رواية انقذني ايها الغريب........ الفصل السادس والعشرون 26 - بقلم Hunen23Hatum

#حنين_حاتم
#انقذني_ايها_الغريب.....#بارت25
(#غير_محلل_نشر_القصة_بدون_ذكر_اسمي)
فتحت الباب وياريتني مافتحتهة ياريت الله اخذ عمري من زمااان
وياريتني باقية يم فاطمة وضيمهة ولا جايبة لنفسي كل هاذ

اباوع تقى نايمة علجرباية وسيف نايم بحضنهة وخال راسة علة صدرهة وثنينهم نازعين ملابسهم كووولهة حتة الداخلية
حتة مامتغطين لابجرجف ولا بطاانية
تقى كاعدة عرفتهة لان ترمش
اريد اسند طولي ماكدرت درت وجهي ونزلت بس احس نفسي فقدت توازني اروح يمنة ويسرة شلون لسكران كوة كملت لدرج ووصلت للكوشة دموع ماكو بس بداخلي وجع بس الله العالم بي
احس نبضات كلبي يوجعني واذاناتي بيهن صوت

طوووووط كلشي مااسمع
لا مسيقا لا صوت لناس بس اباوع بعيوني

هوة هاذ لحبيتة هوة هاذ لكلت راح يكونلي سند وامان بهلدنية
هوة هاذ الي كلت عنة فرصتي الوحيدة للنجاة
ااااخ يانار كلبي
روحي لايبة لا دموعي ينزلن حتة ارتاح ولابية احجي واكول
شكللهم بليلة عرسي خاني
نايم بحضن حبيبتة لقديمة ومرتة كاعدة جوة  ماتدري لدنية طشت لو رشت
ياشماتت لبنى وميس بية
ياشماتت اخوات فاطمة بية
يافرحة فاطمة لو وصللهة لخبر
بلعت لغصة وسكتت بس لعبرة خانكتني اريد احجي اريد اكللهم هاذ لوثقت بي وامنتة علة روحي نايم فوك يم تقى
الله اكبر علة راسك سيف جان تانيت الناس تروح جان اخذتهة بغير مكان
اباوع علناس تركص ومتونسة اريد اكللهم عليمن تركصون علة ياعزة علة ياصخام لعريس نايم بحضن حبيبتة فوك
بعد منو مااذاني وترك بداخلي جرح ماينسي
اوووف يربي ضيم فاطمة سنين تحملتة واكول لجاي احسن والعوض بلله
اتاري لجاي اسوء واسوء بمرات
كلما اكول خلص هانت وراح ارتاح تطلعلي سالفة جديدة هوة اني لفرحة محرمة علية من يوم يومي
اباوع علة عمار ماعاف سكينة دقيقة وبس يبوس بيهة

هوة هاذ الي جنت اكول عنة موراحة هوة هاذ الي اكول عنة مومثل سيف اوووف يلمضاهر شكد خداعة
اااخ سيف يروح فدوة لنعالة شلون يباوع علة سكينة وكلسا يشيلهة ويفتر بيهة
اباوع عليهم فرحانين واني امثل الضحكة وسيف لشفية ولا بين
خالتي اجتني تكلي ضحكي ليش مغندبة
اي خالة صار
سيف وينة لعد
هسة يجي
تدرين هاذ الولد خطب مريم مني
يا صدك علخير
اي بس مانطيتهم رد اكل لأبوهة بلأول
الله كريم
خالتي تحجي وياي واني اصلا مويمهة بالي مليون فكرة بي ميت سؤال واريدلهن اجابة بهاي الحضة لان راح انفجر
اذا بعدة يحبهة ليش ختارني
طبعا يختارني لان ليلى ماعدهة ضهر ولاسند يخونهة يجرحهة يضربهة منو يطلع وراهة ومنو يكلة ليش
ليلى شريفة وفتحت عينهة علي ليلى ماعرفت ولد قبلة تربيلة جهالة وهوة يروح لتقى وغيرهة اني استاهل اني مطية شلون سامحتة جان لازم اعوفة من شفت الصور
هسة يجي يكلي اسف وينتهي كلشي يعني بنضرة ليلى لفطيرة شتريد تسوي تسامحة وتستمر ويا لأن باجر عرسهة ولان هية موبنية وبحاجتة ولأن عيب من لناس متكدر تسوي شي
لا بعد مااستحي ولا اشيل هم واحد طووز بلكل عشت عمري كلة مااذيت بشر بس كلهة اذتني بعد مابية اصبر ولا بية اتحمل وجع
كلبي شيب كافي الشفتة عد فاطمة وماعندي استعداد ابدي بقصة عذاب جديدة هوة عمر واحد ومستحيل اكملة وية سيف لخاين وبعد مااسامح وكلبي لطيب اريد ادفنة واعيش بدون كلب

دقايق وشفت تقى طلعت من ورة لعالم علسريع هية وامهة
طبعا تروح هاذهو خلصت مهمتهة ورتاحت بعد شمتانية واني المطية الي خليتهة تبقة واكول يجوز الله هداهة
اذا لشيطان ينهدي تقى ماتنهدي
يوووو حريمة ماصورتهم هسة ينكر لنذل
لا لا اني اصلا ماريدة يبررلي ولا ريد اشوف وجهة بعد
خلصت لحفلة وسيف الشفية ولا بين وامة وخالتي كلسا يسألني اكللهن مادري بي
تانيت لعالم راحو كلهم وبقو بس لكرايب طبيت جوة بغرفة الحجية كاعدة والوب عقلي راد ينفجر يمكن بيني وبين الخبال شعرة
ساعة اكول اواجهة
ساعة اكول لا اكيد راح ينكر وحتة دليل ماعندي منو راح يصدكني
ساعة اكول اخذ خالتي ومريم واروح واخلي يطلكني بس شكل للناس ليش طلبت لطلاك اكيد كلهة تطلع لصوج بية وين اكو وحدة تطلك وهية بعدهة مامتزوجة
راسي راد ينفجر
طلعت من لغرفة ماكو احد بس اخت ام سيف وجنتهة صحت علة سكينة اخذت منهة ثوب لبستة ولميت شعري وغسلت وجهي ورحت يمهن بلأستقبال
ندكت باب لشارع طلعت ام سيف طبت ووياهة
😱😱😱😱😱😱😱
كلهن طلعن بلصالة بقن بس خالتي وام سيف يمي
وكفت لدنية بية
رجعت البيتنة
للخوف الي جنة نعيشة اني وامي لمن يطلع علينة الفجر ومايمنة رجال
لحديقتنة الي يكعد بيهة للصبح يغني ويفضحنة كدام لجوارين ولو حاجتة امي يلزمهة ميخلي بيهة شي سالم وبعدين يطلعهة بلشارع بدون حجاب ولا نعال
بعدين يرجع علية يشيلني ويشمرني عليهة لو تلكفني لو ماتلحك واوكع بلكاع مثل لحيوان وهوة يطب يكمل لسهرة لصباحية مالتة
ابوي لسكير
الي عشت عمري كلة اتعير بي
ابوي الي عافني تنهش بية فاطمة وجلابهة
ابوي الي مامرة كلف روحة وفكر يسال علة بتة يشوفهة عايشة ميتة
اكثر انسان اكرهة بحياتي كلهة
اكثر انسان من ادعي علي لدعاء يطلع من كل كلبي ومااتندم لحضة لان ادعي علي
هوة مو ابوي هوة بصمة عار عشت عمري كلة مطموغة بكصتي
شكلة متغير كلش لوما الوحمة الي بخدة ماجان عرفتة
باباتي ليلى شلونج بنيني
كمت اضحك بصوت عالي
ههههههههههاي
وينهة بتك
افتر بلأستقبال واكللهم وينهة بتة
هسة تذكرت عندك بنية
والله يا بابا الدنية شغلتني
لاتكوول بابا
صرخت علي حيييل كلهم ضلو صافنين
الدنية شغلتك عن لحمك
عن دمك
لاتكول الدنية كول الك......ب
كول الشرب الملاهي
ليش جاي فهمني شنو الي تريدة
ضل ساكت
جنت بأمس لحاجة الك وردت تشمرني كدام ملجئ وتخلص مني نسيت لو اذكررررك
ولك حتاجيتك بكد مااحتاج للمي
سهرت ليلي ابجي بلمطبخ من لضلمة وصوت الجريدية
مامرة وجعك كلبك علية مامرة تذكرتني وكلت هاي لمسكينة الي اسمهة بتي وين صفة بيهة لدهر
سامحيني بنيتتي والله لدنية اخذتني بغرورهة
اسامحك ههههه عن ياهية بيهن اسامحك كلي
عن يادمعة
عن ياحصرة جريتهة
عن ياوجع
عن ياضربة
هاك شوف شوف
شفت اثار لضرب ولجوي بلسجينة لو اطلعلك بعد
تدري لو اشوفك تحترك بنار كدام عيني مااطفيك
لو موتطلب لسماح مني هسة
لو تطلبة وانتة علة فراش لموت ماراح اسامحك انتة الوحيد الي مستحيل بيوم  يرف كلبي عليك واسامحك
وحقي اخذة منك هناك يم رب رحيم مايضيع حق مضلوم ذيج الساعة كل لرب لعالمين اخذتني لدنية
روح لا محولل ولا موهوب ولا مبري الذمة وماسامحك اليوم الدين
وانتة جنت وراح تبقة ميت بلنسبة الي
يباوع علية متفاجأ

عفتة وطلعت رحت لغرفة سكينة احس نار تطلع من جسمي ابد ماتخيلت راح يجي يوم وانجمع بي
لحكتني ام سيف هية وخالتي
عفية بيج بنيتي زين سويتي تدرين كام يبجي وطلع
اي خلي يبجي انشاء يبجي دم مودموع كل الصارلي من ورا الله خصيمة ربي يوم لقيامة مااسامحة ولا انسة سواياتة بية وبامي
ولا انسة بيوم من لأيام راد يذبني بلشارع بدون مايرفلة جفن
حضنتني خالتي وخلت راسي علة رجليهة هدئت شوية ونفسي صار طبيعي
طلعت خالتي ضليت بلغرفة وحدي
شوية واجت مريم كلتلي ام سيف تكول خل تجي هنا يمنة
كعدت يمهم بلأستقبال بس بالي كلش مويمهم
ام سيف: لعد وينة سيف بنهاية لحلفلة وين اختفة
محد يدري بي واني سكتت ماكلت شي
صعدت فوك تشوفة ونزلت تكول
لكيتة نايم خطية
اخت ام سيف :لعد ماكعدتي خل نشوفة نباركلة بلحفلة ولا شفنا
كعدتة والله يكلي نعساان حييل وتعبان خطية تعب من لركض صارلة سبوع يركض لتحضيرات لعرس كلة براسة وعمار متكتر تدرون بي معتمد علة سيف بكلشي
اوووف اليدري يدري
طبعا تعبان تقى هدت حيلة اكيد
عمار راح جاب عشة جاهز واجة كلهة تعبانة محد بي يطبخ
صبتة سكينة وجابتة كلهة لتمت علسفرة واني كتلهم اريد انام تعبانة
ام سيف لحت رادت كلتلهة مااكدر
كلتلي لعد صعدي صيحي سيف خل يجي ياكل
خالة والله رجلية يوجعني من لكعب مابية اصعد
يلله خلي من يكعد نحطلكم سوة واكلو
كلتلهة ماشي ولعبرة خانكتني كوة صبرت علة روحي
ستأذنت من سكينة وطبيت لغرفتهة انام
تمددت علجرباية بس مانمت وهية المثل حالي تكدر تنام
لل10 طبت يمي سكينة
طفت لضوة تريد تنام تعبانة من لركص
كتلهة لعد اني راح اصعد اشوف سيف
طلعت علكيفي اتخنس محد ماكو كلمن بغرفتة ولخطار راحو ورة لعشة
وعمار نايم بلصالة ولبيت اضلم طلعت بلحديقة كعدت احاجي ربي
يربي الي راح اسوي صح لو لا اريدك ترشدني للطريق الصحيح
ضاكت بية ارضك الوسيعة وبعد مالي احد
ياربي هواي تحملت ضيم وبعد ماعندي لاصبر ولاطاقة ولابية حيل للقهر عبالي الكة راحتي يم سيف طلع اتعس منهم 
طول عمري صابرة وحاطة عيني بعينك وكل لصار وياي ومافد يوم  يأست من رحمتك لو وحدة بمكاني جان من زمان نهزمت ولتجأت للطريق الموزين
بس اني خايفتك ومافد يوم عصيتك
هيج جزاة الي يصبر ويطيعك ياربي لان يتيمة وماعندي ضهر هيج يسوون بية
كلهة تنهش بلحمي لغريب ولقريب
ضليت احجي وية رب لعالمين وابجي لحد ماصارت ب11 طبيت جوة سبحت وطلعت تفحصت لبيت و تأكدت لكل نايم صعدت لغرفة سيف فتحتهة بااردة وهوة متغطي بجرجف ونايم وومطفي لضويات
باوعت علي بكد ماجنت اشوفة ملاك بكد ماكمت اشوفة شيطان
فتحت لكنتور علة كيف طلعتلي ثوبين وملابس داخلية وحذاء وجبة صاية وشال وعندي مليون و300 زادن من لنيشان مالتي حطيتهن بلجنطة وطلعت لتراجيي ولمحبس لجابتهن الي خالتي هم خليتهن بلجنطة  
نزعت الحلقة مال سيف خليتهة علة ميز المراية
فتحت لمجر طلعت قلم حمرة لزمتة كتبت علمراية
شكد نضلمت بحياتي وتأذيت بس محد ضلمني واذاني بكدك
وجرحك الوحيد الي يصعب علية اتناسا واكمل حياتي
رجعت لقلم وسديت الجرارة
ندارت اريد اطلع سيف كعد علة حيلة وفتح عيونة باوعتلة شكد كارهتة
عاينلي ماحجة ولا كلمة ندار علصفحة لثانية ونام شكد كرهتة بهاي الحضة وشكد كرهت روحي لأن حبيتة
مشيت نضربت بشي برجلي
دنكت😳 .....يتبع
#حنين_حاتم
البارت الثاني كامل والله
اشوف تفاعل حلو انزلة الكم ماكو تفاعل ماانزلة منا ل11 يلله
وبطريقكم اقرو قصتي لثانية (هسة حبنة ذكريات) كلش حلوة موجودة بصفحتي هاي يلله اتاني تصويتاتكم عليهة 😙