تحميل رواية «بنات المدينة الجامعية» PDF

صلوا على الحبيب المصطفى 🌺

🌹🌹🌹🌹🌹🌹🌹🌹🌹🌹🌹🌹

فى اوضه واسعه فى احدي المدن الجامعية كانت منار واقفة قدام المراية اللى متعلقه علي الحيطه وبتعدل طرحتها وبعدين اتحركت وهي بتنادي.

منار: بت يا رقيه يا بت اصحي بقا هو انتي ايه من اهل الكهف؟

رقيه وهي بتتاوب: ايه يا منار في ايه متسبيني انام شويه اما انا كنت بحلم حتة حلم انما ايه.

منار: حلم ايه يا متنيله علي عينك قومي ياختي هتتاخري على المحاضره بتاعتك.

رانيا: يوووه هو احنا كل يوم هنصحي علي الموشح بتاعكم دا ماتقومي يا ست رقيه وتخلصينا خليني اعرف اكمل نوم طول الليل سهرانه ياللي معندكوش دم وملحقتش انام.

منار: وايه اللى كان مطير النوم من عينك يا عين امك؟

رانيا: كنت بذاكر ياختي انتي ناسيه ان امتحان الميدتيرم مفاضلش عليه غير كام يوم؟

منار: ربنا ينجحك يا حبيبتي .

ولسه بتبص علي رقيه لقيتها نامت تاني قامت مصرخه فيها وقالت.

منار: قومي ياللي معندكيش ريحة الدم هو انا كل ما اصحيكي تنامي تاني؟

رقيه: يا منار سيبيني اكمل الحلم دا خلاص المز كان هيخطفني في عربيته ويحبسني فى القصر بتاعه ويعذبني وبعدين يحبني ويعيشني فى تبات ونبات.

منار: يخربيت الروايات اللى كلت دماغك يا بت انتي اهلك باعتينك هنا عشان تنأنتخي وتنامي وتحلمي بفارس الاحلام ولا عشان تدرسي وتذاكري يا حبيبتي اتقي الله فى اهلك اللى طفحانين الكوته عشان يوفرولك مصاريف دراستك قومي يلا احضري محاضراتك وذاكري عشان ترفعي راسهم وتفرحيهم بيكي.

قامت رقيه من علي السرير وهي بتعمل التحيه العسكريه: حاااضر يا ماما هنفذ الاوامر واروح الجامعه واذاكر كدا تمام؟ ممكن بقا بعد اذنك يا منار يا حبيبتي تعمليلي سندوتشين افطر بيهم عقبال ما اصلي والبس.

منار: هو كان حد قالك يا ضنايا اني الخدامه الفلبينيه اللى جابهالك السيد الوالد؟

رقيه: عشان خاطري وحياتي وحياتييييي عندك ينوبك ثواب دا انا غلبانه ومتاخره علي المحاضره.

منار: حاضر ياختي اصل انا جايه هنا اشتغل منبه وداده لسعادتك.

رانيا والنوم مسيطر عليها: منار متنسيش بعد ساعه ترني علي جوز الخيل اللى نايمين دول عشان متروحش عليهم المحاضره بتاعتهم.

منار: يا حزني عليا وعلي عيشتي هو انا لو مكنتش موجوده معاكم كنتم هتصحوا ازاي ؟ قوليلي يا ست رانيا خديجه هانم والكونتيسه سندس عندهم محاضرات الساعه كام عشان اظبط منبهي.

راينا: خديجه عندها الساعه عشره وسندس مش فاكره عشره ولا 11 اهو صحيهم الاتنين مع بعض وخلاص.

منار: طب وانتي؟

رانيا: لا انا عندي محاضره واحده الساعه اتنين متشغليش بالك انتي عارفه ان نومي خفيف وبصحي لوحدي سيبيني بقا الحق انام شويه عشان اصحي فايقه.

───

الساعه واحده ونص بليل كل البنات كانوا نايمين بعد يوم طويل فى الجامعه فجاه فتحت منار عينيها وهي بتشم ريحه قويه ماليه المكان رفعت راسها من علي المخده وبصت حواليها ولمحت رقيه قاعده علي المكتب ماسكه روايه بتقراها وقدامها طبق كبير فيه اندومي سخن.

منار: ايه دا يا زفته انتي بتاكلي اندومي الساعه واحده بليل؟

رقيه بصتلها باستغراب وقالت: اه عادي ايه المشكله يعني هو الاندومي ليه مواعيد معينه وانا مش عارفه؟

منار: انتي بتستهبلي يا رقيه انتي ازاي تاكلي القرف دا احنا مش اتكلمنا فى الموضوع دا قبل كدا وقولنا بلاش اندومي عشان بيجيب امراض؟

رقيه: انتي ليه محسساني اني باكل سم فيران دا شعريه عاديه يا منار مفيهاش حاجه يعني مش هتموتني يعني.

منار: ألعن والله دا كله مواد حافظه واملاح وصوديوم يودوا فى داهيه.

رقيه وهي بتقلب الشوكه فى الطبق: بس طعمه حلو اوي مبقدرش اقاومه.

منار: يعني لو جابولك سم وعليه شيكولاته هتاكليه وتقولي طعمه حلو؟

فى اللحظه دي صحيت خديجه علي صوتهم.

خديجه وهي مش فايقه: هو فيه ايه يا جماعه صوتكم عالي كدا ليه؟

رقيه شاورت علي منار: اسالي الست الدكتوره شكلها عاوزه تطبق علينا اللي بتدرسه فى التمريض.

منار: يعني الحق عليا اني خايفه عليكي يا ام راس بمخ نمله؟

خديجه: بصي انا مع رقيه الاندومي دا نعمة ربنا علي الطلبه الغلابه اللى زينا يعني هنعمل ايه واحنا ساكنين بعيد عن اهلنا ومش ملاحقين ما بين الكليه والتدريب والمذاكره عشان كدا بنستسهل اكله لاننا مش لاحقين نطبخ حاجه تانيه.

فى السرير اللى قصادهم كانت سندس هي كمان صحيت وسمعت كلامهم.

سندس: آني مع منار الاندومي ده حاجه مش طبيعيه واصل اصل مفيش حاجه تستوي في تلات دجايج وتبجي سليمه وبعدين ما تسمعي الكلام يا رجيه وانتي ساكته ايه علكي عاد لازم تجاوحي فى الغلط اكده؟

رقيه: اهو العرق السوهاجي طل علينا اهو على العموم احنا كدا تعادل فريق رافض الاندومي وفريق موافق عليه نتصرف ازاى بقا دلوقتي؟

فى اللحظه دي خرجت رانيا من تحت البطانيه وهي بتقول: انا مع الاندومي . الكل بصلها فقالت : بصراحه اي اكل يتعمل فى تلت دقايق يستحق الاحترام.

منار: طب وصحتكم دا انا بشوف بلاوي بسبب الزفت دا وانا فى التدريب كل يوم فى المستشفي.

رقيه: متبقيش حنبليه يا منار وخليكي ديموقراطيه الاغلبيه كسبت ويعيش الاندومي.

منار: خلاص براحتكم بس لما تتعبوا متبقوش تشتكوا.

رانيا: ياستي لو تعبنا ابقي اعمليلنا خصم علي تكاليف المستشفي اهو نستفاد منك بأي حاجه.

رجعت رقيه تاكل الاندومي باستمتاع والكل فضل يضحك عليها.

───

بعد كام يوم كانت رانيا قاعده علي سريرها وحاطه ايدها فى شعرها وهي بتبص للابتوب قدامها بعصبيه وبتقول: انا هتجنن …. هتجنن والله.

رقيه كانت نايمه علي السرير وبتقرا فى روايه كعادتها فبصتلها وقالت: المشروع برضو؟

رانيا: المشروع واللي اخترع المشروع واللي اخترع الهندسه كلها.

خديجه رفعت راسها من الكتاب: ايه دا هي لسه المشكله متحلتش؟

رانيا: بقالي اسبوع بحاول احلها.

سندس: وه عليكي يا رانيا ما تسالي المعيد بتاعك المفروض ان واجبه يساعدك فى اللي يجي صعب عليكي.

رانيا بصتلها وكانها اقترحت عليها كارثه: نعم ياختي عوزاني اسال راجل مستحيل.

منار: يابنتي هو انتي رايحه تطلبي ايده دا مجرد سؤال فى الدراسه.

رانيا: لا يا حبيبتي دا مبدا مش عاوزه اي مساعده من صنف الرجاله.

رقيه: هو انتي يا بنتي عندك مشكله شخصيه مع الرجاله؟

رانيا: لحد دلوقتي لا بس اللى شوفته وسمعته عنهم يخليني مثقش في اي حد فيهم وبعدين اصلا الرجاله كلها زي بعض نفس الطباع دي حقيقه علميه.

سندس: ومين بجا اللى جال ان دي حجيجه علميه يا ست رانيا؟

رانيا: انا اللى قولت.

خديجه: بس اللى اعرفه انك متحكميش علي اي حد الا لما تعاشريه لكن عشان سمعتي موقف ولا اتنين عن رجاله مش كويسه تقومي تقولي ان كل الرجاله مش كويسين كدا انتي غلطانه وارتكبتي ذنب لانك اتهمتيهم بالباطل.

رانيا: معرفش بقا انا كدا بكره كل الرجاله وياريت العالم كله كان ستات وبس.

رقيه: لاااا حرام عليكي هي الدنيا تحلي من غيره اومال مين اللى هيجي يخطفني علي الحصان الابيض لو هما مش موجودين فى الحياه.

سندس: وه وه يا بنت عم عبدالجليل هو انتى مفيش فى دماغك غير الرجاله والعشج يا مرك يا مرك.

───

تاني يوم رانيا كانت فى مكتبه الكليه وقاعده متضايقه لان المشروع قرب يتسلم وهي لسه مش عارفه تحل المشكله فى اللحظه دي كان المعيد بتاعها واقف قريب منها وبيتابع تعبيرات وشها فقرب منها بهدوي وقال: لسه مش عارفه تخلصي المشروع بتاعك؟

رانيا: انا مخلصاه بس جزئيه بسيطه فيها مشكله عندي مش عارفه اخلصها بس باذن الله هحلها واسلمه لحضرتك فى الميعاد.

المعيد قعد جنبها وشد اللابتوب قدامه وهو بيقول: وريني كدا . بعد لحظات بسيطه وهو بيقلب فى المشروع قال : لا دي حاجه بسيطه خالص يعني دي المفروض تتعمل كدا . وفضل يشرحلها حل المشكله اللى عندها . وبس كدا ياستي الموضوع مكنش مستاهل التوتر والقلق اللى انتي عايشه فيه بقالك اسبوع لو كنتي سالتيني من بدري كان زمانك مسلمه المشروع اول واحده بس واضح ان المشكله معايا انا.

رانيا بصوت واطي: والله المشكله مع كل الرجاله مش انت بس.

المعيد: ها بتقولي حاجه يا انسه رانيا؟

رانيا: لا ابدا شكرا لحضرتك علي انك ساعدتني عن اذنك انا مضطره امشي.

لمت حاجتها ومشت بسرعه وكان المعيد بيبص عليها وهي بتمشي وكانت هتقع من توترها فضحك وقال في نفسه: يا تري هتفضلي تكرهي الرجاله لحد امتي كدا انا مهمتي معاكي صعبه اوي يا رانيا.

───

رجعت رانيا المدينه الجامعيه واول ما دخلت الاوضه لقت البنات قاعدين.

رقيه: ها عملتي ايه؟

رانيا: عملت ايه في ايه بالظبط؟

رقيه: فى المشروع يا بنتي.

رانيا: اه اتحل خلاص.

خديجه: ازاي؟

رانيا بتوتر: نوح شرحلي المشكله.

الكل سكت ثانيتين كدا وبعدين شهقوا كلهم فى وقت واحد ومنار رفعت حاجبها باستغراب.

رانيا: ايه في ايه مالكم؟

رقيه: نوح دا المعيد بتاعك؟

رانيا: اه هو.

خديجه: يعني راجل.

رانيا: اه طبعا اومال بنت.

سندس: وجبلتي المساعده يا بت الفرطوس جبلتي المساعده من راجل مش كنتي بتجولي اني يستحيل اجبل مساعده من صنف الرجاله ايه اللى غيرك عاد؟

رانيا بدات تستوعب انها اتخلت عن مبادئها عشان تخلص من مشكلتها.

رقيه: يا جماعه الموضوع دا هيتكتب فى التاريخ رانيا وثقت فى راجل وخليته يساعدها.

رانيا بغيظ: موثقتش فيه.

سندس: اومال عملتي ايه يا بنت عم فاضل؟

رانيا: عادي يعني يا سندس هو شرحلي جزئيه بسيطه فى المشروع وخلاص ايه هتعملوها قضية راي عام؟

منار: بس يا بت انتي وهي سيبوها فى حالها خلاص يا رانيا متزعليش هما بس بيهزروا معاكي المهم دلوقتي ان مشكلتك اتحلت راجل بقا ولا ست مش مهم يلا يا حبيبتي غيري هدومك وقومي صلي واتغدي عشان تذاكري شويه.

خديجه: متنسوش بكرا يا بنات الخميس عاوزين سهره حلوه قبل ما نسافر يوم الجمعه.

منار: انا عليا الفيشار واللب.

رانيا: وانا منزله شويه افلام علي اللابتوب هتعجبكم اوي.

سندس: واني بجا هعملكم رز بلبن هتاكلم صوابعكم وراه وانتي يا رجيه هتعملي ايه؟

رقيه: هعملكم اندومي بالشيتوس والجبنه الموتزاريلا امممم والله ريقي جري من دلوقتي.

منار: لا يا ماما انا مش هاكل العك دا اشبعي انتي بيه.

رانيا: عك ايه ايش فهك انتي اصلا دا تحفه يا ماما خليكي انتي في الاكل الصحي بتاعك انا هاكل معاكي يا بت يا رقيه.

───

يوم الخميس الصبح فى كلية الهندسه كان نوح قاعد مع صاحبه عماد فى مكتبه.

عماد: يابني نفسي اعرف ايه اللى عاجبك فيها دي واحده معقده وبتكره صنف الرجاله هتتعامل معاها ازاي فهمني؟

نوح: بس عجباني وداخله دماغي لانها بنت جدعه وطيبه اما حكايه انها بتكره الرجاله فا دي حاجه مش حقيقيه هي بس بتحاول تحمي نفسها من غدر اي راجل وعشان كدا هي عايشه ورا دور البنت القويه اللى بتعتمد علي نفسها وميهمهاش اي راجل.

عماد: دا بقا اللى هيجنني انت عرفت منين شخصيتها وعرفت منين انها معقده من الرجاله؟

Flash Back

رانيا كانت قاعده في كافيتريا الكليه ومعاها واحده زميلتها وفى نفس الوقت كان نوح قاعد علي الترابيزه اللى جمبهم وسمع كل كلامهم.

رانيا: انتي هبله يا بنتي دا منظر عريس توافقي عليه نفسي اعرف ايه اللى عجبك فيه يا ست مني؟

مني: يا بنتي انا موافقتش بابا هو اللى موافق ومصمم عليه وبيقولي موظف وعنده شقه وعربيه وهيعيشني عيشه مرتاحه ومضمونه.

رانيا: مضمونه ايه يا مجنونه دا حتة موظف وبعدينانتي لسه فى سنه تانيه يعني لسه صغيره اصبري شويه نفسي اعرف متصربعين علي ايه ولا اصلا تتجوزي ليه ابني مستقبلك الاول عشان متخليش راجل ملوش اي تلاتين لازمه يتحكم فيكي خلي ليكي كيان وكارير الاول.

مني: يا بنتي هو انتي فيه بينك وبين الرجاله تار؟

رانيا: لا تار ولا نيله انا مش بطيق صنفهم اصلا.

مني: يعني مش ناويه ترتبطي ابدا؟

رانيا: انا عمري ما هتجوز انا هعيش كدا لنفسي وبس هو انا هبله اتجوز واحد يتحكم فيا ويقولي اعمل ايه ومعملش ايه.

مني: بكرا نشوف ياختي هنقعد جمب الحيطه ونسمع الزيطه.

End Of Flash Back

فى سهرة الخميس اتجمعت البنات فى الاوضه وجهزوا كل حاجة السهره.

رقيه: ها يا رانيا هتفرجينا على فيلم ايه؟

رانيا: انا معايا افلام مختلفه فيه هندي وعربي واجنبي تحبوا تتفرجوا علي ايه؟

منار: معاكي افلام لشاروخان؟

سندس: لا آني عاوزه افلام عربي جديمه ابيض واسود اكده للست فاتن حمامه ولا احمد مظهر يابوي علي حلاوتهم فى فيلم دعاء الكروان.

خديجه: تصدقي يا بت يا سندس انتى ذوقك حلو اوي الفتره دي كانت الافلام جميلة ومحترمه مش اللى بنشوفه دلوقتي.

رانيا: -والله انتي حظك فى رجلك يا سندس انا اصلا بحب الفيلم دا ومنزلاه عندي وكمان معايا فيلم موعد مع السعاده بتاع فاتن حمامه برضو.

خديجه: لا خلينا فى دعاء الكروان ايه رايكم يا بنات؟

الكل فضل يتفرج ومندمج لحد جزء معين وبدات رقيه تعيط وخديجه متاثره ورانيا حاسه بالغيظ والكره.

رقيه: يقطع الحب وسنينه اهي هنادي ضيعت نفسها.

رانيا: لو كانت عاقله مكنتش سلمت قلبها لراجل اهو غدر بيها باسم الحب وهي زي الهبله صدقته والنهايه ماتت علي ايد خالها حتي خالها دا انسان غدار قتلها وهي مظلومه بدل ما يقف جمبها ويرجعلها حقها عشان تصدقوني لما اقولكم ان الرجاله ملهاش امان وان حياتنا من غيرهم احسن امها واختها رغم انهم زعلانين من تصرفها الا انهم برضو ماذوهاش عشان ستات لكن الغدر جه من الرجاله.

سندس: روجي يا ضنايا وخدي طبج الرز بلبن دا عشان يروجلك اعصابك.

منار: هاتي ياختي شوية لب اهو دلوقتي امنه هتجيبلها حقها وتخليه يبقى مذلول قدامها.

بعد شويه.

خديجه: الفيلم خلص تيجوا نشغل فيلم تاني اصل انا مش جايلي نوم.

منار: انا كمان مش جايلي نوم بس مش عاوزه اتفرج علي افلام ايه رايكم نقعد نرغي شويه مع بعض؟

رقيه: انا موافقه جدا اصل انا بحب الحكايات اوي طيب ايه رايكم كل واحده تحكي موقف حصل معاها؟

سندس: زي ايه يعني يا رجيه؟

رقيه: بما ان كلكم انسات كبار يعني اكيد اتقدملكم عرسان فايه رايكم كل واحده تحكي عن اكتر عريس اثر معاها يلا ابداي انتي يا منار.

منار: اشمعنا انا يعني ما تبداي انتي ولا اقولك رانيا اللى هتبدا وتقولنا.

رانيا: واشمعنا انا اللى هتعملوني كبش فدا ما اي واحده غيري تبدا.

منار: لا ما هو انتى اكيد عندك حكايات حلوه لانك اكيد اللى بتطفشيهم بما انك عدوتهم اللدوده.

رقيه: اه يا رانيا احكيلنا بالله عليكي عن عريس من العرسان اللى طفشتيهم.

رانيا: امري لله شكلي هبقي ضحية القاعده بتاعتكم دي بصي ياختي انتي وهي كان يوم مطلعتلوش شمس يوم ما بسلامته اتقدملي كان محامي ولعبته الكلام.

Flash Back

كريمه ( والدة رانيا ): يلا يا رانيا انجزي معايا يا حبيبتي عاوزين نخلص البيت قبل ما العريس يوصل.

رانيا: يعني يا ماما هو العريس هيلف علي اوض البيت ما هو هيقعد فى الصالون وخلاص.

كريمه: يا حبيبتي افرضي مامته اتحركت في البيت اصل فيه ستات كدا بعيد عنك بتحب الفرك وعينهم بتبقي جايبه المكان كله تقوليش رادار.

مجدي ( والد رانيا ): ايه يا حلوين لسه مخلصتوش ولا ايه؟

محمود ( اخ رانيا ): والله يا بابا انا مش عارف ماما اعلنت حالة الطوارئ وكأن اللى جاي يزورنا دا رئيس الجمهوريه.

كريمه: بكرا يا اخويا لما تروح تتقدم لعروسه هيتعملك كدا واكتر كمان اصل دا فلكلور شعبي ولازم نحافظ علي العادات والتقاليد هههههههه.

مجدي لسه رايح يقعد في الصالون قامت كريمه مصوته وقالت: قوم انت رايح تقعد فين انا لسه منضفه عندك روح اقعد فى البلكونه انت وابنك عشان متبهدلوش الدنيا.

مجدي: قوم يا ابني تعالا دي امك طلعت مأعلنه حالة الطوارئ بجد.

───

بعد شويه وصل العريس ومامته.

كريمه: اهلا بيكي يا ام سمير منورانا منور يا استاذ سمير.

سمير: دا نورك يا طنط.

صفاء ( ام سمير ): اومال فين عروستنا الحلوه يا حبيبتي؟

كريمه: حالا يا حبيبتي هتيجي اهي.

مجدي: وانت يا ابني عندك مكتب محاماه ولا لسه تحت التدريب.

سمير: لا يا عمي انا الحمدالله عندي المكتب بتاعي وشغال كويس اوي.

بعد شويه دخلت رانيا وهي شايله صينيه العصير.

صفاء: اهلا بعروستنا الحلوه تعالي يا حبيبتي اقعدي جمبي هنا ازيك يا حبيبتي ايه القمر دا يا ناس.

رانيا: شكرا لحضرتك يا طنط.

صفاء: انا حبيتها اوي شكلك كدا هتبقي مرات ابني انا معنديش بنات وهعتبرك بنتي وهنبقي صحاب.

ابتسمت رانيا ومردتش.

محمود:وحضرتك بقا يا استاذ سمير من انصار ان المرأه تشتغل ولا تقعد فى البيت؟

سمير: طالما شغلها مش هياثر علي مسئوليات بيتها فا انا معنديش مشكله.

صفاء: طيب يا جماعه مش نسيب العرسان يقعدوا مع بعض شويه عشان يتعرفوا علي بعض.

كلهم خرجوا وفضل رانيا وسمير.

سمير: قوليلي بقا يا انسه رانيا انا لاحظت انك ماسكه الموبايل من ساعة ما دخلتي ممكن تقوليلي انتي بتمسكي تلفونك كام ساعة فى اليوم؟

استغربت رانيا ومعرفتش ترد وبعدين قالت: والله محسبتهاش قبل كدا.

سمير: طيب هو انتي بتحبي تجيبي هدايا وتحبي المفاجات كدا ولا لا؟

رانيا فى نفسها: ايه دا هو مش كان زمان السؤال بتحبي يجيلك هدايا هو المنهج اتغير ولا ايه . وبعدين ردت عليه : اه بحب المفاجات طب وانت بقا بتحب الهدايا؟

سمير: اه طبعا بحب الهدايا جدا وخصوصا الماركات.

رانيا في نفسها: ايه دا هو انت منهم اللى بيحب ياخد وميديش قفشتك يا معلم سؤال واحد بقا واديك استماره سته عن اقتناع.

رانيا: طيب قولي بقا يا استاذ سمير دخلك قد ايه فى الشهر؟

سمير: ودا يخصك في ايه انتي ليكي طلبات تبقي موجوده وبس.

رانيا: علي كدا بقا هيبقالي مصروف خاص بيا ولا دا برضو مليش فيه؟

سمير: اظن انتي هتتخرجي من كلية الهندسه وتشتغلي يعني هيبقى معاكي مرتب خاص بيكي فا مش هتحتاجي مصروف مني بالعكس المفروض انك هتشاركي بمرتبك فى مصروف البيت دا طبعا لو اشتغلتي.

رانيا: امم طيب بس انا مش حابه اشتغل وعاوزه اقعد فى البيت وبكدا مش هيبقالي مصدر دخل ومن واجبك انك تديني مصروف خاص بيا بعيد عن مصروف البيت.

سمير: والمصروف دا لازمته ايه بقا طالما انا هجيب كل الطلبات بتاعت البيت اوعي تكوني من البنات اللى بتحب المانيكير والباديكير وكريمات الوش والاكسسوارات وكدا.

رانيا: طب وايه المشكله فى كدا ما دا شئ طبيعي المفروض كل البنات بتعمل كدا.

سمير: لا لا لا خليكي كدا طبيعيه احسن وفلوسنا تتصرف في حاجه مفيده.

رانيا: اه مفيده طب بص بقا يا ابن الحلال انت شكلك كدا بني ادم بخيل وجلده وانانش مش بتفكر غير في نفسك وبصراحه انت متلزمنيش فياريت كدا بكل ادب وزوق تاخد نفسك والست الوالده وتمشي من هنا بكرامتك بدل ما ابعزقهالك فاهم يا استاذ؟

سمير: ايه قلة الذوق دي انتي فاكره نفسك مين عشان تكلميني بالشكل دا؟

رانيا: انا الباشمهندسه رانيا مجدي بنت ابوها رباها علي الادب والاخلاق والكرم مش زي حضرتك عاوز تستغلني ومتصرفش عليا وفاكر انك لما تاكلني وتشربني يبقي كدا عامل فيا جميله لا يا بابا فوق لنفسك انا يستحيل ارتبط بأشباه رجاله زيك اتفضل اطلع برا حالا.

مجدي دخل علي صوتهم: في ايه يا بنتي صوتكم عالي كدا ليه.

حكت رانيا اللى حصل لباباها وقام طارد سمير وحضن رانيا وقالها: انتي غاليه ومياخدكيش غير الغالي زيك.

End Of Flash Back

سندس: آبه عليكي يا جادره بجا طردتي الراجل وجفاه يحمر عيش دا انتي يتفاتلك بلاد بس بصراحه عنديكي حج الراجل دا عاوز جطم رجبته.

منار: جدعه يا بت يا رانيا دا انا دمي اتحرق من بروده انا مشوفتش فى حياتي بحاجه بالشكل دا.

رقيه: الحمدالله ان ربنا نجدك منه.

خديجه: حبيبتي اكيد ربنا هيرزقك بواحد احسن منه واحد يكون راجل بجد ويعرف يشيل مسئوليه.

رقيه: وانتي بقا يا سندس انا بسمع ان عندكم فى الصعيد لازم البنت تتجوز ابن عمها صح ولا دا كلام وخلاص وكنت سمعت ان البنت مش بتكمل تعليمها احكيلنا بقا ازاى انتي قدرتي تدخلي الجامعه لا وبعيد عن سوهاج كمان عملتيها ازاي دي يا بنت اللذينه؟

سندس: بصي ياختي انتي وهي احنا فعلا حدانا فى السوهاج البن لازمن وحتما تاخد ولد عمها لانها بتبجي مكتوبه علي اسمه من وهي صغيره وآني كان من حظي سالم ولد عمي فاروج وهو اسم الله عليه دكتور جد الدنيا لما خلصت الثانوي ابوي واخواتي كانوا رافضين اكمل دراستي وجالولي..