تحميل رواية «أرض الخناجر» PDF

أرض الـــــخناجر 🗡️

بقلمي الكاتبة ايـــلول .

تصويت وتعليق بين الفقرات لطفاً💚

══━━━━✥◈✥━━━━══

الحزن البگلبي ما ينعاش

سراديب النجف ارحم

══━━━━✥◈✥━━━━══

رنـــه :: فاتحه عيني بصدمة ثواني رسم عقلي مشهد الرصاصه تطلع من التفگه وهي تتجهه الراس زهره تخيلت كلشي قبل لا يصير ارمش بثگل ارجف كلي أريد اصرخ ما اگدر الساني ثگل واطرافي ترجف رجليَّه ما يتحركن نزلت التفگه من ايده ورجع بأثنين اديه شالها بس يريد يسيطر عليها وزهره گدامه بالضبط كعدت وتلعب بلعابتها، حسيت جمعت كل قوتي يله گدرت اصيح بصوت تارسه الخوف ويرجف

-حسييين.

دار وجهه علي خايف شمرها بالگاع فاز وانه طحت على اركبي ارجف بشكل مو طبيعي وگلبي حسيته منلزم بأيد وينعصر عصر، حلكي نشف والساني ثگيل أجوني ثنينهم حسين وزهره يكضون بيه وانه تمددت بالگاع اتبرغث مثل الطير المذبوح عيوني غوشن وصوتهم افهمه بس يصير بأذني صوت مثل الصفير.

هزتني زهره تبجي، فاتحه حلكي ما اگدر احجي بچي حسين وهوه يجر بيه بس يريدني اكعد وانه منتهيه حتى رمشت عيني حسيت گمت ما أتحكم بيها وگلبي احسه يدك مرتين بنفس الثانيه.

وگبل لا يغمضن عيوني شفت حسين من طلع يركض وزهره تشبگ بيه وتبجي، حسيت بروحي جاي اموت اريد اگدر اشيل ايدي واشبگها اريد احاجيها ما اگدر آخذني الظلام.

"""

ريـــمه :: طلعت للحوش أشّر اهدوم وندك باب حوشنه حيل وصوت حسين يبجي بعدني ما راكضه حتى افتحه دفعه وطب متسودن يرجف ومايعرف شيحجي يبجي بخبال ركضتله عبالي ســليم طاكه من جديد جلب بايدي غاص بدموعه

حسين:: تعااي تعااي رنـــه رنـــه.

فتحت عيني ما مستوعبه

-ييمه يممه شبيها رنـــه.

وهوه يجر بيه مايگدر يحجي من البچي بس يريدني اطلع وياه صاح

-ررراح تموووت.

حجايه وكفت النفس ببلعومي ما ادري شلون رجليَّه شالني وطلعت وياه بس بالدشداشة والحجاب ارجف واركض وي ركضته بعدنه ما واصلين الحوشهم وسليم وبريا صاحوا على حسين هستوهم رادين من الگيعان هوه راحلهم وانه طبيت للحوش اركض ميته من الخوف واشوفنها ممده بالگاع وزهره تطك على خدها وتبجي ركضتلها متسودنه جريتها الحضني

-رنـــه رنـــه يمه رنـــه شبيهااا شبيهاا حاجوتي شبيها زهره ولج شبيها.

واطك على خدها روحـــي رايحه ميته بإيدي كل ظني منتوله فقدت بس اصرخ ونجرت من أيدي بجيت متسودنه بريا جراها على رجليَّه وسليم جرني يصيح

ســليم::شبيهاااا ولج شبيهااا؟

لطمت على وجهي اصرخ

-ما اددددري ما ادري.

بس اريد اردها الحضني وبريا لامها بين اديه يطك على خدها صاح وصوته يرجف

بريا:: عبااايه عبايه بساع عبايه.

سليم طلع يركض للسيارة وانه كمت اركض الغرفتها ابجي وارجف اندل كل اغراضها وهسه احس روحـــي كلشي ما اندل مدري شلون لكيت عبايتها وطلعت اركض بريا لگيته منگع وجها بالماي وصوته مخنوگ ايده ترجف تمسح بوجها ويگلها

بريا:: رنـــه اصحي رنـــه لا تموتيني وولج بس فتحي عينج رنـــه.

ذبيت العبايه عليها وطب ســليم يصيح

-جيبهااا بريا بساااع.

ودار وجهه عليه صاح

-عبايتج وتعاي ولج ريـــمه تحرررركي.

ركضت لبيتنا من الدموع ما اشوفن دربي والساني يردد

-يا ربي دخيلك اللهي دخيلك، يا علي ياحاضر الشدات يا علي.

صارت بوجهي ام صــيهد تحاجيني وانه ما اجاوبها اركض للبيت بس جريت عبايتي اريد اطلع وامي تصيح عليّ وتجر بيه ما اسمعها شتحجي طلعت اركض ســليم فر السيارة وبريا طلع شايلها بين اديه وام صــيهد وراه متسودنه وحسين وزهره يتباجون، ركضت للسيارة صعدت خلّوها بحضني وصعدوا فر السيارة ســليم طاير، اعاين لوجها بحضني اصفر وشفايفها بيض لميتها الصدري ابجي وسليم صاح بحرگه

-ريـــمه ررريمه

شلت راسي اعاين للمرايه امسح بدموعي

-شبيها حاجيني منتوووله كارصتها حيه شبيهاا؟

-ما ادررري والله ما ادري.

شهكت ابجي والمها الحضني اكثر بريا كاعد گدام يم ســليم دار علينه ايد رنـــه طايحه مد ايده لماها بين اصابعه وعاين لوجها عيونه حمر دم وساكت الغصه تصعد وتنزل ببلعومه.

متت الف مره لمن وصلنا للمستشفى بساع نزل بريا شالها وطب يركض وسليم متانيني متبهذله لا شالي عدل ولا عبايتي اريد بس اركضلها وهوه يجر بيه ويغطي طبينه للطوارئ نركض عايفينها على السديه وملتمين عليها كلهم بريا واكف يم رجليها مغطيهن بالعبايه ولازمها وهمّه يتراكضون ويسألون ببريا شبيها وهوه بس عينه على وجها مايرد ســليم جاوبهم ودار عليَّ يسألني وره ما سألوه

-تاخذ علاج هيه؟

مسحت عيوني اهز راسي لا الطوارئ هوسه واكو غير بنيه هم على سديه وشكد ملتمين عليها يفحصون رنـــه ويركضون على الابر والمغذيات وهي لا تحرك ايد ولا رجل، رنـــه عدها ارتفاع بالضغط وانخفاض بالسكر والبنيه اليمها عدها ارتفاع بالسكر وبنفس الوقت جابوا ناس مدمايه من حادث الطوارئ نخبص واحنا بس نريد واحد يطمنه على رنـــه الدكتورة حددت ابر لرنه وللبنيه اليمها واجه ولد ينطيهن الابر انطه للبنيه واجه الرنه بريا شال الردن منها انطاها الابره شويه ووجها تغير كمت يمها امسح بالعرگ من وجها اجت الدكتورة تشوفها الابره بعدها بأيد الولد الدكتورة لمحتها بأيده وسألته

-هاي الأنسولين المنو انطيتها؟

گالها على رنـــه وهيه تخبلت ضلت تصيح ونخبصوا تريد تلطم وتصيح

-عدهااا انخفاض بالسكر الأنسولين مو الها.

وخروني منها بجيت خايفه دفعوا السديه اخذوها جوه متسودنين وبريا جر الولد اللي انطاها الانسولين يطكه والوادم تفاكم بيهم، البنيه الثانيه هم تخربطت واهلها تسودنوا كعدت بالگاع ايدي على راسي شجاي يصير الامن طلعوا بريا بره وسليم وأكف كدامي ويصيح

ســليم:: اختي اذا صار بيها شي المستشفى احركها عليييكم.

واجوه يجرون بيه يردون يطلعونه دفعهم يصيح بغضب

-ووخر ما اطلع وخرر.

وكفت بظهره ابجي ميته من الخوف على رنـــه وعليهم لان يتعاركون، بريا اسمع صوته گاب وياهم بباب الطوارئ ورجع طب يرجف كله كضاه ســليم يحجي وياه بصوت ناصي

ســليم :: على كيفك طــروادة والولد راح يوصلون اذا شافوك بهالحال اطيح حظك لا تفضح روحك، يموتك طــروادة وعلي، هوه انا هسه بودي اكلك بسنوني شحال هوه.

وبريا عيونه دم نزل كعد بالگاع اديه فوك راسه جراه ســليم يريد يطلعه بره يغسل وجهه دار عليَّ صاح

-تعاي.

مشيت وراه من البجي كلشي ما اشوف كلساع عاثره اشتره بطل ماي فتحه وخلاه بأيدي كض بريا نزل راسه صبيتله ماي بأيده غسل وجهه بريا ومسحه اخذ البطل من عدي يتلفتت شاف محد يعاين علينه مسح دموعي

ســليم:: لا تبجين ادعيلها وان شاءالله تعدي على خير.

هزيت راسي اي دموعي تنزل سكته درت وجهي على الركضه وخرت على صفحة وهوه يركض اجه متسودن والولد وراه كضاه سليم بس يريد يحاجيه وهوه يصيح

طــروادة :: ماتتت هاااه ماتتت اختي ماتت.

ســليم ::بالحسين لااا.

كضاه صــيهد يردون بس يحاجونه وهوه طب يركض بلا عقل مشينه وراه گالوله بالعنايه المركزه بعمري ماتخيلت طــروادة هيج جنت اشوفه جبل مايهتز بلحظة نهدم طاح على رگبه وصيهد وميثم بس يردون يكضونه.

صــيهد:: گوم يابه صلي على محمد شني السالفه گول يا الله خل نفهم شي.

جروه كوه وكفوه والدكاتره يحجون وياه ولان همه الغلطوا ووصلوها الهالحاله كاتلهم الخوف، من اصعب ايام عمــري هاليوم كل شويه واحد من الولد راكض يجيب علاج من بره مره ابر مره مغذيات، اختنكت كمت ما اتنفس بس أأشر السلطان وسليم على رگبتي جروني بين اديهم طلعوني من المستشفى كعدت على يم حايط المستشفى سليم ركض يجيبلي ماي وسلطان كعد كدامي يحجي

سلطان:: شييج ريـــمه شبيج لا تسودنيني.

جريت نفس دموعي تصب جراني الصدره

-والله هسه تصير زينه لا تخافين.

-ييمه گـــلبي والله گـــلبي يوجعني عليها.

-شسالفه شبيج لج هاي هسه والله هسه تصير زينه.

ســليم :: هاج اشربي ماي.

وخرني سلطان من حضنه يمسح بعيوني هستوني اشرب ماي وطلع طــروادة وياه مــيثم وصيهد كعد بالباب حط اديه فوك راسه مدنك والنوب بكل حيله ساكت ولطم على راسه يردون يكضونه مايگدرون حط اصبعه بين سنونه عضه حيل الحد ماسال الدم منه والولد متسودنين يشهك ويگلهم

طــروادة :: انا الدعيت عليهااا انا الدعيت ريت بگلبي الوجع ريت انا بمچانها

صــيهد :: انچب يله سد حلكك

جر ايده طرواده حيل عاصر إصبعه بقوة طكاه راشدي يغلط عليه

صــيهد :: هسه تصير زينه وتمشي تشوفها لا تضل تلطم لا حلگك اشگه.

وطرواده دنك ساكت ميت من القهر وعيونه حمر بريا واكف على جهه گاله

بريا :: شدعيت عليها؟

وكلهم داروا يعاينوله، ســليم بساع راح عليه جراه يمشي ويحجي

ســليم:: راح نروح نجيب الابر.

هم طلعوا واعاين من البوابه مال المستشفى طبت ام صــيهد وماسه وعبود وسجاد، عبود يركض مايندل دربه بس شاف طــروادة اجاه ميت من آلخوف ويصيح

عبود :: ها طــروادة هاااااه.

وكعد على اركبه گدام طــروادة بس يريده يحاجيه عبود عيونه يجرن والولد يحاجونه وهوه كاض طــروادة من ركبه بس يريده يحاجيه وهوه منزل راسه ساكت.

عبود:: وولك حاجيني حاجيني گلي وينها.

جراه صــيهد يحجي وياه ويفهمه اجت يمي مــاسه عيونها مورمه شبگتها ابجي ايدي ترجف وهيه تحجي همس

مــاسه:: شبيها؟

-بالعنايه المركزه اطوها ابرة أنسولين بالغلط وتخربطت اكثر اذا صحت بعد چم ساعة زين واذا ماصحت تدخل غيبوبه يگولون.

رجفت شفايفها تبجي كاضه بأيدي وام صــيهد دموعها على خدها وتحاجي بولد عمي شامل وتصبر بيهم صاح ســليم.

ســليم ::تعالن مناه.

صرنه على صفحة انه وماسه شويه واجوا يصيحون

"منو وي رنـــه شامل"

ركضوا الولد كلهم گالولهم

"نريد مره تضل يمها"

راحت ام صــيهد يمها، مــيثم عينه على بريا من رجع يوكف گدام طــروادة مايخليه يشوف بريا وسليم هم مرتبك كل ساع ماخذه ورايح الغير مكان .

وسجاد حاير بعبود يتسودن من يشوف ايده على گلبه يضل مايدري شيسوي، كعدنه انه وماسه أيدي بأيدها اسألها

-حسين وزهره وين.

مــاسه :: عفناهم يم رغد والبنات لو تشوفين شصار بيهم بس يبجون ضالين كاعدين بباب حوشهم حسين شابگ زهره ويبجون وامي كلساع رايحتلهم بس تريدهم يجون للبيت ما يرضون گبل الفطور بشويه يله خافوا واجوا.

ريـــمه ::دنكت متحسره ممرود گـــلبي  الولد جابوا لبن وتمر بس علمود نفطر كوه على رواحنه فطرنه  بس طــروادة وعبود ماشربوا شي ولا رضوا يتفطرون طــروادة يگلهم

طــروادة :: بس خل تگعد وتحاجيني كلشي ما اريدن.

اعاينله حيله مهدود وروحه رايحه شويه طمنونه عليها وگالوا ساعتين بعد اذا استقرت يطلعونها الغرفة عاديه وممكن  للصبح حتى للبيت تطلع  غمضت عيني احمد ربي واشكره.

اجه يمنه سلطان وبساع اجه صــيهد هم مــاسه دنكت وانه عيني على سلطان كمت وكفت يمه اسأله

-جدي ابوي عمي هم خابروكم سألوا شي شو محد بين؟

وهوه بعصبيه يحجي من بين اسنانه

سلطان:: لا تخليني انعلهم اسكتي، شني مكطعين المحنه؟ كل خيّر مآبيهم.

دار وجهه يدخن ضايج رجعت كعدت يم مــاسه، وطرواده كل ساع يحاجي واحد بس يريد يطبّ يشوفها علوا گلبه لمن صارت ب١٢ يله رضوا صــيهد  گالهم.

صــيهد :: عادي اكثر من نفر؟

-اي بس لا تتأخرون ان شاءالله تطلع للردهه وتشوفونها براحتكم.

صــيهد :: كوم طــروادة خل البنات يشوفنها وياك.

حجاها وأشر الماسه امشن، عبود وطرواده گدامنه وانه وماسه وراهم نمشي  مدنك من يحاجينه طــروادة فتحولنه الباب طبينه انه وماسه ام صــيهد كاعده يمها أيدها على راسها وتقرأ گـــلبي  يدك بخوف وبس شفتها بهالحال نزلن دموعي بلا صوت وماسه تشهك وعبود وطرواده مشوا حانين ظهرهم كل واحد من جهه كعدوا على ركبهم طــروادة ضام وجهه دموعه ينزلن بلا صوت وعبود يبجي ويبوس بأيدها

عبود :: رنـــه خويه حبيبتي رناوي يا روحـــي

دموعه ينزلن على ايدها وعمه تفتر عليهم  ايدها على ظهرهم تصبر بيهم، وطرواده حاط اديه على وجهه مدنك مايريد يبين روحه يبجي بس اشوفهن دموعه ينزلن قطره قطره.

فتحت عينها  ذبلانه كوه  تهمس

رنـــه :: كهلان.

عاف ايدها وشال راسه مد اديه يرجفن يحضن وجها يحاجيها  مختنك

طــروادة :: ها خويه ها يابعد روحـــي.

رنـــه :: ح، حسين، حسين وزهره، وينهم.

ام صــيهد:: يم اخيتج رغد ومابيهم شي والله

عبود :: رنـــه حبيبتي شجاج خويه هيج هيه ولج هيج تهدين حيلنه.

وهيه كوه تحرك راسها تغمض وترجع تفتح تبلل شفتها كوه وتهمس

رنـــه :: كلشي مابيه.

دنك طــروادة يبوس بأيدها حركت اصابعها شال راسه كض ايدها بين اصابعه كالتله

رنـــه :: طــروادة هذا ســليم كضني من زروري وشالني.

تحجي بلسان ثگيل وطرواده يمسح بوجها  من حجت عاين لوجهه عبود همست

ريمه :: لا والله اصلاً بريا شالها مو سليم

دار عينه علي طــروادة عاينلي ورجع يعاين لرنه گالها

-ميخالف، رنـــه شتحسين  هسه ماصرتي احسن.

-اي بس خل انام واكعد زينه.

حط أيده على شعرها يضمه بالحجاب وعبود يگلها

عبود:: نامي يابعد روحـــي نامي.

زفرت نفس بحسره  تريد تغمض ولمحتنه يم الباب بسّ نبجي دارت وجها تحجي وي طــروادة

رنـــه :: ريـــمه وماسه هذن.

هز راسه اي وخر هوه وعبود اجينه يمها كوه تبتسم جفنها مورم وذبلان فص عينها الابيض صاير احمر مــاسه من تبجي ماتگدر تحجي وانه الغصه خانگتني كوه احجي

-شلونج رنـــه.

-زينه

مــاسه :: رنـــه عمــري شلونج.

-الحمدلله، راح انامن شويه واكعد احجي وياجن.

وتحركت تعدل بروحها اجه طــروادة كض أيدها

-لا تحركين هاي ايدج تفلت الكانونه.

غمضت عينها ساكته، طلعونه من يمها ضلت بس ام صــيهد يمها، وبعد طلعونه من المستشفى گالوا الليله تبات بالعنايه بس حتى يطمنون عليها اكثر للوحده گالوا يله نروّح للقريه بريا وميثم گالوا نضل يم طــروادة وسجاد مارضى يعوف عبود.

مشيت وي سلطان وسليم، وصيهد اخذ مــاسه كلمن بسيارته ردينه للقريه.

مــاسه :: گبل لا نرجع اخذني صــيهد فتحت ايدي  حسيت بيها عواج وسكتت بالي مو يمها يم رنه بس صعدت بالسياره وياه عاينلي امسح بخشمي گال

صــيهد:: لا تخنخنين كافي.

درت وجهي للجامه ودموعي بعدهن ينزلن يسوق ويتلفت عليَّ

صــيهد:: وولج انا مو اكلج كافي لا تبجين.

درت وجهي عليه اشهك

-شسووي يعني شسوي غير هنه يطيحن.

-كضيهن لا الدج على حلكج، باع عيونها شصار بيهن هسّه اكتلها كااااافي.

مسحت عيوني ودموعي بعدهن ينزلن كبل لا نوصل للقريه رجع گال

-مــاسه كافيي

مسحت عيوني زين احاول اسكت، فر السيارة يم حوشنه اول مانزلت اسمع صوت زهره تبجي مشيت وصيهد وراي فتحت باب الحوش، لكيت جوري شايلتها وتفتر بالحوش وبدور كاعده على صفحة، ورغد بباب المطبخ كاعده وحسين بصفها دموعه ينزلن سكته.

مشيت يم جــويريه احاجيها

-زهره عاينلي ليش تبجين هاه.

وهيه مختنگه تناشغ وتبجي بصوت العيون مورمه. وكف صــيهد يحجي

-شبيها، واحد محاجيها؟

جــويريه:: لا، بس تبجي وجدي بقى يصيح لان داخ طلعنه هناه.

رغد :: شلونها رنـــه؟

صــيهد :: احسن وحجت وياهم يجوز للصبح يطلعونها.

-يا الله، الحمدلله.

جــويريه :: امشي بالحوش شايله زهره وهيه بس تبجي اديه تگطعن وكلبي ممرود عليها اجه صــيهد يمي ومد ايده الها

صــيهد :: تعاي زهره، شبيج ياهو وياج.

شالها من عندي وبلا مايدري جر شالي وياها وترجيتي مجلبه بالشال صيحت موجوعه ومچلبه بأيده

-اااخ اذني.

وخر ايده شايل زهره ويحاجيني.

-شبيج؟

خليت ايدي على أذانيّ وهزيت راسي

-مابيه شي.

لازم زهره بأيد وحده ويعاينلي دار عينه مسح عيون زهره يحجي وياها

-ليش تبجين؟

جر ايدها من عيونها لان تفرك بيهن صارن حمر اخذها وطلع وحسين يكسر الگلب بس دموعه ينزلن يگل الماسه

حسين:: گولي ولعباس رنـــه ما ماتت.

مــاسه :: يااا ولعباس مابيها شي حجت ويانه وسألت عليك وباجر الصبح تجي.

حسين:: جا ليش عبود وطرواده ما اجوا.

رغد:: مايصير غير يضلون يمها حتى باجر يجيبونها.

جــويريه :: حسوني گوم نام حتى بس تكعد تلكه رنـــه جايه.

مسح عيونه يهز راسه لا

حسين:: خل زهره تسكت وتنام النوب انامن انا.

جــويريه ::باوعت لوجهه مــاسه ساكته صــيهد ما ندري وين اخذ زهره وراح، دخلنه للبيت رغد خلت حسين على رجليها وتمسح على شعره، دموعه ينزلن سكته، واحنا ملتمين يمها بالغرفه، مــاسه وبدور نامت وحسين بعده مقاوم وكل شويه يسأل

-وين اخذ زهره خل يجيبها يمي.

رغد:: نام مالك غرض بيها هسه تسكت عد صــيهد.

حسين:: لا خل تجي يمي وانامن.

دارت رغد الي بحيره گالت

رغد :: شوفي صــيهد وين جيبي زهره اذا سكتت.

لبست شالي وطلعت عبالي بباب الحوش بس شفت باب المشتمل مفتوح ورحت  عليه دخلت ادعي الكاه نايم واخذ زهره بدون ما يحس افتريت بالمشتمل أتلفت هدوء وباب الغرفه مسدود زفرت نفس اهدي بروحي وفتحت الباب على كيف مديت راسي مرتبكه شفت زهره نايمه على الچربايه ومن گد ما بجت حتى وهيه نايمه تناشغ.

دخلت للغرفة اتلفت وبسرعة رحت الزهره شلتها بين اديه اريد اطلع قبل لا يرجع بعدني ما ماشيه خطوه وفتح باب الغرفه وكفت بمكاني گـــلبي يدك حيل  هستوه طالع من الحمام عگد حاجبه بس شافني سد الباب عينه علي ومد ايده للباب بدون ما يلتفت دار المفتاح بلعت ريك وي صوت القفل  تقدم خطوتين دنكت حاضنه زهره حيل وكف كدامي بين الچربايه والكنتور.

صــيهد:: ياهو گالج تاخذينها؟

شلت راسي مرتبكه

-مو شمسه مو.

-مو شسمه؟

-اي

-اي شني ؟ مو شني؟

-حسين، حسين رادها.

تقدم علي  واني رجعت ليوره اكثر طخ ظهري بالحايط احس زهره راح تطيح من أيدي وكف كدامي

-اذنج تعورت؟

هزيت راسي لا هواي اباوعله وارجع ادنك گـــلبي يدك بقوة

صــيهد :: خل اشوفن.

فتحت عيني اباوعله ارجف وعرفت روحـــي گد ما گـــلبي  دك حيل بعد راح احجي غلط چلبت بس بكلمة

-لااا.

-اشش خل اشوفن.

ومد ايده يريد يفتح شالي  وخرت من گدامه ليم الكنتور حط ايده وسد الطريق

-لللج ارگدي.

-ما مجروحه.

-اريدن انا اعاين واتأكد ما متعوره.

ورجع مد ايده جر شالي واني كل حيلي مچلبه بزهره خفت تطيح من عندي وكلبي يدك حيل اعوج براسي حتى الزم الشال بين راسي وجتفي ومايگدر يفتحه گال

صــيهد:: هسه اجيبج براشدي اخلي راسج اعوج دوم.

حجه وكض راسي باثنين اديه عدله خازرني

-ارگدي.

دنكت عيني اتنفس بقوة  تقرب اكثر  حضنت زهره على گـــلبي  فتح شالي وخره من راسي نزله على اجتافي  گـــلبي  دك حيل من لزم اذني بين أصابعه اني اذني حاره احسها تطلع نار وهوه اصابعه ثلج  يمسح فوگ الترجيه  وهمس بهدوء

-متعوره رأح أنزعج الترجيه.

حجاها ومد اديه اثنينهن يفتح بالترجيه من اذني طلعها واني بودي اسكت گـــلبي لان صوت دكاته عاليه واحسه يسمعهن واحس نار تطلع من وجهي، رجع يمسح أذني مكان الترجيه بين اصابعه باوع لوجهي حجه بهدوء

-صايره حمره.

دنكت عيني وشهكت   متحركه من مكاني من نزل ايده من اذني لرگبتي  بظهر ايده تحسس رگبتي على طولها باوعتله فاتحه عيني حيل مرتبكه  وخر ايده ومدّها الايدي يلزم زهره وياي  وجهه بوجهي دنك عينه يباوع الرگبتي وصدري وابتسم حسيت روحـــي عريانه گدامه جاي يشوفني بدون ملابسي گد ما نظرته تحرج شال زهره من ايدي رجعها المكانها واني بسرعة رجعت لفيت الشال دار عينه الي ترجيتي بعدها بأيده غطا زهره وباوعلي

رفع حاجبه من شافني لافه الشال دنكت واسمع خطواته وكف گدامي

صــيهد:: نامي يم زهره.

هزيت راسي لا واني مدنكه واعصر ايد بأيد مرتبكه

-اشيلج وانومج گوه عليج.

باوعتله مرتبكه رجعت ليوره كعدت على حيلي بالگاع ولميت وجليه الصدري يعني حتى امنعه يشيلني

-ضلي هناه راح احاجي حسين واجي.

دار وجهه طلع واني بسرعة كمت شلت زهره وطلعت ميته من الخوف مشيت للبيت مدري شنو بعقلي اسمع صوته بالغرفة يم رغد ردخلت عادي فتح عينه حيل خازرني درت وجهي منه ما اباوعله ومشيت خليت زهره بالفراش يم حسين شبگها يبجي ورغد تحجي وياه بعد ابد ما التفتت ليوره وباوعت الصيهد لحد ما گال

-تعااي احاجيج.

باوعتله هزيت راسي لا  ارجف وكل مايخزرني اخاف رغد تحجي بصوت ناصي

-روحـــي جوري روحـــي.

وهوه واكف بالباب بعصبيه متخبل گال بهدوء

-متأكده ما تجين؟

زفرت نفس خايفه هزيت راسي اي هز راسه خوش واشر على عينه

صــيهد:: هاي هيه سهله بعيني اعلمنج.

ودار وجهه طلع، رغد حجت عليَّ واني بسرعة تمددت يم مــاسه مايعات رجليَّه غمضت عيني مقشعر بدني بس أريد انسى لمسته الاذني ورگبتي ماكو، بالكوه غفيت.

والصبح كعدنا وحده تباوع بوجهه الثانيه محد گالت للثانيه عيدج مبارك النوب بــدور گالت

بــدور:: احنا اخوات مابينه أعياد.

رغد:: امشن يله امشن عايدن جدتجن وجدجن حتى مايكرهونجن منا الرمضان اليجي.

مــاسه ::حكيت شعري اعاين لحسين وزهره بعدهم نايمين عفت البنات وكمت غسلت ومشيت الغرفة وهـــب من راحت ندى لهسه مايطلع من الغرفه امي تتوسل بيه يله ياكل شويه، فتحت الباب وطبيت مبتسمه

-صباح الخير، عيدك مبارك

شال راسه من المخده كعد عدل  صوته رايح

-صباح النور،عيد المبارك عليج، ها شلون صارت بت عمي شامل.

-ان شاءالله اليوم يطلعونها

هز راسه خوش مدنك الچربايه متروسه هدوم ندى تحسرت محتاره

-وهـــب تگوم تتريك ويانه.

-لا حبيبتي ما اريد.

حجاها وندفع الباب طب صــيهد بعصبيه گال

صــيهد :: گووم.

وخر الغطا من رجليَّه ونزل من الچربايه ساكت گاله

صــيهد :: أخذلك هدوم وأمشي اسبح خل نروح للمستشفى يم طــروادة.

وهـــب :: صــيهد عوفني.

صــيهد :: يشهد الحسين اشبعك كتل تحررك.

مشه وهـــب للكنتور ساكت اخذله هدوم وراح يسبح دار عينه عليّ  مخنزر كوه حجيت

-عيدك مبارك.

هز راسه خوش وگال

-عيد المبارك عليج ان شاءالله اشوفج باعلى المراتب.

ابتسمت

-ان شاءالله اشوفك عريس.

سكت طلع من الغرفه مشيت للمطبخ نخبصنه بالريوگ لان اول يوم يردون كلشي، صــيهد اخذ وهـــب وراحوا للمستشفى وحسين وزهره كعدوا يسألون على رنـــه كنالهم هسه راح يجيبونها.

رنـــه :: اول مره احس بالموت،حسيت الانسان شكد ضعيف مهما كان قوي وصحته مابيها شي بثانية يخسر كلشي، دموعي نزلت وانه اشوف طــروادة يفتر يسأل ميت من القهر  ويگلها

طــروادة :: يروح السكر يروح مايضل عدها دوم؟

-اي ان شاءالله يروح ليش هيج قلق انتَ بس ينراد تراقبه هاي الفترة وتنتبهه زين  اريد التزام حتى شويه شويه يرجع طبيعي.

وهوه يهز راسه اي ميت من القهر  كعدتني ام صــيهد تلبسني بعبايتي وعبود راح اشترى جواريب وكعد بالگاع يلبسني 

طــروادة :: تگدرين تمشين لو اشيلج.

-اگدر.

اجه يمي ساندني نزلت من السديه كاضه بأيده هوه من جهه وعبود من جهه طلعنه من المستشفى ولد اعمامي كلهم واكفين بالباب شكد جنت اكرهم وشكد تغيرت نظرتي عنّهم بهالحظه اعاينلهم واحد واحد الحد ماصارت عيني على بريا ابتسم يحرك شفايفه بلا صوت مشاني طــروادة للسيارة وي سلطان وام صــيهد صعدت يمي ولامتني الصدرها.  هستونه وصلنه  وأعاين عــفراء بالباب تصرخ وماسه تكض بيها   وحسين وزهره يمها يبجون نزلت من السيارة واجتني تركض وتبجي شبگتني ماتحس بروحها.

اجاها طــروادة يحاجيها وام صــيهد  تهدي بيها

-مابيه شي عفره.

وهيه تعاين لوجهي تبجي وايدها ترجف، طبينه للبيت مــاسه وام صــيهد ويانه.

عــفراء:: ما ادري انه محد گالي اخابر طــروادة اريدن اعايدهم مايردون عليَّ جابني حماي نزلتي وراح طبيت للبيت مالكيت احد گـــلبي  وگف 

ام صــيهد :: اسم الله يمه اسم الله عدت على خير الحمدلله.

يحجن وعبود فرشلي فراش تمددت تعبانه وهيه يمي الدموع تصب 

عــفراء:: جا ليش ماخابرتوني رنـــه جا تردوني اموووتن.

كضيت ايدها

-اسم الله عليج مابيه شي والله كافي لا تبجين.

اجت زهره ضمت روحها بحضني تبجي وتشبگ بيه بستها احاجيها

-زهوره كافي يله گومي روحـــي اسبحي والبسي هدوم العيد.

وهيه تهز راسها لا وماترضى توخر من حضني وحسين من الباب يعاينلي ودموعه على خده حاس بالذنب أشرتله بأيدي تعال واجاني مخنوگ  بس ضم وجهه بحضني بجه بصوت وام صــيهد تحجي عليهم وعلى عفراء لان يبجون.

كوه وخروا من عدي وطبن ريـــمه وهاجر  ام صــيهد تحجي على عفراء وريمه بس شافتني انفجرت تبجي وتبوس بيه وانه اضــحك.

-همزين تطمنت من اموتن تبجن عليَّ.

مــاسه :: نجبي والله اخلي عــفراء تعضج.

ريـــمه :: چلبه بعد لا تسوين هيج.

-اي مو اني سويت هيج حتى اتونس شويه ضايجه كلت اروحن اشوفن الموت وارجع.

حجيت وشلت ايدي أمسح دموعها اسمع صوت الولد بالحوش يسولفون ويضحكون ام صــيهد راحت يمهم ورجّعت گالت

-ســليم وبريا ذبحوا خروف  مال سلامتج وهذا ســليم ذابحه وعينه وراه يريد يتريك بالمعلاك، وطرواده مايخليه

رنـــه :: يممه خاف جذابين ذبحوا صخلتي.

ضحكن كلهن وضلن يمي   عفراء سوتلي ريوك  وطرواده صاح عليها طلعت يمه علمها على جهاز السكر گالتله

-اخافن ما اگدر.

ريـــمه من الباب حاجته

ريـــمه :: جيبيه عــفراء انه اعرفله وما اخافن.

جابته عــفراء واجت اخذته منها ريـــمه تنمرد روحـــي من چكت الابره مالته احسها بگلبي وعفراء اخذت الجهاز وطلعت الطرواده تراويه اله  وماسه وريمه كعدن يمي يوكلني اضــحك عليهن

-ترى اگدر اكل مابيه شي.

مــاسه:: ميخالف هسه احنا نداريج باجر انتِ تدارينه.

اكلت اضــحك وياهن، شويه ريـــمه گامت وي عفراء تطبخ يسوون غدا للولد مــاسه طبت وياهن للمطبخ هنه سون بس التمن وهمه بالحوش كصصوا لحم وطبخوه، زهره سبحت واجت يمي كعدت امشطها، وحسين هم سبح واجاني مشطت شعره ورشيتله عطر گال بخوف

-خاف طــروادة يكتلني لان تمرضتي من وراي من شلت التفكه.

-لا كتله ابد لا تحاجي حسين بس بعد لا تعيدها خوش اي سلاح ماتوصل يمه.

-اي والله التوبه.

بسته وكف مكيف اخذ زهره وطلع يمهم كمت احس جسمي متكسر امشي كوه گالت عفراء

-هاه رنـــه ليش گمتي.

-ضجت خل اكعد يمجن.

مشيت كعدت على چيس التمن بالمطبخ يم الشباج واعايلنهم الولد بالحوش يتعاركون ويتعاندون ما ادري على شنو درت عيوني بينهم لا ســليم ولا بريا موجودين، عبود كاعد على جهه وسجاد بصفه ومخلي ايده على جتفه يعاينون بالتليفون وميثم واكف على جدر اللحم وسلطان بصفة وصيهد وطرواه يحششون ، وهب كاعد على صفحة يدخن صافن عبالك بغير عالم حتى ما يسمعهم . اعاين مبتسمه صاح صــيهد

صــيهد:: ســليم وبريا وين راحوا؟

مــيثم :: ســليم ما مشتري هدوم  من گناله باجر نلتم مسوين كعده وي الولد تسودن راح يجيبله هدوم

صــيهد:: هسه يجيب قميص اصفر الا اشگگه.

طــروادة :: عمي بالحسين انتَ تغار من عده چيه هوه ابيض وشيلبس يرهمله.

ضحكوا الولد وصيهد يگلهم

صــيهد :: خل نشوف اذا جايب اصفر اشگگه.

سلطان:: واذا اخضر انا الاشگگه.

مــيثم :: عمي اذا وردي انا اتبرع واشگگه.

يضحكون وباب الحوش مفتوح طبگت السياره ونزلوا ســليم وبريا سليم يريد يروح البيتهم وهمه يصيحون عليه

-تعال تعال لا تشرد

طبوا هوه وبريا للحوش يضحكون بأيده علاكه صــيهد گاله

-جبت قميص اصفر.

ســليم:: لا عمي لون ما جايبه گبل، وجبت دشداشه تذبح الطير.

سلطان:: همزين انا وياك نفس القياس.

صــيهد وميثم مشوا عليه يجرون بالعلاكه يردون يشوفون لون القميص وهوه يجر ويصيح

ســليم :: لا تشوفونه گبل اكرهه بس تشوفونه تلعبون روحـــي منه.

وهمه يجرون ويصيحون

-بس نشوف ما نعيب ابد.

ســليم :: هدوها والله انا اراويكم.

عافوا العلاكه حطاها بالگاع طلع منها دشداشه مدحوها وهمه مامهتمين جذابين يردون يشوفون لون القميص گالهم

ســليم :: ابو المحل گالي يموت عليك اخذه وبريا هم گالي حلو عليك وجبته  سدوا حلوگكم ولا تعيبون.

مــيثم :: هههههه يله يابه خل نشوف.

طلع القميص من العلاكه لونه بنفسجي وهمه انفجروا من الضحك اجن البنات يعاينن وياي عليهم ميتين من الضحك وهوه يگلهم

ســليم :: شبيكم بنفسجي حلو.

صــيهد:: ولك البنفسجي على زليخة مو حلو.

لبسه فوگ قميصه

ســليم:: بشرفكم مو حلو؟

طــروادة :: چنك معلمتنا گبل ست حنان كله قميص بنفسجي وتنوره سوده.

ســليم:: هوه انا هم جايب وياه بنطرون اسود.

ميتين عليه من الضحك ولا خلوه يلبسه جروه من ايده يحركون بيه بجكايرهم وهوه يصيح

-احركوه الا البس الوردي.

صــيهد :: لااا.

ســليم:: وعلي اذا مالبسته وافتح الدكم الا اشهركم واطشر عرضكم.

وكضوه خنگوه يضحكون، القميص البنفسجي ضلوا يكضون بيه الجدر سووه وصلتين، ضليت يمهن شويه ورجعت لفراشي نمت.

ريـــمه :: ادري بأمي وابوي راح يحجون عليَّ لان طولت ببيت عمي شامل بس غلست دام اخواني كلهم هنا، ضليت يم عفراء أساعدها لان كوه تتحرك من بطنها، ام صــيهد اخذت مــاسه  وراحت گالت شويه وأردن يمجن ضلينه بس انه وعفراء سألتني على الاء.

-زينه، مالنه شغل بيها بس كون تصير زينه وي سلطان، والله هوه يفكر بيها مايريد يظلمها بس ما ادري شمالها تخرب بيتها يأيدها.

عــفراء:: ميخالف الله كريم.

سكتت ببالي هواي اسئلة مدام احنا وحدنه

-عفره اسألج شي؟

دارت علي مبتسمه

-اي گولي؟

دنكت بحيره

-انه ما اتذكر ليش جدي طرد عمي شامل هواي شغلات ناسيتهن ما أتذكرهن.

وكفت كدامي كضت ايدي مبتسمه

-انتِ ما تذكرين شي ريـــمه.

عكدت حاجبي بحيره دارت للجدر وتحجي وياي

عــفراء:: جدي شعلان ورث سالفة الخنجر من ابوه وابوه وارثها من جده وهيج من واحد الواحد، جدي شعلان اطه ولده كل واحد خنجر وگالهم اليضيع خنجره لا يلفي يمي اموته، صارت هواي مشاكل بين ابوي وجديّ وعمامي دائماً ابوي ضدهم ويمشي عكسهم، فترة من الفترات تحسنت علاقة جدي وابوي وره ماصرنه انه وطرواده عد اهلي، وجدي  جان عده بيت ومحلات راد يسجلهن بأسم ابوي والنوب يرد ياخذهن ما اتذكر علمود شني راد يسوي هيج المهم فجأة گراب خنجر ابوي اختفى شلون ووين محد يدري.

عمامي اختلفوا على ابوي حتى عمي خليل وياهم وكفّ ضده وضلوا يگولون الجدي، شامل يگول انا ما اعترف بالخنجر هوه تقصد يضيعه ابوي گال الجدي

صدك انا ما اعترف بالخنجر هاي وهاويسك ماتمشي علي تمشي على باقي ولدك، جدي طك ابوي وطرده گاله ضيعت گراب الخنجر اطردك من عدي

بس لو ضاع الخنجر كله أطردك حتى من العشيره.

من يومها احنا وحد وانتم وحد.

ريـــمه :: سكتت بحيره دارت وجها عليَّ سألتها گـــلبي  يدك بخوف

-منو تتوقعين اخذ الخنجر؟

عاينتلي متحسره

-والله يا ريـــمه  ما ادري.

-تدرين انه حتى فاتحة امج ما اتذكرها ولا جنها صارلها سبع سنوات، بس اتذكرها من تمرضت چنت صغيره  وأجي يمها

ارتبكت راساً دارت وجها گالت

-اي حتى انه من الصدمة، الله يرحمها تعذبت هواي.

-هيه شلون تمرضت .

ضلت دايره وجها ما تعاينلي شويه ودارت علي عيونها متروسه دموع همست مخنوگه

عــفراء:: انتِ.

عكدت حاجبي مافاهمه  ضحكت تمسح بدموعها وكضت ايدي

عــفراء:: اتشاقى شبيج، هيج اذكر عمر رنـــه اهدعش لو اكثر وبدت امي تتمرض مدري شلون صمدت وخلفت حسين وزهره وهيه مريضه.

ريـــمه :: عفره تدرين شكد جنت احبها جانت احن من امي علي تسبحني وتبدلي حيل انقهر حيل من ما اتذكر شي من فاتحتها ما اتذكر اذا انه بچيت عليها لو لا أحس هالجزء ماكو بذاكرتي.

بجيت مختنگه  جرتني الحضنها شبگتني حيل ضميت وجهي ابجي وهيه تگلي

-بچيتي عليها بچيتي هواي وچنت انه اطردج من بيتنا والكاج بباب الحوش تبجين.

وخرت من حضنها امسح بدموعي ميته من القهر لان ما اتذكر رغم جنت چبيرة وفاهمه قبل سبع سنوات

-ليش تطرديني؟

-هيج جنت مقهوره على امي وتأخذني العصبيه ماجنت اگدر اتحكم بنفسي مثل هسه.

حجتها ومسحت عيوني تبتسم كالت

- الحمدلله امي تحبج هواي الحد اخر لحظة هيه توصيني عليج الحد اخر لحظة تگلي ديربالج على ريـــمه مثل ما تديرين بالج على رنـــه.

كرصتني من خشمي تسأل

-وفاتحة ابوي تذكرينها؟

-اي، ما انساها جان اصعب يوم علي من اجه ابوي يلطم ويصيح اخوي مات شامل مات.

هزت راسها اي بحسره

عفره:: جان ما رايد يروح للصيد ما ادري شلون غير رايه وراح.

ريـــمه :: اتذكر ابوي گال رحنه بعنه السمج وردينه لگيناه منتول بجهاز الصيد، لو ضال واحد يمه لو ما رايحين.

-الحمدلله على كل حال، الله يرحمهم

ريـــمه :: تحجي وصاحوا عليها لبست عبايتها وطلعت للهول طــروادة گالها

-الولد يردون يسلمون عليج.

عــفراء:: استحي من صــيهد فشلانه منّه بسالفه.

وما اطاها مجال فتح باب الهول وهيه بظهره،  الولد يحاجونها مدنگين عايدوها وصيهد عبالك كاض عليها شي  رجعت يمي كملنه وصبينه كعدوا بالدوانيه بس كملنه صب رديت لبيتنا سمعت حجي امي وسكتت مغلسه تعودت.

رنـــه :: نايمه وحسيت نغزه بإصبعي نزيت موجوعه

-ااخ.

طــروادة:: سوده بوجهي.

عــفراء:: اسم الله لا تحجي هيج.

رنـــه :: فتحت عيني موجوعه قاس السكر عاصر اصبعي بين أصابعه عاين لوجهي

-اكعدي تغدي رنـــه.

حجاها وجراني من ايدي يكعدني  تثاوبت بعدني نعسانه كمت غسلت ورجعت وهوه كاعد كدامي يوكلني.

وره العشا اجن البنات كلهن وي ام صــيهد بس رغد ما اجت

ام صــيهد:: ماتگدر تطلع رغده وصتني اسلم عليج.

ضلن يمي للعشرة بالليل يله راحن جنت احس بجسمي تعبان وكلبي دكاته مو منتظمه بس انام، من فتحت كنتوري مالكيت ولا شي منّ حلوياتي حتى المصقول ابو الالوان ماخذينه  فات العيد شويه تحسنت  بس السكر بعده يخربط يرتفع هوايه وطرواده متسودن

-تاكلين حلويات؟

-لا والله هوه انتم ماكلينهن كلهن شمخليلي.

عــفراء:: باجر تشربين الچاي مر.

-خو كليلي لا تشربينه احسن.

ضلوا يحجون عليَّ وانه لو اموت ما اگدر اشرب الچاي مر أريده عسل، گمت اختنك اريد بس اطلع عفره يمي خمسة ايام ماعايفتني، اخوالي الجنت متانيه اشوفنهم بالعيد مابينوا.

طلعت بالحديقة يم صخلتي والارانب عاينت للديج والدجاجات  وكعدت يم السياج سانده ظهري عليه والارانب بحضني ألعب وياهن  مختنگه اريد ابجي شويه وحسيت احد بالجهه الثانيه كعد وراي ظهره على ظهري بينا بس السياج  أركز مستغربه

-رنـــه.

-هم انتَ.

بريا:: ليش اكو واحد غيري يحجي وياج؟

-بريا عوفني بحالي.

-ما اعوفنج والله.

وخرت ظهري من الحايط انه اجيت هناه وحدي حتى ابجي براحتي طلعلي هذا مدري منين گال

-شبيج؟

-انتَ شبيك؟ هاه شبيك معاديني هسه انه سكتت وعايفتكم تغلطون وشتسوون تسوون ما احجي شييكم وياي ليش ماتعوفوني.

احجي بحرگه ولكيتها فرصه ابجي

بريا:: عليمن تبجين؟ انا بس ردت اكلج الحمدلله على سلامتج وهاي هيه ليش تبجين،  مو احاجيج ليش تبجين.

صيح مسحت دموعي اشهك

-ما ابجي انه.

سكت فتره وگال

-خير ان شاءالله .

حجاها وراح  ضليت بمچاني ابجي بس ما ادري عليمن  مسحت وجهي وطبيت للبيت سمعت طــروادة يحجي وي عفراء هيه تگله

-التفكه بعد لا تطببها للبيت

-لا اقفلها بالكنتور، انا جنت شايل المخزن منها هيه ما منتبهه وخافت.

-ميته من القهر عليها لا يچلب عدها السكر دوم.

داروا ولكوني اسمعهم بساع غيروا السالفة، بالليل اجوا سلطان وصيهد وميثم يم طــروادة  لكيت عفراء واكفه يم باب الدوانيه وتسمعلهم وكفت يمها مــيثم يگلهم

مــيثم :: تعبـــت ما ادري شسويله وهذا شعلان يفتر عليه.

طــروادة :: شعلان نعلان يفتر عليه كل هذا انا مالي شغل بيه اذا شفت من بريا شي مــيثم اعذرني حتى انتَ ماتوكف بوجهي.

مــيثم ::يابه هسه هوه معبر شعلان مهتم؟ شبيك انتَ؟

صــيهد:: هسه شني المطلوب شسوي اكتله الك؟

مــيثم :: جا انا شني ما اعرف اكتل، بس اريدنك تسحله يداوم وياكم  شويه يلتهي يرجع طبيعي.

صــيهد:: سهله هسه اطيحلك حظه وغصباً عليه يداوم ويانه.

رنـــه ::رحت للغرفه وعفراء اجت وراي كعدنه نسولف الحد ما طــروادة راح للگيعان واحنا نمنا.

جــويريه ::كضيتها شارده  لو مدري شيصير ما اروحن عليه واذا طب للبيت اروحن يم جده اعصر برجليها لو اطيها ماي حتى مايسحلني  وهوه كل ما يوشفني يشيل اصبعه  مدري شيحسبلي لمن صارن عشره سولفت الماسه گالت

مــاسه :: يعني عشر راشديات.

-احلفي!!!

-لا ما احلف بله طلعن دفرات مو راشديات.

خلتني اطكطك بأصابعي خايفه، بالليل التمينه يم رغد بالغرفة نسولف حجينا بالصور گالت

-حرامات تلفوني راح احترك وي البيت بيه صور تخبل.

درت عليها احجي

-ذاك اليوم شفته بغرفة صــيهد على الميز.

بهتت ملامحها تباوعلي بخوف گالت

رغد :: لا مشتبهه.

-لا والله متأكدة اعرفه تلفونج لكيته مخليه على  الشحن وحتى مكسور.

رغد :: مــاسه جيبيه

مــاسه :: بيه شي هوه؟

مسحت عيونها هزت راسها اي

رغد:: اي وهوه صــيهد الاشتراه وهوه الخله الرمز.

جــويريه :: شبيه ؟

دنكت خايفه همست مختنگه

- صوره قافلتهن بخزنه بس خاف يگلي افتحيها.

مــاسه :: صور منو رغد.

دنكت بس تبجي ساكته گالتلها

-لا تخافين حتى لو بس نمسح الخزنه البيها الصور مو الا نجيبه، بعد شوي يروح للگعيان واروحن امسحهن.

مــاسه :: اعاينلها مقهوره، كمت طلعت من يمها ابوي هستوه جاي من بغداد جان ماخذ مرته للزيارة يفتر بيها من كربلا البغداد متونس مدري متقصد حتى يحرك گلب امي وهيه مغلسه ما تحجي.

وجدي صار يگعد ببيت غانم اكثر من مايكعد يمنه  اهز ايدي من اعاينلهم كلمن يجرله بصفحة، مشيت لغرفة وهـــب احاجيه يطلع گبل لا ابوي يحجي عليه متمدد بس فاتح عينه مشيت يمه  مديت ايدي الشعره غمض عينه

-وهـــب ماكافي حابس روحك؟

زفر نفّس بحيره

وهـــب :: ما اگدر بدونها اريد اموتن.

-اسم الله عليك خلّيها فترة يم اختها وروح وراها ترجع وياك والله اني متأكده ترجع.

ضحك مستهزئ ودار عينه الي

وهـــب :: سافرت من  لبنان راحت لغير دوله وما گدرت اعرف وين.

فتحت عيني مصدومه وهوه كعد على حيله صوته مبحوح كوه يحجي

وهـــب :: كتلها احجيلي  احجي يابه احجي سولفيلي چلبت اختي واختي  وديتها الاختها شو بس وصلت للبنان ماكو يومين مسافره آلغير دوله.

سكتت بحيره ما ادري بشنو اواسيه جر باكيت الجكاير والجداحه خلاهن بجيبه وطلع من الغرفه صاح عليه ابوي وهوه مارد طلع من البيت كله  طبيت للمطبخ يم امي واجت ورانه سعاد تحجي

سعاد:: شوكت تزوجين صــيهد، اشو وليد يگول ما ازوجنه هسه.

دارت عليها امي گالتلها

-ياهي مالتج؟

سعاد:: بكفي اريدن اسأل اريدن احجي اريدن اسولف بكيفي انتِ إلياهو مالتج.

وامي بأيدها المس ما احس الا طكتها على زندها  فتحت عيني على وسعها صدك جذب يمه مال عركات هيه هاي تمردنه انه وياج بدقيقة.

ذبيت روحـــي وي امي  كلت بعد انه وامي مخبوزات مابيها مجال بس امي لوتيه مدري منين كرصت سعاد خلتها تصرخ ونامت فوگها 

وهدن بــدور ورغد انه عبالي صدك يفرغن سعاد من امي لمن انتبهلهن يصيحن

-لااا يمه لااا.

وهنه شبعن سعاد كتل اجه ابوي وجده يغلطون  وخرت امي على صفحة گالتلهم

ايمان :: لا طاكتها ولا واصلتها، بس خل تكفني شرها.

وسعاد تعاين الامي بغضب وجها محتقن  منتفخه شلون العجين المختمر وابوي يغلط ويسب وامي دارت وجها تشتغل ساكته.  اخذ سعاد وراح البيت شاكر

رغد :: يمه شلون طيحتيها.

ايمان:: خايبه انه بت امي اكو مره تگدرلي.

مــاسه :: ضحكنه كلنه  وضلينه وياها بالمطبخ رحت بالليل للمشتمل لكيته قافله رجعت لكيت امي تخبز گالت

-الولد بالزرع كلهم خل اكمل اكل ولد عمج خليل وروحي انتِ وديهن وتعاي بعد امج انه مابيه حيل.

هزيت راسي خوش وصعدت اركض

-بــدور نروح نلعب بلي؟

بــدور :: لا ولالي خلك.

جــويريه :: مــاسه عود انتِ تخافين من صــيهد وترحين تلعبين بلي اذا ماتخافين شسوين.

وكفت ضايجة حسيت حجايتها صح وتقهر

-راح اروحن بس اودي الاكل مالهم واجي لان امي مابيها حيل.

سكتن  نزلت يم امي حجاية جــويريه تدك بگلبي  وافكر بيني وبين نفسي بعد ما اروحن  عودك اقنع  وهـــب يجيب بلي هناه والعب وياه.

حيل لمت روحـــي وتندمت على كل يوم اروحن بيه البيت عمي خليل، ل١٢ انه كوه فاتحه عيني  طفينه الجدوره امي شدت الخيز بعلاكه وتعلمني

- بعد امج، وشوفي البيت وصخ نظيف حتى اروحن باجر أنظفه.

هزيت راسي اي لبست عبايتها اخذتهن ومشيت  فتحت الباب وطبيت البلي ضالّ مشتغل  عاينتله ودرت وجهي، حطيت الاكل 

وافتريت بالبيت اعاين مو كلش وصخ شلت الصحن من الطبله اللي بالهول غسلتهن بالسنگ ومشيت يم البلي شلت اليده بأيدي ورجعت نزلتها طفيته ومشيت أريد اطلع بعدني  هستوني افتح  باب الهول وشهكت متسودنه من سمعت صوت صــيهد ولمحته وي مــيثم  طب للحوش رجعت اركض واعثر ميته من الخوف   ما ادري وين اروحن كعدت يم السنك ارجف خايفه منه حيل  واسمع صوته وميثم من گاله

مــيثم :: امشي غسل يله  اذا ماخسرتك شاربي ازينه.

صــيهد :: نشوف.

وانه ودي الگاع تنشگ وتبلعني  اضم بروحي ميته ارجف

-مــاسه.

يتبع...

أيلول💚