تحميل رواية «بدرون تحسين» PDF

بعد سبع سنين سكن صاحب العماره طردنا من الشقه لأنه كان عايز يرفع الإيجار الضعف ولما اعترضت طلب منى اسيب الشقه، مكنش فيه اى مكان نروح فيه، عارف انى غلطت لكن مكنش قدامى طريقه تانيه، كان فيه بيت ملك خالتى إلى رمت نفسها من البلكونه، البيت دا كان مقفول من سنين من وقت الحادثه، استإذنت من خالى اسكن فيه، خالى قالى انت عارف ايه إلى حصل هناك ؟

قلت عارف بس من فضلك محدش يجيب سيره لمراتى

انتقلنا للبيت إلى كان مليان تراب متراكم وعفره قعدنا يومين ننضف فيه ونقلنا كل حاجه جواه ،وعدا اكتر من اسبوع محصلش فيه حاجه لحد ما بدأت اعتقد ان الحكايات إلى كانت عن البيت مجرد هرى وتأليف،بعد اسبوع مراتى اشتكتلى ان قطتها ماجى بتعمل حركات غريبه، بتقطع الستاير وبتخربش فى الكنب بضوافرها واحيان بتقعد فى حضنها مش بترضى تتحرك وهى باصه على ركن فى الصاله

وفى ايام بتلاقيها واقفه فى الصاله فى نص الليل وعمال تموء بصوت غاضب

قلت لمراتى يمكن عايزه تتجوز اصل القطط بتعمل كده لما توصل لعمر معين بس زوجتى قالت انا متأكده ان دا مش السبب ،لأنها وهى نايمه سمعت صوت خطوات فى الصاله وقتها انا كنت فى الشغل، ولأن مراتى بتحب قطتها ماجى جدا وعشان اريح دماغى من وجع الدماغ قلتلها هنركب كاميرا.

ركبت الكاميرا وكانت القطه توقفت عن حركاتها الغريبه وبعد يومين سمعنا حركه غريبه فى نص الليل

قلت ابص على الكاميرا

، لقيت منظر ماتتخيلوش:

> *”رجل طويل، هزيل، جلده شاحب، وعيونه كبار… ماشي في أوضتي.

الرجل وصل الكاميرا لدرجة انك تقدر تشم ريحة فمه. وابتسم.

جسمى ارتعش ورجعت ابص على الفيديو ملقتش حاجه كأن الصور اتمسحت،قلت يمكن عيب فى الكاميرا والفيلم

دخلت على امازون اراجع التعليقات على المنتج

لقيت في التعليقات التعليق ده

> *”الكاميرا بتشتغل بتأخير، ساعات بتوصل لحد ١٥ دقيقة.”*

مراتى كانت جنبى مرضتش اقلها حاجه لأن قلبها خفيف دخلت غرفتى وقفلت الباب ورجعت للفيديو…

لقيت الكاميرا مسجله قبل نص ساعة، الراجل بيقف جنب الكاميرا بيغمز لها وبعدها بيتسلل تحت السرير، وانا ومراتى نايمي

مكنش فيه اى لبس انه شبح، منظره كل جسمى كله يرتعش ،مجرد التفكير اننا نسيب البيت فى الوقت دا كانت مستحيله، مفيش شقق تانيه فاضيه للأيجار وكمان الميزانيه لا تسمح غير ان بيت عمتى كبير جدا وواسع، مرضتش اقول لمراتي إى حرف وحذفت الجزء الموجود فيه المخلوق بشكله المرعب.

قمت من النوم صليت وشغلت القرأن كنت عارف ان سورة البقرة بتطرد الشياطين وطلبت من مراتى تسيب القرأن شغال وانا فى الشغل ولما سألتنى عن السبب قلت عشان البيت يعمه الخير وتنطرد منه الشياطين، وقبل ما اروح الشغل شغلت الرقيه الشرعيه على تليفونى ولفيت بيها البيت كله.

وانا فى الشغل صدرى كان مقبوض كنت خايف إى حاجه تحصل لمراتى لان قلبها خفيف وكل شويه كنت بتصل اطمن عليها والاوضاع كانت تمام.

رجعت على البيت بعد الشغل كان فيه عاصفه ترابيه والعفره فى كل مكان والناس كلها بتقفل شبابيك البيوت عشان التراب ميدخلش ويوسخ كل حاجه

اول ما فتحت الباب ناديت على مراتى لانى لقيت القطه ماجى واقفه فى الصاله بتلعب على الكراسي ومراتى مش موجوده

ردت عليه من الشرفه إلى فى الناحيه التانيه لان بيت عمتى مطل على شارعين

دخلت عندها لقيتها واقفه بتبص على الشارع

قلت، ليه واقفه كده التراب هيغرق البيت،اقفلى الشرفه وتعالى ندخل جوه.

قالت حاضر لكن بشرود

وقفت جنبها، مالك بتبصى على الشارع كده فيه حاجه؟

الشارع كله فاضى الناس كلها هربت من التراب؟

قالت مفيش، اصلى شفت طفل صغير داخل البيت إلى هناك ده

اول مره الاحظ ان فيه بيت قصادنا فى الناحيه المهجوره

بيت قديم وشبابيكه مكسره ،قلت ايه الغريب فى كده ؟

قالت احنا بقالنا اسبوع فى بيت عمتك ومشفت اى شخص بيدخل هناك

ضحكت، ودا يخليكى تهتمى ليه ؟

يمكن طفل مشرد بيدخل ينام هناك

قالت انت مش فاهم حاجه يا عدلى

طيب فهمينى يا ست ساره

قالت وانا بدردش مع الجيران عرفت ان البيت دا مهجور من زمان، حصلت فيه حريقه ومن وقتها مفيش اى شخص سكن فيه ولا حتى أصحابه حاولو يجهزوة

فضل مهجور كده والاهالى بيقولو لم يمرو من هناك بيسمعو احيانا صوت طالع من جوه

قالت احنا بقالنا اسبوع فى بيت عمتك ومشفت اى شخص بيدخل هناك

قلت عادى، احنا مالنا وماله، الحمد لله ان بيت عمتى كويس

هى ماجى عملت اى حاجه غريبه تانى ؟

قالت من من وقت ما شغلنا القرأن وهى كويسه

همست الحمد لله اصل القطط دى من الأوراح المميزه إلى الشياطين بتحب تسكنها

مراتى بصتلى بخوف وعرفت آنى عكيت فى الكلام

قلت انا بهزر اسف

يلا بينا ندخل عشان انا ميت من الجوع

مراتى قالت بس انا مش مطمنه على الطفل الصغير إلى دخل جوه البيت المهجور

قلت واحنا مالنا خلينا فى حالنا

قالت عدلى يمكن الطفل ده حصله حاجه لو كان طفلنا كنت هتقعد ساكت ؟

مكنش فيه حل تانى قلت لما اخلص اكل هروح ابص عليه

مبسوطه كده يا ستى؟

ابتسمت سارة ربنا يخليك ليا يا عدلى وميحرمنيش منك

اكلت بسرعه كنت عايز اخلص وانام، كنت عارف شارع مش هيهدالها بال غير لم تتطمن على الطفل

نزلت من البيت وعديت الشارع، العاصفه كانت قويه جدا والتراب لسعنى فى وشى وخلانى جريت على البيت وملاحظتش نفسى غير وانا بدخل من بابه المكسر

لكن فيه حاجه مريبه ،الباب رغم انه مكسر كان عليه نقوش عجيبه ،دقيقة الشكل وجميله جدا ،تشعر انها مكلفه جدا ومستحيل تقعد فى مكان ذى كده الفتره دى كلها من غير ما تتأثر

اول ما عبرت الباب حسيت ببروده غريبه ولان الدنيا كانت ضلمه اول ما تحركت وقعت

كان فيه درج مكسر وانا مأخدتش بالى نزلت على الأرض وسط الضلمه وحسيت بالخوف

رغم كل الصوت إلى عملته مشعرتش بأى صوت غير صوتى

كان لازم اجيب معايا كشاف ،تسرعى خلانى نسيت

حطيت ايدى فى جيبى ادور على التليفون ملقتوش

قات كملت ،يبقى نسيت التلفون كمان فى البيت

عشان اريح ضميرى قعدت انادى فيه حد هنا؟

صوتى تردد بين الجدران المشققه من غير رد

قلت الحمد لله يبقى ساره مخاوفها ملهاش اساس

يمكن الطفل دخل وخرج من مكان تانى أصله بيت قديم

واكيد جدرانه مكسره

لفيت ارجع بيتى وفى نفس اللحظه تخيلت انى شفت خيال صغير تحرك فى اخر الممر

رجعت بصيت تانى على نفس المكان وبصوت مهزوز قلت فيه مين؟

فيه حد هنا؟

انتظرت ثوانى بعدها اخدت نفسى ومشيت على الشقه

ساره لقيت هدومى مدبهدله وملطخه بالتراب سألتنى حصل ايه ؟

قلت ولا حاجه وقعت نفسى على الأرض، طمنتها ان مفيش اطفال داخل البيت وانى تأكدت بنفسى

اخدت شاور ونمت ،ساره بحثت عن تليفونى فى كل مكان ذى ما طلبت منها لكنها ملقتش حاجه

اشتعوضت ربنا وقلت يمكن اتسرق او وقع فى المواصلات

ورغم كل ده كنت مبسوط ان البيت مظهرتش فيه حاجه تانى

تأكدت من الكاميرات.

تانى يوم لما رجعت من الشغل لقيت ساره منتظرانى فى الصاله

قالت مش هتصدق الى حصل

قلت حصل ايه؟

قالت اتفضل تليفونك

قلت كان مختفى فين ؟

قالت انت وقعته فى الشارع وفيه طفل صغير عثر عليه وجابه لحد باب البيت

قلت والطفل عرف ازاى ان التليفون بتاعى ؟مش يمكن بتاع اى شخص مر فى الشارع؟

ابتسمت ساره ،انا برضه سألته نفس السؤال

وقال إن كان واقف فى الشرفه لما انت خرجت من البيت

وشافك بتعبر الشارع جرى والتليفون وقع منك

بس هو مقدرش يوصله ألبيت امس عشان العاصفه

قلت والله طفل مؤدب، والديه عرفو يربوة رينا يرزقنا بطفل زيه

هو ساكن فين عشان أشكر اهله ؟

قالت فى الشقه إلى قصادنا فى الدور الرابع

بعد ما اخدت قليوله قررت انزل اشكر والد الطفل عن إلى عمله، بس انا كنت متأكد مفيش حاجه وقعت منى على الأرض وانا بعبر الشارع

طلعت الشقه وقعدت اخبط كتير ملقتش رد، انتظرت شويه وخبطت مكنش فيه رد

لما الصوت أصبح متكرر طلع واحد من الجيران

قال انت عايز الاستاذ عدلى ؟

قلت هو اسمه عدلى ؟

قال ايوه

قلت فى سرى غريبه دا نفس أسمى، بعدها قلت ايوه

قال عدلى من اول ما خرج امبارح جرى فى العاصفه مرجعش البيت

قلت طيب وعائلته، ابنه فين ؟

قال الله يحفظ دماغك يا استاذ ،عدلى مش متجوز ومش معاه اطفال

وانا نازل السلم قلت اكيد مراتى سمعت رقم الطابق إلى الطفل ساكن فيه غلط ودا امر طبيعى

لما فتحت الباب مراتى سألتنى ها عملت ايه؟ لقيت الطفل ؟

قلتلها لا الظاهر سمعتى العنوان غلط

همست مراتى كنت حاسه كده

متأكده من ايه يا ساره؟

قالت بثقه ان الطفل مش ساكن هناك ،اصل منظره كان غريب ومريب

غريب ازاى بقا ؟

كان ماشى حافى مثلا ؟

قالت بالضبط وصل هنا حافى وكان لابس ملابس غريبه وكان واضح عليه الجوع

تعرف يا عدلى لولا تقول عليه مجنونه كنت قلتلك هو نفس الطفل إلى شفته دخل البيت المهجور

قلت خيالك وسع اوى يا ساره، تلاقيكى بس سمعتى كلامه غلط ،لكن لما دخلت غرفتى فكرت ان كلام ساره منطقى

انا دخلت البيت المهجور ووققعت على الأرض هناك وجايز والتليفون ضاع منى وهو لقيه ورجعه

لكن ايه قصة الولد ده وازاى لما دخلت مشفتوش ؟ ولا حتى رد عليه

لكن كان فيه حجات اهم بالنسبه ليه، المخلوق المرعب إلى ظهر فى الكاميرات عشان كده قمت راجعت شريط امس

كنت بقدمه كل شويه مستحيل اراجع 12 ساعه مره واحده

مفيش اى حاجه ظهرت قدامى لكن لفت نظرى تشويش غريب بيغطى الشاشه كل ساعه تقريبا لمدة خمس دقايق

يا ريتني اشتريت كاميرا كويسه، عامل المحل قالى ان ممكن تظهر مشكلات فى الكاميرا على المدى الطويل لكن حظى النحس بعد عشر ايام المشاكل بدأت تظهر

فكرت ارجع الكاميرا واغيرها بس هى الراجل هيوافق يبدلها بعد المده الطويله دى كلها ؟

شفت القطة ماجى واقفه على باب الاوضه، ماشاء الله بقت كويسه ومفيش صراخ على الفاضى والمليان ولا تكشير عن الانياب ،قلت ماجى تعالى هنا

القطه مشيت ناحيتى بطاعه، ضحكت غريبه اوى القطه دى مكنتش طيقانى لكنها دلوقتى قربت منى وحكت شعرها فى جسمى ،ملست عليها برفق ومراتى شفتنى قعدت تضحك

ربنا يسهلو يا عم انت تصالحت مع ماجى ؟

قلت الظاهر كده رضيت عنى ،القطه نطت فوق رجلى وقعدت حاجه عاديه لكن انا شعرت ببرودة غريبه وكمان جمسى

ارتخى وحسيت بالنوم ،تثأبت،ساره قالت انت عايز تنام؟

دا انت لسه صاحى حالا

قلت جسمى خامل جدا ،قالت طيب ادخل نام وانا هروح أزور ماما بقالى كتير مشقتهاش لما ارجع هصحيك

لما دخلت غرفتى بين النوم والصحيان ساره كانت بتلبس

وماجى معاها ،ساره مشيت عشان تخرج من الشقه

ماجى مشيت وراها لحد ما خرجت بعدها رجعت وقفت على باب غرفتى، قعدت تبص عليه بتركيز ويدوب عنيها جات فى عنيه نمت فورآ.

فى الحلم عملت حاجه متوقعتهاش ابد، ورغم انه مجرد حلم كنت عايش جواه التفاصيل كأنها حقيقه

انا نايم فى سريرى وبنت بتدخل الغرفه معاها اتنين رجاله

كان شكلها غريب كأنها مش من عالمنا، الرجلين كان فى ايديهم وثيقه قرأو كلامها بلغه غريبه بعدها طلبو منى اوقع عليها ووقعت عليها البنت ،بعدها اختفو وحصل بينى وبين البنت ذى إلى بيحصل بين اى اتنين متجوزين

قمت من النوم جسمى مكسر، حاسس بالبرد جدا عايز اتغطى باكتر من بطانيه

قلت يا عدلى مفيش فايده من النوم قوم خد دش وفوق

دخلت الحمام وانا بستحمى باب الشقه انفتح ،قلت يبقى ساره رجعت، وانا بستحمى لاحظت علامات غريبه على جسمى، غير الخربشات على ضهرى كان فيه حاجه داكنة اشبه بالختم على يمين صدرى، حاجه مش واضحه اوى بس عمرها ما كانت فى جسمى وقفت قدام المرايه شويه ادقق فى جسمى ، هو انت جرحت نفسى من غير ما احس؟

وايه الكدمه الداكنه دى

باب الشقه انفتح مره تانيه، حسيت بقلق قلت مين ؟

قالت انا ساره يا عدلى

قلت تمام ،يمكن باب الشقه مكنش مقفول كويس وساره

رجعت قفلته ،مرضتش ازعج ساره او اخوفها، لبست هدومى وخرجت لقيت الاكل جاهز، ساره اخدتنى فى حضنها وهى بتقول شكرا يا حبيبى رغم أنها من غير مناسبه

لرد الامتنان قلت شكرا يا حبيبتى، اكلنا وبعد ما خلصنا اكل لاحظت ان ماجى مش موجوده

بسأل ساره عنها قالت دخلت الشقه مكنتش موجوده

يمكن خرجت من الشباك هروح ابص عليها

دورت ساره فى كل مكان ملقتش القطه ولما زهقت طلعت فى الشرفه تبص عليها عند الجيران

شافتها فى الشارع بتجرى ناحيت بيتنا لكن الغريب انها كانت خارجه من البيت المهجور