رواية اساور الفضه ج١+٢ الفصل الثاني والخمسون 52 - بقلم mem141162

#اساور_الفضة_ج٢
#نهى_الحسون
#البارت_خمسة_وعشرون

مفارقات الزمن وسخرية القدر
في ذات المستشفى الي شهدت على الام واوجاع ضحى
وخوفنا وترقبنا عليها
كانت ايضاً شاهدة على
قلوب معلقة معذبة بالحب المكتوم مثل صهيب وضحى
وايضا في ذات الوقت هناك قلوب انولد بيها الحب
مثل هشام ومريم
وهناك قلوب تكابر الالم وتظهر القوة غافلة عن
القلوب المحطمة بسببها مثل قاسم وهدى

هدى
عدة اسبوع على حادث ضحى. بالمستشفى
وبهذا الاسبوع بدينا اني وشيماء نتناوب على المبيت
يم ضحى بالمستشفى
اتذكر من طلبت من قاسم ابات بالمستشفى وية ضحى
كال هذا من حقج لعد المن الاخوة تنراد
ما انسى وكفته وياية هو وخالتي والبنات
صدك رفعوا راسي حسيت اكو من
يحترمنا ويحتوينا

ام قاسم جانت بين يوم ويوم تجي واليوم المتجي بي تتصل تطمن على ضحى
هاي من غير تطبخ وتدزه بيد العم حسنين
اما هالة كل شوية تتصل تسألني على ضحى
وتكلي شوكت ترجعين البيت ضوجة بدونج
تعاي شنو عايفتني يم هديل العوبة
لازم تضحكني وتنهي المكالمة
اما قاسم فكان بحثاً اخر

مرات احس سؤاله عني بداية اهتمام من نوع اخر
ومرات احس بي يعطف علية اني وخواتي
يعني مو شي خاص بية الي

اما عن تصرفاته فكان دائما مشغول

حتى من يجي للمستشفى ويشوفني شنو محتاجة
يروح الوقت كله اتصالات منا الى ان يخلص
يسحب نفس عميق ويسألني عن ضحى وصحتها
وبعدها يكلي ما اوصيج اي شي يحتاجونه البنات
خواتج كولي انا موجود

جنت انتظره مثل الطفلة شوكت يسألني عن حالي
شكد اتمنيت اسمع منه كلمة مشتاقلج
او شوكت ترجعين للبيت طولتي
بس مع الاسف ما نطق هاي الكلمات
لان اني بالنسبة اله لا شي. مو مهمة بحياته
ان حضر لا يُعد وان غاب لا يفتقد
هذا حالي وية قاسم

بس المشكلة كلبي مو راضي يفهم بعده
يلحن بكيفه عبالك عايش بغير عالم
وصرت اعد الايام بصبر شوكت ارجع
للبيت لان هناك المكان الوحيد الي اكدر
احظي بقاسم الي لوحدي يحجي وياي واحجي وياه
احس بحنانه اشتاقيت لكلشي بي
ريحته صوته ابتسامته حتى غضبه وزعله
مشتاقتلهم

انتبهت من افكاري على كلام شيماء وية مروة
شيماء .. مروة اني جهزت كل غراض ضحى والدكتور
وقع على ورقة جروجها من المستشفى
مروة.. هذا هو اني اتصلت على السايق يجي
ياخذنا

طبعا مروة رغم انشغالهة بعيادتها والمركز وبنتها
بس من يوم الصار
صار شغلها الشاغل قضية ضحى
وكلت محامي يتولى امور القضية حتى تتأكد ان سيف ياخذ اقصى العقوبات اتذكر المحامي
كعد يسأل ضحى هواي اسألة كنا عافلين عنها
وحدة من هاي الاسئلة
سألها
.. قبل تهجم زوجج عليج بالسلاح
هل تعرضتي للعنف والضرب على ايده ؟؟
ضحى هزت راسها بعنى نعم

بعدها المحامي طلب من مروة ان يستغلون الفرصة ما دام ضحى بعدها اثار الضرب موشومة على جسمها
كال لمروة افضل تتصور هاي الاثار والدكتور يشرف عليها
واريد تقرير كامل حتى اضيفه على مجموعة القضايا
المتهم بيهن

لان القضاء راح يحاكم سيف على حيازته على سلاح غير مرخص قانونياً.
ومحاولة قتل. زوجته
وضرب والتعنيف والتهديد الي اتعرضتله ضحى
اضافة الى التعدي على دكتورة هذني التهم
راح اكدراثبتهم عليه مثل الورد وراح اكون

مسيطر اكثر عالقضية اذا زوجة اخوه الي اتصلت عليج
تكون شاهد عيان على مداومة المتهم على ترهيب وتعنيف ضحى

شيماء جاوبته .. والله استاذ ما اكدر اضمنلك هذا الشي
يمكن اهل سيف يمنعونها

.. على العموم ان شاء الله منحتاج شهادتها
لان الادلة الي عندنا تكفي وتوفي
مروة .. ولا تنسى اريد نرفع عليه دعوة طلاق
المحامي.. هو اني ليش اصريت على اخذ صور لاثار الضرب
لان هي نفسها راح تساعدني بقضية الطلاق
وان شاء الله الطلاق مضمون

وبهذا الاسبوع الي مر علينا
جنت شاهدة على معاناة ضحى والالامها من وعت على نفسها بالمستشفى
وبدت تتذكر الصار بيها
بوقتها جانت حالتها النفسية صفر وانهارت مرعوبة
وعلى ادنى صوت تكمز من مكانها خايفة
كانت مفزوعة لدرجة لا تصدق
اتذكر مرة من المرات
انسد باب الغرفة الي هي بيها بكل قوته وصدر منه صوت عالي مثل دوي الطلق

بوكتها ضحى كامت تصرخ مرعوبة
ومروة كبل طلبت
من الممرضة ان تلحلكها بأبرة مهدئة. وكتبتلها الكمية المطلوبة

مروة.. طبعاً الصار بضحى راح يبقى يطاردها حتى باحلامها
لان لحظة الرعب الي اتعرضتلها ضحى مو شوية

وفعلا ضحى من بدت شوية بالتدريج تستعيد صحتها
صحيح هي كانت بطيئة بالشفاء من ورة الحالة النفسية
بس احسن من ماكو

بعدما طلعناها من المستشفى
مروة اصرت ان تاخذها وياها ببيتها
على الاقل علما تبدي تتشافة عندها ومريم بقت يمها
حتى تساعدها وتداري مروة
حتى شيماء بس كان عندها دوام

بعدين شيماء ما بقت يم البنات ببيت مروة
كالت اني ارجع للبيت يم سليمة محد يمها

خطية ضحى اول مدخلت للبيت بدا وجهها يسترد لونه
وحتى انطلقت بالكلام
خطية لان من جانت بالمستشفى.
ماكو متحجي ابد متفتح حلكها الا على شي ضروري
واحنا طول فترة الاسبوع مجبنا سيرة سيف والصار.
مروة كالت نعوفها براحتها هي تحجيلنا

لان اتذكر من اجة ضابط التحقيق ياخذ اقوالها هو المحامي من حجتلهم الصار بعدها انهارت وارتفعت حرارتها بيومها ومن عندها بطلنا نحجي بالموضوع

جنت دا اطبخ وافكر بضحى والصار بيها
اجاني صوت شيماء دخلت للمطبخ وكالت
.. ها خلصتي غدا لو بعدج

.. هذا هو هياتة خلصت كلشي بقة بس اسوي الزلاطه ونصب
بس اتصلي على مغوة (مروة) شوفيها وين صاغت (صارت)
حتى نتغدة سوية

جنت احجي ومشمش تفتر جوة رجلية
شايلة لعابتها ومشط تلعب يمي اباوع عليها
شعر اللعابة وشعرها اثنينهم مفتوح

شيماء.. اتصلت عليها وكالت صبوا غدا اني واصلة قريب عالبيت

.. لعد يالله صيحيلي مغيم (مريم) خلي تجي تساعدني اصب الغدا
وانتي اخذي مشمش مشطيلها لان الست
ماخذة غاحتها (راحتها) لاتجي مغوة (مروة)وتشوف الشعغ (الشعر) مفتوح
وتظل تحجي عليها

مشمش.. لا هدى انا اغيد شعغ (اريد شعر)مفتوح
لزمتها شيماء واخذت المشط منها وطلعت هي وياها
من الطبخ حتى لا يوكع شعر بالاكل
اباوع لمشمش شلون برطمت متقبل بنت اللذين مال هسة الزمها اشبعها بوسات

وبين ما خلصنا تجهيز الغدا وصلت مروة
واول مدخلت للبيت سلمت علينا ودخلت للغرفة
وصاحت لشيماء
بعدها اتغدينا وخلصنا
وكعدنا يم ضحى بالغرفة اباوع عليها بدت تتحسن
جانت لابسة اتراك وردي ذراعها وكتفها مجبس
ورافعة ذراعها بحاملة يد

جانت مسوية شعرها ظفيرة وحدة خطية ضحى والله حلوة
بس سيف جان دافن كلشي حلو بيها
ربي يخلصها ويخلصنا منه

مروة .. تدرون بنات اليوم وصلني تهديد من ابو سيف
يهددني اتنازل عن قضية ضحى

ضحى شهكت بخوف.. مروة عفية عوفي القضية
اني كلشي ما اريد لا يأذي وحدة منكم
هذا عمي ناقص وعار وكلشي اتوقع منه
ماعنده مخافة الله متشوفون سيف شلون
متفرعن لان يعرف بأبوه وراه

جانت تحجي وترجف
مروة.. مستحيل نتنازل عن القضية
وخلي يهدد ماراح يهز شعرة مني
اصلا اني من اتصلت على المحامي وكلتله عن الصار

المحامي قدم بلاغ بخصوص التهديد
وبعدها الضابط المسؤول عن التحقيق
خلة ابو سيف يوقع على ورقة بعدم التعرض الي
متشوفين اني اليوم ما رحت للعيادة كضيتها كلها وية المحامي

باوعت لشيماء وكملت كلامها
.. شومة عفية شوكت تقررين تشتغلين وياي

شيماء
سؤال مروة اجة بالصميم باوعت لوجوه خواتي
كل وحدة من خواتي محتاجة لوجودي ودعمي
بحياتها واني بالحقيقة قررت مثل كل مرة

اترك عني كلشي وارجع اوكف وية خواتي
مروة تحتاجني ادير مركزها لان محتاجة شخض توثق بي
حتى تتفرغ لشغلها ومتظل اتابع كولشي بنفسها
وهسه طلعت شغلة ضحى وقضيتها وية سيف
الي مبين عليها راح تطول وانضافت لبقية شغلاتها
وبالتالي لازم اكون السند الي تكدر تعتمد عليه

مريم تحتاجني حتى اخذها لاقرب مكتبة
تريد تشتري ملازم وسألتلها عن معهد وقررت ادخلها دورات تقوية

اما هدى انتبهت عليها بهذا الاسبوع هواي انشغلت بضحى وبينا
ونست زوحها وعيالها صحيح همة ناس طيبين
بس اذا صار حبيبك حلو لاتاكله كله
وصار لازم ترجع لبيتها وحياتها
اما عن كلبي ومشاعري فراح ادفن
هذا الحب الي ماله راس ولا رجلين

باوعت لمروة واتخذت قراري
.. هذا هو مروة خلاص راح اساعدج بس انطيني مهلة
كم يوم على ما اقدم استقالتي وامشي بالاجراءات

مروة..يابعد عمري شومة والله اوعدج ما تتندمين على الشغل وياي وان شاء الله اعوضج
وراح تلاحظين هواي فرق بالشغل بين العيادة والمركز وبين الشغل بالمستشفى

شيماء.. حبيبتي اني اهم شي اكدر افيدج واساعدح
بس بالاول احتاج تكعدين وياي تفهميني شنو المطلوب
مني

هدى
بعدها بلشوا البنات شيماء ومروة يحجون.
وجان يدك نقالي والمتصل خالة ام قاسم
وجانت تسأل عن ضحى وسألتني شوكت ارجع للبيت
حسيت من خلال سؤالها تريدني ارحع للبيت

وجاوبتها اني اتطمنت على ضحى واليوم اكدر ارحع للبيت
اليوم جان يوم خميس
وبعدها كلت اتصل على قاسم يجي ياخذني يرجعني للبيت
سديت النقال وانتبهت لضحى دتسولف وية البنات
خطية ضحى بعدما اتطمنت وامنت وشافت نفسها
بين خواتها بدت تحجي عن الصار بيها وية سيف بذاك اليوم

ضحى .. تدرون بنات طول ما اني بالمستشفى
واني الخوف ما فارقني مجنت احس بالامان هناك
جنت اتوقع باي لحظة يدخل علية
سيف او واحد من اهله ويموتني

شيماء.. ياعمري لتخافين بعد سيف واهله ما يتجرؤن
يوصلون يمج
ضحى.. هو هذا الشي الي مطمني ان بعد ما يكدرون
يوصلوني

مروة.. اذا تردين تفضفضين الي بكلبج النة احجي
لتبقين كاتمة خوفج بصدرج احجيلنا عن الصار بيج بذاك اليوم
وطلعي من كلبج حتى ترتاحين

ضحى صفنت وراحت بغير عالم
لوحدها سرت بيها رجفة بؤس والم جانت مقهورة
بعدما فاتحت عمتي بحقيقة العقم وان اني مبية شي
وهي ظلت تلف وتدور وتريد توهمني
ان هي ماعندها علم هم مثلي تجهل هذا الشي

كانت ردة فعلها مشابها تماماً لردة فعل سيف من سمع بالموضوع.
فضلت اتغاضى عن الصار

وبيومها حسيت بالقوة وصرت اني صاحبة الحق من بعد مكنت المكسورة من ورة الذل

بعدها بيومها بالليل رجعت اطلب من سيف يعزلي ببيت
شفته اترفز وضاج وضل يصيح علية

سيف.. اكلج اشو انتي طلعلج السان بيوم عرفتي
مبيج شي
.. لا سيف مو هيج الحجي اني من قبل
اطلب منك تعزلني بشقة لوحدي حالي حال نسوان اخوانك بس انت حضرتك جنت تتهرب وبأخر فترة صرت تعيرني وتكلي المن احطلح شقة اذا خلفة ووماكو هسة اني اطالب بشقة
لان ثبت ان الخلل مو مني
يعني شفت من حقي اطالب ببيت حتى لو مو بالضرورة
اخلف اولاد يكفي ان اريد اخذ راحتي
واتنفس شوية من الكراب

بيومها كام يحجي علية ويصيح مثل الي
يريد ياخذني بالصياح

بحيث من يحجي ويتعارك وياية ميضل واحد بالبيت ميسمع بهوسته
بس هالمرة ما مد ايده علية لان صدك اني مطلبت منه غير بس حقي
وهمة عندهم شقة يعني يكدر يعزلي

بس مع الاسف سيف مثل كل مرة يرجع يصيح ويغلط
طلع وتركني تحت رحمة السان عمي وعمتي
.. هججتي الولد من البيت
من الله لايوفقج سودتي عيشته

همة يحجون واني كاتمة ما اكدر اردهم لان همة ناس ما عندهم مخافة الله

بعدها بقيت اليوم كله منزلت جوة
اعتكفت حتى اكل رفضت
وعمتي اجتي تتخبل لان منو يلزملها البيت
ويكعد. يكرب من الصبح لليل

لان ما تقبل تجيب وحدة تساعدني ولا
تخليني ارتاح

وبيومها ما اعرف شلون دكت علية مرت حماي
فرح وكالت
.. سمعت بيج متعاركة. انتي وسيف
.. اي اتعاركنا منو كلج

.. هيج سمعت ترة ماكو شي ينضم ببيت عيالي

طبعا جنت متفاجئة بمكالمة فرح لان هي قبل ايام
سيف ضربها واتعارك وياهة هي ورجلها

.. اي اتذكر ذاك اليوم كلتيلنا عنهم
.. هو اني من هاي جنت مترددة من عندها
بس هي بوكتها جانت مصممة توصلني كالت

.. شوفي ضحى عندي موضوع كلش مهم
اريد احجي وياج واتمنى تسمعيني للاخير
.. اتفضلي احجي اسمعج

.. اريدج بالاول اتحلفين متحيبين سيرتي بالي راح اكوله الج

.. شنو شبيح فرح احجي.شنو الموضوع قلقتيني
.. بالاول حلفي حتى اتأكد اسمي ما ينذكر بالموضوع

حلفتلها ووعدها ما اجيب اسمها بالسالفة
.. شوفي ضحى طبعا بيت عيالي مستغلين طيبتج وفهاوتج وغبائج وفقرج

شهكت .. لج فرح ليش تكولين هيج صدك زعلتيني منج
.. مو كلتلج اتمنى ما تقاطعيني وتسمعيني للاخير
هاي مو اني الي اكول هيج عنج

انتي تصرفاتج هي الي تثبت ان هاي الصفات كلها بيج
.. شلون يعني ما افتهمت
.. يعني بربج اريد احلفج بالله اكو وحدة
عيالها يستغفلونها ويضحكون عليها
طول هاي السنوات مفهمينها اني هي عاقر ومنها
العيب وطول هاي المدة انتي بقيتي جوة ايدهم

محاولتي ولا مرة تراجعين غير دكتورة
لان فطيرة وعلى نيتج. يعني بشرفج اكثر من هيج
فهاوة وغباء مشفت

.. فرح انتي تعرفيني كلش زين سيف مقيدني
وخانكني لا طلعة ولا مشية وحتى خواتي اروحلهم بالكوة
شوكت ترديني اسوي الي كلتي عليه

.. هو اني ليش كلتلج همة مستغلين فقرج
وسيف سادي كدر يخنك الحرية عندج
وما ينطيج اي مجال تتنفسين بدون علمه

على العموم اني من بعدما عرفت انتي
اكتشفتي بالصدفة انتي مو عاقر وما بيج خلل يمنع الحمل
انقهرت عليج من حجيتي وية سيف
وعمتي اباوع عليهم هم رجعوا يستغلونج من جديد
وكعدوا يمثلون ان همة هم ضحية مثلج
بس الي اريدج تعرفينه

ان عمتي وسيف حايكين كلشي ومتعمدين يوهمونج
بان انتي السبب بعدم الخلفة
بس الحقيقة الي انتي متعرفينها
ان سيف عقيم ميصير عنده اطفال من قبل
من زواجه الاول واحنا الكل نعرف ميخلف

زوجته الاول طلبت الطلاك من عنده وراحت عند اهلها
جان هو يموت عليها مجنون بيها
ووابوها لزوجته جان رجال صاحب نفوذ
كدر بكل سهولة يطلكها من عنده وهو الممنون

حجيت واني مصدومة.. اني اعرف بسالفة
زوجة سيف الاولى بس هو كلي
طلقتها لان جانت وحدة مو زينة

واني مثل الغبية صدكت وصرت احلل من يمي واكول
خطية اشوفه متعقد من سالفة اللبس والمكياج والشك والنقال
وحارمني من كلشي طلع كلة من ورة زوجته
خاينته وهو متعقد منها

.. لعد ما سألتي نفسج ليش
سيف من شافج بقة يحوم عليج واتقدملج لامرة ولا مرتين.
وكام يدزلج اخته شهد حتى تقنعج

لان عرف بيج حلوة وفقيرة وما عندج سند وابوكم وضعه تعبان لا يحل ولا يربط
فكال هاي الي جنت ادور عليها

سمعيني زين ضحى اباوع عليج اليوم كاتلة روحج حتى يعزلج بشقة
كل همج حتى ترتاحين من الكراب والخدمة وظلم عمي وعمتي

الي انتي ما تعرفينه والي اني اجيتج مخصوص عليه
اريدج تعرفين ان سيف متزوج عليج وحدة ثانية
ومكعدها ببيت لوحدها مو شقة لالا..... بيت
ومو بس هيج عمتي تعرف بيها وهي خاطبتها بيدها له
بس بدون ميعرف عمي ابو سيف بالبنية
وحسب الي افتهمته ان هو مبقي السالفة
بالسر لان البنية المتزوجها وحدة مو زينة

وهو ديتونس وانتي كاعدة تاكلين تبن
من وراه ومن ورة اهله وكاعدين يمنون عليج بالفتافيت

بنات متدرون شصار بية من سمعت اخر كلامها
احس اجيت اموت من الشوطة
كلشي اتحملت على ايد سيف ورضيت اكل وحل
واسكت واتحمل

بالاول عقلي مكدر يتقبل كلامها واتهمتها
ان هي تريد توكع بيني وبين سيف علمود ضربها واتعارك وية زوجها.
اي ووين جانت عني بكل هذا الكلام. بس مع الاسف هي كالت

.. صحيح كلامج اني اكره سيف لان هو مو بس
ضربني واتعارك وية رجلي لا هو حتى طرحني
جنت حامل ببداية حملي وهو الحيوان سقطني
والي قهرني عمي الشفية ما حجة وياه ولا حتى كلف نفسه يعاتبه

بس الي كاعد اسويه راح اعتبره.
عمل خير اريد اكسب بيج ثواب
وبنفس الوقت اكسر خشم سيف واخذ حقي منه النذل
وافضحه كدام عمي
وعرفت بيج ما راح تصدكيني

راح ارسلج صور عرسه على الواتساب
رسلتهم الي واني اجيت اتخبل وصرت اكمز مو غيرانة عليه
لا بس ظلم وهضيمة سيف يكسرني هيج كسرة

سألتها .. زين انتي ليش اجيتي وكلتيلي الي
ليش متروحين تاخذين صور عرس الحيوان
وتفضحينه عند ابوه.

فرح.. لان اعرف كلش زين سيف وعمتي ا
ذا عرفوا بية اني ورة سالفة فضيحته عن ابوه
خاف ذيج المرة بس ضربني علمود اتدخلت
بعركتهم هو وزوجي
هالمرة متأكدة ما راح يسكت الا يطلقني من اخوه
ويهجم بيتي وهو وعمتي
وبالحقيقة بعد الي سووه وياج ما استبعد كلشي يسوو وياي
مو بيعد حتى يتهموني بشرفي حتى زوجي يطلكني

شيماء.. لج ضحى هذولي شنو عيالج يخوفون
ضحى.. اهووو شحجيلج عنهم قليل
المهم اختكم ظلت تحوم منا لحد ما رجع عمو ابو سيف
وفضحته هو وامه عند ابوه
وابوه حرك البيت عليهم وسيف من عرف بية
اني ورة السالفة هد علية مثل المخبل وصار يضربني
عبالك ديضرب برجال ولزم نقالي كلي فتحي
خلي اشوف الصور من رسلهم الج
اني رفضت كلت هي كتلة واكلتها
وهو المخبل كام وكسر النقال براسي
وما اكتفى لزمه سواه وصل

واني من حركة كلبي كمت احجي بكل غضب
.. لك سيف تتزوج علية فوك ما انت عقيم
ولا ونوب الي متزوجها وحدة ساقطة ومفرعة
واني دافني جنت احجي وهو وية كل كلمة. اكولها
هو يزيد بالضرب اكثر

بعدها تركني بالغرفة مجنزة من الالم
كمت بية ما بية ورحت لبست عباتي
ورحت وكلت لعمي اني طالعة لاهلي
ومستحيل بعد ابقى على ذمة واحد مخبل وعقيم
كله خلي يطلكني

اني جنت احجي وية عمي وابجي
يمة وما احس الا كام العياط شنو السالفة ما اعرف
التفتت لكيت سيف بيده مسدس ويريد يهد علية
واخوانه بالكوة لا زمينه

.. ولج ساقطة بنت العار انا وحدة كلبة بنت كلب
تعيريني وتهددني بالطلاق
ولج والله اليوم موتج على ايدي

جان يحجي

اني شفته هيج واني رجلية بادت من الخوف
عمتي كالت روحي رجعي لغرفتج واتكفي الشر
اني خفت ركضت اريد اروح لغرفتي
ما احس والا صوت طلقة وبعدها

حسيت شي حاد حار نار اخترق ظهري شلون وليش
وشوكت صرب بس اسمع عياط خالتي وصياح اخوانه
بعدها صار كلشي مشوش بذاكرتي
ما وعيت الا واني بالمستشفى وانتوا يمي

حضنتها شيماء وكلتلها
.. الحمدلله الله قدر ولطف بحالج لان يتيمة وفقيرة ومالج
احد ربي فوق الكل
وان شاء الله تتطلقين منه

.. الله يسمع منج
وبعدها اني والبنات صرنا نسولف
وتذكرت موضوعي وية مروة
.. اكول مغوة (مروة) مكلتيلي شنو كالت طبيبة
التجميل. من حجيتيلها عن الوحمة
مروة.. اي صدك ذكرتيني

قبل يومين سالتها عن الوحمة ووصفتها الها
كالت افضل تجيني حتى افحصها واقرر شنو تحتاج
بس من خلال وصفج لها على الاكيد
راح تخضع لعدة جلسات لأزالة الوحمة بالليزر
خلي تجي حتى اعرف كم جلسة تحتاج بالضبط

وقررت استأذن من قاسم
واروح خلال هاي الايام

بعدها اني اتصلت على قاسم حتى يجي يرجعني للبيت
سلمت على خواتي

حضرت نفسي بس هالمرة لا مكياج ولا كعب عالي
ولا ترتيب

وصل واتصل علية وطلعتله وهو سلم عالبنات
صعد بالسيارة وباوع علية

.. هاي شنو هادي والله مبين عليك التعب صاير جنك كتكوت اصغير

جان هو يحجي واني عيوني ما بطلت ترسم معانيه بكل
لهفة
جاوبته .. الي صاغ (صار) بضحى مو شوية
سألني .. اي صدك مروة شلونها سمعت بالصدفة
ابو سيف مهددها واتصلت عليها وكلتلها اذا تريد مني
اتدخل واروح اشوف شغلي وياهم

كالت لا تروح الهم خليهم بالعكس هذا كله لمصلحتنا
خلي القانون ياخذ مجراه وفهمتني شنو سوت بالضبط

.. قاسم اني ما اعغف (مااعرف) شلون اشكغك (اشكرك)على وكفتك انت واهلك

.. اهوو هم رجعنا لهاي السالفة
يابة وداعتج. هم لو واحد غيري هم راح يوكف هيج وكفة

انتي ما انتبهتي لعمي ابو فرزدق وصهيب
شلون سكنوا المستشفى
يعني اذا صهيب الما يعودلكم
شفتيه شلون كل شوية يجي يسألكم خاف محتاجين شي
بس حق الجيران يحتم عليه يوكف وياكم

فلا تكعدين كل شوية فاتحة الموضوع وياي وتتشكرين

وصلني للبيت وراح ما نزل وياي
وشفت البنات كلهم متجمعات
منى.. لج والله البيت ضوجة. همزين رجعتي

وبعدها بقيت يمهم جوة والتهيت وياهم بالحجي
وكل شوية وحدة تسألني سؤال عن ضحى وسيف
باوعت للساعة صارت بالتسعة واني كلش تعبت

اترخصت منهم وصعدت فوك لغرفتي
وسبحت وذبيت عني تعب الاسبوع كله
صحيح جنت ارجع لبيت مروة لان قريب عالمستشفى واسبح وابدل ملابس وارجع لضحى بس مو مثل ما ببيتي وبحمامي

وبدلت ملابسي
ولبست شي خفيف مخصر على جسمي الدلعة حفر واسعة
وعدلت وجهي شوية وفتحت شعري ورتبته

وبعدها صرت ارتب بالغرفة وعندي كم شغلة اريد اكملها
لان من دخلت للغرفة لكيتها نظيفة البنات ما مقصرات
بس اني طلعت ملابسي من الجنطة وصرت ارتبهن

دخل قاسم للغرفة
واني كبل كمت من مكاني ورحت وكفت يمه
بكل لهفة اباوع عليه باوع علية وضيك عيونه

وكال .. هادي ما اعرف ليش احس بيك هواي متغير
انت مو هادي الاولي شنو. شجاك وشغيرك
جان يحجي وعيونه ما فارقتني

.. عاد كولي التغييغ (التغيير) الي حسيته نحو الاحسن لو نحو الاسوء
.. بالنسبة لوضعنا هذا التغيير راح يشكل تهديد

عرفت ان قاسم ديعاني يعني هو متأثر بوجودي بقربه
انتبهت عليه انطاني ظهره وكال
بسرعة حضريلي الحمام اريد اطلع

باوعت للساعة .. لحظة وين طالع هسه الوقت كلش متأخغ (متاخر)
اباوع عليه راح فتح الكنتور وطلعله طقم ملابس فخمة
حطهم عالسرير. واخذله منشفة وباوع
علية .. طالع معزوم
عافني ودخل للحمام يسبح
بعدما خلص من الحمام بدل ملابس
وكشخ على اخر حباية واتأنق ورش العطر
وسلم علية وطلع

صرت اغلي من الغيض
شوية وجان تدخل علية هالة وهي تباوع علية

.. اكلج هدهد امي تريدج
.. ليش تغيدني صايغ (تريدني صاير) شي
.. والله ما اعرف بس اشو هي شافت قاسم يريد يطلع
واتعاركت وياه قبل لا يطلع

وكلشي ما افتهمت
.. والله حتى اني مثلج كلشي ممفتهمة
نزلت جوة ورحت لخالتي اباوع عالبنات كلها
تباوع على وجهي جنهم يدورون على فد شي ضايع منهم

صاحتني للغرفة مالتها
الله يستر صار بيها اجتماع سري
دخلت وراها وسديت الباب
وباوعتلي
ام قاسم.. اكول شنو صاير بينج وبين زوجج

عقدت حواجبي مستغربة سؤالها
.. كلشي مصايغ (مصاير)
ليش خالة تسألين
.. لعد اذا ما كو شي صاير بينكم زين قاسم ليش
طلع بهيج وكت

فتحت حلكي وبقيت مصفصفة كلشي ما افتهت
شبيها خالة
.. سألته كال معزوم بغة (برة) وية جماعته

اباوع عليها ما تعرف شنو تحجي بالاخير كالت
.. ما اعرف ليش اكو شي غلط بعلاقتكم انتوا الثنين

هاي اليوم شبيها خالتي هو ابنها الي طلع اشو فاتحة اليوم وياي تحقيق

.. خالة ليش تحجين هشكل

.. يعني رجال مرته بعيدة عنه صارلها اسبوع
لا كلف روحه يتصل عليها ولا حتى شفت منه لهفة
او اي تغيير يدل على هذا الرجال يفتقد زوجته

يعني مو غريبة شوية هسة اني دا اشوف بناتي
من يجون عندي لازم ازواجهم يتصلون عليهم
هاي من غير اذا ما يجون بنفسهم
يعني اليوم لو ما انتي متصلة عليه
جان هم بقى عادي عنده تباتين بعيد عنه

وهسة من رجعتي كملت السبحة
وعافج وراح طلع
زين بعد هذا كله وتسأليني ليش
احجي

جانت خالتي تحجي واني كلبي وكع بين رجلية

.. لا خالة بالعكس قاسم دائما يتصل بية وما ترغكني (ما تركني)
وطول هاي الفترة يجيني للمستشفى ويطمن علية وعلى
ضحى ولاتنسين هو مجبوغ (مجبور) لان اني طلبت ابات يم ضحى

ام قاسم.. خالة هدى اخذيها مني نصيحة لاتعودين زوجج على بعادج
صحيح انتي التهيتي بأختج
بس رجلج هم اله حق يمج تنتبهين عليه

كون هسة المفروض منج متخلينه يطلع وانتي صارلج هواي مشايفته
يعني تفرين عقله بكلامج
وصلوات انتي حلوة وما ناقصج شي

دنكت راسي وجاوبتها .. صاغ (صار)خالة منا وغايح (ورايح)
غاح (راح) تشوفين بعينج

ابتسمت وكالت .. الله يبارك بيج ويوفقج ويهديكم انتي ورجلج لحياتكم

طلعت من يمها
ورحت كعدت يم البنات وهالة اشتغلتني تحقيق
حجيتلها الصار
هالة .. مو كتلج ام قاسم ما تفوتها هيج سوالف
لا بد ويجيكم يوم وتوكعون بلسانها
.. اشش كافي سكتي
وصل هشام واتلكوه الجهال وخواته
وهو شكله يعرفلهم جان محمل علاليك حلويات

جنت اباوع على هشام والجهال شلون متجمعين
عليه التفت ما لكيت هالة
اباوع هاي وين راحت
شوية وجان اشوفها واكفة يم الجهال تتعارك عالحلويات
هههههه صدك عوبة

صعدت فوك لغرفتي
مر الوقت والبيت صار هدوء
واني بقيت انتظر قاسم اشو هذا كلش اتأخر
شنو السالفة
اتصلت عليه ماكو ما يرد علية مرة مرتين
صدك ضجت
التفكير راح يخبلني

سمعت صوت ام قاسم دتصعد الدرج وتحجي بالنقال
ما اعرف وية منو
ام قاسم.. والله هذا قاسم راح يموتني ناقصة عمر
هسة راح اسأل هشام واشوف

رحت ركض لبست محرم الصلاة على ملابسي
انتظرتها. دكت باب غرفة هشام ودخلت
واني كبل رحت امشي على اطرف اصابيعي
وصرت اتسمع عليهم طبعا هذا مو طبعي
بس كل شي جائز بالحب
والغيرة لا تخضع لقواعد
اسمعهم يحجون

هشام.. يمة انتي ليش معظمة الامور ترة قاسم مو جاهل
ويعرف شنو ديسوي

ام قاسم.. يعني بشرفك متكلي اخوك . شوكت ناوي
يبطل هاي سوالفه.
كل فترة رايحلي يسهر برة وما يجي الا على وجه الفجر

هشام.. اكلج يمة ترة عادي هي مو عجبة
كلنا نروح حفلات ونسهر وية اصدقائنا

ام قاسم.. عزة بعيني لا تكلي انت هماتين
تسهرلي بالملاهي والله اطين عيشتك

هشام يضحك.. حجية عفية لا تدورين علية
هو كلما في الموضوع احنا نروح للونسة
وطرب وفنانين وغيرها من هاي السوالف

وانتي شوفت عينج
قاسم كاضيها كلة شغل وحتى ما فارغ يحك راسه
يعني لا تبخلين عليه بشوية سهرة ليلية بيوم واحد بالاسبوع
يرفه بيها عن نفسه وية جماعته

يمة همة يحجون بسالفة قاسم
واني كلبي اجة يوكف
وجسمي صار كله يرجف من الغيرة
قاسم يسهر برة وللصبح واني الغبية عبالي معزوم
يعني ملاهي يعني نسوان ورقاصات
والله يعلم شنو وراها. معقولة

سمعت صوت ام قاسم تريد تطلع
رحت ركض رجعت لغرفتي
سديت الباب واني ارجف من الخوف والغضب

حلفت اليوم ما انام الا يرجع انتظره
صرت اتذكر اثير من جان يسهر بالليل ويجينا سكران
بتالي الليل معقولة قاسم هيج من هذا النوع

والله وجان تصير الساعة بال٢ بالليل
صرت اغمض عين وافتح عين احس بعيوني دبكت
وهو الاخ بعده ما جاي
وبهاي الاثناء دخل قاسم
كمزت من مكاني وطارت النعسة من عيوني
باوعت عليه اتفحص شكله وملابسه
وعيونه. اراقبه شلون دخل يمشي بصورة
طبيعية بالغرفة

وهو بالمقابل هم رفع حاجبه يباوع عليه

سألته مترددة .. قاسم وين جنت غاجع متاخغ (راجع متأخر)

جنت منتظرة منه يحجي مثل اثير من يجرجر بالحجي
بس ماكو جان جوابه بكلام عادي وطبيعي

.. اني مو كلتلج معزوم وية جماعتي
اقتربت عليه وبعيوني خوف على امل
.. اي بس مكلتلي عن مكان العزيمة
اباوع عليه عقد حواجبه

.. اكول اصحي على نفسج اشو انتي دتنسين
نفسج وكاعد تحققين وياية. مثل زوجة غيرانة
على زوجها. خلي اذكرج خاف نسيتي روحج

حسيت بخوف من غضبه
وهنا جنت مااعرف يا ترى غضبه من ورة سؤالي
لو هو خاف مثل اثير من يشرب

جاوبته والدمعة بطرف عيني
.. قاسم اني اعغف (اعرف) مو من حقي احاسبك
بس صدكني خايفة على نفسي
لا فد يوم ترجع لي بسهغة من السهغات (بسهرة من السهرات )
تجيني مو صاحي وتأذيني وتدغي بغروحك (ومتدري بروحك) مثل ابوية

اتسعت عيونه متفاجيء .. الله يلعنج انتي منين تجيبين هاي الافلام
طلعتي اضرب من امي
شوفي حبابة ولو انا ما مجبور ابررلج
بس علمود تتطمنين على سلامتج

انا اروح اسهر وية جماعتي حفلات فنانين هيج تغيير جو لا اكثر
ما انكر قبل جنت اشرب بس من وفاة
الوالد الله يرحمه حرمت المسه
خلاص هذا كل ما في الموضوع هسة تكدرين تتوكلين
وتنامين وتتطمنين على نفسج ما اسوي بيج شي يأذيج

درت وجهي ورحت اريد افرش بس فجاءة طرة على بالي سؤال
.. قاسم هناك هم اكو غاقصات (راقصات) يعني ونسوان
حجة بغيض .. روحي نامي هذا السؤال مو من ضمن
سلامتج فهذا الشي ميخصج

دنكت راسي وانتبهت لروحي بعدني بملابس احرام الصلاة فرشت بالكاع
ورفعت احرام الصلاة ونزعته جنت لابسة جواه
نفس ملابسي الخفيفة سمعت صوت غلط ولعنات
التفتت لكيته يباوع علية

وكال .. جنية هسة اذا اجي اسحلج محد راح يلومني

حجيت واني اشهك .. ها قاسم انت مو كلت اني ما اشغب (ما اشرب )

.. ها جنية شدخل هاي بهاي
.. مو اشوفك كمت تغلط وتلعن وكلت غاح (راح) اجي اسحلج
وهاي كلها علامات الشغب (الشرب)

عزة اجة هد علية وعض كف ايده بغيض
.. من احتركت عشيرتج نار ونفط.

لج سمعيني زين قبل لا اسحلج
ترة مو بس الشارب يفقد عقله من يسكر

الله وكيلج حتى الي عنده جنية مثلج يفقد عقله وياكل تبن بثنين ايديه
كلها نفس العلامات فاحسنلج انتبهي لروحج
لان حيل زودتيها ودتنسين نفسج ودتلعبين بالنار
جان يحجي وعيونه علية يكصني من فوك ليجوة
بلعت ريكي
وراح بدل ملابسه ونام عالسرير

شيماء

بعدما اتطمنت على ضحى بييت مروة
ومريم تدير بالها عليها
واني كلتلهم ارجع لبيت سليمة
خطية مريضة ما اكدر اتركها لوحدها تحتاج من
يأكلها ويغسللها وينطيها علاجها
مروة كالت
.. انتي ليش مبتلية
اتصلي على ولدها خلي يجون يخدمون امهم
.. ماكو اتصلت على امجد بالبداية كلي انا مشغول بمعاملة البيت ويفتر بالمحاكم
ونوب ورة كم يوم رجعت اتصلت عليه حتى اشوفه
ماخلصت هاي الطلابة
اشو هذا كام حتى ميرد على اتصالاتي

واثير من يوم حادث ضحى اتصل عليه ميجاوب
وهاي السالفة عرفناها من يصير عنده شوية فلوس
جوة ايده يتخبل ويظل يلعب
وعلى طاري اللعب
تصدكين البارحة من رجعت للبيت لكيت
بطالة الشرب مالية البيت والريحة تكتل

احس كلبي صار نار عليه ادور عليه الكاه غاط بسابع نومة ما يدري بالدنيا طشت لو رشت

بالله فهميني شتصرف ما ينطيني كلبي اعوفها
تبقى صاحبة فضل

مروة.. اريد اعرف بشنو فضلت علينا

.. على الاقل احسن من ابونا خلتنا نعيش ببيتها
وهي في غنا عنا بس احنا جنا نحتاجها

هسة دار الوكت وصارت هي بحاجتنا
هذا رد الدين يامروة

جنت بالمستشفى
قدمت استقالتي بالمسشفى وهاي اليومين كاعد اكمل الاوراق مالتي حتى تصير استقالة رسمية
جنت اودع بالممرضات زميلاتي
والدكتورات.

انتبهت لحيدر ديشتغل وية كادر الاجهزة
بسرعة بدلت الطريق
كلبي نهض اول مشفته
اتذكر خلال ذاك الاسبوع من اجة يتحمد السلامة علمود
ضحى وسألني بالصدفة وكال
شنو اخبار شاكر خو ما بعد رجع يضايقج

اني بوكتها اتفاجئت بموقفه
وصرت اتكلب بأفكاري يعني شنو معنى هذا اهتمامه
حيدر يحبني لو لا

كل امور حياتي مخبوصة بهاي الفترة
وحيدر وغموضه حيرني وزاد
بهوسة افكاري على اساس اني عايزة
وجع كلب

وصلت لغرفة الدكتورة سولاف حتى اسلم عليها لان اليوم اخر يوم الي بالمستشفى
وسلمت عليها لكيتها تحجي وية ولد صغيريجي عمره
بحدود ال٨ سنوات
شافتني وابتسمت وكالت
.. كلة مني فتحت على روحي باب واقترحت على مروة تعرض عليج الشغل
وتالي اخذتج من عندي تدرين راح اشتاقلج

الدمعة لمعت بعيوني
.. والله حتى اني راح اشتاقلكم

جنت احجي وياها واباوع عالولد
لابس جنطة المدرسة
دخل علينا حيدر احس كلبي صار يرجف

فجاء وجان اسمع الولد الصغير اول مدخل حيدر
كال .. بابا يالله كلش تعبت اريد ارجع للبيت
حيدر.. اصبر بابا هسة اخلص شغلي ونروح للبيت

جان يحجي وية ابنه وعيونه علية وسألني
.. شيماء سمعت بيج مقدمة استقالة. وراح تعوفين المستشفى
جاوبته الدكتورة سولاف
وكالت .. اي لان راح تشتغل وية اختها مروة
وكعدت الدكتورة سولاف تشرح لحيدر نوع عملي واختصاص مروة

همة يحجون
واني جنت بعدني ممستوعبة الصدمة
كمت من مكاني و اترخصت منهم وسلمت حتى ما اعرف شنو حجيت وياهم
وطلعت من يمهم واني كارهة روحي
ومقهورة اكثر على غبائي الماله حدود

حل ياكلبي تستاهل هسة بعد هم ترجع تفكر بي
مو كلتلك جوز منه حبه راح يتعبك
طلع عنده عائلة مثل ليث والله يعلم بعد شنو يخفي بغموضه

هدى
جنت فوك بغرفتي منتظرة قاسم
اتصلت على مروة حتى اتطمن على ضحى
وحجتلي على موقف قاسم وياها وكالت امانة تشكرينه
تعبناه ويانة
جانت مروة تحجي
يوم عن يوم صار حب قاسم يكبر بكلبي
وبيومها اتخذت قراري وكأن اتصال مروة انطاني
الدافع حتى اقدم على هيج خطوة
وصرت اجهز نفسي وهالمرة

اختاريت غير ملابس هالمرة لبست الثوب الابيض
لان قررت اوهب نفسي لزوجي
واريده يعرف بحبي اله
اباوع لروحي بالمرايا جنت لابسة ملابس نوم
بيض جان شكلي عبالك عروسة باول ليلة عرسها

اتصلت عليه اسأله عن مكانه
كال اني طالع بشغلة مهمة

اني بأخر فترة صرت
اهتم بكل امور قاسم ووين يروح اني اكون متواجدة وياه وحتى من يدخل الحمام اوكف يم الباب اسولف وياه وهو يسبح
ومن يتريك او يتغدة او يتعشا لازم اكعد يمه حتى لو ما اكل اهم شي ابقى اسولف وياه
ابتسمت واني اضحك على خبالاتي وياه الي تخليه
يبقى واكف عاجز عن الكلام

..
شيماء
رجعت للبيت واني حالي صار اقرب للجمود
دخلت جوة للبيت لكيته مثل ماهو اظلم
مخنفس دخلت على سليمة بس شافتني
فرحت جانت متمددة بفراشها تكسر الكلب
وكالت .. ها شومة اجيتي جنت منتظرتج

جاوبتها وكلبي مليان حزن وهموم
.. اي رجعت
كالت .. شومة انا جوعانة
حطيت جنطتي عالميز وكلتلها
هسة بس خلي ابدلج واغسلج

لان جانت ريحة الغرفة نتنة
اني متعودة على المرضى وشلون ابدلهم واغسللهم
لذلك جنت مرتبة لسليمة كرسي بلاستك بالحمام اكعدها عليه واكعد اسبحها
وبعدما خلصتها وبدلتها ومشطتها اخذتها للغرفة

هي مرات تساعدني وتشيل نفسها ومرات
اني اشيلها بية ما بية
اخذتها للغرفة ورحت حميت الاكل وغديتها

وصرت اهوي البيت من ريحة الشرب مال اثير
الله يلعنه

اتصلت عليه اريد اعرف وين اراضيه
احس بروحي صرت ام اثير وسليمة ولازم
اهتم بأمورهم

جنت خايفة عليه لا يسويله مكسورة جديدة
ويخلينا وحدة تدعم باللخ

ماجاوبني ولا رد على مكالمتي
بين ما خلصت شغل البيت وصار الليل وانطيت سليمة علاجها
رحت بغرفتي فرشت ونمت
جنت غاطة بالنوم
بس فزيت على صوت اثير السكران
فركت عيوني وشمرت الغطا
ورحت عليه اريد اشوفه وتاليتها وياه لشوكت يبقى هشكل يشرب زفت

جنت دا البس نعالي وجان ينفتح الباب
ويدخل علية شاكر بالغرفة
ويسد الباب وراه وعيونه كلها شر
شكهت بصوت خايفة

يتبع