رواية انا شاعرك العام والقصيد عيونك. الفصل الحادي والسبعون 71 - بقلم rw2ixxx

= بعد مرور سنين طويل ونهاية حكاية ابطالنا =
-
عبدالرحمن ابتسم وهو يشوف غيث جالس يطالع بـ شيهانه كان ع الوكر وغيث يطالع فيه ولابس ثوب ،
امال كانت تصوره وهمست : ياروح ماما غيث طالع هنا ،
عبدالرحمن مشى وهو يشيله ويبوسه بقوه ،
امال بضحكه : دحيم حرام عليك لا تبوسه كذا ،
عبدالرحمن ناظر لغيث الي بدا يبكي يبغى يلمس شيهانه ،
امال مشت وهي تاخذه منه : ياروحي جعل هالدموع بعدوك،
عبدالرحمن : ما شاء الله على الام خوش ام انتي و دعواتك ،
امال : اي جعل دموعه ب عدوه ،
عبدالرحمن : واذا عدوه طلع عيسى؟
امال بضحكه : لا بعيد الشر بسم الله عليه ،
-
عساف وعيسى وجوري وسيلين كانوا يتراكضون في الحوش،
وهديل ماسكه بنتها لارا وتصارخ : عيسى بشويششش ،
نزلت سُلاف وناظرت : اوف منك ي عساف انتبه على اختك لا توسخ نفسها وتطيح على الارض ،
ملاذ ضحكت بخفه وهي شايله سعد تبنو طفل جديد ،
جوري كانت تضحك وهي تركض ورا عساف تلحقه ،
عيسى كان يركض وراهم ويصارخ ،
ام صقر ابتسمت وهي تطالع فيهم بحُب و مبسوطه ،
يوسف طلع من المجلس وهو يتذكر ابوه الجد سُليمان توفى ،
تنهد و رفع نظره وهو يشوف احفاده في الحوش يلعبون ،
-
سعود و دلال جابوا ولد و سموه ابراهيم ،
دلال كانت تضحك وهي تشوف ابراهيم يشوت الكوره ،
سعود : اي كفو على ولدي ارميه على امك ،
دلال : برهومي بابا ارميه لي يلا بسرعه ،
ابراهيم ضحك وهو يرميه على دلال ،
طلعت جنان وبيدها الكُتب وتذاكر وتطالع فيهم وتضحك ،
-
مريم كانت حامل وفي شهر التاسع ما بقى شي على ولادتها ومعصبه : ناصررر لا تطفشنييي ،
ناصر : اوف قاعد اجهز توزيعات استقبال بنتك وانتي معصبه علي!
مريم : طب لا تشغل اغاني و تزيد صداعي ،
ناصر : اي فكيني خلاص ماني مشعل شيء ،
مريم سكتت وهي تتمشى في الغرفه وتحس بالم،
-
ماجد و ريما كانوا يتمشون في الحديقه ريما ابتسمت وهي تطالعبـ بنتها ريم كانت تلعب بالتراب وهمست : يا خوفي تاكل التراب ،
ماجد بضحكه : بالعافيه عليها ،
ريما : يمه بسم الله على بنتي ،
ماجد ضحك بخفه وهو يطالع بـ ريم كانت جالسه بين التراب و تلعب بالتراب بيدينها ،
-
ام نجلاء وقفت وهي تطالع بـ جوهره و نايف يركضون و يلعبون حوالينها وفهد جالس معها يتقهون و مبتسمين وهم يطالعون بجوهره ونايف دخلت نجلاء ومشت وهي تجلس : اي يبه ام غيث تقول ما تقدر تجينا اليوم ،
فهد : متى تجي اجل اشتقنا لـ غيث من فتره ما شفناه ولا جت عندنا ،
نجلاء : مدري والله ي يبه ما قالت لي متى تجي بس قالت ما تقدر اليوم اعتقد زوجها مشغول عشان كذا ما يمديه

سلطان وصقر و عمر كانوا جالسين في المجلس يتقهون ،
صقر ناظر لعساف الي دخل : بابااااا عيسى يضربني ،
عمر : اقول حدك على ولدي وش كبرك و تحط عقلك بعقله!
صقر بضحكه : عساف بابا شفت هالجزمه روح اضربه فيه ،
عمر بتهديد : والله ان لمست ولدي ي عساف بضربك ،
سلطان بصدمه : خير خير انت وياه الاثنين على ولدي روح ي بابا اجلده و تعال ، دخل عيسى وهو يركض لـ عمر ،
عمر ضحك وهو يسحبه لحضنه : تعال المسه اشوف اكسر راسك و راس ابوك ،
دخل عبدالرحمن وهو شايل غيث : السلام عليكم ،
سلطان التفت : وعليكم السلام وصل الوغد غيث ،
عبدالرحمن بحده : والله ما الوغد الا ذا الهطف ،
جلس وهو يحط غيث على الارض و صقر صب له قهوة اخذ القهوة منه وهو يشرب ، غيث مشى عند صينية القهوة وهو يسحب الكليجا من الصحن ويحطه بفمه ،
سلطان بصراخ : ولددددددد ، غيث فز من صراخه وطاح الكليجا من يده والتفت لعبدالرحمن وهو يبكي ،
عبدالرحمن انصدم وهو يقومه ومشى مسك سلطان من ياقته وناظر بحده : تصارخ عليه مره ثانيه!!!
سلطان بضحكه : عساف صارخ عليه خذ حقك ،
عساف ركض لغيث وصارخ : باوووووو ،
غيث رجع يبكي بقوه ، صقر ضحك وهو يشيله و يبوسه ،
عبدالرحمن سدح سلطان وهو ماسكه : قسم بالله ي سلطان ان صارخت على ولدي لا اخلي بنتك وولدك يشوفون نجوم الليل بالظهر ، سلطان كان طايح وهو يضحك : اسف اسف،
عبدالرحمن وقف و رفسه برجله بقوه : جرب تصارخ ،
عساف ناظر لغيث وصارخ بقوه : ياووووووو ، غيث رجع يبكي،
عبدالرحمن مشى وهو يمسك عساف من اذنه : تصارخ!
سلطان بضحكه : اترك ولديييي ولا والله اصارخ ،
عساف بصراخ : باباااا ،
عبدالرحمن فرصه باذنه : يلا انقلع لابوك ،
عساف وقف وهو يبكي وماسك اذنه : باباااا ،
عمر كان جالس يضحك عليهم : تستاهل انت و ابوك ،
سلطان ضحك وهو يناظر : تعال ي بابا تعال ما يحبونك عمانك،
عمر ناظر لـ عيسى الي قام و اخذ كليجا الي طاح من غيث ومشى مده له ، عبدالرحمن : تعلم تعلم يالحمار ،
عساف كان جالس بحضن سلطان يبكي وماسك اذنه وناظر لغيث وهو يصارخ بعناد : باااا..ماكمل الا و سلطان حط يده على فمه : انكتم الوحش جالس قدامك ، وضحك وهو يشوف عساف يعاند يبغى يصارخ على غيث ،
عبدالرحمن بتهديد : جرب بس جرب اوريك ،
عساف : الا الا اصارخ ،
عبدالرحمن : طيب صارخ جرب اوريك انا ،
عمر بضحكه : قسم بالله انكم اطفال ،
صقر ناظر لـ جوري دخلت و ركضت له ،
سلطان : جت زوجته تنقذه تعالي زوجك هنا ،
صقر : يخسي اعطيه بنت والله ما يشم شعر راسها حتى ،
عمر بضحكه : وينها سيلين زوجة ولدي ،
صقر : انت ولدك مسالم موافقين

عساف بدموع : بابا اصارخ اصارخ ،
سلطان : ي بابًا حرام عليك الولد ضعيف ما يصير كذا ،
عبدالرحمن رفع نظره : تعال صارخ اشوف ،
عساف التفت عليه : الا الاااا الا ،
عبدالرحمن ناظر لغيث الي بحضن صقر يناظر ويلعب بالكيجا ونطق : والله ي عساف اخر مره اقولك ان قربت من ولدي ولا صارخت عليه راح اضربك صدق ما امزح ،
سلطان بضحكه : شايف ي بابًا الوحش وش يقول؟
عساف بعناد : الا اصارخ و اضربه ،
عمر ضحك وهو يناظر : والله الولد عنيد ،
عبدالرحمن : اطلع عناده من عيونه الثنتين ،
عيسى مشى عند عبدالرحمن : عمي غيث ما ياكله ،
عبدالرحمن ابتسم : ي روح عمك انت تعلم ي عساف تعلم ،
شال عيسى وهو يبوسه : والله بنات صقر حلالك انت ،
صقر رفع نظره : ما شاء الله على كيفك ،
عبدالرحمن : لا لا سيلين وينها عيسى ياخذها ،
عساف بعناد : اختي اختي ماراح ياخذه ،
عبدالرحمن : غيث راح ياخذ اختك ،
عساف : ماراح اعطي اختي ماراح اعطي ،
عبدالرحمن : عيسى بابا كلم مارلين تجيب سيلين ،
عساف بصراخ : بابااااااا ،
سلطان بضحكه : ما ياخذونها ي بابا يهايط بس ،
دخلت مارلين ومشت مدت سيلين لعبدالرحمن ،
عساف ببكاء : باباااا ،
عبدالرحمن ناظر لـ سيلين واخذ غيث من صقر و جلسه بحضنه ونطق : سيلين بوسي غيث ،
عساف بصراخ : لاااااا باباااا لاااا ،
سيلين قربت وهي تبوس غيث ، عبدالرحمن كان يضحك ،
عساف قام ركض وهو يطيح نفسه على الارض ويبكي ،
عمر بضحكه : يلعن شكله الهطف ،
عبدالرحمن : يلا انقلع شف اختك تحبه ،
عساف ركض وقف ورا عبدالرحمن وهو يضربه على ظهره ،
عبدالرحمن مد يده سحبه وهو يسدحه على الارض : تسويه!
سلطان كان جالس يطالع : لا لا دحوم مو كذا ،
عساف بدموع : بابااااا ،
عبدالرحمن تركه وناظر : يلا هش انقلع ،
-
امال بصدمه : متى صبغتي؟؟؟؟
هديل بضحكه : صح النوم امس الصباح طفشت و قلت لـ عمر يحط لي صبغه عاد ،
امال : حيوانه تغيرتي مرررره ،
ملاذ كانت جالسه تضحك وهي تشوف صدمة امال ،
سُلاف : قلت لها حطي لون ثاني الا وحطت هاللون ،
امال : الا صح نجوله وماما جاين المدينه وحتى مريم يقولون احتمال تولد اليوم ،
سُلاف : اي يعمري هي الله يسهل لها ولادتها ،
-
غلا كانت واقفه عند البحر وماسكه يد جاسم وتتمشي حول البحر و مبتسمه ' مو كل نصيب يُصيب ياما ناس حبوا بعض لكن النصيب كان اقوى منهم و ربي عوض كل شخص منهم باشخاص اخر ،
جاسم : غلا شوفي عند البحر هناك ،
غلا ابتسمت و رفعت نظرها وهي تشوف الاطفال يلعبون بالمويا وضحكت بخفه ،
-
مشعل دخل و توجه وهو ينسدح بتعب نايف و جوهره ركضوا له ، مشعل ابتسم بخفه

ملاذ ابتسمت وهي تناظر صقر واقف يلعب معاهم ويضحك توجهت عند الشباك وقفت وهي ترفع راسها للسماء وتناظر ،
رغم انه عجز عن الانجاب وهي عجزت عن الكلام لكن الاثنين عايشين مبسوطين هالدنيا ما يوقف على احد مهما كان معاناة الانسان هي عاجزه عن الكلام والنطق لكن مبسوطه ربي عوضها بـ احن زوج ممكن يحبها و يسعدها ويركض ورا رضاها ابتسمت بخفه وهي ترجع تطالع فيهم ، ياما ناس عايشين مثل حالتها عاجزين عن الكلام لكن عايشين و مبسوطين ،
" تمنيتوا نهاية ملاذ انها تتكلم لكن الواقع كثير زيها عاجزين عن الكلام ما يتكلمون لكن عايشين ومبسوطين "
-
نجلاء ضحكت ووقفت وهي تشوف مشعل واقف وماسك يد الجوهره و يدورها والدنيا مطر ، حطت يدها على بطنها حامل بشهر الثالث ابتسمت والتفتت وهي تشوف نايف يركض ،
وهمست : نايف بابا بشويش لا تطيح ،
نايف مشى عند مشعل : بابا دوري دوري ،
مشعل ضحك وترك الجوهره ونطق : تعال بابا يلا ،،
-
سلطان ناظر لعساف الي كان جالس يحل واجباته للمدرسة وتوجه لسيلين : تعالي نروح عند تيتا ،
سُلاف ابتسمت : قبل تروحون انتظروا عساف يخلص ،
سلطان : اذا خلص انتي جيبيه وتعالي معه ،
سُلاف عقدت حواجبها : ليه؟
سلطان : مدري والله امي تنتظرنا لا تتاخرين ،
سُلاف : تمام بس عساف يخلص اجيك ،
-
عيسى كان يركض في الغرفه و عمر واقف يعدل شماغه
وهديل ماسكه لارا ونطقت : عمر ارجع متاخر ؟
عمر التفت عليها : والله مدري ي عيوني ليه؟
هديل : اختي دلال جت من السفر وهي عند بابا خذني لها ،
عمر ابتسم : تمام تجهزي انتظرك انا ،
هديل فزت بفرح و ركضت تتجهز بسرعه وغيرت ملابس عيسى و لارا ولبست عبايتها وتوجهت نزلت مع عمر ،
عمر حرك سيارته متوجه لبيت اسماعيل ،
هديل ابتسمت وهمست : استودعتك الله ، نزلت ومسكت يد عيسى توجهت وهي تدق الباب ، ساره بنت سوميه كانت في الحوش تلعب مع خالد والشغاله ، الشغاله مشت فتحت الباب، هديل دخلت وصارخت : يناسووووو ،
ركضت وهي تضم خالد و ساره و تضحك ،
دلال سمعت صوتها و ركضت نزلت تحت ،
هديل ابتسمت شافتها ومشت تضمها بقوه ،
-
ابو سعود بهدوء : جيت اطالب بالسماح وانا اخوك غلطت في حقك بدون سبب وانت مالك ذنب ،
سعود كان ساكت و رفع نظره بهدوء لفهد ،
فهد : انا مسامح الكل وانا اخوك ما بقلبي لا حقد ولا حسد على احد حنا قاعدين نعيش اخر ايام حياتنا ما ندري متى ربي ياخذ امانته وانا اخوك وشو له الهواش والزعل والله مسامحك دنيا و اخوه ،
ابو سعود ابتسم وهو يقوم يحضنه ،
سعود ضحك بخفه : اعتذر ي عمي عن كل الي صار و..ما كمل كلامه الا وفهد حضنه : حصل خير

البنات تجمعوا سُلاف و امال عند ام صقر يسولفون ،
والعيال كلهم كانوا في الحوش عبدالرحمن وسلطان وعمر وصقر يلعبون كوره والاطفال يركضون و يلعبون معاهم ،
عمر بضحكه : لو ولدي هنا جلدكم والله ،
سلطان : اقول اسكت بس ولدي يجلده ،
عبدالرحمن : لو انه غيث يمشي كان جلدكم كلكم ،
صقر بضحكه : خل عنكم لو جبت سعد عطاكم صفر واحد ،
عساف : بابا ارمي الكوره ،
عبدالرحمن رمى عليه الكوره : هيا العب نشوف ي هطف ،
سلطان بضحكه : يلا ي عساف شد حيلك و اجلد ،
-
ام ياسر و ريما كانوا في المستشفى عند مريم لانها ولدت ،
مريم ابتسمت والتفتت وهي تشوف بنتها بيد ام ياسر ،
ونطقت : خالتي عطيني تالا ،
ام ياسر ابتسمت ومدت لها تالا واخذت جوالها اول ما رن وابتسمت : في المطار ؟؟ جاي!!!
ريما عقدت حواجبها والتفتت : وش صاير خالتي؟
ام ياسر ابتسمت : ياسر ولدي جايه ،
ريما : اوه اكيد تزوج كل هالسنين ،
ام ياسر تنهدت : للاسف لا هو حلف انه ما يتزوج ،
ريما سكتت بهدوء وهي لابسه عبايتها رفعت نظرها من دخل ناصر ونطق : السلام عليكم مشى وهو يشيل تالا و ابتسم وهو يبوسها ويناظر فيها بفرح و يضمها لصدره ،
-
اسماعيل كان جالس و شايل لارا ويسمع سوالفهم ومبتسم،
دلال : خالد هذا صديقه اسمه عيسى تعرف عليه ،
خالد كان ساكت يطالع بـ عيسى و مستحين من بعض ،
سوميه : عمير يتصل يقول انه في الطريق ،
هديل : خير خليه يروح عند عمر والله ودي اجلس معاكم ،
سوميه ضحكت وكلمته يروح لـ عمر ،
وعمير فعلًا اتصل على عمر و توجه له وقف سيارته وهو يشوف كلهم عند في الشارع عند الباب يلعبون كوره ضحك بخفه وتوجه اهم ونزل : السلام عليكم ، الكل قربوا يحضنونه ،
عمر : يا هلا بـ ابو ساره ،
عمير ابتسم بخفه : والله و صرنا كلنا ابو فلان وفلانه ،
-
امال ابتسمت وهي تغير ملابس غيث ومشت حطته على السرير وهي تجلس ع سرير اخذت الكتاب ابتسمت وهي تكمل تقرا الكتاب التفتت عليه ناظرت فيه كان ساكت و يلعب بيدينه ابتسمت وهي تطالع فيه ونطقت :لازم اخذك لخالتك تهتم فيك واجي اكمل اقرا ، غيث كان ساكت ويلعب ،
ابتسمت واخذت جوالها : ملاذ صاحيه؟
ملاذ كانت واقفه تغير لجوري والتفتت ع صوت جوالها وهي تشوف رسالة امال و ردت : اي فاضيه ليه وش صاير؟ اذا تبين تجين حياكِ تعالي ،
-
سُلاف : يلا سيلين ماما وش صاير ليه تناديني؟
سيلين مشت وهي تاشر على الباب تبي تطلع برا،
سُلاف شهقت : لا ي ماما ما يصير تطلعين برا في حرامي و في وحش ياكلونك ما يصير تعالي ننام،
-
ياسر وصل و ابتسم وهو يشوف ماجد كان ينتظره يستقبله مشى وهو يحضنه : يا هلا ي هلا،
امال ابتسمت وهي ماسكه غيث مشت نزلت عند ملاذ دقت الباب ملاذ فتحت الباب امال ابتسمت : خذي غيث بروح اكمل روايتي اقرا الكتاب يزعجني ،
ملاذ ابتسمت واخذته منها ، امال توجهت رجعت لبيتها ومشت وقفت عند الشباك وهي ماسكه الكتاب تقرا الروايه بعد دقايق خلصت اخر صفحه من الروايه و ابتسمت والتفتت وهي تشوف دخل عبدالرحمن ونطقت : خلصته !
عبدالرحمن توجه لها و ابتسم : ما بغينا ،
امال : عطني روايه غيره ايش افضل شي قريته؟
عبدالرحمن ابتسم ونطق : انا شاعرك العام والقصيد عيونك،
امال عقدت حواجبها وهي تناظر فيه : بقراه ،
عبدالرحمن : اي اقراي شوفي القلب وقمراها ،
امال ضحكت وعرفت هُم المقصودين : وش نهايته؟
عبدالرحمن ضحك بخفه : ماله نهايه.
امال : ليه ماله فصل اخير؟
عبدالرحمن ابتسم : اتركي الفصل الاخير من الرواية مو ضروري دايم نعيش النهاية دامنا للحين باقي ما انتهينا مانبي نتجاوز احساس البداية في حياتي جيش بس الرمح واحد ! وانتي اعظم من تقدم للرماية ما اصبتي الا الفؤاد اللي يحبك ، عيدي الرمية وأباعيد الغواية ، امال ابتسمت وهي تطالع فيه ،
ناظر فيها ونطق : مو قلتلك انا شاعرك ومجنونك ومن مثلي!
امال ابتسمت ونطقت : محد مثلك محد مثل قمراي ،
ابتسم ومد يده طلع الكليجا من جيبه : ناقص شاهي تسوين لي شاهي من يدينك؟
امال ابتسمت وهزت راسها بـ اي و توجهت للمطبخ تسوي الشاهي ، عبدالرحمن التفت ع صوت الباب ناظر مارلين جابت غيث كان يبكي ابتسم وهو ياخذه منها ويبوسها امال طلعت ومدت له الشاهي ، عبدالرحمن ناظر لـ غيث : تشرب؟ مد الكوب لفمه غيث فتح فمه وهو يشربه ،
امال بخوف : لا بسم الله على قلبه لا يصير له شي ،
عبدالرحمن بضحكه : ما بيصير له شيء اسد ولدي،
غيث ابتسم وهو يرجع يقرب فمه يبي يشرب ،
امال ضحكت وهي تاكل الكليجا وتناظر فيهم ،
عبدالرحمن حط غيث على حافة الشباك وهو يشرب الشاهي وناظر فيها : ياحلو الشاهي من يدينك يا كم تمنيت نتزوج ونشرب و..سكت والتفت لغيث الي يبكي يبغى الشاهي ضحك وهو يشربه امال ضحكت وهي تطالع ........انتهى ،
-
وانتهت روايتنا شكرًا على تفاعلكم وحُبكم و تشجيعكم شكرًا على هالمشاعر الطيب و وقفتكم و دعمكم و حُبكم للروايه ، اتمنى نالت اعجابكم وكل شخصيه اخذت حقه واغلب الشخصيات مو من ضمن الابطال لذلك سرعت احداث حياتهم ، وشكرًا لكم على كل شيء و احبكم يا اجمل مُلهميني 💜💜💜💜💜💜💜💜💜💜💜،