_بنات الغجرية _
( بقلم بسمة البياتي)
_البارت الثالث والعشرون _
مشت السيارة باهر يسوق. ومنصف كاعد بصفة واني ورا
دموعي مسكتن منظر جنة ميروح من بالي وصوت بجيها لهسه باذني
منصف كل شوية يندار يباوع عليه
كرهتها اكثر من قبل لوبيده احركة هو مرجانة
منصف... بوية عيونج راحن كافي بجي
... معليك بيه يقتل القتيل ويمشي بجنازتة والله يا الله
باهر... يبتلي على عمره اليحجي وياج كلمة
... يكون افضل لو متحجون وتكرموني بسكوتكم
... اكلك منصف انه بحياتي محد غالط عليه من البارحة ولليوم شبعت مسبة صرت ثور وزبالة وادور مكسرات
منصف... ههههههه اليكول مترزل وحدك
اصال... استفزوني كتلهم والله محد كاللكم تعالوا عليه اليدك الباب يسمع الجواب
باهر... وهسه انتي منو حجة وياج انه واخوية ليش تحشرين نفسج
... درت راسي على الشباك عود يقلدني تهي بهي
كل شوية ادز مسج على فون اميرة اطمئن على جنة
وهي تجاوبني تكول مابية شي لاتخافين
ما اعرف اشكد السيارة مشت ووين احنا فقدت الاحساس بالوقت وجع گلبي طاغي على كل حواسي
وكفت السيارة يم مطعم
منصف... انزلي نتغدا انتي حتى ريوك ممتريكة
.... ما اريد اسمم والف مرة كتلك معليك بيه
... لا اله الا الله بنتي بطلي عناد الطريق طويل ميصير تبقين جوعانة راح تتخربطين
... يطبني مرض كون اموت قبل لا اوصل البصرتكم واعيش ويا ناس مثلكم
باهر...جوابها بطارف لسانها تغلب عجايزنا بسوالفها
.... اني مخنوكة منك وادري بنفسي تالي اخلي قهري كوله بيك واخليك تنام مستشفى اليوم
... وعلي انه الروحي طكت منج وخايف لا ابتلي بيج
.. عششتو يبتلي بيه مو تايهتلك ابن ابوك وتعال مد ايدك عليه وراح اشوفك اصال منو
.... منصف على ششنو تضحك سكت بنتك هاي اذا حجت هيجي كدام احد تخزينا
منصف.. ههههههه امشينا انجيب اكل عوفها بعدها اصغيرة ومقهورة
... نزلوا وقفلوا السيارة يخافون لا انهزم اتصلت على تلفون اميرة
اول مرة مجاوبت بالمرة الثانية يلا
... هلا حبيبتي اصولة
... هلا بيج وين جنة
... هااا نايمة
... انتي وين؟
.. بالبيت
... اميرة جنة شبيها وشنو هالهوسة اليمج فدوة احجييييي جنة شبيها
... لج لاتعيطين والله مبيها شي لاتخافين
... لعد احجي وينها انطينيها اريد احجي وياها
... احنا بالمستشفى
... عززا عزززا وتكولين مبيها شي
... خررب غيرتج شكو تلطمين ولج ضغطها نزل لان مماكلة ولا نايمة هسه شكلولها مغذي وصارت احسن بس يخلص انطلعها
... احلفي مبيها شي
... وادعت ليث مبيها شي بس ضغطها نزل
.... مسحت دموعي ماشي خلي ترتاح بوسيها الي وكوليلها لاتنقهر ولاتخاف عليه مصيري ارجع خلي يوكفولي اله اخبلهم
... هههههه كدها ادري بيج تخبلين عشيرة كاملة ولاينخاف عليج
انتي هم صوتج تعبان اكلي شي لاتظلين بدون اكل انوب ينزل ضغطج مثلها
ماشي لاتشغلين بالج
سديتة منها خليت ايدي على حلكي وكمت اشهك سودة عليه جنتي بالمستشفى واني مو يمها الله لاينطي كلمن جان السبب
منصف... شجاج من نزلنة جنتي ساكتة شبيج
... هم الك عين وتسسسسألني الله لاينطيكم جنة بالمستششئشفى بسببكم والله اذا صار عليها ششششششي اشششرب من دمكم
باهر... كافي عياط فهمينا شبيها خالتج
... اشششك اهدومي اكوله بالمستشفى يكولي ششبيها
منصف.. صوتج راح من الصراخ اذا اظلين بهالحالة انتي هم تتخربطين اهدي واحجي منو كالج جنة بالمستشفى وشبيها
... اميرة كالت ضغطها نازل ومتخربطة
... ماعليها شي لاتخافين
... ششنو من گلب عندك حجر خوما حجر
باهر... امشي اخذج للحمام تغسلين وجهج صار بلون الطماطة
.... هالمرة مناقشتة ولاعيطت محتاجة اروح للحمام واغسل لان احس راح فعلا اتخربط
مشيت ويا
باهر...كون دوم هيجي حبابة وتسمعين الكلمة
... ترى ارجع والله
... هسه انه شكلت عمييييي سكتت توبة ما اعيدها
... دلاني على الحمام دخلت غسلت شوية صحصحت من طلعت واكف ينتظرني
رجعت للسيارة وبعد محجيت وياهم
جانوا جايبيلي اكل توسلوا مقبلت اكل ولا عبرتهم
الطريق طويل الدوخة زادت عندي وعيني ثكلت جنت اكابر واسوي نفسي عادي
باهر... اكلي شوية لاتظلين معاندة
زين نامي وارتاحي بين منوصل
اووف من العناد
.. وصلنا للبصره وتحديدا للمنطقة الساكنين بيها
استغربت من شفتها عبالي قرية وبيوت عادية
اشو طلعت حلوة واكثر وبيوتها فخمة
باهر.. الحمدلله على سلامتج والله يستر من لسانج
منصف... ههههههه خايف منها
... الله وكيلك قنبلة مؤقوتة وراح تنفجر بوجه الكل
.... اسمعهم وما اكدر اجاوب مبيه حيل مسطورة ودايخة
وكفنا كدام بيت يخبل
منصف.. نزلي البيتج بنتي
.... اني بيتي ابغداد مو اهنا
حجيت بداخلي عايش بالعز واني وجنة اجتنا ايام اللكمة حسرة علينا
وهسه صار بيتي وعندي اب ههه
نزلت من السيارة لازمة نفسي حتى لا اوكع
باهر صار بصفي وهمس من ورا عنادج حتى حيل مبيج اشكد راسج يابس
... صكيت على اسناني هسه انت شعليك قابل اني شاكيتلك
طلعوا من البيت ثلاث. ولد صغار اكبرهم يمكن عمره 12 سنة اجوي يركضون على منصف اخذهم الحضنة
كاللهم شوفوا شجبتلكم هاي اصال اختكم الجبيرة
شششنو شوف شجبتلكم احد كايلك اني العابة يلعبون بيها
...يتورط اليغلط كدامج بكلمة
بوية هاي اختكم راح تعيش ويانة وتنور بيت ابوها
... اني معندي لا اب ولا اخوان
باهر... يرادلها گلب هالكبرة فوووتي جوا
... الجهال صافنين عليه فتت جوا صوت هواي نسوان اخذوني للديوانية كومة نسوان كاعدات وكلهن عينهن صارت عليه
منصف وباهر سلموا عليهن
اكو مرة جبيرة كالت خايب منصف لاتكول هالبت الحلوة هي بنتك
باهر.. شفتي الحظ منصف الاجلح طلع مخلف هالحورية
... اللهم صل على محمد وآل محمد تعالي يمه ابوسج
باهر.. انلاصت وعلي
... زفرت بضجر احترام العمرها رحت يمها سلمت عليها
وبدون ما احجي شي رجعت وكفت بمكاني وهذا باهر ولايسكت
كال شعجب رحتي سلمتي عليها بدون ماتغردين وتقسمين
... هو غير يسكت ويفضني شلون ورطة هاي
... اششش الله لايثرد الاحد بماعونج
.. اجني نسوان اثنين بوسني والباقيات كاعدات يباوعن عليه من فوك ليجوا
بنين.. انه عمتج بنين وهاي عمتج بيداء فدوة الهالخلقة مال كرط
منصف.. ام سيف ليش مكمتي سلمتي
... كامت من ورا خشمها باستني واني حتى مبادلتها السلام
يحجون ويسوالفون واني واكفة بمكاني الدوخة عاميتني متحملت نترت بغضب
احد كايللكم اني مزهرية حاطيني وتتفرجون عليه اريد مكان انطمر بي
... حقج بوية اكيد تعبانة بنين رحمه الاهلج اخذيها الغرفتها
... مشيت وياها واني اسمعهن يتهامس عليه
بنين.. شبيج ضايجة حبيبة
... اي قابل من شنو اضوج اصلا لأزم اشد وصلة واركص احتفالا بجيتي السعيدة الهالمهجوم
... اسم الله خايبة بيش طالبتة وسويتي مهجوم
... بكيفي واحجي اليعجبني
... هاي غرفتج وهذا الحمام قريب منج هذا الطابق بس الج والسيف اخذي راحتج بي
. دخلت للغرفة مثل غرفة الاميرات كولشي بيها وردي مرتبة وحلوة
ههه عبالة اذا جابلي هيجي غرفة راح اتقبلة
صعدولي ملابسي بدلت طلعت غسلت ورجعت تمددت
فتحت الفون اتصلت على اميرة. وهالمرة جنتي جاوبتني
من كالت الووو. دموعي جرن سكتت واسمع صوت شهكاتها وبجيها
بالكوة حجيت شلون صرتي ياروح اصال
... شششلون اصير واني كطعوا الهواء مني
.... لاتبجين يروحون فدوة الكل دمعة نزلت من عينج
... انتي شلونج وصلتوا لوبعدكم
... اي وصلنا
... شلونهم وياج
...عدلي السؤال وكولي انتي شلونج وياهم
... حبيبتي لاتسوين مشاكل الخاطري والله اخاف عليج هذولة عشاير طبعهم يختلف عن طبعنا ميحبون البنية التلاسنهم اخاف ياذوج
... عشاير على روحهم مو عليه الزلمة البيهم خلي يندك بيه وشوف شراح اسوي
... كلامج ديخوفني فدوة حبيبتي تحمليهم هالفترة الحد ما الكي حل وارجعج يمي
... ماشي عمري مراح اسوي شي جنونة امانة ديربالج على روحج ترى معندي غيرج لاتاذيني بيج
... اني عايشة علمودج والله لاتخافين عليه وانتي اهتمي بنفسج وبأكلج لاتهملين روحج
وهسه روحي ارناحي ادري بيج تعبانة
.. سديتة منها حظنت المخدة ورجعت بجيت ربي ارحمني الديصير بيه فوك طاقتي
اني شسويت وهيجي دتعاقبني انحرمت من اغلى انسانة الي بالهدنيا شلون حكدر اتحمل فراكها
بنين...خوما نمتي جبتلج اكل كومي حبببة اكليلج جم لكمة سندي گلبج بيهن ابوج كال طول اليوم على لحم بطنها وممخلية شي بحلكها
.... ما اريد منكم شي عوفوني بحالي لاتظلون كل شوية طابين طالعين عبالك كاعدة بگراج العلاوي مو بغرفة
... هههههه باهر كالي ديربالج من لسانها مصدكتة هذا الاكل يمج من تجوعين اكلي
... عافتني وراحت اني من التعب والدوخة بسرعة غفيت
مدري اشكد نمت فزيت احس جسمي مشتعل نار وعظامي تصل عليه من الوجع كمت اون عبوني ثكال ما اكدر افتحهن
كلما اغفى افزع من الوجع حسيت ايد باردة تخلت على كصتي وصوت يمي
منصف... هاي مصخنة ليش عايفيها وحدها ومحد منتبه عليها
بنين... من جبتلها الأكل ضاجت كالت لاتبقون طابين وطالعين اريد انام
... بوية فتحي عينج واحجي وياي شنو اليوجعج
... ظليت مغمضة معندي طاقة اجاوبة
... بنين كوميها اخذها للمستشفى
... اجت بنين تريد تكومني نفضت ايدي منها رجعت تغطيت
... موزين تبقين هيجي لاتعاندين كومي
... حجيت بصوت تعبان ما اروح الاي، مكان بلكي اموت واخلص منكم
بنين... اسم الله عليج
منصف عوفها انه راح اسويلها كمادات وانت روح جيب دكتور قاسم بلكي بنطيها علاج
... بنين ظلت تسويلي كمادات جنت افز من برودت المي
ورا شوية سمعت صوت واحد يحجي بس منتبهت شبحجون
رجعت نمت وهالمرة بعد محسيت بشي
كعدت نص الليل عركانة ملابسي مي ردت احرك ايدي انتبهت مربوطة بشي باوعت بيدي كانولة واكو مغدي معلك
انداريت للجهة الثانية شفت وحدة نايمة بصفي ومنطيتني ظهرها نسيت اني وين وشصار ويمكن عقلي الباطني وهمني وخلاني اتخيل البصفي جنة حضنت ظهرها واشم بيها بس عطرها يختلف عن عطر جنة
فزت واندارت عليه حجت بصوت نعسان شلون صرتي
ابتعدت منها همست انتي مو جنة اذكرت اني مو يم جنة كمت ابجي بشهكة من الخنكة والحسرة البصدري اختنكت
بنين... اسم الله بنيتي يااا شجاج هاج شربي ماي سودة عليه لاتبجين اعتبريني مثل جنة
... صحت بقهر واني اشهك محد مثل جنة اريدها حرام عليكم حموت بلياها ارحموني وارحموها
.. اهدي بعد گلبي انتي تعبانة ومريضة عهد عليه من تصيرين زبنة احجي ويا منصف عسى ولعلى يرجع الها
.... صدوك حتحجين ويا لو جاي تضحكين عليه
...وداعت وليدي راح احجي ويا
اكوم اجيبلج ملابس بدلي حتى لاترجعين تتمرضين
.. جابتلي ملابس ساعدتني بدلت فصلت المغذي عن ايدي كمت واني استند على الحياطين رحت للحمام غسلت
دخلت للغرفة بنين ماكو رجعت للفراش ورا شوية اجت بيدها صينية بيها كاسة شوربة
.. بداعت جنة شربي شوية حتى تتقوين
... عفية والله نفسي متريد
... حلفتج بالغالية بس شوية ضوكها اشكد طيبة
... شربت شوية وراها انطتني علاج اندكت باب الغرفة دخل منصف
كال شلون صرتي بالي يمج ماكدرت انام
.. هه ابد ميلوكلة دور الأب الحنون درت راسي للجهة الثانية ومجاوبتة
بنين.. لايظل بالك الحمدلله وضعها احسن روح نام انت هم تعبان وجاي من سفر
... عافنة وراح تمددت اجت بنين يمي كالت ليش مجاوبتي خطية لو شايفتة شلون جان خايف عليج
...هههه خايف عليه وصارلة سنين شامرني وميعرف شي عني وبعد كالهسنين صار، اب براسي
... هو لو يدري بوجودج مجان عافج ولايوم
... عفية سدي الموضوع اذا تظلين ادفعيلة عوفيني وطلعي
... ههههههه سكتت انه ماصدكت حجيتي وياي جنت مايسة منج خفت على لحظة وتكبين عليه
... مبين عليج طيوبة انتي وهذاك اخوج ابو لسان
... هههههههه انعل يومج والله لويسمعج يعلكج بمكان البنكة
. وداعتج سمع الاضرب من هالكلام
... صخام وشكال
... كولشي مكال اكولج منو شدلي الكانولة والمغذي
... ابن عم ابوية دكتور وبيتة قريب علينا راح باهر جابة شافج وكتبلج علاج
... عزززا خوما جنت بدون حجاب
... رجال جبير موصغير وجنتي مستورة مشاف منج شي
هنيالها جنة عليج اشكد تحبيها
... فز قلبي من ذكرت اسمها شلون ما احبها وهي روحي من الدنيا
..... خايبة طول اللبل تهذين باسمها وينج جنة اريدن جنة تعالي جنة
... فدوة العمرها
انتي. عايشة بهذا البيت؟
.. لا حبيبة انه عندي بيت بنفس الفرع اليوم بقيت اهنا علمودج
.... يعني مزوجة؟
... اي ماخذة ابن عمي وعندي وليد واحد اسمة حسن عمره عشر سنوات
... اهاا ربي بحفظة الج بس بعدج صغيرة مو كولش جبير
... ازوجت وانه عمري 16 سنة وبداية زواجي صار عندي حسن وبعد مصار عندي والحمدلله على كل حال
.... اهاا ربي يرزقج باخو الحسوني
منصف كم طفل عنده
.. هههههههه خايبة كولي بوية يابة بابا مو فد شطحة منصف
.. اهووو بطلت ولا اريد اعرف ولو اموت ما اصيحة بابا اني معندي اب
. ماشي لاتتعصبين منصف عنده ثلاث ولد سيف ومنتظر ومحمد
... وبنات معنده
... اخاف اكولن عنده انتي وتعطين بيه
.. على اساس هسه انتي مكلتي
...هههههه خايبة نعست خلي انام وراية كعدة من الصبح باجر اسوالفلج على كل العشيرة
...كعدت تفريبا ساعة عشرة بنين مموجودة اول مفتحت عيني لزمت التلفون اتصلت على جنة
اول مرن رفعتة وجاوبت بالهفة
الووو اصال وينج من البارحة كومة اتصلت عليج وانتي ماكو
. جنت تعبانة ونايمة شلوتج عمري
.. موزينة بدونج انتي شلونج
.. . حالي نفس حالج
...شبي صوتج ليش هلكد تعبان
.. مابي شي لان هستوني كعدت من النوم
... تريكتي
لابعدني
... اصال اكلي ما اريد تتمرضين
لاتحافين عليه راح اكل انتي هم ديربالج على صحتج
.. ان شاء الله حبيبتي اليوم اشتري تلفون واتصل عليج منه تلفون اميرة من البارحة يمي عيب اريد ارجعة
.. ماشي عمري
سديتة منها وكمت غسلت ورجعت للغرفة
جنة.. حياتي بدون اصال جحيم بمعنى الكلمة دموعي ليل ونهار يجرن عليها البيت بدونها مثل الگبر مرات افتر بي مثل المخبلة ادور على صوتها
من اتعب اروح انام بفراشها واحضن ملابسها
اكلي صار قليل ونوم بالكوة انام صحتى يوم بعد يوم دتدهور
حتى للصااون ما اروح خالة الله ينطيها الصحة والبنات متركوني دوم وياي اميرة كامت تبات يمي متعوفني وحدي
منصف قبل لاياخذ اصال ويسافر اخذت منه رقمة يومية اتصل عليه اتوسل وابجي وماكو اي نتيجة جوابة مثل كل مرة اني مصدكت لكيتها شلون تريدين ارجع اعوفها
اشب وانطفي من القهر وهو ولا يمه
اصال من تحجي وياي امثل دور القوية واحجي عادي واني داخلي يتكطع
مرات اكول احسن خلي تعيش يم ابوها اذا بقت يمي يطيح حظها مثلي ومرجانة مراح تعوفها بحالها والناس اذا عرفوا اصلها ومنو بيبيتها حتى زواج مراح تتزوج
ويرجع گلبي يكولي لا هاي انتي الربيتها وشفتي الضيم علمودها محد اله حق بيها غيري هاي بنتي اني
اميرة.. جنة الى متى حتبقين هيجي حابسة نفسج ومأذية صحتج لا اكل ولا نوم وبس بجي دشوفي شصاير بحالج
... شسوي قابل بيدي لج فراكها دمرني تعرفين يعني شششنو دمرني
....حقج والله حقج ومحد يلومج بس هم ميصير هبجي تاذين نفسج اصال يم ابوها مو يم واحد غريب وهي مو صغيرة اعتبريها مزوجة
قابل انتي جنتي حتبقيها طول العمر يمج هم يجي يوم مصيرها تتزوج وتتركج
فكري بنفسج جنة انتي هم لازم تشوفين حباتج وتكونيلج عائلة مادامج بعدج صغيرة اذا تكبرين منو الج
... مو جربت اعيش حالي حال الناس وفشلت كوليلي منو اليرضى ياخذ وحدة امها غجرية كاولية
حتى التقدمولي كلهم كبار بالعمر ومطلقين لو زوجاتهم ميتة ويريدوني مربية الاطفالهم
اني المثلي صعب تعيش حالها حال باقي البنات لان عار امها يظل يلحكها للموت
... اول مرة اشوفج هيجي ياسة ومستسلمة
... لا مو ياسة هذا الواقع لا اني ولا انتي نكدر انغيره
... زين عوفج من الزواج ارجعي للصالون اقلها تلتهين وتنسين همج شوية
... ماشي باجر ان شاء الله اجي وياج
اصال... مرت كم يوم واني حابسة روحي بالغرفة الأكل يجي اليمي منصف هواي حاول يقرب المسافة بينا واني اصده اخير شي تعاركت ويا كتلة ما اريدك بعد تجي للغرفة
مرتة اسمع صوتها ومرات تجي تجيبلي الاكل سبحان الله لا اني اطيقها ولا هي طايقتني مبينا على عمى عينها متقبلتني
بنين الوحيده ارتاحلها واكعد اسوالف وياها تعودت يومية تجي يمي
كاعدة ويا بنين اندكت باب الغرفة صوت باهر كال يا الله يصير افوت
بنين... فوت خوية
فتح الباب ومد راسة ابتسم كال اريد الوكحة اتكلي فوت احاف تطردني انه هم مثل ابوها
... ابتسمت كتله والله اذا رجعت كلت ابوها اكيد تنطرد
باهر...ههههه لاطرديني ولا اطردج عندي سالفة وياج احجيها وارد منين ماجيت
.. اجة كعد كبالي اي شنو هي السالفة واذا جاي تنصحني اتقبل اخوك واصير البنية المطيعة وهو الاب المثالي ونعيش عيشة سعيده
اذا هذا موضوعك لاتحجي احسن
...على كيفج بوية اكلتيني اكل يتورط اليكعد وياج
... والله انت اجيت عليه مو اني صحتك
.. هههههه تحمليني هو انه الله غاضب عليه وجابني عليج
ادخل بالسالفة احسن شوفي بنتي اليوم اخواني وعمامي يجون يريدون يشوفوج ويتعرفون عليج
... لا اشوفهم ولايشوفوني اصلا زين مني احجي وياك انت وبنين احمدو الله
بنين. ههههههه اطكها بالكصة ولاتعرف اتجذب
باهر.... سمعيني بالأول وبعدين قرري بوية احنا ناس عرب واي تصرف غلط يعتبر عيبة بحقنا
اخواني وعمامي موصغار زلم الهم هيبتهم الناس كلها تحترمهم هما لوما حبن بيج مايجون بنفسهم حتى يشوفوج
.... قابل اني قردة ويجون يشوفوني ويتفرجون عليه
.... حشى القردة انتي بلوة وعقاب من الله دزة الاخوية
... دام اني عقاب وبلوة شجابة عليه
... ههههه حظة المصخم
اصال جديات عيب ماتنزلين
.... ما انزل ما اريد اي شي يربطني باخوك انتوا ناس غربة وتبقون غربة بالنسبة الي
... ترضين يحجون على خالتج ويكولون ماعرفت تربيها؟
.... شحد اليكول اكص لسانة واخلي بيده
.... اذا مانزلتي وفشلتيهم راح يكولون خالتها ممعلمتها الاحترام باباتي الميحجي كدامج راح يحجي وراج
خالتج تعبانة على تربيتج لاتجيبلها كلمة موحلوة بحقها
نزلي سلمي عادي وتعرفي عليهم مو الخاطر ابوج الخاطر خالتج
... تحسرت ماشي حنزل الخاطرها والله
... عفيه عليج واهم شي ضبي لسانج وعد اذا عدا هاليوم على خير اطلعج افترج بالبصرة واي مكان يعجبج اخذج اله
... ممممم ماشي اذا تراجعت بكلامك افضحك والله
.... شنو مارايد روحي واتراجع
... ورا المغرب لبست دشداشة مستورة ولفيت الشال اجتي بنين كالت اجوي تعالي نزلي
نزلت وياها دخلنا للاستقبال متروس زلم عززززا هذولة كلهم عمامي جنت داخلة بثقة اشو من شفتهم خجلت.......
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!