ازمة ضمير الفصل الثالث وستون 63 - بقلم Rozaya

احداث جديده ازمة ضمير ..
للكاتبه روزايه ....
الجزء الاخير .....

ثريا.. بين الضحك والسوالف دك تليفون امنيه كالت هاي نيران فتحت خط وهي تسلم عليهه ووجه امنيه مايتفسر
وهي دكلهه يضربج؟؟ وانتي ساكته ؟؟باجر
يجيج فاروق شكالوله تايهتله...

بنفس اللحظه الي امنيه تحجي ويه نيران دك تليفوني
قيس كمت للغرفه احاجي الحب الحقيقي والعشق ماراح يختفي بيوم وتبقه الگلوب سواجي...

اول جمله اله وهو يكول ثريااا نيران بيهه شي
كلبي مامرتاح صار ايام وعبالك اليوم تفارگنه!!!

ثريا... اخذت نفس عالي وكتله كلبك حس بيهه؟؟
قيس.. سنين فارگتهه وكل ماتتاذه كلبي يتأذه وياهه
صارلي اسبوع ياثريا حته من اكل الغصه ابلعومي ويتراوالي عيونهه مدمعه...

ثريا.. مابيهه شي هسه جانت تحجي ويه امنيه بس انت تعرف
حالتهه واكيد ضايجه وانت حسيت
قيس.. ماتجيكم ابد؟؟ شلون شكلهه صاير نفسهه لو تغيرت؟؟

ثريا.. كبرت !! عيونهه حزينه ... الضحكه محمله هموم
واذا ابتسمت بسرعه عيونهه تكوم تلالي وعبالك تذكر هي
مكتوبلهه الحزن

قيس.. ماعندي صوره الهه بس من جانت صغيره المهم
سلميلي على اخوتي انه جاي اشتغل باوراقي ارتبهن واجي
للبغداد..

ثريا.. مسحت دموعي وكتله توصل بالسلامه ونفرح بشوفتك
اهتم بنفسك احنه كلنه زينين...

سديته منه وكعدت على الجربايه شبعت بجي ليش من دون اخوتك انكتب عليك فراگ وغربه مرات عزة النفس ادمرنه وقيش دمر نفسه بعزة نفسه يحبهه حيل!! لاوالله موحب عشق هيام وهي هم بلعت غصت الفراك واثنينهم يعانون ...

ظليت بلغرفه لحدماسمعت صوت امنيه وهي تبجي على اختهه
طلعت لگيتهم كلهم مجتمعين وتسولفلهم
ادهم.. غير نفتهم عليمن ضاربهه هي موكالت مريض وتعبان
امنيه.. ماحجت بس كالت انه بعد مااتحمل يضربني وعايشه بجحيم

ادهم.. كلما نسأله‍ه دكول زينه يعني الواحد الى متى يكابر ويدمر نفسه هذا كله عناد حته لايسمع باخبارهه قيس راحت بيدهه للنار هسه شنسوي انطلكهه من رجلهه وتكعد وتسكت..

ايوب.. ومنو كاله احنه منطي فصليه انعل ابهاتهم اذا يتيمه يستقوي عليهه خلي يصبح الصبح وانه اعلمه
اوس..اني هم اروح وراك هاي عزيزه قيس والله انتو ماتحسون بي اني لان التوم مالته كلبي يوجعني علي واحس بي شي
ويجوز ضايج ترى الفراك موهين ...

فاروق.. باجر انروحلهه وانشوف شنو السالفه بس ايوب ديربالك تعصب ادري بيك باجر انروح هدادين واخرنه نرجع معتذرين
من وراك

ايوب.. غير اذا طلع صدك ضاربهه وحق الله اكتله
ادهم.. انت صارلك هواي مامتكاون مشتهيلك هوسه
ايوب.. ليش يكتلهه هي مريضه وضعيفه حال لاعدهه ولد لا بنيه شو خدامه اله ولاولاده

فاروق..كولو يالله هي هم عزيزه علينه ومانقبل باذيتهه انروح باجر وانشوف ونحلهه باللتي احسن

ثريا.. كل واحد راح لغرفته وبالي يم اخوتي ايوب اعرفه والله باجر يصخمهه ومايوكف بعينه لاجبير ولاصغير هو حته بعركه اخوات ابراهيم يفزع يتخبل اذا سمع واحد كتل مرته عنده عقده من هالموضوع يمكن لان جان صغير ويشوف ابوي شلون يكتل بامي ويخلي دمهه بطولهه..

كعدت ب7 سويتلهم ريوك جانت جمعه والحجيه توصي بيهم
فاروق من يطلع محافظات تطلع وراه سياره حمايه وهي بكركوك راحوا ايوب واوس وفاروق وادهم ظل يمنه

بالنه عليهم بيهم طبيعه. اي شغله يسووهه يرحون ويجون مايخابرونه واذا نتصل يفتحون خط نشبع رزايل خوب ايوب يحضرنه ومن يجي يفتحه يكول تگرعن راسي...

صار المغرب وماكو خبر اجه ادهم جاب المسواك تلكيته اسأله كال جايين هذوله ببغداد ونيران وياهم هو كال هيج واني عبالك الجانت عندي علاقه بيهه بسرعه بجيت صار سنين ماجايتنه وواصلا طلعت من عدنه مكسوره خاطر ...

امنيه تسوي عشه واني عيني على الباب اذن الاذان كمت صليت ورجعت كعدت كدام الباب بس شفت اضويه السياره صحت اجوو دك هورن ايوب طلع عمر فتح الباب شفتهه شلون تنزل تعبانه الدنيا هاده حيلهه هد...

امنيه وراي بس شافتهه شهكت وركضت شبگتهه وتبجي صوتهن عالي صارن والاخوات اليتيمات وحده ماملتقيه بالثانيه صار سنين ...

رحت شبگتهه سلمت عليهه كوه تبلع غصتهه الانسان المهموم والشايف الويل مرسوم على وجهه دخلنه ليجوه سلمت على البقيه واخذناهه لغرفتي طلعت ملابس من جنطتهه واحنه نباوع على حركاتهه نفسهه نيران العكس اسمهه هادئه وتتصرف وبالهه حته مويمهه..

كمت كملت العشه بمكان امنيه ياقوت تحضر بالسفره
فرشنه بالكاع وكعدنه كلنه هي وامنيه اكلن وحدهن بالمطبخ
جانت هاي رغبتهه لاحظتهه ابد ماترفع عينهه ويه اخوتي
ولحد الان محمله نفسهه الذنب ...

وره العشه جبت الجاي وكلنه مجتمعين ايوب طب يسبح واوس صعد لغرفته بس كلنه انريد نعرف شصار بس مانريد نفتح كدامهه الموضوع صارت ب9 والكل ساكت علما اجه ايوب واواس كالت الحجيه فهمونه شصار؟؟

فاروق.. ايوب يحجيلكم
الحجيه.. هااا تكاون موو؟؟
فاروق.. اكو يوم حجيت حجايه وايوب مشه بيهه اخذته من بغداد لكركوك احجي ايوب الزم نفسك ايوب لاتتكاون احنه صاحبين حق وهو منطيني الاذن الطرشه..

ايوب.. ترى زودتوهه جبتوني الطريق كله تاكلون براسي من وراكم لومخليني اكسرله ايده واخلي ينوح حته يبطل يعيدهه وعبالك انساهه اله وين الله والزمو اله ازوعه العافيه

الحجيه.. جده انت شبيك مسودن امك بيش متنسيه بيك
يول خايبه شتنسيتي بهالمخبل هذا؟؟
أمي.. الوحيد بيهم تعبني بالحمل جنت احس بدفراته الزم اعظام ايدو لو رجلوا ويدفرني من غير مكان ومن جبته 3 اشهر ومايقبل اگمطوا

ادهم.. يعني احنه ماغلطانين بحقه هو خبل من يومه
ايوب.. الكعده وياكم تخليني اتخبل امداك انت هم تحجي ابو السحوره

ادهم.. شوف وحق الله الي يوم ارفع اسمك للمركز واكلهم عدنه واحد مشترك ويه الدواعش واخليهم ياخذوك شكم يوم تأديبي
لان محد يكدرلك

ايوب.. رجفت كوم يول هو انته ربعك شلونهم هو انت
شلونك حته تخوفني بيهم
فاروق.. والله العظيم ماترهملك كل جاره عمك وابوك يموتون على العنف وانت مثلهم ماعندك تفاهم يعني انت لو ماهاد على الولد موهسه احنه اهل حق

ايوب.. خلي يجي كوا.... يكول انتو على غلط ودحك شسوي بي انت بس اسكت ولاتحجيلي بالقيم ناس طالعهه من طورهه مانتعامل باخلاق وياهم كل واحد انطي طينته بگصته...

فاروق...صيحوا نيران تحجي
ثريا.. كمت صحتهه واجيت كعدت وهي مدنگه لزموهه تحقيق كل سؤال احسهه مخليهه بمركز شرطه ...

ادهم.. سولفينه شنو سبب تدهور علاقتكم موكلتي مرتاحه
نيران.. عماد زين وياي واصلا هذا الشهر الثامن هو مريض سوه عمليه للفقرات وانشل وضغط وسكر وامره موبيده حالتهه بيهه وماتسوء بس هو زوج ولده اثنينهم وواحد منهم هو شاد وياي..

مانعني حته من ادخل المطبخ مرته الكل بالكل حته اذا اجه خطار يفشلني كدامهم ومن احجي تصير عركه بيومهه اني ومرته تعاركنه تاكل وتعوف مواعينهه وملابسهم الكاهه معفنه بالحمام واغسلهه حجيت وياهه كامت تتجاوز وصارت عركه من اجه رجلهه مد ايده وضربني ابو صاح وتعارك وعماد تخربط واجن بناته وصار اللوم كله براسي ...

ومن هاليوم صرت اني صاحبه المشاكل محد بلبيت يريدني جانو يخافون من عماد وساكتين عني بس من وكع عماد وصار محد يسمعه كلهه صارت ضدي حته ابنه المريض الصغير اني اغسل وابدل هم صار متوحش ويضربني ...

فاروق..زين ليش ساكته ماخابرتي من يوم اثنين حسب كلامج راح يصير سنه انتي على هذا الوضع
نيران..ماكدرت احجي ليش ازود همكم

ايوب.. انتي عقلج تنكه كلما توكعين بمصيبه تكولين ماكدرت سوايتج الاولى نفس الشي تصرفتي بدون عقل واحنه موجودين وشكد لحينه عليج وصرتي شاطره كربستي روحج وتريدين اطلعين نفسج بزودج وياريت طلعتي كل حلولج عوجه وتوصلين نفسج للهاويه

فاروق.. فرك وجهه بقلة صبر وكال ايوب لزمتنه بالسره انطينه مجال يا اخي احنه مانلومهه الماضي راح احنه نساعدهه

ايوب.. سكتت
فاروق.. الف رحمه على اهلك بس ربع ساعه اسكت
كملي نيران !!

نيران.. كلام ايوب صح اني اغلط بحق نفسي واني تعبت وبجت دنگت وكامت تمسح بدموعهه اني تعبت حيل طاقتي خلصت جنت مرتاحه بحياتي ويه عماد لان هو الامر الناهي بس هسه هو يكلي مااكدر احميج من ولدي وبناتي حته الورث تعاركوا

ادهم..انطينه الحل الي يعجبج
نيران..اني مااريد اطلك من عماد ماكدر اعوفه لان مريض وهو ساعدني هواي بحالتي ومرضي وكل هاي السنين هو زين وياي
بس هسه مااكدر اعوفه بهالوضع...

ادهم... انتو شحجيتوا ويه ولده
فاروق..شحجينه طبينه السلام عليكم كعدت سولفت بعدهت مامكمله السالفه اخوك بس سمع ابن رجلهه ضاربهه بنص مضيفهم وعمهم كاعد كوم اضربه بوكس طفه عينه ووكعله كلات موراس عبالك بلوكه

ادهم.. وانتو كاعدين ادحكون
اوس.. اني ماكدرت افكه لان مجربه من افكه يعوف الولد وتجي الكله لراسي خليته براحته

ادهم.. وتالي؟!!
فاروق.. تالي ظلينه نتعذر وطلعوا الولد من الاستقبال وجبنه نيران واجينه وكالو احنه نزوركم لبغداد كال اخو عماد اجمع الولد ونجيكم

ادهم... كفووو منك يول تعجبني بالكتل محد يلحك شدكول لو تعوف دوامك واعينك بالمكافحه تفيدك ...

ايوب.. زين انت شنو رأيك اجربلك البوكس مالتي واخربطلك هالوجه التركض وراه البنات وهم اريح كلب امنيه لان محد كتلك من جنت مسحور ...

ثريا.. بده مداهرهم ومكاونهم واخر شي انختمت بصياح فاروق يصيح دمرتوني لاجبير ولاصغير بيكم واحنه كمنه للغرفه
ظلت نيران يمنه 3 ايام واجو اخوان زوجهه وشيخهم ورجعوهه وتعهدوا مالهم علاقه بيهه ...

رجعنه لحياتنه انجهز لعرس ايوب وتعديلات البيت ويوميه مانطلع من بيته ل12 بليل انرتب الاثاث صح نتعب
بس فرحانين كلساع تهوس الحجيه هذا عرس ابو الطلايب لازم نفرحله...

اليوم حنة ايوب داخلين انذار يمكن عشر مرات حصلت كفخه على راسي من عنده ساعه قميصي وين ساعتي وين جواريبي وين ويوكف بالطرمه وصاح ثريااااااا الشارع كله يعرف اسمي
من وراه..

البنيه مسوت حنه لان كالت يوم واحد هو حنه هو عرس بالقاعه بس احنه كل اقربائنه ومعارفنه اجت وبليل سوو حفله
مال شباب واحنه حفله وتونسنه بيومهه ثاني يوم رحنه للقاعه
الحفله مختصره وبوقتهه كال ايوب مااريد بالبيت الزفه وحجزوا بالفندق...

رحت وياهم للاستوديوا وشدكله المصوره سوي حركه مايقبل يخزر بيه وعبالك اني الورطته اول مره ادري بايوب يستحي
بحيث الكلينس بايده كلساع وكال الحكيلي بوحده ...

راحوا للفندق واحنه رجعنه للبيت خابرت قيس مكدر يجي لان الحجز بعده كال وره العرس اجي اقربائنه راحوا ظلن بس عماتي والبيت مهوس بديت ارتب بي نيران مااجت للعرس بس نخابرهه دكول زينه..

ادور على امنيه سألت ياقوت كالت موراحت وياكم بزفه شو مارجعت ياقوت رجعوا نص الطريق رحت خابرتهه تليفونهه مغلق بسرعه قلقت ركضت لفاروق جان بغرفته اسأله وين ادهم عبالي جاي قبلنه؟؟

ضحك وكال ادهم هم معرس حجز بالفندق وجهاله ذبهم على امي اخذت نفس ونزلت لياقوت متدري سولفتلهه كالت وغلقت تليفونهه تنلام الحجيه بامنيه من دكلهه فاره ادهم باصبعج ...

نمنه كلنه من التعب ثاني يوم كعدنه الصبح عماتي مهوسات كلهن باتن يمنه ادهم ماجاي بس ايوب خابر كال جاي بالطريق
فاروق خابر على الگصاب من وصلوا ذبحنه الطلي جوه رجل العروس ودخلت يمنه بالاول ...

مستحيه لان غريبه كعدت بصفهه باركتلهه اجت الحجيه
كالتلهه بالمبارك عليج بنيتي شلونه وياج اوبي خومازعلج
سمر.. الله يبارك بيج حجيه لا زين
الحجيه.. موجنه وجهج اصفر زياده انتي هيج لو مستحيه
سمر.. لااا من التعب

ثريا..عفناهه وكمنه اشوف الحجيه ماعجبهه رحت وراهه كتلهه بحلكج حجي
الحجيه.. شحجي يولي بس مومن ثوبنه متعلمه على بنياتنه
هاي اول بغداديه نعاشرهه

ثريا.. بعدنه نسولف واسمع ايوب يصيح وين الحجيه كالوله بالغرفه انفتح الباب صليت على محمد الوجه منور وصدك عريس ولابس القميص سمائي والبنطرون اسود والضحكه ماليه وجهه

الحجيه.. هاااا ابو سميره ادكت براسك
ايوب..دكت دكت ووصلت للعظم
الحجيه.. من هالضحكه يمصكوع تعال ابوسك يابعد اهلي وعشيرتي

ثريا.. وكفت على جهه باركتله وهو والحجيه يضحكون وهي مدري شدكله وهو يشاورهه ومغطيه وجهه بالشيله وتضحك
اخر شي كالتلي البت وجهه اصفر جيبلهه معلاك ضحك وطلع...

شويه واجو اهلهه واخواتهه وراحت لبيتهه واحنه يمنه خطار
مهوسين ادهم وامنيه مارجعوا لحد 3 العصر اول ما اداهرت هي والحجيه دكول كعدنه ب12 الظهر لصبح كاعدين لان صدفه صارت عيد ميلاد زواجهم ...

مرت الايام مال العرس سمر تجي يمنه شويه وتروح من يجي خطار بعدهه ممتعوده علينه ومرات احنه انروحلهه شويه
ونرجع نكول غريبه عنه وعن اطباعنه حته تتعود ...

رجعنه لحياتنه كل واحد لشغله ولدوامه بيوم منهن ادرس عموري انگليزي واسمع صوت عياط من فوك الفوك بس ادهم وفاروق عرفتهه امنيه ركضت ليفوك واشوفهه مكسره
المرايه مال الميز والتليفون وهو لازمهه وتصيح فضحتنه

دفعت ادهم من عدهه وفاروق سحبه ليبره وسديت الباب
وهي تبجي ومكياجهه وغراضهه مكسرتهم صعدت ياقوت
ونحاول نهديهه وهي تريد تهجم علي واسمعه يكول خبله
موصاحيه ...

شربناهه مي بس حته علينه اتخبلت شمرت الكلاص واخذت حجابهه ونزلت حافيه نركض وراهه نلزمهه تدفعنه وطلعت لطرمه بملابسهه ايوب جان هستوه فايت لبيته وسمع صوتنه
تلكاهه

ايوب.. فضحتونه من دون الوادم صوتنه بالشارع
امنيه... وخر عني ماراح اخليكم تلكوني وهذا اخوك كله اذا مااشحطه بالمحاكم

ايوب.. يابويه بيهه شحط دتعالي يمي ازعلي حته انه هم اشحطه الج
امنيه.. وخر ايوب عيب من مرتك
ايوب.. لاماكو عيب امشي وياي طلعه ماطلعين الحكج وانه اشحطج واجيبج من اذانج...

امنيه.. تعوذت الشيطان ورحت ويه ايوب التفتت ماشفت ادهم ماكلف نفسه ولحكني انه اعلمه رحت لبيت ايوب استحيت من مرته رغم ماادخلت وفرحت بيه وحاولت تهديني بس كلبي نار...

اندك باب المطبخ كتلهم اذا ادهم اطلع بس صوت الحجيه
تصيح ولج امينه هاي انه وثريا العوبه وامه وياقوت الفطيره..

ابتسمت شلون سوتهن مزق راحت سمر فتحت الباب طبن كلهن جهالي بيد ثريا وواحد ظال يم ادهم كعدن وكالت الحجيه سمر صارت من عدنه احجي امينه شجاج تخبلتي

امنيه.. مليييت طكت روحي بس ابنكم شايف روحه لو بس ابنكم ضابط التليفون مايسكت ارقام غريبه ادك وعادي يرد
والف مره متعاركه على هاللسالفه وهو ماهامه

والفيس شوف المتابعين شكد وكلهن بنات والانستا مسوي عام
ولا يجذب عليكم ويكول هن لو مامنطي مجال مايدخلله خاص

ايوب.. نعمة الله هاي مايصير يردهه
سمر.. ايوووووووب
ايوب.. انه احجي عن ادهم انه ماعندي نعمة الله

الحجيه.. حلهه ابو سمره ادهم متحلف بيهه
امنيه.. وفوكاهه متحلف وحق الله اشتكي علي
الحجيه.. موهيج يابنتي على كيفج عجل غير هو مثل العافيه ويركضن وراه ترى احلى اخوته هو

ايوب.. اي صدك هو احلانه وهو يموت على النسوان تاريخه عريق تاريخ نور المالكي والتفت على سمر وكالهه اعذريني
خاف تزعلين على زعل ابوج

امنيه.. موصدك ايوب هو عنده سوابق ومن حقي اتعارك
ايوب.. حقج يابه حقج هسه انه مااعرف احلهه صيحوا القاضي
انه اعرف اهدي الوضع بس مااحلهه

الحجيه.. ياربي شوكت اخلص من طلايبكم كومي يثريا صيحي فاروق يجينه الساعه ب10 بليل ومتكاونين
ثريا.. رحت صحت فاروق كال هسه اجي شويه واجو ادهم وفاروق

الحجيه.. حلهه يابو عمر ماتخلص من اخوتك
فاروق... شحلهه امنيه الله يخليج بطلي غيره انتي شايفته يحاجيهن ؟؟ يخابرهن؟؟
امنيه.. لاااا بس هن يراسلن ومايحضرهن

فاروق... مالج حق بعد مدام مايحاجيهن وتليفونه عندج بعد شنو السالفه
ايوب.. اثنينهن عدهه بعد شكو؟؟
امنيه.. منين اثنين هو واحد ؟؟.

ايوب.. هااا عجل واحد صرصر مثل تليفون الحجيه تلكي بالجكمجه شعجب ماتدرين بي ليش ادهم ضامه!!؟؟

ثريا... دنك راسه فاروق فركه وادهم خزر ايوب وامنيه اليوم
الكاع متشيلني كامت تكمز بنص الصاله وتصيح تخوني
تخوني ياادهم وعندك واحد ضامه عني

فاروق.. غضب الله على راسك ايوب بويه هدي حالج
موهيج الحجي هسه نفتهم
امنيه.. شتفتهم ليش ضامه عني ليش واكول ليش مايخابر
طلع يخابر بالسياره

ايوب.. ماتحجي انت بلعت اللسانك ماتفهمهه
ادهم.. انه اعلمك انت... امنيه اذا ماسكتي والله العظيم
اتصرف غير تصرف التليفون هسه اجيبه وخلي يمج

فاروق.. شتسوي بي؟؟
ادهم.. يعني انت قاضي وتعرف شغلي انه بالصخام بالاستخبارات وعدنه كومه خطوط نستخدمهن فتره
على كد العمليه ونكسرهن وهذا التليفون خاص بينه
بس باوقات الشغل حته رقم امنيه مامخلي بي بعد هاللغوه الزايده شنو

فاروق... ليش ماحاجي الهه فهمهه حته من تلكه التليفون او تسمع تكون على علم ليش تضم عليهه ترى كبرتوا مو اظل اعلم
دخيل الله فكروا نسوانكم امانه عدكم وفوك كل هذا يتيمات
يعني التسوو الله يبهذلكم اذا اذيتوهن كافي ادهم والله اذا انعاد هالتصرف لادكول اخوي فاروق سمعت لو اعيد

ادهم.. صااار
فاروق.. تدري بمرتك تغار شكو دماغك مايشتغل تعال واحجيلهه حته ماتنصدم وماتشك وبعدين سوالف الفيس الغي المتابعه غير حسابك الانستا غير وسوي خاص هاي اخر مره امنيه
تزعل علمود هالسالفه المره الثانيه انه اطلع واعوفكم

وانتي امنيه خفي بهالغيره ترى بهاي المشاكل ماراح ينعدل
راح يسوي من وره ظهرج وانتي ماتدرين هسه ترجعين وياه
وغرفتي بصفكم اذا سمعت الهوسه اخذ عمر واطلع وانتو ظلوا
تكاونوا

الحجيه.. لاتنقهر يمه موزين عليك ضغطك لايرتفع
ومدام كاعدين ونحل المشاكل حل مشكله ابو سميره
موبس هو يحرك على الوادم

فاروق.. ايوب شعنده؟؟
ايوب.. كلشي ماعندي سمنه على عسل
الحجيه.. جذب البنيه شكتلي وحجيت وياه وغلس

فاروق.. شكوو؟؟
الحجيه.. مايخليهه تروح لاهلهه كل اسبوع وهم قريبين
واذا راحت مايروح يسلم على ابوهه دكول يوكفلي بالباب
وابوهه ماخذ على خاطره...

فاروق.. استلم عود هاي انت الي اكول عليك اعقلهم
ايوب.. كل عقلكم اروح اكابل ابوهه مواسلم علي بالباب عزيمه مااريد اكل يمهم مااريد وبعدين موكل جمعه تروح لاهلهه من الصبح للعصر طلابه بعد

فاروق.. اهلهه قريبين موبعيدين كل جمعه تاخذهه بس هاي الجمعه غلست عنهه وبعدين ابوهه من الاصول اطب اتسلم علي وتكعد وياه

ايوب.. والله اسلم بس مال اكعد وياه لاا مااكعد هو رجال يموت على الحكومه وانه اكره الحكومه وسالفه الروحه مامانعهه بس باليعجبني اوديهه

فاروق.. هز راسه كلهه تتفاهم وتسمع الكلام اله انت
سمر اكو شي مضوجج بي ايوب كولي؟؟

سمر..لا تسلم ابو عمر ورده ايوب
الحجيه.. عمت عينج هسه لان كاعد من اجيتي تتبكبكين
هسه صار ورده

فاروق..الله يديمكم يله امنيه كدامي انتي وادهم وين الله واسمع صوتكم انه اريد حجه اطلع من البيت

ثريا... رجعنه لبيتنه انه اخر وحده طلعت وسديت الباب وراي
مال المطبخ اسمع صوت ضحكه سمر عاليه وهي دكله لا ايوب
لااا الله عليك بسرعه ابتعدت حته لا اسمع سوالفه المكسره...

امنيه صعدت فوك وادهم ظل جوه هو وفاروق شويه وصعد
وجهالهم يم امي متعلقين بيهه حيل هي ربتهم كمت صليت وقريت قران ودعيتلهم براحه البال مشاكل الغيره ماتخلص...

وره شهر ضبط من زواج ايوب اجت سمر بشرتنه وكالت حامل
اما موضوع زواج فاروق ماحجه بي ولا احنه حجينه
بعد بس بيوم منهن عمر ماتغده ولاقبل يتعشه وضام راسه بالفراش...

سولفت لفاروق اجه شاله لكاه يبجي ويضرب برجليه بالكاع
كوه قنعه وطلعه للصاله حضنه ويسكت بي ويتوسله شتريد
يابعد اهلي بس كلي شتريد وهو يشهك من البجي...

جان ايوب يمنه عاف ابو وركض حضن ايوب ويبجي
فاروق عنده عمر الدنيا باكملهه اخوته بكفه وعمر بكفه
سكته ايوب ظل بحضنه ومخلي راسه ومايباوع لابو ابد...

فاروق.. انه اعرف عمر شبي زعلان عليه وعباله راح اتزوج
الحجيه... عجل انت موكلت اريد اتزوج واحنه ماحجينه بعد
فاروق.. انتو عائلتي ومااضم عليكم ...

جر نفس بحسره جبيره ودنگ عينه على الكاع وكال ماتجي وحده ابمكان شذره الله يرحمهه هو گلب واحد ومشاعر وحده
موبيدي حاولت اكمل بس ماكدرت

المهم اكو بنيه من زمان شفتهه بمكان عام تشبه شذره وهي نازحه من الموصل المهم مرت اشهر كلما اروح لدوامي اشوفهه
بطريقي تدفع بولد مراهق عمره 13 سنه تقريبا مقعد ومااعرف. وين تروح...

مره من المرات وكفتلهه جان الجو مطر وجانت وحدهه ووياهه طفله صغيره صعدت واشرتلي على بيت بغير منطقه قريب على المحكمه كالن اني اعيش هنا عائله دكتور وهي وامهه واختهه واخوهه نازحين ويشتغلون خدم عند الدكتور ومنطيهم غرفه وهاي من اشوفهه تدفع باخوهه يوميه كالت اخذه لمركز تدريب الدكتور متكفله...

شفتهه اكثر من مره وصعدت وياي مرات هواي البنيه عمرهه 21 سنه مرت اشهر وكمت مااشوفهه وبيوم لكيتهه واكفه بنفس المكان الي اركن بي سيارتي وانزل للمحكمه

كالت الدكتور سافر وباع بيته واحنه صارلنه 5 ايام بالامام
وماعدنه حته مصرف وانه لان ساعدتهه شكم مره ماادري
يجوز الله دلاهه لان ماينسه عبده كتلهه شتردين هسه ردت انطيهه فلوس. كالت عدنه قليل بس اريد بيت نشتغل بي بحكم
منطقتنه اكثرهه مخليه خدم وبوقتهه كتلهه اعرف الدكتور عبالهه عندي معارف بهالمكان...

انطيتهه رقمي واخذت رقمهه وكتلهه العصر اخابرج من اطلع من الدوام كفلت واحد من الحمايه شافلهه بيت قريب علينه 50 متر للايجار واجرته الهم وخابرتهه وجبتهه هي وعائلتهه

امهه مره تعبانه جثير من هجوم داعس متعرضه لضربه براسهه باله حاده وتجيهه فقدان ذاكره اخوهه معوق وابوهه مكتول باحداث داعش واختهه صغيره بالابتدائيه وهي تشتغل الهم

مااعرف السويته غلط لو صح بس مااكدر ارجع احد يطلب المساعده اسألهه عن اهلهه عمامهه تحجي كله مصلاوي كلشي ماافتهم دكول كلهم اخذوهم داعش امهه اصلهه سوريه مو عراقيه هاي كل السالفه

ايوب..وانت تريد تزوجهه لو بس تساعدهه ببيت
فاروق.. موزواج فعلي ناقشت هالموضوع وياهه هي متكدر تعوف اهلهه نهائيا واصلا غريبه بدون والي يعني ماراح يتقدملهه احد وهي بدون اهل وعمام مجرد هي وامهه واخوهه المعاق ...

طبتي الهم غلط وانه لسه ماخطيت هاي الخطوه متردد
مجرد عقد حته اكون مسؤل عليهم بس رجعت بقراري
لان البيت قريب واكدر ادزلهم بيد الحمايه المسواك جنت شايل هم لطبتي وعبالي مااتوفق بالمسؤليه بس هسه لا كل مره ادز الحمايه يدحكون شمحتاجين

ادهم... يعني ماراح تزوج؟؟
فاروق.. لااا
ادهم.. ليش
فاروق.. بنات الناس مولعبه مااكدر ارتبط بوحده بعد

عمر.. كول وروح شذره ماتزوج
فاروق.. تعال يول زعلان عليه ؟؟ وروح امك الغاليه مااتزوج ولاراح اتزوج

ثريا..كام من حضن ايوب ركض لابو يبوس بي ويكله كول والله وفاروق يضحك شكد جنت اتمنى اشوف فاروق
مثل اخوتي وعائلته ومرته بس شاء الله يكون وحيد..

مرت الاشهر مثل كل عائله عراقيه من الدوام للبيت
بيوم منهن رجعت لكيت امنيه مبدله وتريد تطلع سألتهه
شكو جاوبتني وعينهه مدمعه كالت زوج نيران مات ...

لا اعتراض على حكم رب العالمين الله يرحمه بس بسرعه
اجه قيس ابالي معقوله الهم نصيب استغفرت ربي ودخلت امنيه راحت هي والحجيه. امي وثاني يوم رجعن

كملت الفاتحه وجابو نيران يمنه لزمت عده بس بغرفتي متطلع ابد انسانه محطمه لاتضحك لاتسولف لا تشارك
الصفنات تاخذهه للبعيد وترجعهه من تسمع اسم قيس تفز وتنتبه على نفسهه

مره اني كاعده سهرانه وهي نايمه وفزت مرعوبه ايدهه على كلبهه ولفظت اسم قيس بس من شافتني انتبهت وكامت غسلت ...

بعد هذا العمر تأكدت عمر الحب ماينمحي الي حب حب حقيقي وبكامل مشاعره ماراح ينسه بس الماحب الحب الطاهر النقي راح يبيعه مره ومرتين

ماكو رجال يكول اني احب ويروح يتزوج على مرته!!
ماكو واحد يكول اني احب وعندي حبيبه ويتركهه ويروح يخطب غيرهه بأي حجه !!!

الحب قداسه .. ونقاء... وتؤم روح من انحب ونتعلق بكل مشاعرنه معناتهه هاهي انتهت گلبنه يرفض نستقبل اي
شخص ثاني ...

مرت اشهر طويله نيران خلصت عدتهه ورجعت ويانه تكعد بس متشارك قيس مااجه ويدري زوج نيران توفه بس ماحجه ماكدر يجي بسبب الحضر مال السفر
لحدما استقر الوضع شويه يله كال راح اجي...

كلنه نتحضر لجيته وهو خابرنه كال انه بالمطار اله نيران
الوجه صار اصفر عبالك الدم جمد بعروقهه بس الله يعلم بمشاعرهه وگلبهه بهذيج اللحظه ...

وصل قيس هلاهل وجكليت فرحتنه جبيره بيومهه
اقربائنه وعماتنه كلهه موجوده متغير حبيبي حيل
ضعفان جسم رياضي اجنبي لحيه خفيفه ابتسامه
حزينه عيون ممليه هموم وعتاب...

لليل يله خفت الناس وخلصنه من الهوسه واجتمعنه هذيج اللمه الحلوه كاعد بصف فاروق ونضحك
كل واحد مرته بصفه اله هو عينه على باب غرفتي بلكي
يلمحهه بس ماطلعت...

مرن يومين اجيت من الدوام لگيته واكفلي بالباب
كال اريد اشوف نيران روحي كليلهه دخلت حاجيتهه
بعدني ممكمله كلامي بجت بس بجي بحرگه گلب بحيث
صوت شهكتهه عالي...

هزت راسهه ااي طلعت اريد اكله جانوا اخوتي كلهم بالدوام كعد بالاستقبال وصحتهه ورحت للغرفه هاي اللحظه بعد سنوات من المر من الخذلان من الفراق ...

نيران... اصعب مايمر بي الانسان هو الفراك وانت مابيدك حل
واتشوف احلامك تتبخر كدامك وانت عليك تهز راسك
بالقبول وماتعترض لان صنع ايدك هذا...

واكفه كدامه الي مانسيته ولا لحظه الي كل ليليه ابجي
واني اتخيل شكله واللوم بنفسي مانسيتك ولا ثانيه
ولارمشه عين انت تمشي بروحي بدمي انت ويه كل شهگه نفس اذكرك...

زوجي جان يدري من اتزوجنه كال سامع ابن عمج جان يريدج وتحبي زوجي مريض نهائيا ماصارت علاقه زوجيه بيناتنه كل الي بيناتنه احترام وصداقه مايريد يتفشل كدام اخوته واولاده لان ضاغطين علي بموضوع الزواج ومن اتزوجنه اتفقنه واحد يحترم الثاني ويمكن هاي النعمه الي الله رزقني بيهه اكرام للفراق الشفته ..

واكفه بنص الاستقبال وهو واكف اي حركه ماكو مجرد عيون التقت بعد عذاب مجرد عيون تسولف بالم الهجران وهي تحجي الايام المره السهرت بيهن للصبح...

حلاوة اللقاء يزيل مرارة الهجر والفراق...

تقرب بخطوات بطيئنه وعينه تلمع مايفصلنه غير سنتمترات. قليله اني بحلم لو بواقع نتنفس اني وياه
نفس الهوه وهذا قيس الماغفت عيني براحه واعاني من حبه وفراگه ...

هي لزمة ايد بدون شعور لا اني اتحكمت ولا هو وهي كعدة بالكاع راسه على راسي مااكدر احجي مااكدر
اعبر ولاهو يعبر بس دموعنه هي خلاصنه دموعي توكع على ايده واشوف دموعه تأبى تنزل بحراره وتوكف بنص خده...

ماحجينه اي كلام ماحجينه طول الوضع بيناتنه هيج
واخر شي ابتعد وفرك وجهه واني طلعت بدون كلام
وينك ياكلبي شكد جانت عندك سوالف ليش ماحجيتهن؟؟

ثريا.. شفتهه شلون طلعت تركض وتبجي عفتهه براحتهه
وقيس طلع بالسياره مابيدنه غير الدعاء الهم شوكت اخوي يعوف عزة النفس ويلم نيران ويطفي نارهه وترجع
من جديد...

ماكو شي بعيد عن الله وهاي رساله لكل وحده فاقده الامل سواء بموضوع زواج او اطفال او عمل اكو رب رحيم تشاء وتشاء وهو يفعل ويقدر مايشاء

فرت الدنيا فرت هواي ورجعت نيران لاحضان قيس
تفاجئنه من كال فاروق صيحولي نيران اسألهه تقبل
تزوج قيس جنه كلنه بوضع صدمه ...

ايوب يشرب جاي طلع الجاي من خشمه
ادهم يحدد بلحيته جرح نفسه
فاروق وكف بنص الصاله وكال مو يكولون حرام الزواج
بالاكراه انه اريد اكسب ذنب بيهم واغصبهم ..

شهر وهم يماطلون بيهه نيران ساكته وقيس ساكت
واخر شي قيس خطبهه كدام الكل بس جانت ورده تزهي
هسه اخذ ورده ذابله ينرادلهه عنايه خاصه وايام طويله
يله ترجع من جديد...

ماقبل فاروق انطش الخبر بس احنه اهل البيت
قيس بس خطب ثاني يوم سافر علمود الاجراءات
كلشي صار سريع سبحانك ربي اذا كتبت على گصة هالعبد قدر لو بعد الف ميله حظ وفرة وقت لازم
يرجعله نصيبه...

شهر كامل ودز عليهه لتركيا وصلهه اوس ومناك راحتله
عقدهم زواجهم فرحهم عاشوا وحدهم هذا طلب قيس
ماراد هوسه راد يكتفي بيهه ...

خابرت امنيه دكلهه يوميه نكعد الصبح اول ما نبجي وواحد حاضن الثاني ونرجع لوعينه ايام وهم يعانون
من مراره الايام العاشوهه ...

كمل كل الاجراءات واخذهه يمه نتواصل وياهم صحتهه زينه وراجعه من جديد قيس اول مره من يحاجينه نسمع صوت ضحكته وكلما يخابر يكول ثريا احبهه اضعاف حبي السابق...

هذا عوض الهي لصبر نيران اختبرهه بحبيبهه وفراگه
وبصحتهه وبفراگ اختهه وبالذله العاشتهه ويه اولاد
زوجهه من لكاهه صابره ومؤمنه ودائما دكول كل اليجي
بي من الله هله بي عوضهه عوض جميل ...

لهنا انتهت اخر رحله وياكم ثريا الاخت الوحيده المدلله
بين اخوتهه وراح تظل هيج انتهه موضوع الزواج بالنسبه الي وماافكر بي...

ايوب صار عنده ولد ومرتاح بحياته ...
اوس بنات اثنين وولد
ادهم ولد اثنين وبنوته وحده تشبه امنيه ..
فاروق على حاله وعمر كبر وكلما يكبر كلما تنعاد صورة شذره وصوتهه وضحكتهه بالبيت ....

اما البنيه النازحه التقيت بيهه مرتين متكفليهه مرات اني ادفع من راتبي مرات ادهم مخصصين الهه راتب شهري
الفتره الاخيره كاموا يجوهه خطابه من معارف ايوب
ويصيح مشتغل خطابه للنسوان....

ايوب حاجي لابراهيم عليهه وابراهيم شكو واحد يدور
مره يكله عندي الك مره وشذره ترفض شكد حاولنه
وماقبلت دكول اخويه وامي مااعوفهم ...

الحجيه مريضه ادعولهه شكل عدهه سكر ومحرومه من الحلويات وايوب ناصب عليهه يصيحهه من بره
جبتلج زنود الست... كفشه الجايفات هاي التسميه خاصه
للحلويات الي على شكل عش العصفور ...

هاي ايامنه كلنه بصحه وسلامه بس قيس بعدهم مارزقهم الذريه اطلب دعائكم الهم ...
شكرا لكل مشاعركم والله يكتبلكم السعاده وراحة البال ..... اختكم ثريا...

.
.
.

احبكم ... انتظروني بقصة وحدث اخر....