مااريد اشوفها وحاولت اتهرب منها مااعرف بعد الي صار صعبه خاصتا احنه من بعد الخلاف ماالتقينه

علياء ..
من صحيت چنت تعبانه لمحت علي گام من يمي وطلع وعمتي بقت يمي وعيت على نفسي وانه ملفوفه بجرجف انصدمت وشبعت قهر ليش يصير بيه هيج
وانه شنو مصيري حته علي بسبب الساني خسرته بس انه صدگ اكره هيچ عادات واكره العمام واجبارهم البنت العم چان بالي هوه هيج يفكر بعد المشكله الصارت ابتعد عني بس احسه يهتم بيه واليوم عرفت هوه الي مطلعني من الحمام انحرجت حيل واحس روحي صرت عاله عليهم قررت ابالي اطلب منه يدورلي امي ويخليني اروحلها وهيه تبتلي بيه ليش انه اتعرض الهيج موقف عمامي ممقصرين بس اني التقصير بيه احس روحي وحيده شگد يجون يمي احسهم يجاملوني وولد عمي هم يحترموني بس البنات متخوفات مني وهذا الي يحز بروحي
بقيت ابجي وابجي ماكو غير البچي شي يواسيني
وين اني جنت ووين صرت كل مااصفن واشوف حالي اگول حسبي الله ونعم الوكيل بيك ياعلاء وحته على امي نوبات اتحسب بس من انتبه على نفسي استغفر ربي مهما تكون امي ومااعرف ضروفها اكو شي بداخلي مستعز بيها يممن مااريد اصدك هيه عافتنه بدون سبب
سمعت صوته داخل البيت واني موصيه عمتي يجي اشوفه طول وهوه مااجه قررت انه اروحله
چنت تعبانه وجسمي گوه شايلته بس اريد اشوف حل النفسي هواي ضعفت هواي تغيرت شبيه اني وين شخصيتي وين ذيج ضحكتي وليش هالگد مهتمه العلاء وليش هوه مرتاح ويكمل دراسه واني ضاع مستقبلي يمكن الصدمه الصارت بيه من عرفت علي مطلعني بهيج وضع قوتني وخلت فكره ابالي كل الراح مو ذات اهميه بالنسبه للصار اليوم وللجاي مااعرف مصيري شنو واني هيچ ضعيفه
مشيت بخطوات تعبانه وخليت شال على راسي بس بدون ترتيب ماواعيه النفسي من كثر الكلام الي يدور بدماغي ولازم احچي
دگيت الباب اجاني صوته جاوب بهدوء ونبره رجوليه من اسمعها احس بالأمان ماادري ليش
..فوتي يمه
..دخلت للغرفه گتله اني علياء
..تفاجأت بجيتها وگمت من مكاني حته تگعد اعرف بيها تعبانه ..علياء هاي ليش گمتي انه ردت ارتاح واجيچ فوتي گعدي هنا گعدت على طرف الجربايه
شلون صرتي
..الحمدلله
..يستاهل الحمد ..طولت وانه مركز على عيونها لونهن اصفر على زيتوني نظرتها ناعسه هيه هيچ لو من التعب مااعرف اول مره انتبه عليها نازله من شعرها خصله تميل للشقار نزلت عيني منها وحولت نظرتي للگاع جنت اريد اسمعها

..علي اعرف طلبي ثگيل عليك ومو من حقي اطلب هيچ طلب بس ماعندي غيرك
..باوعتلها واشرت براسي تأمرين امر اذا اكدر عليه بعيني ليش ثگيل
..اريد امي
..تنهدت وين الگه امچ اني الي عرفته اهلها كلهم مسافرين
..بيت خالتي نندل عنوانهم ابغداد ويندلوها جيب عنوانها منهم اترجاك
..ليش ؟
..محتاجتها هواي
..انتي تبقين هيچ
..شلون يعني
..يعني تبقين هيچ معلگه مصيرج بيد كل شخص مامهتملج وتاركج وانتي بأصغب الضروف شوكت تنتبهين الروحچ وتصحين وتگولين مااحتاج احد احتاج انتبه الصحتي وبس محد يفيدج بس صحتچ صدگي
..بس عندي امل امي ضروفها جبرتها
..هسه انتي شنوو تردين
..اريد اسافر وياها
..وين ؟
..اروح استقر يمها
..مامرتاحه هنا احد مضايقچ
..لا
..فكرة السفر انسيها .امج احاول الگيلها عنوان وتحاچيها يعني وسيلة اتصال مو اكثر وصدگي لو تريد تجي يمچ مااگلج افتحلها بيتي خاف اطلع جذاب گدامج بس عندي خير من الله وبدل البيت تلاثه انطيها وحد من البيوت تستقر بيهن الخاطرج بس حته تكون قريبه عليكم
..بس هيه تريد اهلها
..وانتي ليش مو مثلها ليش شارده من اهلچ
..علي اني تعبت وتعبتكم
..ماتعبتي احد المتعبنه تعبچ يعني نريدج ترتاحين واحنه هم نرتاح
..وضعيتي مو عاجبتني واريد اخلص اريد اخلص من كل شي يذكرني بالي صار
..انه اساعدچ اول خطوه ترجعين للجامعه وتكملين دراستج تتواصلين وي زميلاتج اطلعين تشوفين الدنيا تشوفين العالم الي صار وياج مو نهاية الدنيا
..بس اني هيچ مااگدر شلون ارجع واذا اجتني نوبه واني بشارع واني بالجامعه شلون حالي
..شوفي انه چنت اريد احچيلج عن طبيب بالبصره زين ويعالج هواي حالات من هالنوع والعلاج من الله توكلي على الله وان شاء الله خير بس تره اكثر علاجج نفسي يعني انتي تتحكمين بوضعج صيري قويه وهزمي انكسارچ لو بيدي انطيچ من القوه العندي
..ابتسمتله انطيني ياريت والله
..هسه تگولين عني مغرور بس والله مو هيچ انه عندي ثقه بنفسي واعرف كلشي يمر عليه هوه اختبار الي وعندي قناعه انو الله سبحانه وتعالى منطي القوه للبشر تعادل المصائب الي يمر بيها انتي لوتخلين هالفكره ابالج تتجاوزين كلشي وحته علاجج بعد ماتحتاجي ..وعلى طاري العلاج بعد خمس دقايق وكت حبايتج
..ونعم بالله تعرف اجيتك واني مقتنعه انو اسافر ومااگدر استمر هتا بس اكو شي مخوفني هنا انت وعمتي وعمامي وياي من اروح يمكن ماالگه ذاك الأهتمام
..لاتنتظرين من احد يهتم بيج اي واحد وحته اني منهم لاتربطين سعادتج على بشر ماتعرفين الضروف تغير هواي انتي اسعدي نفسج بنفسج ..هذا الشي خلي ابالچ وحضري نفسچ بعد يومين نروح للبصره
..اني ومنوو
..اني اخذكم اشوف منو يروح ويانه عمتي لو اي احد مانروح بروحنه لاتخافين
..لا موقصة خوف بس يعني
..يعني لاتهتمين انه اعرف اتصرف روحي ارتاحي امج وعد عليه اذا حصلت الها عنوان اجيبه الج بس مال ترحين يمها عذريني ماراح اخليج
..انت تكرهه اعرف بس هيه امي اكيد تهتم بيه
..كرهي الهه مايأثر عليج مو قصدي انتقم منها بيج لا والله بس اخاف عليج منها
..تخاف عليه من امي
..اخاف عليج من اي شخص حته من روحي

علياء ..
سمعت اخر حچيايه منه انصدمت اكو شي حسيت بي بس احساسي مخربط مااعرف شنو اريد ولا اعرف هوه شيريد يمكن يحس نفسه مسؤول عنه هوه حته على افياء ميقبل فد يوم زعلها رافع لأن رادها تروح وياه للبيت ومن راحت عمتي الي هيه امه مسمعتها حچي عن امي وشلون عافتنه من افياء ضايجه ورايده تطلع بدل ميرضيها هوه مصيح عليها وجابها زعلانه عافها وراح
من دخلت وشافها علي دموعها على خدها ضاج وطلب منها تحجيله حجتله كلشي اتصل على رافع وگله هسه تجي اجه وبوكتها گله لتتصور مالهن احد افياء وعلياء اني مسؤل عنهن واي شي يزعلهن ماارضه علي وممنوع احد ينزل من قيمتهن البينهن وبين امهن مايحق الأحد يدخل بي وفهم عمتي الگلته بوكتها اثنينه حسينه ارواحنه مسنودين رافع گله انه  ردتها تصبر وتتحمل الخاطري وانه اكيد ماراح اضيع حقها ومن رجعت منكم عاتبت امي ومارضيت عليها بس ردتها تتعود مااريد احد يأثر على علاقتنه خل تحاول تهدأ وتعرف بدون ماتشكي انه مااسكت الاي شخص يمس كرامتها بوكتها تراضوو بس احنه ارتاحينه من موقف علي
اكيد هوه اني هم يعتبرني حالي حال افياء
رجعت الغرفتي شربت علاجي وتمددت مرتاحه صح اني لازم احاول اسعد نفسي بنفسي وراح اتعالج وارجع اكمل جامعتي يمكن اني لگيت اشخاص يهتمولي غيري يتمنون الأني بي ورجعت افكر امي ليش هيج تاركتنه
وصح كلام علي اني ليش ابقه اهتم للي مايهتملي
تعبت ونمت بس اليوم احس براحه
كعدت ويمي افياء تبوس بيه گالت رجعت بالليل وماحبيت اگعدج چنتي توج نايمه اعتذرت منها بس هيه عاذرتني
وره يومين رحنه للبصره وراح ويانه عمي ابو احمد
دخلنه للطبيب واخذنه كل التقارير
گال اكثر علاجها يعتمد ع الحاله النفسيه والألتزام بالحبوب بوقتها وان شاءالله ماتجيها نوبات بعد تخف تدريجيا الى ان تنتهي او متنتهي بصوره نهاييه بس تصير قليله كلش
بوقتها فرحت وعمي وعلي هم فرحوو بيومها رجعنه وصلنه متأخرين للبيت نص الليل تقريبا تعبانين
دخلت الغرفتي ونمت بدون مااحس
ثاني يوم گعدت من فرحتي نشيطه وحسيت لازم ابدي حياتي من اليوم
رحت العمتي بوستها ورحت الجدي والبيبي استغربو نشاطي والكل متفاجأ حته علي فرح بس بيومها طلع بشغل ومارجع الا بالليل
جنت اجهل شغلهم شنو يشتغلون وهاي الخيرات الي عدهم منين حبيت اعرف كلشي عنهم طلع عدهم بساتين وفلح ويزرعون ويبيعون وعلي عنده شغله الخاص بي اضافه الكل هذا بس مو هوه بالوجه احمد وياه عنده معارض سيارات هذا الكلام عرفته من عمتي سالتها سؤال والله يخليها حچتلي كلشي
من هذا اليوم بديت اشتغل بالبيت واساعد عمتي شنو تحتاج اني وياها حاولت اشغل نفسي حته ماابقه وحدي وافكاري ترجع للي صار والي يضوجني جانت عدهم حديقه حلوه وبيها زرع انواع بس ناقصها ورد وصيت عمتي على سنادين ورد وزينتها
كل ورده تكبر احس امالي تكبر وياها
بهذي الفتره علي ابد مايتواجد بالبيت ومن يجي مااعرف شنو يدور بداخله مرت اشهر وبدت السنه الدراسيه الجديده جنت بالحديقه انتظر علي يجي يعد مافاتحت عمتي وكتلها راح ارجع للدوام فرحت وشجعتني هيه والبنات
دخل علي وهوه يعدل شماغه وعباته مسفطه على ايده مااعرف ليش ركزت علي لابس دشداشه بيضه وشماغ ابيض واسود عباته سوده مصنوعه من وبر الجمل مسفطه بأيده وسبحته صفره نهايتها زناجيل فضه وساعته سوده ماركه عطره مله البيت اول مره اشوفه هيج شكله هيبه وحلو من شافني رجع يباوع على البيوت الي داير مدايرنه عبالك يراقب شي
ابتسمت بوجهه رد الأبتسامه بس حسيته مو مرتاح
..هاي انتي ليش هنا دنيا العصر والبيوت عاليه اخاف  يشوفچ تره الجام هذا مايبين منه اذا جان احد وراه
..ها لا چنت منتظرتك بس مو منتبهه بعد مااطلع اذا ماتقبل حاجاني وهوه يمشي واني وراه ماوگف
..مو مااقبل بس كعدي بالحديقه مضلله محد يشوفج منها بس كبال الباب لا
..ان شاءالله ..بوكتها خلاني انسه الأرد اكوله ارتبكت
..اي ماگلتي عليش منتظرتني
..ها اريد ارجع للدوام
..بدون ماتگولين خليت عباس يكمل معاملتچ ويباشر بنقلچ يبقه بس لازم ترحين انتي الكليتج حته تكمل الاجرائات
..هاا يعني الا اني اروح شيوديني
..حاولت بس گالو الا هيه تروح
..ضجت وحسيت روحي رجعت ضعيفه شيوديني اني هناك خاف اشوفه
..ها شبيچ گلبتي وجهج
..اني مااريد اروح
..ليش
..اخاف
..تخافين وانه وياج منين تخافين
..اخاف من نفسي اني احاول انسه
..الي تخافين منه انهي جيبي نقلج وانسي كلشي هناك اني وياج اروح لاتخافين
..علي
..بيتنه وين صفه ومنو بي هم تعرف
..شذكرج بي هسه ارتاح واشوفه لاتهتمين
چنت اعرف ابياهم مبيوع من اول مااجن بس ماردت اگلها
بعد مانفسيتها تحسنت
دخلت اغير ملابسي وارتاح ورحت اشوف ابوي وامي الحجيه
انه متعود من ادخل اسلم عليهم واحجي كلشي الجدي كلشي صار وياي دخلت وجدي نايم بس ماادري ليش ماارتاحيت النومته ركزت على صدره ماكو نفس رحت جسته جان بارد
جست نبضه عرفته مات
بهذا اليوم صدگ حسيت روحي تيتمت اعرف بي رجال جبير ومريض ومرضه مامنه علاج بس جان وياي بكلشي هوه الي علمني وعلي وشخصيته واحترام الناس اله كلها بسبب تربيته الي وخلالي قيمه بين الناس من خلاله الكل يحترمني حته عمامي
خابرت عمامي وصار العزه بوكتها التهيت عن البيت وماادري بشي تلث ايام اني مااعرف كلشي ثالث يوم رجعت للبيت قبلها نبات ببيوت عمامي لأن نسوانه وعزاهن ابيتي

علياء ..
جنت بالمطبخ وسمعت صياح عمتي عرفت جدي توفع تاثرت عليه بس اكثر واحد.تأثر علي التهينه احنه البنات نضييف النسوان اليجن اني وبنات عمتي وبنات عمي ريم چانت حامل بشهرها تعبانه جنت تخليها ترتاح واني اخذ شغلها وحته جهالها ابدل الهم واغسل الهم جانت متأثره كلش لأن جدي هوه مربيهم
صارت المغرب واجن عماتي الي بالبصره حسيت روحي توترت تذكرت موقفهن وي ابوي ماتقربت الهن ولاهنه بحالي بقينه على هذا الوضع تلث ايام ريام حسيتها حيل ارتاحتلي عكس قبل جانت متخوفه مني خلصت ايام العزه واحنه تعبانين من الشغل مي جاي ضيافه وتنظيف
صار الليل ومابقه احد غريب بس عماتي ونسوان عمامي واحنه البنات جنه مجتمعين بعد العشه وتوني صابه جاي الهم وافياء جاي تلم بيهن
حجت عمتي الجبيره
..وينهن بنات اخونه ولو هوه اله يرحمه اخوو مرته اشفنه منه احنه
..اني تبنجت حسيت الحجي على ابوي بس جنت اريد اتأكد افياء گالتها عمه ابوي الله يرحمه اني بنته وذيج علياء هوه هم ماشاف منكم شي للموت وانتن ماقصرتن لا اجيتن ولا وصلتن والهسه وبعدجن تحجن علي انسنه ليش المذمه بعد ردت عليها عمتي شوف السانها ام السان عليمن اطلعين بت هناء انتي لو غيرج صدك على طاريها يكولون ذبتجن ذب حته الجلبه تعرد بجراويها بحلكها وتاخذهم وين ماتروح بس هيه شجابها للجلبه
..اني هنا دموعي كامت تصب گتلها انتي شتردين منه بس حسيت اطرافي كلها ترجف عوفينه هسه احنه يمج حواليج
..ياا هاي انتي علياء الي اطلگتي باول ايامچ الله اليعلم ليش اكو واحد يطلك باول ايام
..انتي شتردين منه
..اريد الله ياخذجن ويخلصنه من ساسجن بيجن يمشي دم هنيوه واهلها
..جاوبتها وين الله وياخذنه صدگ واخلص من عيشتي وارتاح
وافياء بدت تحچي وتصيح وعمتي ام رافع صاحت عليها عيب احترمن عمتجن عمتي ام ريم ماقبلت عليهن وحجت والزغيره اصلا ماادخلت بس صارت هوسه بعد اني حسيت روحي راح تجيني نوبه وبعد ماحسيت الا واني بغرفتي

علي ..
رجعت للبيت بدخلتي اسمع هوسه وصياح بس اريد وحده تطلعلي تكلي ماكو احد غريب ماادري اكو احد عدنه لا زين البنات خاف مفرعات سمعت كل الحچي
وضليت حاير لا اكدر افوت ولا اكدر اطلع اتصلت على زينب محد يرد دگيت الباب الداخلي بقوه ماردن
دفعت الباب وصحت شكووو هاي شصاير ردتهن يسمعن صوتي حته يتحضرن
فتت الهم چانن گاعدات بس افياء واگفه
عيني ادور شكو اريد افتهم عمتي شعدها بعدني ارد اگلها شعندج عمه مو وكتها صارت عيني على علياء اجتها النوبه
شمرت عباتي من متني ورحتلها خليت جماغي بحلگها وجتفت اديها قوي وافياء مدت رجليها

يتبع ..

حبايبي هذا الأكدر اكتبه مقبله على ولاده وجاي احضر اغراضي وبيتي وهم عندي شغل مو فارغه اني والتاخير مرات بسبب النت كلش ضعيف اني اذا اكدر اكتب بارتين اكتب بدون مطلبون مني والله بس هذا الأگدر عليه

البارت بدون مراجعه.. عذروني اذا اكو تقصير بس وقتي مايسمح 😘