_بنات الغجرية _
( بقلم بسمة البياتي)
_البارت الواحد والعشرون _
وكفت بنص الشارع ونترت بيها منو هذا.؟
... شبيج وكفتي امشي صعدي لاتخافين هذا صديقي هو يوصلنا للبيت
... اجت جرتني من ايدي واخذتني بتجاه السيارة
عيوني صعدن الرأسي سحبت ايدي بقوة رفعت جنطتي وضربتها بظهرها من قوة الضربة عثرت وتكومت بالكاع
كامت تصرخ الظاهر تاذت
صديقها العار فتح الباب يريد ينزل صرررخت بعلوا صوتي يبووووووو لحكوني هذا يريد يخطفني هو سمعني هيجي گلت صار مثل بربا الشاطر كمز للسيارة شخطها وطلع
مرجانة. ااااخ رجلي لك كوا.... وين وليت وعفتني ابن الكلب اني اعلمك عزززززا راح امووووت
.. ردت ارجع اضربها شفت الناس التموا شلت جنطتي صكيت على اسناني كتلها بختج بالناس ولا جان خليت دمج بطولج بنت ابوج وعتبي باب البيت اذا ما ارتكبت بيج جريمة فلا اتسمى اصال
مشيت وعفتها كاعدة بالكاع تلوب من الوجع الزلم كوموها
بعد منداريت ولا شفت وين اخذوها
طول الطريق واني شايطة وصلت للبيت الباب مقفول والمفتاح يم جنة نفخت بضجر دكيت الباب على بيت خالة
ام وليد... يااااا هاي شرجعج خوما صاير شي
.. لا ماكو شي شوية بطني وجعتني مكدرت ابقة اخذت اجازة واجيت
... فوتي يووم ليش واكفة
... دخلت جوا كعدت بالمطبخ كتلها خالة اريد تلفونج اخابر جنة
... اذا سمعت بيج مريضة يظل بالها ابقي يمي الحد مترجع
فوتي الغرفة البنات ارتاحي واني هسه اجيبلج علاج
... لازم اخابرها حتى تبلغ السايق اذا راح وملكاني ويكول الجنة حتخاف اكثر
كالت اي والله صح
راحت جابتلي الفون دكيت على جنة
عبالها خالة من سمعت صوتي فزت
... شجاب خالة يمج لج احجي خوما صاير شي
.. يمعودة شبيج اخترعتي ماكو شي اني يم خالة بطني وجعتني ورجعت للبيت
... شبيها بطنج هسه اجيج انتظريني
.. يبوووو عليه وين تجين ماكو شي مغص عادي وراح لايظل بالج
عفية جنونة دزيلي مفتاح البيت ويالسايق لان نعسانة اريد انام
... اصال متاكدة مببج شي شو گلبي ممرتاح راح اجيج
... وين تجين اليوم مو عدكم عروستين وكومة مرافقات اميرة وين تكدر تكملهم وحدها والله مبيه شي لاتخافين وهياتها خالة يمي يعني مو وحدي
... اووف ماشي راح ادزلج المفتاح ويا السايق وغدا هم اخلي يجيبلج
... لا ما اريد لادزين اني من اجوع اسويلي شي اكلة
خالة واكفة يم السنك من سمعتني اندارت عليه
كولي الجنة تبطل هالسوالف ليش انتي بالشارع وادزلج اكل مو عيب عليها
يمكن اكلي مطيب وميعجب
كلت الجنة ارتاحيتي وهاي ترزلت من خالة بسببج
.. هههههه فدوة العينها هو وين اكو اطيب من اكلها نفسها بالطبخ فد شي
... اي والله طبخها يخبل
على عنادج شميت ريحة بامية اويلي الريحة تارسة المطبخ
... كافي ترى جعت يلا روحي ارتاحي ومن تتغدين اخذي علاج
سديتة منها كمت اريد اساعد خالة شفتها مخبوصة وحدها
... هاي اشدتسوين؟
.. اساعدج
.. امشي كعدي معندي شي كملت بس بقة اطبك التمن
اذا جوعانة خلي اصبلج البامية مستوية
... لا ما اريد كومة نساتل اكلت بالمدرسة
... ماشي لعد من يجي كامل والبنات انصب
كامل.. سمعت اسمي خير
... بسم الله هاي منين طلعت.
... من الفانوس
... انجب واحجي عدل شجابك من وكت شنو انت هم مريض
اصال .. اكيد انهزم من سياج المدرسة
كامل ظل يغمزلي حتى اسكت
... صخام الصخمك كامل واني اكول ليش ملابسك تنفتك وما الحك عليهن طلع من التكمز مالتك
... اي يطلع من المدرسة حتى يلعب طوبة
كامل... غضب الله على راسج منين طلعتيلي اليوم
.. من الفانوس وعيبت عليه
... اكولج اخاف انتي هم فالتة لان مدرستكم بعدهم مطالعين
... شوف اعترفت بنفسك خو اني محجيت خالة ترى كمولي من يكمل لعب طوبة يوكف كدام مدرستنا يباوع على البنات واكو بنية يظل رايح جاي وراها
... عزا العزاني هذا الناقصتني الجيران يهدون عليه ويكولون ابنج يتحارش ابناتنا لك ليش هي هاي تالي تربيتي تباوع على عرض الناس مو عندك خوات يا ارعن مثل متباوع عليهن الله يسلط الي يباوع على عرضك
... اي بعد بعد كملي ست اصال كوليلها شفتة واكف يدخن وببده البطل والاقوى يكبسل هم
... لا اني ما اتهم حظي وبختي مشايفتك تشرب وادخن من اشوفك اجي افضحك
راح كامل حضن امه يبوس براسها يكلها يوم لاتصدكين كلامها هاي وحدة حاروكة
اني صح اطلع من الدوام علمود الطوبة وساحة الطوبة كدام مدرستهم لهذا اشوفهن من يطلعن لا لاحكهن ولا مصخم
لج احجي الحق مو حركتي الدنيا وسكتي
.... خالة زعلت منه ههههههه كتلها والله اشاقة موتدرين بيه احب اخبث عليه
شمرت عليه المنشفة كالت الله يطيح حظكم لاكيني على كد ايدكم
وانت امشي جيب خبز مخلصين
... صار ست الحبايب من عيوني
وانتي صلصالة حسابج بعدين.
... اجة السايق جاب المفتاح ردت اروح للبيت خالة مقبلت كالت تغدي واخذي وحدة من البنات وياج وروحي
اجن دعاء وثناء من الدوام
صبوا تغدينا
من كملنا انتظرت البنات غسلن المواعين واجن ويا اثنينهن
جنت متمددة ودعاء وثناء يمي
دعاء.. اصولة شبيج اليوم صح تحجين وتتشاقين بس مو من كل قلبج احس اكو شي غاثج
.. ايباه صايرة حساسة هاي من شوكت
... انجبي اني دوم ذكية الكفها وهي طايرة الطير الطايرة اذا فات من يمي اعرف اصلة وفصلة
ثناء... كلنا احمي بس مو هيجي الغرفة صارت نار
... مضغوطات مني
يلا اصال احجي شبيج لاتخليني اتوسل بيج
... هو غير يسكوت هيثم يوسف
شبيه كولشي مبيه مثل الوردة
ثناء... جديات اصولة انتي اليوم موطبيعية ولو صدوك بطنج توجعج مثل مكلتي جان ظليتي رايحة جاية للحمام
.. عابتلكم مراقباتني جربت نفس عميق كتلهن اريد وعد اذا حجيت متكولون الاي احد خصوصا جنة
....عززا خوفتينا احجي منكول
احنا مو اسرارنا كلها يمج
... اعرف واني معندي صديقات مقربات غيرجن صح بعيرات واكبر مني بس اتوالم وياجن
ااخ شعري شبيجن مجلوبات قابل شحجيت
... احنا بعيرات يا جاموسة دشوفي نفسج تبينين اكبر منه
... وشبي البعير ضجتي منه حيوان اليف ويخبل يتحمل الجوع والعطش ولقبة سفينة الصحراء مو مثل بعض ناس لقبهم سفينة المطبخ والحش
... والنبي راح ابتلي بيج
المصيبة ضحكت على امي وجنة اتكوللهن مريضة وهي هياتها مثل الحصان
... جاموسة لو حصان اشو كمتي تخلطين
... ضيفي عليهن مطية
... ممممم لعد ولن ولا احجيلجن
ثناء.. لا حبابة احجي معليج بهاي الحب اثر على عقلها صايرة متنطاق
... قنعتيني يلا ححجي
اليوم مرجانة اجت اخذتلي اجازة كالت جنة مريضة ومن طلعت لكيت واحد كاعد بسيارتة ينتظرها
... عزززززززا اي كملي
... رادت تصعدني بالسيارة
... وصعدتي؟
...لا مصعدت بس خليت جنطتي تصعد على ظهرها هفيتها بيها وكومتها بالشارع
... هههههههه خرب يعني ضربتيها
... لا لا عيب شنو هالحجي اكو وحدة تضرب بيببتها كتلج الجنطة ضربتها مو اني وصديقها العار اول مسمعني صرخت عافها كاعدة بالشارع تلطم وانهزم
... هههههههه ليش تلطم
... يمكن رجلها انكسرت
.... اصولة جنة لازم تعرف حتى توكفها عد حدها اليوم الله سترج وما اخذتج
اخاف مرة الجاية اتجيب اكثر من واحد وبالغصب يصعدوج مرجانة موسهلة
... شحدها بعد توصل
واني صارلي درس منها
جنة اذا عرفت اظل قلقة وخايفة اعرفها خوافة يمكن تجي اداوم وياي
.. اي صح لعد صيري حذرة وديري بالج على نفسج
... اوووي عوفكم من مهرجانة احجي اخر اخبارج شسويتي ويا ابو كرعة
دعاء.. كم مرة منبهتج لاتكولين عليه ابو كرعة
ثناء... هههههه هو صدوك اكرع صلعتة هلكد متلمع اشوف بيها انعكاس وجهي
...والنبي حلوة ولايكتلة لاتصنفون ترى ازعل
اصال.. اوووي عيني تزعل العوبة مو سبينا العنب الأسود يلا بعد ما احجي
اي استاذ وسام شوكت يجي يخطبج ضايجة اريد حفلة حتى اركص
... السالفة معقدة الظاهر ممكتوبلنا ننجمع
.. يااا ليش بعدها امه تريدلة بنت خالتة
... اي والمصيبة بدون علمه رايحة حاجية ويا اختها وحاجزتها اله
ثناء... اشو اني مداصدك هالفلم معقولة امه تتصرف بدون علمه شنو هو طفل مو رجال
... ما ادري اني هم حايرة مرات اريد اتركة بس من اشوفة خوفة وحرصة عليه وحبه الي اتراجع
والله مفديوم كعد وياي وحدنا حتى ايدي ملازمها بالكلية من نكعد ثناء وباقي زميلاتنا ويانة
...الله يجعلة من نصيبج
.. امييييين يارب اي عفيه اصولة دوم ادعيلي
وادعي الله يهدي امه عليه
ثناء... اذا خليتيني باجر ألبس تنورتج الجديدة اني هم ادعيلج من صمصوم قلبي
... لا عيني ما اريد استري عليه دعواتج كلها حزك لزك اول مترفعين ايدح تخبطين خبط بحيث تكلبين حتى الأسماء تسوين اميرة سمارا واني أميرة وكامل وليد استغفر الله حتى الله يحتار بيها
أصال. ههههههههه خرب صدوك تحجين لو تشاقين وشنو حزك لزك
.... اي والله مرات انصلي سوا وترفع أيدها تدعي بصوت عالي اكطع صلاتي واظل صافنة عليها
ومعنى الكلمة ما ادري سامعتها من صديقتي وطبقتها عليكم
ثناء... هذا الحجي كله عليه صدوك لو كالوا خيراً تعمل شرا تلكى فوك ما ادعيلها هي ام الراهي ومعاجبها ترى الاعمال بالنيات واني نيتي صافية
اصال.. هههههههه ذكرتيني بسالفة الشيخ والمرة قبل كم يوم سمعتها
وحدة اتصلت على شيخ كالتلة زوجي ديخوني ويعرف وحدة ثانية اريدك تدعيلة الله يهدي ويبعدها عن طريقة
الشيخ بده يدعي بكل خشوع ونية صادقة كال اللهم اجعل في قلبه نور وفي عقلة نور وفي دربة نور واجعل لسانة ينطق نور على نور
المرة كامت تبجي بصوت عالي الشيخ كاللها بارك الله فيكي يا اختي انها دموع الخشوع
المره حجت وهي تناشغ يا خشوع اني جاي ابجي على الساعة السودة الفكرت اتصل عليك بيها
يا شيخ حبيبة زوجي اسمها نور
دعاء.. ههههههههههههه خرب اي والله هذا الشبخ مثل ثناء
ثناء.. ههههههههههه ولا اكدرلجن
جنة... بالي يم اصال ما اعرف شلون كدرت اشتغل اول مكملنا اخر عروس رجعنا اني واميرة للبيت
دخلت ادور الاصال لكيتها كاعدة ويا دعاء وثناء ديشربن جاي
كامت اجتي عليه اخذتها الحظني وافحص وجها بيدي شبيج عمري شنو يوجعج
... مابيه صرت زينة
دعاء... بربج هذا شكل وحدة مريضة دشوفيها شلون متفحة انتي مبين عليج تعبانة اكثر منها
ثناء.. جنونة لاتخافين صارلها ساعة تركص
جنة... عگدت حاجبي شلون بطنج توجعج وتركصين
... عادي جان عندي مغص اخذت علاج وراح
وتعرفين بيه من اضوج اطلع ضوجتي بالركص
... اهاا ومنو مضوجج
.. محد اني ضايجة من وحدي
... بله اذا ابتلي بيها هم احد يلومني اني زايعة العافية من الخوف عليها وهي كاعدة تركص
... اوووي يعني تريدين ارجع اتمرض حتى لاتضوجين
.. اسم الله هو منو يكدر يغلبج
.... محجيت الجنة على سواية مرجانة رجعت داومت عادي والعار اختفت
جنة كالت شعجب مجاي تجينا مو من عوايدها
.. عساها لا أجتي لازم اشتاقيتلها
.. يااا ششتاقلها بس مستغربة
... ما اريدها تبقة يمنا احنا على شنو متحمليها ناوية بس تجي اطردها
... اهووو اصال هم رجعنا الهالسالفة موكتلج معليج بيها خلي تولي هي حتى لو تجي تبقة ساعة لو ساعتين وتروح الخاطري تحمليها
... ما اتحمل وما اريدها تبقة اهنا اذا احد من الجوارين طلع يعرفها وشافها مو حننفضح
هي خلي تجي وشوفي شسوي بيها
... اصال صاير شي ليش هلكد متعصبة وتحجين بحركة گلب
... مصاير شي قابل شيصير اني ما اريدها وخلص
.... سكتت ما اعرف شجاوب كلامها صح وبنفس الوقت ردت فعلها غريبة احس اكو انه بالموضوع
ورا يومين دخلت علينا مرجانة رجلها ملفوفة وتعرج مبين عليها مرتبكة وتباوع عليه بترقب
سالتها شبيها رجلج؟
.... هااا ازحلكت ووكعت
اصال... سمعت صوتها تحجي ويا جنة جنت محظرة ملابسها شلتهن وطلعت من شافتني لونها انخطف
هاي شششجابج مو جنا خلصانين من شكولتج الزفرة شمرت عليها ملابسها يلا برا
مرجانة... لج جنة امج دتنطرد من بيتج واني واكفة تتفرجين
جنة.. انتي مو بحاجتنا ولا احنا بحاجتج روحي عيشي يم صديقتج هي من ثوبج وانتي من ثوابها احنا منفيدج
... شحجي وياجن الكح.... اشرف منجن بس بسيطة يجي يوم وادفعجن الثمن غالي وكولو مرجانة كالت
... اخذت ملابسها وراحت ارتاحيت باوعت الجنة صافنة كتلها شبيج
... سمعتي شلون تهدد كتلج معليج بيها اوووف من عنادج
... خلي تهدد هي ونعالي متهز شعرة مني
... الله يستر من تاليها
... طلعت مرجانة من حياتنا اني صرت خامس علمي
اليوم خميس من رجعت من الدوام كالعادة رحت للصالون
ماشاء الله هوسة كومة عروسات
ومخطوبات غير المرافقات
بدلت ملابسي وبديت اشتغل وياهن
جنة واميرة جابن عاملات اثنين. ورغم هذا هم ميلحكن
اميرة كالت اصال بلشي بهاي العروس مكيجيها صحتلها من شافتني عقجت وجها ورفعت حاجبها
... شنو ولويش هاي تمكيجني ترى احنا دافعين فلوس مو حصو على يا اساس تشمروني الهاي الزعطوطة هستوها دخلت بصدرية المدرسة
... الشياطين كامن يكمزن كدامي من كلامها
لج على منو زعطوطة
جنة... لحظة اصال سكتي
.. شسكوت مسمعتيها شتكول
.... داكولج سكتي وانتي عيني هاي التكولين عليها زعطوطة احسن وحدة بينا احمدي ربج لان هي راح تمكيجج
وحدة من البنات الوياها اعتذرت منا كالت عذروها عبالها متعرف شي
اميرة...ترى احنا النا سمعتنا والكل يمدح بشغلنا شلون تتوقعون انجيب وحدة متعرف وانسلمها الشغل
.. العروس صلفة نترت شبيكم اكلتونا احنا مكلنا شي اني دافعة فلوس من حقي اختار التمكيجني مجاي اهنا صدقة
اصال... شخبصتينا بفلوسج يلا اخذيهن وروحي الغير صالون ونصيحة انتي عروس شوية ثكلي لازم بهيجي يوم يكون عندج خجل مو صوتج اعلى من صوت الملاية
جنة... اصاااااال
.. لا اصال ولا صخام خلي تاخذ فلوسها وتطلع
اخت العروس.. وين نلكي حجز هسه
... هاي مشكلتكم
ظلن يتوسلن اميرة صاحت عهود كالت انتي مكيجيها
اني اخذت عروسة ثانية مكيجتها وحتى التسريحة اني سويتلها طلعت لعابة
هذيج العروس عيونها نطت البنات الوياها يتهامسن مبين يرزلنها
للمغرب يلا كملنا
جنة... تعالي لج مو عيب اتكوليلها ثكلي
... لا موعيب هي وكحة وصلفة تستاهل
... اي هي الوكحة وانتي الفقيرة
اميرة... ههههههه هاي امها داعية عليها ترزلت بيوم عرسها
... اني مقهورة على زوجها وعيالها الله يساعدهم عليها
جنة. والله يساعد الياخذج تهججي باليلة ظلمة
... عشششتو اصلا لازم يشكر الله بكل صلاة لان اخذني
اميرة... العكس هو الصحيح بكل صلاة يدعي على نفسه لان تورط بيج ههههههه
.... عابت مكروهات
اميرة... جنة امي هسه اتصلت اتكول امج ابيتنا كاعدة تنتظرج
اصال.. اهوووو وتالي ويا ام صكبان ولانخلص منها هاي شذكرها بينا
عهود...منو ام صكبان؟
.. ماهية زعم نعم شنو متعرفيها
... هههههههه اعرفها
... رجعنا للبيت اجتي مرجانة كعدت بالهول رجل على رجل وتخزر بيه
شجابج؟
.... انتي ما اريد اسمع صوتج كلمة لاتحجين اني مجاية عليج جيت اشوف بنتي
... سودة عليه اشكد حنينة هه ملاعيب العيد عبريهن على غيري
جنة.. وهاي شفتيني شنو المطلوب
... هههههههه احجوا بعد وجاوزو وطولوا لسانكم الحساب ديجمع وكولشي بوكتة حلوو
جنة.. دتهددين حضرتج
.... لا اني ما اهدد اني گول وفعل
اصال... مهرجانة الزيارة انتهت يلا من غير مطرود برا بيتك بيتك
كامت عليه مثل الثور الهايج جلبت بشعري عززا بعينها ملخته
كمت اعيط ولج عااااارررر عوفي شششعري
جنة. انكسسسسرت ايدج عوفيها ششششبيج جاية حامية علينا
مرجانة... بنت الكلب اذا ما بجيتج دم اوكفيلي
ورجلي التآذت بسببج راح ادفعج ثمنها غالي
... بالكوة عافت شعري كومة شعر اجة بيدها الحقيرة
كتلها طبج مرض وهسه اذا مطلعتي اكسر رجلج الثانية
جنة.. اصال شدخلها بالصار برجلج
..هههه احجيلها ليش ساكتة عبالج اخاف منج ومنها بسسسسسيطة ***** اني الجن
...طلعت مرجانة وهي تغلط
جنة وكفت كبالي كالت راح تحجين لو شنو
لزمتها من ايدها خليتها تكعد وكعدت بصفها بديت احجيلها على سواية مرجانة
... لج ليششش مكلتيلي
من شششوكت صرتي اتضمين عليه
... والله بس هذا الموضوع ضميتة عليج لان اعرف اذا كتلج راح تخافين
... سودة بوجهي لو صاير بيج شي اني شجان سويت
... لاتخافين ميصير شي اني تربيتج وتعلمت القوة منج
... اشو تعالي حضنتها راسج خوما يوجع
... بلي والله شعري اجه بيدها
... الله ياخذها مدري ليش داخاف من تهديداتها
... يمعودة صارلها اشكد اتهدد وكولشي متكدر تسوي هاي وحدة بوخة
... بعدج متعرفيها زين مرجانة كرصتها والگبر الله يكفينا شرها
مر شهرين بالضبط واحنا مشايفيها
اليوم المغرب رجعنا من الصالون اني وكفت اسوي عشا واصال دخلت نامت
خطية هواي تتعب
دوامها كله صباحي ومن ترجع تجي تساعدنا منعتها كتلها معليج بشغل الصالون هي عنودي اتكولي تعودت ما احب ابقة كاعدة لهذا من نرجع المغرب تدخل تناملها ساعتين بعدين تكعد تتعشى وتدرس
اندكت الباب لبست حجابي وصحت منو؟
اجاني صوت المصخمة امي لا هلا بيها
فتحت الباب تفاجئت من شفتها مو وحدها وياها رياجيل اثنين ردت اطبك الباب بوجها دفعتة بيدها وفاتت
عطت اوووكفي وين رايحة ومنو هذولة
اجاني صوت رجفني انداريت المصدرة ركزت بشكلة اي والله هو واني ممتوهمة كمت ابلعم اريد اوكف ما اكدر حسيت حيغمى عليه
منصف.. شبيج جنة شنو معرفتيني..........
يتبع
الي ناسية منو منصف حبيت اذكركم هذا ابو اصال...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!