رواية امقت اعرافهم لكنها حيتني الفصل الرابع والعشرون 24 - بقلم نور الشمس

بهذا اليوم علي انشغل ناس رايحه راجعه تبارك عاداتهم تختلف المفروض العرسان اول اسبوع ياخذون راحتهم همه بالعكس من اول يوم العالم تبارك والكل مخبوص وهوسه
اجه بدل وطلع للخطار يستقبل الضيوف واني هم بدلت ورتبت نفسي عمتي گالت يجون جوارينه والأقارب يتباركون يأدون الواجب
مر هذا اليوم بتعب چنت تعبانه كلش وعلي ذكرني بموعد علاجي دز عمتي عليه
راحت العالم اجه بالليل
چنت ارتب نفسي ع المرايه واگفه
تقرب عليه مبتسم
..شلونها العروسه
..الحمدلله جاوبته بتعب
..مبين تعبانه
..اي والله
..طفي الضوه وتعالي ارتاحي يمي
..انت هم تعبان اكيد
..تعبان بس فرحتي بيچ اكثر تعالي
..فتحلي ايديه وحضني بقوه مشتاقلچ وانتي يمي بس لأن ماكدرت اشوفچ براحتي
..اني هم والله
..چا ماكو نوم هسه شويه اشبع منج

مرت الأيام واني مرتاحه كلش وافياء هم حيل مرتاحه ورافع مدللها وزنوبه هم تجي كل فتره عمامي يجتمعون يمنه
مرت شهرين على زواجنه وبيوم صادف يوم جمعه الضهر
عمتي چانت مشغوله تحضر بيبي الغسل الجمعه تحب تغسل غسل الجمعه قبل صلاة الضهر چنت اساعد عمتي على بيبي نگعدها ع الكرسي
اشوف عمتي شلون مهتمه بأمها حيل تعجبني رغم هيه تعبانه بس تضحك وتشاقه حته متحسس بيبي انو هيه متضايقه منها
واحنه نجهزها سمعنه صوت علي

..وينچن ..يمه ..علياء

عمتي گالت روحي شوفي شعجب من وكت اليوم خاف عنده شغل
لو يريد شي
رحتله شفته ابتسمت شگد افرح بشوفته واتلهف الملگاه عبالك اليوم شايفته بعد سفر طويل

..هلا هاي شعجب من وكت

..هلا بيچ يعني ارجع لو ابقه فرحانه متضايقه شني شعورچ حته افهم ههههه

..ضحكت شلك بهاي تعرف احساسي بوجودك

..حبيبه انتي اجيت عندي موضوع وياكم بالأول گليلي غداكم كامل لو اجيب من بره

..لا حبيبي كامل عمتي مسويه مطبگ سمك

..رفع حاجبه الي وابتسم هههه مطبگ سمك مااحبه انه احب مطبگ سمچ
.ضحكت يلله وليهمك مطبگ سمچ
..اي هاي الأكله كلش طيبه هههه ..جهزوو الأكل رافع وافياء هم جايين اني وديت عليهم

..ها شعجب مو اول البارحه يمنه

..عندي شغل وردتهم اروح ابدل وارتاح بين متكملون

..اخذ راحتك عمري
راح هوه وبديت افكر شعجب مودي عليهم وشنو الموضوع الي يريد يحچي لهيت نفسي بالشغل
وگلت من تجي افياء اسئلها

شويه ودخلو بس راحو يم بيببي رحت وراهم حته نجهز السفره
رافع شاف بيبي تمشط بمشطها الخشبي
گلها
..هاحجيه جنج نويتي عليها نگول مبروك للشايب
..يا ولك ياشايب يمهمود تالي عمري انت تضحك عليه
..ههههههه ماعاش اليضحك عليچ بس اذا ناويه صدگ جنچ عليها اعرف شلون شايب كشاخ وعطره بعد امتار ينشم روحه خضره ويريد يجدد

..خايب ماتسكت كون صخونه

..ههههههههه

ضحكنه كلنه وعلي اجه گل الرافع لتضوج امي شوكت ماتريد انه اجيبلها خيرة الشياب
كلنه ضحكنه وحته بيبي ضحكت گلها رافع نفس الحجي الحجاه علي انه حچيته بس انتي عندج من علي كلشي حلوو ومن يمي تقفلين

حضرنه الغده وگعدنه ومنتظرين علي يحجي خلص الغده ومگال شي
بعدها حضرنه الجاي وهوه ساكت
گتله علي احچي شنو الموضوع الي جمعتنه عليه
بقه لحظات صافن بوجهي وبعدها گال

..تعرفين اني منطيج وعد شوكت ماالگه شخص يوصلني الأمج راح اگلج وينها وعنوانها وانتي تتواصلين وياها

جاوبته بلهفه
..أي
..أي عندي صديق استقر بسوريا بمنطقة السيده وكلفته صار اكثر من اسبوعين والولد ماقصر اليوم امچ خابرتني وتريد تلتقي بيچن

..اني من جاب سيرة أمي بچيت بدون وعي احس عيوني مااگدر اسيطر عليهن حته رمشه مارمشت
بس افياء ابد ممتوقعه ردة فعلها بچت وگالت لحد يجيب سيرتها يمي اني ماعندي ام امي ميته هيچ بلغوها
تحچي وتبچي چانت ورافع يهدي بيها من سمعتها هيج حجت اني هم انهاريت بچي ورحت الغرفتي
احس نار بيه وگلبي يريد ينفجر وين چانت كل هذي الفتره صدگ ليش اني مهتمه وهيه مو يمها اني غلطت ورطت علي وخليته بنفسه يدور عليها وادري البينهم شي جبير مو مال اخلي بهيج موقف
ظليت ابجي محتاره وكارها نفسي شويه واندگ الباب
عمتي گالت عمه علي يريدچ بعدهم گاعدين ميصير تعوفينه هيج وترحين
گتلها عمه اريد ارتاح شويه
..ميخالف ياعمه حته لو ترتاحين بس يكمل حچيه يلله هاي الأصول
بقيت متردده اريد اطلع وفشلانه منه ومن موقفي اختي الي مصارلها الصارلي تعرف هيه شتريد ونست كلشي وشافت حياتها اني شكوو اخلي علي يحتار بمشاكل امي وهيه العافتني
انفتحت الباب واني على گعدتي وبچيتي ومن شفته يباوعلي بچيت اكثر

..حبيبه ليش البچي هسه
..مجاوبته وزادت شهگاتي
..علا حبيبتي الردتي سويته بعد شني تردين مني يجرالج ليش ضايجه
..علي اني غلطت اعرف روحي اني اسفه
..على شني تتأسفين شني غلطچ ليش تبچين فهميني
..اني خليتك تدور وتسئل على امي الماكلفت روحها بيوم وسألت خليتك.انت تسأل واعرف انت تضوج منها
..ماعليچ مني انتي
..اعرف بيك ضايج مني
..والخلقچ ماضايج ولا اضوج وكافي دموع گومي انه وعدتچ و وعد الحر دين
..بس انت ماتحبها
..قربت عليها حضنتها بس احب بتها ومسويتلي عله
..اسم الله عليك ان شاءالله اليكرهك 
..تعالي نكمل حچينه يلله گومي
..رحت وياه للخطار وشفت افياء عيونها حمر ووارمه ورافع يهدي بيها يکلها خلي املكم بربكم الله كريم الله يشافيها
مااستوعبت الحچي بالبدايه
بعدين گالتلي علياء امي مريضه وشهگت تبچي
اني عيوني ظلت تدور بين رافع وعلي اريد احد يحچيلي
..علي امي شبيها
..حس كلامها هيه مريضه وتگول اني ردت أمن مستقبلهم وماابالي ابقه الهذا اليوم اصلا عبالي اتوفه قبل وقت بس رب العالمين كاتبلي عمر وهسه ياريت اعرف اخبارهم قبل لا اموت
..شبيها امي ..فدوه احچي شبيها
..بس اهدي هسه لاتتخربطين وانتي حاچيها وافهمي كلشي
..معليك مني بس گلي شبيها فدوه
..مريضه ومرضها واصل مرحله الظاهر من هيه وياكم وانتو ماتدرون بيها
..الي فهمته من كلامه امي مرضها خطير يعني نوع من انواع الاورام السرطانيه حسيت روحي راح اتخربط من تجيني النوبه اعرف بيها قبل لحظات
بعدها ماصحيت الا على صوت علي ومخلي راسي بحضنه ورافع موجود وافياء يمي تبچي وتفرك بأيدي گالتلي حبيبتي شجاج ليش ترعبيني وتقهريني فوگ قهري اشرت الها بعيني بمعنى اني زينه لتخافين بس احس جسمي متكسر ومابيه ارفع ايدي
رافع گال العلي اخذها للغرفه ترتاح
باوعت العلي چانت عيونه مغورگه وشكله حيل مقهور سندني وطلعني من باب الخطار واجت عمتي وياه سندتني گالت عمت عيني عمه ان شاءالله هسه ترتاحين ودارت وجهه العلي اصابعك خو مو كلش متعورات
گلها ماعليهن يمه بالي مو يمهن اني بالي يم علياء وشلون اخلصها من هذا المرض
جاوبته الله كريم
صار عندي فضول شفت اصابع عليهم اثر عضه قويه وطالع دم منهم
حيل ضجت اكيد مخلي ايده بين اسناني حته لا أذي الساني
دخل للغرفه وگعدني ع الچربايه اني تمددت دار من الجهه الثانيه وخله راسي بحضنه ودارني عليه
حسيته احتواني بچيت كل مره وره ماتجيني اانوبه واصحا ابچي مااعرف ليش
بس ماارتاح الا ابچي
..كافي حبيبه كافي يروحي زينه انتي چنج ورد لاتخافين اخذج هالمره الطبيب اعصاب زين واخلي يشوفلج علاج ليش رجعتي تتخربطين
..بست اصابيعه ومسحت الأثر بيدي وبچيت
..لاتهتمين سهله هاي
..علي أمي امي اتركها لو احاجيها
..الي يعجبج سوي
..أذا انت بمكاني
..مااخلي روحي بمكانج مااعرف انتي شني تحسين
..زين لو امك تسامحها
..لاتربطين امي مو امج ولو تموت مااسامحها ..أنتي ليش مدوخه روحج اسمعي منها وظلت بكيفج تسامحين لا
..خايفه
..منين وانتي مرتي وانه سندج

..خايفه من الي راح يصير واخاف اقبل اسامح امي وتتركنه من جديد واحتمال هذي لعبه منها حته تثير عواطفنه وخايفه ارفض التواصل وياها ويطلع حچيها صحيح واندم

..أنتي مو چنتي رايدتها شني الغيرج مو طلبتي مني الگاها الكم واعرف اخبارها بعد ليش متفاجأه وزعلانه وانه ابالي فرحتج

..مااعرف اكو شي بداخلي مكسور منها

..الله كريم يصير خير لتفكرين بشي هسه اهم شي صحتچ نامي ارتاحي ومن نکعد نتصل بيها

ظليت العب بشعرها حسيتها نامت طلعت حته اگل الأمي صارت زينه واشوف رافع وافياء چانو يم امي الحجيه

..ها بشر شلونها

..الحمدلله احسن نامت هسه

..انت هم ارتاح ولتتركها اليوم وحدها خاف ترجعلها النوبه

..لا ماراح اتركها اكيد بس ردت ابلغكم وارجع

رجعت للغرفه وبالي يمها شني اسويلها حته اطيب شلون تروح هذي الحاله منها تعبتها وتعبتني اذا طلعت المكان بعيد يظل فكري يمها اخاف عليها بيوم تتخربط ومحد يمها
خابرت جماعتي اسأل على طبيب زين وصفولياه قبل فتره
اخذت العنوان اعرف هوه مااله علاج نهائي بس بلكي يخفف عنها بوكتها تندمت لأن حچيتلها عن امها بس هيه طلبت مني ورادت وعد قبل الزواج وانه عد وعدي
واني افكر گطع افكاري صوتها التعبان
..علي
..عيونه
..بعدك هنا اخاف عندك شغل وأخرتك روح اذا تريد اني زينه
..حبيبه شغلي مو اهم منچ بعدين اعرف انتي زينه وجنج ورد بس انه مشتاقلچ واريد ابقه يمج
..ابتسمت اله واني مشتاقه اكثر
..يروحي انتي ارتاحي وانه راحتي يمج
بعد يومين من الي صار اتصلت امهن مره ثانيه وهالمره خليتها تتواصل وي افياء وگتلها شويه شويه نبلغ علياء وصدگ بلغناها اول اتصالين خلصتهم بس بچي وكلشي ماحچت بعدها لا تتواصل وياها بشكل يومي

اخذتها للطبيب والعلاج نفسه اهم شي راحتها النفسيه
بعد شهر من تواصلهم بلغتني انو امها جايه للعراق وتريد تشوفهن وهيه كل بالها تروح للبيت البيت ابوها اضطريت ابلغها بيت ابوها مبيوع امهن باعته قبل السفر
هم ضاجت حيل بس چانت مهتمه تشوف امها
گتلها عندي بيوت اثنين غير هذا اختارن واحد ونجهزه وأگعدن يمها بوقت جيتها
صح صعبه وانه عادتي اضييف ابيتي وداري بس انتي عذريني مااگدر انه وياها ابيت واحد هواي جروح تنفتحلي انه الخاطرج اسوي كلشي بس هاي تعذريني بيها مااقصر بشي ان شاءالله بس خليني بعيد عنها
هيه عم تفهمت وضعي ومگالت شي يجوز ابالها يبقه بس مو بيدي
وصار وقت جيتهم واجوو الي قهرني جاي وياها اخوها واخوتها همه سبب ومطلوبين ثار النه غلط جيتهم
بس الخاطر علياء سويت روحي ماادري ومامهتم للموضوع
الى ان اجوو عمامي وحچوو عليه شلون هيج يصير ودم ابوك وين وانت هواي تماهلت وياهم حته لو خال مرتك هالشي مايغفرلهم غلطهم
بعد نقاشات وحكيث طال وعرض وديت بلاغ الخال لازم يطلع من الولايه كلها وتبقه بس الأم هذا الحچس علياء يم امها صار تلث ايام وانه ماشايفها ولاواصلها باقي ع الأتصال من وصلهم البلاغ هيه اتصلت تفتهم مني صح هذا الحچي گتلها صح
حسيتها مو راضيه بس انه الي سويته مو شويه ومو كل واحد يسوي هواي تماهلت وياهم لعيونها
رافع موجود وياي والولد وگالو السويته صح
عمتي چانت ماتعلق على شي لاهيه ولا امي الحجيه بس باقي نسوان عمامي وعماتي لا هنه الي يحچن وبدوو عماني ياخذون بحچيهم وحته عليه وجوهم ثگلت انه كل هذا مو همي همي علياء صار اسبوع وهيه ماكو المفروض تشوفهم وترجع مو هالگد تظل يمها هم انه اشتاقلها وانه مم يوم زواجي لليوم ماابقه هالگد بره البيت رغم مسؤلياتي تتطلب بس چنت اترك كلشي وارجع احاول اكمل شغلي بظون مابات لو قليل ابات صح امها وحقها تشوفها مشتاقتلها بس مو معناها تنساني
بديت اضوج صدگ وچنت اتصل عليها بعدها گطعت الأتصال
بس بالي يمها كمت اسأل افياء عليها ووصيتها خاف تتخربط خل تذكرها بعلاجها اعرفها مو ملتزمه بالعلاج

افياء ..
من اجت امي وشفناها عبالك مو هيه متغيره وضعفانه ولونها اصفر من شفناها انهارينه وهيه هم تباظلنه نفس اللهفه ونفس الشعور اكو عتب واكو ندم واكو اشتياق كلهن ذني نريد نوصلهن الها وهيه هم هواي حچي بعيونها
علياء حيل تأثرت ومفارگت امي ابد واني بقيت يومين يمها بعدها اروحلها بالنهار وارجع بالليل ومرات اروح عصريه لأن عمتي نحسه وتتحجج عليه خاصتا من اجت امي تخبلت حارت شتسويلي مشاكل چنت اعبر بمزاجي الخاطر رافع وحته مااحجيله بيوم اتثل بيه علي تفاجأت يوصي بيه على علياء ويطلب اذكرها بعلاجها
حسيته ضايج من نبرة صوته
ومن رحت سألت علياء
..ولج انتي ابد مارحتي البيتج
..لا امي تعبانه واذا رحت منو يبقه يمها
..لچ ورجلج
..ميگول يعذرني
..خابرني الصبح يسأل عليج ويوصي ع العلاج وحسيته ضايج
..ليش ميتصل بيه ليش يتصل عليج
..اني شمعرفني سألي نفسج ياحلوه اكو وحده تعوف رجلها هالگد
..لا ميزعل انتي متوهمه
..حبيبتي شوفي واذا زعلان رضي الرجال ميريد يحس اكو شخص اهم منه حته لو اهلج
بعدين امي شكو عليها نسويها بين يوم ويوم يوم عليه ويوم عليج
..رافع يقبل
..احاول ..هسه انتي روحي حضري نفسج واتصلي علي يجي ياخذج لو ترحين للبيت رافع يوصلج وسويها مفاجأه
..خوفتيني والله مالي خلگ زعله ابد كلشي ولايزعل
..والله من غبائج اكو وحده اطول هالگد وهاي انتي تدرين بي حته سفراته بطلهن علمودج
..يلله اجهز نفسي عفيه بلغي رافع يجي يوصلني
اجه رافع ورحت للبيت وانه فكري كله يمه ادري چنت بغيبوبه ليش هيج هملته من اول لقاء صار بينه هذا جزائه شبيه اني ظليت اكل بروحي وخايفه من ردة فعله
دخلت البيت واستقبلتني عمتي
..هلا بعلويه من لگه احبابه نصه اصحابه
..لا عمه اني أگدر انساكم انتو بالگلب بس امي خطيه مريضه كلش ومحد يمها
بيبي گالت حگج يمه بس الرجال ماينعاف هالگد انه ماادري انتو متفقين لا بس الأدري بي علي هاليومين ماله خلگ وضايج واحساسي يگول ضايج منج وعليج
ماجاوبتها شي ورحت الغرفتي زاد خوفي والقلق
وحاولت اجهز نفسي حته ارضي ولو مااعرف شلون ابرر بس بلكي من يشوفني يطيح الزعل

يتبع ..

حبايب صح هواي طولت عليكم بس والله مو بيدي يعني الزم الجهاز اريد اكتب كلمه ماتطلع مني لأن بالي مشغول على جهالي خاصتا الوسطاني فد مره صار اكثر من اسبوعين ومجاي يطيب ماخليت تحاليل واطباء وكلها افلاونزه واذانه وبلاعيمه والأدويه ولتفيد ربي يكفيكم انتو واطفالكم شر الأمراض والعلاجات ادعووله ربي يشافي مااعرف من الغيره هم زيدته فوگ ماهوه مريض غيران
طولت عليكم بس ماعندي وقت والله حته اوضح

احاول منا لليل انزل الكم بارت تعويض احاول مو اكيد