رواية انثنى غيم نجد لخد الحجاز النرجسيه الفصل الثامن والستون 68 - بقلم شُروق

دقت الباب نورا ودخلت ومعاها عصير وابتسمت أنهار:تأخرتي
قفلت الباب نورا ومدت العصير:طولت شوي بالدوام كان في اجتماع
اخذت العصير أنهار:ثانكيو
نورا جلست بتعب:ما قالت شي الدكتوره ؟
أنهار:قالت تنتظر استشاري بيخلص اجازته ويشوف حالتي
نورا:بالله ؟ ومتى يخلص اجازته صار لك يومين هنا
أنهار:ما اعرف وطفشوني بالتحاليل نورا كلميها تكفين خلاص ابغى البيت مافيني شي يعورني
نورا:اوكيه اشربي عصيرك انتي الحين اشوفها
وقف وانفتح الباب ودخلت الدكتوره وابتسمت:بالعافيه ، الدكتور معاي
هزت راسها أنهار ودخل الدكتور:سلام عليكم
أنهار:وعليكم السلام
الدكتور:كيفك أنهار ؟
هزت راسها له وجلس الدكتور وناظر الاوراق اللي بيده:طيب انا شفت التحاليل ولاحظنا ان الالم نتج من نزيف داخلي
عقدت حاجبينها بخوف أنهار وتقدمت نورا تمسك ذراعها بصدمه
الدكتور:كان تحذير اجهاض وطبعاً لازم يكون في سبب وبعد التحاليل عرفنا انه في اجسام مضاده تحارب الجنين
رجفت بخوف أنهار:يعني ايش ؟ بيموت ؟
الدكتور:لا لا البيبي بخير لكن ممكن الاجسام المضاده تسبب إجهاض لاسمح الله لانها تحارب البيبي بالرحم
أنهار نزلت دموعها وناظرتها نورا:أنهار لا تبكين !
الدكتور:الموضوع ان شاء الله بسيط بوصف لك على إبر راح تاخذين الإبر يومياً لين الولاده وبعد الولاده توقفينها عشر ايام وترجعين لها لين فترة النفاس كامله
أنهار:والبيبي ؟
الدكتور:البيبي بيكون بخير ان شاء الله بس بالمحافظه على الإبر
نورا:الإبر ماراح تضر أنهار ؟
الدكتور:لا لا بس ممكن تقلل مناعتها بس مافي اعراض جانبيه خطره
أنهار مسكت بطنها وكمل الدكتور:في زي حالاتك كثير ومافي شي يستدعي الخوف او الدموع وان شاء الله ربي يسهلها وتشوفينه في حضنك
نزلت راسها أنهار تبكي بتعب وحضنتها نورا بهدوء ووقف الدكتور يخرج وناظرتها الدكتوره وابتسمت:تبغين تسمعين نبض البيبي ؟
لفت نورا لأنهار اللي تبكي وتناظر الدكتوره وتقدمت الدكتوره للسونار
لفت أنهار تتمسك بكف نورا اللي واقفه عندها وبدأت الدكتوره تكشف عن بطنها وثواني اشتغل صوت نبض البيبي وابتسمت الدكتوره:هذا نبضه
ابتسمت نورا وعضت شفتها تشد على كف أنهار
نزلت دموعها أنهار وهي تسمعه لفت تناظر السونار وعيونها تمليها الدموع
الدكتوره:عمره ٨ أسابيع
نورا ضحكت:ومتى نعرف جنس البيبي ؟
الدكتوره:اذا كان البيبي واضح بيبين الشهر الرابع بدايته او الخامس
نورا شدت على كف أنهار:نبغاها بنوته أنهار
ابتسمت بين دموعها أنهار لنورا ولفت للسونار
'
دق باب غرفتها وفتحت له ومد لها الورقه وناظرتها واستغربت لين نطق:تذكرتك حجزت لك بكره العصر
شموخ:ماراح ارجع
بهاج عقد حاجبينه:ليه ؟
شموخ:قلت لك ماراح اترك سلطان وهو كذا اذا انت ماتبيني اكون موجوده مشكلتك بهاج انا ماراح اخلي اخوي
بهاج:وسلطان منهو عندي ؟ ماهو اخوي انا بعد ؟ ظنك بخليه ؟ لكن وجودك هنا ماله لزوم ارجعي لاهلك وانا اطمن اهلك
شموخ تقدمت له:تعاقبني يعني ؟
غمض عيونه من تنرفز ولف يضرب بابها بكفه بعصبيه:اطلعي من راسي شموخ ، لا تسوين المصايب وتلوميني ؟ من اللي سبب كل ذا ؟ من اللي خلانا كذا ؟ ماهو انتي وخططك مع امي ؟
شموخ ناظرت عصبيته وسكتت وكمل بهاج:ارجعي لاهلك انا ما ينقصني وجودك ، اقطعي الشر وارجعي جلستي اسبوع وهذا يكفي
شموخ هزت راسها ومشى بهاج تاركها وقفلت الباب خلفه وجلست تبكي غطت وجهها تبكي وجلست بالارض هي حاولت ولو كانت طرق محاولاتها خاطئه الا انها كانت تبيه ليه ماشافها ليه تمكنت أنهار تسرق قلبه وهي عاشت سنين عمرهم وطفولتهم ولا التفت لها ؟
مشى بهاج لغرفته وفتح الباب ودخل انسدح على ظهره بتعب وناظر السقف هو تعبان ومتعور من داخله ويحس انه يحارب دون اسلحه وجسمه معرّض لكل ضربه ، كل اللي يحتاجه وجودها عطرها بالمكان حسّها ضحكها
غمض عيونه بقوه:اهخ أنهار
جلس واخذ جواله يناظر رسالة ابراهيم:فهد بالرياض ساكن بشقه مع زوجته واشتغل بشركه اذا تبي عنوان بيته او شغله كلمني
تنهد من عرف ان فهد مع ريوف ما خلاها وهي قربت تتخرج وما بقي لها غير اسابيع قصيره ، يوم تخيّر اختار فهد يكون مع ريوف بعيد عن اهله وبعيد عن المشاكل وياليت بهاج تخيّر واختارها بعيد عن اهله لكن ما تركوا له خيال هم اجبروه وحدّوه
واكيد نورا وأنهار عند فهد وريوف اكيد انهم بالرياض وعرف عنوانهم الجديد وبيرجع كل شي كل شي بيرجع من جديد
فتح جواله يدور رقمها ووقف عند شباكه يوجع يتصل عليها من جديد لكن انتظر ولا لقي رد
تنهد وقفل جواله ومشى يفتح لابتوبه ويشغله وسحب دخانه ياخذ سيقاره منه ويشغلها ويدخن
'
دخلت الحمام وجلست على طرف البانيو وكشفت عن فخذها واخذت الإبره بيد راجفه هي ماتعودت هي لها مده تستخدم الإبر وبكل مره تدخل بجلدها تبكي وتنفجر مشاعرها وفعلاً من حست بوخز الإبره بكت لانها قاعده تعاني وحدها قاعده تحارب عشان يسلم البيبي ببطنها وتظفر بوجوده بعد كل هذا التعب بعد كل هذي الوحده ، تتمسك بأطرف شي يوصلها لبهاج يربطها فيه
بلعت ريقها ومسحت دموعها من دق الباب:طالعه نورا
تقدمت وغسلت وجهها وخرجت وناظرتها نورا:اش قررتي بتجين؟
أنهار:اش يوديني نورا المكان كله شغل
نورا:ميتنق فيه شركات كثيره وبلقي كلمه عن الشركه اللي اشتغل فيها ما بتخليني لوحدي صح
تقدمت تشوف جوالها اللي يدق وهمست نورا:مين ؟
أنهار:رقم دولي ما اعرفه
قفلت جوالها ولفت أنهار:انتي قدها بتقدرين تتكلمين وبيكون شكلك احلى وحده بالمكان بس فكيني من الاجتماعات مع البشر
نورا:لا ، بتجين بليز أنهار لي اسبوع اطلبك
أنهار تنهدت:اذا حسيت ان المكان مو مناسبني برجع
نورا ابتسمت:اوكيه وعد
أنهار تنهدت:طيب خليني انام الحين
نورا رمت لها بوسه بالجوّ وابتسمت أنهار وطلعت نورا من الغرفه
مشت نورا غرفتها واخذت جوالها ناظرت رسالة ريوف:صوري لي شكلك ما بقدر اجي
عقدت حاجبينها نورا بضيق وقفلت جوالها بدون ماترد على ريوف ، هي تفتقد كل شي يخليها تكمل وتتخطى وتكون قويه لكن تضغط على نفسها تحارب عشان تكون بخير قدام نفسها وقدام أنهار وقدام الموظفين بدوامها ، هي من شدة الضغط احياناً تختلي بنفسها بنص دوامها عشان تبكي عشان تفرغ عن اللي بداخلها
كل ماتذكر انها انهارت بعد ما طاح بيدها ملف مكتوب فيه اسم لشخص غريب اسمه سلطان كل ما تحس انها انكسرت انخذلت وتعبت
هي يوم حبت لأول مره ابوها كسرها وبندر خذلها ويوم عطت فرصه لسلطان بعد مده طويله من الخوف خذلها وتركها وهجرها بدون سؤال بدون وداع ، يوم كان ابوها الحب الثابت بحياتها شافت منه كل الضرر كل الخوف والضرب والقسوه والخشونه
'
حطت البيتزا بالفرن وهي تراقبها وسمعت صوت الباب وابتسمت بتوتر تلف تناظر انعكاسها بالفرن وتعدل شعرها
هي من متى كانت كذا ؟ متى كان وجود فهد يربكها ؟ يوترها ! ، متى صارت تسوي له الغداء وتنتظر قدومه وهي لابسه احسن فساتينها ؟
نزلت نظرها للبيتزا اللي طلعتها من الفرن حاره ورفعت صوتها من ناداها:هِنا
دخل وفصخ شماغه وابتسم:ياسلام وش هالمنظر الحلو ؟ وش هالريحه الحلو ؟ وش هالحظ الحلو لك يافهد ؟
ابتسمت تناظره وتقدم يناظرها:كل هذا لي ؟
لفت تصد عنه وهي تضحك وكمل:ما أجملك
نزل انظاره للبيتزا:ما اجملك وانتي حاره كذا
لفت من اكتشفت انه يقصد البيتزا وضحك من شاف وجهها ونظراتها:والله اني امزح معك
ريوف:الشرهه على اللي قامت تسوي لك بيتزا رغم اني المفروض انام بالأوف حقي
فهد ابتسم:طيب تعالي ابوسك
ريوف ضحكت:خذ الاغراض وخلنا ناكل بالصاله
لفت تتجاهله ومشى لها يحضنها من ظهرها وضحك:بهذا الانجاز اللي سويتيه وطبختي لزوجك عازمك
ريوف لفت عليه:والله ؟ مطعم ؟ والا كوفي ؟
عقد حاجبينه:وش مطعمه ؟ تسمعين بالثمامه ؟
ريوف غمضت عيونها وهمست:صدعت تكفى
فهد:علامك ؟ والله ان القعده معك وسط هذيك البراري تسوى الدنيا ومافيها بس طاوعيني وانا رجالك
ريوف:اففف شليويح لو ادري ما صرّحت بحبي كل شوي تذكرني انك زوجي
ضحك فهد:بس ناديني فهد يرحم امك
ضحكت تبتعد عنه:ههاي تحلم ياحبيبي
فهد ابتسم:او ناديني حبيبي كذا
لفت من لاحظت عفويتها وضحكت بربكه من اللي يعيشونه سوا وخرجت والبيتزا معاها واخذ العصيرات وفتح الببسي حقه وجلس ياكل معها وهو يطالع بالتلفزيون
لف من تذكر:العيال قالوا لي ان ابراهيم سأل عني اكيد بهاج قال له
لفت عليه وهي تاكل:وينه بهاج؟
فهد:مدري ، تتوقعين لو عرف مكان شغلي بيجيني ؟
ريوف تنهدت:ياليت ، فهد دام كلمت خواتي وهم بجِده هذا يعني ان سلطان وبهاج لوحدهم مانعرف هم وينهم الحين ، جرب تكلم بهاج خله يجي نشوفه
فهد:لو بفتح مجال لأحد اكلمه كان كلمت امي وابوي لي شهرين وعليها ما كلمتهم
ريوف:طيب جرب كلم امك اول والله فهد مرت ايام طويله واحنا لحالنا
فهد تنهد ورجع ظهره لورا يفكر ثواني ولف لها وابتسم وناظرته:اشبك كمان تتبوسم ؟
فهد:ان بغيت اكلم امي ببشرها بحفيدها
ناظرته بهدوء ريوف لين نطقت:تغدا عشان لا اغديك انا
ضحك لانها تقلد اسلوبه ولفت عنه تشرب عصيرها وتقدم يلعب بشعرها:يعني بالله وش شعورك وانتي تنامين بحضني بعد كل ذا الايام ؟ يعني بالله توقعتي
ريوف:الظروف حدتنا
ضحك لانها تتصدد عنه وحاوط كتوفها يسحبها لحضنه وضحكت وهي بحضنه:طلقني ياثقيل الدم
ابتسم فهد وهو محاوطها بحضنه وناظرته ريوف:اكيد ناسي ان وراك بيتزا بتاكلها
فهد:فاتح شهيه مايضر !
تقدم يبوسها وابتسمت وسط قبلاته لها وهي تحاوط رقبته وابتعد عنها يعض شفته يناظرها وضحكت من نظراته:تغدا
ضحك وابتعدت عنه وتقدم ياكل واكلت معاه
'
جلس على الكراسي وجهه اسود من الضيق والهمّ رفع راسه من تقدم الدكتور بالأوراق ووقف بهاج يسمعه يتكلم ويبلغه كم بتاخذ وقت العمليه ونسبة نجاحها ، أضرارها والنتائج بعد العمليه اللي ممكن تظهر لهم
هو تعب واخذ وقت طويل مع سلطان بألمانيا بدون نتيجه بدون ما يتغير حال سلطان أو يتحسن وأنهد حيله من الوقت اللي مشى فيه وهو وحده ، وحده مع جسد سلطان بس
والغربه كوَت صدره والهوجاس والذكريات أتعبته ، متغرب عن مشاعره عن وطنه عن اهله لوحده ، متغرب صدره وروحه وقلبه ، انهلك من سهره ومن اصوات عقله من ذكرياته
قضى الليل لوحده بالمستشفى ينتظر خبر من عملية سلطان اللي بدوها من وقت
رجع راسه لورا يناظر السقف وشبك سماعته باذنه الثنتين وظل يناظر السقف لين ماغفت عيونه ، لين ما انتقل من حاضره لمنامه من واقعه لحلمه ..
تقدم يناظرها منحنيه وشعرها منسدل على ظهرها وبيدها تسقي الزرع ، لابسه فستان قصير بنك وأبيض وشوز أبيض وتقدم لين حست عليه ولفت تناظره وابتسمت:شفت كيف طلعت الشتلات حلوين هنا ؟ حوالين المسبح
ابتسم بدون مايرد عليها ورفعت شعرها خلف اذنها:ريحة الورد بالمكان خيال ، متحمسه اطلع هنا الصباح اشرب قهوتي
لفت له وعقدت حاجبينها:متى تجي الشمس ونفطر هنا ؟
رفع انظاره لأهداب عيونها لحجاجها لمنافذ النور من وجنتها من تورد ثغرها وهمس:لا تزرعين الـورد و انتي عبيره ‏ولاتحترين الشمس وأنتي الصباحات
رفع يده على وجهها يلمسه ويزيح شعرها بملسات رقيقه تناسب رقة المخلوق اللي أمامه
استنشق اكبر قدر ممكن من رئته عشان يصدق انه حقيقه عشان يتأكد ان اللي يشمه حالياً هو عطرها
لكنه فتح عيونه وجلس يفزّ ونزل سماعاته وبلع ريقه يناظر مكانه والتفت يشوف المستشفى فارغ وهادي ونزل انظاره لكفوفه بهدوء واخذ نفس ومسح وجهه ووقف يمشي راجع لغرفة العمليات وجلس عندها ينتظر
لف من انفتح الباب وخرج الدكتور ووقف بهاج بربكه ومال براسه بتعب وهمس:تكفى ياسلطان
نزل كمامته الدكتور وتقدم لبهاج وابتسم له وناظره بهاج برجا لين هز راسه ونطق:نجحت العمليه
ابتسم بهاج وضحك بعد ثواني ونزل راسه يهزه براحه ورجع رفعه يسمع كلام الدكتور اللي استكمل:ممكن بعد بنج التخدير بالعمليه يفوق و نطمئن على حالته وباقي حواسه
هز راسه بهاج وتقدم لغرفة العمليات وحط جبينه على الباب وغمض عيونه:ادري بك ما انت مخليني ، ادري بك يا سلطان
فتح عيونه وابتسم وتلفت حوالينه يناظر وحدته بموقفه هذا وهمس:حمدلله حمدلله يارب
-

دخلت القاعه تناظر الحفل والطاولات والمقاعد والستيج وتقدمت من نورا اللي متحمسه:تعالي شوفيهم
مشت مع نورا وناظرت الطاوله اللي عليها موظفين وابتسمت نورا من نطقت وحده من بينهم:اخيراً
نورا ضحكت:أنهار اختي عطلتني
ابتسمت أنهار تناظر الموظفين:مرحبا
صافحت البنات ولفت نورا:مديري تعالي بالله سلمي عليه
لفت أنهار وتقدم لهم وابتسم لهم من قدومه ووقف قدام نورا:توقعنا ماراح تجين
نورا:لا كويس لحقت
لف يناظر أنهار وابتسمت نورا:اختي أنهار
هز راسه:أنهار ! حلو إسمك
ابتسمت بهدوء أنهار ولفت لنورا:بجلس هنا قريب
نورا:اوكيه
مشت واخذت نفس وجلست على كرسي تناظر المكان هي مو مرتاحه بوجود الكمّ الكبير من البشر حوالينها لكن اضطرت عشان نورا وعشان ما تبقى لحالها
بدأ الكلام وبدأت الشركات تتكلم عن افكارها وهي تجهل كل هذا تجهل شغلهم وكلامهم وانتظرت لين وقفت نورا وابتسمت لها
وبدت نورا تتكلم بإسم شركتها بكل ثقه وميلت شفايفها أنهار تتأملها ، هم لوحدهم سوا بالوقت اللي تخيلت انها تكون بهذا المقعد ويمينها ريوف وأبوها وبهاج وفهد وسلطان لكن كانت لوحدها ، لوحدها قدام نورا اللي تتحدث عن الشركه اللي تشتغل فيها
كانت نورا تتجاهل انظار الحضور وتخفي توترها مركزه على كلامها والكلام اللي معروض بالشاشه قدام الجميع ، اخذت نفس وسط كلامها من شدة توترها ولفت تناظر الحضور وبلعت ريقها من انتهت من حديثها وسمعت صوت تصفيق الحضور ونزلت راسها للاوراق ونزلت من الستيج وتقدمت لأنهار اللي وقفت لها وابتسمت تحضنها
أنهار:كنتي زي القمر
نورا ضحكت:توترت كيف كان شكلي امانه؟
شدت على كفوفها:زي القمر زي القمر ياعيوني
نورا تنهدت بتوتر وعضت شفتها تجلس جنبها وجلست أنهار تناظر الحضور
ولفت من نطقوا بإسم الشركه اللي تعرفها ونطق الرجال اللي واقف على الستيج إسم ابراهيم
رجفت بخوف ولفت بسرعه تناظر المكان اللي ينتظرون منه ابراهيم ووقف ابراهيم من الجهه المغايره لمكانهم يتقدم للستيج
دارت بعيونها بالمكان خوفاً من انه يكون موجود ، يكون مع ابراهيم وبين موظفين الشركه لكن ماشافته ولا لقته
عقدت حاجبينها نورا من شافت ابراهيم واقف ولفت لأنهار:تتوقعين بهاج موجود ؟
ماردت أنهار وهي تتلفت بين الحضور وتناظر وجيههم وعقدت حاجبينها نورا تناظر ابراهيم اللي انتبه لوجودهم وبلعت ريقها تلف لأنهار وتشد على كفها
نزل ابراهيم وتوجه لهم ووقفت نورا من تقدم:اهلاً وسهلاً ، زين شفناك ام سعود كيف الحال ؟
سكتت أنهار تصد عنه هي ودها ما يناديها ام سعود ابد
ولفت نورا عليه من سكوت أنهار:حمدلله
ابراهيم:ماشاء الله شفتك كيف قدمتي شركتكم كان تقديم ممتاز واعطيتيهم حقهم
نورا ابتسمت بهدوء:حمدلله
ابراهيم بلل شفايفه يناظر أنهار ورجع ناظر نورا:كان المفروض تلاقون بهاج معي لكنه مشغول
نورا لفت من مشت أنهار تترك المكان ورجعت تناظره:بهاج وأنهار انفصلوا
هز راسه ابراهيم:عندي علم واعتذر لو ضايقتها او ضايقتكم وما تشوفون شرّ اجمعين
مشى تاركهم ولفت نورا تلحق أنهار ولفت أنهار:برجع البيت نورا برجع احسني مخنوقه
نورا:اوكيه بجي معاك طيب
أنهار:لا اجلسي وخلصي من شغلك والحقيني
نورا:اي شغل منجدك؟ بجي معاك ماراح اخليك
أنهار مسكت ذراعها:نورا ! اجلسي انا بخير بطلب سياره وارجع لحالي
نورا:أنهار
ماردت أنهار ولفت تضغط المصعد ولفت نورا تدخل المكان
طلعت من المصعد ووقفت عند باب الفندق وهي مخنوقه ورفعت راسها تاخذ نفس ، هي ارتبكت وتبدل حالها من شكت انه حاضر انه موجود كيف لو صادفته كيف لو شافته
لفت وعقدت حاجبينها من سمعت احد يناديها:أنهار
ناظرته يتقدم لها ووقف وعقد حاجبينه:عسى ماشر خرجتي من المكان فجأه
ناظرته بإستغراب وصدت:برجع البيت تعبانه شوي
وليد:كان استرحتي بمكان ما ينفع تروحين لوحدك
لفت أنهار تناظره وهي مستغربه كيف مدير نورا واقف قدامها الحين يطلبها ترجع بكل إهتمام
ناظر نظراتها وعدل شماغه يصد:اخذت سيقاره هنا برا وانتبهت لك
أنهار:استريح بالبيت ، شكراً
ناظرت جوالها من شافت السياره وصلت وتركته ومشت تركب السياره وغمضت عيونها بتعب من حرك للبيت
'
وقف عند راسه يناظر الاكسجين اللي على وجهه والاجهزه اللي قلّت من حوالينه ، هو انتظر اسبوع كامل يصحى سلطان لكنه كان يفتح عيونه ويرجع يغط بنوم طويل ويستجيب للأصوات وينزعج وهذا خير
تقدم يناظر عيون سلطان اللي مفتوحه ومسك كفه:حيّ الله صاحبي وأخوي ، هالمره لا ترجع تغيب فزّ وخلنا نرجع لأراضينا تكفى
رجع يغمض عيونه سلطان بتعب وتنهد بهاج يحضن كفه
مشى فيه أسبوع اخر وأسبوعين وثلاثه وسلطان يستجيب شوي شوي وببطئ خلاه يعيش ايام طويله ينتظره وهو مو حاس
شال الاكسجين الدكتور وكشف عن عيونه وهو يتكلم مع سلطان بالانقليزي
سلطان اللي يناظرهم وساكت جسمه تغير وصار هزيل من الغيبوبه اللي انقضت فيه
الدكتور لف لبهاج:البصر ممتاز والتنفس بالرئه أصبح سليم يحتاج وقت عشان يقدر يحرك أقدامه ويوقف
لهاج هز راسه وهمس:ان شاء الله
خرج الدكتور وتقدم بهاج لسلطان وابتسم له بهاج
:انا قلت انك بتقوم ما انت مخليني
سلطان:اهلي وين؟
بهاج:بمكانهم ، انا وانت اللي اختلف مكاننا ، اخذتك ألمانيا عشان تقوم على حيلك
عقد حاجبينه سلطان ما يذكر شي وكمل بهاج
:اخذت ٤ شهور الحين عشان تتكلم معي ، شهر وارجع معك للسعوديه
مارد سلطان ولف بهاج يضغط على كفه:شدّ حيلك لا نطول بعيد عن السعوديه
سلطان:مافي شي في جسمي احس فيه
بهاج:لانك منسدح فتره طويله عظامك ما تحركت لا تخاف امورك طيبه هي كسور هدّتك بس زين انك كنت بغيبوبه والا كان اذاك الألم ، ركبوا لك صيخ برجلك اليسار انكسرت وفقرات بظهرك تأذت والجمجمه كانت بتكون سبب بموتك
سلطان عقد حاجبينه وكمل بهاج:تحسب حادثك هيّن !
سلطان:ما اذكر شي
بهاج تنهد والتفت عنه:ليتني ما اذكر معك
مارد سلطان ولف بهاج يناظره يقفل عيونه بتعب
واخذ جواله يفتحه ووقف وصور سلطان اللي فتح عيونه يناظره وابتسم بهاج يصور:هذا الوحش الذيب سلطان ما خلانا ، هذا هو اخوي سلطان
ضحك وشد على كف سلطان من وسع فرحته وارسل الفيديو على شموخ ولف لسلطان يربت على كفه
'
فتحت جوالها وناظرت الفيديو وابتسمت بفرحه وخرجت:يمه يمه تعالي بسرعه
مشت منيره لها:علامك ؟ وش جاك؟
تقدمت شموخ لها وفتحت المقطع ولمت كفوفها منيره لوجهها تبكي من شافت سلطان يناظر بهاج ومفتح عيونه وبكت شموخ تحضنها:حمدلله
منيره:الله يبشرنا بجيتك يا أمي الله يفرحنا بجيّتك
لفت لشموخ:الحقي نادي ابوك الحقي
مشت شموخ تاركه جوالها وخرجت من البيت وركضت للدكه وهي تناديه ودخلت ولف زيد:وش صاير ؟
شموخ:بهاج ارسل فيديو لسلطان وهو صاحي ، سلطان قام
لف عبدالله عليه:ياربي لك الحمد
زيد ابتسم:اسألك بالله ؟
شموخ:والله والله
وقف زيد وخرج من الدَكه ولف عبدالله لرَده:سمعت وش قالت يا ابوي ؟
رَده لف له:هاه !
عبدالله رفع صوته:سلطان سلطان ولد زيد قام بالسلامه حمدلله
هز راسه رَده ورجع يناظر مسباحه باصابعه ورجع لف لعبدالله:اخوك وينه ؟
عبدالله:عُمر ؟
هز راسه واخذ نفس عبدالله:على جاله لوحده بالملحق ، امي تزاوره وتدهنه بزيوت لكن هذا حاله حرارته ما تنزل
رَده:ناد جمعه لي نادها
عبدالله:ابشر
قام وخرج من الدَكه تارك رَده ومشى للملحق عبدالله ودق بابه وفتحت جمعه:وش عندك؟
عبدالله:ابوي يبيك يمه هو بالدكه
جمعه:وش عنده ؟
عبدالله:والله مدري عنه لكن شوفيه
جمعه:اقعد عند اخوك لين اجيك
خرجت جمعه ودخلت الدَكه وتقدمت لرَده:عمر طيب؟
جمعه جلست يمينه:ان شاء الله
رَده:فكي سحره
جمعه صدت عنه وكمل رَده:انتي قلتي هذا يقربه لنا لكن ما ظنتي قرب منا ، ولدك تدمر قضيت وقتي اللي بقي وانا ما اسمع له حسّ
جمعه:ماهو سحر عمر مريض من ربي
رَده:فكي سحره مابقي من العمر كثر اللي راح ، فكيه جيبي له احد يقرأ عليه يرد له عافيته وصحته
جمعه لفت له وكمل رَده:والله اني اشوف ملائكة ربي حواليني بالمكان
عقدت حاجبينها جمعه بخوف وشدت على ذراعها:تعوذ من الشيطان
رَده:عمر لا يقعد كذا ، فكي سحره فكي سحر عمر
'

نزلت من السياره أنهار ومشت تدخل دوام نورا وطلعت لمكاتبهم ومشت ولفت تناظر اللي مجتمعين بغرفه قزاز ويترأسها وليد مدير نورا ووقفت تناظر نورا اللي على لابتوبها تكتب ولف وليد من شافها واقفه وتوقف عن الكلام وابتسم يهز راسه بالتحيه لها وردت له التحيه بالنظر أنهار
ورفعت راسها نورا من سكت ولفت تناظر أنهار ولف وليد:لين هنا الكلام كفّى وان شاء الله التطبيق يكون أفضل مما توقعنا ، تقدرون تتفضلون
لمت لابتوبها واغراضها نورا وخرجت لأنهار وابتسمت لها:والله مديري الكبير في فوقه مدير أكبر
ابتسمت أنهار:خلينا من هذا بتجين معاي والا اروح موعدي لوحدي ؟
نورا:افكورس جايه انتظريني اجيب شنطتي وجايه
لفت أنهار من تقدم وليد لهم ومشت نورا لمكتبها وابتسم وليد:نورتينا
أنهار:تسلم
وليد:جايه تسرقين اختك منا ؟
أنهار:بريك الغداء بتقضيه معاي وبتلحق الشغل ان شاء الله
وليد:ابد امزح معك خذي راحتك
أنهار ماردت وصدت عنه وناظرها:شرفينا دايم هنا بننبسط بشوفتك
لفت أنهار تناظره وتكلمت بهدوء:ما اتوقع انا جيت عشان بروح مع نورا موعدي بالمستشفى
عقد حاجبينه:سلامات !
أنهار:لا حمدلله مافي شي بس موعد البيبي
سكت ثواني من لمست بطنها وكمل:بيبي ؟
أنهار ابتسمت وهزت راسها ولفت لنورا اللي طلعت:عن اذنك استاذ وليد
هز راسه لنورا ومشت نورا معها وهمست:اشبه وجهه كذا اسود اش قلتي له ؟
أنهار:قلت له عندي موعد للبيبي
ناظرتها نورا بصدمه وضحكت:بالله ؟
أنهار:والله مو متحمله كل ما شفته بيقعد يلمح لي كذا خلاص خل يفهم انا مقفله بيباني
نورا:اوف أنهار كان خليتيه بعد مشروعي عشان لا يأثر الموضوع على علاوتي
أنهار:ماراح يظلمك عشان والله انا ماما
نورا ابتسمت تركب سيارتها وركبت أنهار جنبها ولفت نورا لها وضحكت:اخذتي دور الماما والله
ابتسمت أنهار ولفت تناظر الطريق ولفت نورا:ايوا ماما نهوري نقول بيبي بوي والا بيبي قيرل ؟
هزت كتفها أنهار وناظرت الطريق:مو قادره اخمن بس ابغى سعود
نورا:لا حياتي نبغى بنوته صعنونه
اخذت نفس أنهار بضيق تناظر الطريق ولفت نورا:وما بتقولين لريوف ؟
أنهار:خليها تخلص اختباراتها واذا تخرجت بقولها
نورا:بتكونين بالسادس أنهار
أنهار:ما يفرق المهم ما ودي اشغلها بحاجه وهي بالفاينلز
نورا ناظرت الطريق وترددت تسأل لكن ماقدرت تسكت لفت لأنهار:بسألك سؤال بس امانه لا تتنكدين
أنهار:متى بتقولين لبهاج ؟
لفت أنهار تناظر نورا اللي ارتبكت وكملت أنهار:هو بهاج لقينا له طريق عشان نقوله ؟ لنا اربع شهور ما ادري وينه وبندخل الخامس ونص سنه وهو ما بيرد ، فين ادوره ؟ اكيد ما برجع للرياض وللمزرعه عشان اقول لبهاج بهاج بيجيك بيبي ، هو صكك ابوابه وهو اختار يكون بعيد
نورا لفت للطريق:مصدقه انه اختفى بإرادة نفسه ؟
أنهار هزت راسها بالنفي:مره أكذّبه ومره أصدقه
نورا ضحكت بسخريه:وانا تقبلت ان كلهم غابوا بإرادة نفسهم نفس ماريوف وفهد سووها سلطان وبهاج سووها
أنهار سكتت وكملت نورا بهمس:كل واحد اختار راحة باله
تنهدت أنهار تلف لشباكها وكملت تسوق نورا طريقهم
وقفت عند المستشفى ونزلت أنهار وهي تتحسس نبض قلبها وسرعته وكيف ارتبكت تناظر المستشفى هي المفروض تمشي لهذا الموعد طايره من الفرحه يديها بيده نفس ما تخيلوا نفس ما حلموا سوا ، لكن خلاها خلاها تعيش شي يجمعهم لوحدها تمشي لخطوات رسموها لوحدها
مشت مع نورا تدخل للعياده وابتسمت نورا للممرضه:الدكتوره عندها احد ؟
الممرضه:لا تفضلي ادخلي على طول
مشت أنهار ودخلت مع نورا وابتسمت الدكتوره:اهلاً وسهلاً
نورا:بنزعل منك يادكتوره لو ماعرفنا جنس البيبي هذا الشهر
الدكتوره ضحكت:لا ان شاء الله كل الامور تمام ، كيفك أنهار ؟
هزت راسها أنهار وشدت على عبايتها بكفها ووقفت الدكتوره:تعالي استريحي
تقدمت نورا وابتسمت بحماس تنتظر السونار وفتحت جوالها تصور السونار
وبلعت ريقها تمسك دموعها أنهار وتناظر ابتسامة الدكتوره ولفت الدكتوره لأنهار:باين
نورا ضحكت:وااييي وناسه
ناظرت الدكتوره بخوف وترقب وكملت الدكتوره
:انتي ودك بولد والا بنت ؟
سكتت أنهار وناظرت السونار ولفت للدكتوره ورفعت كتفها بدون رد ولفت نورا وهي تصور:ايش دكتوره تكفين قولي بنت
ضحكت الدكتوره وناظرت أنهار:ولد
ابتسمت أنهار وضحكت بعد ثواني لين غطت عيونها وبكت وعضت شفتها نورا تناظرها وتقدمت تحضنها وبكت بعلو صوتها بحضن نورا هي تمنت ولد طلبت من ربي يبلغها بولد ، ولد تسميه سعود نفس ماكان ودهم سوا ونفس ماكان يناديها بأم سعود
مسحت نورا عليها وابتسمت للدكتوره اللي واقفه وهمست نورا:حمدلله
ضحكت نورا وهي تسمع بكاها وتجمعت بمحاجر عيونها دموعها:خلاص أنهار بليز بتبكيني معاك
مسحت دموعها نورا وضحكت وهي تصورهم سوا:أنهار خلاص بتصيرين ماما بطلي دموع
رفعت راسها أنهار ومسحت دموعها ورفعت شعرها وابتسمت الدكتوره:اهم شي حافظي على الإبر اليوميه أنهار
هزت راسها أنهار ومسكت كفها نورا من قامت أنهار وضحكت نورا:الكروشه الصغيره ياناس
ضحكت أنهار وسط دموعها وإحمرار وجهها وخرجوا من العياده وحضنتها من الجنب نورا:احلى ماما احلى ماما ياناس
ابتسمت أنهار وخرجت معاها من المستشفى