أساور الفضة الفصل الثامن وخمسون 58 - بقلم نهى

مساء الخير عليكم احبتي
☺️☺️☺️☺️☺️☺️

#اساور_الفضة_ج٢
#نهى_الحسون

هدى

اليوم عرس صهيب
وخالة راحت من وكت لبيت ام فرزدق
وحتى قاسم وهشام هم رجعوا من وكت من شغلهم
حتى يجهزون روحهم

جهزنا نفسنا اني والبنات لبست فستان احمر قصير
كتف مكشوف والكتف الثاني ردانه طويلة
وحذاء كعدب عالي
وشعري فتحته مسويتله شي لان هو جماله بطوله
حطيت ميك اب ظلال سموكن
ركزت برسمة العين.

جنت مندمجة
انفتح الباب ودخل قاسم
جان لابس القاط بس بدون السترة ولا ربطة
لبسهم بغرفة هشام هناك

احس بعيوني كامت تلمع من شفته
باوع علية وكعد يتفحصني بنظراته

عضيت شفتي وغمزتله وحجيت
.. ياختي اسم الله. انت يواد يا تئيل انت يگميل
ايه الحلاوة دي

.. اتوقع المفروض انا اتغزل
اشو انتي اتغديتي بية قبل لا اتعشا

اقترب علية وكال .. انا موكلت متحطين هيج مكياج
ونوب العيون مسويتهم للفتنة

.. بس اليوم حبيبي واوعدك انزل حجابي على عيوني
يعني والله اذا اغيد (اريد) امسحه احتاج ساعة اقل شي
لان الميك اب ميغوح (ميروح ) بسهولة وغاخ تتأخغون (وراح تتأخرون )
عالعغس (عالعرس)

حجة وعيونه على شفايفي وحوطني من خصري وكال
.. تلفين نفسج لف بالحجاب.
دنك راسه وكال
.. بالله خلي اجرب اشوف صدك المكياج ميروح بسرعة

وما انطاني مجال افتهم كبل خمط شفايفي ببوسة
بعدها رفع راسه وكال
.. خلي ابتعد واستر على روحي ورانا عرس

اتصلت على شيماء اسألها عن البنات يجون للعرس
وكالت كلنا راح نحضر للعرس
سألتها بصوت هامس
.. حتى صحى
.. اي حتى ضحى لان اصرت تحضر العرس
.. زين مغوة شخباغها (مروة شخبارها )

.. ومروة اليوم اول جلسة الهة بالمحكمة بخصوص
الطلاق. والمحامي بلش يمشي بأجراءات الطلاق ورافد
رافض يطلق
وهسة هي معصبة كلش بس اقترحت عليها تجي ويانا حتى تغير جو

.. ومغيومة (مريومة) شلونها
سألتها عن مريم واني اتذكر هشام
.. مريم زينة اليوم اخذتها اشتريتلها ملابس
للمدرسة بعد تعرفين مبقى شي عالدوام
وهي هالسنة راحت للخامس ولازم تشد حيلها
حتى بعد تتفرغ للسادس

.. اوووف ذكغتيني (ذكرتيني ) بالدوام
خغب وغاية اشتري (خرب وراي اشتري) زي للكلية.
هالسنة اخر سنة الي واتخغج (واتخرج )
بس ادعيلي ادبغها ( ادبرها.) منا شغل بيت ومنا قاسم
واني صايغة (صايرة )الحقيقة كولش خاملة وكسولة
والله احتمال افكغ (افكر) ابطل واكعد بالبيت

شيماء بتحذير .. ديري بالج تفكرين تبطلين
ما بقة شي هي بس هاي السنة
لاتضيعين تعبي وياج صدكيني ازعل عليج.
اخذي الشهادة وكعدي بالبيت لاحكة على كعدة البيت

.. اي صحيح كلامج. زين انتي شلونج
.. ما دام انتوا بخير فأني بخير

جواب شيماء كان مناسب لشخص عايش حياته لاجل
الاخرين

الساعة ٦ مساءاً
المكان قاعة الاعراس
شيماء
مروة
ضحى
هدى
مريم

خمسة قلوب محملة بالمخاوف والمعاناة والامل بالغد

شيماء
اول ما دخلنا للقاعة وشفت اجواء العرس والفرح
اندعيتلهم بكلبي ربي يتمم عليهم

وبنفس الوقت عيوني وكعت على مكان الكوشة
والعروسة جانت واصلة لان احنا وصلنا فايت وكت

اباوع للعروسة وبدلة العرس وعيوني سرحت بالفستان
شكد مر علية وقت بأخر مرة حلمت بيها البس الابيض
لشريك حياتي واكون عائلة تخصني

حييييل اتذكر اخر مرة حلمت بهيج احلام وردية
جان على عهد ليث الله يذكره بالخير
وبعدها بطلت احلم واتمنى
لان الي مر علية بحياتي نساني حتى اسمي

لمعت عيوني من شفت فرحة العروسة
واهلها وخواتها.ربي يتمم عليها
ويسعدها وية صهيب

التفتت على ضحى الي جانت تباوع على العروس بنظرات ضايعة وحزينة

همست بأذنها .. اندعيلهم ربي يسعدهم صهيب يستحق
يتهنا بزواجه.

باوعت علية والعيون تنطق بالضياع
.. ربي يبارك له بالزواج ويسعده يستاهل صهيب وزوجته مبينه حبابه

ضحى

دمعة الم وغصة بكلبي تكمن بصدري
اتخذت القرار اليوم احضر عرس صهيب
مثل الي يقرر ان يشرب كاس السم
ولازم يشربه لاخر قطرة

اعرف بروحي خسرت صهيب من يوم الي وافقت على
زواجي من سيف

ظروفي كانت كلها ضدي حرب سليمة وحرب اثير
تأخير صهيب دخول سيف
كلها اتعاونت ضدي ودفعتني حتى اوقع ورقة
موتي.

اني مالي حق حتى اعبر عن حزني واكول حزنانة
بس غصب عني الكة روحي احلم بحب صهيب
عسى ولعل يرجعلي

هي كانت مجرد اماني واحلام مستحيلة
جنت متأكد صهيب صعب يرجعلي ويصير من قسمتي بعد كل الي صار

اباوع لعروسته. واغمض بعيوني واتذكر احلامي اني
وياه. شلون جنا نتمنى هذا اليوم وتنكتب
بطاقة عرس صهيب

وفعلا اجة هذا اليوم واتوزعت دعوات عرس صهيب
وعزموا الناس
وصدك اليوم عرس صهيب واني وياه اثنينا
موجودين بالعرس واتحقق جزء من حلمنا

اليوم صهيب العريس بس مو ضحى العروس
وصار صهيب من قسمة وحدة غيري
واني صرت وحدة من المعازيم

حب صهيب بكلبي صار حلم مذبوح
حاله حال احلامي البقية
احلامي الي تحترك كدامي عيني وحدة ورة الثانية

جنت مثل شجرة مغرورة بألوانها بفصل الربيع
ومتحس الا وداهمها الخريف وسلب منها شبابها
وبدت اوراقها تصفر وتذبل وتتساقط وحدة ورة الثانية
وصارت عارية مجرد اغصان مثل عود عجوز كهل.

سمعت صوت منظمة الديجي تعلن عن دخول صهيب

وجان يدخل احلى شي صار بحياتي
دخل حلمي يمشي على البساط شفت بعيونه فرحة
عريس بيوم عرسه
باوعت لعروسته شلون تباوع عليه متلهفة

غصب عني نزلت دموعي الخفية
وصرت عذول بين الاحباب دنكت راسي
وطلعت كلينكس وبديت امسح دموعي

حسيت بأيد مسحت على ظهري رفعت راسي
وباوعت لهدى كاعدة يمي وبعيونها بدت تواسيني

نطقت كلمة وحدة .. استاهل
وغصيت بيها

سمعت صوت وحدة دتسلم علينا رفعت راسي
وشفتها ام سيف
وشهد ديحجون وية مروة وشيماء
يكولون ابو سيف راح يجيب شيوخ ويريد
يصفي النفوس ونريد نرجع ضحى لسيف

وان شاء الله الصار ما ينعاد
لان سيف يحبها ويموت عليها
وانتوا تعرفون المتزوجين اشكال المشاكل تصير بينهم
وياخذون عبرة منها ويبدون من جديد
لان الله الشاهد ضحى بتنا. ونموت عليها
والله اونتوا ما محلفيني ضحى احسن جنة
عندي من بين الجناين
شهد تضيف على امها

.. اي والله حتى بابا يكول البيت فاهي بدون ضحى

قصدهم البيت صار وصخ خلاف ضحى
شلون ناس حيالة

اباوع عليهم شلون اكلو مروة وشيماء بالحجي الحلو
الي يسمعهم يكول دخيل الله هذولي شكد ناس خيريين ماكو مثلهم
ميدرون هذا كله مزيف وبس كلام وحقيقتهم سودة

ودخلو لخواتي بنفس الاسلوب الملتوي بالكلام الي دخلولي بي.
وعموني وخلوني اصدكهم واغرك باحلام مالها اي وجود

خفت لا اخواتي.ينجرفون و تغرهم. حلاوة السانهم
مثلما صار بية من انجرفت بكلامهم وانغريت بيهم
جنت حابسة انفاسي ومنتظرة رد شيماء
او مروة
شيماء كالت بكل احترام
.. خالة. كلشي بالقسمة والنصيب
وضحى ما مكتوبلها تكمل حياتها وية سيف.
والي اتكسر ما يتصلح واحنا ما صدكنا نطلكها منه

مروة جاوبتهم .. انسوا شي اسمه ضحى
مستحيل اخليها ترجع لسيف بعد الصار بيها
اشو جايين بكل وقاحة تطالبون بضحى ترجع لسيف
شنو دتغشمون روحكم

ودتحجون بكل ثقة وناسين انتو شسويتوا بيها وشلون بهذلتوها
وابنكم المريض شنو سوة بأختي
وصلها للموت وانتو تتفرجون عليه
لولا لطف الله جان اختي بعداد الاموات والفضل يرجع لابنكم الطايش

وبعدين ليش ترجعله وهي بعدها شابة ومن حقها تكون ام
وهو عنده مشكلة وعقيم وانتو بكل صلافة حاطين الصوج بيها

انصحكم ترحون تدورون وحدة فقيرة ثانية تضحكون عليها وتزوجوها لابنكم المتخلف

احس بجواب خواتي ماي بارد ونزل على كلبي وجبر خاطري
بهذا جوابهم احس عبالك مرة ثانية انطوني شمعة امل
انهض بحياتي من جديد

واليوم راح اطوي اخر ورقة من حياتي القديمة
اباوع لام سيف هي وشهد شلون متفاجئين بمروة
جان ردها قوي مال وحده واثقة من نفسها انها قادرة على مواجهتهم
وهذا الي مكانوا حاسبين حسابه ببنات اثير الي استضعفوهم من ورة ابوهم

ودرت وجهي لصهيب وعروسته
وكأن الامر ميعنيني تركته لاخواتي مروة وشيماء
وحسيت بالراحة فعلا لهنا وتنتهي قصتي وياهم
صار لازم اغلق كتابي على حياتي القديمة واتقدم للامام
والي راح يخليني انهض من جديد ضحى الجديدة بحلم جديد

كمت من مكاني وشيماء باوعتلي
شيماء.. وين رايحة
.. اروح اسلم على العريس واباركله
عقدت حواجبها مستغربة هدى كامت وجانت لابسة جبتها وحجابها
لان العريس هنا بالقاعة وكالت
.. اخذيني وياج حتى اني اغيد اباغك (اريد ابارك) لصهيب

ادري بيها تريد تبقى وياي خاف انهار
بس هي ما تدري ضحى القديمة ماتت
من زمان جان باقي خيط رفيع يربطها بالماضي
انقطع اليوم بزواج صهيب ووكفة اخواتي ضد اهل سيف

اتقدمت على مكان الكوشة الي جان كاعد بيها صهيب وعروسته
اباوع عليه جان يبتسم بكل وقار

صعدت الدرجات الي تفصل بيني وبينهم حتى اقترب منهم
وكل درجة اصعدها جانت العد التنازلي لنهاية وموت ضحى القديمة وحياتها القديمة

جان يبتسم وية زوجته
رفع راسه وصارت عيونه بعيوني واختفت ابتسامته
وعيونه نار تجدح على الم ووجع
نفس الغصة ونفس نظرة الحلم المذبوح الي بعيوني

ابتسمت وهمست بصوت ناصي بين ما جانت هدى تسلم عالعروس.
.. اليوم شربتني من نفس كاس المر الي انت شريت منه

سحب نفس عميق وكال
.. ليش اجيتي
.. اجيت حتى اهنيك بيوم عرسك واباركلك
واكلك انت اجمل شي حصل بحياتي
واتمنى ان تسامحني وتنسى الي صار بينك وبيني

وتبقى الي طول العمر احلى ذكرى
اذكرني بخير من تفكر بية

حتى اكدر اتقدم واتوفق بحياتي.
همس بصوت واهن وكال

.. ولو ما مو وكته هذا الكلام. لان ما اريد اقلل
من احترامي لزوجتي بهيج. يوم
وهي مالها ذنب بشي

. بس لازم احجي لان متأكد بعد
ما عندي فرصة ثانية وياج حتى احجيه

يمكن يجي اليوم واشفى من اثر حبج
بس هيهات انسى
لان الجروح من تشفى تتزك اثرها

اجتي هدى وكالت .. الف مبغوك (مبروك) صهيب
تركتهم ورحت لعروسة صهيب باوعتلي وابتسمت
جانت بنية كلش حبابة ونازكة

فعلا صهيب انسان ذهب مصفى. ويستحق هيج
انسانة طيبة تستحق كل احترامه واخلاصه

باركتلها ونزلت بدون ما التفت وكانت هاي اخر مرة اشوفهم بيها

كعدت يم شيماء والبنات وجتي مريم
جانت لابسة فستنان قصير رصاصي فاتح منقط بأسود
وشريط اسود عريض عالخصر
صاير موديل كلاسيك بسيط
بس هي محليته وبارزة الموديل بتفاصيلها
جانت لابسه كالون اسود شفاف وحذاء كعب عالي

شعرها طويل مثل هدى ومسويتلها كذلة كثيفة
مويديل ياباني.
طالعة فعلا حلوة وتجنن

كعدت يمنا وكالت
.. اكول بنات شنو السالفة وين ما اروح العيون كلها علية ويسألوني انتي اخت هدى الصغيرة

هدى ضحكت وكالت
.. اشتغلت غحمة الله. بعدين احجيلكم شنو السالفة
لان هسة مو وكتها خالتي اجتي ووياها حمواتي. كوموا
سلموا عليهم وبعدين اني اجيكم للبيت واحجي وياكم

خلص العرس وصارت الزفة والتهينا
اني وهدى نلف حجاباتنا زين
ومريم يمنا بقت نفس ملابسها بس لبست
جاكيت عليها هي مو محجية
اني نزعت النقاب من اول يوم اتحررت بي من صهيب
وبقيت بالحجاب لان اتعلمت عليه
جنت اكدر انزعه بس اني حبيته وعجبني ابقى لابسته

مريم
اليوم خوات قاسم كل شوية وحدة تجيني وتكعد تحقق وياي اخير شي
اختهم هالة. اجتي علية وكرصتني من خدودي
وكالت
.. يمة صدقة لله. شلون خدود حلوات
يمكن اكلها قبله جنها جكليتة

قبله شنو .. منوتقصد شبيهم هذولي مرتفعه حرارتهم
ما اعرف شنو السالفة
بدوا الناس يطلعون واني رحت للحمامات
حتى اعدل نفسي قبل لا يطلعون اخواتي. وصرت البس بسرعة خايفةً
يطلعون بدوني. لان هوسة واني اخاف اكون وحدي

من بعد الصار بحياتي وية عمو امجد وجنان
صارت بية خوفة مستحيل ابتعد عن خواتي
وين ما يرحون اني وياهم وخصوصاً شيماء اختي
هي درع الحماية والامان بالنسبة الي
لكيته بحضنها.الي لمتني بي

عدلت نفسي باستعجال
دورت على جنطتي واتذكرت حطيتها عند شيماء
يالله خلي اروح بسرعة عليهم
جانوا هواي بنات بالحمام هم ديلبسون ويعدلون

بس من طلعت حسيت كلبي راح يوكف من الخوف
لكيت القاعة فارغة وما باقي بيها الا كم عائلة من اقارب ام فرزذق
واخواتي ولا وحدة موجودة

ظليت اافر براسي مثل التايهة ادور عليهم
ولمحت هالة احس روحي ردت الي
ركضت عليها اسالها
.. خواتي وين
كالت.. هدى طلعت وية قاسم واحنا هسة راح نطلع
واخواتج الباقيات شفتهم طلعوا

عزة هي كالت هيج واني قطرة دم مابقت بية
رحت ركض لباب القاعة مثل المخبلة
.. شلون يطلعون وينسوني

انخطف لوني ورجفت اطرافي ورجفت شفتي
اريد ابجي من الخوف
طلعت بباب القاعة اباوع الشارع خبصة بالسيارات
شفت سيارة العريس اتحركت

والسيارات بدت تتحرك وراها واني كلبي يريد يطفر من مكانه
وبعز الخوف وعيوني تدور على
سيارة مروة بلكي اواشوف اي وحدة من خواتي

حصرتني البجية وبالضيم ياحالي
وجان اشوف هذا حمى هدى الامير وليام
المغرور ال شايف نفسه هشام

جان راكب سيارة عالية سودة.
هي الصراحة. كلمة حق تنحجي بحقه هو صدك مملوح
بس ثقيل عالمعدة شايف نفسه وبس يتأمر
كل مواقفي وياه مو حلوة اخر موقف الي وياه
من طلعني وية شيماء ومروة من بيت بيبي سليمة

جان طول ما اني امشي عيونه تتفحصني وسأل شيماء بوكتها كللها
اخذكم للمستشفى هاي اختج وجهة اصفر
شفتها دينزل منها دم
جان يحجي بغضب
بس مروة شكرته وكالت مايحتاج مستشفى اني دكتورة
واختها ممرضة المستشفى بكبرهاعندها

اهووووثول حتى ثول اني وين ضايعة ادور على خواتي
انتبهت لخالة ام قاسم وهالة وهديل ومنى طلعوا
من القاعة وشافوني

هالة .. هاي شنو بعدج ما لكيتي خواتج لحد هسة
ام قاسم..يااا خطية مستحيل ميطلعون
ويتركوها هنا خصوصاً شيماء

همة يحجون واني عيوني تباوع منا ومنا بالمكان
والدمعة لمعت بعيوني
هالة شافتني راح ابجي وكالت
.. يمة هسة يجيج البعبع ياكلج

امها ظلت تحجي عليها
.. لج هالة ثولة ليش هيج تخوفين بالبنية
هالة.. يمة والله تشهي واحد يكعد ينصب عليها
جنها لولو كاتي
والله لو ما عيب اعضها من خدودها

جاوبتها بصوت يرجف
.. هالة مو وكتج اريد شيماء عفية دوري وياية

رجعت اراقب الطريق
وجان الاخ ينزل من سيارته واجة بأتجاه
خالة والبنات
اجتي عينه علية و شافني واكفة يم امه وخواته . اتسعت عيونه متفاجيء وكصني من فوك ليجوة عبالك سونار مو عيون عابتله
اقترب علينا
اشو هذا عوف خالة واخواته
واجة علية وسألني شتسوين واكفة هنا
حجاها بغيض وهو يباوع منا ومنا. وكأنما يفحص المكان

خالة جاوبته .. يمة هشومي دتنتظر خواتها
هسة اتصلت على شيماء وكالت خالة احنا بالكراج مال القاعة
نريد نطلع سيارة مروة بس ازدحام. هواي سيارات
وضحى ومشمش بالقاعة
باوعت عليهم
.. اشو ما شفتها لضحى ماكو

هالة.. حتى اني ما شفتها بهاي الاثناء خالة ام قاسم صعدت بالسيارة
ومنى وهديل وهالة
واني دخلت للقاعة ادور مرة ثانية
دورت بكل مكان حتى دخلت بالحمامات ماكو ضحى

خلي اطلع من القاعة وانتظرهم بالباب اذا طلعت ضحى
الكاهة واذا اجتي مروة راح تلكاني
وبين ما جنت افكر انتبهت لاستاذ هشام نزل مرة اللخ
من السيارة وهو يسب ويلعن واجة علية وجهه نار
هسة هذا شبي منو يمه

حجة من بين سنونه.. شعندج طالعة من القاعة روحي فوتي انتظري جوة وية ضحى
.. ضحى ماكو مموجودة بالقاعة

سحب نفس عميق
لعد تعالي صعدي بالسيارة انتظري خواتج
.. لا ما اريد انت روح مالك دخل بية هسة همة

عزة اني كلت هيج وهو كب بوجهي مثل الطباخ
.. منو الماله دخل بيج لج ....
انتبهت عليه بلع كلامه وسحب نفس عميق مثل الي يريد
يهدي روحه
وكال .. يابنت الحلال وكفتج هنا غلط
ما تشوفين غضب الله شلون واكفين وانتي وهاي ملابسج بس اصبري علية
الا اسويلج فرمتة من اول وجديد

فتحت حلكي .. العفو دتحجي وياية

انتبه لروحه
وفتح باب السيارة القريب عليه
وكال .. شوفي راح احسبلج منا لثلاثة
اذا ما صعدتي ا......

رصيت على اسناني ولميت قبضتي
ورحت فتت من يمه وصعدت بالسيارة
واني ابجي واحجي عليه

.. والله الا اكول لشيماء ومروة عليك
ام قاسم.. يا خالة شبيج ليش تبجين
.. خالة ابنج اتجاوز علية. وبس يصيح ويهدد بية

محسسني عبالك اني بنية مو زينة
جنت احجي وابجي بحركة
بسيطة الا اكول لمروة علية
اباوع عليه بعده
لازم باب السيارة وواكف مصفصف بوجهي
لا والاقوى من هذا كله
انطاني كلينكس حتى امسح دموعي

هشام .. احم هاج اخذي مسحي دموعج.

جر حسرة وكمل كلامه
.. وخدودج صاروا حمر

والله غريب امره يبجيني ويمسح دموعي
هالة .. عليك الله شلون خدود مو مال عض

هشام بغيض
.. هالة شيلي عينج عنها ترة الحقوق حصرية

ما اعرف همة يحجون على شنو بس كسر بجمع
احس بروحي كاعدة بينهم مثل الاطرش بالزفة

جنت اراقب المكان
عين على باب القاعة وعين على
الشارع ياربي وينهم

وهشام بعده باقي على نفس مكانه فاتح الباب
وحاط ذراعه
على باب السيارة. متجي عليه وعيونه ما انشالت من علية

وجان اشوف ضحى لازمة ايد مشمش وطلعوا من باب القاعة
واني بس شفتهم
وصحت بفرحة وابتسمت عبالك طفل ضايع ولكة اهله
.. هذيج ضحى اختي هي ومشمش
اجيت انزل من السيارة

اتقدم علية
.. اوكفي لحظة انتظري لا تنزلين
اني رايح اجيبها هنا ويانة

رفعت عيني واجتي بعينه وخزرته ودرت وجهي عنه وكتفت ايدية بغيض

راح عليهم واجوي وياه
بس اقتربت من عدنا حجيت وياها الدمعة بعيني
.. انتي وين جنتي. دورت عليج بالقاعة
ماكو الج اثر
ضحى.. خطية مشمش بطنها مغص وكضيتها بالحامات

اي صحيح دورت بالحمامات بس ما جيكت دواخلهم
.. يالله مكتوبتلي انهبط

هالة .. مصائب قوماً عند قوماً فوائد
جانت تحجي وتباوع على هشام

هشام .. هالة شيلي عيونج عنها لا افكسهم

ضحى جانت تتصل على مروة.حجت وياها
وكالت
.. يالله مريم نزلي اجوي البنات

انتبهت لسيارت مروة فاتت من يمنا وكفت ورة سيارتنا
ضحى لزمت ايد مشمش وراحت

واني اجيت انزل

اباوع لهشام ما اتحرك واكف قاطع علي الطريق
انتبهت عليه غمز لامه وكال بصوت عالي
.. يمة خليني اخذها ويانة للبيت. والله كلبي ما ينطيني
اخليها تروح
جان يحجي وعيونه بعيوني
بلعت ريكي بلحظتها ارتعد جسمي من نظراته
بيهم وعد غريب

ام قاسم.. لك يمة هشام عوف البنية خليها تروح لخواتها

جر نفس عميق وابتعد عن طريقي فتت من يمه
وحسيت انجرت خصله من شعري

شهكت وباوعت عليه جان يضحك
وخزرته
وتركته ورحت لسيارة مروة
عمة حتى عمه

هدى
جنت واكفة كدام المرايا اعدل حجابي

اليوم قاسم راح ياخذني لبيت مروة
علمود اشوف خواتي بعدما انشلع كلبي وكلب هشام يا الله انطاني فكة
خطية ضحى كالت اليوم اسويلج امطبك برياني دجاج
ومريم كالت اسويلج قالب كيك
وحلاوة جكليت

سمعت صوته يصحيني
.. يالله هدى استعجلي

رحت اخذت جنطتي ورحت نزلت اركض
لكيت قاسم منتظرني بالسيارة صعدت
وانفاسي متقطعة من السرعة

.. يالله فضينا والله اتأخرت عالولد
.. شنو عندك شغل

.. لا بس رائد صارله ساعة ينتظرني

ما اعرف ليش كلما ينذكر اسم رائد
احس بالتهديد والخوف

دك نقالي وجان المتصل شيماء وكالت
.. شنو وين صرتي. ترة متنا من الجوع
نريد نتغدة

.. لالالا الله عليكم انتظروني لتاكلون
هياتنا بالطريق ما بقى شي ونوصللكم

باوعلي قاسم .. مبين عليج هواي مشتاقة لخواتج
وفرحانة راح تشوفيهم
.. تريد الصدك مشتاقتلهم مووووووت
ومثل كل مرة قاسم من وحده ينزل يشتري
حلويات لمشمش وعلبة بقلاوة للبنات

انطاني العلاكة وكال .. هاي الج ولخواتج
اكلي وحلي واستعدي بالليل امر عليج ماكو مبيت
.. تسلم حبيبيييييييي
.. هااااا اشتغلت رحمة الله
يعني انتي سوالفج ما تطلعيها
الا واحنا طالعين
.. ما اعرف يمكن الطلعة تحفز هرمون الادرينالين
واتحمس وطلع جناني عليك

.. لاتخليني ادري سيارتي وارجعج للبيت واطلع جناني
عليج

جان يحجي ويقلد صوتي
.. اي صدك قبل لا انسى البارحة ابو سيف واخوانه
اجوني وحجوا وياي علمود موضوع سيف
يردوني اتوسط علمود يرجعون ضحى لسيف

.. اي حتى بالعرس امه واخته فتحوا الموضوع وية مروة وشيماء

.. هدى ولو ما حق اتدخل. بس اتمنى ضحى ما ترجع لسيف
لان الولد اعرفه فاسد من صغره
وضحى اختج فقيرة
.. هو حتى مروة وشيماء رفضوا طلب ام سيف
وما انطوها مجال تحجي وية ضحى او تقترب منها

رجع دك نقال قاسم وجان المتصل رائد
اسمعه يكله
.. جاي .. والله جاي بس اوصل المرة لبيت اهلها.
سكت ما اعرف شنو رائد حجة وياه

وجاوبه كله ان شاء الله يوصل وسلم عليه
دار وجهه علية وكال
.. رائد يسلم عليج
بهت لوني .. الله يسلمه
شلون صار ابوه
.. بعده مريض صحته مو تمام
ورائد طالعة روحه من ضغوطات اهله على مرته وصايرة مشاكل بينه وبين مرته
خطية متكدر تتحمل امه واخته

.. خطية
جنت احجي وبطني ممغوصة
.. والله هذا الولد خطية ابد ما كامتله راية من يوم
عاف اليحبها.

كلبي كمز من مكانه ودرت وجهي باوعت عليه
.. شنو اليحبها
هو كمل كلامه نظراته كدام يسوق
.. رائد جان يحب وحدة قبل

يتبع

احبكم كومة احبكم هواي
اختكم نهى الحسون