رواية اسرني كيدها الفصل الثالث 3 - بقلم الكاتبة ايات الـ سند

بقلم : ايات الـسند
السلام عليكم

قبل لا نبدي صوتو وعلقو حتى اشوف تفاعلكم واتحمس

أتذكُرُ أول الأيام لما
تلاقينا وكيف جرى الكلامُ؟
أتذكر ساعةً فيها ابتدأنا
هوانا وابتدا فينا الغرامُ؟
أتذكر كم رسمنا من خيالٍ
_______

فزيت ع صوت امي :كومي راح نروح ونعوفج

انا عبالي مثل كل يوم تضحك علية عمود اكعد : يمعودة خليني نايمة

ام جمان : بكيفج ضلي نايمة جتي الزفة راح نطلع

اني كمزت من مكاني تذكرت العرس : يبووو هسه شنو الحك

ام جمان : كتلج كومي يلا بسرعة كملي

جنت اكلب بهدومي وادور شي البسه طلعت لبسة لبستها
ماكو مدا يرهم وياها حجاب وحذاء

طلعت اركض ع غرفة اختي حتى اخذ شي منها

جمان : ياربي ماكو شي البسهه

هاجر (مرت اخو جمان) : يلا بسرعة مضل وكت راح تجي الزفة

جمان : صبري خل اغير ملابسي ماكو شال يرهم ويا هاي

بسرعة غيرت لبسي لبست جينز اسود وسترة شوي طويلة لون بصلي ولبست الحجاب

جمان : يولو اريد حذاء

بس منو يسمع كلمن ملتهي بروحه

طلعت من الغرفة ورحت يمهم لكيت مشغلين اغاني وجاية العروس من الصالون احنا اساساََ بتنا يمهم فتت الهم اركص هذا نقطة ضعفي ورا شوي
جرتني اختي بنت مرت ابوية

رغد : تعالي يولي خل احطلج شوية مكياج

جمان : لا ما أريد

رغد : بلا هوا عرس خل احطلج شوي

جمان : مو يكبرني ولج رغد

لزمتي كبل وحطت شوي ع عيوني مكياج انا ابد ما حبيته وحسيت كبرني فوك عمري ما احب هيج كمت امسحه بس اجتي الزفة وما لحكت امسحه رحت اركض

فات العريس اخذ العروس وطلعو بالحديقة انا رحت اركض أدور ع امي حتى اروح وياها بالزفة لكيتها ورحت وكفت يمها

*العرس مال اخت هاجر (غفران) بس علاقتهم حيل قوية

واكفين جان اشوف ولد لفت نظري لابس قميص اسود وجينز وواكف يم الباب ويكول لهاجر حتى تهلل اضن كرايبهم

درت نظري عنه ومشيت ويا امي وصعدنا بالسيارة اني وامي وهاجر واختي الكبيرة زينب

وصلو ع بيت العريس ونزلنا كعدو العرسان واحنا كعدنا بزاوية راحت عيني ع نفس الولد دا يركص خرب بحظك وبعدين اخذ الكاميرا من اخوه وصوره ويا العرسان ودرت احجي ويا اختي ورجع دحكت عليه لكيته يدحك علية كبل نزلت راسي

عزا العزاج جمانة ليش دحكتي عليه بعدها رجعنا للبيت وتعشينا ونمنا نومة جماعية من التعب

ثاني يوم كاعدين ومجتمعين العصر وكاعدين نشرب جاي جمعة بنات وهيج وجانو دا يحجون ع العرس وجابو الولد نفسه بالطاري اشو اني كبل كمزت

جمان :شنو اسمه

هاجر : اسمه أسر

جمان : نفسه الي لابس قميص اسود

هاجر : اي هذا ابن عمة العريس

جمان : عزا شلون صاك

كلت هيج لان ماكو احد غريب واني ما يكعد بلساني شي

هاجر : يمعودة اكيد زعطوط

جمان : لا ليش بالعكس مبين كبير

هاجر بشقة : ليش لازم عجبج

جمان : دنجبي انوب يعجبني بية خير خل اكمل دراستي

ضلت السالفة ببالي ما اعرف ليش

__________________
اسر

اليوم عرس ابن عمتي كمنا حضرناه وكضيناها نضحك ونصنف عليه

أسر : ها لك عريسنا تريد افوت اغسلك

عمر (تؤام اسر) : يي يلا سبحة العرس

محمد (ابن عمة أسر) : انجبو لكم عارات امشي ولي

اسر ضحكت و كتله : بس اصبر والله والله غفران راح تخليك تمشي عدل

محمد : ولك بس خل تجي يمي واخيرا راح تصير الي
،عجل انتَ ايمتى تتزوج وتخلصنا منك يول عمر تزوج ضليت انتَ

اسر : بعد اني مطول ما ببالي هسه يلا يلا كمل لبس
كمل وطلعنا بالزفة لبيت العروس

هو دخل جوا واحنا ضلينا نهوس ع الباب

حجيت ويا اخت العروس حتى يهلهلون من يطلعها شو ع الصامت
شفت بنية واكفة اضن يم امها وهاجر يمهم هية رفعت راسها شافتني ادحك عليها دنكت ومشت

طلع محمد والعروس وصرنا نهوس الولد برا مشت الزفة
دخلنا بيت العريس وذبحو ذبيحة قبل ما يدخلون العرسان

دخلو اني جنت ع الباب اجت اختي الكبيرة وبنات خالتي يجرون اركص

اسر : هههههه يمعودين دروحو

مريم (بنت عمي) بدلع : يلا اسر تعال ويانة.

أسر :لا عيب اكو نسوان هسه مو محتشمات ما ياخذون راحتهم، وادحك بس لاماني مربم لابسة حصر وواكفة يمي استغفرالله

اماني(اخت اسر) : بشرفك تعال

أسر خزرتها شلون لزكو

مريم : يمعود ماكو احد غريب جوا وكلهم لابسين حجاب

اسر : بس شوي واطلع مو تجلبون بية
فتت للديوان صدك خافة الناس وباقي بس كرايب احسن جرتني اماني من ايدي تريد اركص وياها ركصت هيج ثواني لان حرجت كدام النسوان جرتني وياها

صاح بيا عمر من وصلت الباب هوا جان يصور بالكامرا بالعرسان كال : ما تجي تاخذلي ويا محمد صورة

اخذت الكامرة منه حسيت واحد جاي يدحك علية رفعت راسي شفت الي جان بالحديقة هيج نفسها بسرعة دارت وجهها وانا صورتهم عمر ومحمد اكثر من صورة ونطيته لعمر شاورته : ما تطلع منا لو تكيف ع البنات

عمر: ههههه خرب مو جاي اخذلهم صور

اسر : شهل جذب خو انطي الكامرة لاماني تعرف تصور اوف منك

طلعت برا بالحديقة ويا الولد بعدين صاحو ع صاحبنا سايق اجا ويانا بالزفة كالولها تعال وصل اهل العروس

كام الهم وشفت طلعت هاجر وهية وبنية بطولها ومرة جبيرة رجعت احجي ويا الولد وبعدها الكل راحو كعدنا ب ٩ نتعشة ومجتمعين كل الكرايب كملنا وتعللنا شوي وفرشو النا بالديوان بس الولد لان نص الكرايبين بايتين ونمنا دايخين من هوسة العرس

كعدنا الصبح حتى رجع لبيتنا صار يومين هنا
لبست وكملت كعد محمد كال هاي وين

أسر : هاهية والله رايحين

محمد : يمعودين دضلي عمة

ام اسر : لا تسلم بعد عمري

محمد : زين انتَ اسر دضل يمي

اسر : لا شلون نروح نص ونص هاهية والله

محمد : دنجب خلي عمر يوديهم وانت ضل هنا عود بعدين روح

اسر :اوف منك عجل ماشي خل ارجع انام بعد وكت هسه

رجعت نمت وكعدنا بعد ساعة تريكنا و طلعنا انا ومحمد نجيب غدا خابرت صديقنا اجى بدون ما يشوفه محمد جان يغسل راسه لان حيل جمر الدنيا

اجا ضياء (صديقهم) من وراه وفتحت بطل الببسي وطشه ع راسه

محمد :لا يربكم هذا شنو اشو دبك

اسر ضحكت : اكلتها عريسنا
ضل محمد يغلط علينا واحنا نضحك عليه
حدرت اشتريت بطل مي واجيته غسلت له
وحدرنا جبنا غدا من المطعم ورجعنا ع البيت

كملنا اليوم عادي ثاني يوم الصبح ردت اروح امي خابرت اسر وعزمته هوا ومرته ع الغدا

محمد : يلا لعد نمر ع اهل غفران تسلم عليهم وشوي ونحدر لبيتكم

اسر : يلا بالعجل (بسرعة)
بدلت وهما كملو وطلعنا وضلت لبيت اهل زوجته هما نزلو انا مقبلت انزل : يمعودين روحو انتو انا انتضر

محمد : يلا ترا ماكو احد بس احنا نكعد
نزلت وكعدنا انا محمد بالديوان وحدنا وفاتت مرته جوا شوي ومحمد خابر عليها حتى تطلع كمنا حتى نطلع للسيارة هيا طلعت ورانا ووياها امها وبنات لابسين حجاب لمحت هاي الي شفتها بالعرس نزلت راسي وطلعت كدامهم للسيارة وشوي وهما طلعو ومشينا
_______________________

جمان

اليوم الي وراه كعدنا من وكت لانو راح تجي العروس غفران تسلم ع أهلها
اجتي وكعدنا البنات وياها وسوالف وقبل ما تروح كلت الها

جمان : منو هذول الصاكين الي يم رجلج بالعرس ، ما ردت اكول اسمه وحده

غفران : هذول تؤام ولد عمته

جمان بمزح : اها ولج عود دزيلي حساباتهم إذا عندج

غفران : هههه تمام من ارجع

اني عندي ميانة وياها وهيج صار عندي فضول عنه

طلعنا وراها جان يطلع من الديوان رجلها وولد وياه انا استحيت كلت جوز اخوه أو شي ودنكت بس قبل ما يطلعون خطفت نظرة طلع أسر عزا هذا شجابه ما عنده أهل مكضيها يمهم

انتبهت ع نفسي ولمت نفسي عيب الي دا تسويه استحي ع نفسج فتت جوا واني ببالي اكول عادي عمود شكله حلو يضل ببالي وتناسيت السالفة

العصر جنت كاعدة وضايجة تذكرت كالت ادزلج الحساب
كلت هل ادزلها رسالة دزيت وكتبت ولج مو كلتي راح ادزلج حسابات هذول الصاكين

عفت الموبايل ورحت اكل ورجعت عليه
وضليت اكلب ضايجة ورا شوي جان توصلني رسالة فتحت عيوني ع وسعها
خلتني اجمد بمكاني.....

يتبع........