أساور الفضة الفصل الثاني عشر 12 - بقلم نهى

مساء الورد والحب والطيبة
هلا بيكم
ويااااااااهلا بالخميس

#اساور_الفضة
#الكاتبة_نهى

هدى
دخلت عليهم وشفت ضحى دتبجي بحضن شيماء
وبيبي سليمة تحجي وياها
سليمة _ اثير احجيلك كلمة وية بنتك شبيك
ترة العريس الي جايها من كرايبي وخوش ناس رجال مايتعيب
اثير _ يمة منو هذولي كرايبج اشو انا الي اعرفهم كلهم

تعبانين ما لاكين عشا يتعشون مو نوب يتزوجون
_ شبيهم يمة كرايبي خوش ناس مستورين لاعندهم ابو سكير ولا عندهم بنية اتزوجت بدون علم اهلها
جانت تقصد تبسمر بابا

ضحى _حتى لو خوش ناس اني ما اريد اتزوج
_ على شنو ترفضين ياحظي اشو مدرسة وما فلحتي بيها وكاعدة بالبيت لا شغل ولا مشغلة كل خير ما بيج دخانج يعمي كاعدة بس تاكلين وتنامين
خلي نزوجج ونرتاح على الاقل يخف الحمل عن ابوج

اثير.. يمة منو هذولي كرايبج مكلتيلي ووين يعرفون ضحى
_ شنو السالفة يمة اثير تسوي روحك ما تعرفهم
هذولي بيت ابو سعد بيت عمتي راسقية
_ هاااا اي عرفتهم

_ اي يمة يردون يزوجون أبنهم حسين
وشافوا ضحى وياي ذاك اليوم من رحت للمضمد
والمرة اتخبلت عليها وكالت ما تنطونها لابني
اريد ازوجه وادورله على بنت الحلال
كلتلها كبعي واخذي وين نلكة احسن منكم

.. والله يمة ما اعرف شنو اكلج خلي اشوفهم
واسأل عنهم همة صحيح كرايبج بس انا ما ملتقي وياهم
.. من غير ما تسأل عنهم انا اكفلهم الك
انطي وعلى مسؤليتي

ضحى .. والله اموت روحي وما اتزوج
شنو بعدني صغيرة عالزواج
خطية جانت تحجي وتبجي
بابا كال .. هسة انتي على شنو تبجين سطرتي راسنا
ولج احنا بعدنا ما شفنا الناس ولا عرفنا عنهم
شي انتي كبل كلبتيها مناحة

كامت ضحى من يمهم وهي تدردم وتحجي بالغرفة راحت وراها
شيماء.. لتبجين ضحاوي ما عليج محد يكدر يجبرج
عالزواج اذا ما تردين تتزوجين
.. شلون محد يجبرني وهاي بيبي كاعدة تحش براس بابا اخاف تقنعه يزوجني
.. شنو وين كاعدين يزوجج غصب عنج
انتي بس لا تكعدين تبجين وخليها علية اني احجي وية بابا
...............

ورة يومين
احنا ظلينا بالبيت نصبح ونام على نفس الموضوع
وهو زواج ضحى او بالاحرى هو محد خابصنة
بسالفة الزواج الا سليمة
اكلت كلب ضحى علمود توافق على هذا كرايبها وبابا لحد الان ما معروف شنو موقفه

بس مرة شفت شيماء دتحجي وياه بخصوص ضحى
الي افتهمته ان شيماء تكول لبابا لا يضغط على ضحى كلشي بالاجبار الا الزواج هذا الشي خط احمر
بطلتها من المدرسة لان هي كسولي
وكلت حقك هذا هي ما اهتمت بدراستها

بس مال تجبرها عالزواج لا ما اوافقك عالقرار ولا راح
اكعد اراقبكم شلون تجبرونها عالزواج بساعتها لو اعرف يصير موتي على هالسالفة ما اخليكم تزوجنونها غصب عنها

_ لا من هسة تكعدن تستبقين الاحداث اني بعدني ما وافقت عالناس اريد اسأل عنهم هذا زواج مو لعبة
اريد اسأل عنهم واعرف شنو شغله وحالته المادية
ما بية حيل ازوجها لرجال تعبان وحافي منتف
وتالي تتطلك وترجع تكعد على كلبي
وتعال يا اثير ابتلي بيها

شيماء .. براحتك بس اني كلت انطيك خبر حتى لاتكول
شيماء ماكالت

طلعت من الدوام ولكيت سليمة مطلعة شغل البيت
كله غسل فراشات وبردات ومسوية حملة شاملة
وحاطته كله براس المكرودة ضحى
ادري بيها هاي خطة منها حتى تضغط على ضحى بالزواج تكرها عيشتها

_ ها ضحاوي الله يساعدج
_ هلا هدى عفية روحي بدلي
وتعالي ساعديني والله اكلت تبن بثنين ايدية
من ورة بيبيتج
.. انتظغيني (انتظريني )هسة ابدل واجي اساعدج

بدلت ورحت بلشت اشتغل وية ضحى ونسولف

.. والله زين بعدج مقاومة ما خنكتيها لسليمة خانم
والله حابني عندي دوام وملتهية بي
جان والله انفضحت فضيحة ابسط شي تلكيني
اني وسليمة كل يوم مسيرات على مركز الشرطة يفكونا ياضارب يامضروب

ضحى.. ههههه طبعا شي اكيد انتي الضاربة
انتي هدى تعليميني بيج
جنا نحجي ونغسل بالفراش بعدما خلصنا غسل الفراش
ضحى.. هدى عفية كملي غسل الطارمة انا افوت اكمل الغدة هسة شيماء على وصول
.. غوحي روحي )انا اكمل
اغسل بالطارمة مندمجة
وافكر ب رائد
اليوم اجاني بنهاية الدوام
بعد غياب يومين عني مشايفته
بس شافني بالطلعة كبل
اشرلي بعيونه عالمحل القريب عالمدرسة
افتهمت قصده
دخلت للمحل سويت نفسي اشتري ودخل رائد وراي
ياربي شكد مشتاقتله وبنفس الوكت زعلانة منه

رائد.. لج ما تدرين شكد مشتاق اسمع صوتج
احس الشوف ما يروي عطشي الج
.. اي مبين كلش مشتاقلي والدليل يومين ماكو متجي تشوفني الظاهغ (الظاهر) اكو من اخذ مكاني بكلبك
.. ليش هو اني اكدر احب من بعدج اشو كلبي من حبج صار اعمى وكام كلشي ميشوف بس انتي
.. صدك غائد تحبني

.. كلمة احبج اشوفها تافهة بحقج
لج انتي متعرفين هذا
ويأشر على كلبه
احس مخلوق بس الج
ابتسمت وعيوني لمعت انتبهت على فكه بي لون ازرك مخضر
.. غائد هاي شنو شبي وجهك منو ضاغبك (ضاربك)

.. اهووو لج سكتي صار بية فلم اولت البارحة
.. شنو شصاغ بيك
.. اولت البارحة جنت كاعد بالكوفي لوحدي انتظر جماعتي
وبعدين دخلو مجموعة ولد اعرفهم
وياي بالشغل واحد منهم اسمه حيدر هذا الولد
اني وياه مو على صلح وبينا اشكال
لدرجة وصلت بي كام يبسمرني ويهدد
لان مرة اتقدم لليلى اختي وانا رفضته
المهم ما اطول عليج السالفة لان وراج خط
جنت كاعد وهو شافني اجة علية هو و جماعته

حيدر .. اكلك انت شلون البارحة حاجي علية
يم المدير مال التدريب
وتطعن بشغلي كدامه شنو عبالك الحجي ما يوصل

.. انت متوهم انا ما حاجي يم المدير اي شي
والي بعبه خروف يمعمع انت لو ما تشوف نفسك صدك مقصر بشغلك جان ما اجيت تحاسبني هنا
جان رحت راسا هناك كدام ال مدير تدز علية وتحجي وياي بس الباطل لابد وان يجيه يوم ويظهر عليه الحق
اشو هذا انا حجيت هشكل وما اشوف الا هذا زنكني من القميص وكعد يسب ويغلط على عرضي
ما اتحملت اسكت بعد اكثر وصلت للعظم
..عززة بعينه وانت شسويت

.. بعد شسويت بعدني ما رافع ايدي اريد اضرب ما حسيت الا هو وجماعته التمو علية وما عرفت الضربة
كامت منين تجيني
هذا الحجي همة يضربون وانا جلبت ب حيدر صار هو حصتي كعدت اضرب بيه بس همة هواي

اباوع ولا واحد اخو خيته اجة وكال خلي افكهم
وبأثناء ما جنا نتدافع وكعت بالكاع على ظهري وهذا حيدر صار فوكاي وصرنا تنضارب
جماعته استلموني دفرات
كلت هو لو بالهدف لو بالنجف اضل اتعارك لحد ما
انسحل

علية وعلى اعدائي بس اولاد الكلب
نهوني من الضرب احس بروحي فطست
بس رغم هذا كله ما هديت حيدر

والله ولحظات وما احس الا عالجماعة كامو يتطايرون
انتبهت على واحد اسمراني ضخم كام يلزم الواحد منهم
يزنكه من قميصه وينطيه بوكسي يطشر دمة بوجهه
واستلمهم اكس ومربع
الله وانا شفته استلم الجماعة وانا اتفرغت لحيدوري الوردة
اااااخ يابة احس هذا الرجال الله دزه الي ملاك من السما
.. اي ملاك اسمر
.. اسمر .. احمر اهم شي لحك علية قبل لا اتكطع وصل

خلصت من حيدر وكمت من عنده وانا مكسر تكسر من الضرب
درت وجهي ادور على صاحبنا وين
اباوع لكيته
جاي يصول ويجول بيهم عبالك عنده لعبة متونس يضرب بيهم
وبعدما خلصت العركة ابو الكوفي الفاهي
اجة يركض ستوة يتحزم
مثل الاطرش بالزفة

وكعد هو وكم واحد بالكوفي يحجون ويهدون بين الطرفين
تالي هذا الاسمراني صاح بحيدر وبجماعته يتحلف بيهم
.. خلي اشوف رجال بيكم معتب هنا
قسماً بذات الله الا اكسر رجليه واحسب الله ما خلقه

طلعوهم من الكوفي وانا رحت اتشكر من عنده
على وكفته وياي

لو ما عيب جان بسته من زنده على نخوته

بس فاجئني قبل لا احجي ضحك بصوت عالي
.. ولك رائد شنو سالفتك شوكت ما اجيك الكاك تحتاج للفزعة

عقدت حواجبي متفاجيء اي انا هذا الصوت سامعه
بس وين ياربي
اتسعت عيوني مصدوم واني احجي
.. قااااااااااسم !!!!!
ضحك.. اي قاسم شنو ما عرفتني

حقي ما اعرفه
لان اخر مرة شفته قبل ليسافر للخارج يدرس صار سنين وماكو بينا اي تواصل

ابن اللذين حيل متغير صاير كلش ضخم

اخاف انا من توكفين يمي تكولين علية سارية علم
احتمال قاسم من توكفين يمه تصيرين عبالك واكفة يم
عملاق

هدى.. عاااا على الاساس انا ناقصة خوف وانت كاعد
تسولفلي فلم غعب(رعب) هسة بالله انا اليوم شغاح (شراح)ينومني
هسة اكعد احلم بكوابس كلها من وغاك (وراك)

..هههههههه لج لا تخافين والله صاير حباب
بس صدق او لا تصدق هدى تخاف

.. اي هو لكل انسان عنده نقطة ضعف بالحياة
اكو ناس تخاف من الجلاب واكو ناس تخاف من مشعل المخبل خاف يفشخهم اما اني اخاف من قاسم
خاف يطلعلي بالشاغع يجرغني (بالشارع يجرني) من كصايبي الله يكفينا شغه (شره)

ضحك وعض شفته
.. بالله تعاي شو خلي اشوف
اشو حليانة بنت اللذين على فراكي والغوغه زايده
.. اسكت لا تخجلني
.. اي صدك باركيلي صدك ثبتوني بالوظيقه .. الحمدلله ارتاحيت
صار عندي اساس قبل جنت مهندس بعقد
مابقى بس انتي تشدين حيلج وتخلصين السادس وادز اهلي يخطبوج ونتزوج

.. احلف كول والله اااااااقصد عيب شنو هذا الحجي
شكد ما تستحي
.. اروح فدوة للخجلان اكلج ما تنطيني عضة من هاي الخدود والله صارت حصرة بكلبي اريد بس اضوكهم واضوك الشفايف الي تغوغ

لزمت خدودي واني كلبي يدك حيل

فزيت من تفكيري على صوت سليمة
.. خير وين صافنة يالعوبة ... الباب صارله ساعة يدك
جانت تحجي علية وهي تفتح الباب

حجيت بصوت ناصي
.. عمة والله حتى عمة شلون كمزتني

دخلت اختي شيماء راجعة من المستشفى
سلمت ودخلت للبيت
حجيت وياها جاي اكللها على امتحاني
بس اشو هاي دخلت وما انتبهتلي

كملت غسل الطارمة ودخلت وراها
رحت دخلت عليها بالغرفة جانت تبدل
.. شنو شومة شبيج
.. هدى طلعي وسدي الباب وراج ما بية شي
.. شيماء والله بيج شي
.. هدى كلتلج مابيه شي بس شوية تعبانة
هدى بصوت واهن .. هذا هو بغاحتج (براحتج)
بس اذا تشوفين نفسج محتاجة تحجين تعالي اني موجودة اسمعج
طلعت وسديت الباب ورايه

شيماء
اباوع عالباب المسدود
احس بي يشبه ابواب حياتي كلها مسدودة بوجهي
خايفة ومحتارة اليوم ليث قلب حياتي
خلاني كلامه بحيرة
بالمسشتفى مثل ما اتعودت على روتين حياتي
كلما اخلص شغلي اروح يم رباب اجة الفراش وكال
.. شومة الدكتور فلاح يريدج بغرفة المراجعين الخاصة بي
.. اي هسة جاية
بس لحظة قبل لتروح
.. اتفضلي
.. ما تعرف شنو يريد مني
.. لا والله ما اعرف شنو يريد بس كال صيحلي شيماء بطريقك
.. اهااا شكرا هسة اروح
كمت من يم رباب جانت ملتهية بالسوالف وية
ام رحمان

رحت لغرفة المراجعين ودكيت الباب ودخلت
رفعت راسي ووكفت بمكاني مصدومة
ليث !!!
اني شفته وكلبي فقد انتظام نبضاته
يارب رحمتك واني اكول الحمدلله نسيت شي اسمه ليث
اثاري جنت اجذب على نفسي
والدليل دكات كلبي ورجفة جسمي
اتلاحكت لنفسي وجليت صوتي
وسلمت عليهم
.. شلونك استاذ ليث يارب تكون بخير
جان يباوعلي وعيونه تحجي عكس كلامه
.. بخير الحمدلله

باوع على دكتور فلاح وكأنه انطاه اشارة
فلاح .. شومة استاذ ليث يريد يحجيه وياج بموضع خاص وانا دزيت عليج هنا حتى تاخذون راحتكم بالكلام

ظليت فاتحة حلكي شلون طريق ملتوي حتى يحجي وياي صحيح اني صديته اكثر من مرة
وحتى من حاول يتصل بية
بدلت الشريحة من وراه

لان اكثر من مرة حضرت بس هو مصر يتصل
اول مكالمة جوابته عرفته من صوته ما انطيته مجال يحجي كبل حجيت عليه وسديت النقال

بس بعدها صرت بس اشوف رقم غريب كبل انطيه حضر ما بية حيل ابدل شريحة مرة ثانية

جنت صافنة افكر شيريد مني
فزيت على صوت باب الغرفة انفتح والدكتور فلاح
.. يالله انا اترخص عندي واجب اكمله وارجعلكم
راد يسد الباب حجيت تلقائيا
.. دكتور عوف الباب مفتوح لا تسده
اباوع لليث رفع حاجبه
الظاهر ما عجبه الحجي

اشر للدكتور بيده يعني روح وسد الباب وراك
عبالك اني زعطوطة كدامه

باوع علية
.. شنو لهاي الدرجة ما عندج ثقة بنفسج تبقين
لوحدج وياي
ترة احنا كبار مو مراهقين المفروض تكون شخصيتج اقوى من ان يهزج باب مسدود
.. مو شغلة باب مسدود
انت تشوفها اني خايفة منك وما اريد ابقى لوحدي وياك
بينما اني اشوف الباب عيب ينسد لان احنا بمكان عام واله احترامه والناس الهة الظاهر ما يكولون
علية وعليك كبار لوحدهم ومحترمين
راح يحتارون شلون يطلعون الحجي من جوة الكاع

وانت مبين عليك ابن اصول مايحتاج اعلمك

جنت احجي وهو سارح بوجهي

سكتت انتظره يحجي بس اشو هذا بعده صافن بوجهي

.. احم اتفضل شنو ردت من عندي
رجعت خصلة من شعري وحطيتها ورة اذني

انتبه على حركتي وعيونه ما طاحت من على شعري
عبالك ديحجي وياه
همس بصوت ناصي
.. انتي كتلة انوثة متنقلة كفر مكانج هنا
المفروض حق الله مكانج بين ايدية

فتحت عيوني بس سويت روحي ما سمعته
بدل كلامه .. شيماء شلونه ابوج وياكم

سؤاله كان مثل الضربة عالخاصرة هيج اتألمت من سؤاله
من اتذكرت موقفه وية بابا

_ ليث افضل ما اتكلم بهذا الموضوع لان اذا انفتح الموضوع حق الله المفروض مني ما اكعد ولا احجي وياك عالسويته وية بابا

اباوع عليه فتح حلكه مصدوم
.. مجنت متوقع راح يكون هذا ردج الي

.. شنو جنت تتوقع اخذك بالاحضان واكلك عاشت ايدك عالسويته وية بابا
اسمعها زين اكلك ..استاذ انت اتعديت على واحد من اهلي
.. شيماء مو هيج الحجي انا سويت هشكل ردت اخذ حقج
.. لحظة ليث صحيح جانت نيتك تاخذ بحقي من ابوي بس غلطان اذا تعتقد ان بهاي طريقتك راح تكدر تكسبني خلي اصحح فكرتك عني
ترة اني اتعديت مرحلة المراهقة من زمان
هاي الحركة السويتها
تكدر تملك بيها عقل وحدة مراهقة راح تشوفك بساعتها البطل الي اخذ بحقها من الظالم

بس اني اشوفها قلة احترام
اي لتباوع علية متعجب
اني احترامي من احترام اهلي
وانت هنت كرامتي بهذا تصرفك

.. وين جانت كرامتج من ابوج شوه وجهج وكص شعرج

.. هذا ابوي انت كلتها ابوي مني وبية ما بين البنت وابوها كرامة حتى لو كان اسوء الناس

بس خلي اسألك بالعقل
لو كانت الادوار مقلوبة

واشوف ابوك او امك يضربونك ويهينون كرامتك كدامي
تقبل اني اروح الزم امك او ابوك واكعد امثل بيهم
بالضرب

.. انا اختلف ابوي او امي حتى لو يمدون ايدهم علية افتخر على الاقل انا رجال واتحمل

.. ما جاوبتني على سؤالي لتتهرب
داكلك ترضاها ادز ناس عليهم يمثلون بيهم بالضرب
جاوبني بغضب
.. لا مستحيل واكسر ايده الي يفكر يمدها على واحد من اهلي

.. شفت شلون انفعلت مجرد تخيلك للموضوع عصبك لعد ليش ترضاها علية
شنو تتوقع تكون ردت فعلي من يدخل علية ابوية
مطبر تطبر
تطن راح افرح واكول شكرا ليث عالسويته بأبوية

خلي ببالك لو مهما صار بيني وبين ابوية مستحيل اغضب عليه او اتمناله الاذية

.. لو يرجع بية الزمن وينعاد الموقف ويمد ايده عليج
هم ارجع امسح بيه الكاع
ما اكدر اشوفه يمس شي يخصني ويأذيه
ما اتحمل اشوف يمد ايده على شعرج الي ياما جنت اتحلم اتوسد عليه بتالي الليل
يكصه بدون ما يوجعه كلبه
.. ليث تعرف شنو مشكلتك انت عاقبت بابا
لان شوه وخرب لعبة حلوة عندك او سيارة جديدة
تخاف عليها لا تخرب وتضرر

.. شيماء انتي غلطانة انا اجيت اليوم حتى احجي وياج بخصوص هذا الموضوع اني ما اشوفج كسلعة لو لعبة مثلما تكولين
بالعكس انا من اول يوم دخلتي بيها لغرفتي
بوكتها انتي مو بس دخلتي للغرفة لا انتي بداخلي
جوة بكلبي بدون ما تستأذنين
صرت مالي سلطة على مشاعري
وتصرفاتي وياج حاولت املك السلطة على
كلبي بحضورج واتصرف صح
بس غصب عني تصرفاتي تخوني من كد اللهفة واستعجالي خلاج تبتعدين عني وتخافين مني

.. حقي من اخاف منك وانت كل مواقفك وياي
تحذرني منك انت نار
.. بس يمج انطفي واصبح رماد

شوفي شيماء انا
رغم الحواجز والقيود الموجودة بحياتي
اتحديت كلشي وضربت كل افكاري بعرض الحايط
واجيت حتى احجي وياج
.. بشنو تحجي وياي
.. شيماء انا اريدج تصيرين زوجتي
كمت من مكاني مثل المكروصة

طار الحجي من عقلي كعدت بس ارمش بعيوني
افتح حلكي وارجع اسده

.. ما اريدج هسة ترجعيلي الجواب
روحي للبيت واخذي راحتج وباجر انا اجي واريد اسمع منج الرد
.. لاااا باجر شنو ما اكدر افكر هشكل
انطيني مهلة افكر بيها براحتي
جنت احجي وحيل خايفة ما اعرف شبية معدتي انعقدت
وكلبي يريد يكمز من صدري
.. ترة ما يحتاجلها تفكير
هي كلمة وحدة لو اي لو موافقة

اتسعت عيونها.. لا تجرب حظك
وتكون واثق من نفسك هشكل
ترة اني بعدني ماغيرت نظرتي عنك

وهذا الشي بحد ذاته يخليني اطلب منك وكت
افكر
اباوع عليه بدة ياكلني

.. والله لعبتي بأعصابي عمري ما عانيت وية مرة
ولا كاعد بحياتي افكر بردة بفعل اي وحدة
الا انتي خليتني امشي واحجي وية روحي

عالعموم ننطيج فرصة تفكرين
بس لا تتأخرين بالرد لان التأخير مو من صالحج
.. ليش يابة
.. لان اذا موافقة وتتأخرين بالجواب اطلع حيفي منج بالخطوبة
واذا كان جوابج رفض ومتأخرة علية بالرد
والله امج داعية عليج بساعة مغربية بيوم الوكعتي بيدي

.. هم رجعنا للغة التهديد
.. لا هذا مو تهديد هذا يسمونه تحذير

رحت نمت عالفراش افكر بي وبهيبته
وبكلامه وبغضبه وبكلشي
حتى من اريد اعدد عيوبه تصير بعيني تافهة
ويشفعله حبه الموجود بكلبي ويخليني اتغاضة عنها

........
ضحى.. اكول هدى انتي لاحظتي شومة اليوم كاعدة كله بالغرفة
حتى ما طلعت اتغدت ويانة شنو شبيها مريضة
.. والله علمي علمج بالله خلي اغوح اشوفها
شبيها

رحت فتحت الباب على كيف ودخلت على اطراف اصابيعي
جانت الست متمددة على بطنها وسرحانة بغير عالم

رحت ركض عليها وعطت بصوت عاااااالي
.. بووووووووووووووووووو
طفرت من مكانها مفزوعة

.. شكو جنية كمزتيني
.. اختي شيماء ما اعغف (اعرف) شبيها امانة متكليلي اختي
شبيها ليش سغحانه (سرحانه)
كامت من مكانها
.. امشي منا اريد اطلع خلي اروح اكل
جوعانة
.. انا اصبلج اكل وانتي احجيلي ليش هشكل دايخة وغايحة بعالم ثاني
.. والله انتي لزكة بعدين احجيلج بالليل مو هسة

جانت شيماء تضحك وعيونها تلمع
اول مرة اشوف اختي تضحك بفرحة
.. يارب دوم الضحكة والله تلوكلج
.. يالله امشي ما تقشمريني بهاي الكلمتين ما راح احجي هسة الا بالليل
طلعنا وصبتلها غدة واني افتر وراها مثل ذيلها
اتعودت اصلا مو جديدة علية

كعدت تاكل واجة بابا راحت ضحى صبتله غدة
وكعد ياكل وية شيماء
ياكل ويحجيلنا عن يومه بالشغل
وشيماء بحكم خبرتها بنظام المستشفيات
كعدت تنطيه بعض المعلوامات
جنة كاعدين على حب الله
وجان تدخل علينا سليمة ام العلوم والمصائب
كعدت يم بابا
.. اكلك اليوم الناس اجوي يردون يعرفون شنو
جوابك عن موضوع ضحى
ضحى كمزت من مكانها
.. بيبي ما اريد اتزوج
.. انتي انجبي واكلي تبن وخلي ابوج يحجي
جاوبها اثير.. يمة كليلهم ماعندي بنية للزواج
.. ها يمة اثير كعدن يمك شوية واكلن راسك بالحجي
وبدلوا رأيك على امك

.. لا يمة البنات مالهم دخل برفضي للناس انا رحت
سألت عن الولد طلع واحد حافي منتف يوم يشتغل وعشرة ماكو شغل
مال شنو انطيه ضحى

.. هسة الي يسمعك يكول بنته ست الحسن والجمال
مو زين ولكيتلك واحد يدك بابك ويريد يخطب
وحدة من بناتك
اباوع لضحى شلون عيونها كامت تلمع من الفرحة

مرت الايام وبدت امتحانات اخير السنة
والتهيت براستي بحيث كمت ما اشوف احد
ولا ادري شنو الوضع بالبيت
بس الشي الي لفت انتباهي
ضحى الي كثرة صفناتها ودخلت حالة اكتئاب
مرة سمعتها تتعارك وية بيبي سليمة الي نشبة وياها
من ذاك اليوم علمود رفضت ابن كرايبها
وصارت تطلعلها الشغل من جوة الكاع
البارحة خطية خلتها تغسل السطح
واليوم كلتلها تنظف البنكات

وهسة خطية طلعلتلها المواعين القديمة من عهد جدي
كالت كلهم غسليهم بيت جوارينا عندهم عرس ويردون
ياخذوهم

خطية هي ضحى ساكتة متكول شي بس مرات
هاي سليمة من نامت عليها سليمة
تستفز الواحد الله لا يسلطها على احد تشرده بليلة ظلمة

ضحى جانت تغسل بالمواعين
وسليمة تحوم فوك. راسها
سليمة .. امداج يالغمة تاليتج راح تعنسين مثل اختج الجبيرة. وتظلين بحصرة الرجال
هسة لو موافقة على هذا ابن كرايبي جان هسة انت

ملتهية تجهزين لعرسج وشحلاتج
بس انتي مو وجه نعمة تبقين فكر بنت فكر
بعد منو امج مشهودتلها بالفال الشين

ضحى وصل حدها
مسحت ايدها وشمرت الجدروة من ايدها بالكاع وصادف جانت اكو سجينة. عالسنك وية المواعين
لزمتها وهي تكلب بيها بصورة عادية وحجت بصوت ناصي يعلن عن الانفجار
.. شوفي انا كلشي اتحمل بس مال تغلطين على امي وهي ميتة لا لهنا وحدج
جانت تحجي والسجينة بيدها وسليمة انخلست
بمكانها تباوع عالسجينة

وانا خربانة ضحك على شكلها

سليمة.. ها ولج شنو تردين تذبحيني
بالله شو عوفي السجين من ايدج ترة الشيطان شاطر
.. والله مو اشطر. منج
الشيطان يمج طفل بالروضة لى سوالفج

عدة هذا اليوم وصارت الايام تجر وضحى صارت حالتها النفسية صفر
كل يوم اسمعها تبجي بالليل
جوة الغطى ادري بأختي دتعاني من الوحدة
لان كلنا مشغولين عنها وهي كاعدة لوحدها بين اربع حيطان
صرت ادعيلها بكلبي ربي كون يرجع صهيب
للعراق ويخطبها بس هذا الثاني كلش انأخر ولا بعد هم اجل رجوعه سنة ثانية
يوم ثاني وجان اخر يوم بالامتحانات
بالمدرسة خلصنا الامتحانات وكالعادة اجتمعت وية البنات
وصادف هالة عزمتنا ملنا على عرس اختها
منى
هالة .. هدى دعوى خاصة من امي كالت
كولي لهدى خلي تجي هي وخواتها لعرس منى
ازعل عليهم اذا ما اجوي
فرحت وكلت من ارجع افرح ضحى حتى تحضر روحها علمود تغيير جو

رجعت للبيت وشفت شهد صديقة ضحى عدنا بالبيت
لاحظت هاي الفترة كثرة جيات شهد لضحى
بالصدفة جنت مارة من يمهم
سمعتها تحجي وية ضحى
تكللها .. ولج والله مو لان اخوية اكلج وافقي عالزواج منه
بس عاجبتج هاي العيشة الي انتي بيها لا طلعة ولا مشية وفوك هذا كله بيبتج ناشبة وياج ومطلعة عينج

ضحى.. اي ميخالف اتحمل ما مستعدة للزواج هسة
صدكيني
شهد .. براحتج بس والله اخوي ما يتفوت حلو وكشخة
وهو الجبير يعني الكل بالكل
تدرين هو شايفج مرة وسألني عليج
.. وين شايفني
.. يكول شفتها من جانت بالمدرسة جانت تمشي هي واختها الجنية ام لسان
هدى
عمة حتى عمة هاي شتريد من ضحى ليش تحوم عليها
وليش ضحى ما كالتلنا. عن موضوع اخوها

يتبع

جمعة مباركة عليكم مقدما

احبكم هواي احبكم كومة
اختكم نهى