رواية اسألي عني الليالي الفصل السابع والعشرون 27 - بقلم رقية جاسم

بالكيف هوَ الگلب لمن يحب ..
      بالكيف ؟.....

بالكيف ريح السفن لمن تهب ..
      بالكيف ؟.....

الدنيا مرّه بشتا.. ومرّه بسموم وصيف ..

هو شيشوف الجفن .. غير الدَمع والطيف ..

يا هَي..يابو المستحى ..يالعينك ولاية ..

بيهه الفرح والحزن يتلاگن ..
       حچاية .....

يصير ضاع العِرف ..
      والجُرف مل مايه ..

وعينك ولا كل عين ..
      مشتني بين البين ..

لا نفع بيهه الهوى ..ولا نصح بيهه الحيف ..

هو شيشوف الجِفن غير الدمع والطيف ..

الـبـارت الـسـادس والـعـشـرون..............

شذى : ماما سما..رزان كومن للدوام..لا تضوجوني من الصباحيات..بعد عشر دقايق يجي الخط..هم تريدن تتأخرن..
سما والنوم بعيونهه : اي كمت..شبيج انطي مجال..
شذى : يله ماما انتي همين..وجنت مأشره على رزان..فتحت البردات وطب الضوه للغرفة..عاد هن كعدن ووحده راحت للحمام الجوه واللخ للحمام الفوك..

نزلت جوه..شغلت الراديو ..سويت الريوك..بين ما اجني صبيتلهن..اكلن هيج ع السريع واجاهن الخط..
محيي يطلع لشغله من وكت..ب٨ ونص تقريبا..كلت اطلع اغسل الطرمه بين ما تصير ب٨ حتى اكعده يطلع لشغله..خليت الشال ع راسي وطلعت اغسل بيهه..رشيت الحديقه الخارجية وادندن بيني وبين نفسي باغنية فيروز نسم علينا الهوى.. سمعتهه بالراديو وضلت ببالي من جنت اسوي ريوك للبنات.. مرت من كدامي مره جوارينه موظفه لشغلهه..

ام ديار : شلونج ام رزان..صباح الخير..
شذى : صباح النور عيني..الله يسلمج..انتي شلونج..
ام ديار : على الله..هاي شوفت عينج شغل وبيت وجهال وعلى هل رنة..الله كريم..
شذى : هي هاي الدنيا يختي..
ام ديار : عاش لسانج..يله ام سماوي عن اذنج اروح للدوام..هم يالله اوصل بثمانيه..
شذى : بالسلامه عيني..

كملت رش الحديقه ..طببت الصونده وسديت المي وسديت الباب وطبيت..باوعت ع الساعة..لكيتهه بثمانيه الا ربع..يله اروح اكعده..نزعت الشال..خليته ع الميز وطبيت للغرفة..فتحت الاضويه واكعد بي..يله عيوني كوم اكعد لشغلك..جاوبني بصوت ثگيل من النوم..
محيي : اي كايم..
شذى : راح يغسل..عدلت الجربايه والكوشات مالت القنفه الي بالغرفة..شلت الملابس جانن بالكاع..حسيت على محيي طب للغرفة وينشف بوجهه..

محيي : شذاوي عيني..اليوم اجيب دنوة للبيت تتعرف عليكم.. انه سبق وگتلهه متزوج وعندي بنات ثنين..بعد بس تجي..ما اريدج تقصرين بحقهه..كلهه كم ساعة وترجع لبيت خالتهه..
شذى : ضجت من السالفة هاي..جنت كل هاي السنوات خايفه يجي اليوم الي يجيب بي محيي بنته ويجيني..ماكو وحده تحب بت ضرتهه..بس الاختلاف اني ضرتي ميته اصلا..وموتتهه جانت سبب كره محيي الهه ولبتهه..كتله : شعدهه جايتني هاي بنت ال...بعدني ما مكمله كلامي..
محيي : لا تحجين على شهلاء..مره ماتت ولا تنسين عندي بنيه منهه..وهلبنيه حتجي تعيش هنا بين خواتهه..

شذى : ليش عيني تجيب سماوي ورزان الشاطرات بنات الدلال على هاي الجايه من المزارع والوصخ..
محيي بعصبيه : شو ما تعرفين تحجين انتي؟..هاي بنتي.. تعرفين شنو يعني؟..يعني انه ربيتهه..والعز الموجود يم بيت ابوي الشيخ انتي وبناتج تحلمن بي..فاهمه..لا تنسين روحج..
شذى : عود شتقصد يعني..تريد تعيرني؟..لا والله هسة تالي وكت تريد بنتك تخرب عشرتنه والحياة البنيناهه سوه..بعدين صدك..مو زين انه قابلة وساكته وانت بعدك ما معترف بيه كدام اهلك وناسك؟..
محيي : بس معيشج احسن عيشه..والبنات بأحسن مدرسه.. حتى خصوصي مخليلهن..وهن مكانهن مو علمي..المفروض معهد من الثالث وانتهى الموضوع..

شذى : ضجت منه من كام يذكرني بأفضاله..نزلت دموعي.. كمت ابجي..لا تجيبهه ..اذا تحبني..ذب الخاولي واجه كعد بصفي..باسني من راسي وايده على چتفي..يباوع عليه مثل الي يكول حاولي تفهميني..
محيي بعد ما جر نفس طويل بقلة حيلة : شوفي عيني..هاي بنتي..يعني قطعة مني واحبهه..صحيح قسيت عليهه ومديت ايدي عليهه عساهه بالكسر ولا مادهه..چي ما تستاهل..ما تستاهل تنمد ايدي عليهه..بنيه شاطره وذكيه وتشتغل وكلشي بيهه..اريد اعوضهه عن كل لحظه عفتهه وحدهه بوكت احتاجت بي أب يوكف بسدهه لو أم..اريد اصير امهه وابوهه.. انه ظلمت حامد..

شذى : باوعت عليه..شلون ظلمته؟..
محيي : تذكرين انمار ؟..الي گتلج جان السايق من طلعت من البيت وشهد ضدهه ..
شذى : اي شبي..

محيي : گبل فتره جنت بالمحل واجاني واحد سلم علي چنه يعرفني بس انه ما عرفته..شبهت بي..ضل يسولف وياي ويسألني على هذا وذاك..كتله انت منو؟..انه شايفك گبل بس ما اتذكر وين..گالي انه انمار السايق..كتله اي عرفتك مو اكول شايفك..گلي اريد ابري روحي من الذمه الي كسرت رگبتي ورگبة عيالي..طببته جوه وصحت العامل جابلنه عصاير.. كتله خيرك شكو..گالي انت تعرف انه السايق مالكم.. وعايش بكرم الشيخ الله يحفظه.. المرحومه بليله ظلمه خابرتني وصوتهه مليان بجي ودموع..كتلهه خيرج ام دنوة..كلتلي ابويه توفى.. تكدر تجي تاخذني هسه..والله مااتحمل ابقى للصبح.. كتلهه الى رحمة الله بس شعجب الاهل ما موجودين ..كلتلي طالعين لغير محافظه بس الحريم بالبيت..كتلهه بس مسافة الطريق واجي..

عاد هو جايبها لبغداد ومسوي حادث كل هالأمور تعرفينها.. هو بيوم النام بالمستشفى حچالي وكال هي رايدة تروح لابو رائد وعندي دليل وانه سمعته بإذني..

كال هسة انه يابو دنوة جايك وره ما تبهذلت وتكسرت احوالي..انه تعبان والف علّة بيه..حتى ابني وبنتي الصغار الاخيرين كل واحد منهم متعلعل بي من دكتور لدكتور.. هاي كله چي ظلمت المرحوم .. سمعت بي متوفي واجيت اريد ابري روحي الذمة ريت لساني مگصوص ولا حاجي چلمه وحده ضده..الله يرحمه والله جان كريم ونفسه طيبة وما يگصر بفلس احمر..بس النفس دنية.. وانه چنت عبالي رائد مخبر ع المنطقة وهو الخله اخوي الصغير ينعدم.. اعرف مشى وكت طويل.. بس اتمنى تسامحني..بس ارضا عني وعن اطفالي.. تبهذلت حيل..

شذى : عيونه كامت تلمع هو ويحجي..اكول ليش اجه ضايج قبل فتره..شكد حاولت وياه حتى يحجيلي بس ما قبل..اكله شبيك يكلي تعبان من الشغل... زين انت شسويت؟..
محيي : كتله وكتك غلط..هسة اجيت وره كل هاي السنين.. الرضا المفروض تاخذه من ابو رائد مو مني..انه ما الي دخل.. انه رحت ضحية كره بس..شهلاء ما ادري شنو تريد مني انه بالتحديد.. اشكال سويتلها وماغزرت بعينها
شذى : عيني هسه انت لا تضوج روحك هيج..مات وهي ماتت الله يرحمهه المهم عرفت الحقيقة وحامد ماله دخل..

محيي : بعديش؟..بعد ما ظلمت بتهه سنين وسنين.. خليتهه تكره اسم أب..بطلتهه من الدوام..زوجتهه بالغصب..
شذى : ما ادري شگلك..الكل يخطأ حبيبي.. هسه عرفت غلطتك واكيد حتصححهه..
محيي : الله كريم..هسة شني.. اريدج تخلين دنوة مثل بنتج.. تره اقل من نص اليوم حجيبهه هنا..انتبهي عليهه..تراهه حبابه وماعدهه اذيه..هسه تجي وتشوفيهه..

شذى جاوبته بزعل : هاي لخاطرك بس..
محيي بابتسامه : اي عفية..يله اكوم ابدل واروح للشغل..
شذى : لا اصبر ما تريد ريوك؟..
محيي : لا ما اشتهي..رجعي نامي انتي..
شذى : يله لعد ابقى كاعده بين ما تطلع وارجع انام..
ابتسم ولبس ملابسه..باسني بخدي وطلع..طلعت وراه.. صعد بسيارته وراح للشغل..سديت الباب وطبيت..

تمددت وبالي كله يم دنوة..شلون اجيبهه يمي...عفت كلشي ونمت.. راسي كام يوجعني بعد السمعته من محيي..صحيح اني ما شايفتهه..بس خطيه هيج مسوين وياهه..اكيد اكو سبب بس محيي ما يقبل يكول..

كعدت على صوت الباب تندك..اكيد اجن البنات..طلعت بسرعه فتحتهه..سما اول ما فتح الباب طبت دردم بينهه وبين نفسهه..
سما : هاي ايمان شكد حقيرة..كون تموت يارب..عود مسميه نفسهه مدرسه وهالله هالله..شدعوه شمسويه قابل..
رزان : دسكتي بس تلغين..
شذى : شكو شبيجن تتهامسن..
رزان : ماما ماكو شي..هاي سما رزلتهه المدرسة..

شذى : رحت على سما ولزمتهه من زندهه..باوعت عليهه بنظرات تساؤل..ولج صدك مرزلتج؟..شمسويه استر يربي..
سما بنبرة صوت بريئة : ما سويت شي والله..مخليتلي درجه اقل مما لازم اخذ ورحت عليهه..رزلتني وخجلت..فكلت استغفر الله..كلتلي شنو كدامج حتى تكولي استغفر الله..
شذى : ديله عبالي صار شي..هسة تعويضهه بعدين..اصلا امتحانات نص السنه جايه..شدي حيلج وجيبي درجه تكسر عينهه..
رزان : مووو كتلهه هيج..ما تقبل تسمعلي..راكبه راسهه..
شذى : ديله طبو جنكم دجاج هنا..

طبينه جوه..بديت احضر بالغده..اندكت الباب والاكل بيدي..
صحت سما تعاي فتحي الباب ماما..اجت فتحتهه..اجه محيي بيده علاليك فواكه وحلويات..اخذنهه البنات من ايده..اجه وكف يمي بالمطبخ وجان يحجي باستعجال..
محيي : حجيب دنوة بعد شوي..وهي بكيفهه تبقى لو ترجع.. مو تكليلهه رجعي لو ما اريدج..
شذى : شتقصد؟..هيج اني ماعندي أصول..يله هي هاي المرجيه منك..
محيي : دسكتي بله..
شذى : كمت ابجي بس حتى ما يجيبهه..كتله..هسة اني شنو ذنبي اذا انت غلطت بحقهه قبل؟..
محيي : لا تنسين هذا بيتي..واجيب بي اليعجبني..شحال لو بنتي؟..
شذى : هسة صارت بنتك موو..وين جنت قبل لعد..
محيي : دروحي من وجهي..ما اريد امد ايدي عليج..عيب علاقل خلي العشره بيناتنه..

شذى : عافني وراح..عفت الاكل والبنات اجن على صوتنه.. طبيت للغرفه وسديت الباب عليه..كعدت ابجي عبالك طفل.. لحد ما اندكت باب الغرفه..صحت منو..كالت اني رزان ماما.. كتلهه شتريدين هسة..
رزان : ماما هاي دنوة هنا..
شذى : فزيت من مكاني وفتحت الباب..مسحت دموعي ولفيت الشال على رگبتي..اول ما شفتهه انصدمت بيهه..ما توقعتهه هيج اببد..حسبتهه وصخه وشكلهه همجي..ملامحهه هادئة.. عيونهه ابرز شي بيهه والمبرزهه اكثر بشرتهه السمره..وعيونهه عسليات بيهن خضار..تشبه محيي نسخه نسخه..بس بشرتهه مو بيضة مثله..لعد شبيهن بناتي مدري على منو طلعن..

عاينت عليهه بطرف عيني..ردت احسسهه ما احب تواجدهه هنا..بس هي جانت اذكى مني وتغاضت عن كلشي..راح محيي واني بلشت اسوي بالغده..البنات اخذوهه فوك واني جوه..صبيت الغده وتغدينه..عجبتني بموقفهه من كالت ' انه ' اغسلهن للمواعين..وبناتي كل يوم اتعارك وياهن يالله يغسلنهن..حرامات هذا الجمال ماعنده شهاده جامعيه..عفتهه تغسل المواعين ورحت للغرفة..خابرت اختي وداد..

وداد : هاي منو مخابرني..يا هلا ومية هلا..شلونج عيني..
شذى : الحمد لله على الله خية..انتي شلونج..
وداد : بهلدنيا..شخبار البنات..ابو رزان؟..
شذى : زينين الله يسلمج..
وداد : خير؟..احس بيج شي..شو صوتج عبالك مخنوك..
شذى : بله عليج محيي جاب بنته واجاني اليوم؟..
وداد : اي غير بنته يا عيني..قابل يعوفهه بدون ما يعرفهه على خواتهه..بعدين انتي گلتي طلگهه رجلهه..يعني هاي فرصته..
شذى : هسه اني خابرتج تخففين عني لو تزيدين الطين بلّه ؟..انوب شكد حلوه لو تشوفيهه..بله هاي جانت متزوجة ادور عقيل موكلش حلو يعني..
وداد : هاي قضاء ربهه بعد..اكيد اكو حكمة..
شذى : تدرين..اليوم محيي حجالي ليش جان يكره ام دنوة..بس صدمني من كال ان اخوه ماچان عنده شي وياها خطية.. تالي مات مظلوم عباله عنده شي وياها..
وداد : عوذه..شنو من بشر هذا هيج يتبلى ع الوادم.. شوفي يجوز اكو شي بيناتهم قديم..ثار ..مشكلة..الله اعلم..
شذى : اي اني هم هيج كلت..يله اخذي راحتج خاف يمج احد..ودعتهه وسديته ..

بعدين رحت ع البنات اشوفهن شسون اليوم ع الدراسه والواجبات..سمعت صوت الباب تندك..نزلت افتحهه اجه محيي..عفته هو وبنته ورحت للغرفة..اخذهه وطلع..رتبت البيت بين ما اجه..طب للهول وصاحني..
محيي : خوما سويتيلهه شي لدنوة؟..ليش ضايجه..
شذى : شدعوه عيني شسوينه قابل..لا لا تخاف ما مسويلهه شي..بناتي حبوهه وهي هم حبتهن..
محيي : بناتج الله يستر منهن..هسة يطلعن مسمعاتهه شي ومغثوثه منهن..

شذى : شهگت باستهزاء..ست الكل هاي بعد..زين گلي بله ليش حامد يكرهكم؟..مو اخوكم..
محيي : ماضي قديم..بس اعتذرتله ووضحتله موقفي..انه ما الي دخل..كله ذنب ابوي..اجه مذعور بذيج الليله..بربج هي هاي سالفة تحجين بيهه؟..اريد انسى وتجين تذكريني..ما تكولين رجلي جان بالشغل بالصخام..يريد ماي.. زمهرير..
شذى : چنك على مي..هسة اجيبلك يله لا تضوج روحك..عفته ورحت صبيتله مي..بس حضل وراه وراه..لحد ما يگلي شنو سبب الكره....

دنوة : وره وكت..صارت الساعه بالوحده الا ربع..متت عطش..
اصبرو اجيب ماي واجي..نزلت اجيب..سمعت صوت طلقات جمدت بمكاني..ما حسيت الا تارة وحلا يمي...خالتي طلعت من غرفتهه بسرعه والشال على راسهه..طلعت بره ..ما اسمع غير صوت شهگتهه..وكلماتهه : هاي الطلقات من بيت رائد .. هنا بعد ما اعرف شحجي..

تارة وحلا ثنينهن يعاينن علي..انه رجليه بعد ما احس بيهن..كوه كمشت روحي..طلعت بره بدون شال..وكفت بالباب ومديت راسي اشوف شكو..جان راس الفرع كله مطوقي دوريات جيش والضباط يم البيت.. طلعت ام رائد وبسدهه بنيه لخ..يمكن اخلاص..اكو سياره مظللة نزلو منهه ٣..الرابع جان مشدود بلاستر على فخذه وكرشة رجله..

بدون وعي كلت هذا رائددد...
خالتي : شمدريج خالة..
دنوة : شهگت وكتلهه : لا بس احس..

چي السيارات يم بيتهم.. ضليت اعاين عليهم وگلبي يرجف.. يعني هاي الطلقات على سلامته؟..چا وين تصوب هو..طلعن تاره وحلا من جوه..اجن يمي..حلا ذبت الشال على راسي..
تارة بهمس : همزين مو هسة متصوب..
حلا : تره دا يعاين عليج..امشي طبي جوه..عود باجر نقنع امي ونروحلهم سوه..
دنوة : صدك انتبهت عليه داير وجهه ويعاين علي..گلبي صار نار..دموعي صبت بدون ما ادري..مسحت دموعي..امه حضنته وطبو جوه..اكو ضباط بقو بره..عاد احنه طبينه.. خالتي قفل البيبان وطبت..

خالتي : همزين مامتزوج هلرجال..جان مرته من الهبطات يصير بيهه سكر لو قلب..
حلا : يمه هسة وكت هلحجي..مو خطية الرجال متصوب وحالته حاله..شوف شلون تحجي..
خالتي : اي شنو قابل چذب..بعدجن ما تعرفن شيصير بالمره من رجلهه يغيب اكثر من اللازم عن البيت..لو يجي متمرض لو متصوب..ما تشوفين ليش ما اقبل انطي لواحد بالجيش..كلشي يصير لا سامح الله..قضاء وقدر..
تارة : يمه خلي نروح نتحمدله بالسلامه باجر..
خالتي : اي نروح..هسة دنامن..شكد تلغن..

دنوة : خالتي انتبهت علي ما احجي وساكتة..مو مثل ع العشه لو گبل فتره..بس ما حجت شي..بس عاينت علي بنظرات گصتني من فوك ليجوه..
صعدنه فوك..ذبيت روحي ع الجربايه وتغطيت.. دموعي بعيوني..عود ليش رائد من بين الدنيا كلهه يتصوب ويتأذى وينوخذ منه كلشي بخاطره..وانه ابسط مثال.. هو هذا هم حظي..شوي سمعت صوت تارة وحلا يمي..
حلا : ها نمتي؟..كومي دا احجي وياج شغلة..
دنوة : وخرت الغطى ودرت وجهي عليهن..
حلا : تره مابي شي..شفتي شلون واكف ويحجي وي الضباط..وامه حضنته وطبو جوه..بعد شكو..

دنوة : دموعي تجمعت بعيوني كلهه..اي ادري..بس مو بيدي.. مراح تفهميني..اجت حضنتني وسولفت وياي شوي..
حلا : احنه يمج..هسة يصير زين يمعوده..المهم باعيلي..باجر نروح..وشبعي منه شوف..
دنوة : ابتسمت..تمددو بالجرابي البسد مالتي ونمنه كلنه..

غرفة جبيره ظلمه..يطلع الضوه من جوه الباب بس..جسمي عرگان..عيوني تصب دموع..كل سانتيم بجسمي يوجعني.. عبالك واحد ضاربني لحد ما تعبان..ايدي على راسي ومدنجه عيونه للكع..انفتحت الباب وطب الضوه وياهه..وكف بالباب واحد ضخم..ملامحه ما مبينه بس سواد..صحت لا اراديا.. رائدد..فدوه تعال اخذني منا..انه حجيت جان تنرگع الباب حيل..وطب الولد يتمشى..بس صوت حذاءه اسمعه يدك بالكع..تقرب علي..كمشني من شعري وشالني فوك..رگع راسي بالحايط..كمت ابجي واشهك..صاح : ولا كلمه اسمع خوش؟..رائد اذا عرف بالي ديصير بعد حتى ما يعاين بخلقتج..ضلي هجي..مكانج هنا..ولو مدري شحجيتي مراح يصدگج..شتريدين تسوين..لطخي راسج بالحايط..
جاوبته بحرگه وصوتي مبحوح بالگوه تنسمع الكلمه : لا هو يحبني..وحيصدگني..ما مسويه شي خاطر ما يصدك..وانت منو اصلا..هو يحبني..اي يحبني..هو كال..يحبني..اي يحبني..ضليت اعيد هاي الكلمه..اي حبني..

لحدما فزيت من النوم على ايد تارة تگعدني وتدفع بجسمي على كيفهه..جسمي خدران ما اكدر اتحرك سانتيم واحد..انه كاعده بس عيوني مغمضتهه واسمع شديصير..اسمع تارة تگلي يمعوده كومي شدتحجين..دقايق وفتحت عيوني بس الدنيا مغوشه كلش..كمت اغمض وافتح بهدوء لحد ما كمت اشوف زين..عدلت كعدتي وعاينت لباب الغرفه..جريت نفس وزفرته بصعوبه..ما ادري ليش تخيلته موجود عند الباب.. شيسموه هذا؟..حلم لو كابوس..عود ليش جان يقصد رائد .. انه بالحلم مثل الجنت اعرف عن شنو ديحجي..يكلي لو يدري رائد انتي شمسويه يعوفج..بعدين كتله لا هو يحبني..يعني جنت ادري عن شنو ديحجي..شنو هلموضوع عود..

عاينت لتارة وحلا واكفات يم الجربايه وينتظروني احجي..
تارة : شبيج يمعوده..خوفتينه عليج..شوفي وجهج شلون عرگان وايدج يرجف..
دنوة : مديت ايدي جدام عيوني..صدك جانت ترجف حيل.. ووجهي عرگان فدنوب..فركت ايدي بوجهي..شويه هدأت..اجن كعدن يمي..
حلا : شكو..خايفه على رائد؟..لو شنو..
دنوة : لا..حلمت حلم يخوف..
تارة : خير ان شاء الله..
دنوة : سولفتلهم الحلم وشلون جنت خايفه ومتوجعه..حتى من كعدت متوجعه واتخيله واكف بالباب..
حلا : هاي لأن نمتي خايفه على رائد..لتخافين ماكو شي.. كومي سبحي واهدي..احنه وياج زين؟..
دنوة : ابتسمت وحضنتهه..ارتاحيت الحمد لله..

كمت طلعت ملابس وشفت التلفون بالجنطه..تذكرت رائد.. لازم اشوفه اليوم..ما اريد يحترك گلبي مثل من سوه حادث وما رحت اشوفه..مثل واحد ذبو بغرفه مليانه نفط بعدين يذب بيهه شخاط وتشتعل بي النار..هج حسيت..الكل يدري وراح يشوفه بس انه ما كدرت اطلع واشوفه..ضلت حسره بگلبي..شگد جان صعب هليوم..والايام البعده همات..ضلت النار بيه لحد ما اجه للبيت وشفت ايده مشدوده برگبته..حسبت روحي بهدوء من تفكيري واخذت ملابسي ورحت للحمام..سبحت وكملت..لفيت شعري بالخاولي وطلعت..

طبيت للغرفه لكيت الجرابي معدلات..يله هم زين..مابيه حيل اعدلهن ع الوجع الحسيته بالحلم وبالحقيقه اول ما كعدت..نزلت جوه ورحت للهول..صابين الريوك ومشغلين التلفزيون على قناة مطلعه برنامج صباحي..صبحت عليهم وكعدت وياهم..ما اكلت بس شوي..

خالتي : اليوم العصر نروح لبيت ام رائد..نتحمدلهه على سلامة ابنهه..بس بالاول اروح اجيب هدية..
حلا : شحتجيبين..
خالتي : ما ادري والله..يمكن انطيهه فلوس..اشوف..
دنوة : انه اسمعهم وساكتة..بس اريد يجي العصر واروح اشوفه..كملنه اكل وشلناه..غسلت المواعين والبنات راحو لغرفتهن..بقيت انه وخالتي..راحت للغرفة الي بيهه التلفون الارضي.. دقايق واجت يمي بالمطبخ..

خالتي : دنوة عيني..
دنوة : ها خالة..عيوني انتي..كولي..
خالتي : صدك جايج كابوس؟..سمعت من البنات..
دنوة : اي والله..ليش..

خالتي : خابرت وحده بنيه صديقتي جانت بالدوام..هي كلش تفتهم بهسوالف وعدهه قدره الهية بس تشوف الواحد تعرفه اذا عنده مشكله لو شي..بحيث مره اجت وكعدت جدام وحده مدرسه لخ..كلتلهه انتي عندج مشاكل وي رجلج وحتطلكين..كلتلهه بيش طالبتني ومن هلحجي..وصدك وراهه بفتره تطلگت..فسولفتلهه على حلمج وشلون حسيتي حقيقه وره ما كعدتي..كالت حتحب واحد..وتصير مشكلة بينهه وبين الولد التحبه سببهه هذا الشخص الاجاهه بالحلم..بس مو مشكله عاديه..لا بيهه تبعات هي حتعرفهن بعدين..

دنوة : بعدني ما شفته وتهنيت بي تصير مشاكل؟..كتلهه..خالة الله كريم..الكاتبه الله يصير..
خالتي : اي ادري..بس غير علمودج..
دنوة : فدوه الج..ادري بيج تخافين علي..ماكو شي ان شاء الله..اجت يمي باستني وراحت لغرفتهه..كملت المواعين جان تجي هي..لابسه صايتهه والشال وجزدانهه بيدهه..

خالتي : انه حطلع اجيب هدية..احسن مما اطلع الظهر والكاهم معزلين..تعاي قفلي الباب وراي..
دنوة : اي يله..طلعت ورحت سديت الباب وراهه..سديت باب المطبخ همات وصعدت فوك يم البنات..جانن ديغسلن ملابسهن مالت الدوام..كعدت احجي وياهن ضحك وسوالف..لحد ما سمعت صوت هورن..اكيد اجت خالة..نزلت جوه فتحت الباب وطبت السياره جوه..نزلت وكالت جيبي الغراض بالسياره..جانت جايبه صندوك عصاير وعلبة حلويات..طبينه جوه..وره ساعه تقريبا كامت تحضر بالغده..مشى الوكت وصار العصر..بالخمسه وربع هجي ..

خالتي : يله كومن نروح..لو اروح وحدي؟..
حلا : لا عيني نجي وياج..شعدنا نبقى وحدنا هنا..
خالتي : يله بالعجل..ما نتأخر ها..
تارة : لا شعدنا متأخرين..امشي دنوة وياي..
دنوة:: صعدنا فوك..غسلت وجهي ورجعت للغرفه..لكيت تارة مطلعتلي ملابس منها مال طلعه..كل ما اجيهم ما جايبه ملابس للطلعه..شمعرفني حيصير هج..اخذتهن منهه ولبستهن..بنطرون ثلجي عريض شوي من النهايه وبي حزام..وبلوز جوه الكمر مالت البنطرون..لبست الشال وصاحتنه خالتي..نزلنه..

جان اكو ولد يطلع عمره ١٣ او دعش بالباب واكف..راحت خالتي صاحته..اجه اخذ الصندوك مالت العصير وحلا اخذت علبة الحلويات وطلعنه بره بين ما قفلت البيبان..تمشينا لبيتهم واحس گلبي يمشي جدامي..دقيقتين وصلنا..جنت مدنجة وامشي..رفعت راسي شفته بالباب هو وياه زلم بيهم ٦.. متچي ايده على عكازه وذاب ثگله كله ع الجهة اللخ..گلبي صار طبل مو نبضات..وجهي احمر وحار..دنجت بالعجل.. سمعت صوت بيبان السياره..معناها راحو..الولد خله الصندوك يم تارة وراح..انه ضليت واكفه ونسيت روحي..حسيت على صوت تارة..
تارة : امشي ولج..

دنوة : رفعت راسي شفته يعاين علي..يمه گلبي..ادور شلون نظرات عنده..تمشيت لباب البيت وصرت وره خالتي.. تسلم عليه بعدين كال تعالو تفضلو..ليش متعبه روحج..مابيه شي..
خالتي : لا يمه شنو مابيك شي..حتى بالعكازة تمشي..
رائد بابتسامة : لا هسة احسن..يله طبو..

طبو كلهم وانه طبيت اخر شي..وكفت جدامه ورفعت راسي اعاين علي..عاينلي بنظرة گصني بيهه..شلون صرت؟..
رائد بابتسامه ع طرف شفافه : بخير من شفت عيونج..
دنوة : ابتسمت بلا ماادري..
رائد : يله فوتي جوه..لا يشوفج احد..
دنوة : اي..

بالكوه تطلع الكلمات من حلكي..جسمي وكلشي بيه يرجف..طبيت جوه..البيت جبير حيل مدري چي حديقته جبيره..نزعت الحذاء وطبيت للديوانية مالتهم..سلمت على خالة ام رائد واخلاص..اخلاص تعاين علي بطرف عينهه..ما اهتميت..عفت كلشي وكعدت يمهم..
ام رائد : صدك طلگج هلعقيل هذا؟..
دنوة : اي خالة..حيل صار هواي..
ام رائد : يله همزين افتكيتي..
دنوة : اي الحمد لله..ضلو يسولفون مدري منين يجيبون الحجي..اخلاص جابت عصاير وكالت حروح اكتب التقرير مالتي..

انه كمت اريد اشرب مي..البيت تصميمه غريب ما ادري شلونه..طبيت للمطبخ ادور على مي..ماكو ما اعرف وين يخلوه..سمعت صوته الي يخلي جسمي كله يرجف من نبرته..
رائد : شدورين؟..
دنوة : ها..لا ردت مي بس..اجه يم الميز..جواه جان اكو صندوك مي..ما انتبهت علي بالبداية...راد يدنج بس ما كدر..عض على شفافه من الوجع الحسه يمكن..شهگت..لا لا عوفه..هسة انه اطلع..ابتعد شوي واجيت اخذت بطل مي..انتچى ع الباب وخله العكازه بسده..صرت جدامه..

رائد : دنوة..
دنوة : عيني..
رائد : مشتاگلج شكثر.. بوياي چانت روحي مسحونة..
دنوة : وهسه شلونها..
تقرب علي وغمز : چنها ورد..
دنوة : ههههههه.. عليك سوالف..
عفته ورحت للديوانية..حتى الماي نسيت اشربه..كعدت يم تارة..

تارة : شبيج ياستار..شو وجهج مخطوف..
دنوة : جاوبتهه وانفاسي تصعد وتنزل سريع..بعدين احجيلج..معلينا.. كليلي شوكت نرجع للبيت..
تارة : هسة اگللهه لامي..
دنوة : كل شوي ارفع راسي اعاين للباب خاف اجه..وره شوي خالة كالت يله نروح..هم يالله يا بنات...
ام رائد : دبقوا بعد..تعشو يمنه..
خالتي : لا بعد شفناكم هاي هي..سلميلي على رائد..
ام رائد : واصل عيني ما قصرتو..
دنوة : طلعنا بره بس تارة مجانت موجوده..شوي واجت مبتسمة وتعاين علي..

رجعنا للبيت..كمشوني البنات استجواب من صعدنا للغرفة..
حلا : شبيج جنتي مدري شلونج هناك..رائد حاچاج؟..
دنوة : اي حچه..بس ما كال شي..
تارة : اي صحيح ماكال..
دنوة : وانتي شمدريج بله..كافي سكتي..
تارة : ديله عيني شحجينت..سكتنا ها اها بعد ما نحجي..
دنوة : غيرت ملابسي وتمددت ع الجربايه..ضليت اتصفن هنا وهنا بعدين غفيت بدون ما ادري..كعدت وحدي ما ادري شوكت..نزلت جوه لكيتهم كاعدين بالهول ديشوفون فلم ع الدي ڤدي..والحب والكرزات جدامهم.. بس خالة مو وياهم..

حلا : صح النوم عيني..اليوم شينيمج..تره بالعشرة هسة..
شهكت..عززه..شنو بالعشرة يمعوده..درت وجهي للساعه.. اي صدك..نوم فشگ استر ياربي..كعدت يمهن اشوف الفلم..اكول؟ مو عدكم دوام الباجر؟..
تارة : باجر جمعة..
دنوة : لا انه من صدك تيهت كلشي شبيه ثولة..
تارة : الحب سواج ثولة عيني..وله انتي شبيج عيني..تلگفيهه هي وطايرة..لا تثولين بروحج آنسة..
دنوة : يااا..شفايتلي لو هج..شمرت تارة التلفون بحضني..جان دا يدك بس صامت..اخذته منهه..
تارة : روحي جاوبي..
دنوة : جان مكتوب رائد ..اخذته وصعدت فوك..

جاوبت بدون ما احجي شي..كام يحمحم بعدين حجى..
رائد : لازم انه احجي بالبدايه مو..يله شلونج..
دنوة : حسيت بالفشلة بس غلست..زينه..انت شلون صرت..
رائد  : بخير ونعمة.. تدرين بيه مااحب گعدة البيت بس لمن طبيتيلنا كون ابقى بالمطبخ..
دنوة : هههههه.. عفية انت ليش تخجلني شنو هاي..
رائد : يولي اروح فدوه لمستحاچ.. گلبي انتي ضاعت الدنيا بدونج..
ابتسمت : والله وبدونك هماتين..
بقينا نحچي شواي بعدين كتله : رائد ...
رائد : عيون رائد انتي..
دنوة : حروح..
رائد : ماشي..ديري بالج على روحج..
دنوة : انت هم..   سديته منه..

وگلبي ضل يرجف رجف..حتى ايدي.. احبه اي والله احبه..دائما شعور الامان الأحسه عند رائد ما موجود عند غيره..الشعور الي يخلي گلبي يرجف ما شفته يم احد غيره.. حتى عقيل الي عساس جان زوجي..ما حسيته يمه..شعور الراحه والحب والأمان والادمان على نفس الشخص..نفس الكلمات..نفس الصوت والاحساس والنبره والعيون والنظرات وكلشي نفسه..بس لأن انت ترتاح يم هلشخص..شمرت التلفون ع الجربايه والابتسامه تارسه وجهي..

نزلت جوه يم البنات..كل ساعه وحده منهن تضحك من تشوفني..فهمت قصدهن..اكول..انه باجر ارجع للبيت..
حلا : هاي شنو..شبقيتي..حتى اسبوع مابيهه..
دنوة : اي اجي غير وكت شكو طايرين قابل..

مدري شلون مشى الوكت واجاني نوم..طبيت للفراش واجه التلفون على بالي..شلون؟..اخذه وياي لو اغلس..خاف ابوي يسويلي مشكلة چي اخذته من وره ظهره..اي اعوفه احسن..
كعدت الصبح متأخره..نزلت جوه صبحت عليهم..خاله بلكت تخابرين على ابوي يجي ياخذني..اليوم ماعنده شغل هج وكت..
خالتي : ها ولج بعد وكت وين رايحة..
دنوة : لا هم يالله..اجي بعدين..
خالتي : يله هسة اخابره..تلفوني بالغرفة..

دنوة : كعدت وي البنات شوي ع الريوك..بعدين اجت خالة..كالت يله يكول بعد عشر دقايق اجي..مسافة الطريق بس..كمت فوك حضرت جنطتي..ولبست الصاية والشال.. نزلت جوه انتظر..ما جبت موضوع التلفون خاطر ما تكول اخذي ومدري شنو..شوي واجه ابوي..طلعتله..اجه سلم على خالة بدون ما يطب بعدين طلعنه..كتله سما ورزان شلونهن..عاين علي وابتسم..
محيي : زينات بنتي..
دنوة : شوكت حتكول لجدي عليهن وعلى خالة شذى؟..
محيي : باجر بحيل الله..واريدج تعرفين شغلة عن امج..تذكرين من كعدنا سوه بالغرفه وحجيتلج إنه عرفت الحقيقة؟..
دنوة : گلبي صار يدك من كال امج..اي اذكر..
محيي : حتعرفين كلشي باجر..

دنوة : سكتت بس بداخلي الف سؤال..اولهن ليش ابوي من عرف الحقيقه ..تذكرت موقف قديم..هم ابوي صار عصبي وحجى على امي..بوكتهه محد كال شي والكل سكت.. من عدا جدي..گله ماتت المره وراحت..كافي تحجي عليهه..

وصلنا للبيت..اخذت الجنطه وطبيت جوه..تلكتني سرور ونوارة..بوستهم وحضنتهم بعدين طبينا جوه..تفاجئت من عمة سناء جانت هنا هي وبناتهه..اخر مره شفتهن گبل شهور.. فرح وكوثر..سلمت عليهم..سرور اخذت الجنطه خلتهه بغرفتي واجت كعدت ويانه بالمطبخ..جدتي هم جانت هنا..وجودهن يحلي البيت..حلوه هي وسوالفهه..صح جبيره بالعمر بس بعدهه بحيلهه..

سناء : رائد حبيبي متصوب عمت عيني عليه..اريد اروحله بس ما اندل بيتهم الجديد..تدرين بي شكد عزيز هو والمرحوم وعائلته..
جدتي : صخام يداده..صدك؟..يله چا شمنتظرين..نوصي السايق يجي ياخذنه انه وياج..هم يبقى حفيدي وماعندي شي وياه..حاله حال احمد وعصام والباقين..
سناء : صدك احمد ماكو..ما شفته من البارحة..
ابتسام : غير اقسام داخلية وما يرجع كل اربع ايام يومين..
سناء : هاا..الله يسهله يارب..

كل ما اتذكر احمد تلعب روحي..سوالفه ويانا حقيرة ودائما يسوي مشاكل تفشل عمو وخطية ميستاهل

اجت سرور كعدت يمي..سألتني على رائد .. كتلهه رجله مشدوده وتوجعه بس هو ما يحجي..
سرور : هو هذا رائد..ما شفتي حالته من اتزوجتي..الله كريم بعد..سولفيلي شكو ماكو..حجيتو؟..
ضحكت..اي حجينا..وسولفتلهه شصار..
سرور بابتسامة : اي عيني متطوره علاقتكم..بعد شتردين..

جانو ديحضرون الغده..كمت وياهم..صار شكد ما مسويه اكل..سالفة منا واللخ مناك..تأكدت محد يعرف بالسالفه اليريد ابوي يحجي بيهه..كمت احسب دقايق خاطر اعرف شحيصير.. وره الغده كلش نعست..شلت المواعين وي البنات بعدين رحت انام..كعدت العصريه شبعانه نوم..شينيمني اليوم..كلت اشتغل بالبيت والهي روحي خاطر بالليل انام بالعجل..اجن فرح وكوثر يمي..سولفنا شوي..كوثر جاي عليهه الولد مشايه بس بعد ماكو حفلة خطوبه لحد ما تطلع راس سنة ابو رائد..بس فرح بعدهه..يمكن ناسين سالفة رائد .. محد سألني علي..بعد احسن..انه هم مااريدهم يعرفون شي..

بالليل كملنا شغل واجن فرح وكوثر ينامن يمي..كتلهم يروحون يفرشون بين ما اجيب مي وچم شغله..خاطر ما اطلع من الغرفة بعد..مريت بغرفة ابوي وسمعته يصيح ويحجي بحرگة..يگله شلون مات يمعود..صدك جذب تحجي؟....

يتبــــــــــــع....................

قناة التليگرام

حساب الانستگرام