تحميل رواية «بعد ما اتقابلنا انكتب الفراق» PDF

وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ

بسم الله توكلت علي الله. وهو رب العرش العظيم

‏ ‏

من قدام مطار القاهرة…

كان كريم، شاب في أوائل التلاتينات، طويل، جسمه رفيع، شعره منكوش بطريقة مميزة، واقف قدام بوابة الوصول وهو ماسك شنطة لاب توب حديثة، لابس هدوم شيك على أحدث موضة، وسلسلة فضة بتلمع في رقبته. كل شوية يبص على الساعة، وبعدين على باب المطار، مستني لحظة وصول أقرب صاحب ليه… وصهره في نفس الوقت.

رجل الأعمال الوسيم سليمان الطيب… صاحب الخمسة وتلاتين سنة، واللي بقاله خمستاشر سنة كاملة عايش بره مصر.

تمر كام دقيقة…

وفجأة تبدأ بوابة الوصول تفتح، ويخرج سليمان ببدلته الكحلي الأنيقة، ماشي بثقة وهيبة، وبعد ما خلص إجراءات السفر كلها، لمح كريم واقف مستنيه.

ابتسم الاتنين في نفس اللحظة…

وجري كريم عليه، حضنه بقوة وهو بيقول باشتياق:

أخيرًا… رجعت مصر يا سليمان!

سليمان وهو بيبادله الحضن:

وأخيرًا شوفتك يا كريم… والله وحشتني أوي. تعرف؟ شكلك اتغير خالص عن آخر مرة شفتك فيها.

ابتسم كريم وقال:

يا عم… خمستاشر سنة مش شوية.

يتنهد سليمان وهو يبص حواليه، وكأنه بيستنشق ريحة البلد لأول مرة من سنين.

يااااه… خمستاشر سنة بعيد عن مصر… والله كانت واحشاني بشكل ما تتخيلوش.

كريم بابتسامة:

وأنت كمان وحشتها… ووحشت أختك نيفين اللي كانت هاتتجنن من الفرحة. دي عملت كل أصناف الأكل اللي في الدنيا، وخربت بيتي بسبب الطبخ… وعشان كده ماعرفتش تيجي معايا المطار.

يضحك سليمان من قلبه ويقول:

حبيبتي نيفين… ربنا يخليها. وتعيش وتفضل تخرب بيتك.

يرد كريم وهو عامل نفسه متضايق:

تعيش يا خويا… هو أنت خسران حاجة؟

يبص له سليمان بخبث ويقول:

لسه بتلعب بديلك… ولسه ماشي في سكة النسوان؟

يهز كريم رأسه بضحكة ساخرة.

يا راجل… أختك قطعت ديلي من زمان. أنا دلوقتي ما بقيتش أعرف أعمل غير حاجتين… أشتغل وأجيب فلوس… وهي تتولى مهمة صرفهم.

ينفجر سليمان في الضحك.

فيبص له كريم بغيظ مصطنع:

هتفضل تضحك كتير؟…ما يلا بينا نمشي ولا هنقضي اليوم كله في المطار؟

سليمان:

يلا بينا.

ويتحرك الاتنين خارج المطار… من غير ما يعرفوا إن رجوع سليمان لمصر هيقلب حياة ناس كتير… وهيفتح أبواب أسرار اتدفنت من سنين.

ــــــــــــــــــــــــــــ

وفي نفس الوقت… داخل أحد أقسام الشرطة…

كان الرائد أحمد خالد قاعد خلف مكتبه، بيراجع شوية أوراق، قبل ما يدخل عليه أحد العساكر، يؤدي التحية العسكرية ويقول:

يا فندم… المتهمات في قضية شبكة الدعارة بتاعة العجوزة.

يرفع أحمد عينه من الورق ويقول بجدية:

دخلهم.

يفتح العسكري الباب…

وتدخل خمس بنات، أعمارهم مختلفة. واحدة بتعيط، والتانية مرعوبة، والتالتة واقفة ساكتة وكأنها مستسلمة.

لكن كانت في واحدة مختلفة تمامًا…

بنت عندها حوالي خمسة وعشرين سنة، ملامحها جامدة، وعينيها مليانة تحدي، وجمالها لافت يخطف أي عين تبص لها.

كانت شيرين عبود.

وقفت قدام مكتب الظابط بكل ثقة، كأنها هي صاحبة المكان، مش متهمة داخلة تحقيق.

يبصلها أحمد شوية، ثم يقول بصرامة:

مالك يا بت؟ عدلي وقفتك.

ترفع شيرين حاجبها بابتسامة ساخرة، وترد بهدوء:

هو أنا اتكلمت أصلًا يا باشا وبعدين… أنا اسمي شيرين عبود… مش “بت”.

وتكمل وهي تبتسم بسخرية:

ومن زمان أوي… أنا ما بقيتش “بت”… أصلي مدام.

تضحك ضحكة مستفزة…

لدرجة إن أحمد حس إنها بتتعمد تستفزه.

فيبص للعسكري بسرعة ويقول وهو بيحاول يمسك أعصابه:

خدهم من هنا… وبكرة الصبح يتعرضوا على النيابة.

تضحك شيرين بنفس الثقة، لكن قبل ما العسكري يخرجها…

تفلت منه فجأة، وتجري ناحية مكتب أحمد.

تقف قدامه مباشرة، وتبص في عينيه وتقول:

يا باشا… أنا مش هارجع الحجز تاني.

يرد أحمد بحدة:

ليه؟… هو على راسك ريشة؟

تبتسم شيرين بدلع وهي تقول:

آه… على راسي ريشة.

ودلوقتي هتتأكد بنفسك… لما الباشا الكبير يكلمك ويقولك: “سيب شيرين عبود تمشي.”

وفي نفس اللحظة…

يرن تليفون المكتب.

يرفع أحمد السماعة بسرعة.

ألو…

يجيه صوت أجش، مليان هيبة:

أنا اللواء فؤاد الشرقاوي… مين معايا؟

يقف أحمد انتباه فورًا.

الرائد أحمد خالد يا فندم.

يقول اللواء بلهجة لا تحتمل النقاش:

اسمع يا أحمد… عندك واحدة اسمها شيرين عبود. عايزها تخرج… حالًا.

يتفاجئ أحمد ويقول:

بس يا فندم… إحنا قبضنا عليها متلبسة جوه شقة دعارة.

يقاطعه اللواء بعصبية شديدة:

نفذ الأمر… وإلا هتلاقي نفسك متحول للمحاكمة التأديبية.

ثم يغلق الخط في وجهه.

ينزل أحمد السماعة ببطء… وهو غير مستوعب اللي حصل.

يبص لشيرين…

يلقاها واقفة مبتسمة، وكأنها كانت عارفة المكالمة قبل ما تحصل.

ثم يقول للعسكري، وهو بيحاول يخفي غضبه:

سيبها… خليها تمشي.

تضحك شيرين بانتصار، وتبص له قبل ما تخرج وهي بتقول:

ها… عرفت بقى إن فعلًا… على راسي ريشة؟

وتخرج من المكتب بخطوات واثقة…

بينما ظل أحمد واقف مكانه، قبضته بتترعش من الغضب، وعقله بيسأل سؤال واحد…

مين شيرين عبود؟… وإيه السر اللي يخلي لواء بنفسه يتدخل عشان يخرجها؟،،،،،،

ومن داخل أحد المساجد، كان سليمان بيصلي صلاة العشاء. وبعد ما خلص الصلاة، خرج من المسجد واتجه نحية فيلته اللي كانت على بُعد خطوات.

أول ما دخل الجنينة، لمح نيفين وكريم قاعدين. كريم كان غارق في شغله، وقاعد قدام اللاب توب، أصابعه بتجري على الكيبورد بسرعة. فهو مهندس كمبيوتر عبقري، والشغل بالنسباله مابيخلصش.

بص له سليمان وهو بيهز راسه بابتسامة وقال:

مش كنت تيجي تصلي العشاء معايا؟

نيفين وهي بتتنهد:

ادعيله ربنا يهديه… ده لو الشغل اتجسد في بني آدم هيبقى كريم.

ابتسم كريم، وقفل اللاب توب، وبص لسليمان وقال:

ارتحت بقى لما رجعت لنا؟… قوللي بقى ناوي على إيه؟ هتفضل عايش لوحدك في الفيلا الكبيرة دي؟

سليمان وهو بيهزر:

ما أنت قاعد معايا أهو.

كريم:

يا عم أنا النهارده واخد أجازة بالعافية من الشغل، إنما مش كل يوم هعرف آخد أجازة عشان أقعد أونسك.

ابتسم سليمان، لكن ابتسامته كان فيها شوية وجع، وقال بهدوء:

معاك حق… العمر جري بيا، وكل همي كان أجمع فلوس… والحمد لله ربنا كرمني وعملت اللي كنت بحلم بيه. بس اكتشفت إن الفلوس من غير بيت دافي ولا ست تحبك… مالهاش طعم. يمكن جه الوقت إني أبص لنفسي… وأتجوز.

قفزت نيفين من مكانها بفرحة وقالت:

الله! أخيرًا نطقتها! استنى بقى… أنا عندي ليك عروسة بنت ناس، جميلة، ومحترمة، وهتحبها من أول نظرة.

ابتسم سليمان، وهز راسه بالنفي.

لو هاتجوز… مش هاتجوز غير أكتر واحدة حبيتها في حياتي.

اتسعت عيون نيفين.

مين؟

وقبل ما سليمان يرد، قال كريم وهو بيبتسم:

دنيا عبود.

بص له سليمان بابتسامة كلها حنين.

لسه فاكرها يا كريم؟

نيفين:

استنوا… مين دنيا عبود دي؟! إزاي كريم يعرفها وأنا لأ؟

كريم:

كانت زميلتنا في الكلية… وأول حب… وآخر حب في حياة سليمان.

تنهد سليمان، وكأن السنين كلها عدت قدام عينيه.

دنيا… دي مش مجرد بنت حبيتها… دي حب عمري كله.

سكتت نيفين لحظة، وقالت بحذر:

بس إنت بقالك خمستاشر سنة بره مصر… متأكد إنها لسه فاكراك؟ أو حتى مستنياك؟ يمكن تكون اتجوزت وخلفت كمان.

ابتسم سليمان ابتسامة هادية وقال:

هي فعلًا اتجوزت.

شهقت نيفين.

طيب… وهتتجوز واحدة متجوزة إزاي؟

ضحك كريم وقال:

ما هي دلوقتي مش متجوزة… لأنها اطلقت.

لفت له نيفين بسرعة وقالت بضيق:

هو إنت عارف عنها كل التفاصيل دي منين؟

رفع كريم إيده مستسلمًا.

والله سليمان هو اللي بيحكيلي كل حاجة.

ابتسم سليمان وقال:

من يوم ما سافرت وأنا على تواصل معاها… كنا بنتكلم من وقت للتاني، وكنت عارف أخبارها كلها. ولما عرفت إنها اتطلقت… حسيت إن ربنا لسه كاتب لقصتنا نهاية تانية… ويمكن المرة دي تكون النهاية السعيدة.

ابتسمت نيفين وقالت:

طيب… هي عرفت إنك رجعت مصر؟

رد كريم بسرعة:

لأ… عاملها مفاجأة.

بصت له نيفين وضربته على كتفه.

هو أنا كل ما أسأل سؤال، إنت اللي تجاوب ليه؟ هو إنت اللي هتتجوزها؟

ضحك كريم وقال وهو بيغمز لسليمان:

لو سليمان اتأخر… أخلص أنا فيها.

في ثانية، قامت نيفين ومسكت كريم من شعره بعنف وهي بتقول:

نعم يا روح أمك؟! والله كنت قطعّتك حتت، وغمستك في البيض والبقسماط، وحمّرتك، واتعشيت بيك يومين!

انفجر سليمان في الضحك، بينما كريم كان بيتلوى من الوجع.

يا نيفين… خلاص… وحياة أمك سيبيني!

لكن نيفين زودت شدتها أكتر.

كريم وهو بيصرخ لسليمان:

إلحقني يا عم… أختك هتقلع فروة راسي!

سليمان وهو بيضحك:

وأنا مالي… تستاهل.

كريم:

طيب… وحياة آدم ابنك!

وقف سليمان فجأة وقال وهو بيضحك:

طالما حلفتني بآدم… يبقى لازم أنقذك.

راح يشد إيد نيفين بعيد عن كريم، فبصت له باستغراب وقالت:

استنى… هو إنت خلفت؟! وكمان سميته آدم؟

ضحك سليمان وقال وعينيه مليانة حلم وشوق:

لسه… بس بإذن الله هاتجوز، وأخلف ولد وأسميه آدم… نفسي يبقى ليا ابن يجري عليّا، ويناديني “يا بابا”… حد يشيل اسمي، ويملالي البيت ضحك وحياة. يمكن ساعتها أحس إن كل سنين الغربة والتعب كان ليها معنى… ويمكن يكون معايا وقتها الست اللي استنيتها طول عمري… دنيا.

ومن جوه أحد الأحياء الشعبية، كانت عربية سليمان، أحدث موديل، بتشق الشوارع الضيقة وسط نظرات الناس. كان لابس بدلة شيك جدًا، وساعته الفخمة بتلمع في إيده، وفي إيده بوكيه كبير من الورد الأحمر… اللون المفضل لدنيا. وكان كريم قاعد جنبه، مبتسم وهو بيتابع ردود فعل أهل المنطقة اللي وقفوا يتفرجوا عليهم باستغراب وانبهار.

توقفت العربية قدام البيت اللي ساكنة فيه دنيا، فنزل سليمان وهو ماسك الورد بحرص، وطلع هو وكريم السلم لحد شقتها.

وقف سليمان قدام الباب، خد نفسًا عميقًا، وخبط.

بعد لحظات، اتفتح الباب، وظهرت شيرين… لابسة حجاب، لكن عيونها كانت مليانة جرأة. أول ما شافت سليمان، وقفت تبص له من فوق لتحت بإعجاب واضح، تتأمل بدلته الأنيقة وساعته الغالية، وكأنها نسيت نفسها، قبل ما تقول باستغراب:

إنت مين؟

سليمان:

دنيا موجودة؟

شيرين:

دنيا أختي… إنت تعرفها؟

سليمان:

آه… كنا زمايل في الكلية. ممكن تقولي لها إن سليمان الطيب برة وعايز يشوفها؟

بصت له شيرين في عينيه بنظرة كلها دلال، وبعدين حولت نظرها لكريم وقالت بابتسامة ماكرة:

هو لازم دنيا؟… ما ينفعش شيرين؟

اتلخبط سليمان للحظة من جرأة كلامها، لكنه ابتسم وقال:

إنتِ شيرين… أختها الصغيرة، صح؟

شيرين وهي بتضحك ضحكة خفيفة:

أيوه… الصغيرة.

لفت ودخلت تنادي على أختها، فساعتها مال كريم على سليمان وهمس وهو بيضحك:

البنت دي نظرة عينيها مش طبيعية… بقولك إيه، لو اتجوزت علي أختك هتزعل؟

انفجر الاتنين في الضحك.

وما عدتش دقيقة…

وفجأة ظهرت دنيا.

وقفت قدام سليمان، واتجمدت مكانها. الزمن كله وقف في اللحظة دي. بصت له بعيون لمعت بالدموع، وابتسامة حنين رسمت على وشها، وقالت بصوت مرتعش:

لسه زي ما إنت… ضحكتك حلوة… حتى لو صوتها لسه عالي.

بصلها سليمان، وعيونه غرقت بالدموع من الفرحة. حاول يتكلم، لكن الكلام خانه.

وفي لحظة… جريت دنيا عليه، وارتمت في حضنه بكل قوتها، كأنها بتعوض سنين الفراق، وضمته لدرجة إنها كادت تكسر ضلوعه، وهي بتبكي وتقول:

وحشتني… وحشتني أوي… أوي… أوي يا سليمان.

ناول سليمان بوكيه الورد لكريم من غير ما يبعد عنها، ولف دراعيه حواليها بكل الحب اللي كان مخبيه سنين، وهمس:

وإنتِ كمان… يا دنيتي.

وفي اللحظة دي…

طلع صوت حاد قطع دفء اللقاء. ودة صوت امها عفاف

دنيااا!

التفتوا كلهم، فكانت عفاف، واقفة ووشها كله غضب، وشيرين واقفة جنبها بتراقب المشهد.

قالت عفاف بعصبية:

إيه اللي إنتِ بتعمليه ده يا دنيا؟

بعدت دنيا بسرعة عن حضن سليمان، ووشها كله ارتباك.

أنا آسفة يا ماما… أصل ده…

قاطعتها عفاف بحدة:

ولا كلمة… ادخلي جوه، وحسابي معاكي بعدين.

اتقدم سليمان بكل احترام وقال:

أنا آسف جدًا على اللي حصل، بس يا ريت تهدي وتسمحي لي أدخل… عندي كلام مهم.

ردت عفاف بنفس الحدة:

إنت مين أصلًا عشان أدخلك بيتي؟ وجاي هنا ليه؟ وإزاي تسمح لنفسك تحضن بنتي بالشكل ده؟ لو مش خايف على نفسك، خاف على سمعتي وسمعة بناتي.

خفض سليمان رأسه باحترام وقال:

مع حضرتك حق… وأنا باعتذر مرة تانية. اسمحِ لي أعرفك بنفسي… أنا سليمان الطيب، كنت زميل دنيا في الكلية… وجاي النهارده أطلب إيدها، وأتمنى إنها تبقى مراتي.

ساد الصمت…

الكلمات وقعت على قلب دنيا كأنها حلم كانت مستنياه من سنين، وامتلأت عيونها بالفرحة.

أما شيرين…

ففي اللحظة دي، اتحول الإعجاب اللي كان في عينيها إلى نار غيرة.

بصت لدنيا وهي بتحاول تخبي الغل اللي اشتعل جواها، وقالت في سرها:

“المطلقة دي… ييجي لها راجل زي ده؟ وأنا لأ؟! هي دايمًا حظها أحسن مني… هي فضلت نظيفة… وأنا ضيعت نفسي. ليه؟… ليه كل حاجة حلوة تروح لها هي؟”

ضغطت على أسنانها بعصبية، لكن في ثانية واحدة رسمت على وشها ابتسامة مزيفة، واتقدمت ناحية دنيا، وقالت بصوت كله حنان مصطنع:

مبروك يا دنيا… يا حبيبة قلبي.

وضمتها لحضنها…

لكن الحضن ده ما كانش حضن أخت… وهي مش اخت

دي كانت أفعى بتلف حوالين فريستها… ومستنية اللحظة المناسبة عشان تبث سمها.،،،،،

دي بداية شر نهايته خراب علي مين بعدين اقول لكم بس انتم تابعوني واوعو تروحو بعيد ،

وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ

بسم الله توكلت علي الله. وهو رب العرش العظيم

‏

ومن داخل شقة عفاف، كان سليمان يجلس بجوارها، ومعهما كريم. تنهدت عفاف وقالت وهي تنظر لسليمان بابتسامة ممزوجة بالخجل:

أنا آسفة يا ابني… على الطريقة الوحشة اللي كلمتك بيها أول مرة. أصلّي ماكنتش أعرفك، وخفت على بنتي.

ابتسم سليمان وقاطعها بلطف:

ماحصلش أي حاجة يا… ينفع أقولك يا ماما؟

ضحكت عفاف من قلبها وقالت:

يا سلام… ده أنا طول عمري كان نفسي ربنا يرزقني بولد، بس إرادته كانت غير كده. ومن النهارده إنت ابني بجد، وقولّي يا ماما براحتك.

ابتسم سليمان وهو يمسك يدها باحترام.

ربنا يحفظك يا ماما من كل شر… ويشهد ربنا إني هاعتبرك أمي من النهارده.

وفي اللحظة دي دخلت دنيا بعد ما غيرت هدومها، وكانت لابسة فستان أحمر رقيق زادها جمالًا، وشايلة صينية عليها أكواب عصير ساقع. وخلفها دخلت شيرين، لابسة بنطلون جينز وبلوزة شيك، وشايلة صينية عليها جاتوه.

أول ما كريم شاف شيرين، مال ناحية سليمان وهمس:

هو ينفع أقوم آخد البنت دي في حضني ولا هايتقبض عليّا؟ بتهمة فعل فاضح قصاد النيش

رد سليمان وهو بيكتم ضحكته:

لم نفسك… بدل ما أقول لنيفين، وساعتها هاتعرف يعني إيه واحدة تشد شعرك خصلة خصلة. بعد ما تحط راسك في المية السخنة

ابتسم كريم وقال وهو متابع شيرين بعنيه:

يا أخي… دي صاروخ أرض-جو!

وضعت شيرين الجاتوه على الترابيزة، بينما وضعت دنيا العصير وجلست بجوار سليمان. أما شيرين فجلست في المقابل، وعيناها لا تفارقان سليمان، بينما كان هو لا يرى في المكان كله سوى دنيا. أما كريم، فكان يراقب نظرات شيرين الغريبة، وشعر أن خلفها شيئًا لا يريحه.

قطع سليمان الصمت وقال وهو ينظر إلى عفاف بكل احترام:

أنا مش هاطول في الكلام يا ماما… أنا عايز دنيا، زي ما هي، ومن غير ما أكلفكم ولا مليم. وكل اللي بطلبه إن جوازنا يتم في أقرب وقت.

ضحكت دنيا بخجل، بينما قالت عفاف مبتسمة:

بالسرعة دي؟!

لكن شيرين تدخلت فجأة وقالت بنبرة تحمل سخرية خفيفة:

مش المفروض نسأل عليك الأول؟ ونعرف أهلك وناسك، ويبقى فيه راجل نحط إيدنا في إيده؟… ولا علشان دنيا مطلقة، فاكر إن الموضوع سهل؟

ساد الصمت للحظة…

تبدلت ملامح دنيا، وانكسر شيء داخل عفاف، بينما ظهر الضيق واضحًا على وجه سليمان، لكنه رد بهدوء وثقة:

كون إن دنيا مطلقة، أو حتى بنت عمرها ما اتجوزت… ده ما ينقصش منها حاجة. بالعكس… هي أغلى إنسانة في حياتي، وشرف ليا إنها توافق تكون مراتي. ومن حقكم طبعًا تعرفوا كل حاجة عني.

شعر كريم بالحقد المختبئ خلف كلام شيرين، فابتسم وقال وهو ينظر إليها:

وأنا هازود على كلام سليمان… أكيد لازم يبقى فيه راجل نحط إيدنا في إيده، لكن قبل أي حاجة، موافقة ست الكل، ماما عفاف… والأهم منها موافقة دنيا نفسها. غير كده كله شكليات.

ابتسمت عفاف وقالت:

يا سليمان… اديني شهر واحد بس، أجهز فيه بنتي، وبعدها إن شاء الله هاتبقى مراتك.

تنهد سليمان وقال بابتسامة عاشق:

الشهر ده بالنسبة لي هايعدي كأنه سنين… لكن طالما ده طلبك يا ماما، يبقى موافق.

أخرج سليمان ورقة وقلم، وكتب عنوان فيلته، وعنوان المنطقة اللي اتربى فيها، وأرقام تليفوناته كلها، ثم ناولها لعفاف.

الورقة دي فيها كل عناويني وأرقام تليفوناتي… عشان أي حد يحب يسأل عني.

مدت عفاف يدها لتأخذ الورقة، لكن شيرين سبقتها بسرعة، وأخذتها تتفحصها بعناية.

وفي نفس اللحظة، أخرج سليمان علبة حمراء صغيرة من جيبه، وفتحها ببطء…

فإذا بخاتم ألماس مبهر يلمع كأنه قطعة من النجوم.

اتسعت أعين الجميع من شدة جماله.

قال سليمان وهو ينظر إلى عفاف:

تسمحي لي يا ماما… ألبس دنيا شبكتها؟

كانت شيرين تنظر للخاتم وكأن قلبها يحترق من الغيرة، بينما همست دنيا بذهول:

سليمان… ده مش نفس الخاتم اللي كانت لابساه جينيفر لوبيز؟

ابتسم سليمان وقال:

أيوه… الخاتم ده مافيش منه غير أربع نسخ بس في العالم كله. يوم ما سمعِتك بتقولي إن نفسك فيه، وعدت نفسي إنه في يوم هيكون في إيدك… وسافرت وجبته مخصوص من أمريكا.

لم تتمالك دنيا نفسها، وانهمرت دموعها.

أنا قلتلك عليه من زمان… فضلت فاكر كلامي كل السنين دي؟

اقترب سليمان منها وقال بصوت مليء بالحب:

أنا عمري ما نسيت كلمة خرجت منك… وكل حلم كان نفسك فيه، اعتبرته وعد لازم أنفذه.

ابتسمت دنيا وسط دموعها وقالت:

ربنا بيعوضني بيك عن كل وجع شوفته.

ابتسم سليمان وهو ينظر في عينيها:

لا… ده أنا اللي ربنا بيعوضني بيكي، عن كل سنين الغربة والوحدة.

ثم التفت إلى عفاف مرة أخرى وقال:

بعد إذنك يا ماما…

هزت عفاف رأسها ودموع الفرحة تلمع في عينيها.

هو فيه أم تقدر تكسر فرحة بنتها؟

ابتسم سليمان، وأمسك يد دنيا برقة، ثم ألبسها الخاتم وسط نظرات مليئة بالحب والفرحة.

أما شيرين…

فكانت تنظر إلى الخاتم، ثم إلى دنيا، وداخلها نار من الغيرة والحقد تكاد تلتهم قلبها، بينما أدرك كريم من نظراتها أن الأيام القادمة لن تكون سهلة أبدًا.،،،

وبعد انصراف سليمان وكريم…

ومن داخل غرفة عفاف، وقفت عفاف أمام شيرين، وكانت ملامح الغضب واضحة على وجهها، وقالت بحدة:

مش هاتبطلي بقى طريقتك المستفزة دي مع أختك؟

رفعت شيرين رأسها وقالت ببرود:

ماما… بلاش كلمة “أختك” دي، عشان الكلمة دي بتخنقني. إنتِ عارفة، وأنا عارفة، دنيا دي تبقى إيه.

في لحظة، أمسكتها عفاف بقوة من ذراعها، ونظرت في عينيها بنظرة تحذير.

إياكي… إياكي أسمع منك الكلام ده تاني. دنيا أختك… فاهمة؟

نظرت لها شيرين في تحدٍ، لكنها التزمت الصمت.

صرخت عفاف:

ردي عليّا… فاهمة ولا لأ؟

نزعت شيرين يد أمها بعنف وقالت ببرود:

أنا عايزة أنام.

ثم استدارت وخرجت من الغرفة، وأغلقت الباب خلفها.

أما عفاف، فظلت واقفة مكانها، تنظر إلى الباب وعيناها امتلأتا بالحزن، وهمست لنفسها:

يا رب… استرها. أنا حاسة إن الغيرة اللي مالية قلبها دي هاتجيب لنا مصيبة.

ــــــــــــــــــــــ

ومن داخل سيارة سليمان…

كان سليمان يقود السيارة في هدوء، بينما ظل كريم ينظر إليه لثوانٍ، قبل أن يقول:

صدقني يا سليمان… البنت اللي اسمها شيرين دي، مش مبسوطة أبدًا إن أختها لقت عريس زيك.

ابتسم سليمان وهو يركز في الطريق وقال:

إنت بتقول إيه يا عم؟! هو فيه أخت تزعل عشان أختها هاتتجوز؟

هز كريم رأسه وقال بثقة:

واضح إنك ماخدتش بالك من نظراتها. دي كانت بتبصلك بطريقة غريبة… كأنها عايزة تاكلك بعينيها. ولما طلعت الخاتم… والله حسيت إنها هاتنفجر من الغيظ.

ثم أكمل وهو يشير بإصبعه:

أنا قابلت النوع ده كتير… والنظرات دي حافظها. الغيرة والحقد باينين في عينيها.

قطب سليمان حاجبيه وقال:

تقصد إيه؟

تنهد كريم وقال:

قصدي إن بصتها مش بصّة بنت محترمة ومكسوفة. دي بصّة واحدة جريئة زيادة عن اللزوم… ومن الآخر، البنت دي مش مريحة.

ضغط سليمان على الفرامل قليلًا عند إشارة المرور، ثم التفت إليه بحدة:

كريم… لحد هنا وكفاية. وماتنساش إنها في الآخر أخت دنيا، وأنا مش هاسمح لحد يتكلم عنها بالشكل ده.

رفع كريم يديه مستسلمًا.

حاضر… هاسكت. لكن افتكر كلامي ده كويس. الأيام هي اللي هاتثبتلك إذا كنت غلط ولا صح. أنا حاسس إن البنت دي وراها حاجة… وحاجة كبيرة كمان.

ابتسم سليمان ليغيّر الموضوع وقال:

سيبك منها بقى… شغل أي أغنية لعمرو دياب، يمكن الليلة تبقى أحلى.

ابتسم كريم وهو شغّل الأغنية، لكن عقله ظل مشغولًا بنظرات شيرين التي لم تغب عن باله.

ــــــــــــــــــــــ

ومن داخل مكتب مأمور القسم…

كان النقيب أحمد خالد يجلس أمام المأمور طارق، ويتحدث بانفعال:

صدقني يا فندم… ده اللي حصل بالحرف. ومن امبارح وأنا بحاول أوصل لحضرتك، لكن حضرتك كنت في أجازة، وتليفونك كان مقفول.

عقد طارق حاجبيه وقال بحزم:

وليه اللواء فؤاد الشرقاوي بنفسه يتدخل علشان يخرج بنت زي دي من القسم؟

هز أحمد رأسه في حيرة.

والله يا فندم… ده السؤال اللي شاغلني. من ساعة ما خرجت، وأنا بفكر… إيه اللي يربط لواء بحجم فؤاد الشرقاوي ببنت اتقبض عليها متلبسة في شقة مشبوهة؟

صمت طارق للحظات، ثم قال بصوت منخفض:

اسمع يا أحمد… الموضوع ده ما يطلعش بره المكتب ده. مفهوم؟

أحمد:

ليه يا فندم؟

طارق:

لأنك لو دخلت في سكة اللواء فؤاد، لازم تبقى عارف إنك داخل على نار. الراجل ده أنا أعرفه كويس… وما بيرحمش أي حد يقف قدامه.

ابتسم أحمد بثقة وقال:

أنا ما اتعودتش أخاف يا فندم… طول ما أنا على حق، وده اللي اتعلمناه من حضرتك.

ابتسم طارق ابتسامة خفيفة، ثم قال:

دي مش مسألة خوف… دي مسألة ذكاء.

ثم اعتدل في جلسته وأكمل:

لما تدخل قفص أسد… ماتدخلش بعقلك بس، ادخل بصبرك كمان. اعرف إمتى ترمي له الأكل، وإمتى تشده من أنيابه، وإمتى تخليه ينط من فوق الحاجز. والأهم… عمرك ما تديله ضهرك إلا وإنت ضامن إنه مش هيغدر بيك.

نظر أحمد إليه باستغراب.

يعني إيه يا فندم؟

ابتسم طارق ابتسامة غامضة وقال:

يعني… أنا هاتصرف بطريقتي.

ثم أخرج هاتفه، واتصل برقم.

وبعد ثوانٍ، جاءه صوت من الطرف الآخر اسمه بحر

طارق باشا… تؤمر.

طارق:

إزيك يا بحر؟ عامل إيه؟ وفين أراضيك اليومين دول؟

ضحك بحر وقال:

في السوق يا باشا… بقلب رزقي.

ابتسم طارق وقال:

طيب… عندي مأمورية ما ينفعش يعملها غير بحر.

رد بحر فورًا:

بحر تحت أمرك.

ابتسم طارق وقال:

مفيش حد خدام لحد يا بحر… لكن اسمعني كويس. عايز ملف كامل عن شخص واحد.

بحر:

قول اسمه… واديني يومين، والملف يبقى عندك.

تنهد طارق وقال ببطء:

اللواء… فؤاد الشرقاوي.

ساد الصمت لثوانٍ…

ثم سُمع صوت بحر وهو يبتلع ريقه بصعوبة.

اللواء فؤاد؟!… يا ساتر يا رب.

طارق:

لو خايف… بلاش.

رد بحر بسرعة:

لازم أخاف… ده راجل ما يعرفش الرحمة. ولو عرف إني بدوّر وراه، ممكن يدفني حي.

قال طارق بهدوء:

يبقى خلاص… هنقفل الموضوع.

لكن بحر قاطعه بحسم:

لا… أنا ما قلتش إني هارجع. قلت إني عارف حجم اللي داخل عليه.

صمت لحظة، ثم أكمل بنبرة مليئة بالإصرار:

العمر واحد… والرب واحد. وإحنا مش هنفضل طول عمرنا نخاف من الناس دي.

ثم قال بثقة:

اعتبر الملف عندك يا باشا… وهجيبلك كل حاجة عن اللواء فؤاد الشرقاوي… حتى الحاجات اللي هو نفسه فاكر إنها اتدفنت للأبد.،،،،

وبعد منتصف الليل…

ومن داخل غرفة نوم دنيا وشيرين، كانت الأنوار مطفأة، ولم يكن يضيء الغرفة سوى نور القمر المتسلل من الشباك.

كانت دنيا مستلقية على سريرها، تضع الهاتف على أذنها، وابتسامة خجولة لا تفارق وجهها، بينما كان سليمان يحدثها من الطرف الآخر.

أنا مش قادر أستنى شهر كامل يا دنيا… والله كان نفسي نتجوز النهارده، وآخدك معايا وأنا راجع.

ضحكت دنيا بخجل وقالت:

إنت مجنون… صح؟

ابتسم سليمان وقال بصوت مليء بالشوق:

أيوه… مجنون بيكي. هو مش كفاية كل السنين اللي اتحرمت فيها منك؟ كل يوم كان بيعدي عليّا وأنا بعيد عنك كان كأنه سنة.

ابتسمت دنيا، لكنها عاتبته برقة:

بس إنت اللي سبتني وسافرت، وقلت هارجع بعد ما أحقق حلمي وأكون نفسي. وسيبتني أواجه الدنيا لوحدي… لحد ما اتجوزت واحد شُفت معاه أسود أيام عمري.

تنهد سليمان بندم وقال:

عارف… وعشان كده حقك عليّا. أوعدك إني هاعوضك عن كل لحظة وجع عشتيها. مش هاسمح لدمعة تنزل من عينك تاني… بس بسرعة بقى تعاليلي، وتبقي مراتي، وتملّي عليّا البيت ضحك… وتخلفيلي عيال كتير يا دنيتي.

وفجأة…

اختفت ابتسامة دنيا، وتبدلت ملامحها، وساد صمت ثقيل.

لاحظ سليمان صمتها، فقال بقلق:

ألو… ألو يا دنيا… إنتِ معايا؟ روحتي فين؟

انتبهت دنيا من شرودها وقالت بصوت حاولت تخفي ارتباكه:

أنا معاك… أهو.

ضحك سليمان وقال وهو يحاول يخفف الجو:

إيه؟ بدأتي تفكري هانسمي أول بيبي إيه؟ أنا خلاص حجزت الاسم… لو ولد هاسميه آدم.

ابتسمت دنيا ابتسامة باهتة، ثم قالت بتردد:

سليمان… هو موضوع الأطفال ده… بيفرق معاك أوي؟

رد سليمان بحماس، دون أن يشعر بالخوف المختبئ في صوتها:

أكيد يا دنيا. نفسي أكون أب من زمان. نفسي يبقى عندي بيت مليان حياة وضحك… وعيال يجروا حوالينا وينادوني يا بابا. العمر بيجري، وأنا نفسي أعيش الإحساس ده.

ازدادت ضربات قلب دنيا، وقالت بصوت يكاد يختنق:

يعني… لازم… لازم نجيب أطفال؟

ساد الصمت للحظات…

ولم يعرف سليمان لماذا سألت السؤال بهذه الطريقة.

أما دنيا، فكانت تخفي سرًا ثقيلًا، تخشى أن يكون سببًا في ضياع حلمها كله.

وفي السرير المقابل…

فتحت شيرين عينيها ببطء.

كانت مستيقظة منذ دقائق، تستمع إلى كل كلمة دارَت بينهما.

وما إن سمعت حديث دنيا عن الأطفال، حتى ارتسمت على شفتيها ابتسامة خبيثة، ولمعت عيناها بنظرة مليئة بالشر.

همست لنفسها بصوت يكاد لا يُسمعو الا الشياطين

أها… يبقى دي هي نقطة ضعفك يا دنيا… والسر اللي مخبياه عن سليمان.

واتسعت ابتسامتها أكثر، وكأنها وجدت السلاح الذي كانت تبحث عنه منذ البداية…

تمت الحلقة… وعايز اعرف بعد ما خلصتهم قراءة الحلقة الساعة كام في الموبيل عندكم علشان اظبط ساعتي