رواية #انتي سيوف الثأر في اجفاني الفصل الثاني وأربعون 42 - بقلم الكاتبه سمو العراق

الجزء الثاني..بارت 3
رواية...انتي سيوف الثأر في اجفاني
بقلمي..سمو العراق
💔💔💔💔💔💔💔

يقولون حبيبتي مريضة .......فياا ليتني الطبيب المداوي
رفقا بها.......... ايها القدر
خذ مني سنوات وسنوات وارزقها عمرا وعمرا مديدا
فلقد اكتفئ قلبي بكل هذا العذاب
دعوتك يارب بكل انواع الدعاء
ان لا تسلب منها نور الحياة💔
فلقد سلبيتها الروح انا قبلا
فالضرب في الميت حرام...
فطفلتي المريضه ضحية عنفوان سيفي البتار

شكر خاص للمبدعه Mnmn78

.......................

رحت فتحت الباب...

ورجعت خطوتين من خووفي وصدمتي واني اشووف الصهيوني خيم علئ بابنه وخياله وجثالته غطت عليه...

ردت اسد الباب لكن هو دفعه واحتضني...

وقيدني باديه ...

دفعته ماگدرت جان اقووئ مني

احتضني وهو يهمس...دانيا حبيبتي اني زوجج حبيبج اهدئ لا تخافين...

انصدمت من كلامه... حبيبي؟؟،زوجي المجرم اي بس حبيبي لااا والف لااا

كتله بهدووء...شتريييد؟

عض شفته وغمز الي وكال...افااا هيج تستقبلين الضيوف ومع العلم اني مو اي ضيف اكيد الي معزه خاصه..

بلعت ريقي واني ارجف مجرد ما شفته مشاعري تلخبطت

كتله...تفضل بابا موجود

كال...ماعندي حجي ويه بابا كلامي وياج انتي...

كتله بجمود...لا ماعندي كلام وياك كلامي انتهئ من اول يوم تركت بي البيت...خااالد طلگني..

هو تكلم من بين اسنانه ولزمني من تشيرتي وبعصبيه...دانيه مااطلك لو ينزل نبي من السماء..

عطت بوجه بعصبيه...اطلگني يعني تطلگ وهاي الفاظك بطلها علئ شنو نازل نبي من السماء

عقد حواجبه وتقرب مني اكثر كال.. تردين تطلگين حتئ تزوجين مصعب...

كتله بنهيار...اتزوج مصعب غيره هذا ما يخصك

كال بوعيد...يعني اذا طلكتج تزوجين؟

كتله بعناد...اي اتزوج اتزوج رجال يحترمني ويقدرني ومايضربني ويتهمني باااطل اتزوج ولا يرف الي جفن..

هو لزمني من ايدي وسحبني بعصبية ومشئ حسيت طرت صررخت وضليت اضررب بي عطت بصوت عالي...بااابا

هو دار وجه وراد يحط ايده علئ حلگي حتئ يمنع صراخي بس اني جنت اسبع منه لزمت ايده وعضيتها حيييييل

ويدقني من اعضه يضل بس يبتسم وعيونه الخبيثه تتاملني ويضل يهمس...عضي حيييل تمنيتها بصدري...

من يحجي هيج يخليني ارخي اسناني وتضل رجليه ترجف

شوويه واجه بابا وماما...

شافونه واكفين هو مغطيني،واني ضايعه ويه حجمه

بسرعه ابتعدت وهو هم ابتعد وضحك...

بابا كال بااستغراب...خييير شكوو انتي بابا صرختي؟

ضحك خالد كال...السلام عليكم لا مصرخت بس جانت تريد تكلك اني اجيت...

بابا اجه سلم عليه هو وماما واستقبلوو...

واني رحت الغرفتي ارجف وجهي گب نااار وصار احمر حتئ الوجع نسيته ...

ضليت افتر بتوتر داخل الغرفه وكلي فضول اريد اعرف شنو الي دا يدور بينهم وعن شنو يحجون...

ياربي بس لا يحجي الهم عن ماضينه التعيس ويقهرهم ويقلقهم....

شوويه واجه بابا كال...دانيا تعالي خالد يريدج

كتله بخوف وتردد...شيريد؟

تقرب مني وحط اديه على اكتافي كال...بابا تفاهموو انتي وياها ترئ رغم اني احبج واريد مصلحتج بس الطلاگ مو هين صح هو حلال بس بغيض عند ربج ابغض الحلال عند الله الطلاق....تفاهموو بابا واذا لگيتي طريقج مسدود رديلي،خبر...

طلعت من غرفتي وبابا وماما راحوو الغرفتهم اني لازم اروح اكعد الوحدي وياها بالاستقبال...

اول شئ رحت سويته قفلت الباب الرئيسي اخاف هتلر بخطفني فقلت الباب وضميت المفتاح بصدري...

انووب رحت رجعت الغرفتي لبست بليره لان جنت لابسه بس بجامه وبدي

و خالد مو راحه اخاف يغتصبني واصير حامل وارجع غصبا عني...وتتكون عندي الذريه الدايحه..

وكفت علئ المرايه رتبت شعري وكرصت خدودي حتئ اصير حمره طبيعي...

انتبهت علئ نفسي شنو الغايه من ان اكون حلووه بنظره استغربت حالتي وخليت ورحت...

فتحت الباب شفته كاعد علئ التخم الملكي ويشرب جكاير وهيئته حيييل تخوفني...

هو من شافني عدل كعدته وطفئ جكارته وكف ملهووف ومشئ بخطوات وصلته اليه...

لزمني من اكتافي واني درت وجهي زعلانه

كال بهيام ولهفه...كالوو مريضه تخبلت مرتين اجيت اسووي حادث بالطريق

باوعتله بحددده ماعجبني كلامه...

كال..اليوم مرتين غصيت بالأكل استغربت حالتي اثاري دلال حااس اليوم الروح مريضه ...جاوبت گلبي وكتله اروحلها فدووه وونذر من عمري علئ عمرها...

غمضت عيووني حيييل ورجفت شفايفي وكعن دموعي لا ارادي...

هو مسح دموعي بلهفه وباسني بدموعي كال بخووف...شبيج شنو اليوجعج والله اعارك المرض وطلعج من حلگ السبع اشتريت بروحي والله انتي جاهله معزتج عندي بس اني ماجاهل غلاج بگلبي...

هزيت راسي ناكره كلامه...خاااالد انت السبب بكل شي انت دمرتني دمرت كووولشي والله مااريد اعاتبك لان متستاهل العتب...واني مااحب اشكي..

كال باسف...اني وياج ضحيه للعنف الطائفي صح تجبرت عليج وقسيت بس صدكيني جنت اقسي علئ روحي قبل مااقسئ عليج...تعبني الحنين لعيونج وزعلني غيابج..فعلا افتقدتج وشتاقيت الج احس يومي فارغ بدونج...

درت وجهي عنه وانطيته ضهري مسحت دموعي بتعاسه كتله...واني احس يومي مليان بدونك...خالد اني وياك ابد ما نتراهم فارق عمر بينه ولا عقلي،مثل عقلك اني وياك مثل السماء والطارق...

كال..شنو التردينه؟

كتله برجاء بدون ماادير وجهي اله...بس حررني من سجنك والله اخذت ثارك وزايده اصلا ما الك ثار ويايه

حسيت بقبلاته علئ رقبتي من وره غمضت عيوني وبطني لوتني

همس عند اذني..ترضين امووت والله مااكدر افاركج اني هاايم تعرفين شنو هااايم احببببج

درت وجهي عليه ولزمته من ياخة قميصه بااثنين اديه باوعت بعيونه كتله برجاء...باوع بعيوني خاالد شووف اني مثلي دانيه الجيت عروس لبيتك لو تغيرت شوووف شووف الشحووب اتمعن بوجهي تشوف الحياة مسلوبه مني والله

هذا كله بسبب شنوو؟ تعرف شنو ذكرياتي الاليمه وياك لك والله اني دا امووت خليني اعيش بسلام فدوه اروح الك..

حتضني من خصري وهمس...مستعد انسيج كوولشي،واعيشج بسلام بس،انتي،انطيني،فرصه ولا تصيرين قاسيه..

بللت شفايفي واحس ريقي يبس...خالد كوله انساه وتغاظئ عنه بس لا اكدر انسئ ضربتك العيني ولا اكدر انسئ من تركتني بالشارع انت اجرمت بحقي والله ومحاسبتك ولا شتكيت عليك ولا كلت شئ،ولا حتئ اي شخص،من  اهلي يعرف...

كال بحب..اصييله والله صح قسيت وياج بس انتي عالجتيني من ازمات مرة بحياتي،القدر هو خلاج بطريقي والصدفه هي لجابتج دووه لجروحي

شهكت من البجي كتله..خالد ترضئ امووت..

هو احتضني حيييل وعبالك راح اطير حسيت عضامي تكسرت بحضنته..

كال...كتلج الاوي المووت وطلعج من حلگ السبع المووت مو الج مايلوك الطوولج

كتله. ببكاء.....لعد لو انت تموت لو اني،واحد منه لازم يموت حتئ الشخص الثاني،يخلص طريقه...

كال بتفاجئ...هيج وجودي تعتبرينه الموت بالنسبه الج...

كتله بشهكه...اي

كال بجمود...خووش راح احاول ابتعد عنج بس مراح اسمح لاي شخص يتفرل منج ولا اسمح لشخص يكون ولي عليج انتي مرتي ومسئوله مني وان شاء لله باجر اخذج للدكتور...

كتله بتنهيده...خالد ترئ مجرد تشنج عضلي،ماكو شئ وياريت تطلگني بدوون مشاكل

ماحسين غييير بااديه القاسيه قيدتني وصفني علئ الحايط وعيونه تجدح شرار...

كال بعصبية وفحيح شيطاني...صارلي ساعه احجي وياج واكلج مااطلكج اعرفج بس اطلگ ترحين تزوجين وتحركين كلبي...والله مو زلمه ولا طالع من ضهر ابووي اذا طلكتج...

صررخ لوجهي كال ... فاهمه انتي ملكي تعرفين شنو ملكي...

كتله ...مو ملكك ولا ورث من امك

ماحسيت غير بقبلاته القاااسيه قطعت انفاسي،حاولت ادفعه ماكدرت جانت قوته تفوق قووتي اضعااف...

فتح شعري ودخل اصابعه بشعري واني اضرب بي واريد التقط انفاسي صرت ارجف وعرگت حيييل

نبتت اضافري بيده وهو رخئ اديه مني دفعته وركضت

وصلت لباب الاستقبال باوعت عليها وهو نظراته الخبيثه وضحكته الاشمئزازيه مراقبتني...

عض شفته وكال...اووووف والله بزونه منفووشه نفش...

بلعت ريقي هذا مستحيل اخلص منه....

مديت ايدي بصدري وهو يبتسم بخبث...

طلعت المفتاح وشمرته عليه كتله..اطلع بررره يامنحرف ياحيف شواربك وبابا مئمن بيك وانت تريد تعتدي عليه...

لكف المفتاح وضحك بااستهزاء... ههههههههههاي اي. مو علئ اساس اني ممعتدي من قبل لج دانتي حافظ جسمج شبر شبر اوووف من الشامه البخصرج لحد هسه مزلزله كياني....لا وبعد ل....

فتحت عيووني مصدومه من جرائته

كال..اكمل لو كاااافي ...وغمز الي

فتحت الباب وطلعت ملهووفه وخايفه شكد ميستحي حافظني حفظ ويعدد خررب يومك

دكيت الباب علئ بابا ...

طلع بابا كال...هااا بابا

كتله...خالد يريد يروح منتظرك...

بابا طلع وراح للاستقبال..

وكفت وره الباب...

بابا كله...هااا عمي ان شاء لله خيير

كله...خير ان شاء لله خلوها عدكم هاي الفتره وان شاء لله بس ترتاح ارجع عليها.. بس هي شنو البيها..

بابا گله...هي بس صار الها فترها تشكي من ايدها وكتفها دكول شد عضلي...

خالد...راح احجز الها عند طبيب مفاصل واخذها وان شاء لله خيير

رفعت حواجبي بااستهزاء يا مفاصل اني انمليت عقد بصدري وحده وتحت ابطي وحده ودا احس برزوز وحده ثانيه...

اووف لو يعرفون اني من شنوو اعاني...

بجيت من اليأس والجزع الي تلبسني معقووله بعد فتره اكون جوه التراب واكون نسيان وما اكون بينهم كلمن يعيش حياته واني تخلص حياتي...

شنو المنتظرته اني المووت ؟ سكوتي عن مرضي يدل اني منتظره المووت...

ماحسيت غير باابويه حط فلووس بيدي..

باوعتله مصدومه كل هل فتره افكر وخالد طلع...

كتله بااستغراب...هاي شنوو؟

كال...خالد دزهم الج...يكول مدام مسؤؤله مني محد اله شغل بمصرفها

باوعت علئ الفلوس وتنهدت..ميغريني لو شيسوي ميغريني...ميكدر يتملكني...

ما عرفت نفسي ابجي اله ما بعد بابا مسح دموعي..

تركت بابا ووكعت الفلوس من ايدي وركضت الغرفتي ودموعي تتطاير من عيوني...

وبابا ادرك البيني وبين خالد شئ عظيم وما گدر يستوعب شنوو...

نمت علئ فراشي واني اشهك وابجي وحسيت بالنغزات زادت وصدري اشتعل نار

حاولت اخفف من الضغط علئ نفسي بس مكدرت لذالك التجئت للنوم الكاذب للهروب من ذكرياتي التعيسه.....

.............   .......................

سحر...

زحفت على السرير من الخووف واني اشووف أقبح انسان علئ وجه الكره الارضيه...

قيس النذل العااار ...وجه ممسوحه من الرحمه وصاير مثل القرد ...

مزين گرعه وطابر حاجبه...

حسيت من شفته راح اتقيئ...

هو هجم عليه وجدتي والبنات لزمنه...

ضل يتهدد بعصبية وغضب...لج عااار انخطبتي والله اله افسخها واذلج هنا بنت الكلب

انقهرت حيييل ودموعي نزلت لا ارادي يسب بااهلي وهمه مووته الله ياخذك وينتقم منك شر انتقام الله علئ الضالم ان شاء لله حوبت يتمي ما تتعداك...

ماكدرت انطق بولا كلمه خووفي منه اكبر مني...

كال بااستهزاء...ههه خطيبج العار يدري لاعب بيج منا لمن كلي الله بس...

شمئزيت من كلامه وحقارته وشديت علئ شفايفي...

تقرب مني ولزمني من حجابي وهمس...تطلكين واخليج خدامه جووه رجليه مفهووم مو اني قيس الوحده مثلج حشره تريد تذلني...

وكمل بهمس مقرف...اوووف مشتاق الاحضانج

حسيت القهر ياكل بكلبي باوعتله بحده وتفلت بوجه

ماعرفت شلووون اجتني القوووه ماحسيت غير براشدي افقدني السمع للحضات...

وكعت من الجربايه وصرخت احس ضهري انكسر ضليت اصرخ وابجي

وهو يدفر بيه ويتهدد وهنه لازماته...وكفت اريد انهزم منه ماحسيت غير برفسة رجله علئ بطني طيرتني من مكاني انضربت بالباب جانت بيه حديده وحافته طالعته

حسيته دخلت بضلعي ضليت اتلوئ واصررخ من الوجع انهاريت كووولش متحملت اببببد

جدتي ضلت تضرب بي وتغلط عليه وهو من شافني هيج خله وطلع...

كومتنني اخته وكعدتني علئ الجربايه الدم ترس ضهري..

سمعت جدتي تخابر بام خالد كلها..خييه الحكينه كليلهم خلي يزوج علي وسحر هذا الاسبوع غيس هجم علينه وكتل سحر

وبعدها كالتلها...جااا خووش باجر اجيب سحر واجي...

قفلت الموبايل واجت يمي تباوع علئ ضهري ضلت تلطم كالت...يمممه شلون تزوجين وغيس العار شوهج

راحت فتحت الكنتور وضلت تلم بااغراضنه وقررت تزوجني بسرعه من علي حتئ تحميني من قيس...

وانه هم اريد اتزوج علي وهم اخاف منه يطالبني بحقوقه كزوج وانه كاره جنس ادم

ربي يحلها محتاجه لامي حييل اتمنئ اموتن واخلص من الحياة الگشره...

يمممه وينج افتحي كبرج وحضنيني مااريدن اي واحد بس انتي ضليت ابجي منا لمن احسن عيوني طفن وبعد مااشوف...

وضهري متت منه انه احسن بعد مااخلف وقيس النذل احسه كطع خلفتي ضرباته كله على ضهري

جدتي كعدت بصفي كالت باجر نروح من الصبح نشرد وان شاء لله علي يحميج من غيس

هزيت راسي بأي وضليت اون و ابجي..منا لمن حسيت دموعي خلصن...

................... ..

جنت كاعده بالاستقبال اني والبنات وعموو ومعن...ومرته وعمتي وعذراء...

جانت عمتي تلعب بفادي وتبوس بي ودكله...فديتك يا رويحت الغالي...

اجه مرتضئ دخل كعد بصفي..

واني تنحنحت وابتسمت بوجه وهو بادلني الابتسامه ودار وجه

وبعدين راح اخذ فادي من عمتي وكعد يمها يبوس بيه ويبززه بلحيته وفادي مزعوج فديته

بعدين دخل خالد كال..السلآم

كلوله...وعليكم السلام ورحمة اللة وبركاته

امه كلتله...وين جنت

كلها..مشوار

هي سكتت محد يحجي وياه ...عمتي بطبيعتها تخاف علئ ولدها واذا واحد منهم طلع تحرك التليفون حرك عليه ومن يجي تسوي بي فلك...

بس خالد شكد تتصل عليه ميفتح خط او يفتح يكلها جاي بالطريق..ومن يجي دكله يمه فدوه لا تطلع دير بالك على نفسك

وهو يكلها اي ان شاء لله وثاني يوم نفس الشئ علئ كولة دانيا...دايح

وشفت الكل يخاف منه ويحسبله حساب حتئ اخوو الكبير..

الوحيده المتخاف هي عذراء...

اول مدخل كلتله...هااا وينه ابو لهب

كالها...بالدرك الاسفل من جهنم

كلتله...يااا ابو لهب المتدين بجهنم جاا انت وين يشمرونك بالزفيير

كلها..انجبي انجبي وينج وين ابو لهب رجال متدين وصاحب دين انتي شنوو

كلتله...شني والله العظيم اذا يريد اكص النيشان طول مال علگ اخضر

هو ضحك كلها ..والله ذكرتيني بنكته تنطبق عليج ان شاء لله عذراء من تزوج ابو لهب تلبس ثوب اخضر وتشعل كلوب اخضر وتحط نزله خضره ...ويدخل ابو لهب يكول ازور عذراء اصالة عن نفسي وعن والديه ووالد والديه اادخل يا عذراء اادخل يا امة الله

احنه ضحكنه متنه من ضحك...

وهي هم الفطيره تضحك علئ واهسنه بس المهم تزوج ابو لهب...

كلتله..نذر عليه اذا اتزوجت ابو لهب البس بدله خضره

كلها...ان شاء الله ازوجج والله بس اصبري عليه شويه...

كلتله...ان شاء لله واني هم نذر عليه اذا تزوجت ارجعلك دانيه وبديت وياها اغور بيها...

هو ضحك وتركنه وراح...

شويه واتصلت بيبة سحر ...

والفتهمته حتجي لان كاتلها ابن عمها مااعرف شنوو..

بسرعه انتبهت علئ مرتضئ عيونه صارت بكصته وترك فادي انطاه لاخته وانتبه علئ كلام امه...

عرف ابن عمها ضاربها ومئذيها...

مرتضئ كال بعصبيه...شنو تايهتله والله من علي اله اجفنه وهو حي وادفنه نذل عار يضرب بنيه لا حول ولا قووه...

امه كلتله...ان شاء لله راح تجي واخابر اختك ام علي تقرب زواجهم...

هو عبالك انضرب راشدي تركها وراح واحس لسانه انربط...

انقهرت حيييل عليه وعلئ سحر وعلئ الكل الله ينتقم منك عمار بهذلتنه كلنه ربي يبهذلك مثل ما بهذلتنه...

اخذت فادي وطلعت وحس وجرت من القهر...

وعمتي كعدت تخابر بأم علي وتحجي وياها....

واني دخلت لغرفتي حسيت خنكتني العبره واريد ابجي بس كتمت عبرتي وحاولت اقووي نفسي...

بس هيهات لان صعب من تحسين بعدم اهميتج وانتي جنتي الكل بالكل من انسان يسواهم كلهم...

.....................  

بعد مرور كم يوم..

خابرتني عبله كالت باجر تعالي ويايه للجامعه لان حاجيت الاساتذه وكالوو خلي تجي تشوف الاقسام...

كلتلها ميخالف رحت لبابا كتله

بابا خطيه مكسر خاطري كال ..روحي

رحت دا احظر ملابسي طلعت فسان قصير اسود وبي ذهبي من الوسط وبنطرون اسوود

وشال ذهبي وحذاء بيجيه وجنطه كذالك...

شويه واتصل موبايل ماما هو كوله عندي...

فتحت خط لكيتها رانيا...

حجيت وياها...جانت مزعوجه من تصرفات مرتضئ تجاه سحر...

سكتت منها ومااعرف شنو انصحها اصلا مشكلتها عويصه..

كلتلها..باجر اروح للجامعه

كالت..خالد عنده خبر

كلتلها..وهو شله شغل هو طليقي ان شاء لله

كالت..لج ميصير تطلعين بدون علمه..

كلتلها..يمعووده هو اني وين رايحه للملهئ كوله رايحه ادور جامعه تتقبلني اريد اداوم...

كالت...لعد مو كلتي ادرس بااوكرانيا

كلتلها..اي ان شاء لله بس خاف خالد ميقبل

ضحكت كالت...مو معتبرته طليقج شكوو ماكله همه

تنهدت كلتلها...مااعرف بس يمكن لان بالخارج...

كملت اتصال وقفله...

بعدين ضليت احووس مكدرت انام احس بثقل بصدري ويوجعني...

حاولت اتناساها ...

دخلت علئ صفحة خالد الرسميه بالفيس...

شفت ناشر صورة قبر زينب الله يرحمها وكاتب...

الگبر مو للبگدج گومي البسي سوار...الچفن ميلوگ للمتروسه حنييه..

جان مكتوب الشهيده الشابه..زينب ....

انقهرت حيييييل وبجيت اووف يا خالد...

زينب ماتت ودانيا مريضه...

ان شاء لله تدفني بصف زينب وتخلصني من همك...

رحت لفراشي واني افكر بيه اذا متت شيسوي هم يبجي عليه...

بس لا حقير ميبجي اصلا من ضربني ما رف اله جفن..صح تأثر بس ما شفت دموعه

وهو حيل ميحترمني...

ومخلصها عليه بنت الكلب بنت المطي...ابويه يدخل الجنه من وراه اني متأكده...

وشكد يقلد عليه شعرج صووفه وشفايفج براطم صوماليه...

اذكر مره جابني من اهلي...

كال..اكلج شكد عمرج؟

كتله بحقد..جنت 19 بس هسه 102

كال بااستهزاء...اي مبين 102 شكلج مال وحده كبيره

باوعتله بنظره حاده اصلا اني كاعده بصفه بالصدر ضايعه مضيعني...

كتله بسخريه...وانت شكد يالبيبي؟

كال..زين عمري مااكدر اكوول اخاف من العيون

كتله..اعرف بيك اكبر مني ب 15 سنه ولو مبين بعشرين

كال..احجي بكيفج وهذا حجي يفيدج هو مو بالعمر بالشكل

كلت...اووف شووف الثقه والله بابا مبين اصغر منك

كال..وانتي مبينه اكبر من امي

كتله...اني وزني 54 وعمري 19 وطولي 159 يعني كيووت..بس كوول لروحك وزنك طن..وطولك برج ايفل وعمرك 70 سنه

ضحك كال..لا يا ملعوونه راح اكولج عمري الحقيقي اني 34 سنه ارتاحيتي

كتله..اي شويب رجلك بالگبر

كال..بنت المطي تسكتين لا اوكلج نعل

سكتت واني اسب بي بكلبي ...

ضحكت علئ ذكرياتي وياها ونمت....

وماصحيت اله علئ رنة موبايلي...

موقته الموبايل...كعدت بدلت بسرعه ومكيجت ورشيت عطر...

شوويه واجت عبله بالخط مالتها...

رحت ركبت وياها....

كالت...لج شطالعه تجننين اليوم تصير كتل عليج

ضحكت كلتلها...مو الهلدرجه...

اول موصلنه كالت عبله...خلي نروح للمطعم نتريك ونرجع للجامعه بين متجي صديقتي تجيبلج ورقه من العماده حتئ يقبلون يدخلوج...

رحت وياها المطعم كووووولش راقي يجنن بالكراده وقريب علئ جامعتها...

استقبلنه النادل...

كعدنه بجناح خاص للعوائل...

ضلينه نسولف وكل شوويه عبله تراسل...

شوويه وحسيت صارت حركه ورايه درت وجهي...

شفت شخص لابس قاط اسوود ومسدسه بارز من احزام بنطلونه ووياه اثنين واحد علئ يمينه وهو علئ يساره وكل واحد منهم عضلاته اكبر من وجه عبله يخوفون...

بلعت ريقي ...وهي ضحكت ووكفت...

جانت لابسه فستان قصير احمر وشعرها اسود ولادي وحمره ...حمره تجيب الشبهه

سلمت عليها تفاجئت منها...

وهو كعد مقابيلي وعيونه الجريئه تتاملني

كال...مرحباا معرفتج منو بلا زحمه

بلعت ريقي ومكدرت احجي لو يجي خالد او بابا شنو  موقفي واني كاعده ويه عصابه مدري شنوو...

........    ..................

بمكان ثاني....

جان واكف بالمكان الي يتواجد بيه خالد...

همس الصديقه وهو يخفي وجه بمناظر كبيره وشفقه عريضه...

...لازم اتخلص منه هذا خطر على حياتي...

صديقه...وشتريد تسوي

....بضحكه حقيره...يا اما اقتله يا اما اكسره وكعده بالبيت...

صديقه....ههههههاي كسره وكعده مثل النسوان حتئ تحس بنشوه وانت تشوف عدوك عاجز..

هوو.... ههههههاي فعلا حلوه هاي كثرلي منها...

طلع خالد..من الكهووه

وتوجه السلاح عليه بدون علمه...

نهاية البارت....يتبع...

حبيباتي طلب تابعوو هذول الكاتبات فضلا وليس امرا...user6542200 FatimeRaad

انتظروني بالبارت القادم...

كونوا هنا كونوا بخير...

احبكم...نور سمو العراق😘💔