رواية #انتي سيوف الثأر في اجفاني الفصل الرابع 4 - بقلم الكاتبه سمو العراق

البارت الثالث
رواية..إنتي سيوف الثأر في اجفاني
بقلمي...سموو العراق

مسائكم.. نسمات هدوء خالية من العتب لأي شخص كان.نور...سمو العراق

دخلت علئ رانيه وابتسمت طالعه تجنن

لابسه فستان قصير اوفايت ومن الخصر بي حزام ذهبي ولابسه حذاء ذهبيه وحاطه مكياج برونزي وحمره بصليه...

كتلها واني اصفر...لك شنو هاي ياحلوو شطالعه اخاف علئ مهتدئ يموت من جمالج

اجت عليه بسرعه وبلهفه حطت ايدها على شفايفي وكالت...اششش اسم الله من عمري علئ عمره

وخرت ايدها من شفايفي كتلها...شبيج رانيه اشاقه وياج...

بلعت ريقها بصعوبه وكالت...ماادري شبيه احس بقلق واحس ضايجه اريد ابجي

بعدت خصلة شعرها من وجهها كتلها..شبيج مهتدئ مسويلج شئ ؟ ليش ضايجه

كالت بضيق...مااعرف احلامي مو زينه اتحلم ابني بيوت من رماد وينهجم

انصدمت كتلها...اسم الله رانيه انتي شكولين ديري بالج اخاف مصيرج ويه مهتدئ مو زين بصراحه رنوو انتي استعجلتي ترئ الزواج مو لعب واحس مهتدئ مراهم الج

نفخت بقهر وكالت...لا بالعكس غير مهتدئ مايرهم الي ولا انام بحظن غيييره صح هوايه اموور مختلفه بينه بس اني اتغاضئ عنهم وهو هماتين انتي متعرفين اني شكد احببببه وتعذبت يالله صار الي

ضحكت كتلها ...اي اتذكر من حاجيتي بابا كلتيله زميلي بجامعه خطبني وهو من غير طائفتنه ورفض وانتي زعلتي واسبوع انگطعي عن الاكل وهبط ضغطج وتخربطتي واخذناج للمستشفئ هههههه واني ادور علئ نعالج اختفئ لبست كعب عالي هعهه

رانيه...هههههه ثووول

ابتعدت عني وهي تتصل بمهتدئ بس ما رد عليها

تافئفت بضيق وكالت بدلع...ما يرد عليه ونبي اني اعلمه اخلي يبطل هاي السالفه من اتصل وما يرد اليوم اشلع گلبه

كتلها...احم احم نشوووف

كالت...ههههههههههه صدوك بس يجي انسئ كوولشي وناكل جبس حار

كتلها..عوود انطووني مو بس انتم تاكلوون

كالت...لا لا هذا خاص من تنخطبين شتردين اكلي حتئ فلفل حاار ههههه

كتلها...انجبي والله مبين قصدج مو شريف بس مدا افهم عليج

كالت..احسن ضلي هيييج

رجعت اتصلت يتصل بس مايرد

اتصلت اكثر من خمس مرات بس مارد عليها...

خطييه وجهه صار اصفر والخووف بين علئ ملامحها

كتلها...لا تخافين هسه يجي

كالت بخووف...اخاااف صااار عليه شئ هو مو من عوايده ميرد عليه حتئ لو ميرد ثواني ويرجع يتصل بس اليووم مدري شبي

كتلها..الغايب عذره وياه هسه يرد

اجت ماما كلتلها رنوو وينه خطيبج مو ابوج يريد يطلع عنده شغل...

رانيه..دا اتصل بي وميرد عليه اخاف صار عليه شئ

ماما...رجعي اتصلي بي

رجعت اتصلت ماكوو

كعدت علئ السرير مالتي والدمعه لمعت بطرف عينها وبلعت ريقها بصعووبه وايدها ترررجف

شووويه واتصل مهتدئ

يالله يافرحتها معرفت شلون تفتح خط

ضحكت وهي تحاول تفتح الموبايل.. هذا هذا اتصل  والله اليوم اتعارك وياه خبلني اجيت اموت اله شويه

رانيه بعتب....الوووووووو

الطرف الثاني............

رانيه ملامحها جفت وضلت ترمش وكع الموبايل من ايدها وصرررخت بصووت عالي

............................

ام خالد...منئ روحي خلي خالد يتصل بمهتدئ شوو تاخر

منئ..خااف نايم وتدرين بي شلون يتعصب من واحد يجي يمه

امها ..وج روحي اخووج تأخر

نزل خالد من الدرج وهنه جانن كاعدات بالصاله باوع عليهن وتنهد

خالد ..خيرر يمه شكوووو؟

امه...مهتدئ تأخر خابر عليه يممه الطريق مو زين والوضع مو امان واخووك من يشوف خطيبته ينسئ نفسه خابره وگله يااما يبات يمهم ومايجي يااما يجي من وكت

خالد طلع موبايله اتصل بي مارد

عقد حواجبه بااستغراب رجع اتصل اكثر من مره ماكوو

حس بخووف بس مابين

امه بخووف...هااا خالد شبيك ليش اخووك ما يرد

خالد بتصريفه...ماعندي رصيد مع العلم اني البارحه خليت رصيييد بس فاتح بيانات الهاتف ومخلص رصيدي..

انعاد عليه شعور ست سنوات مرت الخوف تضاعف عنده وانربطت ادييييه طلع بسرعه

رجع خابر خابر خااابر ماكوووو رد

باوع للشارع بنظرات حاااده وقرر يرووح لاهل خطيبة مهتدئ

اجه ابووو من بعيد هو ومرتضئ

ابوو...هااا بووويه خالد شبيك واكف هنا

خالد...اتصل بمهتدئ ما يرد وراح ل......

ابوو...هذا شبي اني كم مره كتله لا تروح الوحدك خابر علئ عمه ابو خطيبته

خالد...ماعندي رقمه مو تعرف اني اصلا مااعرفهم وماعندي علاقه بيهم

مرتضئ...هو منو عنده علاقه بيهم اني هم شفت ابوها بس بالخطبه

ابوو طلع موبايله...هاااك اني عندي رقمه مكتوب ابو مهتدئ

خالد بااستغراب...ليش مسمي ابو مهتدئ

ابوو..جااا شتريد اكتب ابو رانيه

مرتضئ...هههههه رووح حجي حركات

خالد ببتسامه صفره...انت مستحي تكتب اسم بنته بموبايلك وهو بناته كاسيات عاريات

مرتضئ..بس مهتدئ يكول تحجبت

خالد..اي ستر الصخوول حجابيش يمعود شعرها نصه طالع وذيج الثانيه لا عبالك طالعه من الملاهي

ابوو...المهم هو عاجبته

خالد...اي الله يسعدهم ويهديها

مرتضئ..تحسسني بنات الرجال من كفار قريش ههه

خالد تركه وسجل اسم ابو رانيه واتصل بي وكذلك مارد استغفر ربه وهو يحاول يلزم نفسه الخووف دب بكل جسمه

ومايريد يخووف اهله علئ مهتدئ وركب سيارته بسرعه

ابوو...خالد بووويه وين رايح اخوك وييين؟

خالد لف السياره بسرعه...هسه اجي ياابه

اتصل موبايله ابتسم بهدوء من شاف هذا رقم ابو رانيه...

خالد ...الووو هااا عمي مهتدئ اتاخر ومايفتح خط هو عندكم

ابو رانيا بقهر...مهتدئ خطفووو

خالد انصدم بلع ريقه بتوتر وهو يباوع علئ وجه ابو واخوو همس من بين اسنانه...انت شدگوووول

ابو رانيا..هسه خابرونه وساومونه علئ فدييييه

ضرب سيتيرن السياره بعصبيه وعيونه تجدح شرار ...انت تضحك عليه لو تحجي صدك

ابوو برعب...هااا بويه شصار اخووك وينه شبي اخووك كتلوووه

باوع علئ،ابو ومارد مسح وجه بتوتر...انطيني الرقم الي اتصل بيكم بسررررعه بسرررررررررعه

ابو رانيا جاوبه..هم اتصلو علينه من رقم مهتدئ

قفل الخط بسرعه وشغل السياره بادين ترجف والوجوه تغيرت وقلوب انهارت وابووهم ضل يدك علئ راسه عرف ابنه مو بخييير

ابوو...ولك بووويه خاالد ولك احجي اخووك كتلو

خالد...لا يابه مخطووف بس مساومين عليه ندفع كل شئ بس،يعووفونه انتم اهدئو وان شاء اللة انحلها

ابوو...ولك شنحلها شنحلها مصيبه وطاحت علئ راسنه..ولك بيه مهتدئ شلوون حالك ضربوك اذوك

خالد اتصل علئ رقم مهتدئ ونفس الشئ ماكوو

شووويه واتصل رقم جديد علئ خالد

فتح خط بلهفه وبصوت جامد كله غضب..الوووووو

الطرف الثاني...الووو خالد اخووو مهتدئ

خالد...اي مهتدئ وينه انطيني اسمع صوته

الطرف الثاني...انتظر لحظه مهتدئ بخير وهو عدنه تدفعوون دفترين انسلمكم مهتدئ اتفقنا

خالد وتنفسه ضاق.. ادفغلك الي تريده ورجعوا مهتدئ بس بملابسه ولا تاذوو

الطرف الثاني...هو بخير ادفع المبلغ ونسلمك مهتدئ وراح نحدد المكان بس اذا حاولتوا تخابرون الشرطه اقرو الفاتحه علئ مهتدئ

خالد...لا ما نخبر الشرطه بس انطيني خليني اسمع صوت مهتدئ

الطرف الثاني....لاااا مااكدر

خالد...يجووز تطلع جذاب ومهتدئ مقتول

الطرف الثاني...لا مامقتول هو عايش تجيب الفلوس نسلمه الكم

خالد تنهد بضيق...جذااااب

الطرف الثاني قفل الخط

.............................

من سمعت مهتدئ نخطف لحد الان وهي بس تبجي وتلطم تخبلت رسمي وكحلها سال علئ وجنتها

واني وماما نحاول نسكتها ونهديها وهي ماكوو مخبله

رانيا ببكاء...شيردوون انطوهم بس خلي مهتدئ يرجعلي والله احببببه احببببه مااكدر اعييش بدونه امووت والله امووت مهتدئ حبيبي ياروحي

ياربي ما يئذوو وج ماما راح اموووت مهتدئ

مسحت دموعها بااصبعي واني ابجي وياها تكسر الخاطر وهماتين مهتدئ ميستاهل

حضنتها كتلها...ان شاء اللة يفكون أسره لا تخافين

كالت...مااعتقد والله مئيسه روووحي ذابت عليه خلي ارووح ادور عليه والله ابووس الايادي بس يتركوو..ذهبي كوله خلي ياخذوو بس يتركوو ليش ياربي لييش مهتدئ بذات

ماما كلتلها...كولي يالله بنيتي هسه اهله يدفعوون الفلوووس ويطلعوو لا تخافين

كالت بنحيب ..والله والله اذا رجع اصير عبده جوه رجليه وماازعله لا يدووس ببطني

انقهرت عليها حيييل حب دام اربع سنوات عشقو بعض بجنون صحيح اذا صار المهتدئ شئ رانيا تجن ياربي يرجع سالم

مجان النه غير الدعاء والدمووع وبابا ضل يجري اتصالات واهل مهتدئ يخابرون

وبعدين اجوو اهله طلع الهم بابا ضلووا يدورون ويخابرون وبابا هماتين وياهم واجه ابن خالتي محامي هماتين ضل يخابر  ويدورون بس ماكوو اله اثر

جان باب بيتنه عبالك عدنه فصل عشائري الكل متواجد..

دخل ابن خالتي علينه كال جيبو مي وجاي

ماما خطيه سوت جاي اجتي خالتي وياها وضلت تبجي علئ حال رانيا ليكسر الخاطر

اني رحت غسلت الاستكاين وجنت لابسه تراك زيتوني فوكاه بليره طوويله سووده ومسويه شعري كبايه وهو عكش صاير مخربط فد مره

سمعت صوت واحد جاي باتجاه خلفي

درت وجهي شفته ابن خالتي مصعب هو شاب بنهايه العشرينات محامي وشكله حلوو ابيض حييل ومعانيه حلوه وطوله وسط

كال هلاوو دنووش شلووونج

كتله هلاوو مصعب شلوونك

كال مو زين بس من شفتج صرت بخير وعافيه

رفعت حاجبي متفاجئه من كلامه صحيح هو لزكه ومن يشوفنه اني و رانيه يضل كاعد ويسولف ويضحك بس مشايفه منه شئ محلوو

كتله تسلم

تقرب مني اكثر وحط ايده على شعري كمزت

كتله وخررر شبيك مصعب

كال...دانيه اني معجب بيج والكل يدري اله انتي متدرين

فتحت عيوني مصدومه هي صح اخته دائما تلمح الي وامه بس متوصل الهاي الدرجه ويجيني هسه وبعدين احنه بيا حال وهذا بطران

تقرب اكثر وصار نفسه كوولش قريب مني بلعت ريقي بخوف دفعته بااديه ثنينهم..

كتله بحده..مصعب انت متستحي متشوف حالنه شلوونه احنه بيا حال صدوك الي استحو ماتو

لزمني من ايدي...كال شبيج ترئ،اني حتئ قصيده كاتب بيج

كتله بعصبيه...ياااا قصيييده درووووح والله بطران

طلعت بسرعه واني كلبي يدگ سررريع منا اختي وخطيبها ومنا مصعب ردت اشوف بابا يجي ياخذ المي الهم

فتحت الباب شوويه شفت خالد يخابر رجف كلبي منه شكله جلفي ومزعج وانوب اخوو ماكوو صاير نار سديت الباب فتحت شوويه منه ضليت اباوع عليه

يصيح ويغلط وكل شوويه يلزم موبايله يتصل بيه واهله واكفين يممه وابوو خطيه يكسر الخاطر يبجي علئ ابنه

استغربت بابا ماكوو وين رااااح

اجه مصعب ورايه كال...عليمن تباوعيين

باوعت عليه بحده كتله معليييك

هو خله وطلع بره واني ضليت اباوع ادور بعيوني علئ بابا وخالد كل شوويه يصير بوجهي

رجع مصعب متعصب تدخل كال شكوو تباوعين

كتله... معليك...وين بابا

كال...راح من قبل ساعتين ولسه ماكوو

عفته ودخلت جووووه

سوينه عشاء وتعشوو بس اهل مهتدئ ماحطوو بحلكهم شئ وهماتين بابا ما اجه

رحت كعدت يم رانيه مخلت بحلگها شئ وبس تبجي وترجف خطيه وجهها صار شاحب وشفايفها بيضت وعبالك سعفه داخله بوسط اعصار ترجف وتكمز وتبجي وتفتر بتوتر ولازمه موبايلها مترقبه منه اتصال

ضلينه سهرانين للصبح

وجه الصبح اذن المؤذن ولحد الان مهتدئ ماكوو عنه خبر واخوانه يرحون ويرجعوون

جانت الشمس ما غالبه الغيووم والجوو بارد وصوت المؤذن يطرب بالاذن وصوت تكبيراته تقشعر القلووب.. وتريحها

لكن للاسف اجانه خبر مهتدئ ويه اذان الفجر

ماسمعنه بس صووت ثغيب ابوو مهتدئ وهو يصيييح ... ياااابوووويه يااااابووويه ولك ابوويه مهتدئ كسرت ضهري

طلعنه نركض ورانيه ركضت ويانه خطيه مكملت طريقها وكعت مغشي عليها وتخربطت واني امي ضلينه نصرخ عليه وحاولنه نصحيها بس هي ماتت عليه حقها والله موقف يدمي القلب

صار الصراخ بالشارع اخوانه وابو واقاربه

اجه مصعب كال خطيب رانيه مات الله يرحمه لكوو مكتوول ضاربينه طلقه بقلبه وبراسه وهسه نقلوو للطب العدلي

امي ضلت تلطم علئ وجهها وتبجي ورانيه لا حياة لمن تنادي

واني ضليت ابجي الخيال ميستوعب الموقف الي مرينه بي...

وره ساعتين رانيه كعدت وتخبلت تشيل روحه وتركعها بالكاع وشعرها كطعته تكطع

تبوس بدينه دكول عفيه كولو مصووب كولو رجله مكطوومه كولو اي شئ بس لا تكوولون مات

رانيه ببكاء ونحيب...والله احببببببببه ولج يممممه احببببه اررررررريده ارييييده مهتدئ لا موهيج اني رناوي حبيبتك اني رانيه روووحك مو دكول انتي روحي انتي حبيبتي مو كلت محد يفرقنه ليش مهتدئ ليييييش ولك مهتدئ نهجمت حياتي مهتددددددددددددددددئ

ماما حاولت تهديها بس هي فاقده

لبستها ماما صايه وشال وركبو بسياره بابا اخذهم البيت اهل مهتدئ واني مقبل اروح ضليت يم خاله خلصتها بجي علئ رانيه

اشووف ملابسها ونيشانها واغراضها تشتري احلئ ملابس حتئ تلبسهم المهتدئ خطيه ماتهنه

..... ......................

وصلو البيت اهل مهتدئ شافت الهوسه الي بالباب تخبلت معناه صدووك راااااح تركها وترك جروحها تنزف ايامها...

دخلت للبيت شافت امه شاكه الثووب وتلطم بقسووه وتملخ بشعرها وبناتها مقابيلها يبجن وياها ويلزم بيدها والنسوان تبجي علئ حالها

ركضت عليها حضنتها وهي تصرخ بااقوئ ماعندها وام مهتدئ حضنتها حيييل وهي تبوسها وتشم ريحه ابنها المغدور بيه

امه...ولك يمممممه مهتدئ يالعرررريس يا ابو وجه الحلووو مااصدك يمه طولك الحلوو يضمه التراب لا يممه المووت لامك مو الك ولك يمممممه كسرت كلبي مرتك يمممه صغيييره شلون تعوفها وحده

هي حضنت عمتها حيييل وتتمنئ تنطي روحها بس يرجع مهتدئ لكن هيهات راح عند رب كريم

وصلت الجنازه ومقبلوو ينزلون التابوت لان مهتدئ كل مايغسلون اله ينزف فما حبوو ينزلوا

راحو للدفن ومهتدئ روحه مثل الحمامه المذبوحه الئ تشكي الربها ضلم البشر وغدرهم بروحه وكانوا روحه مسرعه للدفن والوقوف امام باريها تاخذ بحقها من كل ضالم وطاغي

وصلوو للنجف غسلوو ودخلت امه ورانيا رانيا ما واجهته انهزمت متكدر تشوف حبيبها روحه جثه بلا رووح وين روحه الحلوه وين السانه الي ينكط عسل معقووله كل هذا يندفن وتضل بس الذكريات معقووله ولا كانوا صار ونولد...

ادوو الدفن بالصوره الازمه

واندفن الابن والحبيب

تارك ام ثكلئ وحبيبه مفجوووووعه

ولهنا انتهئ دور مهتدئ بالحياة لكن ماانتهئ بالنسبه المحبيه واهله وحبيبته ونطفه صغيره من تنتظر تظهر للحياة...انتهت الحياة الاحدهم لكن بدت حياة جديده لنطفه جديده...

خلصت الفاتحه لكن مخلص الثأر

الكل راح علئ بيته ورانيه راحت البيت ابوها تحمل وياها جراح وذكريات والالم وامل مقتول وبيت من رماد

..........................

عند خالد

جان نايم علئ فراشه وهو يحس ببراكين من نار تحرگ كل جزء برروحه

اخوو المغدوور مدفوون صار اكثر من عشره ايام..« تسريع بالاحداث»

كل مايطلع بسيارته ويشوف قطعت مهتدئ المعلقه علئ جدار بيتهم يزيد بااصراره بالانتقام

استرجع كلمات القطعه

انتقل إلى رحمه الله الشاب المغدور الشهيد مهتدئ سلمان ..اخ كل من خالد ومرتضئ ومعن اثر عمل ارهابي جبان

وكف علئ حيييله وهو يشوف رووحه بالمرايه شد علئ شفايفه بقووووه

قبض علئ ايده بقسوه همس بداخل جوارحه هدولنه موووت لازم نهديلهم كبر

والله والله ثارك مايروح يامهتدئ اعاقب كل ابن عايقه اتدخل بموتك الله اخليهم يوصلون للگبر ياحزام الضهر يا مهتدئ

فتح الكنتور طلع موبايل مهتدئ بي دم يابس هذا ثار دمه

اخذ كنلكس بلله شويه ومسح الدم حاول يفتحه بس الموبايل بي رمز

لفاه بقطعه بيضه وضمه بالكنتور

قرر يتصل برانيا تعلمه علئ الرمز لان اكيد تعرفه ومهتدئ مايضم عليها شئ

لان يردون يسوله صوره كبيره يخلوها بالمقبره عند قبره....

عض شفتتتته حيييييل وهو يسمع نواااح امه الئ يدمي گلبه ويعزز الثأر بداخل رووحه

همس..نكون نسوان اذا مااخذنه ثارك يالرووح

..............................

رحت الرانيا شفتها كاعده وفاتحه موبايلها وتبجي

كعدت يمها حضنتها مطلعه صورها هي ومهتدئ وتبجي

همست ..الكل شئ حسبت حساب البدلتي والقاطه والغرفتنا وللقاعه ...بس محسبت حساب لهذا اليوم والله ممصدكه هييج مهتدئ مات

والله متعلمت علئ جموده ماتعلمت علئ هدوئه اليوم المابي مهتدئ مااعده ومااعترف بي

جان مالي يومي صخب يومي مليان بضحكته والله متت راحت رووحي

ليش يامهتدئ ماكسرنه خاطر الله شنو الحكمه من موتك شنوو الحكمه

ليش صارت الذكريات هي الي تواسيني وصورتك هي التصبرني

حضنتها بستها بدموعها الئ جرحت خدودها

همست والله مااتزوج والا يلمسني رجال بعده عايش بروحي ودمي هو استعملني واني رضيت بحالتي ياربي احبببه احببه.. صدوك اني صلفه شلون ما متت وراه شلون لحد الان عايشه صدوك اني حقيره

كتله..لا رانيه كافي لا تحجين هييج الله يصبرج

حطت ايدها على صدرها وتنفست بضيق بعدها حطت ايدها علئ شفايفها وركضت للحمام

ركضت وراها ضلت تتقيئ وتغسل بوجهها وتبجي

كتلها رانيه شبييج

كالت صخام الصخمني عزااا العززاني لج مصيبه فووك مصيبتي عبالي محد حيعرف اني مستعمله

كتله بخووف ...شكوووو

كالت...لج بس لا اطلع حااااامل

نهايه البارت ....يتبع

وقفه بنات...اعتذر عن البارت المأساوي لكن ماحبيت اغير الحقيقه والموت حق  وهذي الحقيقه وهوايه مثل مهتدئ راحوو غدر الله يرحمهم😢

وثانيا بنات اني مااكدر انزل يوميه لان عندي امتحانات مد وكوز ولود كوولش قووي فااعذروني ان شاء اللة بس اخلص امتحانات التزم وحاليا انزل بس مامحدده وقت

وهماتين حرجع انزل قصه رحمه عاطف لان اخاف تناخذ فكره القصه بس ماانزل منها اي بارت بس مجرد اعيد نشرها اوك

انتظروني بالبارتات القادمه...توقعوا عوود ولا تنسوو التصويت فديتكم

كونوا انتم كونوا بخير...احبكم😘