أساور الفضة الفصل الاول 1 - بقلم نهى

#أساور_الفضة
#بقلم_الكاتبة_نهى
مساءاً محملاً بالحب لكم مني يا احبتي
تعالوا واجتمعوا من حولي لاحكي لكم قصة منبع نهرٌها عنوانه الوفاء
.................
انا...
سوار فضة في معصم امي
فرحة لم تكتمل حين الولادة
ولد .. امي تمنتني
لتزين الصدر لا المعصم بقلادة
دمع دعاؤها الليلي بلل الوسادة
انا..
سوار فضة في معصم امي
قيود نار وعار
فمدينتنا متوازية الاعراف
شوارع لا تلتقي
لا تعرف لغة الحب
لا تأبه بالبدايات
لا تنهي نهايات
شوارعهااا ... لا تلتقي
فيها الانثى مذمومة ..
ومن تلد الانثى مذمومة
وحده الذكر من يكمل الامومة
انا..
سوار فضة في معصم امي
((بقلم هدى ))
@houda_s
.......................

طلعت من يم الدكتورة وبيدي ورقة السونار ودموعي تصب عشرة عشرة
النسوان الي بالعيادة يباوعون علية بفضول
سمعت مرية جبيرة تحجي وية البصفها تكللها
.. خطية بس لا كلتلها الدكتورة بيها شي خطير
حرت وين انطي وجهي
غمضت عيني واخذت نفس ومسحت دموعي قبل لا اطلع برة العيادة اخاف وحدة من نسوان منطقتنا تشوفوني ابجي وتوصل خبر لعمتي
لان مو كلهم يعرفون بضيم كلبي مريت.. من يم الممرضة واخذت الفايل مالت المراجعة من يمها وكالت

.. بثينة مو تنسين الاسبوع الجاي موعد اللقاح تجين تلقحين ونسجله بدفترج الصحي
جاوبتها.. ان شاء الله
المستوصف الطبي جان بنفس منطقتنا قريب على بيت عيالي

خايفة ومحتارة ما اريد ارجع للبيت واني عيوني حمر اخاف يعرفون بمصيبتي وانفضح وساعتها ينهجم بيتي

رفعت راسي للسماء جانت الساعة ب١١ الصبح والشمس عالية تصكع بالراس صرت اناجي رب العباد

ربي ضاكت علية الواسعة خايفة من عبادك يبطشون بية واني مرية ضعيفة لاحول ولا قوة
وانت اعلم بيهم اكثر مني وين انطي وجهي
جنت امشي بطيء اجر بخطواتي جر اتمنى الطريق كون يطول وما اوصل لبيت عيالي بسرعة
شحجي وشكول خطية بناتي هسة يرجعون من المدرسة ينتظروني على احر من الجمر يردون يعرفون الخبر

جنت امشي وصلت لراس الشارع العام وكفت سيارة باص نفرات
كبل اجة على بالي اروح ازور ابو الجوادين عليهما السلام اي واريد هناك يم شباكه اذب حملي يمه واشكي همي

اي هو ماكو غير هذا المكان الي راح يهون علية مصيبتي وينطيني الصبر فتحت الجزدان وشفت عندي فلوس مال خياطه البارحه استلمتها صحيح قليله بس الحمدلله .

رحت وكفت عالشارع العام انتظر اركب نفرات واجتي سيارة مقبطة اشرتله وكفلي
ركبت شلون ماجان ووصلتنا للكراج ومناك ركبت سيارة ثانية نفرات للامام الكاظم عليه السلام
على طول الطريق انا اتحسب واكول ربي لا اعتراض على حكمك

احمدك واشكرك على كل حال
بس شسوي المصيبة الي عندي شيقنعهم
وصلت وهناك مريت على سوق الكاظمية
وصار بوجهي محل صايغ الفضة القديم جان كاعد بي رجال جبير اتعودت دائما من عنده اشتري السوارات
شافني الرجال.. هلا عمو وين هالغيبة اتفضلي عمو بشنو اخدمج
.. خادم ربك عمو والله اجيتك هالمرة مثل كل مرة اشتري سوار فضة وتنقش عليه الرقم
ابتسم.. ها عمو راح تجيج الخامسة يعني انقش عليه رقم خمسة
.. اي والله مثل كل مرة بعد شسوي هذا امر الله جنت اتمنى اجيك اشتري كلادة رجلي مواعدني بس يصير عندي ولد يشتريلي بس هذا امر الله ... سوار فضة خامس
.. والنعم بالله

انطاني السوار بعد ما نقش عليه رقم خمسة انطيته فلوسه ورفض ياخذ مني فلوس الصياغة اكتفى بس بفلوس الفضه اخذته واني اتشكر منه واندعيله رحت
ودخلت للامام وهناك زرت وكعدت و ابجي واشتكي واطلب من الله يقضي حاجتي بجاه كلمن عنده جاه عند رب العالمين رحت صليت

وخلصت صلاتي وكعدت انتجيت على الحايط جان الحايط مرمر رخام بارد وجانوا مشغلين تبريد وروائح العطور الزكية الطيبة اتسربت وية انفاسي احس مفعوله مثل المهدء
سنحت عالبرودة وتجيت راسي عالحايط وعيوني ثكلت اتمنيت اغفى من التعب جانت اصوات الزوار تعم المكان

واني مغمضة عيني
حسيت على وحدة كعدت بصفي تحجي وية بنتها مدري جنتها مااعرف شتصيرلها
تكللها نصلي ونزور ومن نطلع نتغدة
فتحت عيني ومسحت دمعة معلكة على رموشي جذبتها حركتي جانت مرية جبيرة
كالت.. ها خالة ان شاء الله حاجتج مقضية عند ابو الجوادين وان شاء الله ما يردج خايبة

هي حجت هاي الكلمات واني انهديت بالبجي
.. كولي يالله يمعودة ماكو شي يصعب على ربج
كلشي ينحل هونيها وتهون
جانت تحجي حتى تطمني
.. خالة شتهون واني الفاس وكع بالراس
بمصيبتي ما يفيد غير بس الصبر واني حتى الصبر مل مني
.. كولي خالة شنو سالفتج فضفضي وطلعي الي بكلبج
اترددت بالبداية وبعدين كلت هي مرية غريبة ما راح تضرني مرات الواحد يحتاج يحجي وية ناس ما يعرفهم وياخذ راحته وياهم لان يعرف ميأثرون على حياته
.. خالة والله ما اعرف منين ابديلج بس خلي احجيلج
اني مرية خلفتي كلها بنات وعيالي صعبين ورجلي اصعب هددني اذا هاي المرة اجيب بنية ينطيها لاخوه ويطلكني واني ماعندي اهل اروح عندهم اهلي الله انطاهم والله خذاهم اني خلفت اربع بنات وهسة اني حامل بالخامسة

وصرت احجي وية المرية عن حياتي وعن زوجي وبناتي وعيالي المرية بالمقابل
صارت تهون علية وتحجيلي مصايب الناس الي كانت اسوء من مصيبتي وكأنما الله دزها مخصوص حتى
تصبرعلية وبأثناء الكلام طلعت السوار الي اشتريته من جنطتي وراويته للمرية ورفعت ايدي وجنت لابسة اربع سوارات فضة وهذا السوار صار الخامس
وباوعت عليه بأمل رفعت ايدي ولبست السوار جانت المرية تباوع علية كالت

.. هذني اشتريهن منا
.. اي خالة من السوك القريب عالامام
اشتريت بس واحد هذني الاربعة عندي قديمات مشتريتهم من نفس المحل
.. بالعافية خالة كلش حلوات
حجيت واني اباوع على السوارت
.. الله يعافيج تدرين خالة اني وية كل سوار من هذني السوارت عندي قصة
.. قصة؟؟
.. اي قصة جانت امي الله يرحمها اذا تسمع بية حامل ببنية تروح تاخذني تزورني الامام وتشتريلي سوار فضة وتكول يمة الفضة فضية وعساه فال خير على بناتج
وصرت كلما احمل ببنية اشتري سوار فضة
صارت عندي عادة
وصار سوار يجر سوار لحد ما صارو اربع سوارت وهسة اجة السوار الخامس يكملهن
.. يارب يسعدهم ويباركلج بيهم وتشوفين بناتج باعلى المراتب
.. اشكرج خالة ربي يسهل امرج مثلما هونتي علية مصيبتي
.. يمة مسحي دموعج وكولي الحمدلله اهم شي تمام الخلقة
.. خالة والله ماعندي اي اعتراض على زرق ربي
بس خايفة من ردة فعل زوجي وعيالي خاف يأذوني
اذا عرفوا بية حامل ببنية
.. يخالة من ترجعين كليلهم ما بين عندي شي بالسونار الدكتورة مكدرت تعرف جنس الجنين ومنا لحد ما تولدين الله كريم يحلها الف حلال
على الاقل من تجيبين ويعرفون جبتي بنية بساعتها
انتي تعبانة من الطلوك وما يكدر رجلج يحجي عليج وانتي بهيج وضع تعبانة

.. اي هو احسن شي اسويه اسكت وما اكللهم شي
رفعت راسي وشفت الساعة صار وقت الظهر وهسة بناتي اكيد رجعو من المدارس
عدلت عباتي والتفتت على المرية

.. خالة كعدتج حلوة اني هم يالله ارجع للبيت هسة الكة بناتي ينتظروني على احر من الجمر
سلمت على المرية وهي اندعتلي دعوة غريب لغريب
يكولون مستجابة
طلعت وكان لازم امر عالسوك ومناك يطلعني عالشارع العام حتى اركب نفرات توصلني للكراج
واني دا امشي بالسوك شميت ريحة الدهينة الحارة والله رف كلبي عليها
فتحت الجزدان جان المبلغ الباقي بعد ما اشتريت السوار قليل
يادوب تجيبلي قطعة صغيرة اشتهيتها واني اباوع على ابو الدهينة شلون راش عليها جوز الهند المحمص وفوكه لب جوز ماحسيت الا على رجلية ماخذتني يم ابو حلاوة الدهينة
وسألته ينطيني على كد فلوسي
باوع علية اخذ صحن بلاستك وصار يكص بيها
واني احسر روحي رايحه وية الحلاوة اويلي .. مرات الانسان المحروم
من هاي الاطايب يتلهف حتى يضوكها
حط علبة الحلاوة بالعلاكة
انطيته فلوس واخذتها
حسيت بدية صارت دافية اتمنيت اكعد يمه واكلها
بس عيب بالسوك اكل

وصلت للشارع العام انتظر الباص وحطيت علبة الحلاوة وفتحتها ومديت ايدي اريد اكل
باوعت لبنات طالبات يعبرون الشارع توهم طالعين من المدرسة تذكرت بناتي واتنغصت الهم وباوعت عليها قطعة صغيرة شميت ريحتها ورجعت غلقت العلبة وشديت العلاكة
خطية بناتي يحبونها ومو كل مرة يكدرون ياكلون حلاوة هه قصدي يضوكون
وكفت باص وركبت اروح للكراج

غمضت عيني وتجيت راسي عالجامة واباوع عالناس
من طلعت عالدنيا واني احلم واتمنى وكل يوم اكول باجر اجمل واحلى
لكن مع الاسف طال انتظاري والباجر الي جنت اتأمله ما اجة ولا عدا علية

نزلت من السيارة عالشارع العام مال البيت
الحلو بأثير من كثرة اهماله الي ولبناته ما يعرف الله وين خالقنا

جنت امشي ووصلت يم راس الفرع وهناك
اشوف رياجيل ملمومة يم بيت عيالي انخمط كلبي
.. ياستار استر شنو هاي اللمة
صرت امشي سريع وكلبي يريد يطلع من صدري
منا الى ان وصلت لبيت عيالي ميت الف حسبة اجتي على بالي
انتبهت على امجد اخو زوجي من بين الرجال يدفع بأثير زوجي
يريد يدخله للبيت واثير يهد ويصيح
.. اليوم احرك بيتهم على راسهم ولك اني واحد مثل حازم يعيرني
..ضربت على صدري عزة هذا اثير وية منو متعارك. هالمرة
دخلت للبيت وشفت عمتي ام اثير تلطم وجنان مرت حماي امجد تهدي بيها
انتبهت على بناتي كاعدات عالدرج شافوني اجتي بنتي الصغيرة تركض

هدى .. ماما لحكي بابا اتعارك وية جيرانة حازم
.. على شنو اتعارك يحظي
اتلكتني عمتي من الباب
.. ياا صلوات عالنبي شرفت الفكر بنت الفكر
ظليت فاتحة حلكي ومصفصفة بوجها
هاي المرية مريضة نفسية وتبقى مريضة

مجاوبتها واشرت لبنتي شيماء الجبيرة انطيتها الحلاوة وكلتلها تاخذ خواتها وتصعد بيهم فوك لان الكل مخبوص خبص داخلين بالانذار واني متعودة كل مصيبة بالبيت عمتي تطلع حركتها بية وبألبنات
صعدن بناتي فوك ودخلت للمطبخ اشرب ماي واباوع من شباك المطبخ دخل امجد واثير جان كلش متعصب ويصيح على اثير

امجد.. اثير رحمة على والديك كافي ترة والله ملينا
من مشاكلك وتالي وياك ما راح نخلص
اثير.. اشك حلكه شنو تريدني اسمعه يبسمرني واسكتله
امجد.. يا اخي جان سويت حساب لهذا اليوم اذا انت هشكل حريص على كرامتك
.. ياكل تبن واكسر راسه
اجتي عمتي وكامت تحجي على اثير
.. ولك يمة شوكت تبطل مصايب اي مو طلعت روحي
وراح اموت من وراك
جنت بس اباوع عليهم

امجد .. شوف اثير اني بعد ما اتحمل مشاكلك
راح اتصل على علي اخوي حتى لو تكلفني المكالمة الدولية كومة فلوس مو مهم امري لله بس اهم شي اريده يشوفلك حل حتى تطلع من المنطقة انا مليت من المشاكل
اثير.. ترة اني ما كاعد ببيتك انا كاعد ببيت ابوية
ام اثير.. شوف يمة كلام اخوك صحيح كفاً للمشاكل
انت تنتقل من هاي المنطقة

تركتهم يحجون بينهم اريد اروح لغرفتنا صعدت فوك وحسيت ضاقت انفاسي
من صعدت جان الفوك اظلم والحيطان ماكلتها الرطوبة
دخلت للغرفة لكيت بناتي مبدلات ملابسهم
وفارشات كتبهم شافتني شيماء دخلت للغرفة كامت من مكانها واجت يمي
.. ها ماما شنو بابا ليش متعارك
جاوبتها مروة
.. يعني متعرفين ابوج مثل كل مرة يتعارك على نفس السبب
دنكت شيماء مقهورة
نزعت ملابسي ولبست دشداشة
وسألتني شيماء بصوت ناصي وبخيبة خلاني التفت
.. ماما هاي شنو لابسة سوار خامس

باوعت على ايدي واتذكرت مصيبتي من ورة مشاكل اثير نسيت مشكلتي والتفتت اخاف احد يسمعنا
وحجيت بصوت ناصي
.. اي ماما سوار خامس
شيماء بجزع.. يعني شنو طلع بيج بنية
.. اي ماما راح تجيكم اخت خامسة بس سدي الموضوع كافي لحد يسمعنا خلي هذا سر بيني وبينج
كعدت بالكاع وكلتلها جيبي علاكة الحلاوة
جابتها واجوي البنات اتجمعوا داير مدايري
وصرت اوزعلهم الدهينة واباوع عليهم شلون فرحوا بيها

هدى.. الله ماما عاشت ايدج شكد طيبة هاي الحلاوة
ضحى .. ماما بعد مرة ثانية جيبي هواي
مروة.. ماما اني حصتي قليلة انطيني بعد
كمت انطيتها حصتي لان اصلاً هي مو هواي
انتبهت على شيماء قسمت من قطعتها وقربتها من يم حلكي
.. ماما الله عليج فتحي حلكج واكلي مني
ابتسمت واخذتها منها واكلتها

ياربي البنية شكد حنينة على امها ويلوموني من احب البنات الي عنده بنية الله حابه
بس اثير حظي يبجي بوجه الله
وبقينا اني وبناتي كاعدين فوك

دخل علينا اثير وهو ينافخ ضايج
كال.. بثينة حضري غراضنا وشدشدي الغرفة
عكب باجر انشيل لان امجد اتصل على اخوي علي
وسولفله عالصار وعلي كال خلي اثير ياخذ عائلته ويروح يكعد بالمشتمل الجديد الي اشتراه كال بدال ما ظال فارغ وما بي احد روح اكعد بيه هم عينك عليه وهم تكفنا من المشاكل
خلص كلامه ودار وجهه وطلع يدردم شكله ما قابل عالقرار بس حكم القوي عالضعيف
بس يكولون مصائب قوم عند قوم فوائدً
اي من سمعت كلام اثير
بقينا اني والبنات وحدة تباوع بوجه الثانية ممصدكين
الخبر يعني معقولة الله التفت لحالنا واخيراً راح نطلع من هذا البيت ونعيش ببيت لوحدنا بعيد عن عمتي وظلمها
رفعت راسي .. ربي فدوة رحتلك ما انسى فضلك
كمنا اني وبناتي من الفرحة والحماس صرنا وحدة تدعم بالثانية عبالك بحلم
مروة .. واخيراً راح تصيرلنا غرفة لوحدنا خاصة بينا
ضحى.. الله ونلعب براحتنا وبعد ماكو بيبي تضربنا
علمود اولاد عمو امجد لان ما نلعبهم ويانا
شيماء.. يالله اتحركوا لمو كتبكم ودفاتركم حتى ما
تضيع وية الغراض بالشيلة
صرنا نشتغل بهمة ونشاط واني الافكار والاحلام صارت تتوالى على بالي
اتذكرت عندي كم قطعة قماش لازم اخلص خياطتهم واوديها للنسوان اخاف نشيل والتهي ويصير مشوار بعيد شيوديها الهن
كعدت اخيط وخليت شيماء والبنات يضبون الغراض ........

ورة يوم حملنا الغراض وانتقلنا للبيت الجديد بس ما شاء الله جانت المنطقة الي انتقلنا الها فخمة وبيوتها كلش كبار صرت اباوع وافر براسي
مروة.. حيييل هاي شنو من بيوت عبالك قصور
شيماء.. كولي ما شاء الله
مروة.. ماما شعجب عمو علي عنده هنا مشتمل بهاي المنطقة الراقية
.. حبيبتي عمج من سافر للخارج دائما بين فترة وفترة يحول فلوس لبيبيتج يجمعها عندها وهي جمعت فلوسه وكللها هذني الفلوس اشتريلي بيهم بيت حتى لو صغير بس اهم شي بمنطقة راقية حتى اخاف ارجع انا وعائلتي يكون عندي بيت ضمان بالعراق

وكفت سيارة الحمل الي بيها الغراض يم بيت صغير مبين مشتمل ماخوذ من بيت المهم نزلت واني كلي لهفة
وصرنا ننزل بالغراض واثير والعمال ينقلون الغراض القليلة وغرفتنا
وبلشنا بتنظيف البيت اني والبنات
واثير جاب النجار حتى يشد الغرفة
ورة فترة اندك الباب وطلعت ضحى تشوف منو بالباب شوية واجتي وكالت ماما هذا ولد يكول احنا جوارينكم بيت المختار ابو رائد الي بصفكم
طلعت شفت ولد يجي عمره ١٣ سنة وشايل بيده صينية. بيها اكل
شافني الولد وسلم. خجلان وكال
.. خالة هذا غدا الكم من بيت المختار ابو رائد
اخذت الصينية من عنده
.. مشكور خالة متقصورن نردلكم اياها بالافراح
بس كلي وين بيتكم بالضبط اشرلي على بيت كلش حلو وجبير يصير بصفنا
جانت هدى واكفة يم الولد وتحجي وياه وهو لزمها من كصيبتها وكرصها من خدها على كيفة سألها على اسمها
استأذن رائد وطلع
واني والبنات هدينة عالصينية
جان بيها مطبك دجاج ولبن وطرشي وخظرة وركية
ومركة فاصوليا وبيها لحم وخبز حار
باوعت لبناتي شلون عيونهم لمعت سودة علية
صارلهم هواي ماداخلة اللحمة لبطنهم
صحت لاثير وكال هذا منين وكعد ياكل ويانة
جان احلى واطيب اكل اضوكه بحياتي
خلصنا وضميت الباقي للعشا يفيدنا نحمي وناكله الحقيقه دازيلنا هواية

المنطقة الي انتقلنا الها عكس منطقة بيت عيالي
وناسها يختلفون اهل خير
جنت ملتهية اشتغل وسمعت صوت تكسير مواعين
.. يبوووووي
دخلت للمطبخ والكة هدى بنتي الصغيرة موكعة كارتون الصحون
.. لج هاي شنو سويتي جنية لج وتالي وياج
جانت تباوعلي بعيونها الوساع وترمش وخدودها حمر ولامة حلكها
.. ماما اغيد (اريد) اساعدكم
.. لج ماما شتساعديني
صحت لشيماء.. ماما شومة تعالي اخذي اختج منا لا تجرح رجلها بالكزاز المكسر خليني الم المواعين
شيماء.. شلون بيج جنية شوداج عالصحون انتي وين ما ترحين تسوين مصيبة وتأذين نفسج يالله تعالي امشي منا
برطمت .. لا تصيحين علية ماما تعاي لشيماء كغصتني(كرصتني)
.. لج شومة ليش تأذين اختج
شهكت شيماء .. عزة بعينج فصمة ماما هاي بنتج جذابة ممسويتلها شي
اباوع لهدى طلعت السانها تعيب على اختها وراحت
تركض
شيماء.. لج تعالي فصمة اني الج وين ترحين مني
ابتسمت على شكلهن
.. امانة عليج شومة لاتأذيها
جرتها من ايدها وهي ترزل بيها وهذيج تعيب مطلعة السانها على اختها
صحت لمروة ولضحى
.. عفية بنات بس تعالوا نقلو مكينة الخياطة من مكانها حطوها الي جوة الدرج
بعدما استقرينا بالبيت ونقلنا البنات من مدارسهم القديمة على المدارس القريبة من عدنا مرت الايام
والحمل صار يوم عن يوم يثكل علية حتى خياطة صرت كوة اخيط ما عندي قوة اكعد افصل واخيط
وفوك هذا كله انا جديدة عالمنطقة فنسوان هاي المنطقة مو كلهم يعرفون بية اني خياطة بس كم وحدة من جارتنا
جنت كاعدة وعقلي يتحسب لباجر شلون بية وببناتي
المصرف جاي يقل وهذا اثير حتى ما يكلف نفسه يطلع يشوفله شغلة ويساعدني بمصرف البيت لا وفوكاها
يريد نفسه مني يجي يوكف فوك راسي يريد ادبرله فلوس ما اعرف منين اتلكاها ياربي
والفرحة الفرحتها باول ايام انتقالي لهذا البيت وكلت ارتاحيت من نكة عمتي بسرعة اتبخرت واكتشفت ان كعدتي ببيت عيالي اصرف بهواي الي ولبناتي على الاقل هناك ما جنت اشيل هم
الاكل جنا ناكل وياهم سوية وامجد حماي هو المسؤل عن مصرف البيت وجانت فلوس الخياطة بس للبنات وطلباتهن ومدارسهن
هسة منين ما التفت احس تضيك الواسعة بعيني
حطيت شوية كليجة ام التمر بماعون
شيماء .. ماما هاي المن الحلاوة سويتيها
.. هاي حلاوة طحين سويتها لبيت جوارينا ابو رائد كلت عيب ارجعلهم مواعين الاكل فارغة
وشوية بقالكم بالماعون ضميته من ارجع انطيكم منا يالله ماما شومة عينج عالبيت اجتي هدى تركض
هدى.. ماما اخذيني وياج
.. لا ابقي يم خواتج
.. ما .. ما .. اغوح (اروح) وياج
شيماء.. ماما اخذيها وياج وفكينا منها لا تكوم تبجي فوك راسنا
.. يالله لبسي نعالج وتعالي وياي
راحت تركض كدامي وكصايبها وراها
دكيت باب بيت جوارينا
ما شاء الله ربي يزيدهم ويباركلهم بيتهم كلش فخم
سمعت صوت مرية تسال منو
جاوبتها .. عيني اني جارتكم ام شيماء النزل الجدد
شوية وانفتح الباب وطلعت مرية تقريباً بعمري
مبين عليها الخير جانت لابسة دشداشة قصيرة ولابسة سوارات وتراجي ذهب كلش حلوات وكاصة شعرها قصير فرنسي حلوة سلمت عليها وسلمت علية من ورة خشمها جانت تحجي بتكبر وياي وعيونها كصتني من فوك ليجوة عبالك دتعاين بضاعة
عرفتها على نفسي وقدمتلها الحلاوة واتشكرت منها عالاكل ودخلتني جوة لبيتهم وكعدنا بالمطبخ وشفت ابنها رائد كاعد يدرس على ميز الطعام شافنا وابتسم وسلم علينا وظل يحجي وية هدى الي راحت كعدت يمه وانطلقت بالسوالف وياه وانطاها الوان ودفتر رسم اباوع عليها شلون لمعت عيونها بفرحة وانطلقت ترسم وتسولف وياه
انتبهت على ام رائد دتحجي وياي وسألتني كم سؤال عن زوجي وبناتي مثل التحقيق مبينة مرت مختار المنطقة
دخلت بنتها اسمها ليلى سلمت علينا جانت بعمر مروة بنتي
..ام رائد من الناس القداما بالمنطقة وتعرف تقريباً كل واحد بهاي المنطقة ووعدتني ان تكول لنسوان المنطقة عني حتى اخيطلهم اذا يردون
ام رائد.. بس عيني ام شيماء اكلج اياها من الاخير ترة
جاراتنا مو كلهم يخيطون اغلبهم يشترون كله جاهز
بقت بس اشوفلج كم وحدة من النسوان الكبار هنة الي يحبون يخيطون
ام شيماء..والله يا ام رائد الخياطة باب رزقي وتسوين علية فضل اذا تساعديني
طلعت من بيت ام رائد واني اتأمل تساعدني
ورة فترة تقريبا دزت علية ابنها رائد تريد تحجي وياي فرحت كلت بلكي جابت معاميل اخيطلهم
رحتلها ودخلتني لبيتها مثل كل مرة تكعدني بالمطبخ
ام رائد.. شوفي ام شيماء اني دزيت عليج حتى اكلج حجيت وية صديقاتي ووية نسوان المنطقة عليج بس كم وحدة وافقت تجي تخيط عندج وكالوا على وقت فراغهم يجون بس خلي اختصر عليج التعب اني اعرف نسوان منطقتي الخياطة هنا عدنا ما ناجحة هالكد وانصحج تشوفيلج باب رزق ثاني وية الخياطة اذا انتي كلش محتاجة
.. والله يا ام رائد بس الله اليعلم بحالي شكد محتاجة
ام رائد .. شوفي راح اقترح عليج اقتراح
واعتبريه مساعدة مني الج وهم انتي المستفادة واني المستفادة
.. كولي حبيبة الله وايدج
.. شوفي ام شيماء مثل ما تعرفين اني بيتي جبير واحتاج وحدة تساعدني بالبيت وانتي محتاجة شغل فتعالي كل يوم ساعديني بشغل البيت
واني انطيج الي اكدر عليه وهاي من غير يلوحج
مني الملابس الزايدة الاكل الزايد وخير من الله وانتي اولى بيهم
.. والله ما اعرف شنو اكلج
.. انت شوفي وفكري ورجعيلي خبر
حتى اكول لأبو رائد يجريلج راتب
.. ان شاء الله اخذ رأي ابو شيماء بالموضوع واردلج خبر
بعد فترة طلعت من بيت ام رائد افكر باقتراحها
والله هو اجة بوكته وانعم الله عليها من كلفت روحها تساعدني خلي ارجع للبيت واشوف اثير شنو يكول
بعدما وافق اثير وكيف من كلتله عالشغل
اثير.. اي والله اجة بوكته انا مفلس ومحتاج كم فلس
.. هاي بدال ما تساعدني وتعيني تجي انت تريد مصرفك مني شطلعت هاي
.. لا تظلين تمنين علية ترة بعدج ما اشتغلتي
ترة انا دا ادور على شغل بس ماكو
.. اشتغل عمال او اطلع عامل بمحل مو الا وظيفة
.. شنو منو يقبل يشغل واحد عنده بظهره انزلاق
من ورة الدك الي اكتله زين ما صار بية شلل
.. شنو تزرع تحصد
غمضت عيوني بصبر اتعودت على اثير وحججه الما تنتهي
ومن عهدها صرت اروح كل يوم اشتغل عند بيت ام رائد وهي المرية الله فوك الراس ما مقصرة وياي
بس بيتهم جان جبير ويتعب صرت اطلب من شيماء من تحل من المدرسة تجي وياي تساعدني
سودة علية هي مكالت شي واجتي بكل رحابة صدر تساعدني وتدرس امتحاناتها
صرت احط الفلس عالفلس واجمع حتى اسد احتياجات البيت احنا من انتقلنا للبيت طلعنا بس بطرك غرفة الاخشاب جان ما عدنا اي شي لا ثلاجة لا كاونتر
صرت باول ايام الزكها شلون ما جان وبعدها كامت ام رائد تنطيني غراض قديمة زايدة متحتاجها اخذها للبيت
فادوني كلش هواي
مرت ضحى من يمي وراها هدى تمشي وتبجي وشعرها مكوش ومبهذلة تريد من ضحى تطلع تشتريلها
صحت .. ماما شيماء الله يرضى عليج تعالي اخذي اختج سبحيها وجلفيها زين
وجيبيها الي انا امشطها
.. صار ماما بس اخلص الشغلة البيدي واجيج
اباوع عليها خطية امتحانات وملتهية
اجتي اخذت هدى الي كامت تلعي متريد تسبح
سطرت راسي بنت اللذين
رحت كعدت على مكينة الخياطة حتى اكمل خياطة صدرية ضحى لان الست اجتي من المدرسة شاكة الصدرية كعدت اخيط ومروة يمي كاعدة تدرس
مروة اشطر وحدة بخواتها وهواي تهتم بدراستها
وتأمل من تكبر تاخذ شهادة عالية وترفع راسي
كعدت اخيط واحس بألم ينزل من ظهري على محالبي
لازم اشوفلي يوم واروح للمستوصف مال المنطقة واجيك لان هاي الايام راسي وظهري هواي اذوني
شوية واجتي شيماء ولافة هدى بالمنشفة جابتلها ملابس وكعدت تبدلها كدامي
اباوع عليها شلون تبدل اختها جريت حسرة جبيرة
ما اعرف ليش اموت من القهر كلما اشوف الوحمة الي بجسم هدى جانت وحمة سودة جبيرة ماخذة نص من خصرها ونازلة على فخذها الايسر
بقعة سودة متناقضة وية لون بشترها البيضة
سودة علية على كدما هدى حلوة على كدما البقعة مشوهة منظر جسمها جنت اتأمل من تكبر تخف الوحمة وتبدي تصغر مساحتها
بس اشو هاي البقعة صارت تكبر وتمدد وية نمو جسمها صرت يوم عن يوم اشيل هم هاي البنية
خطية بنية وين تنطي وجها
خلصت خياطة الصدرية

.. يوم ضحاوي تعالي بالله شو لبسي الصدرية
هاي هية خيطتها الج وعدلت الاكتاف
اتعشينا اني والبنات بعدما انتظرنا اثير بس ماكو ما اجة
عدت الساعات وصارت الساعة ب١٢ واثير ما بين
محتارة هذا وين صار
ظليت كاعدة سهرانة انتظره جانت شيماء كاعدة تنتظره وياي متحب تتركني لوحدي
.. كومي ماما شومة روحي نامي انتي باجر وراج دوام صبحي هم يالله تنامين
شيماء.. يعز علية اخليج لوحدج تنتظرين
.. روحي ماما نامي اني اتعودت عالسهر من ورة ابوج وصدك بأثناء الكلام جان يندك الباب طلعت واني خايفة سألت من ورة الباب منو سمعت صوت اثير ثكيل كوة يطلع منه ويجر بالحجي جر
لطمت على صدري وفتحتله الباب
ودخل اثير يتطوطح كدامي
لطمت على صدري بجزع
.. ها اثير رجعت لشرب السم من جديد
لك وتالي وياك زين انت مو كلت تبت وبعد ما تقرب للشرب
اي صدك تعال كلي منينلك فلوس حتى كعدت تشرب
صاح بصوت عالي بوجهي ودفعني وفات دخل للغرفة
وكال وهو يمشي من كدامي
.. اخذت من الفلوس الي ضامتهم عني ما ادري بيج بنت كلب وتضمين علية الفلوس وانا اسألج تكولين ماعندي الله سلطني ..... عليهن اليوم..... واحذتهم منج حتى توبين وتبطلين تضمين من وراي
جان يحجي بلسان ثكيل ويترنح كدامي وراح للغرفة
ضربت حلكي من الشوطة
.. عزة العزاني صخام هذا ماخذ فلوس السلفة الي جنت مجمعتها حتى انطيها لنهاية الشهر شلون مصيبة هاي ياربي منين اتلكاهة
باوعت على شيماء تبجي
ادري بيها صعبة على البنية تشوف ابوها بهيج منظر
بس شبيدي عليها
صرت ابجي من من القهر ما اعرف ربي شوكت يهدي هذا الرجال
رحت اخذت فراشي ونمت بغرفة البنات طول الليل واني اسمع صوت اثير وهو يتقيء بالحمام ما طلعتله ولا رحت يمه يطبه طوب يشرب السم وتعالي يا بثينة ابتلي بيه
كعدت يوم ثاني راسي صايرطبل من ورة التفكير
شفت البنات كاعدات قبلي ومحضرات نفسهن للدوام وهدى نايمة لان بعدها مامسجلة السنة الجاية تداوم بصف الاول طلعو البنات للدوام واني لبست عباتي ورحت على بيت ام رائد وقبلها كلت لأثير يدير باله على هدى جاوبني من جوة المخدة اي ان شاء الله ادير بالي عليها
طلعت واني ادردم كون تعرف الله صدك جان بطلت سوالفك المصخمة
ومثل كل مرة اروح لبيت ام رائد ابلش بغسل الكراج وبعدها ادخل للبيت جان ابو رائد موجود سلم علية وشغل سيارته وطلع

وام رائد نايمة والجهال راحو للمدرسة وية ابوهم بالسيارة اللهم لا حسد بس اتمنيت ولو واحد بالمية من حرص ابو رائد يكون عند اثير
خلصت وطلعت اللحم من الثلاجة بين ما تخلص تنظيف
يموع اللحم وابلش اطبخلهم غدة
الحياة غريبة جنت اتفنن بالطبخ لبيت ام رائد من مطبك دجاج من سمك مشوي من مرك بي لحم وكبب هذا كله اسوي الهم بيدي واتمنى لو احصل جزء منه لبناتي
بالعافية عليهم جانت مرات ام رائد تحن علية وتنطيني ماعون من الاكل الي اطبخه ومرات لا متنطيني تنسى او تلتهي عني واني استحي اطلب عزت نفسي ما تسمحلي اطالب بلساني
خلصت شغلي وكملت غداي وطفيت النار عن الجدور

وكعدت ام رائد من النوم متأخرة وحضرتلها الجاي
كعدت تتريك جنت اشتغل وبالي مشدوه وافكر بالفلوس مالت السلفة شلون راح ادبرهن على نهاية الشهر شكول عليك اثير والله صخمت وجهي
استأذنت من ام رائد اريد ارجع للبيت اطبخ غدا للبنات خاف يحلون من المدارس واريك هدى خطية هسة الكاهة كاعدة ميتة من الجوع
انطتني قبل لا اطلع علاكة بيها بامية كالت هاي البارحة بالليل جابو جماعة ابو رائد سلة متروسة بامية وكونية بطيخ انطتني بطيختين يصير حجمهم صغير اتشكرت منها واخذتهم وطلعت
رجعت للبيت وبعده العلة نايم وهدى كاعدة مهوسة البيت ولكتها واكفة منتظرتني ورة الباب
اول مدخلت صاحت .. ماما متت من الجوع شاكل
.. سودة علية يخسة الجوع هسة اسويلج ريوك
وصرت اطبخ واوكل بهدى شوية وحلو البنات من المدرسة دخلت شيماء ترزل بمروة ومروة تنافخ وتبجي
وضحى بس تباوع عليهن الظاهر متعرف شنو الموضوع

.. خير يمة مروة ليش تبجين
جاوبتني شيماء.. ماكو شي لتخافين عليها
جانت تحجي وتخزر بمروة
مروة..لا تباوعيلي هشكل ما اسكت
ماما انتي صدك تشتغلين خدامة عند بيت ابو رائد
.. اي ماما اشتغل عند بيت ام رائد ليش تسألين
اتذكر من بلشت اشتغل عند بيت ام رائد البنات ميعرفون بالموضوع بس شيماء تعرف وهي تساعدني من يشوفوني اطلع واروح لبيت ام رائد
البنات عبالهم اسير عليها لان هي جارتي وصديقتي مكان ببالهم انظف
هو مكان سر بس همة مسؤلوني وين اروح جنت اتوقع هنة بنات صغار وما ينتبهون لهيج امور
مروة بقهر.. يعني كلام ليلى صحيح
.. شكالت ليلى
.. ليلى اليوم عيرتني بالقميص الي لابسته وكالت هذا القميص مالتي قديم وماما انطته لامج
كلتلها .. لا هذا جديد ماما اشترته الي من السوك
ليلى.. هي امج منينلها فلوس حتى تشتريلج
.. ماما عندها فلوس وتكدر تشتريلي قميص
ضحكت علية كدام البنات وكالت
.. امج لو عندها فلوس جان ما اشتغلت عدنا خدامة
جانت مروة تحجي وتبجي بغيض
مروة الوحيدة من بناتي الي دائما تتشكى على العيشة
ودائما ترفض الرضوخ للوضع خصوصا من انتقلنا لهاي المنطقة
.. ماما مروة ترة الشغل مو عيب اهم شي الواحد يكسب ماله بالحلال ويعيش اهل بيته
.. اي صحيح الشغل مو عيب وصحيح الواحد لازم يعيش اهل بيته بس مو على حساب كرامتنا
ماما انتي ما تعرفين اني اليوم شنو صار بية كدام البنات

بعد ما اكدر ارفع راسي بينهم اني مروة الشاطرة المتميزة الي كل المدرسات يشهدون بشطارتي جنت
امشي بين البنات مفتخرة بس اليوم انتي كسرتيني
حجت الكلمة ودخلت للغرفة تبجي وتنوح كسرت كلبي

حرت شلون اسكتها
مرت الايام ومروة اعتكفت بغرفتها زعلانة من عندي
رحت طلعت للسوك القريب من بيتنا واشتريتلها قميص جديد حتى اراضيها كلت من ترجع اليوم من المدرسة انطي الهة
انتبهت من صفنتي على هدى دتفتح بباب الحوش صحت عليها
.. لج هدى سدي الباب ودخلي جوة لتطلعين
.. ما اغيد (اريد ) اطلع اشتغي (اشتري )
هدى عندها لدغة بحرف الراء ترتل
.. لج شنو تشترين كعدي انتظري خواتج يحلون من المدرسة واخلي ضحى تاخذج للدكان تشتريلج
.. ما.. ما. اغيد اشتغي هسة
طلعت وخلتني اصيح وراها كمت على حليي
واني ادردم عليها

باب الحوش ينفتح عالشارع كبل ما عدنا طارمة
مديت راسي اريد اشوفها وين راحت
شفتها دتركض وفجاء عثرت ووكعت بالكاع
كامت تبجي
.. اهوووو عفية عليها هدى شكد تعثر وتوكع
انتبهت لمرية جبيرة بالعمر جانت تمشي بالشارع
من شافت هدى وكعت اتوقفت عن المشي واتجهت
عليها وكومتها من الكاع وكعدت تنفض ملابسها من التراب ولزمت كف ايدها وكعدت تمسح بي من التراب

جان ظهر المرية علية سمعتها تحجي وية هدى وهي تمسح كف ايدها
.. خطية هاي البنية يامكثر العثرات بحياتها
سإلتها وين بيتكم
اشرتلها هدى وهي تبجي على بيتنا لزمتها من ايدها والتفتت
جمدت بمكاني متفاجئة حطيت ايدي على حلكي
ممصدكة اقتربت المرية ورفعت راسها تريد تحجي وياي ومن وكعت عينها علية اختفت ابتسامتها وعقدت حواجبها بسؤال مستنكرة
.. لاتكولين انتي بثينة بنت ام سامي

يتبع
احبكم كومة احبكم هواي
مو تنسون التصويت ♥️♥️♥️♥️♥️