رواية #انتي سيوف الثأر في اجفاني الفصل الثامن وأربعون 48 - بقلم الكاتبه سمو العراق

الجزء الثاني..البارت التاسع
رواية...انتي سيوف الثأر في اجفاني
بقلمي..سمو العراق

💔💔💔💔💔💔💔
الخيانة هي الجريمة التي يدفع ثمنها من لم يقترفوها
.....................

لزمت الموبايل هذا منوو ...؟

كتبت باادي اليسرئ لان اليمنئ،مربووطه من العمليه ومااكدر احركها...

جانت كتابتي هووايه ساحكه بيها لان ممسيطره وموجوعه..كتبت...انت منو بلا زحمه...

كتب..اني ميسر صديق عبله...

فتحت عيوني مصدومه صخام بوجهج عبله هذا شنو يحجي..

كتبت..اي منو انطاك رقمي...

كتب..اخذته بدوون متعرف عبله دانيا اني تعبان والله وانتي احسج بلسم لجروحي تعرفين اني الغربيه كلها اليه واني كبير بالدووله وحمايه الشخص معروف بالدووله وانتي انزرعتي بكلبي من اول يوم شفتج بي ولعنت زوجج لان ممقدر النعمه العنده..اني زوجتي عقيمه ومدللها دلال . .

يالله شلوون صدمني ما اكدر اوصف الرجفه الي اعتلتني النذل العاار يضحك علئ بنت خالتي وديريد يسووي علاقه ويايه مااكتفئ...

بس خفت حييل هو كشخص مسؤؤل بالدوله واله حمايته ومركزه يكدر يسووي اي شئ...هو ديستغل البنات بفلووسه ومركزه...

بس عباله اني مثل الي عرفهم اني تربية الصهيوني مستحيل اتقشمر يمكن لو علئ قبل انجرف بمشاعري بس مستحيل اخوون بنت خالتي الثووله..

اني اصلا تعبانه من العمليه بس الابر والمسكنات مسكنات الآلام...

ماما اجت يمي كالت.. دانيا عيب ماما عمتج والبنات كاعدات وانتي لازمه الموبايل وبعدين مو زين عليج انتي هسه طالعه من العمليه...انطينياه

كلتلها بخووف..انتظري ماما بس ارسل رساله لعبله

كالت..يالله بسرعه يا سالفة عبله الي متخلص..

كتبت بسرعه ونصه سحك..بلا زحمه بعد لا ترسل اي رساله هذا رقم ماما وختأخذ الموبايل...

هو كتب...اوك حبي

فتحت حلكي عرضين مكسر النذل يكوولي حبي حبتك صخله ورفستك بگلبك مو كلب فندق كل شويه وحب وحده ودك اليتيمه الها...

مسحت الرسائل ونطيته لماما...

عذراء كالت..امج جنها أمي بس تشوفني لازمه الموبايل تجيني تركض ومن اكلها يمه مريضه دكول كله من وره الموبايل...

ولج يممه بطني توجعني ...دكول اي من وره الموبايل...

ولج يمممه حاامل..اي كله من الموبايل...موتتني دكول تحبين الموبايل اكثر مني..

بصراحه احب الموبايل اكثر من عشيرتي..

ضحكت بتعب ...

عمه كالت ..شلوونج يمممه

كلتلها...زينه شوويه احسن

كالت بحزن...والله متستاهلين مدري منين تجيج المصايب والامراض..كلها عيون ما تصلي علئ النبي

نزلت راسي وتنهدت كلتلها...الله كريم

تقربت مني وعذراء مدت راسها تتنصت كالت..جااا عمه انتي ليش رحتي بعد ما رجعتي وخاله ذيبج يعاني الوحده...

عذراء كالت بصوت عالي...ابجي طحال بايت علئ الذيب وصديق الذيب اي والله يعاني الوحده..

فوزيه خزرته وهي سكتت...

عمتي تقربت مني كالت...ادري مو وكته يا دانيا وادري خالد عصبي ومايرحم واني امه والله ما راضيه بتصرفاته ولا قابله علئ اخلاقه بس يا يمه هو يحبج وهو هم متعذب بحياته من ماتت زينب وهو متخبل اخبال...

همست بصوت ضعيف وناصي ودمعه لمعت بطرف عيني...بس يا عمه انتي ما ترضينها علئ بناتج مو صح هووايه مواقف سواهن ويايه بدون ذنب وكله نسيته اسالي،بنت مريم شلون ضربني بالشارع والله شنوو گاطعته بالكلام وخله سني ينزف ويصيح ويغلط وذلاني وهذا يهون ومحجيت...

بس من ضربني بعيني لا مستحيل يجمعنه فراش واحد اعذريني عمه بس نفسيتي متتقبل...

عمه كالت...انتي ما تحبينه

سكتت شوويه وجريت نفس كلتلها..ليش،اني شوكت شفته حتئ احبه اشوو هو يطلع من الصبح لحد العصر بشغله يجي من شغله بس ياكل ويسبح وطلع لو عنده فاتحه لو عنده عرس لو بالكهوه ما يدخل اله نص ليل ومن يرجع بس يعارك يعارك ذبان خشمه..

اني شنوو ذنبي اتحمل خبالاته..والله عمه ابنج مخبل

كالت.. هوو ابني مااحب واحد يحجي عليه هيج ويكول مخبل بس انتي ارجعي واذا ائذاج والله العظيم اني اطلكج بيدي...

سكتت بس حسيت الوجع رجع عليه لان المسكنات تفكني...عضيت شفتي من الوجع وحاولت اسيطر علئ نفسي مديت روحي ونمت...

هي حطت ايدها على شعري كالت...هذا مو كته الحجي ان شاء لله نحجي غير مره

هزيت راسي بأي...

غطيت وجهي باادي الثانيه...دموعي نزلت لا ارادي محتاااره مااكدر اعيش وياه ولا اكدر اتقبل حياتي بدوونه......

عدت ذكرياتي وياه من اول ماشافني بالجامعه وحسيت حيصير شئ وبعدها من خطفنه وضربني بالحايط زواجي منه دماار ...

مااذكر عنده موقف حلووو..

لا والادهئ من هيج من نتعارك يطردني بره الغرفه يخليني افتر مثل المجديه...

سمعت ماما دكول لام خالد...والله مااعرف دانيا شنو الي شافته وهيج رافضه خالد بس اني دا اشوفها جانت متعذبه وياه ودانيا مدلله عدنه

عذراء كلتلها...خاله والقران مدللها دلال تكعد الضهاري وهي خاله لسانها طوويل يحجيله كلمه ترد عليه عشره ..مو لسان رشاشه جاا الرجال من حقه يكتلها

ماما كلتلها...لا شنو يكتلها لازم يتفاهمون هي صغيره وهو كبير وواعي وهي انثئ وهو رجال لازم يكون اوعئ من هييج..وعمر الانسان ما مشئ بالضرب ترئ بس الحيوان ينضرب وهم لازم نرفق بي

عذراء..والله يا خاله شكلج الزلمه يتقشمر بالكلمه الحلوه اكلها ولج عووبه البسي مشلتح وشغلي ساجده عبيد...ودكي وركصي للصبح شووفي اذا ما الصبح تلكينه يصلي علئ ذيال ثووبج...

بس هي ويين شعفتها معطبه ووجها اصفر وبس وااع وعااا بس تقرب منها جااا شلون ما يمل وشوكت ما تجينها تعبانه وتدلع عليه...هاي بعدها ما صار عدها ست جهال وملت جاا من يصير عدها جهال شلون بالله...لازم يطكها بمره...

امها كلتلها...وج انتي شوو متستحين اسكتي...

عذراء..رجاءا انتي اسكتي مااعوفج انتي وابوي دقيقه اذا ماا الكاج مخلفه طفل..حتئ سويت عليهم برج مراقبه كد ما يتختلوون..

ورجعت كملت...خاله لا تلومين ابن خالي. ابن خالي سبع ونجر وما يصادق اله الناس الزينه بس الصووج من بنتج لا منطيته حقوقه ولا ترد لسانها...وتسمي الصهيوني العباس عليج بداعت بناتج اكوو وحده هيج تسمي رجلها...

ماما كلتلها...اي غير مضوجها

عذراء..يا مضوجها خاله هااا ودكول عليه الدايح ابو الشوارع ...هتلر ...العباس عليج هذا حجي..

ضحكت واني جوه البطانيه الحماره فضحتني فضيحه...طلعت اني حقيره وابن خالها شريف

هنه ضلن يضحكن...

رجعت كالت..شوفي خاله هي تحبه والقران لان مره من المرات ضربها راشدي فك براغي رگبتها واجت تبجي وتغلط وتسب والعن خيره والصهيوني والدايح ابو الشوارع والمعفن ضربني عسه ايده الكسر...محد يكدرله...شايخ علئ العالم الشيخ الدايح

اني مو تعرفيني فطيره انقهرت عليه عبالي ادميه كتلها ما يكدر اله بس الله...

جاا وهي تسودنت ..انجبي وكلي تبن شنوو اسم الله تردينه يمووت مو خطيه عمتي...تنحرم من ابنها

العباس عليج هسه هاي واحد شيحجي وياها..

اسمع الكل يضحك بس ضحكة ماما مختفيه من بينهم اكييد مقهوره عليه لان خالد يضربني...

تنهدت وجريت نفس.. الله كريم مخليه كل شئ للوقت

هنه كالن نترخص اجه معن عمتي وخرت الغطاء سويت روحي نايمه باستني بخدي وراسي وخلت فلوس جوايه هي وفوزيه وراحن

وعذراء تلعلع عليه..سلمت علئ امي وراحت...

واني تجيني اوجااع وترروح بس احس بتشنج بضهري حييل اذاني وهماتين السرنجه الموجوده بصدري بيها نص دم ...

الدكتور كال من تنترس انزعيها  ونزلي الدم ورجعي لبسيها بالصونده..

ضليت اتلوئ من الوجع وتلعب نفسي من الاكل من وره البنج ضال جاثم علئ صدري...

نمت موجوعه تعبانه ...

..........................

رانيا جنت دا اساعد ماما بالغده...

ودانيا خطيه نايمه ماخذه مسكن...

وفادي عند بابا...خاله كالت حتجي النه...

هي وبناتها...وهماتين اقاربنه كل شويه واحد يجي..

اني خابرت سلسبيل كلتلها..اذا انتي بالدوام اريدج تجيبين اليه حبوب مانع للحمل..

وهي استغربت كالت..ليش شنوو تشربين مانع زوجج ميقبل

كلتلها...لا مو ميقبل بس احس فادي صغير لازم اربي تربيه زينه وبعدين اخلف غير طفل..

كالت..اوك اجيبلج بس مو زين اعتقد

كلتلها..لا ماكوو شئ ان شاء لله اني هماتين مااريد طفل من مرتضئ هسه لان احس ممستقرين..

كالت...اوك من اجي اجيبلج...

قفلت الخط وضلينه نسوي اكل اني وماما

احس السويته صح لان مرتضئ متناقض ساعاته مو سووه

وما اريد اسووي طفل واضلمه ويايه فادي كافي عليه من احس انوو متصافين اخلف طفل...

شوويه واندك الباب رحت فتحته..

جانت خاله وبناتها ومصعب وخالتي الثانيه هي واطفالها وخالوو..

سلمت عليهم ودخلوو جووه خطيه مكعدوو دنوو معولت نامت...

بس خالاتي تخبلن عليها...

اجت سلسبيل . .انطتني الحبوب...

اخذتهن واشكرت منها...

وانطيتها فلوس مقبلت تاخذ...

ما ضلوو هووايه قبل لا تكعد دنوو راحت خاله وبناتها ومصعب وضلت بس خالتي الصغيره

كالت خاله..شلونه مرتضئ وياج:

كلتلها بضحكه..زويين

غمزتلي..ماكوو نونو علئ الطريق

ضحكت..لا والله ماكوو

كالت..ليكون لحد الان ماكوو شئ

كلتلها...لا علئ كولة دنوو اغتصبني

خاله ماتت ضحك كالت ..شبيها دنوو؟

ضحكت كلتلها..اول مااخذها خالد خابرتني تبجي وتسب وتغلط كلتلها شكوو صاير شئ كالت خالد اغتصبني،بيومها متت ضحك

خاله ضحكت كالت...هاي مخبله وين اكوو رجال يغتصب مرته...

كلتلها...لا وتريد ترفع دعوه ضده...

كالت..هو رجلها مبين شخصيه وحااد

كلتلها..اهوو خاله سايگ علئ عائلته هو الكل بالكل مشي عائلته علئ سراط المستقيم..

كالت..حلوو هيج رجال مسيطر بس هي شكوو تريد تطلك

كلتلها..خاله هو قاسي وياها وهي تعرفيها تدلع فما بينهم كيمياء..ميتفاعلون..

كالت..الله يهديهم اني زوجي رجل دجاجه ميحل هههه واذا تعصب يكول ونبي اليوم مااكوول ..يابه اوكل ..مااوكل هههه

ضحكت علئ كلام خالتي خطيه رجلها بااااارد وهي ضايجه تريده شوويه يضبها..

خليت وكعدت دنوو سوينالها معلاك شووي خاله خطيه كعدت تبوس بيها وتوكل بيها وجبرتها تاكل. 

اكلت شوويه وكل شوويه تسأل علئ عبله
...........................

دانيا متت من الوجع العصر احس روحي طلعت ضليت ابجي واتلوئ وماما خطييه كاعده تبوس بيه..

ضهري موتني اكتافي حيل تاذيني قبل شوويه زينه بس هسه متت...

بابا كعدني وضل يقره ايات عليه ويمسح علئ اكتافي...

شوويه والباب اندك...

راحت رانيا فتحت الباب..

شوويه ودخل خالد ..باوعت عليه واني ابجي

كال..خييير شكوو شبيها دانيا ؟

بابا كال..مااعرف ضهرها يوجعها وكتفها...

هو اجه كعد يمي جنت لابسه تراك بنفسجي بي سحاب وفاتحه السحاب من ناحية صدري علمود الصونده البصدري...

خالد لزم ايدي كال..هااا گلبي اخذج للمستشفئ

جاوبته بدموع ..لا مااريد

كال..جااا شلوون تضلين هيج خليني اخذج للمستشفئ ويضربوج ابر حتئ ترتاحين..

بجيت حييل...مااكدر ارووح جسمي مشنج

سحب اديه كال..اني موجود واشيلج وسيارتي موجوده

هو سحب العلاج ويقره بيهن خررب حضي هو ميعرف يقره انكليزي مدري شنو يقره..

كال بثقه..هذا ميفيد لازم ابرره اروح ادور مضمده اجيبها واجي

كتله ببكاء...لا مااريد ماما تعرف تضرب ابر بس دكول خلي من يزيد عندج الالم كوولش يالله اضربج

خالد باوع علئ ماما بعتب...خااف ما ترضين صدك جذب شنو منتضرتها تموت يمعوده اضربيها..

ماما اخذت الابره والاسرنجه وحضرته هو كاعد وبابا كاعد غير يكومون اضرب الابره

فاني شسويت رحت ضربت الابره  بره بالصاله..

ورجعت ماما تجي اليه

استحيت من خالد كوولش...

رجعت نمت علئ فراشي...

وبابا وماما طلعوو خلونه وحدنه...

هو ما صدك تقرب مني  واني بعدني موجوعه ما سكنت...

حط ايده علئ شعري كال...هااا حبيبي ما رتاحيتي شوويه؟

همست بوجع...لا

همس برومانسيه..عسئ الوجع للاقصده بكلبي ولا بيج

باوعتله بألم..تقصدني؟

كال وهو يعض شفته.. افاااا اني اقصدج والله اتمنئ المرض انسان اله امحي من الارض والسماء..

تقرب مني وحط خشمه علئ خدي...تحبيني؟

تنهدت من جنت اساله واكوله تحبني يكوولي عفيه لا تزعجيني،فاني لازم اقلده

كتله..اهوو لا تزعجني

كال بثقه ...هو اني اكدر ازعجج عمي وروح اهلي كلهم مااكدر علئ زعلج...بس اني اعرف قصدج من دكولين لا تزعجني

باوعتله ورفعت حاجب..اي،شنوو

كال ببتسامه خبيثه..معناه كلبج يضل يدك ويزعجج من يسووي حفله موسيقيه صاخبه وهو محتفل بحبي...

هزيت راسي باسئ..يايمه منك عندك ثقه توكل بلد

كال..اي لج احترك عشيرتي بنار ونفط غير من اشووفج تصعد عنده الثقه لج الله خلقج وجان راضي علئ عباده وكتبو. بجنسيج نوع الجنس..انووثه طاغيه...

ابتسمت بخجل خررب يوومه اله يخجلني

رجع كمل كال عود مثل عذراء ماعرفوو يحددون نوع الجنس كاتبين بالجنسيه الي شعار اخر..

باوعت عليه وطكيتها بضحكه...هههههههه

هو ضحك باسني بخدي حييل ماصدك حطيت ايدي علئ صدره وبعدته

باوع علئ صدري..كال وهو يعقد حواجبه..ليش السرنجه متروسه دم ومحد مبدلها شهل تسيب والله اخذج وياي هنا محد يداريج..

كتله..لا تضل تصيح تعرف كولش زين شلون اهلي مداريني...

كال..اي بس ماتحمل بعدج عاد تعالي دلليني كولي رجلي ابو جهالي يجي تعبان خلي اسويله مساج ادلعه ترئ والله حرام عليج محاسبه امام الله لان ممهتمه بيه وطبعا هذا مو كلامي كلام ابو لهب رجال متدين وعابد وزاهد..حتئ راح يبوش عذيره يخاف علئ الجمال الخارق البارق مايدري عذراء ارجل منه

ضحكت يالله شكد يحجي علئ العالم وياخذ غيبه وهاا الكعده ماخلت عن سؤاله عن مصعب..

من كال..اجتكم الحيه المسمومه

استغربت منو الحيه المسمومه...اثاري يقصد مصعب..

بعدين كتله..اشوو عذوره ما نخطبت

كال..غير ابو لهب يريد يروح للعمره من يجي ان شاء لله يخطب ...

كتله...ان شاء لله

بعدين تقرب مني ونزع السرنجه واخذها ودخل سرنجه غيرها لان مليانه دم...

ضل كاعد يمي يسولف ويحاول ينسيني اليوم ماسب هووايه...

بس اني كتله تذكر من جنت دكول علئ بابا نعال وهيج وهيج

اشر على نفسه بصدمه...اني شووكت والكائنات مااذكر هيج غالط علئ عموو اصلا حيل احترمه..

يابه فوك شينه كوات عينه وجذاب طلع وهاي خصله جديده من خصلات صفات خالد الحميده...

ضل كاعد للمغرب بس شرب جاي وبابا توسل بي يضل يتعشئ مقبل...

خله وراح بعد ما كل شويه بايسني واني اتعيقل عليه يحقلي لان هو هوايه جان يتعيقل...

وبعد ما راح  اخذت موبايل ماما رسلت رساله لعبله كتبت الها...

يا معفنه يا عووبه يا حماره هذا حبيبج دزلي رساله ويكول دانيه احببج تعالي حليها شلون بالله..

كتبتلي بسرعه..خلي يولي يمعووده اصلا مااحبه هم جبير وهم عقيم وهم ساقط..جنت اقط بي يولي..

ياربي خبلتني عبله كلتلها..لعد كاتبلي احبج واكتل زوجج واخطبج

كليله رجعت ولتخابرها بعد

كتبت والله دانيا ميسر اذا خله وحده اباله يجيبها يجيبها...

كتبت بنت الزمال انعل ابووج ياابو مكسر وياج انوب عليه مكسر...

قفلت الموبايل وحضرتها وحضرت مكسر من الشركه..

وين المطي يجي عليه هسه هذا شنو
..................
. 
بعد مرور مده

رانيا رجعت الزوجها ..وعذراء بعدها لحد الان ممخطوبه وتبجي نعل عبالها ابو لهب خرب الخطبه

دكول هو هذا حضي حتئ ابو لهب المهلس يتعيقل عليه ويماطل بالخطوبه ويوميه هذا الاسبوع الخطبه وكوولشي ماكوو...

لكن تقرر الاسبوع الجاي الخطبه بعد تخرب تصير مااعرف...

اني اليوم موعد الزرع خابر خالد كال اني راح اروح اجيبه واجيكم...

ضليت كاعده متوتره وخاايفه وماما تدعي وبابا هماتين بس يدعي..

اني شلت الازرار وفتحت العمليه جانت نضيفه

بس ضل الزرع

خالد حيييل تاخر راح من 3 الضهر وهسه بالسته العصر وهو مجاي...

ضليت ابجي كلت بيه شئ ومااجه ميكدر يواجهني

خابرته انطاني رفض رجعت خابرت هم رفضه

حسيت كلبي طار من بين اضلاعي لا ياربي كوولشي ولا الخبيث فدووه اروحلك

والله تعبت وكوولشي مجاي احقق من حياتي احس الدنيا ضلمه بعيني وانوب افقد صدري والله مصيبه

احساسي قاتل بذيج اللحضه ولا يمكن انسه الرحفه الي اعتلت جسمي...

بابا كال..حروح وراه اشوو تاخر وميفتح خط ااخاف التحليل مو نضيف...

كلتله ماما بخووف...اي روحح

بابا جاي يطلع واندك الباب....

نهاية البارت...يتبع..

لاتنسو التصويت حبيباتي...اعرف البارت قصير بس والله العظيم هذا الاسبوع كوله امتحانات ومع لعلم كتبت تستاهلون والله

كونوا هنا كونوا بخير...احبكم

نور سمو العراق..😘💔