_بنات الغجرية _
( بقلم بسمة البياتي)
_البارت التاسع عشر _
مرجانة... ببتسامة شلونج جنة
... وكعت الفرشة من ايدي بعدني بحالة صدمة بلكي يطلع هذا حلم بس لا هذا مو حلم هذا واقع والي واكفة كدامي مرجانة بشحمها ولحمها
... شو صفنتي هههههه حقج اكيد من اشتياقج الي انصدمتي
اصال.. دخلت مرة للصالون ركزت بيها عزززا هاي مرجانة كمت وكفت وعيني عليها. حجت ويا جنة
وخطية جنة مصدمة حتى مكدرت تحجي
اشو هاي اندارت عليه كالت اصوووولة حبيبتي ياعيني اشكد كبرانة لو ما تشبهين عطر ولا جان عرفتج
اجت حضنتني وتبوس بيه خرب هاي شبيها منين نزلت عليها هالحنية
اميرة...همست الجنة هاي امج مو؟
.. اي للاسف هي
... روحي احجي وياها واني اكمل بدالج شوفي ايدج شلون دترجف
.. رحت عليها كتلها كعدي اهنا بين ميروحن النسوان ونحجي وانتي اصال تعالي يمي
... اي عيني اكعد ليش ما اكعد قابل شكو وراية
... خلت رجل على رجل وطلعت الباكيت اخذت منه جگارة ورثتها وظلت ادخن
اباوع عليها بعدها نفسها نفس القوة والأسلوب حتى شكلها ممتغير بالعكس زايده جمال وانيقة هه حتى السجن مكسرها
راحن النسوان فرغ الصالون
اميرة اخذي اصال وروحي بعدين اجي وراكم
... ياااا وشلون نعوفج وحدج
.. لاتخافين ماعليه شي اريد احجي ويا مرجانة وحدنا
اصال... مااه اني ما اروح اريد ابقة وياج
... لاتعاندين روووحي اني شوية واجي لاتشلعين گلبي
مرجانة... سمعي كلامها وروحي ولاتخافين راح اتشوفيني هواي ههههههه
... راحت اميرة واخذت اصال وياها مابية حيل ابقة واكفة جريت كرسي كعدت مقابيلها
كتلها شجابج وشلون اندليتي مكاني؟
.. ياعيني غير اشتياقي البنتي وحفيدتي هو الجابني
.... اكولج هاي الافلام عبريها على غيري اني حافظتج واعرفج زين متكدرين تضحكين عليه بهالكلاوات شلون اندليتيني
.... ههههههه وداعتج من زمان اعرف عنوانج ورا شهرين من طلعتي من السجن اندليتج
بس مثل متدرين الوضع جان تعبان اضطرينا اني وساهرة انسافر وقبل فترة يلا رجعنا
... هه اي اكيد انهزمتوا لان مصايبكم هواي والف واحد عنده عداوة وياكم ياما هجمتوا بيوت ناس وكسرتوا رگب بناتهم
.. طبهن طوب احنا مرايحين عليهن. هنا برجلهن يجن علينا
... مكتيلي شلون عرفتي عنواني
... انتي بس لا عبالج اني من دخلت السجن هاهيه انكسرت ومظلي ظهر استند عليه
لج اني مرجانة معارفي بكد شعر الراس ويتمنون يخدموني
كلفت جماعة وعن طريق مدرسة اصال القديمة كدروا يعرفون وين ناقلتها وخلال ايام عنوانج صار عندي
... خرب شلون غابت عني هالسالفة اوووف ولا اكدر المرجانة
اي وهسه شرايدة مني
.. ممم اريد اصال
... هههههههه والله ضحكتيني ترى اصال كبرت مو نفسها هذيج الطفلة التهدديني بيها وبعد محد يكدر ياخذها مني
... وداعتج اكدر اخذها اصال حفيدتي اني اولى بيها منج ولو اريد بالقوة اخذها منج
ترى اذا قبل جان ظهري قوي هسه صار اقوى نصيحة لاتلعبين وياي وهسه انتي مخطوبة ما ريد حفيدتي تعيش ويا رجال غريب
.... لا لا هاي منو الدتحجي ولا عرفتج معقولة مرجانة صارت تهتم بالشرف ههه اخاف مبدليج
.. العندي حجيتة ارجع واكولج لاتلعبين وياي
... خفت منها تحجي بثقة وادري بيها كولشي يطلع منها
كتلها اذا فكرتي تقتربين من اصال اكتلج خلاص واريح العالم من شرج
.. يلا كتليني هياتني كدامج شمنتظرة
بس انقهرت عليج لهذا راح انطيج خيار ثاني وانتي بعد بكيفج
.. شنو هو؟
... اجي اعيش وياكم حتى حفيدتي تبقى كدامي
... قبل شوية جنتي اتكولين ظهري قوي وعندي فلان وعلان هه وانتي طلعتي معندج بيت يلفيج
.... لو اريد اسكن بقصر بس اني عاجبني اعيش وياكم وهسه جاوبي ولادوخيني مظل وكت اريد اروح
.. اختنكت رجعت مرجانة لزمتني من الأيد التوجعني حسبي الله عليج موافقة تعالي
... عفية بالحبابة باجر انتظريني اتريك وياج ههههههههههه
من طلعت شبعت بجي هاي وين جانتلي رجع ضيمي من جديد تاخر الوقت كمت سديت المحل ورجعت للبيت
وصلت للبيت واني اسحل برجلي سحل تلكتني اصال مبينا خايفة
... ليش تاخرتي خفت عليج
.. لاتخافين مبية شي رايحة ابدل وانام
.. شنو مراح تتعشين
... لا ما اريد مو جوعانة وانتي سويلج شي اكلي لاتبقين بدون اكل
عفتها وفتت للغرفة بدلت وتمددت
ياربي ساعدني شراح اسوي اذا اطردها ادري بيها راح تاذيني باصال هاي حية كولشي يطلع منها ولو حتى الحبة تنظلم من تتشبه بمرجانة
باليل خالة والبنات اجوي يمنا
ام وليد.. اميرة كالت امج اجتج هاي شلون اندلتج؟
.. قسمتي السودة دلتها عليه
.. وشتريد منج
... اشرتلها برأسي على اصال بمعنى ما اكدر احجي كدامها خالة فهمت علية كالت
ثناء انتي واصال دوختوني كومي قريها بالغرفة
دخلن للغرفة
حجيتلهم على طلب امي ظلوا صافنين عليه ميعرفون شيكولولي
... زين كرار واهله اذا عرفوا شلون
.... والله اني هم حايرة مدري شلون راح اكوله
اميرة... الله يعينج على هالبلوة
من راحوا بيت خالة كلت الاصال باجر مرجانة راح تجي تعيش ويانة
.. ششنو لا عفية جنونة ما اريدها تجي اهنا
... ما اكدر امنعها بلكي تبقة فترة وتروح الاريده منج متكعدين وياها ولاتتعلمين شي منها
وما اريد مشاكل مفهوم
.. اهووو هاي الجانت عايزة تجي تعيش ويانة
اروح انام احسن وراية دوام
جنة.. ثاني يوم اجتي مرجانة
... شنو هذا البيت اشكدوتة وين حيكفينا
... والله هذا الموجود اذا ميعجبج تسوين فضل اذا ترجعين منين ماجيتي
.... هسه اني شحجيت اكلتيني
صدوك تعالي اكولج لعد موبعتي هذاك البيت وين وديتي فلوسة وانتي عايشة بهالبيت وتشتغلين عاملة بصالون
... الفلوس انباگن
... شلج بهالكلاوات
... مثل ما انباك الذهب هذن هم انباگن لعد اشو بوكتها مكلتي كلاوات
... هااا لا مو استغربت لان هنا لا فلس ولافلسين غير اديرين بالج عليهن
... شوفي مرجانة من هسه اكولج المنطقة اهنا الكل يعرفون اهلي ميتين بحادث ما اريد تكولين الاي احد انتي امي وما اريد تختلطين بالجيران اقل حجي اسمع منهم وحق ربج اخذ اصال واهج
وعود اريد اشوف هالمرة شلون تلكيني
... اووي شبيج اكلتي راسي طبج طوب انتي وجيرانج على اساس اني ميتة عليهم واختلط بيهم
اصال اجت جنونة اخذتني من المدرسة
شفتها دترجع للبيت سالتها شنو منروح للصالون اليوم
.. لا مابية حيل دايخة ومالي مزاج للشغل
.. ممممم مرجانة اجتي لو بعدها
.. اي اجت اصخامة
... ههههه حلوو هذا الدلع
وصلنا للبيت مرجانة ماكو يمكن نايمة دخلت بدلت ورحت غسلت وتوضيت طلعت من الحمام دخلت للهول
لكبتها كاعدة كالت هلا بحبيبة مرجانة تعالي ابوسج
.. همست لا هلا كتلها هستوني توضيت اذا تبوسيني راح ينكسر وضوئي
... شنو رجال بايسج حتى ينكسر وضوئج
...شوفي مرجانة ابقي بعيدة عني احسنلج ترى اني مو جنة الفقيرة والنبي اذا طخت براسي اهججج باليلة ظلمة
.... گرة عينج جنة هي هاي تربيتج الفرحانة بيها تعالي شوفيها اشكد صلفة وادبسز
جنة.. مديت راسي من المطبخ كتلها بعدج مشايفة شي ابقي بعيده عنها احسنلج
... ماشي يا بنات **** يجي يوم واطلع هالصلافة من عيونجن
اصال... همزين تعرفين بنفسج **** ههههههه
جنة... اصااااال دخلي للغرفة
.. كلفتي نفسج لج سزز جاي تغلط على امج وانتي هذا جوابج الها امده البطنج الشالتج
.. وراه الغدا دخلت للغرفة رزلت اصال لج شنو هاي الفاظج شو صايرة فدمرة
.. اني شعليه هي حجت.واني عدت كلامها
. كتلج معلييج بيها ليش متسمعين الكلام الخاطر الله رحموني ترى البيه مكفيني ما اريد مششاكل
.. هذا هو لاتتعصبين بعد معليه بيها
... هاي الفترة كلها كرار يم اهلة مدري شعدهم اخذ اجازة وبقة اهناك حتى مكلف نفسه يكولي شنو سبب بقيتة هلكد
مرجانة الحمدلله التزمت بكلامي جانت تطلع الظهر ترجع قبل حظر التجوال ومرات تبات برا وهذا الشي الصالحي حتى الجيران ميشوفوها
اليوم بالصالون كرار اتصل على اميرة لان هي جديد اشترت تلفون وهو اخذ رقمها
حجة وياي كالي أني رجعت واريد اشوفج خليت ايدي على گلبي بس لا عرف بسالفة امي قبل لا اني اكولة اتفقنا العصر يمر عليه ونطلع
اجة العصر طلعت من الصالون صعدت ويا سلم عليه عادي مثل كل مرة ووجها ممبين ضايج
.. حبيبتي وين تريدين نروح
... شوفلنا فد حديقة نكعد بيها عندي موضوع وياك
... اني هم عندي موضوع
.. بلعت ريگ هااا شنو هو
.. ههههه شبيج صفريتي ماكو شي من نوصل نحجي
... ركن السيارة كعدنا بمتنزة بعيد عن الناس
.... اي عمري شنو موضوعج
.... تنفست وتحسرت كرار صارت شغلة وانت مسافر وما اكدر اضمها عليك لان انت بيها وبلايها حتعرف اذا مو اليوم باجر
... اي شنو هي وشبيج هلكد مرتبكة وخايفة
... امي اندلت مكاني وهسه هي يمي بالبيت
.. شششششنو شششلون اندلتة انتي مو كلتي تركتها وهي متعرف عني شي شنو جنتي تضحكيين عليه
... لاتصيح اني مكذبت عليك فعلاً مجنت اعرف عنها شي وقبل جم يوم انصدمت بيها من اجتني للصالون هي كادرة تعرف عنواني عن طريق مدرسة اصال القديمة
.. اسسسستغفر الله وهسسسه ششعدها باقية عندج
... كمت ابجي ما اكدر امنعها هددتني اذا متبقة يمي تاخذ اصال مني
... اي خلي تاخذها هي بيبيتها
... انصدمت من جوابه ششنو انت اشتدتحجي شنو تاخذها كل عقلج انطيها المرجانة
... اي هذا احسن حل لان اني هم بعد ما اكدر ابقة اهنا طلع نقلي للديوانية وحتى بيت عمي راح يشيلون واذا تريدين نزوج لازم انعيش اهناك
... فكرت اي هذا خوش حل اخذها وانهزم من امي للديوانية كتله اي عادي اجي وياك وناخذ اصال ويانة
... اني مزوجج لو مزوج اصال امج مو تريدها عوفيها. الها
... مجاي اعرفك مو انت النطيت كلمة وتعهدت تربيها وياي وتشيلها بعيونك وين راح كلامك وهسه دتطلب مني انطيها الأمي
... اني ما اريد مشاكل وبا امج اذا اخذناها اكيد راح تلحكنا لهناك وتسويلنا فضيحة واهلي وعمامي اذا شافوها يگلبون الدنيا على راسي
واني وانتي راح انعيش ابيت اهلي مو راهمة تعيش ويانة بنفس البيت لان ولد اخواني كبار وهي موطفلة
... دموعي تجري ما اعرف شجاوبة احس گلبي انكسر وصار تستين وصلة همست هذا اخر كلام عندك
... اي جنة وانتي هسة لازم تختارين يا اني يا اصال
.. مسحت دموعي وبدون تردد نزعت الحلقة خليتها بيده كتله شوكت اطلكني.
... هيج بسهولة عندج تبيعني
... الكلام بعد ممنه فايده احسن حل كل واحد يروح بدرب الله يوفقك وتلكى الاحسن مني
... ماشي جنة يجرالج باجر امشي بمعاملة الطلاق
رجعت للبيت واني منهارة تمامآ دموعي تجري ممقهورة عليه بكد ما مقهورة على نفسي ليش اني من دون العالم هذا حظي جنت متاملة ارتاح واستقر بحياتي لكن الظاهر ممكتوبلي هالشي
محد بالبيت تمددت بالفراش بدون ما ابدل ملابسي بجيت بصوت اريد اطلع قهر گلبي
سمعت صوت اصال اجتي غطيت راسي ما اريدها تشوفني بهالحالة
... جنونة جنتي اشو نايمة انتي موتكولين موزينة نومت المغرب وفوكاها الغرفة ظلمة
كشفت راسها جانت مغمضة ووجها احمر وقطرات دموع على خدها
جنونة كووومي شبيج لاتخوفيني عليج
.. الخاطررررر الله رووووحي وعوفيني مابيه شي شششوية مريضة روووحي منا
. .. لاتتعصبين رايحة
... طلعت من الغرفة واني خايفة عليها عزززا بس لا كرار تعارك وياها من عرف مرجانة اجتي يمنا
رحت البيت خالة صحت اميرة كتلها جنة مدري شبيها وتبجي روحي شوفيها اني متقبل ابقة يمها
.. يبووو بس لا تعاركت ويا كرار المصخم
دخلت للغرفة شغلت الضوا
كومي جنة اني اميرة مراح تكدرين تطرديني مثل اصال وما اطلع منا اذا ما اعرف شبيج
.. والله مابيه حيل احجي فدوة عوفيني
... وربج ما اعوفج جريتها من ايدها. وكعدتها
اصولة عوفينا وحدنا
... مممم ولو الفضول يجلط بس يلا ميخالف راح اصبر
طلعت وسديت الباب افتريت شوية بالبيت مكدرت اتحمل وكفت يم باب الغرفة اتصنط
سمعتها تحجيلها شلون كرار خيرها بيني وبينا وكالت اني رضيت امي تجي تعيش اهنا حتى لاتاخذها مني يجي كرار بكل سهولة يطلب مني اتركها
لا إرادياً دموعي نزلن خليت ايدي على حلكي وخرت من الباب ورجعت للمطبخ ابجي
جنة... شفتي حظي اني شلون صدكتة وامنت بي
... كافي بجي عيونج راحن
انتي شمعرفج راح يطلع واحد نذل احنا كلنا انغشينا بي
جنونة انتي حبيتي
... تعلقت بي وتعودت عليه بس مو حب لان من اول لحظة گلبي ممرتاحلة
.. لعد ليش هلكد مقهورة
.. حقي انقهر جبت حياتي ضيم بضيم ومن كلت هاهية راح ارتاح واعيش حياة طبيعية بين يوم وليلة رجعت ادمرت حياتي
... سودة عليه كافي عمري كومي غسلي ترى اصال خطية خايفة عليج
... كمت غسلت وبدلت اميرة راحت دخلت للمطبخ لكيت اصال دتحظر العشا
حظنتها من وراه وبست راسها خوما. زعلانة لان صيحت عليج
... لا جنونة اني ما ازعل منج يلا جوعانة خلي نتعشى
كعدنا نآكل كتلها جنونة اني اريد اروح ويا ماما مرجانة
... شمرت اللكمة من ايدي رفعت راسي عليها
ماما؟
وتريدين تروحين وياها
وين تروحين
.. اعيش وياها
.. انتي جنتي تصنطين علينا موو شوفي لج اياج اسمعج تحجين هذا الحجي بعد فهمتي
.. لا مفهمت اني اريد اروح وانتي متكدرين تمنعيني
.. اصااااال سسسدي حلكج امنعج ونص اني امج
... لا انتي موو امي انتي خالتي
... كلامها مثل الطلقة وانضرب بگلبي _
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!