رواية انثنى غيم نجد لخد الحجاز النرجسيه الفصل الخامس والسبعون 75 - بقلم شُروق

انسدحت على سريرها وهي تشوفه يتصل وابتسمت ترد:كم ساعه وتشوفني ليش تتصل ؟
سلطان:ماقدرت اصبر وجيت قبل موعدنا بساعه
ضحكت نورا:قبلها ب٦ ساعات قصدك
سلطان:والله مو قادر أنام اهوجس لوحدي حتى بهاج ماهو عندي
نورا:بهاج مع أنهار
سلطان:اسألك بالله ! رجعت معه ؟
نورا:جانا من العصر مع امه وزانت امورهم
سلطان:يالله لك الحمد زين وانا اقول وينه مختفي
نورا سكتت ونطق سلطان بهدوء:تتوقعين ابوك يوافق على قرارنا ان سمعه بكره ؟
نورا:كان ودي اقوله قبل يسمعه منك بس ما اعرف احس توترت
سلطان:المهم انتي تبين بيقتنع
نورا ابتسمت تلعب بشعرها:احس بينصدم من قراري
سلطان ابتسم:اخذك بكره بدون ما نطول بدون زواج يا سلام ، وليه ما يوافق ابيك نورا ابيك اهخ يوم يكون حلمك باقي عليه مده قصيره
نورا سكتت بربكه ولفت تناظر فستانها معلق:بيكون يوم حلو ان شاء الله
سلطان:واشوف لون قلبك على الفستان ؟
عضت شفتها وهي تسمعه وكمل سلطان:الا يالله
نورا:وما بتنام وتخليني انام ؟
عقد حاجبه سلطان:يجيك نوم ؟
نورا ضحكت:بس اكيد ما بتجلس تكلمني للصباح !
سلطان:وش يمنع ؟
نورا:يمكن القليل من اللهفه ؟
سلطان:انا متلهف لك حتى وانا اكلمك
ابتسمت نورا ودق باب غرفة سلطان:من ؟
نورا سكتت ووقف سلطان ومشى وفتح الباب وناظر ابوه:هلا ابوي
قفلت نورا وناظر جواله سلطان وقفل الباب ودخل زيد:قبل انام قلت بسألك كلمت المطبخ على كم ذبيحه ؟
سلطان:كنت بكلمهم بس عمي عمر رفض وعزّم هو ياخذها
زيد:ماعليك فيه كلمهم بكره اول ما تقوم ما بياخذها كلها عمر
سلطان:طيب ابشر سمّ
زيد:وانت ارقد الحين لا تقعد صاحي
سلطان ابتسم:ان شاء الله
وقف زيد وخرج من عنده وقفل الباب سلطان
-
وقف السياره عند القاعه ولف لها وابتسم
ابتسمت تناظر كفوفهم ببعض ولفت عليه تناظر نظراته:ما انزل ؟
هز راسه بالنفي:ماوده ابو سعود
ميلت راسها تناظره:بس راجعه لك
بهاج:يكفي اللي قضيته بدونك
أنهار نزلت انظارها لجوالها اللي يدق:ريوف
ردت:ايوا ريوف
ريوف:وينك ام سعود ابو سعود حبسك ؟
ضحكت أنهار:لا ابو سعود وام سعود عند القاعه نازله لكم
ريوف:يالله خلصت ميك اب والميك اب ارتست تنتظرك
أنهار:جايه
قفلت ولفت لبهاج واخذ نفس بهاج:ان بغيتي شي كلميني
أنهار هزت راسها وابتسمت ولف وجهه بهاج لها وتقدمت له تبوس خده ونزلت من السياره
ظل يناظرها لين دخلت وتنهد يحرك رايح لسلطان
دخلت وناظرت نورا على جوالها ويسوون شعرها وابتسمت:عروستي
ابتسمت نورا ولفت لها:اخيراً !
ريوف ناظرتها:الوجه ما يحتاج هايلايت منوّر من الحب
ضحكت أنهار وفصخت عبايتها:مافي وقت بنات مره تأخرنا
ريوف:انا جاهزه بس باقي البس
نورا:بموت بنات توتر خلاص احس قلبي بيخرج من مكانه
جلست أنهار تناظر الميك اب قدامها:دعواتكم ما اولد اليوم واخرب زواجكم بس
لفت نورا بصدمه:لا تكفين
ريوف ضحكت:لا توترينها زياده !
ضحكت أنهار:لا تطمني مو والده اليوم
وقفت نورا وهي تناظر مكياجها:ريوف ساعديني البس
لبست فستانها اللي يرسم جسمها أبيض نفس لون قلبها يبرز كتوفها ويغطي باقي ذراعينها بنعومه وابتسمت بربكه من تعليق ريوف:خارجه من مجله نورا
وقفت قدام المرايه بربكه تناظر فستانها ومدت لها الورد ريوف:تهبلين نورا قمر قمر واحلى عروسه
لفت نورا:طيب شوفي اذا المصوره جات نبدأ نتصور سلطان شويه وبيجي
ريوف:اوكيه دقايق
أنهار:لا تتعبين ريوف وتمشي كثير
ريوف:خليني استوعب اني حامل اول
-
سلطان:فهد مد يدك عشان اكسرها
فهد ضحك يشوف توتره:ياخي بعدل لك العقال
سلطان:لا خله زين
بهاج:اتركه يافهد العريس متوتر
ضحك فهد وتأفف سلطان بتوتر:ابوي داق علي عشرين مره الشيخ سابقنا وانتم تستهبلون
بهاج:وصلنا يالعريس وصلنا
نزل سلطان ونزلوا معه وعدل غترته فهد ومشى بهاج يدخل جواله بجيبه ويدخل مجلس عمر
ابتسم سلطان يسلم على الرجال ويتقدم يجلس جنب الشيخ ويعدل شماغه بتوتر
زيد:بسم الله
لف عمر على الشيخ اللي بدأ مراسم عقد النكاح
وابتسم بهاج لانه كان شاهد لنورا ماهو لسلطان اختار يكون من طرف نورا وكأنه يثبت لنفسه قبل يثبت لأحد انه اخوهم
لمعت عيون سلطان ونطق:إبنتك نورا
وكمل باقي المراسم مع الشيخ وعمر
الشيخ:شوف الرابط وصل للعروس يا ابو نورا ؟
لف عمر اللي جالس على جواله يتواصل معهم
وناظر الايباد بحضنه الشيخ وأكد زواجهم الكترونياً وابتسم عمر ولف من شد على كتفه زيد:مبروك
ابتسم ووقف يسلم على راس ابوه ويتقدم يسلم على عمر
وقف بهاج يضحك وحضنه سلطان وربت على ظهره بهاج:مبروك النسيب
ضحك سلطان وابتعد عنه يحضن فهد وجلس بينهم
-
لبست فستانها الأحمر وضحكت من بطنها البارز وهمست:الله يسامحك يانورا ما صبرتوا لين اولد !
رفعت راسها ريوف تضحك:خلينا نخون نورا ونتصور سوا
أنهار:تعالي
وقفت ريوف بفستانها اللي من درجات الوردي ووقفت جنب أنهار يتصورون
أنهار:متى يخلصون تصوير نورا وسلطان ؟
ريوف:مطولين حياتي
أنهار:امانه خلينا نطل عليهم
ريوف ابتسمت تفتح شويه من الباب
ناظرت سلطان واقف معطي ظهره لنورا والمصوره خلفهم وتقدمت نورا وابتسمت ترفع كفها لكتفه والتفت لها وضحك من سعادته وحضنها وضحكت نورا من حضنها وابتعد عنها:مبروك
ارتبكت نورا وهزت راسها ولفت للمصوره اللي تصورهم
عدلت فستانها ورفعت راسها لسلطان وميل راسه يبوس خدها بخفه وابتسمت تتفجر ملامح وجهها لان المصوره موجوده
ابتعد عنها وضحك بهدوء:بشويش عليّ
نورا ناظرت المصوره:انادي ابويه يجي يتصور ؟
المصوره:اذا حابه عادي خليه يجي
نورا اخذت جوالها تخفي رجفة يدينها واخذ نفس سلطان يعدل بشته:استعجلتي ليه يجي الحين
رفعت عيونها نورا عليه بتوتر:عشان اخاف بعدين ما يكون فاضي مع العشاء والناس
سلطان هز راسه لها ولف يناظر المصوره اللي تعدل الكاميرا بالمكان وجلس جنب نورا
ابتسم يناظر القاعه اللي اختاروها اوت دور على البحر وزيّنوا المكان برا عشان يتصورون
وابتسم يشوفها جنبه تلبس البياض وتزيّن شعرها بهيدبيس والميك اب ينوّر وجهها المنور وشامتها بنحرها ماخفتها بأي خافي لا بفستانها ولا بمكياجها
رفع كله يلمس شامتها ورجفت بربكه ولفت له
لمسها بأصابعه وبدل انظاره عليها:أول سبايب طيحة سلطان
رفعت كفها تلمس كفه اللي على شامتها وبلل شفايفه يسمع دخول عمر للمكان وغمض عيونه بهدوء ووقفت نورا
اخذ نفس والتفت يشوفه يتقدم وتحضنه نورا
ابتسم يحضنها:بنتي وحبيبة قلبي وعيوني الثنتين
شدت عليه تحضنه نورا:حبيبي
ابتعد عنها يبوس جبينها ويمسك وجهها بكفوفه:صرتي عروسه ؟
ابتسمت له تناظر عيونه تلمع ورجع يحضن وجهها لصدره ورفع عيونه لسلطان اللي واقف ببشته
وتقدم له ومسك كفه وهو حاضن نورا:ما يحتاج اوصيك واذكرك انها اول افراحي
لفت نورا تناظر سلطان اللي نطق:لا توصي عليها نورا عندي غاليه وهي تدري
ابتسمت نورا:نتصور ؟
عمر:نتصور
حضنت عمر تتصور معاه ومع سلطان وبعد ما قطعوا وقتهم بالتصوير مسكت كفه تستعد للدخول وابتسمت تسمع زفتهم تشتغل
وشد على كفها ودخلوا ورفعت صوتها ريوف تصرخ لدخولهم وابتسمت أنهار تصورهم
ورفعت يدينها تأشر لهم وابتسم سلطان يشوف أنهار وريوف بعباياتهم واقفين يستقبلونهم
التفت يهمس لها:نورا يا أغلى امنيات سلطان
لفت له تبتسم وتشد على كفه لين وصلوا واشتغلت الاغاني كل اغاني الفرحه كل اغاني انتصار الحب تغنّت عشان نورا وسلطان ، كان يرقصها بذراعه وهو واقف يتأملها بإبتسامه ترقص وتتمايل وتخجل ولكنها تضحك وسط كل مشاعر الفرحه وصفقة خواتها لها ، رفع جواله يصورها كان يحس ان اللي أمامه ترتدي الابيض اعظم انتصاراته ونتيجة صبره الطويل تستحق اللحظه تتوثق بجواله
تقدم بعد ما انتهت الاغاني يمسك كفها وابتسمت لين ابتعد عنها يسلم على امه اللي تقدمت له ورفعت عيونها أنهار تشوف شموخ اللي طلعت تسلم على سلطان
وصدت تمسك ظهرها بألم من الكعب ومن الوقوف ومن الثقل اللي تحس فيه
دخلوا الغرفه سلطان ونورا مع اهل سلطان ومشت ريوف تلبس عبايتها وتمشي مع أنهار:يالبطه بهاج بيجي ؟
أنهار هزت راسها:بطلع معاه
ريوف:دقيقه بسلم عليه
فتحت الباب وناظرت بهاج عنده وابتسمت تشوفه يدخن رمى زيقارته ودخل يناظر فستانها
وتنحنت ريوف:قبل تخطي اي خطوه انا موجوده
ضحك بهاج:هلا ريوف
ريوف:كيفك بهاج ؟
بهاج:صرت احسن ، فهد يدلعك والا التفت له؟
ضحكت ريوف:لا ما اقصر معاه السياره مسألة وقت
ضحك بهاج ومشت ريوف:بشوف نورا
هز راسه وابتسمت أنهار من خرجت ولفت له
بهاج:مرحبا ياراس مالي وكنزي وذهبي
ابتسمت تمسك ظهرها:ناديتك تشوف شكلي
بهاج:موتٍ حَمر
لفت من انفتح الباب ودخلت منيره وناظرها بهاج
منيره:شلونك بهاج ؟
دخلت شموخ على اسمه وناظرتها أنهار ولفت لبهاج تحط ذراعها خلف ظهره وابتسم بهاج يهز راسه:حمدلله طيبين
لف لأنهار يبوس جبينها:انا برا اطلعي لي
ابتسمت تهز راسها وخرج وقفلت الباب خلفه ومشت تتخطى شموخ وتخرج من الغرفه هي تشوف الخساره بعيون شموخ وهذا الشي مكفيها
-
خرجت تشوف سيارة سلطان قدام الباب ومشغل الفلشر ينتظر خروج نورا وبهاج عند سيارته وفهد معاه وسياراتهم كلهم عند الباب
ولف بهاج يشوفها تخرج لوحدها وابتسم يتقدم لها:ام سعود مبروكين عساها دايمه افراحكم
ضحكت له وناظرته يوقف قدامها:نمشي وراهم ؟
بهاج:اي اركبي بسلم على نورا واجيك
فتح لها الباب تركب وركبت وقفل بابها ومشى يشوف نورا اللي خرجت ولفت له يتقدم لها ووقفت
التفت عمر يشوف بهاج يتقدم لنورا:نورا
ضحكت له:بهاج
بهاج تقدم لها:مبروك يا عروس
نورا:الله يبارك فيك
بهاج لف يأشر على سلطان اللي واقف عند السياره:هذا ان سوا لك شي تعرفين لمن تروحين
نورا ضحكت:بخوفه فيك ماراح يسوي لي شي
بهاج ضحك:ياويله
تقدم يفتح باب نورا ولفت نورا لعمر واشرت له وابتسم يأشر لها وركبت وركب سلطان جنبها
ومشى بهاج يركب سيارته وحرك خلفهم
لف فهد لعمر:وين ريوف ؟
عمر:الحين تطلع
فهد شاف ريوف تخرج:انتي دايم متأخره ؟
ريوف:مو طايقه ملابسي فهد كبدي سايمه
عمر:تعبانه ؟
تقدمت ريوف له:لا بابا بس ريحة اللحم بالمكان قلبت معدتي
فهد:كدينا خير واضح بيطلع خكري تلوع كبده من الشحم
ريوف:لا تقول شحم تكفى فهد احس بغثيان
فهد تكلم بسرعه:طيب اركبي بنروح للشقه على طول وارتاحي هناك
عمر ناظر فهد اللي يتكلم بسرعه:شفيك انت تتكلم بسرعه
فهد غمز له:يعنني مهتم فيك وكذا
ضحك عمر يهز راسه وناظر ريوف:ريوف يابابا اذا تعبتي كلميني
ريوف:لا ياحبيبي انت روح نام وريح انا كويسه وفهد عندي
عمر هز راسه وركبت ريوف وركب فهد يحرك وبقي عمر محله لوحده بعد ماودع بناته كلهم وكل وحده راحت مع زوجها لبيتها
-
كان يمشي ورا سلطان ومهدي ومشغل فلشرات سيارته ومبتسم ومشغلين اغاني
دخل بسيارته سلطان للفندق وبهاج خلفه وفتحت شباكها أنهار ونزل بهاج تارك بابه
ووقف سلطان يشوفه جايه وابتسم بهاج:مبروك ياعرسان
ضحك سلطان ونزلت نورا وتقدم بهاج لسلطان:ان احتجت شي كلمني
سلطان:ماتقصر عقبال نفرح بسعود
ابتسم بهاج:بوجودك يا اخوي
ربت على كتفه ومشى لسيارته وابتسمت أنهار تشوفهم يدخلون الفندق وحرك بهاج ولف لأنهار يحس بالراحه بصدره وكأنه شاف اخته واخوه بليله وحده يتزوجون
لفت أنهار عليه:متى رجعت امك؟
بهاج لف لها:بدري ما طولت رجعتها بعد عشانا
أنهار:انتبهت عليها وهي رايحه
سكت بهاج ولفت أنهار:بهاج
بهاج:ابو بهاج وربعه
ابتسمت:مشتهيه بسكوت
بهاج:الحين؟
أنهار:ايوا
بهاج:أنهار انتي كم يوم وتولدين باقي تتوحمين؟
أنهار:لا ادلع عليك
ضحك والتفت عليها:تردين الشهور اللي بدوني يعني ؟
ناظرته بنص عين وهي تضحك ووقف عند البقاله:وشو البسكوت
أنهار ورته الصوره بجوالها ونزل يدوره ورجع يركب:مالقيته أنهار يا ابوي خليه بكره
أنهار:لا نفسي فيه الحين بهاج مشتهيته تخيل يطلع براس البيبي وحمه
تنهد بهاج وحرك وناظرته:لا يكون تتأفف ؟
ضحك:طيب انتقمي يا ام سعود امرنا لله
وقف عند السوبر ماركت ونزل وانتظرته وابتسمت من خرج بعد دقايق ومعه كراتين وضحكت وحطها بالخلف وركب:لا تاكلينه وشوفي وش يجيك شريت كل اللي معروض
ضحكت وحرك سيارته وتقدمت تحضن ذراعه:ثقيله لدرجة ما اقدر اجي احضنك
بهاج:راحت ايام الخفه يا ام سعود
أنهار لمست دقنه:هذا سعود بيطلع لك شيب يا ابو سعود بيكبرنا
بهاج ناظرها:وش احلى ؟ اكبر معك
ابتسمت له ووقف عند فندقهم وناظرت:بهاج ياحبيبي رجولي تعورني من الكعب مره مو قادره انزل امشي عليه زياده
بهاج لف لها:اشيلك ؟
ضحكت:لا عند الناس اشبك
بهاج:اجل خذي حذياني
أنهار:وتلبس كعبي ؟
بهاج:اي شدعوه عادي ، صاحيه انتي ؟
ضحكت أنهار تفصخ كعبها:تنزل حافي ؟ ما ارضى حبيبي ينزل حافي
بهاج:من البدايه مشاني سعود حافي الله يعين
ضحكت ونزل بهاج وحط حذيانه لها ولبستها وشال كعبها بيده ومشت معاه
تمسكت بذراعه تشوفه يمشي حافي عشانها وابتسمت تحط راسها على ذراعه وتمشي معاه بهدوء
اخذت نفس بتعب من وصلت وجلست وهي ماسكه بطنها وحط كعبها:بدخل اغسل ونجي نتفاهم على الاحمر ، لابسه احمر ماتدري اني ثور
ضحكت ودخل الحمام وفصخت عبايتها تعدل شكلها وتتعطر من جديد
-
دخلت معاه وهو ماسك كفها وبشته على ذراعه الثانيه وابتسمت تدخل الغرفه
تقدمت تفلت يده وتشوف الغرفه ووقفت قدام المرايه تشوف شكلها وتقدم يحضنها وابتسمت تاخذ نفس تشوف انعكاسهم سوا بالمرايه وابتعد سلطان يقعد على السرير واشر لها تجلس جنبه
وجلست وناظرها:سولفي لي
ضحكت من طلبه ولفت عليه:عن ايش اسولف ؟
سلطان تكى بيده وهو يناظرها:سولفي وش اكثر فيلم تحبينه واكثر مواقيت يومك المفضله ، سولفي اسمعك ، قولي احلى يوم بحياتك وامنياتك وانا حاضر وألبي وأسمعك بس سولفي ، جربي قولي أحبك خلي كل بحر جِده يغني عيديها ، او ناديني يكفي تناديني قولي سلطان
نورا:انت قبل أعرفك عرفت عني كل شي
سلطان:عرفت عنك كل شي واختبرت صبرك وعنادك وظفرت بك
مسك كفها وناظرته نورا وفصخ شماغه واعتدل وهو ماسك كفها بذراعينه الثنتين:انا ربي اختار لي اعيش عشان احقق حلمي معك ، واختارني عشان اعوضك وانتي تعرفين واختارك لي لان القعده معك عن مليون سنه مع غيرك ، اختارك لي لان هذي اليدين اللي بلمسها وتلمسني بتكون صبري على الدنيا عشان البيت اللي بيجمعنا سوا عشان اللقمه اللي بنتقاسمها سوا عشان انا ودي بك من صغري انا ودي بك من قبل اشوفك ، ودي بكل هذا الجمال والدلال كل هذا العناد كل هذي الحنيّه كل هذي القوه والشدّه ، انا وعيالي وحياتي نحتاجك
نزلت نظرها لكفوفه ورجعت ترفع عيونها له:وشكراً عشانك اخترتني وحاولتني وطلعت اسوأ مافيني وتقبلته وحبيته وساندتني ووفيت بوعدك ولا تركتني ، شكراً سلطان
سلطان ابتسم:بس شكراً ؟
ضحكت تصد بوجهها وبللت شفايفها وكمل سلطان:قولي أحبك عشاني ضامي عشاني صابر عشان تطفي نار حربي عشان أرتاح
لفت له وابتسمت تشوف عقاله فوق راسه وشماغه بحضنه وجالس ينتظرها وهزت راسها تطمنه:أحُبَك
لانت ملامحه يسمع همسها ونبرتها ولمعة عيونها وهمس:روّتني اكثر من روي الماء الله لو أصبها بعروقي
شد على كفوفها يتقدم لها وغمضت عيونها تحسه يتقدم لنحرها يبوس شامتها وشدت على كفوفه بربكه
ورفع كفه يمسك وجهها ويبوس نحرها وشامتها اللي بعد ما تلوّنت بالسواد الحين تلوّنت بالورد من قبلاته
ميلت راسها على راسه من استغرق وقت طويل يبوس عنقها ورفع راسه يناظر ثغرها ويقبله ورفع جسده يقدمها له يبوسها وعقد حجاجه من مشاعر صدره بتقبليها بإنها ما تبتعد عنه بالعكس هي تبادر له وتشد على كفوفه اللي على وجهها
-
لو الصبر على الحب ياخذ نصف عمر بني آدم ! نتيجته تظفر بباقي عمره لو إنه قليل ، يُعزّ الحب ويتمجد وينرسم وسط برواز بيت وعائله ، ينشاف الحب بمشاركة كسرة خبز تاكلها بطمأنينه وتكون خير من وليمه تاكلها بقلق وحدك ، الحب اللي ما يخليك تطرق الباب وتدخله يخليك تكسره وتهدمه ، اللي يعطيك قوه ما يعطيك يأس يعطيك هدوء وسكينه مايعطيك خوف يعطيك أجوبه ما يعطيك اسئله ، الحب حجاب عن الشمس وظلال من قيظها ، الحب نجاه من زمهرير البرد الحب أدفى من لبس المعاطف والفرو ، ذخيره ضد الليالي السود وأمل للمستقبل المجهول ، هو العوده لدار الأمان من جديد وبعد يوم متعب بحضن المحبوب ، الحب هو البحر المطمئن اللي ما يحتاج له طوق نجاه ، الغارق فيه أسعد من الناجي ، الحب لو نزل على أرض جافه سقاها ويرجع يخلي النبات يزهر من جديد .
-

جلست على الكنب ومددت رجولها:نورا بليز عطيني مويه
ريوف:ثقلتي خلاص يالبطه ؟
أنهار:طفشت ابغى اولد مو قادره اسوي شي
ريوف فتحت جوالها:تبغون عشاء يجيبونه قبل يجون؟
نورا مدت الكاسه:شوفي ابويه اول بيكون معانا والا لا يصير نجيب شي يحبه وياكله
ريوف دقت عليه وانتظرته يرد ولفت أنهار لنورا:بطني مشدود مو طبيعي
نورا:طولتي أنهار اولدي نبغى بيبي
أنهار:الحين اضغط زر ولا يهمك
ريوف قفلت جوالها:يقول معزوم
نورا ناظرت ريوف:ماقالك شي عن البيت ؟
ريوف:الا قال بيدور بيت قريب من اخوانه بالرياض
أنهار:احسن كمان ما بنطول بجِده كلنا بنرجع الرياض ما نخليه لوحده
ريوف:انا ما برجع لين اشوف ابويه اش بيسوي
نورا:وهذي تنتظر ولادتها عشان ترجع للرياض شكلي الوحيده اللي بسبقكم
أنهار:ما بتسافرون ؟
نورا:الا بس سلطان ما لقي حجز قريب
ريوف:وين ؟
نورا ابتسمت:مالديف
أنهار هزت راسها:حركات
ريوف:خذوني معاكم انا وفهد ما بنزعجكم
ضحكت نورا:روحوا سوا حياتي كنت احتاج اسافر واخيراً
أنهار:سافرنا قريب انا واياك ياكلبه
نورا:مع سلطان غير
أنهار جلست بتعب:بروح الحمام
وقفت ومسكت بطنها ومشت للحمام فتحت الباب وعقدت حاجبينها تنزل راسها من شافت المويه تنزل من بين رجلينها
ورجفت بخوف ولفت تصرخ:نورا ريوف
مشوا بسرعه وناظروها عند الحمام وملابسه مبلله
نورا:اشبك ؟
أنهار:نزلت موية البيبي ؟
ريوف:اش يعني بتولدين ؟
نورا:شرايك ؟ اخلصي كلمي بهاج او بابا اللي قريب يجي
ريوف خرجت واخذت جوالها
-
يشرب شاهي قاعد مع فهد وسلطان ولف من دق جواله وطلعه ورد:هلا ريوف
ريوف:فينك بهاج ؟
بهاج:برا ليه تبون عشاء ؟
ريوف:لا اش عشاء أنهار بتولد
فزّ ولفوا له بخوف ونطق:اسألك بالله
ريوف:والله بسرعه تعال
بهاج:جاي
قفل جواله وناظره سلطان:وش العلم؟
بهاج:أنهار بتولد
وقف فهد:منجدك؟
اخذ بكت دخانه ومفتاحه ومشى لسيارته وقاموا وراه
حرك للبيت ونزل تارك سيارته مفتوحه ودخل ومشى للصاله:أنهار
ريوف طلعت وهي لابسه عبايتها:تعال
دخل وناظرها تبكي:علامك ؟
نورا:خايفه بس
بهاج مسح على شعرها:يوجعك شي ؟
ريوف:لا بس قاعد يدغدها البيبي شرايك بهاج؟
أنهار:مافي وجع بس خايفه بهاج
بهاج:ابوي انتي مامن خوف امشي نروح قومي
مسكت ذراعينه ووقفت معاه تخرج وركبت ولف لسلطان وفهد:الحقوني
هز راسه سلطان وركب بهاج وحرك ولف لأنهار وشد على كفها:تحسين بوجع؟
أنهار:مغص مغص بس كنت احسب ابغى الحمام بس طلع مغص البيبي
بهاج:تساهيل يا ابوي تساهيل الحين نوصل
حط كفه على بطنها وهو يهمس:استودعتكم الله
وقف عند المستشفى ونزل وجاب لها كرسي ودخلوها ووقف يعبي بياناتها عند كشك الولاده
بهاج:لا ابي غرفه لزوجتي لوحدها ما ابي احد معها
الموظف:والله ياحبيبي ما نقدر نوفر لك الا بعد الولاده الانتظار لازم تنتظر مع النساء الباقين
بهاج:لا لا ما ينفع الله يعافيك دور لي جناح لزوجتي تولد فيه وترتاح فيه
الموظف:في عندنا جناح خاص بالقسم فوق
بهاج طلع بوكه:طيب بلغهم يطلعونها لوحدها
الموظف مسك التلفون يكلم ودفع فاتورة الجناح ببطاقته وعقد حاجبينه بتوتر هو ما يبيها تكون مع نساء غيرها وترتبك وتخاف ولوحدها ما يقدر يكون معها
الموظف:طيب استاذ بهاج نقلوها بجناحها فوق اذا حاب تشوفها
هز راسه ومشى يركب المصعد وطلع لها وشافها واقفه وتلبس لبس الولاده لوحدها وتقدم لها:ابوي يا أنهار وش تسوين لوحدك ؟
أنهار ناظرته بخوف:عطوني هذا البسه
بهاج:وليه محد عندك ؟
ساعدها وجلست وجلس عندها ومسك كفوفها:تحسين بوجع ؟
أنهار:مغص بس
بهاج:ارتاحي طيب بشوف لك احد يجيك وجايك
هزت راسها وخرج وطلع جواله يكلم:اطلع الدور الثاني واذا ما دليت قول لهم جناح بهاج بن سعود
دخلت الدكتوره وبهاج معاها وتقدم لأنهار ومدت كفها بخوف وهي ترجف ومسكها وناظر الجهاز اللي حطوه على بطنها وناظرتها الدكتوره:خليك مرتاحه الجهاز بيبين عدد الطلقات تمام؟
هزت راسها واشتغل صوت نبض البيبي ولف بهاج يناظره وابتسم يشد على كفها:يا سعود
جلس عندها وهو يمسح على شعرها ويناظرها تتوجع
طلع جواله بعد وقت طويل ودق على سلطان
رد سلطان وهو يناظر الجناح:هلا ابو سعود بشّر
بهاج:مطولين خذ البنات وارجعوا وانا اطمنكم
سلطان لف عليهم:عادي ننتظر معك
بهاج:لكم ٤ ساعات وش يقعدكم اكثر ! ارجعوا
سلطان:طيب
قفل وناظر نورا:نرجع البيت ؟
نورا:ليش ؟
سلطان:يقول بهاج مطولين
نورا:مو مشكله انتظر أنهار لين تولد
سلطان:والله بتبطي نروح نرتاح بهاج عندها
نورا هزت راسها:بليز سلطان حتى لو رجعت البيت بالي هنا ، اجلس احسن
لف سلطان لفهد وريوف اللي جالسين وتنهد وجلس
لفت نورا:اذا تبغى ترتاح انت ارجع مو مشكله
سلطان حط ذراعه خلف كتوفها:ما اخليك
اخذت نفس بتوتر:الله يسهل لها يارب
بلعت ريقها ريوف وهي تناظر المكان ولفت نورا لفهد وحركت عيونها تأشر لريوف وعقد حاجبينه ولف لريوف ورجع ناظر نورا اللي تأشر لها
فهد:ريف قلبي
لفت عليه وابتسم:شرايك نرجع البيت ؟
ريوف:لا بجلس انتظر أنهار
فهد:طيب نطلع ناخذ لنا شاورما ونرجع لهم وش قلتي ؟
ريوف:متعشين فهد قبل شوي امداك تجوع
فهد:ياليل البثاره قومي تمشي معي طيب بالمستشفى
ريوف:احد يتمشى بالمستشفى ؟
فهد:اي انا وانتي قومي
وقف ومد كفه ومشت معاه بهدوء كانت مرتبكه وخايفه من ولادة أنهار لانها هي حامل وقريب بتجرب شعور أنهار وتجهل حجم الألم
فهد مشى لين دخل قسم ووقف من سمع صوت صراخ وعقد حاجبينه ووقفت ريوف بخوف:اش هذا؟
رفع عيونه للوحه:قسم الولاده
ولفت ريوف بخوف:تولد هذي والا ليش تصرخ؟
ارتبك يسمع صراخها وسحبها:امشي نرجع لأنهار
ريوف:اوف فهد سمعتها كيف تصرخ ؟
فهد:يمكن مكسوره رجلها ماهو ولاده أنهار مالها حس
ريوف:اش مكسوره رجلها قسم الولاده مكتوب
فهد:يمكن تعسرت الله يعينها امشي نرجع
ريوف دفعته:كله منك بعيش هذا الشي بسببك طلقني الان
فهد:يارب رحمتك ، انا شدخلني كل شي براسي حتى انتي ودك بالورع
ريوف:اوف ياخي ما ينفع بدون اخر خطوه ؟
-
تمسكت بكف بهاج بقوه وهي تتألم:مو قادره بهاج
بهاج:زاد الألم ؟
رفعت رجلينها من الألم ورفعت صوتها:اخخ
ارتبك ووقف وهو ماسك كفها وتقدمت الممرضه تكشف عليها:طيب أنهار بندخلك غرفة الولاده
بهاج:وشو بتولد ؟
هزت راسها الممرضه وصرخت أنهار وعض شفته بهاج
الممرضه:تبغى تدخل معاها ؟
هز راسه واتجهوا لغرفة الولاده وانسدحت أنهار على سرير الولاده وهي تصرخ بألم
وجلست الدكتوره:طيب أنهار قولي بسم الله اذا سمعتي بوش ادفعي أقوى ماعندك
تقدمت الممرضه تلبسه لبس أزرق فوق ثوبه وتقدم من صرخت أنهار بعلو صوتها:أبو بهاج وأهله اسم الله عليك
مسكت كف بهاج بقوه وهي تتألم وبهاج عاقد حاجبينه بتوتر لانها طولت وتعبت وبدت تبكي من ألمها وصراخها سبب له الربكه
ناظر اظافرها اللي حفرتها بكفه وعض شفته يسمع الدكتوره تكلمها
وتخالط مع أصواتهم صوت رضيع يبكي ولف وجمد وجهه بصدمه من رفعوا الطفل وابتسمت الدكتوره:ولد
ابتسم بهاج يناظره ولبسوه وتقدمت الدكتوره تحطه على حضن أنهار اللي بكت بتعب وابتسم بهاج يشد على كفها:ارحب سعود
شالوه يغسلونه وناظرت الدكتوره بهاج:بننقل زوجتك لغرفتها اذا حاب تخلص اوراق البيبي على بال ما زوجتك ترتاح
هز راسه وتقدم لأنهار باس جبينها وناظرها تبكي بألم ومسح دموعها:حمدلله يا الشيخه أم سعود
تشكلت دموعه بمحاجر عيونه وكأنه انتصر ولمس نتيجة صبره وتعبه وشاف حلمه قدام عينه
مشى يخرج من الغرفه ووقف بالممر ومسح دموعه وهو يضحك لوحده نزع من عليه لبس العمليات وسجد:حمدلله يارب
رفع راسه يمسح دموعه ويضحك ومشى بسرعه يخرج ومن ناظرهم جالسين ضحك بعلو صوته:سعود وصل
وقف سلطان ووقفوا من شافوه جاي وضحك سلطان:حيّ سعود وأبو سعود
تقدم يحضن سلطان بهاج بقوه وابتسمت نورا:كيف أنهار ؟ بنشوفهم
ريوف:وين أنهار ؟
ابتعد بهاج يحضن فهد وهو يضحك وناظرهم:الحين يطلعون
شد على كتوفه فهد:مبروك يالله تحييه الشيخ سعود
رفع راسه بعدم تصديق بهاج وهو يضحك وتقدمت نورا تحضن ريوف وهم يضحكون
-
دخل الغرفه ومعه اكياس وناظر ريوف عند أنهار وأنهار نايمه وتقدم:ما اكلت ؟
ريوف:نايمه
بهاج:وين نورا ؟
ريوف:رجعت مع سلطان بيجيبون اغراض البيبي
بهاج تقدم لأنهار وحط الاكياس وتقدم يمسح على شعرها:أنهار يا ابوي
عقدت حاجبينها بتعب ورجع يناديها وفتحت عيونها تناظر حوالينها وابتسم:أم سعود
رفعت عيونها عليه بقلق:شفته ؟
بهاج ضحك وهز راسه:شفته بيجيبونه بعد شوي بس قومي كلي
جلست وابتسم بهاج يناظرها:كلي عشان تروين عظامك وامي اذا جات بتجيب معها اكل يدفيك
أنهار:بشوف سعود بهاج
بهاج اتسع مبسمه ومسك قلبه:الله ! يا أحلى الأمنيات
أنهار ابتسمت:يشهبني ؟
بهاج هز راسه بالنفي وضحكت أنهار:يشبهك ؟
بهاج:يشبه القمر
ضحكت أنهار وتمسكت بذراعه:أخيراً
تقدم لها يحضنها وابتسم وحضنته أنهار
وناظرتهم ريوف:شكلي بعد ما حملت صرت غير مرئيه مع الجنين ، الله يعين
وقفت ومشت تخرج من عندهم وصرخت بحماس من شافت الزينه اللي عند الباب يرتبونها
وشافت المنسقين يحطون اسم سعود جنب الباب وطلعت جوالها تصور
-
نورا مشت بالصدليه:أنهار تقول كل شي كامل بس ما ادري احس ممكن تحتاج شي ثاني
سلطان حاط يدينه بجيوبه يمشي معها:طيب خل نروح لهم وان نقص شي انا اجيبه
نورا شالت الرضاعه الصغيره وميلت شفايفها بحنيه ولفت له توريه وابتسم سلطان لها لان عيونها تلمع
وضحك بهدوء:اشد حيلي يعني ؟
ضربته بالرضاعه ورجعتها:اتمنى ما يتنكسل الهوني مون عشان سعود
سلطان:منهو ؟
نورا:شهر العسل
سلطان:لا ما نكنسله ولا يهمك بس يمكن نزيد تذكره
نورا:لمين ؟
سلطان:لسعود
ضحكت نورا :سلطان !
سلطان:تلهفت على ولد بهاج اكثر من لهفتي لك
نورا:بتخليني ابدأ اغار منه !
سلطان ضحك ومشت بالاغراض بيدها واخذها سلطان بيحاسب ولفت تشوف قصاصة الاظافر الصغيره وهمست:سلطان يابيبي شوف
سلطان لف عليها:منهو ؟
نورا لفت عليه وضحكت:يابيبي
عض شفته وهو يطلع بوكه والتفت يحاسب وخرجت معاه وركب ولف لها:تقولين لي يابيبي وانا بهالشنب ؟
نورا:مو حلو اناديك يابيبي ؟
سلطان سكت ثواني:عيديها اسمع
نورا ابتسمت وتقدمت له:يابيبي
فهى ثواني يناظرها وتقدم لها يبوس خدها وضحكت تبتعد عنه وابتعد:بس ما تناديني قدام احد بالله مابي احد يشهد خضوعي
ضحكت وهزت راسها وحرك سيارته سلطان
-
لابسه فستان ساتر سكري وسيع وحجابها على راسها وتسمع سوالف أعمامها مع عمر اللي جالس جنبها ولفت لنورا اللي تقدمت تمد لها سعود واخذته بحضنها وابتسمت تناظره
وتكلمت بهدوء نورا وسط اصواتهم:يشبه بهاج نسخه
ضحكت أنهار وتقدم سلطان يهمس:انتي شوفي تعقيدة الحاجب وتعرفين
ضحكت وهي تبوس جبين سعود ولفت نورا لسلطان؛هو فينه اصلاً بهاج؟
رفع كتفه سلطان وابتسم وناظرته نورا بنص عين وصد عنها
دق الباب ودخلوا عاملتين معاهم بوكيه ورد كبير وابتسمت أنهار تعض شفتها وحطوها جنبها وابتسم عمر؛ماشاء الله تبارك الله
دخل بهاج وناظر أعمامه:يالله حيّهم
وقفوا يباركون له ويسلمون عليه وابتسم بهاج:اللهم امين ماقصرتم
زيد:قلنا نجي خفاف نسلم ونبارك وان رجعتوا للرياض نزور ام سعود ببيتها
ابتسم بهاج:ما تقصرون
عبدالله:نستأذن الحين دام شفناك ، هاه ياعمر
عمر وقف:اقعدوا اقعدوا ونطلع سوا عشاكم عندي
زيد:مستعجلين ياعمر المره الجايه
بهاج:لا والله تتعشون هنا
عبدالله:ليه تحلف يارجال
بهاج:يمين وعطيناه
زيد:نريح ونجيكم بعد صلاة العشاء ان شاء الله
عمر:حياكم الله
خرجوا ومدت يدها نورا تقرأ الكرت على الورد:جنتل
مدت كفها أنهار تاخذه وتقراه:حمدلله على السلامه زوجتي وحبيبتي وراس مالي أم سعود والله يجعله من الصالحين والبارين فيني وفيك
ناظرت بهاج بحنيه:اووه
ضحك بهاج وتقدم يجلس جنب عمر وابتسم عمر يوقف:هاتيه من حضنك
اخذه وجلس جنب بهاج وابتسم بهاج يناظره
ولانت ملامحه من طلع من جيبه ظرف عمر ومسك ذراعه بهاج
عمر:لا تدخل ماهي لك لسعود
ضحك بهاج:لا والله مالها داعي ماتقصر
عمر حط الظرف ببطانية سعود وناظرته أنهار:بابا ! ماله داعي
عمر:هديتي هدية سلامتك
ابتسمت أنهار:ماتقصر ياحبيبي
عمر لف لبهاج يعطيه سعود ولف لأنهار:برجع البيت ان احتجتي شي كلميني
هزت راسها له وابتسمت وتقدم يبوس راسها وجا بيخرج على دخول فهد يجري ودخلت خلفه ريوف:نذاله يعني تجري تسبقني عشان ما الحقك ؟ ترا اجري واضيع ولدك
فهد:سلام عليكم
ريوف:بابا رايح؟
عمر ابتسم:تأخرتوا
فهد:اشتهت تشم ريحة الطين عند البحر اشغلتنا
ريوف صدت عنه وضحك عمر:يالله سلام
خرج وجلست ريوف تناظر الورد:خيااال مين جابه؟
ابتسمت أنهار:أبو سعود
لفت ريوف لفهد:احفظ عشان تسويها كل شي مسجل ترا
فهد:الله يعين بالله بهاج لا تكثر
ضحك بهاج:لا الهديه ماوصلت للحين
ضحك سلطان وناظره بهاج:ان نطقت بشي طردتك
غطى فكه سلطان وناظرته نورا:والله عارفه انك مخبي علي شي
أنهار:ايش بهاج ؟
بهاج وقف وحط سعود بسريره وناظرها وهو يحط يده بجيبه:الهديه صغيره بجيبي
فهد:بجيبك ؟ اكيد حاط شنطه
ريوف دقته:اش شنطه يقولك بجيبه يعني شي اصغر يمكن بوكيه ورد ثاني
ضحك فهد وناظر أنهار بهاج وعضت شفتها:دبله جديده ؟
هز راسه بالنفي وناظره سلطان:اخلص والا انا قلت
بهاج:انت انكتم
أنهار:يالله بهاج بموت من فضولي
بهاج همس:اسم الله عليك
دخل يده بجيبه ومبسمه متسع وطلع من جيبه مفتاح سياره
ورفع يدينه على راسه فهد وشهقت ريوف وعضت شفتها أنهار بصدمه
نورا:جنتل بهاج واللي يقول غير كذا ما يفهم
أنهار:سياره ؟
هز راسه ومد لها المفتاح:تسوقينها مع سعود واخواته ان شاء الله
ابتسمت تناظره:ومع ابوهم
ابتسم وضحكت تاخذ المفتاح وجلس على طرف السرير ومسكت كفه:بهاج !
بهاج ابتسم؛تستاهلينها ام سعود
ريوف دقت ذراع فهد اللي يناظر السقف ولف فهد لبهاج:الحين بالله بهاج عشان أنهار جابت لك سعود تشتري لها سياره ؟ طيب كيف اقدر ازرع رحم ؟
ضحك بهاج ولف سلطان اللي ضحك يضرب جبينه ولفت ريوف عليه:لا تفكر بصوت عالي بالله
فهد:اي والله شكلي جبت العيد
نورا:بالعافيه عليك أنهار واعدتنا بفره
أنهار ضحكت وهي تشد على كف بهاج؛ان شاء الله
-
وقفت تشيل سعود اللي نايم بحضنها وبهاج شايل اغراضها واغراض سعود وخارج من المستشفى معاهم وابتسامته ما غابت عن وجهه من الفرحه دخلوا المصعد وابتسم يناظر انعكاسهم وضحكت أنهار من طلع جواله يصورهم سوا معاه وابتسم يناظر سعود اللي نايم:نايم الشيخ
ضحكت وخرجت معاه وركبت السياره وهي حاضنته وحرك سيارته بهاج والتفت يناظرها ماسكه كف سعود ومسك كفها يناظر اصابع سعود الصغيره
وضحكت ولفت تناظره عيونها تلمع من الفرحه وابتسم يوقف عند بيت عمر ولف لها:قبل طيارتي بمركم
أنهار:بتطول بالرياض بهاج ؟
بهاج هز راسه بالنفي:لا يابوي بشوف بيت ابوك اللي هناك وارجع امي معي وبعدها اجيكم اخذكم ونرجع للرياض سوا لبيتنا
ابتسمت أنهار وكمل بهاج:ما اشتقتي للبلكونه ؟
ضحكت وهزت راسها:مره
بهاج تقدم يناظر سعود وباس جبينه ورفع راسه يبوس خدها:اصبري اساعدك
نزل من سيارته وفتح الباب وشال سعود من حضنها واخذ الشنطه بذراعه ودخلت أنهار وبهاج وراها تنحنح
وجاه صوت عمر:تعال محد موجود
دخلت أنهار:فين البنات؟
عمر:ريوف عندها موعد راحت مع فهد ونورا وسلطان جايين
أنهار:ما بيسافرون ؟
عمر:الا بس بيجون قبل
بهاج حط سعود على الكنبه ورفع راسه لعمر:توصي شي؟
عمر:سلامتك ما تقصر يابهاج
بهاج:ان وصلت للرياض بخلص امور بيتك ان شاء الله واكلمك
عمر:ماتقصر
بهاج لف لأنهار:سلام
أنهار ابتسمت وخرج بهاج وتقدم عمر يناظر سعود وابتسمت أنهار تنزل عبايتها
خرج بهاج وجا بيركب ولف من دق بوري سلطان ووقف خلف سيارته وقفل بابه بهاج ومشى لهم
نزل سلطان:ابو سعود
بهاج ابتسم:العرسان
نزلت نورا:ودعونا بتشتاقون لنا
بهاج:يالله انبسطوا
دخلت نورا وصافح سلطان بهاج وناظره بهاج:ان بغيت شي ارسلي
سلطان:ما تقصر سعود داخل؟
ضحك بهاج:داخل
سلطان:بدخل اسلم عليه
بهاج:وانا رايح بنام وراي رحله للرياض بالليل
سلطان:الله يوفقك
مشى بهاج لسيارته وحرك ودخل سلطان البيت وناظر نورا اللي شايله سعود
جلس جنبها:الشيخ سعود
عمر ابتسم وناظرته نورا:أنهار فين ؟
عمر:بغرفتها
نورا مدت سعود لسلطان:بشوفها واجي
شال سعود سلطان وابتسم ورفع راسه على صوت عمر:عقبالك ياسلطان
ابتسم سلطان:اللهم امين بحياتك
دخلت نورا عند أنهار ولفت أنهار وهي تنشف شعرها:عروستي
نورا ابتسمت:ماما أنهار
أنهار:بتسافرون ؟
نورا:ايوا جينا نسلم على بابا كويس كنتي موجوده
أنهار:متى راجعين ؟
نورا:بناخذ شهر حياتي
رفعت حاجبينها بذهول أنهار:بايعين الدنيا  العرسان
نورا ضحكت:بنجي وسعود يستقبلنا
ابتسمت أنهار:اوف بهاج بيجيني بعد اسبوعين ودي اشتري فستان حلو مين بيساعدني ؟
نورا:ريوف موجوده
أنهار:ريوف مستفرده بفهد طلبات
نورا:صوري لي واختار معاك
أنهار:لا انبسطي مو مشكله اروح لحالي اشوف
نورا حضنتها وابتسمت أنهار:انجوي
نورا:ان شاء الله
خرجت وناظرت سلطان واقف:هيا ؟
تقدمت نورا تحضن عمر وباس راسها:انتبهي لنفسك
نورا:وانت كمان ، نجيكم الرياض ؟
عمر:ان شاء الله بهاج بيروح يشوف البيت واسبوعين نروح للرياض
نورا:ان شاء الله
مشى معهم عمر للباب وخرجوا يركبون سيارتهم
-
ركبت السياره وسعود بالكارست جنبها وعمر يتكلم مع بهاج اللي يوصف له الطريق:ماهو بعيد ياعمي هذي الدخله لبيت عمامي زيد وعبدالله وانت من الشارع المقابل
عمر:وبناتي ؟
ابتسم بهاج:ريوف قريبه منك لكن أنهار بعيده
لف لعمر وكمل:أنهار بقلبي
ضحك عمر وابتسمت أنهار تعض شفتها ووقف عمر عند البيت وناظرته أنهار:بابا انزل معاك؟
عمر:لا روحي بيتك ولدك صاح بالطياره لين شبع
بهاج نزل وناظر سيارة فهد:المجانين داخل
ضحك عمر وهز راسه:ماقصرت ابو سعود
بهاج ابتسم له يهز راسه ولف من نزلت انهار تركب يمينه ومشى يركب سيارته والتفت يمد كفه:ابوك قعد بيني وبينك مدري هو قصده يختبر شوقي والا وش ؟
ضحكت تحضن كفه بكفوفها:وااي بهاج وحشني بيتنا
بهاج ابتسم:مسوي لك مفاجأه فيه
أنهار:والله ؟ امانه ايش
بهاج:ان وصلنا تشوفين
أنهار ابتسمت ومن وصلوا للبيت نزلت ونزل بهاج يشيل سعود من سريره لحضنه ومشى يدخل وأنهار خلفه
ودخل البيت وفتح أنواره وابتسمت أنهار تناظر البيت ، اول مكان كانوا يختلون فيه عن الناس ويصدقون شعور ما يحسونه غيرهم ، شعور انها زوجته وحبيبته ماهي اخته
تكررت عليها مشاعر بوساته لها بالبيت هذا وجيّاتهم المتكرره له وابتسم يشوف نظراتها
ومشى يحط سعود بسريره وشغلت كاميرا صغيره أنهار وهي تغير له وتنومه بسريره
خرجت ومشت للغرفه وفتح الباب بهاج وابتسمت بذهول تشوف الورد والبالونات والطاوله والهدايا وعضت شفتها تلف تناظر بهاج اللي ضحك:حياك ام سعود
تقدمت تدخل وبللت شفايفها بربكه ترفع شعرها وفصخت عبايتها ولفت له:مناسبة ايش ؟
بهاج؛انك نورتي بيتنا من جديد
ابتسمت له ومشت تحضنه وغمض عيونه يحضنها وباس عنقها واخذ نفس من عطرها وباست خده تبتعد:تدلعني !
بهاج:من زمان
أنهار ناظرت ثوبه ورجعت ناظرت عيونه:كاتب لي على الكرت نورتي بيتك أم سعود ؟
ضحك لانه فعلاً كتب لها كذا وتقدم بيبوسها وابتعدت:بشوف الهدايا حقتي
بهاج تنهد ومشت تفتح الهدايا وتعلق عليها وطلعت شنطه من البوكس:بهاج ! أحُب هذا البراند
بهاج رفع حاجبينه:منهو ؟
ابتسمت:أحُبه
بهاج تقدم لها:وتحوبيني ؟
ضحكت تمسك عنقه من تقدم يبوسها وانحنى لها وهي جالسه ورفعها من خصرها يبوسها
سحب شماغه وعقاله عن راسه وحطه على السرير وانحنى فيها يبوسها وعقد حاجبينه يسمع صوت بكاء سعود وناظرها
عضت شفتها تاخذ انفاسها ولفت تشوف الكاميرا اللي عندها وصورة سعود يبكي
بهاج:نسينا وش بيصير ان جانا سعود
ابتعد عن أنهار وانسدح بملل وجلست وهي ترفع شعرها وسحب ذراعها وضحكت توقف وتناظره وتخرج برا
وهمس بهاج؛ليه ياسعود يابابا ؟
-
دخل عمر وصرخت ريوف ترحب فيه وفهد يحاول يفك المفرقعات اللي بيده ولفت ريوف:خربت الحفله كلها
فهد فتحها وانفجرت وضحك عمر يهز راسه بالأسف
ريوف:انا الوحيده اللي اتذكر يوم ميلادك
تقدمت تحضنه وابتسم عمر يناظر الكيكه اللي بالنص وابتسمت ريوف:اول يوم ميلاد ببيتنا الجديد وان شاء الله ١٠٠ سنه ياحبيب ريوف
ابتسم عمر يبوس راسها وهو حاضنها وتقدم لفهد اللي نطق:مبروك البيت عمي بيتٍ عامر ان شاء الله
عمر ضحك منهم:امين اللهم امين بوجود عيالكم
ريوف:شغل الاغنيه فهد
فهد شغل الاغنيه بالتلفزيون واشتغلت اغنية الميلاد بالانقليزي وضحك عمر من رقص فهد قزوعي وضحكت ريوف:معتوه
رفعت جوالها تصوره وتصور الكيكه وعمر:بابا طفي الشمعه وتمنى اني اجيب بيبي يشبهك
فهد:الله كريم
نفخ الشموع عمر وتقدمت تحضنه ريوف من جديد وابتسمت تجلس وتحط الكيكه بالصحون وجلس فهد بالارض عند الطاوله:لا تحطين لي بصحن باكل لوحدي
ريوف:جرب الحس باصبعك وشـ
قاطعها يلحس بإصبعه وعمّ السكوت وضحك عمر وضحك فهد من نظراتها ولفت لعمر:بابا !
عمر:خليه ياكل بالعافيه
رفع حاجبينه يغثها ولفت وهي تاكل:بابا ماجبنا هديه بس عندنا هديه احلى
فهد:عمي الهديه بتزين ان وقفت بصفي
عمر:وش الهديه ؟
ريوف ابتسمت:انت تسمي البيبي بنت او ولد
عمر ابتسم ولف فهد:تكفى عمي لا تسمي نفس اسامي بنتك تراها بتسمي ولدي دانيت شايفته شركة لبن
ريوف:مو دانيت ! دانيال
ضحك عمر ولف فهد:بالله هذا اسم اسألك بالله ؟ والا البنت اللي بتسميها نشارّه
ريوف:شليويح ! ناتاشا اسمها مو نشارّه
عمر ضحك وهو ياكل:وانت وش ذوقك
فهد:الولد سعيد عشان يكون سعيد دايم والبنت سعيده
ريوف:اوكيه ما بقول شي انا
ضحك عمر وهز راسه وحط الصحن:انتم صاحين؟
ريوف:بابا قوله لا يغثني !
عمر:لا انا بسمي
سكتوا وناظرهم عمر:الولد عبدالمحسن انت ناده محسن وانتي ناديه عبودي واذا بنت سموها رفيف تاخذ من حروفك وحروفه
فهد:انا موافق جاز لي الاختيار
ريوف سكتت شوي تفكر وناظرها فهد:وافقي يالدعله
ريوف:عشان اختيار بابا بس
ضحك عمر وكمل يلحس الكيكه فهد يغث ريوف