أساور الفضة الفصل السادس 6 - بقلم نهى

#اساور_الفضة
#الكاتبة_نهى
مساء الحب والطيبة عليكم يااحبتي
اشكر متابعتكم وتصويتكم وتعليقاتكم الجميلة
التي ترفع من ابداع قلمي ليقدم المزيد
♥️♥️♥️♥️♥️♥️♥️♥️♥️♥️♥️♥️♥️

حيرة .. الم.. وندم .. ومن ثم الفراق

هدى
جنا نحجي وية مروة.. وشيماء دخلت للغرفة حتى تجيب الفلوس
بس سمعنا صرختها
ركضنا وشفنا شيماء فاتحة الكنتور وواكفة كدامه بعد مانثرت كولشي بي على الكاع
شيماء.. مروة لحكي الفلوس اختفت
مروة.. مستحيل انت شدتحجين لج شيماء وين راحت فلوسي

راحت للكنتور مثل المخبلة وصارت تشمر بالملابس وتعيط .. لا .. لا .. لا مستحيل وين فلوسي
طلعيهم اتذكري وين ضميتيهم احجي شيماء كولي
انتبهت على شيماء كامت تبجي شكلها تعرف منو ورة اختفاء الفلوس

انقهرت على مروة هذا تعب عمرها كضت كل حياتها تلم فلس على فلس وحرمت نفسها من كلشي علمود تحقق حلمها يالله شلون بيها شراح تسوي
احتمال تنهار وربي خفت عليها
مروة بقهر وغضب

.. شيماء انتي شكد غبية اكو وحدة تضم الفلوس هنا
ادري شكالتلج روحج وتحطيهم بهيج مكان تافه لج حتى الطفل يكدر يلكاه وياخذه
هدى.. مروة لتصيحين على شيماء فوك ما جمعتهم الج وضمتهم
مروة.. وشنو استفاديت اني هسة منو يكلي وين راحت فلوسي
ضحى .. حرامات كل ذاك تقتيرج .. شكد حرصتي عليهم

ادري بضحى حجتها بدون قصد بس مروة كانت بقمة الغضب من سمعتها حجت هشكل هدت عليها وضربتها راشدي على وجها وسحبتها من شعرها
بقيت جامدة بمكاني متفاجئة من حركة مروة
مروة.. احجي حيوانه ماكو غيرج اخذهم لان انتي جنتي دائما عينج عليهم ودائما تتمنين يكون عندج فلوس حتى تصرفيهم على سوالفج التعبانة
اجتي شيماء ووخرتها عن ضحى

.. مروة لهنا وحدج ما اسمحلج تتهمين ضحى شكلج نسيتي احنا تربية منو خلي اذكرج اذا ناسية ترة احنا بنات بثينة وتربية امنا ما ندنسها لو على كص ركبتنا ضحى كامت تبجي ولازمة خدها
مروة كعدت منهارة بالكاع وحطت ايدها على وجهه وصارت تبجي مثل الطفل

.. ولكم اني اتدمرت وحلم عمري انسرق
والله اموت اذا ما تحقق حلم عمري عشت طول حياتي حارمة نفسي من كلشي اشوف البنات يطلعون ويلبسوو ويتونسون الا اني اكول ميخالف مروة صبري كل هذا لاحكة عليه اهم شي حطي الاساس وحققي الحلم
وتالي شنو بهفوة من اختي المصون نزلتني لسابع ارض

ورجعت تبجي منهارة
دخل بابا يباوع علينا وجان مبين علينا متعاركات
اثير.. خير شصاير شبيكم وجوهكم مكلبة
هدى.. بابا فلوس مغوة جانت بكنتوغ شيماء مجمعتهم
هسة اجتي تاخذهم وما لكتهم مختفين
اثير.. وهسة انتوا مسوين هاي الهوسة كلها علمود الفلوس

هدى .. اي بابا هنة فلوس هواي مو شوية وخطية مغوة
تغيد تدخل شغاكة وية صديقتها حتى يشتعون عيادة سوية ويجهزونها
اثير.. وشنو يعني كضت طول عمرها مروة تبجي بوجه الله ما محصلين منها اي شي وعلى العموم ترة الفلوس الي تحجون عنها اني احتاجيتهم واخذتهم
مروة كامت بغضب احس بيها انجنت عبالك تريد تاكل بابا بسنونها

مروة.. قصدك سرقتهم مو اخذتهم اكو هواي فرق
بين السرقة والاخذ
السرقة تمد ايدك على فلوس مو الك ومتعبان بيهم ومن دون مايسمحلك صاحبها
والاخذ تكدر تاخذ فلوسك بأي لحظة وكدام الكل

ما حسينا الا على بابا هد على مروة وراح نازل عليها دك ردنا اني وشيماء وضحى نفك مروة من جوة ايده ما كدرنا جنزها تجنز صرت اعيط من الخوف اختي راح تفطس جوة ايده
جان كلما يضرب مروة
هي تعيط وتصيح بصوت عالي مقهورة
.. انت اكبر حرررااااامي ومجرم اريد الله ياخذ حوبتي منك يا ظالم
اجيت اتخبل جان يضربها بوحشية وخلة الدم ينزل من خشمها انمرد كلبي عليها

شيماء.. بابا ابوس ايدك كافي دمرتها كااااافي لخاطر الله كافي
.. بنت الفكر تكول علية حرامي وبواك
لج والله حلكج اشكه و ادفنج وما يرفلي جفن
مو شفتي روحج كبرتي وصرتي دكتورة تتجاوزين
اي الفلوس الي بكنتور شيماء اني اخذتهم وادري بيهم فلوسج كضيت كل عمري اصرف عليج وانتي تقبضين بالرواتب وتضمين اسألج وين متجاوبين لو تغلسين علية خليتج براحتج تلعبين بس مو انا الي وحدة مثلج بكد القندرة تضحك علية وتتهرب مني وهذا انا اخذت تعب عمري منج يالله امشي ولي
مروة جاوبته بس كوة تحجي

.. كون متتهنى بيهم كون زقوم بكلبك
جانت تحجي وتشهك بحركة كلب
رجع هد عليها .. لج انتي ما راح تسكتين الا من اموتج كاعده تدعين علية
يمة شفته شلون شالهة وضربها بالكاع
وهي مثل الخركة بيده متشيل لا ايد ولا رجل
شمرها بالكاع وانضرب راسها بحافة الدرج
والدم غرك الكاع

صرت اصرخ مفزوعة من المنظر مروة امددة بالكاع غركانة بالدم وما يصدر منها اي نفس
شيماء ظلت تلطم على وجهها مثل المخبلة
.. يمة اختي ..يمة اختي ماتت
ضحى طلعت تركض بالشارع تصرخ

منعرف شصار بينا بذيج اللحظة بس حسيت مثل الي داخل بدوامة التموا علينا الناس وصار بيتنا هوسة ناس طابة وناس طالعة دخلت علينا خالة ام فرزدق
تولول وام رائد ورائد وصهيب اتعاونوا وشالوا مروة
لحظات واجتي الشرطة واخذوا بابا منعرف ليش
وعمو امجد وبيبي اجوي ورانا للمستشفى
هذا كلة يصير كدام عيني مثل شريط الفديوا عبالك اني متفرج بس اباوع بعيوني مصدومة جامدة ما احرك ساكن يمشوني ويكعدوني عبالك جثة بلا روح
ما اتجرء احجي كلمة اخاف انهار ما اكدر انطق بحرف

واكول مروة وين شيماء تركض منا وتجي منا مثل المخبلة الدم ملطخ ملابسها
اتمنيت اروح انام واحط راسي جوة الغطى واروح احلم انام بحضن امي
ونرجع بنات صغار وامنا يمنا وكلشي امن بحياتنا
ونرجع نتجمع احنا الاربعة مثل قبل تحت جناح امي

حسيت على حركة يمي وواحد يهز بية حسيت بشفايفي كامت ترجف وسنوني اصطكت واتبعها جسمي صار كله يرجف سمعت صوت اجاني من بعيد
اي هذا صوت رائد يطلب مني اتماسك
زين ليش اصلا ابقى متماسكة وعلى شنو اتماسك
والمن اذا علمود حياتي فا اني متنازلة عنها
حياة وبيها هيج دمار ما اريدها متنازلة عنها ما اريد اكمل بيها غمضت عيوني ورحبت بالرجفة الي هزت جسمي كله ووصلت لحد عضامي
حسيت بيدين اثنين قويات لزمتني من كتفي وصارت تهزني
سمعت رائد يصيح بصوت عالي
.. شيماء لحكي هاي هدى ما اعرف شبيها
شيماء.. دخيلك ربي اختي شبيها سودة بوجهي خواتي اتفرهدن وراح يروحن من بين ايدية
صاحوا الدكتور وكال

.. بسرعة نقلوها المريضة
اتعرضت لانهيار عصبي ضروري انطيها ابر مهدئة شكلها متعرضة لصدمة
بعدها ما حسيت على اي شي
.........
حسيت على ايد دافية تمسح على راسي وتقرة عليها
فتحت عيني شفت ضحى كاعدة يم السرير وحاط راحة ايدها على كصتي
.. ها شلون صرتي
حجيت بوهن .. ضحى كليلي مغوة عايشة
كوة طلع مني الكلام
ضحى .. الحمدلله مروة بخير وطلعت من مرحلة الخطر

عندها كسر بواحد من ظلوعها وراسها مشكوك خيطوه الها والدكاترة
كالوا خلال اربعة وعشرين ساعة اذا ما استردت الوعي احتمال تدخل بغيبوبة
واحنا هسة منتظرين مرت عليها ست ساعات
هدى.. حيل اني جنت نايمة هذا الوقت كله
ضحى .. اي الدكتور انطاج ابر مهدئة
.. سودة علية مغوة متستاهل
دخل رائد للغرفة وبيده اكل
.. ها الحمدلله على سلامتج خوفتينا شبيج جبانة
.. الله يسلمك
مد العلاكة لضحى.. هاج لزمي اخذي العشا اكلوا شوية وضروري تخلين هدى تاكل لان وراها علاج تاخذه

هدى.. لا ما اشتهي اكل
اقترب مني رائد وحجة بصوت كله حنية قشعر جسمي
جنت شكد محتاجة واحد يعاملني بحنية ويهتم بية
خاف جنت بس احب رائد هسة صرت اموت عليه
من لمست اهتمامه وخوفه علية
رائد.. لا تخليني اجي اوكلج بيدي بالقوة
ضحى.. ما عليك بيها هاي تتدلع اني اوكلها
يالله كومي اكلي

ساعدتني حتى اكعد واخذت اللفة وصرت اكل بدون نفس بس لخاطر رائد اكلت وحتى يطلعوني منا اريد اعرف خواتي شنو صفة بيهم الدهر
كملت اكلي واخذت العلاج واجتي الممرضة وجيكت ضغطي
الممرضة.. ضغطج تمام منو بيكم اخت شيماء
ضحى.. اثنينا خوات شيماء
الممرضة .. يا هلا وميت هلا بيكم طبعا شيماء جانت
دائما تسولف بيكم جنت اتمنى اشوفكم
اشرت على ضحى

.. انتي اكيد ضحى
ابتسمتلها ضحى.. نعم اني ضحى
والتفتت علية.. وانتي اكيد الجنية هدى
.. نعم اني الجنية
عرفتكم من خلال وصف شيماء الكم
اني صديقتها اسمي رباب
.. اهلا وسهلا اتشرفنا بيج
افتهمت منها ان احنا هسة حاليا بنفس المستشفى الي تشتغل بيها شيماء ممرضة
يا الله اشكد صعبة علي شيماء صار الكل يعرف بموضوع بابا ومروة
بعد مرور اربعة ايام مروة استردت الوعي وكدرت تحجي الي صار للشرطة وقدمة بلاغ ضد بابا واتهمته
بالتهجم والتعدي وسرقة فلوسها
والشرطة طلبوا شهادتنا
وفعلا رحنا وكعدوا يحققون ويانة
لكن قبل لا نروح

عمو امجد وبيبي كانوا موجودين وكعدوا ويانا حذرونا اني وخواتي ان ما نشهد ضد بابا ونكول بالتحقيق ان مروة وكعت من الدرج وماكو شي اسمه فلوس مختفية
شيماء اعترضت بوقتها وكالت
.. حرام عليكم شلون تردونا نشهد زور وهو صدك اجرم بيها ووصلها للموت وسرق فلوسها
ام اثير.. شوفي ولج اذا ابوج دخل للسجن قسماً بذات الله

اشمركم بالشارع واقدم بيجن تبرءة بالعشيرة واكول هذني البنات الي اتبلوا على ابوهم وسجنوه
مو عبالكم من يدخل ابني للسجن اني ابقى اباوع عليكم لا والله ما اتردد لحظة وحدة كبل اطردكم من البيت

الي انتوا كاعدين بي وشوفوا بالله منو الي يلفيكم
وخلي الناس والكلاب السايبة تنهش بلحمكم
امجد.. يمة عليمن هالحجي الزايد هذني خليهن علية حلهن يمي
التفت علينا وطلع مسدسه ورفعه كدامنا وحجة بتوعد
قسما بذات الله شايفات هذا جان يقصد عالمسدس
.. خلي اسمع وحدة بيجن شاهدة ضد ابوها
والله العظيم كبل احط طلقة براسها واذبها بالبلوعة وخلي وحدة بيجن تطلعلي وتطالب بدمها كبل تلحكها

وهنا صرنا امام خيارين
اما ان نشهد ضد بابا او نخذل مروة
وكفنا امام الموضوع بعجز
ضحى بقهر .. والله حرام عليكم انتوا شنو من بشر
هسة صرتوا عائلة وحدة وكلب واحد وكلبتوا علينا
التفتت على بيبي وكملت
.. تردين تطلعين ابنج من السجن على حساب اختنا
حقج انتي مشفتي هو شسوة بمروة بيبي ترة بابا حرام يطلع من السجن هو اجرم بمروة وصلها للموت

ما حسينا الا على عمو امجد هد على ضحى ضربها راشدي انطبع على خدها مثل الختم
وزمخ بيها .. اشش ولا كلمة ادبسز اشك حلكج اذا بعد عدتيها وعليتي صوتج على امي اي شنو حضرتج ترديني اتفرج عليكم شلون تدخلون اخوي للسجن

واكعد واسكت هذا عشم ابليس بالجنة
لا عبالكم ما اعرف انتوا متفقات على اخوي حتى تاخذون راحتكم باللعب والسفر مثل الست مروة والدياحة وتصيرون مالكم رداد
دفع ضحى على شيماء
.. اذا تحبين خواتج كليلهم يسمعون كلامي ويطبقونه بالحرف الواحد حتى ما اهدر دمهن
وهنا وكفنا عاجزات عن الكلام منعرف شنكول
ومن بعدها اتحولت حيرتنا من بعد التهديد الى خوف

وانسحب من عدنا الخيار وجبرونا بالتهديد
ان نكذب ونشهد زور ضد اختنا
اخذنا عمو للمركز ودخلونا على الضابط المسؤل عن التحقيقات والي افتهمنا من عمي امجد منطي فلوس حتى يسد القضية وشفنا مروة كاعدة على كرسي متحرك

وايدها مجبسة وراسها مضمد كله شاش ابيض وايدها معلكة على رقبتها بحامل يد وجهه متروس كدمات لونهم ازرق على بنفسجي
جان منظرها يكسر الكلب هي اليوم طلعوها من المستشفى وطول هاي الايام جانت شيماء يمها وتخدمها وتساعدها بكلشي
واني وضحى رجعنا للبيت ومحد قبل نوصل للمستشفى
خصوصاً من بعد ما مروة قدمت البلاغ
والشخص الوحيد الي بقى متواصل وياها هي شيماء وجنا نتطمن عليها من خلال شيماء يمكن لوما شيماء ممرضة بنفس المستشفى الي بيها مروة جان هم ما خلوها تروح تشوف مروة
....

الضابط .. اتفضلوا كعدوا استريحوا
كعدنا مقابيل مروة جانت بعيونها نظرة كلها ثقة
ومسيطرة بس شافتنة ابتسمت بأمل
وكالت.. سيدي تكدر تتفضل وتسأل خواتي عن الي صار وهمة راح يحجولك كلشي
غمضت عيوني بقهر كانت اصعب لحظة بحياتي مريت بيها وعمري ما راح انساها ولا راح تروح من بالي نظرات اختي مروة النا حرت شكللها
خية مروة خواتج هددوهم بالقتل وجبروهم يطعنوج بظهرج واحنا اذا كلنا الصحيح او لا القضية راح تتلفلف لان الضابط مرتشي
صرنا وحدة تباوع للثانية شيماء عيونها تحجي
ضحى كان خدها الاحمر شاهد وخير دليل وانذار يذكرنا بمصيرنا

الضابط.. منو بيكم شيماء
شيماء بتردد .. نعم اني شيماء
وكعد الضابط يحقق وية شيماء واخذ اقوالها
لكن من وصل للشهادة بموضوع بابا
شيماء نكرت وكالت احنا منعرف دخلنا البيت لكيناها واكعة من الدرج
هنا سمعنا صرخة مروة المفجوعة
مروة بعدم تصديق.. لج شيماء شتدتحجين
الضابط .. رجاءاً دكتورة التزمي الهدوء بلا كلام خليني اكمل التحقيق
مروة المغدورة.. شيماء ليش كذبتي شنطوج وسكتوج

احجي لج اني اختج نسيتي امي شلون امنتج علينا شلون تفرطين ب الامانة
جانت شيماء واكفة بلا حول ولا قوة بس تبجي بحركة كلب جانت متأكدة ان عمو امجد منتظرنا برة
وما راح يتردد لحظة وحدة بتنفيذ تهديده
وبعدها التفتت مروة لضحى بامل ان ما تخذلها هي الثانية

مروة.. عفية ضحى احجيلهم ماعليج بكلام شيماء كليلهم
شسوة بية بابا ومنو سرق فلوسي
ضحى رفعت ايدها ولمست خدها تتحسس عليه وكأنما
تتذكر الوعيد دنكت راسها وكالت مثل شيماء
.. بابا مضرب مروة هي وكعت من الدرج واحنا منعرف شنو الفلوس الي تكول عليها
صرخت مروة بجزع .. حسبي الله عليكم ونعم الوكيل
من وصلني السرة صرت كلي ارجف حسيت بالرجفة رجعتلي ما كدرت اشوف الالم بعيون مروة واسكت صعبة ياناس هاي اختي

حجيت واني ابجي منهارة وارجف وصار جسمي كله ينتفض بصورة غريبة
.. سيدي مروة ما وكعت .. بابا ..كانت الكلمات تطلع متقطعه
قاطعني صوت شيماء المفزوع
.. سيدي رجاءاً غير مسموح بأخذ اقوال اختي الصغيرة هدى لان هي غير مسؤولة عن كلامها حالياً اختي عندها انهيار عصبي وضروري تاخذ ابرة المهدئ

فعلا كنت بوقتها كلي ارجف وانتفض واسناني اصطكت احس بروحي اتشنجت اريد بس اكمل كلامي واوصل صوتي ما كدرت حضنتي شيماء ووكفتني
الضابط .. خلاص ميحتاج راح اكتفي بس بأخذ اقوالج واقوال اختج الثانية ضحى
مروة انهارت من القهر وصارت تحجي مثل الفاقدة
.. شيماء انتي اكبر غبية شفتها بحياتي وبغبائج ضيعتيني وذبحتي حلمي مثلما ضيعتي
احلامج قبلها اني شجاني وامنت حلمي بيد وحدة بايعة احلامها وماكدرت تحتويهم وضيعتهم من زمان ودفنت روحها بالحياة

باوعت علينا كلنا .. انتوا اليوم ذبحتوا مروة قتلتوها بيدكم انسوا من هاي اللحظة بعد عندكم اخت اسمها مروة
انتو اشتريتو ابوكم العار بفلوسي وبعتوني واني من هاي اللحظه بعتكم بس اني بعتكم بغالي مو برخيص بعتكم بتعب ايام وسنين واشتريت نفسي منكم بعد مااريد اعرفكم ولااشوفكم ولتحاولون بيوم تتصلون بية لان ميشرفني اعرفكم
جان موقف كلش صعب ما تتمناها لعدوك
ومن يومها مروة بعد ما شفناها صدك طلعت من حياتنا

وبابا طلع من السجن وجهه ما يتفسر وشيماء وضحى واني كمنا منحجي وياه على كد تلبية طلباته كمنا بعد
ما نسأله وين طالع او ليش رجعت متأخر صار مثل الخطار يطب ويطلع للبيت بدون مواعيد واحياناً تجيه ايام يطول يومين ما يرجع للبيت اتعلمنا على اهماله وعدم وجوده بحياتنا
لكن الشي الي ما متعودة عليه هو ابتعاد خواتي عني

كل وحدة بينا ابتعدت عن الثانية وكأنما يعاقبون نفسهم عالصار بمروة خصوصاً شيماء
كلش اتغيرت وزاد برودها
احس بيها صارت بعيدة عنا واتقوقعت على نفسها
وضحى زاد هدوئها وزاد اهمالها لدراستها
وصارت روحها هناك معلكة عند بيت خالة ام فرزدق كل يوم تروح الهم
وظليت اني الوحيدة اتخبط بجدران الوحدة
خايفة احس بروحي عايشة لوحدي بهاي الدنيا
لجئت بهاي الفترة لصديقتي فاطمة
بنية كلش حبابة الله خلاهة بطريقي مثل الرحمة جان كلشي يصير وياي احجي لفاطمة وهي بالمقابل جانت تصبر علية

وكمت كل يوم اروح وياها لبيتهم ندرس سوية
جنت من ادخل لبيتهم واشوف عائلتها
جانت امها حبابة وتستقبلنا بحنان
عندها اخوان ثنين واحد متزوج وعازل عنهم والثاني خاطب ويداوم بالكلية وابوها رجل كلش مثقف استاذ جامعي
مرات هو يدرسنا

من اشوف علاقتهم الحلوة مع بعض
واشوف مدى الاحترام المتبادل بين فاطمة واخوانها وابوها وامها احس تخنكني العبرة ربي يديم لمتهم ويحفظهم من كل سوء
اتمنيت بيني وبين نفسي ان يكون الي مكان بينهم واصير وحدة من عائلتهم
امها جانت تعرف بقصتي اني وخواتي وتدري بية
دا امر بمرحلة صعبة ونفسيتي زفت ومحد يسأل عني ولا احد يعرف الله وين خالقني يعني وصلت بيهم المواصيل حتى من اتأخر

عند بيت فاطمة محد يدري بية ميحسون على غيابي وتأخيري
وشيماء صارت تاخذ خفارات بالمستشفى احس بيها تتهرب من البيت متريد تواجه حياتها
واني جنت متعودة انام بحضن شيماء صرت كل يوم بالليل من انام احلم بكوابيس حتى كمت اخاف انام
فاطمة حجت لأمها عن الكوابيس وخوفي من النوم
ام فاطمة ابتسمت حتى تطمني وسألتني
.. ماما هدى انتي تصلين ؟؟

سؤالها كلش غريب علية اي اني ما اتذكر ولا مرة صليت ولا بيوم وحدة من خواتي صاحتني للصلاة او حتى كلفوا نفسهم يعلموني اصلا همة نفسهم ميصلون
جاوبتها بخجل
.. لا خالة اني ما اصلي
ام فاطمة.. شوفي خالة الصلاة علاج الروح والمهديء
للاعصاب والاطمنان للنفس

يعني جربي تبدين بالصلاة كل يوم وشوفي نفسج
شلون راح ترتاحين وشوفي حتى الكوابيس الي تجيج كل يوم قبل النوم راح تختفي نهائياً
سألتها بتردد.. خالة اني ما اعرف اصلي يعني
عندي كم معلومة عن الصلاة علمتنا عليها ام الاسلامية بالابتدائية بس ما اتذكغ بالضبط شلون
ام فاطمة .. كومي حبيبتي خلي بالاول اعلمج الوضوء وبعدها اعلمج الصلاة وفعلا بيومها كعدت ام فاطمة

تعلمني الصلاة وصدك من صليت
حسيت بصدري انشرح واكو شي ثكيل جان على كلبي وانزاح
ام فاطمة.. خلي اعلمج على شغلة لا تتركين صلاتج
لو مهما صار لان اوقات الصلاة هي اللحظات الي تلتقين بيها مع رب العباد اتخيلي هاي اللحظات شكد ثمينة تتقربين بيها من الله وهاي يسموها علاقة العبد بربه تكون النفس راضية مرضية ..يعني التزامج بالصلاة معناها انتي متمسكة بالله
ومن عهدها صرت كل يوم اصلي وما افوت فرض
جنت من اشوف بابا يرجع للبيت سكران حيل اتضايق

ومن يطلع يوم ثاني كبل اغسل البيت كله للطهارة من الطول للطول
وحتى خواتي انتبهوا علية ولاحظوا التغيير
فاطمة.. اكول هدى سؤال انتي شعجب متلبسين حجاب
هدى.. ما اعغف بعدني ما مقتنعة البس الحجاب احس غوحي ممستعدة
فاطمة.. بس عيب متلبسين حجاب
ام فاطمة جاوبتها .. ما بيها عيب وانما لبس الحجاب يكون التزام المراءة مع ذاتها لكن اهم شي من تريد تلبس الحجاب تكون عن قناعة حتى تحافظ عليه

لان لا اكراه بالدين وهي شوكت متشوف نفسها مستعدة تلبسه راح تلبسه وخلي ببالج ترة الحجاب مو حكم على شخصية المرة يعني اني اعرف هواي محجبات ما ملتزمات لا بصلاتهم ولا يعرفون الحلال والحرام عندهم الحجاب هيج شكل امام المجتمع
فلتحكمين عالكتاب من عنوانه
اتعودت على ام فاطمة و كلما اشوفها ارتاح نفسياً واحس بالامان والحنان اهتمامها بية يسعدني ويحسسني بالقرب منهم صرت حتى اكره ارجع لبيتنا

دنمر بفترة امتحانات اخير السنة
وجنا راجعين من المدرسة ودنمشي بالطريق اني وضحى
وست ضحى خلصت السنة يوم تداوم وعشرة غايبة ما اعرف شلون راح تنجح
مرت من يمنا سيارة رائد جان وياه بنات خاله واخته ليلى باوع علينا وما سلم صدك انقهرت من تصرفه

هذا شبي حتى مكلف روحه يسلم علية
ولا كام يسأل عني مثل قبل من يوم موقف مروة لليوم ماشفته دنكت مقهورة ياربي هسة اني شبية حاركة كلبي على شخص اني اخر اهتماماته هو اصلا ما وعدني بشي ولا لمحلي بالحب اني من يمي كعدت اخمن واتخيل اشياء ما موجودة دنكت وكملت طريقي وضحى تمشي سرحانة بغير عالم عدت من يمنا سيارة حديثة عالية نوع برادو بطئت من سيرها التفتت اشوفه منو
اتعودنا على هاي الحركات مال الزحف
والتحرش اني عني ما اهتم بس جنت اخاف على ضحى لان كلش حلوة وتلفت الانتباه واخاف يأذونها
خصوصاً احنا دنمر بفترة خطف وقتل صاير عدنا بفلس وكم مرة نسمع ببنية بمدرستنا انخطفت او انقتلت

وهذا الشي شكل نوع ثاني من الخوف عندي
شفت رجال يجي عمره بالثلاثين مملوح نزل الجامة وكص ضحى من فوك ليجوة بعيونه اكلها اكل بنظراته
وضحى دتمشي وبالها مو يمه اصلا شايلة جنطتها
وعيونها تباوع ليكدام ضحى صحيح اكثر وحدة بينا عاطفية تتأثر بسرعة بالكلام المعسول وتحب تتأنق وتلبس وتكشخ وتهتم بروحها وعندها ولع بالمسلسلات ودائما تكول شوكت نعيش ونضوك طعم الحب الي يسمعها يكول عليها هاي مو راحة البنية

لكن هي بالمقابل متحب سوالف العلاقات والكبل مثل بقية صديقاتها وسوالفهن الي تسد النفس
جنا اني وخواتي نشترك بخصلة وحدة وهي احنا تربية بثينة مستحيل ندنس اسم امي
التفتت على الرجال وخزرته لان كام يذب كلام
هدى.. خيغ سالمين شيل عيونك لا اجي اعميهم الك بالحذاء جنت ااشر على حذائي المكطع
.. خير وانتي منو يمج لو احترك كلبج لان مداتحارش بيج
لان قزمة

.. احمد الله واشكغه اني قزمة حتى ما يجي قغد مثلك يتسلق عالشجغ
.. انا الج هذا السانج المكروط الا اكصه هاي ترتلين وهالطولة
لزمتني ضحى خايفة تترجى بية وتباوع منا ومنا خايفة
لان وحدنا بالشارع دنمشي
ضحى بصوت ناصي.. عفية هدى كافي مالج غرض بي عوفي خلي نمشي بطريقنا
باوع لضحى وحجة

.. صدقة لربها دسمعينا صوتج خلي رحمة الله تنزل علينا
خزرته وجرتني ومشينا وهو مبطل يحرك سيارته بطيء ويوازي مشيتنا وكام يشمر بالحجي
ما اتحملت
حسبتها بعقلي احنا بعد فرع عن بيتنا يعني ميكدر يسويلنا شي واحنا بمنطقتنا صرت سباعية
رحت لزمت طابوكة وكلتله
.. انت زلمة انزل من السياغة وخلي اغاويك الامهات شتجيب

اتسعت عيونه وراد يفتح باب السيارة بس قاطعنا
صوت هورن سيارة وسمعنا باب السيارة انفتح ونزل واحد من السيارة التفتت اباوع منو شفته صهيب
ووياه خالة ام فرزدق صاعدة كدام تباوع علينا بخوف
جنت واكفة ولازمة الطابوكة بوضعية الاستعداد للرمي
شكلي اني والطابوك والحجار قصة لا تنتهي
صهيب اقترب وحجة بصوت خشن ووجه كلامه للولد

.. خير ابو الشباب مضيع شي
.. وانت منو حضرتك
ضحى حجت بخوف
.. صهيب عفية عوفة ماعليك بي
.. لا بالله شو خلي اعرف هذا شعنده واكف يمكم
جان يحجي وهو يتوجه على سيارت الولد
وذاك دك جرس عنده احنا نعود لصهيب
كبل حرك سيارته وشخطها وانطلق من يمنا ما شفنا بس غبار السيارة بالشارع
صهيب بعصبية بالله شو امشو كدامي ركبوا بالسيارة

جان يحجي ويباوع لضحى الي جانت ترجف من الي صار هي بهيج مواقف تظل بس ترجف خوافة
باوع عليها
.. كافي لتخافين وداعتج اخذت رقم سيارته وراح اطلعه من جوة الكاع واطين عيشته
.. لا عفية صهيب خلي يولي خاف يأذيك

صهيب .. فداج صهيب وعشيرته
لك اخ يابة لج تخافين علية
جان يحجي وعيونه بيهن نظرة عاشك
ابتسمت ودنكت خجلانة .. اي طبعا اخاف عليك شعندي غيرك
هذا الحجي اني واكفة بيناتهم اباوع عليهم وراسي يتحرك منا ومنا جني بندول الساعة حسيت بروحي حديقة
همة كاعدين واحد يتغزل بالثاني بكلام الحب
وانااااا اعيط ( بصوت عادل امام)
كعدت احم حم

.. اكول يا جماعة الخيغ اشو جنكم نسيتوني تغة اني
واكفة يمكم مو طغطوغ يالله شو انتي اتحغكي كدامي
وانت استاذ صهيب غوح لخالة ام فغزدق صاغلهة ساعة تأشغ عليك ما بيها حيل تنزل من السياغة من وغة غكبتها وتغيد تعغف شصاغ
ضحك على كلامي

.. يالله اتحركي جنية السانج اطول منج خلي اوصلكم للبيت بطريقي
صعدنا ورة بالسيارة وانتبهت لصهيب شلون عدل
المرايا ههههه هلة هلة كلك حركات ياعمي
وضحى مدنكة راسها مستحية
ام فرزدق بعد ما سألت صهيب عن الصار وهو فهمها وهي كامت توصي بينا وتحذرنا
وبعدين انتقلت تسألنا عن الامتحانات
هدى.. والله خالة اني الحمد لله مجاوبة بس عندج
ست ضحى كلش كسولي
حسيت بضربة كوع اجتي على خاصرتي وهمست

.. اني الج عوبة
ام فرزدق.. يا ليش خالة ضحاوي
ضحى.. لا خالة هدى تتشاقة وياج اني دا ادرس هاي الايام
هدى.. خالة تجذب عليج والله الاخت صايغة سايق مخدة بس نوم ما تشوفيها صايغة جنها تفاحة هذا كله من وغة النوم
انتبهت لضحى تكرص بية وحاصرتها البجية
ههههه فد اتونس من اكعد العب بأعصاب واحد
واتفنن بحرك الافلام وهسة خطية شكلي حركت فلمها
الله يرحمني

صهيب.. هاي شنو ضحى ما اتوقعتج مهملة بدارستج
سمعيني زين منا ورايح اريدج تهتمين لدروسج
وتاخذين شهادتج اريد كون اسافر وارجع
الكاج ناجحة من السادس بمعدل عالي وداخلة كلية زينة غمزلها
بالمرايا
اريد افتخر بيج كدام اهلي
اقصد نريد نفرح بيج وبنجاحج
ابتسمت ودنكت وصلنا للبيت

.. سلمولي على شومة وخليها تمر علية من تفرغ
ضحى.. ان شاء الله خالة
دخلنا للبيت بعدني ما طبيت وضحى الهادئة شنت علية الغارة الجوية صدك لو كالوا الهدوء الذي يسبق العاصفة

ما ظل نعال بالبيت اذا ما طار بالجو متوجه نحو معسكر هدى واني لازمة المخدة وحاطتها درع كدامي
اركض منا واجي منا مثل القرد
وخربانة ضحك عليها جان ووجها احمر من الفشلة
دخلت شيماء وجانت ستوها راجعة من المستشفى
باوعت عليها جانت عيونها حمر شمرت المخدة من ايدي واشرت لضحى حتى تسكت وحركت عيني على شيماء وهي انتبهت عليها وشمرت النعال من ايدها

رحت يمها اريد اشوف اختي شبيها ما عاجبني وضعها هاي الايام
هدى بصوت هاديء
.. شيماء شبيج ليش تبجين
جانت شيماء تتحرك بالمطبخ وطلعت جدر المرك
من الثلاجة وحطته عالنار تريد تحميه
شيماء بصرامة.، ما بية شي جهزي السفرة بين ما ابدل
ملابسي ونتغدة
.. صاغ

درت على ضحى.. كملي جهزي السفرة واني رايحة اشوف شبيها اختج
ضحى.. اوك بس مو تنسين تكليلي من شنو تبجي
.. ميخالف

رحت وراها ودخلت للغرفة لكيتها مطلعة سوارت امي الفضة وحاضنتهم وتبجي صدك كسرت كلبي عرف اختي شومة من يوم مروة طلعت من حياتنا وهي مو على بعضها
لزمتها من كتفها وسألتها .. شومة شبيج
رفعت راسها وباوعت علية
وانهارت بالبجي وشمرت روحها بحضني
لميتها بحضني وصرت امسح على ضهرها اريد اطمنها بس ما اعرف على شنو اطمنها
.. احجيلي شبيج ليش تبجين
.. هدى اريد اموت من القهر
.. اسم الله عليج ليش منو وياج
.. مروة اختي
.. اشبيها مغوة

.. لج هدى صارلي اسبوعين كل يوم امر على مروة بالمستشفى اريد اشوفها واحجي وياها
لج يطلعلي الفراش اكله روح كللها اختج شيماء تريد تحجي وياج بس شوية
يكلي دكتورة مروة تكول ما عندي اخت بهذا الاسم متقبل تشوفج رجاءاً بلا زحمة اتحركي طلعي منا اعرف انتي اختها بس هي متريد تشوفج واحنا مابيدنا شي عبد مامور... اتحركي لا اطلب الامن يجون يطلعونج منا بالقوة
لج كل يوم اروح وهي نفس الجواب
لج اليوم رحت كلولي مروة اتزوجت دكتور رافد وسافرت وياه ايفاد قدمت على دراسات عليا بالخارج

لج هدى اريد اموت من القهر هذا الدكتور اعرفه واحد ملعب وسمعته مو شي هي شلون سوت هيج وقبلت تتزوج بدون علمنا شلون انطاها كلبها
هدى.. اخاف متمكن ماديا وغاح يفتحلها عيادة وتعغفين بيها مغوة عندها تحقيق حلمها يجي بالمقدمة
شيماء.. لا مستحيل الدكتور مستواه المادي وسط مو كلش قوي لدرجة يفتحلها عيادة ويجهزها اني متأكدة منه ما يكدر يفتحلها عيادة وهذا المخبلني ليش سوت هشكل

جنا نحجي وسمعنا صوت صياح بابا وعمو امجد
شيماء كامت من مكانها مرتبكة ومسحت دموعها
.. روحي طلعي اني جاية وراج
طلعت وشفت بابا يكسر بالغراض ويكفر ويسب ويغلط وعمو امجد يكله هدي وخلي نفتهم منهم شصاير
اني لزمت كلبي بيدي وبكل ضني بابا عرف بزواج مروة وجاي معصب علينا
ضحى خايفة راحت جابت المكناسة وكعدت تلم بالكزاز

طلعت شيماء من الغرفة لابسة دشدادشة
.. شكو بابا شصاير ليش معصب
جنت لازمة كلبي بأيدي
كعد بابا ولزم راسه بثنين ايديه ودنك
امجد.. روحي جيبيله ماي خلي افتهم منه شصاير كضاها علية كلة صياح ما افتهمت منة شي
رحت جبيت كلاص الماي
وانطيته لبابا اخذها مني ما شربه كبل كلبه على راسه
فاير من الغضب

امجد.. هسة يالله احجيلنا شصاير
اثير يحجي ويرجف بغيظ
.. هذولي ولد اخوك الي عايشيين بالخارج طلعوا
بايعيين هذا المشتمل بدون ما نعرف اليوم اجاني واحد للشغل وطلب مني افرغ البيت
لطمت على حلكي مصدومة وشيماء شهكت وحطت ايدها على حلكها
وظلينا وحدة تباوع بوجه الثانية

يتبع
مو تنسون ⭐️⭐️⭐️⭐️⭐️التصويت
احبكم. كومة احبكم هواي اختكم نهى