انقذني ايها الغريب........ الفصل الثاني وثلاثون 32 - بقلم Hunenhatum

#حنين_حاتم
#انقذني_ايها_الغريب....#بارت29والأخير
(#غير_محلل_نشر_القصة_بدون_ذكر_اسمي)
نزلنة من لسيارة وهوة مشة كدامي واني ورا طببنة لمستشفى
كلسا اريد اسألة هاي ليش اجينا هنا واكول لا هسة يبين

اخذتهة للمستشفى الي ترقد بيهة سكينة اوووف
سكينة الي كتشفنة بيهة مرض سرطان الرحم بعد ماجابت مهدي بسنة
حفيد العائلة الوحيد الي ملة علينة البيت وخلة امي ترجع شباب و24 ساعة اتلعب وتبدل وتغسل
سكينة من ختفت ليلى بجت عليهة بجي ماصاير ورفضت تسوي عرس وزفة ولحد لان تكعد تفرفح عليهة وتلوم بروحهة لان جانت تأذيهة ودائما من اروح للمستشفى تكلي ليلى ترجع وترجعون مثل ماجنتو وتتذكر هاذ حجيي
هية الوحيدة الي جانت تنطيني دفعة امل بس البيت كلة ممردود عليهة وابنهة حييل متبهذل مابين البيت والمستشفى وعمار مكابلهة ويبجي بلذات بأخر فترة لان حالتهة حييل نتكست الدكاترة كالو متطول اكثر من سنة بس هية قوية ومتمسكة بلحياة صارلهة سنتين و5 اشهر بس حييل تغيرت ولمرض اخذ من حيلهة كلش
جبت ليلى لهنا لان متأكد اذا شافت سكينة بهاذ وضعهة مستحيل تعوفهة واعرف كلب ليلى طيب ورحوم
وادري بسكينة لوشافتهة ماراح تخليهة تروح راح اكدر احصل علة وقت كافي اكدر اقنعهة بي وارجعهة

صعدنة 3 طوابق المستشفى كلش حلوة بس هواي شفت مرضى صلعان كبار وزغار يتمشون بلحديقة وحتة حواجب مابيهم لهاذ تبادر لذهني هاذي مستشفى لامراض لسرطان
بس ليش سيف جابني هنا معقولة هوة بي سرطان
اسم الله
اني شدا خربط سيف مثل الورد مابي شي
وكفنة يم غرفة دك لباب فتحتهة النة
فاطمة 😱
طببني سيف يجر بية من بعد ماضليت جامدة بمكاني من لصدمة
شكلهة حيييل متغير صايرة عجوز عبالك عفتهة 20 سنة مو 4 سنين وهية هم ضلت صافنة بوجهي وفاتحة عيونهة متفاجئة بية
من طبينة اكو وحدة نايمة علة سرير وبحضنهة طفل بس دايرة وجهة علحايط ولابسة كبوس رغم الجو موبارد
سيف ندار علة فاطمة الي اكلتني اكل بنضراتهة كللهة ممكن تتفضلين برة دقايق
طلعت برة بدون ماتحجي كلمة
وكف يم لسرير ندس البنية كعدهة ندارت علية جان تطلع 😱
سكينة بس موسكينة هيكل عضمي ووجهة شعراية وحدة مابي ومن شافتني كعدت علة حيلهة فلتت لكبوس من راسهة هنا اني نتهيت من شفتهة
رأسن كعدت علة حيلي بلكاع
تذكرت من جنت ادعي علة فاطمة واكل لرب لعالمين اريدك تفجعهة بعزيز كلبهة
لاياربي ليش ستجابيت لدعائي سكينة مالهة ذنب ضليت اضرب علة وجهي ملخت روحي كلة من وراي كلة مني اني لسبب
نزلت من لجرباية وحضنتني
ولج ليلى وين رحتي كلبي مثل لنار عليج والله مامر علية يوم اذا ماذكرتج
ليش هيج سويتي بينة ليش
اني املخ بروحي واصرخ وهية تجر بدية تبوس بيهن وتبوسني من راسي وتكلي ليلى سامحيني والله امي هية لسبب جانت تكلي اذا متعاملين ليلى معاملة سيئة اكطع عنج لمصروف وجانت توز بية عليج وتكلي ضربيهة
زرعت لحقد بداخلي بس الله شاهد اني عمري ماكرهتج وجنت اشوف بعيونج الخوف علية عبالك اختج
هية تحجي واني رجعت بية لذكريات لاول يوم اجيت بي لبيتهم لمن كعدت بصفي ونطتني لعابتهة ولعبتني وياهة سكينة فعلا ماجانت تأذيني اول مااجيتهم بس وليد من اول يوم شافني بلفاتحة وجنة ناكل بلصينية ضربني وكلي كومي وفاطمة هم من اول يوم اذتني ومارحمت بحالي ولا رف كلبهة علية
بس سكينة ضلت اكثر من 3 سنوات تحاول تتقربلي وتلعب وياي وامهة جانت تموتهة كتل وتكللهة لتقربين يمهة
ياربي ردتك تعاقب فاطمة بس سكينة مالهة ذنب كمت عليهة حضنتهة فرفحت من لبجي ولج سكينة كلة من وراي اني جنت ادعي الله يعاقب امج والله عاقبهة بيج
لا ليلى انتي مالج ذنب هاذ من سوء اعمالنة اصلا اني يومية احمد الله واشكرة لان مرض لسرطان غفران لذنوبي وكل اليي سويتة بحقج
وحنة نحجي كعد ابنهة بي شبه كلش جبير من عمي خليل كمت علي شلتة وابوس بي وابجي صديت على سيف لكيتة يبجي ويانة
سكينة كلتلة سيف من رخصتك دقايق اريد احجي وية ليلى
طلع هوة وبدت سكينة. تسأل بية وين رحتي كل هاي لسنين وين ختفيتي
حجيتلهة كلشي من اول يوم طلعت بي من لبيت لحد هاي الحضة ضلت مصدومة وهم كامت تبجي تكلي الغربة احسن من عدنة

شوفي ليلى الصار كلة ملعوب من تقى
سكينة ابوس ايدج ماريد احجي بهاذ لموضوع ابد وبس اطلع منا اني وسيف راح نتطلك وارجع للكويت
مستحيل ليلى مستحيل اخليج تروحين بس سمعيني ووراهة بكيفج انتي حكمي
حجتلي كلشي صار واني ضليت مصدومة معقولة سكينة
اي حبيبتي معقولة كلشي توقعي من تقى
يعني عرسي خرب من ورة شي اصلا ماصار
يعني 4 سنين من عمري كضيتهن بلغربة ولحصرة ولبجي علمود شي مالة وجود
حسبي الله ونعم الوكيل عليج تقى اريد الله يطلع حوبتي بيج
لتخافين حبيبتي حوبتج طلعت من زمان
تقى طلعت تتاجر بلممنوع هية وامهة ووليد اخوي متورط وياهن وسجنوهةوعذبوهة وهية من اول راشدي عترفت علة وليد وامهة وهسة نحكمو كلهم 22 سنة سجن
فداوتك ربي ماقصرت هية هاي عدالتك الي جنت انتضرهة واكول عدالة ربي ماتترك ضالم وان طالت لمدة

ليلى باعيني سيف نضلم وانتي هم نضلمتي الصار ثنينكم مالكم ذنب بي سيف يحبج ليلى لو واحد غيرة جان كال عافتني وراح تزوج ونساج وعاش حياتة بس سيف حبج من صدك والله من ختفيتي هوة شهرين مثل المخبل عايف دوامة وكلشي ويفتر بشوارع بغداد يدور عليج بلسيارة
ولج والله عشنة ايام ماننام للصبح علة صوت لبجي ولنحيب مالتة
وغرفتة ماينام بيهة ابد يكول مااكدر اطبلهة وليلى مابيهة
ومرات يصعد يضل يبجي بيهة يفرفح نصعدلة كلنة نتوسل بي نكلة كافي مايسمع لواحد بينة يضل يبجي لحد مايخوة وينام علة روحة
سيف نضلم حييل ليلى. ويجوز تعذب اكثر منج وانتي هم تأذيتي بحياتج ماشفتي شي منهة رجعيلة وعيشو حياتج الي ماتهنيتي بيهة وانشاء الله تسوون عررس واني البس باروكة واجي اركصلج شعر شعر
هههههه والله ياسكينة
اووووف والله كل لكلتي صح
لوتدرين شصار بية اني من شفتهم والله حيلي نهد ومن طلعت موبوعي رحت. للأمام. هناك لكيت راحتي بس عشت بخوف جنت خايفة لايخلصن فلوسي بس لحمد لله
الله ماعافني ودزلي ولد لحلال
بقيت سبوع يم سكينة داريتهة حييل حتة للحمام اطب وياهة واسبحهة بس كتلهة ماريد اشوف فاطمة
خلتهة ترجع للبيت علمودي
وسيف طول هاي لمدة هوة يمنة بس بليل يرجع للبيت حتة دوامة اخذ اجازة بدون راتب وعمار هم مكابلهة وكاعد
تحاول تكون قوية وتبينلنة انو هية طبيعية حتة لانتأذة عليهة بس كسرة المرض حييل مبينة بيهة
اخرايام كامو ينطوهة جرعات كيمياوي مكثفة لأن وضعهة بدة يتأزم كلش واعضائهة لداخلية بدت تنهار وحدة من كلياتهة توقفت ولكبد حيييل متضرر وبطنهة ننفخت حالهة يفطر لكلب
من يخلولهة جرعة لكيمياوي هنا جنت اعيش اصعب لحضات عمري
بلبداية تحاول تكون هادئة وطبيعية دقايق وتعلة صرخاتهة ودموعهة
الألم الي جانت تحسة صعب ينوصف لأن لجرعة كلش قوية مرات الزم اديهة واضل ابجي وياهة مع انو هلشي ممنوع ومرات انهار ماأكدر اشوفهة حالهة يمرد لكلب اطلع برة الكة سيف يبجي وعمار كاعد بلكاع ومفرفح ومرات يفقد ويملخ روحة بلكوة نلزمة ايام صعبة كلش عشناهة وياهة
صرخاتهة لساهن يدون بأذني اتذكرهة شلون تبجي وتكللنة ماريد لعلاج هوة اني ميتة ميتة
جان يوم ثنين رجعت وية سيف للبيت حتة ابدل واسبح وارجع للمستشفى
جاي اسبح سيف دك علية لباب
ليلى بسرعة بدلي وطلعي
بدلت بساع وطلعت
ها سيف خير
خابرني عمار يكول سكينة كلش متخربطة
صعدنة لسيارة وطرنة للمستشفى
وصلنة لغرفتهة سمعت صوت صراخ رجلية بعد ماشالني كوة وصلت للغرفة
فتحت لباب لكيت عمار حاطهة بحضنة ويبجي وهية هم تبجي
تقربت يمهة جريتهة من حضن عمار
هاي الحضة اموت وماأنساهة باوعت علة جسمهة مسامات جلدهة يطلع منهن قطرات دم
سكينة مابيج شي والله باوعيلي
كولي ياابو لحسن احلفك برقية
تعيد لحجي وراي بس كوة تحجي
كولي يا أمير المومنين احلفك بجفوف ابو فاضل
تعيد وراي وصوتهة شوية شوية يختفي
كولي احلفك بستر زينب
سكتت
سكينة كولي والله زينب عزيزة علي مايردج
ولج سكينة احجي
سكينننننة
ولج كطعتي كلبي جاوبيني
سكينة لاتموتين لخاطر وليدج ترضيهة يضل بدونج
سكينة والله مسامحتج من كلب ولسان بس لاتعوفين ابنج
ولج سكينة عدمن امنتي وليدج لدنية بدون لأم ماتسوة شي
عمار طلع برة يصرخ
اجة سيف وويا دكتور جرني منهة كوة
طبت فاطمة كعدت بلكاع ملخت شعرهة ووجهة تصيح ربي دخيلك شسويت اني ليش تحرمني من بنيتي
اوووف لحد هاي الحضة وهية تشوف روحهة مامذنبة ابد
سيف حاضني ويبجي
سيف كللهة خل تكعد حباب والله ماشبعت منهة مشتاقتلهة
كافي حبيبي خليهة ترتاح تعذبت
اخذوهة بلسدية هنا اني فقدت كمت اصرخ ملخت روحي سكينة ابنج شلون تعوفينة ولج ترضيهة يربة بيد مرت لأبو
ولج سكينة لدنية حلوة ليش ستعجلتي
سكينة لاتخلين ابنج يضوك الي اني ضكتة لعمر بلية ام ماينراد
فاطمة رتفع ضغطهة وصارت بيهة ذبحة صدرية ونامت بلمستشفى
3 ايام لفاتحة ملخت روحي وخوات فاطمة وكرايبهة متعجبات
خلصت لفاتحة وفاطمة ماصحت بلمستشفى
وعمو تخبل عليهة يصيح واحد ضيع روحة وبلسجن ولثانية جوة لتراب
كلة من ورة فاطمة وجورهة شكد جنت اكللهة كافي ضلم بعدين الله يطلعهة بجهالنة بس ماجانت تصدك
ابن سكينة ماوكع من ايدي ابد اشوف بي روحي من ماتت امي
ورة لفاتحة ابد ماخليتة يحس بغياب امة العبة واشيلة واعلكلة تلفزيون وكارتون لهيتة حييل ورة لسابع مال سكينة رحنة اني وسيف للفندق الي جانت بي ام حسين مالكيناهم وابو لأستعلامات كال قبل يومين غادرو لمكان
نقهرت حيييل لأن ماشفتهم ولاودعتهم بس سيف وعدني ياخذني الهم بس تعدي هلأيام
ورة لسابع ب5 ايام تلقينة خبر وفات فاطمة اني ماحضرت لفاتحة بس خابرت عمو اخذت من خاطرة ولحجية راحت هية وسيف وعمار بيوم لثالث ادو لواجب وأجو
اتذكرهة بيوم لسابع مال سكينة من شافتني جانت كلش منتهية كوة تحجي كامت تبجي وتكلي سامحيني وبريني لذمة اني علة ساعة اموت
ماكدرت اجاوبهة ولا كلمة ضليت بس دموع
كل لسوتة بية اجة كبال عيني
شذكر من سواياتهة وشنسة
جويات لسجينة الي لسة اثرهن بدية
لو ضربات لكيبل لسة اثرهن بضهري
شعري الي نصة وكع من كتلاتهة
دراستي الي حرمتني منهة
شرفي الي خسرتة وهية جانت من لمساهمين بهاذ لشي
اااخ شكد يوجعني كلبي من اذكرهة لمن تكل لتقى عازمتكم علة عشة انتي ووليد بمطعم لساعة لمن عرفت وليد غتصبني
ماسامحتهة بس عفت هاذ لشي للزمن يحوز لأيام راح يخلني انسة واسامحهة
بس الله اكيد مراح يعوفهة
ورة لثالث مال ام سكينة لحجية كلتلي بعد متنامين يمي بلغرفة روحي يم رجلج
صعدت للصالة فوك وضليت كاعدة خايفة ومترددة ومستحية
ل11 اني كاعدة اخاف ادك لباب
فتح لباب سيف لكاني كاعدة
ها حبيبي شتسوين هنا
امك طردتني بعد متقبل انام يمهة
هههههههه زين سوت
تعاي حبيبي اكو وحدة تعوف رجلهة وتنام يم عمتهة وين صايرة
طببتهة للغرفة اني طول هاي لمدة عفتهة براحتهة رغم مشتاقلهة وعطشان لحضنهة بس حترمت حزنهة علة سكينة
خليتهة علة ايدي وحضنتهة حسيت برجفة جسمهة وخوفهة
عبالهة راح اتقربلهة بس اني ماردت هاذ لشي يصير هيج مهما يكون هية بنية ومن حقهة تلبس لبدلة لبيضة قبل 3 ايام خططت لهاذ لشي وحجزت لتركيا للمرة لثانية وباجر ب11 لصبح طيارتنة بس هية ماتدري ولا حتة امي بس عمار يدري
كعدت لصبح رحت لدوامي اخذت اجازة سبوعين ورجعت
ساعة ب8 ونص طبيت للبيت هية كاعدة تغسل مواعين بلمطبخ ومهدي بحضن امي
اجيت عليهة جريتهة واخذتهة للغرفة لدرج كلة تكلي شكو شبيك
طبينة كتلهة بساع بدلي عدي مفاجئة الج لبست ملابسهة طبعا اني مشتريلهة جنطة ملابس واحذية كاملة ومخليهة بجنطة لسيارة والي هم اخذت شكم قطعة
سلمت علوالدة وعمار وهية ماتدري شنو لسالفة هم تسلم وياي صعدتهة ونطلقنة وعمار وصلنة لمن وصلنة للمطار اول ماشافتة كلتلي
سيف راح توديني للكويت
ليش انتي تردين ترحين للكويت
اي كلش مشتاقتلهم وبلذات عبودي
حبيبي والله بس نرجع من تركيا اوديج الهم تشوفيهم
ليش احنة رايحين لتركيا هسة
اي
يبووو طرت من كلي رايحين لتركيا من جنت ببيت فاطمة اشوفهة هية وسكينة الله يرحمهة يباوعن مسلسلات تركي جنت اتمنة اشوف تركيا ومن سألني سيف قبل زواجنة وين تردين شهر لعسل رأسن كتلة لتركيا بس ماصارت
صعدنة بلطيارة
وهنا تذكرت لمن صعدتهة ورحت وية بيت ام حسين شكد جنت وكتهة خايفة ومقهورة وشكد بيومهة شتاقيت لسيف وتمنيت اشوفة قبل ماروح جنت متخيلة ماراح انجمع بي ابد بس ماجنت اتدري الله كاتبلي سيف قسمتي وماكو شي منعني عنة حتة لبعد
وصلنة لأسطنبول ونزلنة بلفندق اول ماطبينة بس ذبينة لجنط سيف كلي هسة اجي راح ولروحة روحة ساعتين ونص يلله رجع وبالي ضل يمة طب بيدة جيس جبير فتحة بي بدلة عرس بيضة
يا الله تجنن هاي الي سيف
لعد الي حبيبي اني ماردت اتزوجج بدون متلبسين لأبيض انتي حلمج جان تلبسين هاي لبدلة
تغدينة وطبيت سبحت وتحضرت كعروس اخذني لصالون سوولي مكياج ولبسوني بركع ابو لحجاب طلعت كلش حلوة ولبنات الي بلصالون ماخلني اطلع طببن سيف ليجوة وهوة سودة علية من شافني بلبدلة لبيضة كام يبجي فرفح ولبنات صورنة بلمبايل وهاذ لفديو نتشر عليوتيوب ولكرايب ولجوارين كلهة شافتة
اخذني بسيارة تجنن مزينهة ومابيهة سقف مفتوحة وفرني سطنبول كلهة ورحنة للمصور وصورنة لقطات يجنن
رجعنة للبيت بل9 بليل طبيت للحمام لبست سيت نوم ابيض وكلسا افتح لباب واريد اطلع بس خايفة ومرتبكة احاول اكون طبيعية واطرد لخوف مااكدر خايفة لايسوي بية مثل وليد اوووف هلفكرة متروح من بالي ابد ضليت هواي بلحمام لحد ماسيف دك علية لباب
ها ليلو نمتي
ها لا هسة اطلع
اريد افتح لباب مااكدر
رجع دكة
ها حبيبي شلون انطيج مخدة
سكتت
ليلى تعالي حبيبي لا تخافين نامي بلصالة واني رايح للغرفة
سمعت خطواتة يبتعد عن لحمام
فتحت لباب مالكيتة بلصالة
هوووف جريت نفس عميق وقويت روحي سيف يحبني ومستحيل يأذيني وهاي سنة الحياة لازم هاذ لشي يصير
قنعت روحي بلكوة
فتحت باب لغرفة علة كيفي سيف مطفي لضوة اول ماشافني كعد
رحت علي كعدت علة رجلي
تقربت علي بستة من ركبتة
سيف:طبت للغرفة اني كمزت من مكاني هية طالعة جنهة ملاك بلثوب الابستة
تقربت يمي كعدت علة رجلية وباستني من ركبتي عرفت هاي لبوسة معناهة هية قابلة اتقربلهة
اني ميت عليهة
خليتهة علجرباية ويديت ابوس كل مكان بجسمهة من رجلهة لحد ركبتهة وكل ماابوسهة ترجف وتجر روحهة مني علة كيف
بس هاذ اشي يزيد عطشي الهة وشوكي
تقربتلهة بس حاولت مااذيهة
صح هية موبنية بس ماريد اخوفهة مني لأن لسوا بيهة وليد موشوية ردتهة تعرف انو لزواج حلو مومثل مااخذت فكرة عنة بعد لصار وياهة

جنت خايفة حييل من بدة يتقربلي لأن كل ضني راح يسوي بية مثل وليد لكلب
بس من صار هاذ لشي عرفت انو وليد حيوان موبشر
سيف ابد مااذاني وتجاوبت ويا حييل بكد مافرحت لمن شفت لشي يختلف عن لصار وياي علة ايد وليد
اخذتهة وصارت مريتي بستهة من راسهة وحضنتهة نومتهة علة ايدي
ها حبيبي خوما اذيتج
لا مااذيتني
نامت علة ايدي للصبح حاضنهة عبالك راح تشرد جان احلة يوم بحياتي طلعت عطش سنين وشوك الهة

كعدت لصبح سويت ريوك وكعدت سيف تريكنة وطلعنة رحنة رحلة بليخت
سفرتنة جانت تجنن ماخلة مكان حلو وغريب ماوداني الة وجان يشيلني كدام لناس ويحضني ايام تجنن عشتهة بشهر لعسل
رجعنة للعراق وورة شهر وداني للكويت رحت لبيت ام حسين وعبودي ماعرفني هههههه
شهرين نساني
حجيت لأم حسين كلشي ومن عرفت سيف جان مضلوم سلمت علي ورحبت بي تغدينة يمهم سيف تشكر منهم حييل ووعدهم بين مدة ولثانية يجيبني
طلعنة من يمهم فترينة مولات واسواق بقينة 3 ايام ورجعنة للعراق بس ضليت اتواصل وياهم
لحمد لله
الله ضهر لحق وكلهم اخذو جزائهم صح عانيت بطفولتي بس الله عوضني واخذلي حقي من لكل عدالة ربي ماعافت كل الي اذوني حتة ميس ولبنى ورة زواجي بشهر امهن وابوهن سوو حادث بطريق ايران وتوفو وضلن عد بيت جدهن هم عاشن خدامات للجبير ولزغير وزهراء تجي تسولفلي عليهن تكول كل الي سوو بيج صار بيهن ونسوان عمامهن مطيحات حضهن
صبرت والله عوض صبري وعايشة حياة تجنن وية سيف امة حاسبتني بتهة ولبيت كلة بيدي هية ملتهية بصلاتهة وزياراتهة وعمار سافر لأيران وستقر هناك وابن سكينة ضل
بيني وبين لحجية بلنهار يمي وبليل يمهة ولسنة قدمت خارجي ثالث متوسط وسيف خلالي مدرسين ومن اكمل انشاء الله اقدم علسادس واكمل جامعة

لهنا انتهة مشوارنة وية ليلى هلقصة عبارة عن مواعض اني شخصيا ستفاديت منهة
اتمنى اكون قدمتهة الكم بلشكل المطلوب وكدرت اوصللكم كل شخصية مثل ماهية
واتمنة تستفادون منهة وتعرفون انو لضلم ميدوم .....النهاية

لبارحة تعليقاتكم حييل اذتني يعني كولو ميتة مريضة عدهة ضرف ترة اني بشر
عبالك متعاقدة وياكم بصفقة عمل وتأخرت عن لموعد رتقو شوية وقدرو لضروف
طبعا كلامي موجه للبعض مو الكل
واشكر كل الي ضل بالهم علية وتعليقاتهم عكست رقيهم واخلاقهم لعالية
لبارت من لعصر جان كامل ونيتي انشرة بل9 لكن ليلى اتصلت بية وطلبت مني احذف بعض المشاهد من لبارت لأسباب تخصهة ونطتني احداث وطلبت مني اضيفهن لهاذ لسبب ضطريت امسح لبارت واعيد كتابتة من جديد
انتضروني في قصة جديدة
دمتم في امان الله
اختكم لكاتبة #حنين_حاتم
موتنسون لتصويت فديتكم 😘