تحميل رواية انكسار لا يشفي بقلم سحر السحرتي pdf

: يعني هو اصل

:بتهتهي ليه ما تخلصي يا بنت

:معاذ بطل اسلوبك ده خليني اعرف اتكلم

:خلاص يا مهجه فؤادي اخلصي حلو كده

:مش عارفه ليه جالي احساس انك مش بتحبني

: وايه اللي وصل عقلك الذري لده

:اصل احنا مكتوب كتابنا وكل اللي بتعمله معايا حضن بس ما حاولتش في مره تتجرا يعني وتخطف بوسه اي حد بيحب واحده بيتمنى يعني انت فاهم خصوصا لو حلاله

*ضحك من قلبه

:عايز تتباس عباس

*ض-ربته في صدره ض-ربه خفيفه

:معاذ ارجوك انا بوصف لك احساسي ما تخلينيش اندم اني اتكلمت وصارحتك باللي جوايا

:مسك ايدي و باسها

:عارفه انا طول حياتي ما لمستش بنت مش من حقي المسها رغم شهرتي ورغم ان بنات كتير عرضت نفسها عليا بالحرف بس ما قدرتش اغ-ضب ربنا وارتكب الذنب ده ... و أظن ده اكبر سبب لكرم ربنا عليا وبصلي وبصوم تطوع كمان وقبل ما افطر كنت بدعي ربنا يجمعني بيكي بالرغم من انك كنت اتجوزتي ... كنت متيقن من استجابه ربنا ليا ولو استنيتك عمري كله .... اكيد هجتمع معاكي في الاخره

↚

:طب ودلوقتي مش بتقرب مني ليه

:خايف لو دقت حلاوه شفايفك مش هقدر اسيبك ومش عايز اعمل اللي يزعلك او يخلي والدك يحتقرني او يحس اني استسهلت الموضوع بما انك مطلقه فهمتي ... عايز نعمل الفرح واحسسك انك اول مره تتجوزي .. انت غاليه قوي عليا ... بس قوليلي للدرجه دي بتحبني

: لو اقول لك بتوحشني وانا معاك وبتمنى اللحظة اللي تجمعنا ببعض يمكن ما تصدقش

:طب ليه التفكير السيء اللي جالك ده

: الشي-طان قال لي انك مش بتقربلي وبتحضني كل فين وفين لانك مش بتحبني

:و هتجوزك طمعان فيك مثلا ... دارين عارفه يعني ايه انت الوحيده اللي تقفي جنبي وتبقي مؤمنه بموهبتي و تشجعيني حتى أهلي ما حدش كان مصدق ان ممكن احقق حلمي وابقى حاجه .... انت الوحيده اللي وجهتيني اروح اتعلم المقامات الموسيقيه وادرب صوتي وانه خامه كويسه غير المنتج اللي عرفتيني عليه من ورا اخوك ...و وقتها اتشهرت

: يااااه انت لسه فاكر دى انا نسيت

*مسك ايدي وباسها

:عمري ما نسيت ولا هنسى انت هديه ربنا ليا كفايه انك عرفتيني على الملجا اللي لقيتك فيه وكنت كل ما اتبرع لهم بحاجه ربنا يرزقني بحاجه اكبر

: انا بحبك قوي

:انا كمان يا قلب معاذ وبلاش تشكي في حبي مره ثانيه

*مرت الايام يوم الفرح كان في مكان مفتوح وبالنهار وكنت عروسه زي القمر ومعاذ مش مصدق اننا اتجوزنا

*شفت في الفرح اخر ناس كنت اتوقع اشوفهم

*كانت جومانا جايه مع مروان

*مسكت في معاذ كأني بتحامى فيه منهم و افتكرت الظ-لم اللي مريت به بسببهم

*مروان سلم علينا وعينيه كلها حزن ون-دم

:مبروك يا دارين واسف على اللي عملته زمان واتمنى لك السعاده من قلبي

: شكرا يا مروان وعقبالم

*كمل وقال

:ما افتكرش هقدر .... جومانا كانت عايزه تعتذر هي كمان .... استأذن مستنيك بره يا جومانا

*بعد ما مشي جومانا بصت لنا بح-قد

:انا فهمته اني عايزه اعتذر وده طبعا مش غرضي عشان كده وصلني ودخلني لاني ما كنتش هقدر ادخل من غير دعوه وطبعا انتم رتبتوها مع بعض صح بس يا دارين .... احب اعرفك معاذ ده بتاعي وهعرف ارجعه

*سكت وحسيت اني قدام واحده مريضه لكن معاذ رد بالنيابه عني

:مفكره اني فرده شراب ضايعه منك ولا مفكره اني هتجوز على مراتي زي جوزك ما اتجوز عليك من الق-رف اللي شايفه منك .... والله انا عذرته ده انا ارتبطت بيك كام شهر ما قدرتش هو متجوزك بقى له كام سنه يستحق تمثال على صموده .... وحاولي تفكري أن حرمانك من الخلفة عقاب ربنا على سواد قلبك

*واتكلم بجديه ونظره ح-اده عمري ما شفتها

: اي حركه ق-ذره من حركاتك تفكري تعمليها مع مراتي همسحك من على وش الارض انا مش مروان هسيبك عشان انت بنت عمه ... امشي اطلعي بره الفرح بدل ما انادي الحرس يرموك رميه الك-لاب

*مشيت وهي هتت-شل من كلامه وحضنته قوي

: ما كنتش اعرف انك جامد قوي كده

: ما تخافيش طول ما انا جنبك وبعدين دي شخصية يتخاف منها

*بعدها غني لي اغنيه كان محضرها لي اول مره الناس تسمعها وطلعت حلوه قوي

$مش كتير

اللي انت شايفه مش كتير

$عمري كله يهون وأشوف قلبك بخير

$ تبقى أول حد عندي

وتبقى بردو انت الأخير

$ مش كتير

$ من زمان

قبل اما اقابلك من زمان

$ و انت جوه في قلبي متشالك مكان

$مش ضروري احكي اللي شايله في قلبي

$ ما اللي في قلبي بان

$ لو هسيبلك روحي تفضل بين ايديك

$ امتي كان في الدنيا حاجه كتير عليك

$ لو في نجمه بعيده و انت عايزني اجيبهالك

هطير

$ مش كتير

$ لو هعيش أكتر من اللي أتعاش سنين

$ مش هقابل زي قلبك مرتين

$ يبقى لما الناس دي تبقى في كفه

وانت ف كفه غير

$مش كتير

*الاغنيه كانت حلوه قوي وهو إحساسه عالي جدا وهو بيغنيها عرفني انه ساعد في كتابه كلماتها وصف للكاتب شعوره وهو ترجمه لكلمات

*انا كمان كنت عامله مفاجاه وغنيت له

$اوعدني جنبي تعيش .. ولا ليله تنساني

وليك عليا اعيش وام-وت .. يا حبيبي وانا وياك

$اوعدني ما تسبنيش .. ولا حتى لثواني

ده عمري كله هيسوى ايه .. لو يوم مكنش معاك

$جنبك على طول خليني .. ماتغيبش في يوم عن عيني

ده انا لما بقول يا حبيبي .. قلبي بيرتاح

$جنبك على طول خليني .. على حلم بعيد وديني

هنفكر ليه في امبارح .. ما هو عدى وراح

$تعرف بحس بأيه .. طول ماانت ويايا

احلام حياتي بشوفها فيك .. حبك واخدني معاك

$قلبي بتسكن فيه .. يا حبيبى وكفانا

$تفضل في حضني .. واعيش معاك كل اللي بتمناه

*كنت حاسه فعلا أن احنا الاثنين مختلفين عن اي عشاق قبلنا

*الفرح خلص وبابا ودعني هو وماما واخواتي ... اللي كانوا فرحانين قوي ليا مش عشان اتجوزت مطرب مشهور لا عشان شافوا الحب في عينيه

*رحنا على الفيلا ومعاذ شالني بين ايديه

: اظن دلوقتي ما تقدريش تعترضي حقي ... وكل الناس عارفه هيحصل فيك ايه النهارده

*احمر وشي قوي من الكسوف

:لا يا حلوه مفيش كسوف بقى اللحظه دي مستنيها من زمان قوي لا يمكن اضيعها

*وصلنا غرفتنا و نزلني صلينا

*وبعدها مسك وشي بين ايديه زي ما يكون بيتأكد اني فعلا معاه

*باسني اول بوسة بينا رغم اني كنت متجوزة بس حسيت انها اول مرة ليا انا كمان

*بوسة معاذ كانت مختلفة بتعبر عن حبه وانا كمان بعبر عن حبي مش تقضية واجب زي ما كنت بعمل

*غص-ب عني قارنته بعادل لان معظم لمساته ليا كنت بحسها رغبة انما معاذ كانت كلها بتقول بحبك ... يمكن لاني كنت حلم عمره و حبني سنين شعرت معاه اني فعلا هديه استناها كثير

*كان بيتعامل معايا بخوف عليا وكأنها اول مرة ليا وفعلا حسيتها كده

*و غرقنا في العسل

*لو حد خيرني بين اني اعيش حياتي طبيعي أو أمر بكل الع-ذاب اللي شفته وتبقى مكافاتي في الاخر معاذ .... هختار أمر بالعذ-اب الف مرة واخرتها يكون معاذ مكافأتي وهدية عمري

وجدت دارين السعاده اخيرا ام سيحدث شئ يقلب الموازين

↚

*سافرنا نقضي شهر العسل وكنا قاعدين على البحر و حاطة راسي على صدره

: انا بقضي اجمل ايام حياتي يا معاذ

: عارف

:ايه ده م-دمر الرومانسيه وقاه-ر مشاعري

:بقول لك عارف عشان ده نفس اللي انا بعيشه بس انت شكلك بترسمي على نكد بدري

: هههههه هيبقى شكلنا ازاي واحنا بنتخانق

:يا حبيبتي بلاش الكلام ده عشان بيتحقق

*ولسه بنتكلم في بنات شافونا وعايزين يتصوروا معاه فبعدت واديتهم مساحه عشان يتصوروا براحتهم

*بعد ما مشيوا لقاني زعلانه

:في ايه يا بومه حياتي كنت عايزه تعرفي شكلنا ازاي واحنا متخانقين اهو شكلك بدا بصي في المرايه وانت هتشوفي نفسك ... زعلانه ليه

:كان ناقص تقعد على رجلك وهي بتتصور معاك

:وسكتي ليه فكرتك هتجبيها من شعرها

:يا سلام و اخلي شكلك وحش قدام معجباتك

:لا هيقولوا مراته وفي شهر العسل وبتغير عليه وبعدها كل معجبه هتخاف تقرب بالشكل ده

:يعني مش هتزعل لو عملت كده

:لا هفرح انك بتغيري عليا

*بعد الموقف ده بقيت ابعد المعجبات بذوق خ-وفا على زعله وهو بيفرح بيا

*الحب بينا كان بيكبر وحصل خلافات ومشاكل زي اي زوجين لكن كنا بنحلها بالعقل وكانت بتبقى بينا

*الغريبه ان مع كل مشكله واجهتنا ما كانش في نوبه بتجيلي وقلت قوي ... شعرت ان الحب سيطر عليها

*كنت دايما بسافر مع معاذ في حفلاته بس كنت ببقى بعيد عن الاضواء كنت بحب قربه مني اكتر من الشهره

*بعد سبع سنين معاذ راجع من سفريه طولت شويه ما قدرتش اكون معاه فراجع بسرعه يحضني لاني وحشته

*احمد مسك في رجله

:مش تعدي تسلم الأول على راجل البيت اللي انت سايبه يشيل المسؤوليه مكانك ولا ايه يا نجم

*حضنه وباسو

: اسف يا احمد باشا اصل امك وحشتني قوي

: معاذ ايه امك دي انا بحاول اسيطر على لسانه وانت بتيجي بخمس دقائق تضيع مجهودي كله

*ده احمد ابننا عنده خمس سنين معاذ اصر اسميه احمد عشان يعوضني ... غير ان الخلفه اتاجلت سنه من نفسها حسينا انه احسن عشان نقدر نتهنى ببعض

: معلش يا ستي اديني الست داليدا قبل ما تعيط هي كمان عشان حضنت احمد وسبتها و افضالك يا جميل

*وغمز لي

*ودي داليدا بنتنا سنتين كان عايز يسميها دارين فاخترت داليدا قريب منه خفت يشتمها واحس انه بيكلمني انا لان حبيبي لسانه طويل حبتين و بيحترمني قوي

:حمد لله على السلامه يا حبيبي طولت المره دي وحشتني قوي

:قلت لك تعالي معايا انت رفضتي

: حقك عليا خفت على داليدا لانها سخنت من التسنين بس اوعدك هكون معاك المره الجايه

:والقرود دي هيروحوا فين

: الفيلا اللي جنبنا ماما وبابا بيم-وتوا فيهم بس احمد كان شقي وزعل جدو

*رد احمد قبل ما باباه يزعل منه

:كنت بهزر معاه

:بتهزر تحط ملح في القهوه

:اطلعي منها انا صالحته

:شايف يا معاذ لغتك الحلوه

:حماده عيب كده

*وغمز له

:شفتك على فكره

:طب نيميهم بقى عشان نصحى بدري و اقعد معاهم

*وغمز لي

احمد : شفتك على فكره وهصحيك من الفجر

:انا تحت امر احمد باشا

*خليت الداده بتاعتهم طلعتهم يناموا وقعدت مع معاذ في غرفتنا ولسه هيقول لي كلام حلو لقيت احمد ناطط وسطنا في السرير

*معاذ مسكو من هدومه قدام رقبته

:واد انت مش في باب تخبط عليه

: فين ده ما شفتوش

:اللي فتحته ودخلت منه ولا دخلت من تحت عقب الباب

:ااااه نسيت

:عايز ايه يا واد انت

:عايز انام في حضنك يا ميزو

:يح-رق ميزو وسنين ميزو وهو انت حد مسلطك عليا النهارده .... انا عرفت حلك شوف نام النهارده على سريرك وبكره طول اليوم بتاعك انت

قلت ايه

*احمد حط ايده في وسطه ورفع حاجبه وهو بيتكلم

:كل مره بتقول كده وبتنام طول النهار تعبان من السهر مع مراتك فبقول انام و سطكم عشان اضمن تنام بدري عشان تقضي اليوم معانا كله مش نصه وتضحك علينا

↚

: انا كنت رزل زيك كده وعارف ان خلفتي هتبقى رزله بس ما توقعتش انها تكون الرزالة بالشكل ده

*بصلي وانا بضحك قوي عليه

:بتضحكي يا اختي

: تربيتك اشرب بقى وريني هتقنعه ازاي

:اقنعه واقنع ابوه

*لقيت صوته بقى رقيق وحنين

:حماده يا حبيبي نتفاوض نام على سريرك وهخليك تلعب بلاي ستيشن ساعه معايا ايه رايك

:واذا غلبتك تجيب لي العربيه اللي طلبتها

:اجيبها لكن اذا غلبتك انا ما اشوفش وش امك في الاوضه عندي خالص ... اتفقنا

: اتفقنا

*احمد قبل ما ينزل من على السرير همس لي

:سهريه قوي عشان ما يعرفش يلعب واكسابه ويجيب العربيه

:والمقابل يا معلم

: هسمع كلامك اسبوع

: اتفقنا

*مشي ومعاذ هي-موت ويعرف كان بيوشوشني بايه

:كان بيقول لك ايه ابن الك-لب ده

:كان بيوصيني اسهرك ما يعرفش انك مش محتاج توصية

*حضني وقرب شفايفه من شفايفي

: وانت ناويه تعملي ايه

:هعمل حاجات كثير قوي

:طب وريني حاجه واحده منهم

*طفيت النور وغبنا في عالم احلامنا

*ثاني يوم قضيناه مع الاولاد لعب و هزار و طبخت لهم بنفسي احمد بيسال معاذ

:هي ماما فين

:بتعمل لنا اكل حلو

:ربنا يستر هو انت اللي اقنعتها ان اكلها حلو مش كده

:حماده عيب هي بتعمله بحب وبتهتم بينا واجب نشكرها مش نتريق عليها وبلاش ازعل اني مصاحبك الا ماما زعلها من زعلي وبعدين اكلها حلو فعلا

*سمعتهم وكنت مبسوطه قوي من رد معاذ على احمد

*عمره ما حاول يخليه يحبه اكثر مني او يحسسه انه احسن مني دايما كان بيربيه يحترمني ويقدر مجهودي

*ثالث يوم سربت العيال عند ماما وادينا الشغالين اجازه وعشنا سوا احنا الاثنين وبس

*كنت مع معاذ بنعوم في حمام السباحه سوا وبنلعب وبنرش علي بعض ميه لقينا اللي بيتحدف علينا ويقول

: كوا بونجا

*شهقت من الص-دمه

: احمد ايه اللي جابك ودخلت منين

:من باب الجنينه المشترك بين الفيلتين سمعتكم بتلعبوا قلت نعمل فريقين

*مسكته من ودانه

:فريقين ازاي واحنا ثلاثه هو جدو يعرف انك هنا

:لا قلت لتيته وحاولت تمنعني ... وهنعمل فريقين اي حد. فيكم يجي معايا

*معاذ مسكو وبدا يغطسوا ويطلعه

:تعالى العب يا حبيبي معايا ده انت واحشني الساعتين اللي قعدتهم عند جدك

*احمد رفع ايده باستسلام

:خلاص يا ميزو راجع عند جدو انت هزارك تقيل قوي

:طب بلاش تعملها ثاني وتسمع كلام تيته واديك شفت النتيجه ... خليك راجل امبارح كان بتاعكم لكن النهارده حقي انا وماما ولو احتاجت حاجه اتصل عارف اني مش هتاخر .... لكن تعمل كده عيب

:حقك عليا يا بابا انا اسف

:قبلته لاني عارف اني مخلف راجل

*احمد رجع لماما غيرت له ولبسته وفهم انه فعلا غلط واعتذر ثاني لمعاذ و حضنه .... وفهمه ان من حقنا وقت لينا مع بعض و وقت ما يحتاجوا هيلاقيه ووعده ما يكررها مره ثاني

*قد ايه الحياه ممتعه لما ربنا يرزقك بشريك حياه يحبك و يفهمك ومعاذ كان نعمه كبيره عوضني و نساني الع-ذاب .... غير ان بابا فرح انه كان من نصيبي لما شافه بيحبني قوي وبيعمل كل حاجه تسعدني

*علاقتي مع بابا بقت احسن وبيحب الاولاد جدا و هما كل يوم عنده وخصوصا لما سلم اخواتي الشغل وقاعد في البيت لانه بقى مش قادر يشتغل

*مره كنا رايحين المول نتفسح مع الولاد معاذ نزل من السلم وهو لابس اللبس اللي دايما بيخبي بيه شكله عن المعجبين

*اتفاجئت من شكله هو واحمد لابسين زي بعض تيشرتات نص كم و شورت و شبشب بصباع الصراحه كان شكله شيك بس انا رافضة الشكل ده

: ايه ده يا معاذ انا ممكن افهم انت واحمد عاملين كده ليه

: ايه ما انا اصلي متخفي عشان الناس ما تعرفنيش

:وهو الشبشب ابو صباع ده هو اللي هيخلي الناس ما تعرفكش انا لا يمكن امشي معاك بالشكل ده

: يا حبيبتي كل الاجانب بيمشوا بيه ده شيك جدا وغالي انت مش بتشوفي السياح لابسينه ازاي

:وانت مفكر نفسك سايح

:عادي يا (دي) ما تكبريش الموضوع

*احمد رد عليا

: خلاص بقى يا ديدي فكيها بقى وما تعقديهاش

:معاذ اخر مره تقعد مع احمد انا تعبت كل شويه عماله بصلح له اللغه كده مش هينفع

:حبيبتي انت واضح ان انت بتح-قدي على علاقتي بالولد سيبينا احنا شباب مع بعضينا بنعرف نتفاهم

:هو انت شايف ان التربيه نوع من انواع الحق-د

:دارين حبيبتي ما تكبريش الموضوع وعديها

*استسلمت في النهايه وافقت ان هم يروحوا المول بالشكل ده

*واحنا ماشيين سمعت واحد بينده على احمد ابني ببص لقيته عادل بينده على ابنه هو كمان سمى ابنه احمد

*سلم عليا وشفت في عينه ان حبه ليا لسه ما قلش

*عرفني على مراته جارته كانت بتحبه من زمان وحالته الماديه اتحسنت .... وبقى شريك فعلي في مركز صيانه

*استاذن من معاذ عشان يتكلم معايا على جنب

*شكرني لما كنت قلت له انه يقدر يكمل تعليمه وفعلا كمل في معهد هندسي وبقى خريج هندسه ومسماه مهندس فعليا

:انا اسف يا دارين عن اللي حصل مني زمان و ارجوك تسامحيني

:سامحتك يا عادل لان انا كمان غلطت في حقك انا ما حبتكش انا كنت بحاول انسى مروان بيك .... انا كمان ظلمتك و ارجوك تسامحني يمكن لو كنت حبيتك كنا كملنا مع بعض بظروفك دي لو ما كنتش وافقت على الخطه اللي طلبها منك علي

*مشي وكان مبسوط ان انا سامحته

*الحق أن عادل فعلا الفترة اللي بعدنا فيها عن والدته كان مثال للزوج الممتاز كان بيحبني ويساعدني وبيهتم بيا ظروفه بس اللي كانت غير مناسبة لكن لو حبيته كنت كملت معاه احنا الاثنين غلطان في حق بعض

*بعد ما مشي معاذ حط ايده على كتفي وحضني

:ما تفكريش في الماضي انا جنبك يا حبيبتي

*بكيت في حضنه

:بقالي كتير ما زرتش احمد ابني

:تعالي نروح بكره انا عندي اجازه كبيره بعد السفر الطويل .... عايز اشبع منك انت و الولاد

: انت بتعمل كده ازاي

:جايز عشان بحبك وبعد ما صبرت ودعيت ربنا كافئني بيكي ... تعالي بقى نفسح الولاد عشان هاخدك و نسافر يومين لوحدنا

احمد: سمعتك ومفيش سفر من غيري

:لا يا حماده عندي شغل

: احنا بنسافر معاك دايما في الاجازه لما بيكون عندك شغل واحنا اجازه الا اذا

:الا اذا ايه يا احمد باشا

:جبت لي العربيه اللي انا كنت عايزها

:انت مش خسرت في اللعب معايا

:ده اتفاق جديد عشان اقعد عاقل عند جدو و اوافق تسافر لوحدك مع ماما وكمان هخلي بالي من اختي شفت انا راجل معاك ازاي

*بص لي وهو مت-غاظ منه

: دي بوادر راجل اعمال بيجري صفقات

: هههههه نتيجه قعدته مع بابا كثير

:موافق يا حماده بس هطول ولو عرفت انك عملت شقاوه او زعلت جدو هسترجعها اتفقنا

:بس العربيه يا دوب تقعدك اسبوع في السفر هتطول تجيب حاجه تانيه معاك وانت جاي

*شالوا من هدومه

: انت ياض جاي تقلبني ده انا ابوك فوق

*احمد مسك وشه و باسه وغير الاستراتيجيه

:انت حبيبي يا ميزو يا احلى اب لو ما طلبتش منك هطلب من مين يعني

:لا ثبتني يا واد عيوني ليك

*مسكتهم و حضنتهم بحب كبير ودعيت ربنا يحفظهم ليا

*شعرت ان ربنا سامحني بعد غلطه عمري اللي اذيت بيها نفسي اكتر من اي حد

*بعد مرور سنتين وقفت في البلكونه مع معاذ

:ممكن نتكلم شويه

:الاولاد فين

:وديتهم عند ماما

: خير يا دارين في ايه

↚

*مديت ايدي وبدي له النسكافيه كنت عامله لينا كوبايتين

: حبيتها يا معاذ

*اتوتر وقال لي

:هي مين

:مديره اعمالك اللي انا ما كنتش موافقه من الاول انها تشتغل معاك .... ما تخبيش عليا انا حاسة بكل حاجه

*حاول يتهرب من الاجابه بس انا ما ادتلوش فرصه

:انا عارفه انه حقك بعد ما بقت النوبة بتجيلي كثير والدواء ما بقاش يأثر فيا .... و كام مرة اكسفك قدام الناس وخصوصا المعجبين لما جاتلي فجأة قدامهم

: انت بتقولي ايه

: معاذ خليني اكمل .... حقك انك تتجوز واحده صغيره ولسة آنسة ... انا قعدت فتره افكر امتى هتيجي اللحظة دي

:دارين انت فاهمه الموضوع غلط

:معاذ اللي بنا مش شويه احنا فاهمين بعض كويس قوي

*حاول كثير انه يهرب مني بس انا كملت

:رد عليا حبيتها

:للاسف يا دارين مش عارف ازاى ده حصل

: ما تلومش نفسك انت استخدمت حقك كراجل و اتجوزت

*اتص-دم اكثر اني عرفت

:مين قالك

:احساسي ... انا بحبك و احساسي وانا معاك قال إن في واحده تانيه في حياتك ... و انت بتخاف ربنا عمرك ما هتعمل حاجه حرام

:بس انا اتجوزتها عرفي عشان ما تعرفيش

:مش انت اللي تعمل كده هي حقها تتجوز رسمي قدام الناس وتبقى واجهة مشرفة لك فأرجوك ننفصل بهدوء ونرجع اصدقاء ... غير ان في بينا احلى حاجه في حياتنا ... الحاجة اللى عمرنا ما هتفرقنا عن بعض

: دارين انا

:ما تكملش انا بحبك واتمنى لك السعاده حتى لو مع غيري بس اعذرني مش هقدر اعيش في الوضع ده انا حبيت نتفاهم عشان الولاد يعيشوا في جو صحي حتى لو منفصلين

:مش هقدر اسيبك وابعد عنك

:انا خلاص لميت هدومي و هدوم الولاد و بعتهم على الفيلا عند ماما و لبست و هحصلهم

*مسك ايدي وحضني جامد

: لا يا دارين مش هقدر

*بكيت في حضنه

:لا انت قدرت و هعتبر ده حضن الوداع كان نفسي فيه لأن بقالك فترة طويلة مش بتقربلي ودائما بشوف في عنيك نظرة المشمئز من مرضى .... بابا الله يرحمه كان عنده حق مفيش حد هيستحمل مرضي الا إذا كان بيحبني قوي ... وانت بطلت تحبني

*بابا كان م-ات من كام شهر قبل ما يموت حس ان معاذ متغير من ناحيتي و حذرني و فهمني اعمل ايه لو ده حصل وازاي اتعايش مع الوضع و اتعامل معاه عشان مصلحة الولاد

:دارين انا بحبك

:كنت يا معاذ الحب حتى اختفى من نظره عنيك اشوفك دايما بخير بس لو هتعمل فرح بلاش تعزمني مش هقدر احضر

*رجعت بيت بابا ورميت نفسي في حضن ماما اللي كانت نفسيتها مدمرة من يوم م-وت بابا لانها بتحبه قوي ... حتى اخواتي ما صدقوا استلموا الورث وكل واحد نقل شغله بارة مصر ما بقاش في حد جنبها غيري به-مومي و مشاكلي

*بعد اسبوع كان معاذ متجوز وسافر يقضي شهر العسل

*بعد زواجه باسبوعين وكان لسة مسافر ماما م-اتت ما قدرتش تستحمل فراق بابا وبقيت لوحدي ... طبيعي نفسيتي تعبت قوي الولاد وجودهم ما خففش عني طلاقي و جوزا معاذ وم-وت ماما

*معاذ رجع بعد ما خلص اجازه شهر العسل رغم أنه عرف وهو مسافر

*طلب يجي يعزيني رفضت لان لو كان ليا معزة ولو صغيره عنده كان قطع إجازته ووقف جمبي حتى بحكم اني ام أولاده بلاش بحكم اني كنت مراته

*بعت له الولاد عشان يشوفهم و يقعدوا معاه فضلت العلاقة بينا تليفونات بسبب الاولاد

*وفي يوم خرجت معاهم وكنت بسوق العربيه جتلي النوبة وعملت حا-دثة الحمد لله ربنا ستر وكلنا كنا بخير

*بس معاذ جالي وهو متع-صب جامد ومسك الولاد و اخدهم

:رايح بيهم على فين

:هيقعدوا معايا انت خلاص ما بقاش ينفع يقعدوا معاك

:لا ما تقدرش هما في حضانتي دلوقتي

: ارفعي قضية و هثبت انك غير أمينة عليهم لما تسوقي العربيه وانت ممنوعه من السواقة و معاك الولاد مش هستنى لما تم-وتيهم

:انا ام-وت ولادي

: اه يا دارين بقيتي مس-تهترة

:معاذ سيب الولاد ما تعملش فيا كده انا ام-وت من غيرهم

: لو سبتهم هفقدهم وقت ما تحبي تشوفيهم تعالى البيت مفتوح

:كمان مش هتجيبهم هنا

:لا عشان يبقوا تحت عيني احسن تاذي-هم بج-نانك انت خلاص فقدتي عقلك

: ما تقوليش كده انت اتغيرت قوي مش انت معاذ اللي كنت اعرفه

:من عمايلك انت السبب

*مشي و سابني وسط دموعي واخد الولاد

*ص-رخت بصوت عالي ولادي يا معاذ لاااااا رجعهملي

*صحي معاذ من الخ-ضة

:حرام عليك قطعتي خلفي مش عايز الحمل اللي كل يوم والثاني يصحيك مرة تص-رخي ومرة تعيطي ومرة ترفس-يني .... ما الاثنين اللي قبله كانوا ولاد حلال

*قمت من النوم مفز-وعة

:انت هنا جمبي بجد

:ايوه يا حبيبتي هت-نيل اروح فين من كوابي-سك

*رديت وانا بنهج

:معلش يا حبيبي حلم وح-ش قوي

:ما قلت لك انام في غرفه تانيه

*زع-قت فيه

:يعني مش قادر تستحملني وانا قربت اولد امال هتستحملني امتى ... انت ما بقتش تحبني

:يخربيت ج-نانك هو انا موقف شغلي وقاعد مستنيك تبيضي قصدي تولدي كل ده ومش بحبك اته-دي ونامي

*عيطت :كدة يا معاذ

:يا قلبي بهزر معاك عشان افكك ... طب حلمتي بايه

:انك اتجوزت عليا و اخدت الولاد مني

:النص الأول يارب انما النص الثاني اخد مين يا امي دي عيال حد يفكر ياخدها .... انا راضي ذمتك دي داليدا بقت أشقى من احمد و بسيطر عليها بالعافيه دي ضيعت هيبتي خالص دى ولية مش طفله

*ضحكت :ما تقوليش كده عليها احسن ازعل منك

:طب تعالي في حضني بالبطيخة دي وانت هتنامي في ثانيه ... انا اقدر ابعد عن حب عمري

:بجد يا معاذ

:بجد يا روح معاذ ... بس قوليلي الثانية اللي اتجوزتها كانت حلوة

*ض-ربته بوكس في بطنه رد وهو بيت-الم

: تبقى شبه القرد هو انا ممكن اسيب القمر ده و اتجوز قرد نامي ربنا يهديك .... تفتكري الحمل ده مختلف عشان عديتي ال ٣٠

*برق-ت له : نعم سمعني كده ثاني بتقول ايه

:ابدا يا اماااا ... (دي) كنت عايز اطلب منك طلب

:خير يا حبيبي

: ينفع اجيب سرير ثاني انام عليه رف-سة امبارح لسة جمبي بيوجعني منها

:مستعجل على ايه كلها كام يوم واولد وتنام لوحدك

:بجد الحمد لله

*بصيت له بغض-ب

:معاذ

:امرك يا حبيبتي

: ربنا ما يحرمني منك

:وقعتي قلبي تعالي بقى اشبع منك قبل ما تولدي عشان هتوحشيني

:بجد لسه بتحبني زي الاول

:واكثر

:امال في الحلم بطلت ليه

:انا مالي بهرموناتك المتقلبة لو اعرف كده كنت قلت لك بلاش حمل .... تعالي بقى نخاوي اللي جوة

*ضحكت و غبت معاه في عالم احلامنا

*و اطمنت بعد الكابوس المزعج ودعيت ربنا ما اتحرمش من وجوده جمبي

تمت

*اتمنى تعجبكم واعرف رايكم

*توضيح بالنسبة للكابوس فأحيانا عند مرور الإنسان ببعض الأزمات وتغمره السعاده بعدها فهو يتخوف من هروبها وتساوره الكوابيس