_بنات الغجرية _
( بقلم بسمة البياتي)
_البارت الخامس والاربعون _
الأيام تركض ركض عقدنا محكمة وكملت جهازي ومظل غير ثلاث ايام ويأخذوني كلما يقترب الموعد الخنكة تموتني شلون راح اكدر افارك جنة وبابا ما ادري
جنة... اني واصال يمكن مكتوب علينا الفراك جنت اتمنى تبقى قريبة مني بس رب العالمين اله حكمة بيها
اصال.. اليوم العصر رحنا اني وجنة وبنين للسوك باقيلي نواقص بسيطة رحت اخذهن ويا المغرب يلا كملنا ورجعنا
دخلنا للبيت كل وحدة بينا كعدت بطرف من التعب
جنة...اويلي رجلي تكسرت الخاتون اذا متفترنا السوك كله مترتاح
بنين.. ماينطلع وياها ابد
... مع الاسف عليكم كدامي وتحجون عليه اذكرو اني خطار يمكم عكب باجر اروح وتخلصون مني
جنة... والكعبة راح ابجي لا ذكريني ترى دموعي واكفات على طكة
... اوووي سودة عليه والنبي اهم مثلج
بنين.. اي بعد بعد نصبنها مناحة
اكولجن شنو هذا الصوت
اصال.. كمنا من مكانة مخروعات صوت صياح برة وصلنا الباب المطبخ باوعنا بالحوش رضا واخو
رضا مثل الثور الهايج بيده سلاح ويتهدد وماجد مجلب بي
نشف دمي كمت ارجف ختلت ورة جنة وبنين
جنة... هاي شكو وانت شجابك اهنا وشرايد منا
رضا... تريد تزوج مووو انطيتوها من وراي اليوم اخلي دمها بطولها وانعل ابوها لابو اليطلع وراها امووووتج وما اخليج تصيرين الهذا السكط
بنين... ماكو سكط غيرك جاي تتهدد على النسوان من عمت عينك
اخوي لو مربيلة جلب ولا مربيك
ماجد اخذ إخوك وروحوا منا لاتخلوني اخابر الولد اخليهم يجون يطلعونة بالجلاليق
اصال... مفرفحة من البجي احس گلبي راح يوكف من الخوف اني انرعب من السلاح اخو يريد ياخذة منه ميكدر متت بدمي شوية وافقد الوعي
ماجد تقاوى ويا واخذ السلاح من ايده
رضا بخطوة وحدة كمز عليه وسحبني من حجابي من بين جنة وبنين
جنة.. تخبلت جرها من بينا ويسحل بيها لك كلب عوفها الله ياخذك يا عار الزلم اليوم اذا ما ابيتك بالسجن فلا اتسمى جنة اني الك
انريد نجرها من ايده ما نكدر اخو تعب هلكد ما يرافس بس يريد يطلعة من بينا
رضا...بنت الكاولية سويتي علاقة ويا مو ماتكدرين بدون رجال امششي وياي ماتبقين اهنا وهذا الكو...اذا ما طلكج اموتكم اثنينكم
اصال... يسحل بيه يريد ياخذني واني اصرخ وابجي
جنة وبنين لازماتني هنا يجرن من طرف وهو من طرف موقف بس الله يعلم بي
بالحظة الاخيرة اجو اخوانة البقية وولد عمة وامة وخالتة
سحبو مني والتموا عليه شبعوا كتل وامة تكمز تريد تخلصه من ايدهم
حلكة وخشمة فاضن دم ام رضا من شافت وجه ابنها انصبغ احمر من الدم كعدت بالكاع تلطم وتهلس بشعرها
جنة... انفضحنا بالمنطقة الناس التمت يتفرجون اخذت اصال دخلتها جوة
جبتلها مي شربتها وبللت وجها
بنين... اذا هلكد يحبها ليش خانها وكتل روحة حتى يزوج هذيج المسمومة
جنة... والله ما افوتها اله دشوفي شسوة بيها
اجة منصف وباهر وعمامهم وولد عمامهم
المصيبة العشيرة كلها بنفس المنطقة وكلهم عرفوا بالصار
منصف وباهر قبل لايجون اهنا هم رايحين عليه وكاتلي كتلة معدلة
منصف... تعالي بوية ليش هلكد خايفة شحده يسويلج شي وابوج موجود
اصال.. حضنت بابا واشهك حقك مشفتة شلون يتهدد عليه بالسلاح ويجرجر بيه والله خايفة منه هذا مراح يعوفني بحالي
... روحي شوفي شكلة مايبين من الكتل تسوة عمره من طلعوا منا سحل وبالكفخات
جنة... هذا الحجي ميمشي يمي اسمع باهر هسه تروح تشتكي عليه اريده يخيس بالسجن
باهر... مومال نكبر الموضوع رضا اخذ جزاءة الخاطر فاضل سدي السالفة
.... والله ما اسدها واذا مشتكيت عليه لحظة ما ابقالك بالبيت
منصف.. خوية انه مثلج لوبيدي اشحطة واخذة للمركز بس وضع اخوي مايطمن من وراه تخربط واخذوا للمستشفى
... من سمعت بوضع اخوهم سكتت راحت الهوسة بنين بقت يمنا لان اصال شكلها انتهت
والليل كله هي مصخنة وترجف ردنا ناخذها للمستشفى مقبلت
اشكد عارضت زواجها من ابراهيم بس هسه اني اريدها تروح اهناك وتخلص هذا رضا اذا ميسويلة مكسورة ميرتاح
اصال... كعدت الصبح عركانة وجسمي متكسر على اساس اليوم حنتي تهي بهي
كمت بالكوة دخلت للحمام وكفت يم المرآيا اغسل باوعت على وجهي شفت حباية حمرة يم شفتي السفلية لا ياربي بس لا لطت حمى واكيد هسه تكبر وحلكي يصير فلم هندي
جنة وبنين حاروا بيه جابولي ثلج خليت عليها وباهر راح جابلي عصارة من الصيدلية وماكو فايدة للمغرب منظرها صار يخوف
حنة مسويت حظرت ملابسي ورحت البيت بابا لان يجون ياخذوني مناك
موضوع رضا انسد وبعد محد حجة بالسالفة
جنة.. اليوم ياخذون اصال اني وبنين نروح وياها باهر ياخذنا بالبداية ما ردت اروح بس شسوي الخاطرها ما اريد اعوفها وحدها
كتلها ديربالج تحجين الأبراهيم على الصار مانريد مشاكل خلي السالفة تعدي على خير
الظهر اجتي الزفة ومو هواي بس اخوانة وضياء وايمن وولد عمة ونورهان ومرت اخو
حتى غدا مقبلوا يتغدون كالوا اكلنا بالطريق ولازم نطلع بسرعة لان ورانا طريق طويل
اصال... لبست فستان عادي لونة كريمي وحجاب وبزفة ابسط من البسيطة اخذوني ودعت بابا خطية ظل حاضني ويوصي ابراهيم عليه
وهو يكولة بعيوني لاتخاف عليها
اخذ ايدي وطلعنا زهراء واختها صوتهن انبح من الهلاهل هههههه
صعدنا بسيارة اخو وانطلقت بينا
ابراهيم... شبيج حبيبي من اول مشفتج حسيتج مو على بعضج
.... هااا لا مابية شي مقهورة على بابا
... لاتنقهرين شوكت يعجبج اجيبج
... ابتسمت وظليت ساكتة السواه بيه رضا الحد هسه ينغز بگلبي ضيع فرحتى الله لاينطي
... من هسه اكولج اخذج البيتنا عدل لابيت جدج ولا بطيخ
... هذا مو اتفاقنة مو كتلك اليوم اروح البيت جدو ارتاح
.. عادي ارتاحي بغرفتج واطمئني ما اسوي شي المهم انيمج بحضني
.... نصي صوتك اخوك وزوجتة لايسمعون وهذا الموضوع تناقشنة بي وخلص يعني متكدر تصبر الباجر
... ماشي براحتج ومن هسه اكلج باجر ولا ارحمج انتي مو مال عين لعبتي بحالي لعب
... ههههه ايباه مو صارلنا سنين مخطوبين ولاعبة بحالك
... ليش ماتدرين
.. لا شنو
... احنا صارلنة 38 يوم مخطوبين واني يمي اليوم بشهر وبحسابي احنا مخطوبين صارلنة 38 شهر
... اهااا هاي خوش معلومة مجنت اعرفها
... لعد شعبالج كلشي يمي بحساب وكتاب لاتنسين اني خريج ادارة واقتصاد قسم محاسبة
.... ههههه لا مناسية ومبهورة بالكلية الخرجتك
الطريق كله يسولف وياي اخو طلب منه يسوق بداله لان تعب كالة ولا اتحرك من مكاني
عاد اخو خابر ايمن كالة انزل من سيارة ضياء تعال سوق بدالي تعبت والعريس لاطش يم عروستة ميقل يسوق
لليل يلا وصلنا احس تفلشت اخذونا البيت جدي
من وصلنا شلت هم جنة شلون راح تدخل بيتهم وادري بيها بعدها لهسه ممتقبلة ابوها
دخلنا للبيت جدو وام ضياء طايرين بينا يحيرون شيسوون
جنة... اختنكت من فتت بيتهم ردت اروح فندق باهر كال عيب هو بس هاليومين تحمليهم
مرتة واولادة يشهد الله احبهم بس هو لا من اشوفة اذكر كل الضيم العشتة
بيتا قصر ومبينا حالتهم توب واني الخبزة مجنت الكيها الحمدلله
الله عوضني ومخلاني اعتازله
ايمن.. خير ايبو افندي اشو جيت كعدت
... وانت شعليك قابل جاي البيتك هذا بيت عمي واليوم ناوي ابات اهنا
ضياء... حبيبي روح البيتكم ورتاح باجر وراك تعب وسفر اخذها مني بقيتك هاي بدون فايدة ماراح تحصل شي
... هسه اني شاكيلكم وكايللكم تعبان اريد ارتاح لو تطردوني هم ما اروح
اصال... عزززا متت من الخجل همست البنين اكولج اشو هذا ولا يستحي
... خايفة لا يجي يجرج من ايدج وياخذج ويا
... والله يسوبها هو الطريق كله يقنع بيه حتى اروح ويا البيتهم
ابراهيم ظل كاعد شوية وبعدين راح
تعبانين كولش حظرولنة غرفة رحنا نرتاح بيها
وباهر راح نام ويا ايمن بغرفتة
من التعب اول مخليت راسي على المخدة نمت
جنة...اليوم بنت روحي عروس للمرة الثانية تمنيت تلبس بدلة وتسوي عرس لان بزواجها الأول ماتهنت
بس مثل ميكولون اهلنا الطيبين البدلة البيضة والعرس ميكبرن بخت البنية
المهم الولد خوش ولد يصونها ويحبها ويقدر قيمتها
... بعد شوية يجي ابراهيم ياخذني نروح الأربيل
كعدت جوة ايد جنة هي مكيجتني وشعري سرحتة الي اني قبلها خليتها تميشلي اطرافة والفوك بقى نفس لونة
لبست فستان محجبات لون سمائي وحجاب مكياج ناعم
كملت وكعدت انتظر ابراهيم
صار العصر اجة هو واهلة واخوانه دخل لابس قاط باوعت على طولة ووسامتة وكشختة كولشي بي حلو
اجة يمي باسني من راسي وكعد بصفي
اجتي وحدة اول مرة اشوفها بوستني كالت اني فرح اخت ابراهيم الجبيرة
سلمت عليها والحمدلله مبينا حبابة مثل مكال ابراهيم
...يلا كومي خلي نروح
... اخذني من ايدي ووكفنا الولد يداهرو يكولولة شبيك هلكد مستعجل بعد وقت
يكولهم وشعندي ابقى مكابلكم اني مصدكت صارت الي
جنة...جيت حضنت اصال وبوستها ديربالج على نفسج وزوجج
وياربي اشوفج اسعد وحده بالدنيا وافرح بشوفة اطفالج
... الله لايحرمني منج عمري فدوة اروحلج
سلمت على بنين وباهر وخوالي
جنة ظلت توصي ابراهيم عليه
بعدها اخذني وطلعنا الطريق حلو وميتعب قبل االمغرب وصلنا
من دخلنا اربيل اخذني المطعم تعشينا كملنا ورحنا للشقة
سالتة هاي شقة منو؟
... شقة احمد اخوية بالعطلة يجون اهنا
... الجو بارد والشقة ثلج ظليت اطكطك ممتعودة على هذا البرد كتلة ادري وين جايبني راح تموتني برد
... ههههه هسه اشغل التدفئة لان من زمان ممشتغلة التدفئة الشقة باردة
... رحت للحمام اريد اغسل انوب المي مجرش اويلي شلون سالفة هاي
طلعت ادردم وهو يضحك كالي للصبح يصير المي حار
افتريت بالشقة مرتبة واثاثها يخبل
... راح تبقين تفترين امشي بدلي
... اشرلي على الغرفة دخلت راد يدخل سديت الباب كتلة ابقى الحد ما ابدل
... مخبلة فتحي الباب ترى اول وتالي اشوف كلشي
.... عابتلك اشكد ماتستحي
... وليش استحي مرتي حلالي هم شايفة واحد يستحي من حلالة يلا فتحي
... ماااه خلي ابدل كافي ادك بالباب
... بسيطة اني الج وين تروحين مني اليوم
... اضحك على سوالفة فتحت الجنطة طلعت سيت نوم لون ماروني لبستة عدلت مكياجي وتعطرت
رحت فتحت الباب ورجعت كعدت على الطابورية وصافنة على الفراش هذا من كل عقلة انام بفراش اخو وزوجتة
دخل للغرفة عينه عليه كصني كص اتقدم عليه كمت وكفت ردت اروح للجهة الثانية لزمني سحبني عليه وحضني يبوس ويشمشم بركبتي
دفعتة من صدره على كيف ايبو لحظة خلي احجي وياك
... اشش كافي ترى ماظل عندي صبر
... راد ياخذني للفراش ملصت روحي منه اوكف وين ماخذني ما انام بفراش غيري
ظل بباوع عليه
.. منين طلعتيلج بسالفة هاي وشبي الفراش
... مابي بس اني ما احب انام بفراش غيري اتحسس من هالشي
.... حبيبي وداعتج مرت اخوية ماكو بنظافتها اليدخل بيتها يتعجب من النظافة والترتيب والشقة من يجون بيها وقبل لايرجعون ينظفوها يلا يرجعون
... ترى مكلت هما وصخين افهمني والله ما اكدر موبيدي
.... عليج سوالف تصفن المخبل ادري بنفسي راح اكضيها اركض وراج
... ههههه يحجي بعصبية شكلة يخرب ضحك ظل يفتح بالكنتور ويسده مدري شيدور طلع جنطة بيها فرشة جديدة وبطانية
... هذن جديدات هم كولي ما انام بيهن اذا فتحتي حلكج اذبج من البلكونة
... عزززا شنو مزوحة مجرم وما ادري
... غير من سوالفج
... فرشت الفرشة ودخلت للفراش
....كلتي الشقة باردة ودفيتها الج ماقبلتي تنامين بفراش غيرج وطلعتلج فراش جديد تدرين بعد اذا فتحي حلكج واعترضتي على شي شسوي بيج
... اي ادري تشمرني من البلكونة
.... لا هذا مو خوش عقاب
. لعد شسوي
... اسبوع كامل ما اخليج تنامين
.. هههه ويكولي انتي المخبلة داحجي ويا وكمز عليه باوع بعيني وهمس اني ليش هلكد ضعيف كدامج
... ما ادري اكيد انت تعرف الجواب
... لان حبيتج
....گلبي دك سريع من كال حبيتج
باسني من شفايفي اتعمق بالبوسة وصار يتفنن
لهفتة عليه خلتني اندمج ويا وانسى شي اسمه خجل
من ابتعد خلى راسي على صدرة ومطوقني بحضنة
انتبه على شفايفي
كال هاي شبي حلكج
... صخنت وطلعتلي حباية
...خلي ابوسها بلكي اطيب بسرعة
... يحجي ويبوس بمكان الحباية واني اضحك على عليه
الوجة الصبح يلا نمنا ومكعدنا غير الظهر
ردت اكوم لان جوعانة لزمني ورجعني للفراش وتقرب مني وبنفس اللهفة والحب
كتلة يلا كافي خلي اكوم
... تمام حبيبي يلا روحي
.... اخذت ملابسي دخلت للحمام هم زين المي صاير حار سبحت وطلعت حظرت الريوك هو هم راح سبح وبعدين كعدنا نتريك
اكول حبيبي شوكت اطلعني
... وين نطلع خلينا اهنا شعدنا طالعين
.... لا عفية اريد اطلع واشوف اربيل هاي اول مرة اجي عليها
.... الايام جاية هواي وعد اجيبج وما ابقي مكان ومصيف ما اخدج اله وحتى خارج العراق اسفرج
بس هالآيام لاتطلبين نطلع الاي مكان خلينا اهنا
... عود ليش وشنو الفرق
... اتكول شنو الفرق لج بابا احنا عرسان اريد اشبع منج شصخم بالطلعة
.... واذا شبعت مني راح تهملني ومتبقى مكابلني
... ههههه هم اكو واحد يمل من الجنة ويعوفها
... حجيك حلو ابد ما اكدرلك
اربع ايام ظلينا بالشقة للباب ميقبل نطلع حتى الأكل يطلبة بالتلفون ويجبولنيا للباب
خامس يوم كال باجر لأزم نرجع علمود السبعة وما اريد ابقيها بنفسج بدلي خلي نطلع
من سمعت نطلع صرت بيب بيب اقل من نص ساعة بدلت وكملت
من نزلنا من الشقة وضربني البرد تندمت عززا هاي شطلعني
صعدنا للسيارة كال وين تريدين نروح
كتلة اهم شي مكان دافي
... هههههه صارلج كم يوم خبصتيني على الطلعة وهسه تريدين مكان دافي
.. شمعرفني هلكد باردة عبالي مثل الشقة
... تمام راح اخذج للمول
رحنا مجدي مول اول مرة اشوفة جبير وحلو كولشي موجود بي
ظليت لازمة ايده وافتر كالي شيعجبج اخذي
اخذتة القسم المكياج لان كولة ماركة فرصة واجتي العندي كومة اشتريت هههههه
بعدها تعشينا واكلنا موطا ورجعنا
بدلت وجيت كعدت بحضنة
.... امشي نروح للغرفة
... لا خلينا اهنا وشغللنة فلم
... الافلام كلها معاده وشايفيهن الف مرة نروح للغرفة عندي الج شلون فلم يخبل كله اكشن ورومانسية
... ههههه لا ما اريد اتفرج على المعاد احسن
... امري لله
... ظليت كاعدة بحضنة واتفرج وهو مستغلني واكعلي دك بوس
رفعت راسي من صدرة وسالتة اكول ايبو انت من شوكت حسيت نفسك معجب بيه ورايدني
... من اول يوم شفتج بي
... هاي شلك بيها شبسرعة وشعرفت عني حتى تنعجب بيه
.... ترى مجاي اشاقة هاي الحقيقة ويمكن بگلبج اتكولين هذا اكيد انعجب بيه لان حلوة
واني ما انكر انتي فعلاً حلوة وتجذبين بس مو هذا سبب اعجابي بيج اذا على الجمال اني شايف بنات بكد شعر راسي وهم حلوات
.. اي اي احجي بعد بكد شعر راسك مو
... حبيبي اني شغلي بالمكاتب وهواي بنات يجونة ومرات اسافر يعني مجبور اشوف خوما اغمض
.. لعد ليش ما اخذت منهن
.. بربج يعني ياهو الاشوفها اروح اخطبها ترى هذا زواج وعشرة مو لعب وونسة
لازم الأختيار يكون صحيح
واني عندي تجربة فاشلة وما اريذ افشل مرة ثانية
... هم مجاوبتني اذا الجمال عندك مو مهم لعد شنو عجبك بيه
... راح احجيلج من البداية بيوم العمي اجة كال لكيت بنتي واريد اروح اشوفها ابوية طلب مني اروح وياهم كال عمك مريض واخاف تصير مشاكل اهناك لان مرة رحت وتعاركوا وياي
رحت ويا عمي والولد واني اصلا ممفتنع بالسالفة جنت اكول عليه بطران عافهن وهنا بنات صغار ومن كبرن يريد يشوفهن
وصلنا البيت خالتج واجتي بنية ثلاثينية سبحان الخلقها الواحد يستحي يباوع عليها من جمالها عرفت هاي جنة بنت عمي من وكفت وحجت العاشتة بوكتها احتقرت عمي شلون كدر يعوفهن بهالدنيا المترحم ومن كالت اختها ماتت من الظلم العاشتة اختنكت لو بيدي اعوف الكعدة واطلع وبعد بحياتي ما اباوع بوجه عمي
من صاحتج وخلتج كدامنا وكالت هاي بنت اختها يشهد الله انقهرت على حالكم
باليل من اجيتي وكعدتي يمنا بثواني غيرتي اجواء الكل حتى عمي الجان منتهي خليتي يضحك
شفت كدامي بنية كلها طاقة وحيوية لو تحجي منا للصبح ما ينمل منها ومن سوالفها
ومن بومها لعبتي لعب بحالي رجعت واني دايخ بيج اريد اطلعج من راسي ما اكدر كمت اتحجج حتى اجي للبصرة ويا عمي والولد ومن ارجع من بمكم مدري شصاير بحالي لج حتى باحلامي كمت اشوفج
... ضربتة على صدرة اشكد متستحي
... هو عقلج المنحرف وراح البعيد ترى احلام عادية مابيها شي
... والله ولا اصدكك ادري بسوالفك
.... هههههه المهم النية واني قصدي شريف
.. هههههه اشكد كلاوجي يلا كمل
....فريت السالفة براسي جبتها منا وديتها منا كلت لا بعد ما بيها مجال لأزم اخطبها قبل لاتروح مني كاعدين اني وخوالج بالكوفي قررت استغل الكعدة واحجي وياهم
بدون مقدمات كتلهم شباب اريد ازوج واريد مرة منكم
اني حجيت هيج لو تورطت على عمري ضياء وايمن عبالهم داخطب منهم ملاك
اصال.. عااا كول والله
ههههه اي والله اثنينهم صفنوا بوجهي
ضياء.. مانلكي احسن منك بس تدري ملاك بعدها طالبة شلون تزوج وهي مامكملة
... من كال ملاك ضربت على كصتي وحجيت بسرعة قبل لا اتورط لحظة ابو الشباب انتوا تدرون ملاك مثل اختي وبحياتي مافكرت بيها غير هالتفكير مو ملاك المقصودة
ايمن... اذا مو ملاك رايدمن اخاف عينك على امي
... اشكد طايح حظ مو وكت خفت دمك
ضياء ذكي ومن عيونة عرفت بي عرف المح على منو
حب يلعب بعصابي شوية كال اي عرفتها اكيد بنتي ومن هسه اكولك مهرها غالي لازم تدفع دم گلبك حتى انطيها الك
... شلون طلابة عمي رايد بنت اختكم شببكم كل شوية مطلعيلي سالفة
ضياء... ههههه جنت شاك بيك وادري بجياتك ويانة مو حبا بينا
ايمن. لحظة ضياء ترى الشغلة مو سهلة شنو نسيتوا اصال بنت منو واهلها شنو ما اعتقد ينطون للغربة هما عشاير اكيد يريدوها الواحد من عدهم
... لو ساكت مو احسن شنو غربة لعد انتوا مو خوالها واني ابن اخو جدها
... احنا بيئتنا غير بيئتهم واطباعنا تختلف عنهم هو حتى اختنا مامتقبلة وجودنا مو عاد تريدها تنطي بنت اختها ليش اتعب نفس متاكد ماينطوها
ضياء... معليك بايمن خلي انجرب مخسرانين شي نروح ونخطبها اني احب اصال واكيف اذا اجت قريبة منا انت تدري بيها مطلقة لو لا
.. اي اعرف
... تمام احجي ويا اهلك وابوية ويصير خير
....من اجيت تقدمت ايدي على گلبي كلام ايمن يدك براسي خفت اهلج يرفضون بس صار العكس انتي رفضتي وهذا شي شوية طمني لان اهلج اذا رفضوا شيقنعهم بس انتي مكدور عليج وتالي شلعتي گلبي الحد ماصرتي الي وبحضني
... ممممم مشيت اصابعي بين لحيتة وهمست يعني انت تحبني
.. حبيتج وحق الله وكتابة حبيتج وكومي وياي للغرفة حتى اشوفج اشكد احبج
.. هههههه اشكد استغلالي
صارلنة ست ايام باربيل قررنا اليوم نرجع لان باجر السبعة مالتي واقارب ابراهيم والجيران بجون يباركولي
لمينا اغراضنا قفلنا الشقة ورجعنا طول الطريل ايدي بايده وغركانين بالعسل وصلنا المنطقتهم وكفنا كدام بيت جبير ومرتب
نزل فتح الباب ودخل السيارة للكراج
نزلت من السيارة عيني على الحديقة تجنن
... يلا حبيبي خلي انفوت
.. لزمت ايده ومشينا امه وجنتهم واكفات بالمطبخ سلموا عليه ورحبوا بيه
دخلنا جوة سلمنا على عمي وكعدنا
عمي كال من اليوم صرتي وحدة من اهل البيت لاتستحين وتصرفي براحتج
... ان شاء الله عمو المشكلة خجلانة وبالكوة اجاوبهم
امه كالت اخذها تشوف غرفتها وترتاحون شوية بين مانصب الغدة
كمت ويا صعدنا للطابق الثاني تفاجئت بي بيت كامل
غرفتين وهول ومطبخ وصحيات وكلهن كبار موصغار
....هذا الطابق بس النه والطابق الجوة البيت اخوية واهلي
... لعد اخوك الجبير وينه؟
... من زمان طالع بيت وحدة
.. فتت للغرفة تجنن ضخمة وراقية لونها ابيض
سالتة الغرفة ذوق منو
.. اكيد ذوقي ترى ذوقي حلو والدليل اختاريتج
..وكفت كبالة وتعلكت بركبتة وهو حاوط خصري بيده
اكول حبيبي بما انو عدنا مطبخ معناها اني لازم اطبخ صح لو غلطانة
طبعاً لعد خوما مسوي ديكور نتفرج عليه
.. بس اكو مشكلة صغيرونة
... شنو هي؟
.. ترى اني ما اعرف اطبخ
.. ههههه يعني انغشيت بيج
. صوجك غير تسال من البداية قبل لا تتورط
. بيها مجال هسه انسحب لو ماكو مفر
... وداعتك ماكو مفر الفاس وكع بالراس باقية على گلبك
... عمي راضي حتى لو اكل خبز وجاي المهم اصبح وامسي بالهوجه
...ههههه الخاطرك راح اتعلم
بدلنا ونزلنا جوة نتغدا
طبخ مرت اخو وامه رهيب عزززا اني وين راح ادبرها اشكد مسكين يا ابراهيم راح تشوف ايام سودة وياي هههه
من كملنا الغدا ردت اساعدهم بغسل المواعين مقبلوا
نهى.. شغل الطابق الجوة عليه
وانتي عليج الفوك
... من طريقة كلامها عرفتها نحسه بالشغل والنظافة تحب كولشي على ايدها عفتها براحتها اصلاً بعد احسن ههههههه
رجعت الغرفتي تمددت اجة يمي ايبو واخذني الحضنة
...شلونهم اهلي ان شاء الله حبيتهم
... اي حبيتهم كولش طيبين واسلوبهم حلو
..نمنا ماكعدنا غير العصر اصدقاء ابراهيم اتصلوا عليه كالوله تعال يمنا
كالي اروح ساعة وارجع ما اتأخر
راح سبح واجة يبدل
... انزلي يم امي ونهى لاتبقين وحدج بالغرفة
... ماشي
اجة باسني وراح ظليت بالفراش خابرت جنة حجيت وياها كملت المكالمة رحت سبحت
طلعت من الحمام كعدت اشسور شعري وارتب نفسي
سمعت صوت جوة طفيت الشسوار الصوت زاد كمزت من مكاني مرعوبة بسرعة اجة بالي بس لا رضا هم اجة يتهدد عليه كمت ارجف اروح واجي ما ادري شسوي
حجبت بگلبي شكو هلكد خايفة خلي انزل اشوف شكو
طلعت من الغرفة وصلت للدرج شفت بنية شابة تعيط وتصيح وتريد تصعد وعمتي ونهى وفد مرة لازماتها
وكفت بمكاني هاي شكو واشديصير ومنو هاي
البنية من شافتني عبالك جني لبسها تدفر بيهم تريدهم يعوفوها
المصيبة كل هالهوسة واني ممفتهمة شي يحجون تركماني ظليت مثل الاطرش بالزفة
ومحتارة مدري انزل لو اصعد
صرت جاكي شان نفشت ريشي ونزلت مترهية
بقن اربع بايات مال درج
محسيت غير انجريت من دشداشتي وكعت على ركبتي وادعبلت وهاي المخبلة صعدت فوكاية ملختني يجرون بيها وهي الله ذاب بيها كل الحيل منو هاي وشتريد مني ما ادري
من حلات روحي لزمتها من ايدها وخمشتها لان شبعتني كفخات
المرة الوياها من شافتني جرحت ايدها لزمتني من شعري وكفختني
بحياتي ممارة بهيجي موقف انضرب وما اعرف شنو السبب حتى كلامهم ما اكدر افهمة
عمتي ونهى بالزور وخروهن مني ظليت ابجي ومبسطة بالكاع اخذوهن للمطبخ واني على نغس كعدتي بالكاع ركبتي كلها مزلغة ومجروحة
بالكوة كمت وكفت باوعت طلعن للحوش وام ابراهيم حضنت البنية وباستها
تخبلت يعني بعد هذا الصار بيها جاي تبوسها وتحضنها بدال مدافعلي وتطردها
اجتني نهى كالت خوما بيج شي
.منو هذن وليش ضربوني
.... هاي ايشان طليقة ابراهيم وامها
... كعدت على الدرج وكمت اشهك وشكو تجي تضربني ششتريد مني هو مو طلقها
... هي الاخر لحظة عبالها يرجعها ومن سمعت ازوج يومية تجي تتوسل بعمتي حتى تقنع ابراهيم يرجعها وهو ميقبل
.. كمت من مكاني استندت على المحجر وصعدت فوك لزمت الفون اتصلت على ابراهيم
من سمعني ابجي اتخبل بس يريد يعرف شبيه كتلة اريدك هسه تجي
نص ساعة ودخل للغرفة خلقتة مگلوبة الظاهر عارف بالصار
اجة يريد يحضني دفعتة وكمت ابجي بهستيريا
على اي اساس تجي تضربني اذا هلكد تحبك شكو اطلكت منك لو هسه صرت عزيز
... بس خلي اشوف شبيج
... شبيه يعني هاك شوف رجلي ووجهي شبعني ضرب وانت اتكولي شبيج
... والله من سمعت خابرت اخوها تعاركت ويا وبعد شحدها توصل يمج
... الطم املخ روحي هاي الي الله قدرك عليها خابرت اخوها
لك هي وامها اجني موتني كتل وانت هذا اقوى شي عندك
... شسوي تريدين اروح اهد على نسوان واضربهم
سمعيني حبيبي اني لو موجود ويصير هالشي كدامي والله اكسر ايدهن بس هسه ما اكدر اسوي شي هنا نسوان عايشات وحدهن برايج رجولة من عندي اروح اهد على ببت بي نسوان واتعارك
.... سكتت ورجعت ابجي قوي
... تروحلح فدوة لاتبجين
.. عفية وخر ولاتحجي وياي فوك هذا الصار بيه امك حضنتها وتبوس بيها
كدامها انضربت مكلفت نفسها وتعاركت وياهن كل الطلع من ايدها وخرتهن مني هاي لوبنتها عروس وجايات ضارباتها هم جانت راح تسكت ومتسوي شي
ابراهيم صار اعصاب عافني ونزل سمعت صياحة جوة تمددت بفراشي دموعي ميقبلن يوكفن كرامتي انجرحت وحسيت بالذل
ظليت بالغرفة مطلعت حتى عشا متعشيت وهو حار شيسوي حتى يراضيني واني قافلة عليه خليت قهري بي
الثاني يوم ما احجي ويا وابد مانزلت امه صعدت يمي بوستني وطلبت مني انزل جوة
انجبرت ارتب نفسي وانزل لان گرايبهم اجوي كعدت وياهم واني احس روحي غريبة حتى حجيهم ما افهمة
للمغرب يلا راحوا رجعت الغرفتي واني على نفس وضعي
ابراهيم... من البارحة زعلانة مو كافي حتى بوجهي متباعين زين اني شنو ذنبي وتزعلين مني
.... عفية عوفني بحالي ترى حتى روحي مطايقتها
حاول وياي بكل الطرق واني قافلة
ثاني يوم شوية بديت افك واحاول انسى الصار
العصر نزلت جوة دخلت للهول وكفت بمكاني
ايشان وامها كاعدات يشربن جاي و ضحك وسوالف واخت ابراهيم هم موجودة
هي وامها من شافني دارن راسهن ورجعن يسوالفن ولا كانوا اني موجودة
عمتي ارتبكت كالت تعالي كعدي يمنا وشربي جاي ليش واكفة
مجاوبتها عفتها ورجعت للغرفة اشديصير ما ادري وين وكعت وويامن تورطت نار شبت بيه
المغرب رجع ابراهيم
...العصر عفتج كلشي مابيج اشو هم رجعتي دلغمتي
انتوا شنو متكولولي الهدرجة كرامتي متهمكم
اخ اني غبية مسمعت كلام جنة كالتلي ذولة ميفيدوج لاتتورطين بس اني عاندت
... احجي عدل شنو هذا الاسلوب بابا شبيج متخبلة على راسي صارلج يومين كرهتيني عيشتي
. هو اني الكرهت عيشتي من جيت الهالبيت
... اصال احجي شصاير قبل لا ابتلي بيج
...كمت ابجي واحجي طليقتك وامها جانن اهنا وماخذات راحتهن ولا عبالك قبل بومين اجن ضربني واهلك مستقبيلهم احسن استقبال
لك حتى اعتذار معتذرن مني يباوعن عليه عبالك مموجودة
ابراهيم كاعد على الجرباية يهز برجلة كال تمام يصير خير طلع من الغرفة وطبك الباب قوي
صارت هوسة جوة رجع للغرفة صاير نار كبرة وامة اجت ورة تحجي ويا
ام ابراهيم.. اصال ليش ماتنسين الصار مشكلة صارت وراحت واجوي علينا خوما تريدين نطردهم ترى بيت ام رائد جيرانة من اربعين سنة بينا وبينهم عشرة عمر احنا اهل مو جيران تعودي على وجودهم بنتي
ابراهيم.. جيرانج انتي هي مامجبورة تتقبلهم وتتعود عليهم والله العظيم اذا سمعت واصلين يمها لو غاثينها اتصرف وياهم غير تصرف وحتى بالبيت ما ابقى اخذ مرتي واطلع
... هذا هو معليهم بيها ومن يجون خلي تبقى فوك حتى لاتضوج
.... راحت امه اجة كعد يمي
كال اذا ماتكدرين تتحملين نطلع من البيت المهم لاتضوجين
... مجاوبتة تمددت وغطيت راسي
وضعي ويا صار زفت وصلت مرحلة من القهر والغيرة عزلت فراشي منا كلما اشوف طليقتة تجي اشتعل واطفى من الغيرة
هو تعب مني اخير شي عافني براحتي صارلنا شهر على هالوضع مو شهر عسل صار شهر سم
ابراهيم.. عندي سفر عشر ايام تحبين تبقين اهنا لو اخذج الاهلج
... وشعندي باقية حتى اكابل ايشان خاتون اي اخذني الأهلي
ثاني يوم اخذني للبصرة وهو بنفس اليوم رجع من برودي اتجاهة حتى مسالتة وين تسافر
جنة وبابا من شافوني طاروا بيه
جنة. . هاي احلى مفاجئة ممصدكة جيتي كلت منا الشهرين لو شفناها زين
... عنده شغل يريد يسافر استغليت الفرصة وجيت
.. شلونة وياج واهله شلونهم
... اوووف شجاوبها كتلها الحمدلله زينين وابراهيم ماكو منه
... الحمدلله ياعمري ياربي دوم مرتاحة
... ظليت خمس ايام بالبصرة تونست ويا جنة وعماتي
ابراهيم باليوم مرة وحدة يتصل بس شلونج شخبارج يعاملني برود مدري شجاه
اتصلت عليه نورهان
... اكو عروس مصارلها شهر مزوجة تعوف رجلها
... غير ابراهيم مسافر واجيت
... لج منو مسافر ابراهيم موجود يومية يجي على ايمن
شششنو تخبلت عزززا هذا بس لا رجع طليقتة وزحلكني
... لج رجعي البيتج ولاتصيرين غبية ترى ايشان لازكة يمهم
اللع عليج كوليلي شسامعة متحجين هيج اذا مصاير شي
.. لا والله ماكو شي بس نهى يومية تخابرني اتكول ايشان بايعة دمها على ايبو لوبيدها تجي تعيش ويانة
من القهر والغيرة نفسي كامت تلعب سديت الخط
واتصلت على ابراهيم
. الووو
....انت وينك وليش جذبت عليه وكتلي مسافر
.. وعليكم السلام اني الحمدلله زين.
...ابراهيم احجي لاتخبلني
... تاجلت السفرة
... شوكت تجي تاخذني
هسه عندي شغل ما اكدر
. كول ما اريد اجي وفضها الله اليعلم بشنو ملتهي سديتة بوجها كمت ابجي صخام الصخمني هذا اكيد مرجعها
مبين من شكلي ضايجة جنة هواي حاولت تعرف شبيه مكتلها
.
ايبو اتصل اكثر من مرة بعد مجاوبتة
باليل دزلي مسج كاتت حظري نفسج باجر اجيج كمت نفس اللحظة حظرت غراضي ههههه
ثاني يوم اجة ايبو اشكد مشتاقتلة
سلم على جنة وباهر واجة يمي باسني من راسي حتى سلامة من ورة خشمة
نفسيتي انجعصت وصارت زفت اشوفة شلون يشاقة ويضحك وياهم واني حتى كلام ميوجهلي
بقى اليوم بالبصرة مكدرنا نرجع باليل كتلة تعال نام بغرفتي
كال لا فرشيلي اهنا ويا سيف
تعصبت جبت الفراش شمرتهن عليه ورجعت للغرفة
جنة.. اشو ابراهيم نام بالاستقبال ليش
... سيوفي ويا
... اهااا ماشي
... ثاني يوم ودعت اهلي ورجعنا الطريق كله منتحاجة روحي بخشمي بس اريد اعرف شبي وشغيرة عليه
وصلنا للبيت من دخلت ايدي على گلبي خايفة لا انصدم والكي مرجعها
سلمت على اهله وصعدت فوك دورت بالغرف هههههه
مدري شجايني احس روحي متخبلة
هو بكل برود راح سبح واجة نام
والمغرب بدل وطلع واني عبالك مموجودة
باليل من رجع جنت متحظرة اريد اتعارك ولوين توصل خلي توصل
واكف يبدل كال شبيج تباعيلي هيج
... اني الشبيه لو انت اكولك بدون لف ودوران انت رجعت ايشان
. . هههههه الظاهر بعدج تعبانة اتغطي ونامي
.... لاتخبلني ترى مد اشاقة احجي لا الم البيت عليك.
واذا مرجعها شسوين
لو ضاربني طلقة ولا هذا جوابة خليت ايدي على حلكي وشهكت
يعني مرجعها مووو الله لاينطيك الله
الله ياخذك شكو ازوجتني اذا تريدها مو حرام عليك اني شمسويتلك وهيجي تاذيني
اجة لزم حلكي سده وببده الثانية طوقني ظليت ارفس اريده يهدني
ام عقلين شبسرعة تصدكين لج بنتي والله ممرجعها بطلي خبال
.. وخرت ايده وباوعت عليه احجي وابجي عليك وداعت امك رجعتها لو لا
.... وداعت اهلي ممرجعها
لعد شبيك وياي و مطايقني
. غير من سوالفج ياظالمة ورة ست ايام من العرس تعزلين نفسج مني مو شيبتي گلبي
... غير من قهري كلما اشوفها اهنا وشلون ماخذة راحتها اموت من الغيرة
اني الميت بالياج لج مشتاقلج والخلقج ميت شوق عليج
... اي واضح من برودك وعايفني خمس ايام اهناك ولا كتلي انت ممسافر
... هههههه ماكو سفر ولا بطيخ اني دزيتج اهناك حتى ترتاحين وتعقلين و بلكي تشتاقيلي وتبطلين خبال
... ضربتة على صدرة يعني جذبت عليه
. . من وراج صرت ادور افلام حتى اراضيج حتى خليت نورهان تخابرج هههههه
..... عززا صايرين عصابة علية وخر بعد ولا احجي وياك
.... بنت ابوج وتحركي من مكانج ترى مشتعل جد جدي شو تعالي
... اخذني الحضنة يبوس بيه بشوق ولهفة بادلتة البوسة دفو حضنة ولمساتة نسني الأيام الفاتت ورجعت غركت ويا بالعسل
ابتعد مني واخذني الحضنة
... حبيبي بعد اياج تفكرين تعزلين فراشج عني حتى لو تزعلين وتصير مشاكل بينا ديربالج تنامين بعيد عني
مكانج اهنا بصفي ويمي اذا تعودتي كلما تزعلين تعوفيني راح يصير برود بينا وبمرور الأيام نتعلم نهجر بعض
.... اوك حبيبي بعد ما اعيدها
... احبج والله العظيم احبج
. والنبي اني هم اموت عليك
.... اني جنة بنت مرجانة الغجرية ورافت النسوانجي عشت طفولة ومراهقة وشباب مايعلم بيها غير الله تحملت مسؤولية تفوق عمري انحرمت من ابسط حقوقي الي هي دراستي كافحت واشتغلت وتحملت التعب والذل في سبيل احافظ على شرفي واعيش عيشة كريمة واربي الامانة الامنتنيها اختي
اصال نصي الثاني رفيقة دربي والشمعة النورت حياتي باليالي الظلمة بنتي وامي واختي وروحي من الدنيا
يمكن اتكولون هي بعدت عنج وكل وحدة بيكم التهت ابيتها وحياتها وتعودتو بلاية بعض صح تعودنا بس حبنا متغيرة المسافات والمسؤوليات بيوم الما اسمع صوتها واعرف تفتصيل يومها اتخبل اصال الاخر يوم بعمري تبقى رقم واحد بحياتي
اما علاقتي بابوية نفسها البرود سيد الموقف بينا هسه اتكولون ليش هلكد حاقدة وگلبج اسود
راح يكون جوابي بس العاش عيشتي وشاف الشوفتة راح يعرف شحس وشنو الصار بيه
صح سامحتة وبريتة الذمة لان وضعة الصحي تعبان لكن اتقبلة واتصرف ويا عادي هاي من سابع المستحيلات
اما اخواني علاقتي بيهم طيبة حبيتهم وتقربت منهم لان مالهم ذنب بالصار بينا
مرجانة الحد هذا اليوم ما اعرف عنها شي ميتة عايشة ما ادري اخر مرة شفتها بيوم الاجت اخذت مني فلوس. وكالت اروح اتعالج بعدها انقطعت اخبارها واني هم مدورت وراها. ولا اريد اعرف عنها شي
باهر اخ يا باهر اشكد اوصفة ما اوفي حقة هذا حبيبي وابو بيتي وجهالي مافديوم غثني صايني وشايلني على كفوف الراحة
كالي اكونلج سند وفعلاً صارلي نعم السند والظهر بجالة عايشة معززة مكرمة شحدة اليدوسلي على طرف
صار عندي منه رقية وقاسم وحالياً حامل بالشهر الرابع
هاي حياتي صح تعذبت هواي بس الله متركني وجبر بخاطري والف الحمدلله على كل حال
اصال..... اني اصال بنت عطر الأم المشايفتها وبنت جنة المرة الحديدية جنتي بالدنيا ربتني ونعم التربية شافت انواع العذاب في سبيل تحافظ عليه شحجي وشكول قليل بحقها دوم ادعي الله ياخذ من عمري ويحطة على عمرها لان هي عمري وحياتي بلايها مالها معنى
بابا الحنون حبيبي وسندي الحد يومنا هذا من يحجي وياي لو يشوفني عيونه تنترس دموع شايل حنان الدنيا كله بگلبة الله يحفظة الي ويطول بعمره
حياتي الزوجية الحمد لله زينة صح بالبداية مرينا بهواي مشاكل ومطبات لكن كدرنا نتخطاهن
جنت من اشوف طليقتة اموت بمكاني هواي طلب يطلعني بيت وحدي من غيرتي جنت ارفض اكوله اخاف تاخذني الغير بيت وترجع ايشان وتجيبها اهنا
هو يهز ايده ويظل يضحك يكول تبقين خبلة متصيرلج جارة اني لو اريدها من البداية ارجعها ليش ابقى متنظر لهسه اني احبج انتي وما ابدل اظفرج بمليون وحدة مثلها
الله رحم بحالي وخلصني منها اجت قسمتها وزوجت بيومها من فرحتي شبعت ركص ههههه وايبو ميت ضحك عليه
اهل ايبو مشفت منهم غير كل خير بالبداية من شفت علاقتهم باهل ايشان ضجت منهم وكرهتم بس بعدين عرفت البينهم عشرة طويلة والدليل حتى من خربت علاقة ابراهيم وأيشان الاهل استمرت علاقتهم
بيت اخو طلعوا بيت وحدهم والبيت الجبير بقى النه والاهله صار عندي ولد حالياً عمره ثلاث سنوات
عمتي وعمي روحهم بي الدرجة مايريدنة اني وابو ومجلب ببيتة وجده ومن كثر دلالهم وكح الله ميجرعة واني وايبو اذا عطنا بي هاي الي الله كتبها علينا نحصل رزالة غسل ولبس
اني وابراهيم صح تصير مشاكل وزعل بينا حالنا حال اي مزوجين بس منطول بزعلنة
ايبو طبعة يجنن يقدس المراءة ويحترمها وهو هذا الشي المخليني امووت عليه......
هاي نهاية قصة بنات الغجرية ياربي اتكونوا استمتعتوا بيها وحبيتوها
واعذروني لان ختمتها بهاي الطريقة ويمكن البارت مو بالمستوى المطلوب
بس الله شاهد مشغولة ومعندي وقت وما اكدر التزم
تحياتي الكم احببببببكم بسمة البياتي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!