أساور الفضة الفصل الحادي وخمسون 51 - بقلم نهى

مساء الانوار عليكم احبيتي
🌹🌹🌹🌹🌹🌹🌹🌹🌹🌹

#اساور_الفضة_ج٢
#نهى_الحسون
🌹🌹🌹🌹🌹🌹🌹🌹🌹🌹🌹🌹
................ حالة حب .........................
ايا رجلا
فيك تتجسد احلامي
تماما بقدر حجم امنياتي
وسع مدى الحلم
وسع مساحة كلماتي
كأنك العيد الموعود
نسائم نيسان
تزهر في القلب ورود
حين اراك ..
اشعر بكروية الارض
تدور حولي
وانا حولها ادور
وبأن الايام حبلى
بالزهر والعطور
قلبي فرح يرقص
على ايقاع الكلمات
بجذل وحبور
من مدن احلامي قد جئتني
ومن عالم محدود جلف
انتشلتني
فوق في السماء
بين غيمات الافق اخذتني
لتثبت ان الاحلام قد تتحقق
واني واهمة
اذ حسبت الحب احمق
وانت تقف امامي
لا تدري عن انفعالاتي
ولا بأنك اصبحت لي
امنية من اغلى الامنياتي
اقف كالطفلة امامك
اريد ان اعبر عن ذاتي
مشاغبة تلك الطفلة
تود ان تقفز فرحا من داخلي
تعانق القادم الاتي
........................ بقلم هدى سعد ................
🌹🌹🌹🌹🌹🌹🌹🌹🌹🌹🌹🌹🌹
هدى

سمعت صوت باب غرفتي يندك رحت عليه حتى
افتحه بس استغربت
هاي شنو منو راسم عالباب صقر
مديت ايدي عاليدة حتى افتحه بس اشو مدا ينفتح

حاولت اكثر من مرة افتحه بس ماكو مدا ينفتح
بالاخير تعبت من المحاولة سندت مقدمة راسي عالباب

اهووو هم رجعوا يدكون عالباب
(دوك .. دوك..دوك ) واني ماعرف هذا شلون ينفتح
سمعت صوت خالة ام قاسم من ورة الباب
جاوبتها
.. خالة عفية الباب مقفول مدا ينفتح
بس اشو احجي وياها وهي متجاوبني بقت مستمرة
تحجي خرب هاي شبيها خالتي مداتسمعني

غمضت عيوني فتحتها وجان اشوف كدامي صقر
بس مو الصقر الموجود على باب الغرفة
لا هذا الصقر الي داشوفه هسة كدامي
فارد جناحاته موشوم على ظهر قاسم

اوكفوا لحظة شنو السالفةً
عقدت حواجبي مستغربة
دام الاستغراب مجرد لحظات وبعدها وعيت على نفسي وعرفت مكاني وين بالضبط

جنت نايمة عالسرير بغرفتنا اني وقاسم
ولا موبس هيج دافنة راسي بظهر قاسم ولاطشة روحي بي مثل الكتكوت

سمعت صوت الباب يندك
ام قاسم.. يمة قاسم اكعد راح تتأخر عالشغل صارت بالتسعة وانت مكاعد لحد هسة
هم يالله تروح لان اليوم السنوية
مال بيت عمكم ابو فرزدق الله يرحمه

حسيت عليه بدة يتحرك على كيف بمكانه وصاح بصوت ثكيل من اثر النوم وكال .. اي حجية هسة اكوم

يبووووو رجعت بسرعة غمضت عيوني وسويت روحي
نايمة وبقيت على وضعي متحركت لان بس اتحرك
راح يعرف بية كاعدة
اعمل نفسك نايم

اتذكرت
البارحة بعد العركة وصلني قاسم للبيت وقبل ما يدخل وياية للبيت بقى بالكراج كال
ما اريد امي تنهبط علية بس روحي بسرعة جيبيلي تيشيرت خلي ابدل هذا قبل لا اروح

بعدها دخلت سلمت على خالتي والبنات ورحت كبل صعدت فوك طلعتله تيشيرت
ونزلت بسرعة

لكيته واكف منتظرني اخذ التيشرت مني
ونزع بسرعة تشيرته الابيض والمفتوك ونطانياه

ولبس الجديد واني واكفة اباوع عليه
جان يلبس ويحجي وياي
قاسم.. سمعيني زين ديري بالج تجيبين سيرة بالصار لأمي

.. صاغ من غيغ (صار من غير ) متوصي مستحيل اكول

باوع علية وكال
.. والله ياهادي اثاري طلعت كفو
وينشد بيك الظهر

برطمت شفايفي ولميت التيشرت
بثنين ايدية
.. تغة (ترة ) اني اعجبك بالفزعة
باوع على باب المطبخ حتى يتأكد لا امه تجي وتشوفه

وحجة بسرعة .. وعلى طاري الفزعة
ديري بالج تعيديها مرة ثانية وتدخلين نفسج بعرايك الرياجيل

والله العظيم مرة ثانية اعوف العركة واجي اسحلج

برطمت شفايفي
.. صاغ المغة (صار المرة) الجاية غاح (راح) اكعد اتفغج (اتفرج) عليك
شلون تتعاإك (تتعارك) واكتفي بالتشجيع واهتف
قاسم .. قاسم.. قاسم

اباوع عليه عض كف ايده مثل الي كوة لازم نفسه
ما يهد بيةً
.. ااااخ هذا لسانج يجي يوم كاصه الج بمنشار

.. يعني هاي بدل متشكغني (متشكرني)

.. لج جنية على شنو ترديني اشكرج عالحذاء. الي زرعتيه براس الولد

اي صدك وعلى طاري الحذاء
اياني وياج اشوفج بعد لابسة هذا الحذاء
ثقي بالله ازرعه براسج مثلما حطيتي براس عزام
مو تكولين قاسم ما كال

باوعت عليه بغيض
.. ليش هو حذاء
نزل عيونه يباوع على رجلية وكال
.. انا مكلت امشي حافية
انا كلت هذا الحذاء بالذات متلبسينه

جاوبته بزعل .. صاغ (صار) هذا هو
اصلا بعد ما البس اي حذاء احسن حتى تغتاح (ترتاح)
اطلع بالنعال

.. براحتج بس اهم شي هذا الحذاء ما ينلبس
يالله فوتي جوة انا رايح
واحتمال اتأخر عندي شغل
وصدك راح و صار الليل وتأخر الوقت وهو بعده ما راجع للبيت

واني بعدما بقيت شوية جوة يم خالتي والبنات
تالي بالليل صعدت لغرفتي
ومكدرت انام بقيت انتظره يرجع للبيت يالله انام
بالرغم كلش نعسانة
وصرت احوم بالغرفة
اريد شي يلهيني بديت اكمل كم شغلة عندي بالغرفة
وغصب عني لكيت روحي افكر بقاسم

لاحظت عليه صاير كلش عصبي وميتحاجة
من عهد عركته وية رهف

واني امرت الف مرة من اشوفه كدام عيوني شلون
متلوع عليها كلبي يكوم يتكطع
من الغيرة اريد اصرخ اريد اعاتب اريد اعترض

بس ارجع واذكر نفسي
واكول بعدج باول الطريق
لا تنسين ترة هو مصارله هواي من اتعارك وية رهف
وانفصل عنها يعني حتى بعده كلبه ملحك ينسى حبها
صبرج عليه

لازم انطيه مجال يستوعب فكرة خروج رهف من حياته
صحيح هو ممبين عليه متأثر بالصار
لابس قناع المكابرة وراهم عليه لدرجة عبالك
وجهه الحقيقي

رحت للكنتور حتى اطلعلي شي البسه حتى انام
نزعت الدشداشة. وباوعت لروحي بالمرايا
وكعت عيني على الوحمة

اشو اني والله واثقة من نفسي وكالبة دقلة
ودايخة افكر بقاسم شلون اخليه يتقرب مني
واني ناسية عندي اكبر سبب يخلي قاسم ينهزم مني اذا شافها

اتذكرت كلام مروة من
كالت .. سالفة الوحمة سهلة بس
مري علية للعيادة حتى ادخلج على دكتورة التجميل
زميلتي مركز التجميل مالتها موجود بنفس البناية مالتي
اني وابو ياسر

وبعدها ما رحت لان التهيت بالامتحانات وقبلها سالفة مريم والصار بيها

بس هسة ما دام عندي عطلة خلي استغل الفرصة واروح لمروة
حتى تاخذني للدكتورة اراجع عندها واشوفها شنو تكول عنها

سحبت نفس عميق
ورحت للكنتور وطلعتلي
هالمرة ثوب فانيلا تعلاكة عالكتف
صيفي يصير قصير لتحت الركبه باربع اصابع
قررت منا ورايح ما اتقيد بلبسي داخل غرفتي

فتحت شعري واباوع لمقدمة شعري
البارحة خلت هالة تكصلي كذلة وتاخذ وياها
الشعر المشعوط. الحمدلله كدرت ارتبه حتى لو باقي بس الزلوف على جوانب الوجه. كرطفته بالمكص والحقيقه كان تغيير كولش حلو لاكلي هواوية

صار كلش مرتب بس العوبة هالة تكلي حرامات كصيتي
والله لون الحرك على شعرج حلو والله هاي البنية مخبلة

اخذت نقالي واتصلت على شيماء بالاول وسألتها عن ضحى لان هي كالت اني راح اتصل عليها مردت
اتصل على ضحى واستفسر منها
لان هذا زوجها سيف اكيد راح يوكف فوك راسها ومتكدر تحجي براحتها وياي

وبعدما اتصلت على شيماء وطمنتني على ضحى والوضع يمها هدوء واتفقنا نتشاوف باجر ببيت خالة ام فرزدق على سنوية ابوهم

باوعت للساعة صارت بالوحدة بالليل
وقاسم بعده ممبين واني نعست
طلعت الفراش وفرشته بالكاع

وبقيت اشغل روحي باي شي حتى ما انام
وبعدها رحت كعدت عالسرير شغلت التفلزيون
ودرته على قناة (mbc2) كان بادي فلم افتار
شد انتباهي وكعدت اتابعه وهذا اخر شي اتذكر سويته

بعدها ما ادري شلون نمت عالسرير وشوكت وصل قاسم
وشلون نام يمي عالسرير هاي الي ما اعرفها
معقولة اني نسيت نفسي ونمت باثناء مجنت اباوع الفلم

بين مجنت اتذكر شجابني هنا حسيت على حركة
رجلين قاسم تحت الغطا
يمة كلبي اجة يوكف عزة بعيني هاي شمصخمة اني
ورجلية شيسون محشورات بين رجليه

انتبهت عليه استدار على جهتي بكل ثقل
جان يتمغط مثل العتوي المتخوم
وحط ايده على خصري بكل هدوء

ياربي شكاعد يصير
جنت مغمضة عيوني وما اكدر افتحهم حتى اعرف
هو بعده نايم لو صاحي

بقيت ثابتة بمكاني وما اتحركت
حابسة انفاسي وكلبي كام يدك حيل واحس النبض
وصل لبلعومي حسيت على كف ايده بدة ينزل من على خصري بالتدريج

الي يشوفني يكول هاي غاطة بسابع نومة مثل الطفل
وميدري. ببخبصة المشاعر المختلطة الصايرة بداخل كلبي

انتبهت لكف ايده استقر على رجلي احس
بي عبالك متعود وبدة يقربني عليه

شهكت بصوت مكتوم عزة
هسة اني شسوي بهاي الحالة
ابقى نايمة لو اصحى لو ابقى انتظر رحمة الله
لو اكعد ابجي احسن والله كلبي راح يوكف
وبين مجنت افكر
هو ايده لازالت تتلمس جانب جسمي

بس فجاءة حسيت بايديه جمدت بمكانها
وبسرعة فز وشمر الغطا وكمز من مكانه مثل المصدوم

.. احتركت عشيرتج هاي شنو
و ضل يدردم ويلعن ويسب

عزززة هذا شكله جان نايم وميدري بروحه شديسوي
واني بقيت محافظة على سكوني بالكوة
يعني ما اعرف شلون بقيت متماسكة لاخر لحظة
وما عطت

اسمعه يدردم
نهض من السرير وبأثناء حركته سحب الغطا مني
رجع غطاني

وهو ينافخ
ومشى للكنتور و بقة معصب
اسمعه يحجي بصوت ناصي
.. الله يلعنك يالشيطان
انا شنو جنت احس امنت بروحي ونمت
يمها

ركع باب الكنتور بكل قوته
اخذ ملابسه وراح طلع برة الغرفة بكبرها

يبووووو علية الرجال يمكن اتخبل وهج. من الغرفة
اندك الباب وهالمرة اجاني صوت هالة
تستعجلني اكعد لان ورانا نروح لبيت ام فرزدق

يبو والله نسيت كمت من مكاني ورحت طلعتلي ملابس بسرعة ودخلت للحمام
ورة ربع ساعة طلعت من الحمام ووكفت كدام
المرايا لميت شعري ورفعته بقراصة
دنكت للمجر طلعتلي شال حتى البسه اكيد هشام جوة

حطيت الشال على كتفي
انفتح الباب
ودخل قاسم جان لابس ملابس الشغل
باوع علية بنظرات نار احس
جسمي كام يكرصني من وراه

وبسرعة اجتني الفكرة وداهمته بالسؤال
.. صباح الخيغ ( الخير )
شنو شوكت غجعت الباغحة (رجعت البارحة ) بالليل اشو محسيت عليك

جلى صوته .. احم رجعت بالوحدة ونص بالليل
ولكيتج نايمة عالسرير

ارتبكت .. اي موجنت انتظغك تغجع ( انتظرك ترجع) ظل بالي عليك

باوع علية.. وليش يظل بالج علية قابل انا صغير
وتخافين علية اضيع

.. لا بس خفت انام لوحدي بالغغفة (بالغرفة)

حجة من بين اسنانه.. الله يلعنج ياجنية
والله بعد الي شفته المفروض انا الي لازم اخاف
انام يمج

شهكت ورجعت سألته
.. شنو كلت

.. هيج مو يمج جنت اكول شتسوين نايمة على السرير
وملابسج تجيب التايه ليش منايمة بفراشج

يحجي ويتحرك بالغرفة يطلع اوراق من الكنتور
وجنطة وشغلات تخص العمل مالته
جان منطيني ظهره ويكلب بالفايل

.. والله ما اعغف بغوحي نمت عالسغيغ (مااعرف بروحي نمت على السرير)
الا هسة من كعدتني هالة الصبح

حط الفايل بالجنطة وسدها وهو
.. الحمدلله الله ستر جانت نايمة
سألته استغبي نفسي
.. هاااا شنو كلت ؟؟؟

شال الجنطة واتوجه للباب يريد يطلع
.. لا هيج سلامتج مكلت شي

طلع من الغرفة واني خربانة ضحك عليه
بعدك ما شفت شي مني استاذ قاسموف
وراك وين متروح

نزلت جوة ولكيت الكل كاعدين حتى الجهال كاعدين
دخلت للمطبخ وسلمت عالكل
لكيت البنات وقاسم وهشام كاعدين يتريكون

اباوع لقاسم جان مدنك راسه مندمج ياكل

ام قاسم .. هلا خالة شعجب اليوم ممكعدة زوجج
للشغل مو من عوايدج
ابتسمت بفشلة.. والله ما اعغف (مااعرف ) شبية. اخذتني النومة
والله اول مغة (مرة ) هيج انام مغتاحة (مرتاحة) وانسى نفسي

انتبهت على قاسم بسرعة رفع راسه من الاكل وباوع
علية وكال بصوت خشن
.. هدى كلاص ماااااي

كالها بغيض احس بي ديرزلني

اما استاذ هشام من اول ما دخلت للمطبخ هو بس يضحك عابتله
يمكن اتذكر بطولاتي مالت البارحة
احمد الله مكالوا. لخالة والبنات
جان صرت علج بحلك هالة وشيفكني منها

انطيت اكلاص الماي لقاسم وكعدت يمه
اخذه مني وخزرني

اهو هسة هذا شبي منو يمه
صبيت كوب جاي وبديت اتريك

واباوع على هوسة البنات وجهالهم هاي الي تسوي لفات لجهالها
وهاي الي مكعدة ابنها بحضنها وتريكه

ام قاسم .. عفية يمة قاسم ما اوصيك اليوم مو تتأخرون
انت واخوك هشام حتى نروح سوية لبيت عمكم

قاسم .. ان شاء الله اليوم ارجع من وكت
اي صدك اتذكرت

حجية باجر انتي وهدى حضروا نفسكم
اخذكم لبيت اهل رائد نتحمدلهم عالسلامة
خطية البارحة. ابوه ضربته جلطة

ام قاسم .. يااا خطية. ميستاهل
وهسة شلونه
قاسم.. لا الحمدلله عدت سلامات

لاؤل مرة بحياتي ينذكر اسم رائد وكلبي يبقى
منتظم بدكاته عبالك ديحجون بواحد ما اعرفه
احمد الله الف مرة واشكره بيوم رحمني وطلعه من كلبي

هشام .. اكول قاسم
رائد عرف بأبوه لو بعده ؟؟
.. اي اتصلوا عليه اهلة واليوم وصل

ام قاسم.. اكلك قاسم هذا شنو سالفته صاحبك
ليش نقل دوامه للناصرية

.. والله يا حجية خليها سكته هذا الولد راح يخبلني
ما اعرف شبي
هو مو بس نقل دوامه حتى عائلته هاملهم
ذاك اليوم مريت عليه للبيت طلعتلي امه
تشتكيلي عليه تكول خالة قنعه
يرجع ينقل دوامه لبغداد
اسأله يكلي هناك بالناصرية نطلع مواقع
مثلما تعرفين هو مهندس نفط وهناك شغله احسن من هنا

احتاريت اقنع امه لو اقنع هذا ابو راس اليابس
ولا فوك هذا كله لحد ذاك الاسبوع اخذني ورحنا لبيت عمه ابو زوجته يرجع مرته

ام قاسم.. ياااااا وليش حتى وية مرته. هذا شبي الولد
شعجب هو مجان هيج والله جان خوش ولد
وسبع جنت قبل اكول بلكي قاسم ينعدي منه
ويصير شاطر مثله

هالة .. هههههه والله كفو منج يمة هسة بربج وكت قصف
اباوع لام قاسم خزرتها
والاخت بلعت كلامها وسوت نفسها. دتاكل

قاسم.. هو هذا صاحبي الشاطر بالمدرسة. طلع ما بي خير بالحياة
حجاها بغيض وية امه وكام من الاكل وحجة
.. يالله هشام اتحرك ترة هو ريوك مو غدة
وانت نايم

طفر هشام من مكانه
وام قاسم ظلت تحجي عليه
.. دنطيه مجال خلي يكمل اكله. شدعوة عليك
.. هم يالله نروح من وكت حتى نكمل ونرجع. عليكم
ناخذكم لبيت عمي فرزدق

طلعوا الولد واني والبنات وخالة التهينا شي ينظف البيت
وشي يلف الدولمة وشي يسبح بجهاله مثل فاطمة
عزة بالصدفة مريت من يم باب الحمام وشفتها شلون تسبح جهالها
يكول عبالك دتتصارع وياهم يمةةةة هاي دتسلخ جلدهم
وراح تطلعلهم جلد جديد

رحت اكمل شغل بالعجل لان قاسم طلب مني
احضر له دشداشة النيلية
دخلت للمطبخ وشفت هالة واكفة يم خالة مخصرة
هالة.. اكول يمة عود ليش بس اني وهدى علينا الكراب والتنظيف
وذيج الست هديل متشتغل
ترة ميصير هيج اكو طائفية بهذا البيت و اني اعترض

ام قاسم مندمجة تلف بالدولمة هي وسرور وتحجي
.. ما عليج بيها لا عبالج اني ما منتبهة عليها شلون تختل بوكت الشغل
هاي حسابها يمي بعدين انا اعلمها
يالله هسة انتي روحي اتحركي كملي شغلج

مرت الساعات وللظهر وصار الكل جاهز
وقاسم وهشام اجوي
للبيت وبعدما بدلوا
قاسم اخذني اني وامه وهالة وفاطمة وكم واحد من جهال فاطمة
وهشام اخذ سرور وهديل والبقية من الجهال ا
ما منى وكوثر كالوا ازواجهم يوصلونهم مناك

واحنا بالسيارة دك نقال قاسم وحجة
اسمعة يكول .. لا اليوم ما اكدر اجي وياكم عذروني
غير مرة بعد عندنا سنوية جدي

ام قاسم .. ها يمة قاسم اشتغلت رحمة الله
.. ها حجية خير شكو هسة انا مو هالكاعد يمج
.. والله لو اعرف شوكت الله يهديك جان انا ارتاح كلبي

همة يحجون واني طالت اذاناتي مثل الحمار اريد افتهم شنو جانت تقصد خالة على شنو جانت دتحجي

وصلنا لبيت خالة ام فرزدق جان بنفس منطقة بيت قاسم
نزلنا ولكينا هواي ناس جايين
دخلنا من المطبخ وبدينا السلام

هالة .. اهووو شكد اكره سالفة السلام خصوصا
بالعزايم احس بيها نقطة بداية بس مالها نقطة نهاية

.. لا زين اني ما اضوج من السلام
بس اتخبل من اسلم على وحدة وتضربني بوغي (بوري)
يعني ابدي السلام بوسة بوستين
وبالثالثة تبتعد عني
وتخليني ابوس الهوى عبالك ملطلطة
شكد الفشلة

ام قاسم .. يوم هشام عفية روح نزل جدر الدولمة اتعاون انت وواحد من الولد وياك

كملنا السلام واني بقيت يم خالة اباوع
صلوات الكل جايين سلمت على ام مصعب واخته غفران
اما عمام قاسم كل عوائلهم جاية
حتى سعودة مرت عمهم كاظم جاية

دخل هشام هو ومصعب شايلين الجدر
جان كلش جبير ما شاء الله
خطية خالة وسرور انكسر ظهرهم عليه

حطوه عالكاونتر واجة مصعب وسلم على خالة ام قاسم وباسها من راسها
وصار يسألها على صحتها وسلم على فاطمة وسرور
وبعدها سلم عالبنات اني جنت واكفة معزولة يم الباب
لان بعدني مماخذة عليهم وست هالة العوبة دخلت جوة وية البنات وعافتني

اباوع عليه صهيب هواي متغيير بس نحو الاحسن
اتذكر عليه بأيام ضحى جان ضعيف
هسة وين جسمه تارس ولايك عليه

اباوع عليه شافني قطع كلامه واجة يطلع
وقبل لا يطلع سلم علية بكل لهفة احس بي عبالك يشوف بية ضحى
صهيب .. لج هاي شنو هدى والله كبرانة
طبعا جنت اكول كلها تكبر الا انتي متكبرين بس طلعت غلطان
هو يحجي واني خجلانة من الفشلة

.. ماكو واحد يبقى على حطته مصيغنا (مصيرنا) كلنا نكبر
بشغني (بشرني)انت شلونك وشوكت ناوي تتزوج

.. عوفج مني. ولا تسأليني عن احوالي
خليني انا اسألج على احوال الي بكلبي
وين صفة بيه الحال
عايش متهني لو بعده مثل حالي يشوف الهنا بس بعيونه لكن ما يطوله

ياربي والله مرد كلبي بسؤاله على ضحى
جاوبته .. حال الي تسال عليه. صايغ (صاير) مثل حال السفينة
الضايعو وما لاكية مغسى (مرسى) لحد الان ضايع بين الامواج

اباوع عليه جر حسرة وطيف نظرات الحزن مرت على
عيونه سلم علية. وراح من دون ما يلتفت

ضحى بقت غصة بكلب صهيب
اجتي هالة يمي
.. لج عوبة ليش ما دخلتي سلمتي على خالة ام فرزدق
اول ما دخلنا بس تسأل عليج
.. لج غيغ (غير) انتي دخلتي جنج صخلة تغيد (تريد)تلحك على عشاها لا ياكلونه
وما انتظغتيني (ما انتظرتيني) اجي وياج

.. ديالله كومي روحي سلمي عليها

دخلت ولكيت خالة ام فرزدق كاعد على كرسي متحرك
انكسر كلبي عليها رحت دنكت وبستها وهي لمتني لحظنها
ام فرزدق.. لج ليش خالة محد تسأل علية
يعني لو اني اسأل عنكم لو محد تكول هاي خالتي
خطية واجي اشوفها واسأل عنها
بس شومة خطية الوحيدة بيكم تسأل عني
.. والله حقج علية خالة ادغي بغوحي مقصغة (ادري بروحي مقصرة) هواية وياج

.. يالله اهم شي انتي سالمة انا اريد بس اتطمن عليكم
اكلج شنو خواتج يجن لو لا
.. اي خالة شيماء ومغيم (مريك)يجون
بس ضحى ومغوة ميكدغون (ضحى ومروة ميكدرون ) عندهم مسؤليات

.. الله يوفقهن بحياتهن
بس اشو شيماء ما اجتي
باوعت للساعة اي صدك شكد زحمة
راح يصبون غدة وهي بعدها ما اجتي

.. هسة خالة اتصل عليها واشوفها وين صاغت (صارت)
طلعت نقالي من الجنطة واتصلت عليها
جاوبتني
.. الو هلا شومة شنو متكليلي وين صغتي (صرتي)
تغة اتاخغتي (ترة اتأخرتي )
.. هسة حبيبتي هاي جيتي من المستشفى اخذت مريم وجايتكم بالطريق

سلمت عليها ورجعت نقالي بالجنطة اباوع
لبنات عم قام كلهم جاين الا رهف ما جاية

بس انتبهت لمرت عمه محمد ام رهف كل شوية تخزرني عبالك مشاركتها بورث ابوها
تريد تاكلني عمة حتى عمة

عفتها وكمت رحت يم خالة ام قاسم وفاطمة الي بقو
يم ام صهيب يساعدونها
وكم وحدة من جنان ام فرزدق هم ديساعدون
الا المصيبة نسوان عم قاسم وبنات عمه
هذولي ما اعرف الله خالقهم من يا طينة

كلش بايعات المستحة كاعدات
اباوع لهالة دخلت للمطبخ وكعدت يمي والوجه اصفر
.. ها خيغج (خيرج) شكلج مال وحدة مسوية مصيبة
.. سكتي بعدين اكلج مو هسة من نرجع للبيت

.. الله يستغ (يستر) من شكلج اكيد مسوية شي
ام صهيب .. حبيبتي ام قاسم ابو مصعب يكول هسة بلشو صبو غدا منا علما نفرش السفرة ونرتب الكعدة

ام قاسم.. لعد يالله هم يالله بين ما نصب ونخلص همة يكونون مخلصين

باوعت للساعة هاي شنو وين صارت شيماء
معقولة كل هذا طريق ساعة كاملة مرت من كالت اني بالطريق

هالة .. كومي اتصلي عليها شوفيها وين خاف لزمها الازدحام

رحت اخذت النقال وبديت اتصل عليها
مرة مرتين ثلاثة مترد
هاي شنو شبيها ليش مترد

بعدها رجعت اتصلت هم مرة مرتين ثلاث وهم ماكو
صرت اكرر محاولة الاتصال.
اتصلت واني احس اعصابي تلفت

ردت علية بس هو هي هذا مو صوتها
جان صوت مريم
انرعبت وكلبي وكع بين رجلية من سمعت عياط مريم
.. لج هدى لحكي علينا سيف الناقص رمى ضحى بالمسدس
يمة اني هي كالت هاي الكلمتين
واني ما شصار بية شهكت بصوت مفزوعة على اختي
احس صرت مثل الي يمر بحالة هلوسة صرت احجي واجاوبهم واني ما اعرف شنوجنت اكول
وبعدها ما اعرف شلون اجوي البنات وام قاسم
يهدؤن بية

سمعت صوت قاسم جان واكف بالباب يسأل عني
يمة اني سمعت صوته واني ركضت عليه مثل الطفلة
استنجد بي من شنو وليش ما اعرف بس كل الي اعرفه اني محتاجة وجوده

وكف كدامة ولزمته من ثوبه وحجيت بخوف
.. قاسم الحكني ضحى
بعدني ممكملة كلامي حجة باستعجال شكله
جان يعرف بالصار او هستوة عرف

اباوع على امه وحجة
.. حجية يالله بالعجل انا راح اشغل السيارة
راح اخذ هدى واروح وانتي تعالي وية هشام
جان يحجي ويمشي متوجه للباب
جان كف ايده على ظهري يحثني اتقدم

العجيب بالامر لكيت كم واحد. من اولاد ابو فرزدق
واكفين بالباب

وانتبهت لصهيب خطف من يمي وركض على سيارته
اسمعهم يصحون وراه
.. لك صهيب فهمنا شكووو شصاير

سمعت عم فرزدق كال لولده
.. عوفوا اخوكم انا اعرفه وين رايح

وصلني قاسم للسيارة وركبنا وبعدها اشتغلت الاتصالات
بين الولد وقاسم وكم واحد ما اعرفه اني جان بالي كله
يم ضحى

شيماء
وصلت لبيت عيال ضحى واني كلبي ما اعرف شلون
اطمنه. بس سديت النقال كبل اتصلت على مروة
حتى تجي تلحكني

لكيت باب عيال ضحى مفتوح والصياح اجيت اموت
من الخوف دخلت عليهم مفزوعة
بس اصيح اختي وين ولكم اختي ضحى وينها

اجتي مرت حماها الي اتصلت علية اعرفها فرح
كالت
.. شيماء لحكي سيف رمى اختج

رحت ركض دخلت للبيت لكيت البيت هوسة وخبصة واخوان سيف وابوهم واحد يدعم بالثاني

اني كلها بصوب وخوفي على اختي صار محتل كل عقلي ركضت لغرفتها لكيت سيف وواحد من اخوانها
يردون يشيلونها

ركضت بدون شعور على اختي من الصدمة صار همي
اريد اعرف اختي بيها روح لو هاي هي

لزمتها جسيت النبض جنت اتحرك واني فاصلة
فاصلة عن العالم جان بيها نبض بس ضعيف

بعدها صرت ادور على مكان ضربتها لكيت منطقة صدرها كلها دم والشفايف بيض
فزعني منظرها

سمعت صياح سيف
على اخوانه يكللهم شغلوا السيارة
وبعدهاحتى ما اعرف شلون وصلنا للمستشفى

اخذونا لمستشفى اهلية واسمع ابو سيف كل شوية يتصل على دكتور ويطلب منه يروح ينتظرهم

بالمستشفى عرفت شنو خطتهم اتصلت على مروة
انطيتها عنوان المستشفى

وصلنا للمستشفى لكينا منتظرينا بالسدية
والكل مخبوص
شكل اهل سيف عندهم واسطاتهم

اخذوا ضحى حطوها على السدية وصاروا يركضون
رحت وياهم اركض اجيت ادخل وياهم منعوني
من الدخول
واحد من الممرضين كال ممنوع الدخول نسيت نفسي
اني هنا مو بالمستشفى الي اداوم بيها ميصير ادخل

بقيت احوم يم الباب انتظر رحمة الله اريد واحد يطلع ويطمني على اختي ما اعرف الوقت طال مدري
كلبي خلص صبره

لفت انتباهي اختي مريم كاعدة عالكرسي المقابل للباب
وحاضنة جنطتي وتبجي مفزوعة
رحت عليها وكعدت يمها
ولميتها لصدري واني اتنفس سريع
اريد واحد يطمني ويكلي ماكو شي لاتخاوفون
اختكم ما بيها شي

غمضت عيوني وصرت اناجي ربي
يحفظلي اختي
يمة وينج اني بعازتج بنتج ضحى بحاجة دعائج

احس بالدمعة
عاندت وياي متريد تريحني مدري كلبي ااتحجر من كثر الالم

شفت سيف ملابسه كلها دم
وشكله يخوف ويحجي وية نفسه ما اعرف شنو
يكول

رصيت على اسناني وكمت من مكاني وهديت عليه
جنت فاصلة عن المعقول وكفت كدامه وكل قهر وحقد العالم اتجمع بكلبي
لزمته من مقدمة قميصه وصرت اتلاوة وياه
من الغيض

.. لك حيوان ساقط والله الا افضحك
من الله يحرك كلبك كلي شسويت بأختي
.ولك شلون انطاك كلبك ترميها
لك ما كسرت خاطرك

وهو نتر ايدي وعاط بية
.. هييي انتي لاتضلين تمسلتين ترة ورب الكعبة
لا اخليج تلحكين اختج انتي اللاخ

سمعت صوت مروة اجة من وراي وهي تصرخ
بصوت حاد
.. لك سيف والله ثم والله اذا ما خليتك تخيس بالسجن ما اكون مروة

اباوع لابوه جر سيف وبعده عنا
اسمع ابوه يكله
انت روح شتسوي باقي هنا
واشر لاخوانه وكللهم اخذوا اخوكم وطلعوه منا بسرعة
عباله ما سمعته

مروة .. لا والله ميطلع منا الا على السجن
سيف هد عليها .. لج سكتي عار بنت العار
انتي منو حتى تتجرئين وتهدديني
بيمن جاية تزامطين بابوج اثير ابو العرك جاية وتهدديني
ولج والله اشارة وحدة مني اطيرج انتي وعشيرتج
وابوج

سيف واهله استهانوا بية وبمروة واستضعفونا
يردون يلمون السالفة بينهم ويروح حق ضحى لان يعرفون بينا مالنة ظهر
وحتى لو مروة عندها سند هنا بالمستشفى الاهلي ما ينفع ومنا علما تجي الشرطة يكون سيف رايح

اباوع لمروة. جانت تباوع عليه والشرر تطاير من عيونها تفلت وهدت عليه وخمطته وخرمشته بوجهه وهو هد عليها
يريد يضربها وهي بقت واكفة كدامه
رافعة راسها بكل قوة

رحت عليها وصحت بخوف
.. يمة اختي

صاح صوت خشن من ورانا هز اركان المستشفى
.. كون انت صدك رجال جرب ومد ايدك عليها

يمة ما اعرف شصار بية من شفت قاسم
ربي استجاب لدعائي
اتوقف سيف وعقد حواجبه ممتوقع جية قاسم

سيف بصوت كله غضب
اقترب على سيف وكال
.. ها يا سيف هي هاي كدرت عالنسوان
تطلع مراجلك
فتح اذراعه على وسعهن
.. بيك خير وتعال. اوكف كدامي واحجي وياها هذا الحجي

سيف .. قاسم انت ما شفتها شلون اتجاوزت علية
وصارت تسربت بالحجي

قاسم بغضب
.. لك انت هم الك عين وتحجي مصوب اختها بالمسدس

.. قاسم رحمة على والديك انت لا تتدخل
هذا الشي ما يخصك امور عائلية
.. لك انت ويامن دتحجي
هدعليه
ما حسيت الا وعلى ضابط شرطة دخل بينهم ولزم سيف

اتفاجئت مروة حجت وياه بشماتة
.. لا عبالك اخذتها لمستشفى اهلية تعود لمعارفكم
عبالك تكدرتطلع منها
وداعتك انت هواي مستهان

اباوع مفرزة شرطة دخلت للمستشفى وانتبهت
لواحد وياهم اتوقع هذا ابو ياسر الي تعرفه
مروة

الضابط .. لازم تتفضل ويانا عليك بلاغ وتهمة
تعدي على دكتورة ومحاولة قتل زوجتك

اباوع لاخوان سيف وابوه صار واحد يدعم بالثاني وصارت خبصة

وسيف الي جتفوه وصار مثل الجريذي جوة ايدهم
كام يصيح
.. بابا احجي وياهم.
ابوه .. لتخاف ابوية انت انا وياك جاي

بعدما الشرطة اخذو سيف
واخوانه وابوه راحوا وراه

بعد فترة باوعت لخواتي وحدة كاعدة بصف الثانية
وام قاسم وقاسم وفاطمة. وام صهيب وعمو ابو فرزدق
كلهم اجوي

بس جان هناك اكو شخص فاقد ماخذله مكان بعيد عن الكل وكاعد لوحده وحاط ايده على راسه
عصرني كلبي معقولة هذا صهيب

هدى
خوف وترقب وامل
كلنا كاعدين منتظرين ضحى
بعد الي صار حسيت برحمة الله شكد واسعة
والظالم لابد وان يجي يوم ربه يوكع بظلمه

مر الوقت وطلع الدكتور
وركضنا مروة وشيماء صاروا يسألونه
وهو يحجي وياهم. ويجاوبهم بعد دفايق

.. ها مروة بشري شنو
.. الدكتور يكول الطلقة جاية بظلعها وبلوح الكتف
من الجهة اليمنة كوة كدرنا نسيطر عالاضرار
لان هواي نازفة دم وهمة جايبيها متأخرين

واني طلبت من عنده يسويلنا تقرير
باوعت لشيماء
.. شيماء ضابط التحقيق منتظر يريد ياخذ ايفادتج
لان انتي وحدة من الشهود

راحوا البنات
وبقيت اني لوحدي كاعدة جانت ام قاسم كاعدة يم
ام صهيب وفاطمة

انتبهت لقاسم اجة وكعد يمي بس شفته
نزلت دموعي لا اراديا
حسيت على ايده حوطتني من كتفي ولمني لصدره
.. ااااخ لك هادي والله ما يلوكلك تبجي

.. تدري صرت احب اسم هادي من اسمعه بصوت

سكتت الدموع اتزاحمت وية الكلام
رفعت راسي ادور على مريم

لكيتها كاعدة على وحدة من الكراسي قريبة علية
جانت مدنكة راسها
وحاضنة نفسها فاصلة عن العالم

وجان اشوف
هشام جايب بطل ماي ومد ايده ببطل المي لمريم وحجة بصوت ناصي وكال

.. هاج اخذي شربيلج شوية ماي
ومسحي دموعج كافي اختج مبيها شي
من مساعة انتي بس تبجين ادري شنو هذني دموعج متخلص لو عندج تانكر خازنة الدموع بيه

يتبع

احبكم هواي احبكم كومة
اختكم نهى ☺️☺️☺️☺️☺️