رواية بواقي روح الفصل العاشر 10 - بقلم نسمه عبدالله

رواية بواقي روح

الفصل العاشر10

بقلم نسمه عبدالله

رجعت البيت ختيت فرع الوردة في كباية موية و ختيتو في حتة بعيدة لحد م نرجع البيت اشيلو معاي بدلت و طلعت لقيت امي في وشي ثالت لي مشيتي وين انتي ، قلت ليها مشوار قصير ، قالت لي الحفلة كلها مافي تقولي لي مشوار قصير ، قلت ليها امي انا لو قلت ليك م ح تصدقي ، قالت لي اسرااااا، قلت ليها قبضوني الشرطة و حققو معاي ، لوت خشمها و قالت اصلك م تقولي للواحد الجواب العايز يسمعه يلا من وشي م اتفشى فيك هزيت راسي بيأسو مشيت، تاني يوم الحنة الكبيرة و اللي مفروض يكون يوم نضافة الخدار بس الخدم ح يعملو اي شي عدت الحفلة عادي رجعنا متأخرين ..يوم الدعوة و كانت فطور ، بعد فطرت و طبعا الدعوة في الصالة و عازمين ناس محدودة و معينة و كل زول أغنى من التاني و النساوين الجو كلهم لابسين دهب تقيل حتى امي قاشرة ب دهب القمار اتهزا قلبي شوية لمن لقيت اني البت الوحيدة م لابسة دهب و ملابسي عادية جدا بالنسبة ل حقتهم طول م انا قاعدة معاهم بحس ب خنقة م طبيعية ف طلعت برا و المرة دي م مشيت بعيد قررت اقعد في النجيلة هنا و استنى يخلص الاستعراض حق الدهب دا جات عربية فاخرة وقفت قدام باب الصالة بالضبط ي سلام لو عندي عربية ، ضحكت و قلت مع نفسي خلي يكون عندي غسالة اول نزلت شاهندا و معاها مرا اربعينية قوامها رشيق لابسة غالي طبعا دخلوا جوا و انا متابعاهم سألت نفسي اذا الناس كلها عارفة قصة شاهندا ليه معتبرنها صحبتهم و عازمنها كمان انا وحدة زي دي ب عيني م بعاين ليها خلي اعزمها تجي تعمل لينا سمعة ب لبسها و سمعتها ديل استغفر الله، شوية و طلعوا كم وحدة من الصالة و شكلهم خلاص راجعين كانو بتكلمو في وحدة ، وحدة فيهم قالت ب استهزاء راجلها ي دوب تم خمسة شهور من اتوفى و لابسة و قاشرة ولا فوق دا كلو متحننة ، التانية قالت ليها قالو مرتو الأولى في السجن و لسه قضيتها م اتحلت ، قالت ليهم يخ سليمة م بتعملها مستحيل تكتل خالد انا بعرفها مرا طيبانة و على نياتها ، اتقدمو و صوتهم بقى بعيد ، لا انا م ح اقدر اقعد بدون اعرف خالد منو و الكتلو منو ، طوالي مشيت وراهم ب مسافة و سمعت وحدة بتقول مسكين عزام ح يجن و يثبت انو امو بريئة ، وحدة تانية قالت قضيتها صعبة يخ و غاليا ح تتسجن في النهاية لانو كل الادلة ضدها ، وقفت و انا بقول عزام و خالد ، و اتذكرت موقف المحكمة و كلام عزام و صابرين في الحمام و القضية حقت امو و هو اسمو عزام خالد ايوا هو زاتو المحقق عزام خالد ، اتلفت عشان ارجع بس فكرت اذا كانت المرة دي مصاحبة شاهندا بالطريقة دي م بعيد تكون هي كتلتو، برضو منطق والله لا م ح اصبر ح امشي ل عزام اسي دي و اتأكد و كدا كدا م عندي مزاج اقعد ، طلعت ركبت مواصلات و نزلت في السوق و واصلت مشي لحد مركز الشرطة و لما سألت عنه طلع م شغال لانو اليوم جمعة ، و انا قطعت المسافة دي كلها فضول و شمار ساي هو انا حق المواصلات بجازفها عليك الله لو م عدم تفكير و غباء انا الجايبني شنو غبية ي إسراء غبية، ...بركة الاعترفتي ب غبائك ، عاينت ل مصدر الصوت و كان عزام ، ضحكت انو قروشي م راحت ساي مع انها راحت ساي والله ، قلت ليه انت مش اجازة اليوم ، قال لي و انتي بتسالي لشنو ، قلت ليه هم تلاتة أسئلة، قال لي و انا لازم اجاوب ، قلت ليه ولو قلت ليك ل مصلحتك كييييف ، قال لي و انتي تعرفيني من وين عشان تعرفي مصلحتي ، صريت وشي و قلت ليه انت م بتقدر تجاوب قدر السؤال لشنو ، ابتسم وقال دا سؤال واحد راح و فضلو اتنين ، زفرت ب غضب و قلت ليه غلطانة القاطعة المسافة دي كلها عشان اساعدك ، قال لي اختصري وراي حاجات اهم من وقفتي معاك ، قلت ليه امك اسمها سليمة ، قال لي لشنو عايزة تكتبيني عند شيخ ،استغفرت بصوت مسموع و قلت لي جاوب قدر السؤال ياخ ، قال لي اي اسمها سليمة ، قلت ليه متهمة انها كتلت ابوك ، قال لي شكلك عملتي تحقيقات عني ، ابتسمت و قلت ليه عادة سيئة عندي خلتني اعرف شي عنك ، قال لي اللي هو ، قلت ليه مرت ابوك التانية مصاحبة شاهندا ، رفع حاجب ب استغراب و قال شاهندا !!!، قلت ليه ايوا شاهندا بتاعت المخدر'ات دي و م بعيد انهم ورطو امك في الجر'يمة دي الا اذا امك شريرة ، صر وشو و قال بس كيف و من وين يعرفو بعضهم و انا مراقبهم الاتنين ، قلت ليه ب عينك ولا ب عين زول ، قال لي نعم ، قلت ليه مراقبهم انت شخصيا ولا خاتي زول زي م ختيت لي واحد ، قال لي ب سرحان خاتي ناس ، قلت لي بسس هم خيارين ي اما مراقبينك م شايفين شغلهم زي المراقب الخاتي لي لانو ماف زول بقضي يوم بشوفو زول معين بيعمل فشنو في يومو و ي اما ادوهم قرشين تلاتة عشان بنقلو ليكم كلام كذب ، عاين لي ب سرحان و قال انتي منو جديا كدا ، قلت ليه وحدة حلمها تبقى محققة زيك و جنها شمارات، قال لي لو اتأكدت المعلومة دي ح تفرق شديد في القضية و ممكن نلقى دليل ، قلت ليه لا لا لا م ح تلقى لانهم مسحوا كل الأدلة و ببساطة ثبتوا التهمة في والدتك حاول قدر قدرتك تماطل في القضية لحد م تقدر تمسكهم كلهم و تخليهم يعترفو غصب و اكيد عندهم زول ح يختار يقول الحقيقة ولا ينسجن، قال لي عفوا ح اعمل مكالمة ضرورية خليك مستنية هنا ، مشى و فضل يتكلم لحد م زهجت و الوقفة طالت و ماف حتة كدا الزول يقعد فيها و هو عديم الزوق بدل يقول لي اتفضلي المكتب قاعد ينضم هنا لقيتو اتلفت عاين لي و رجع واصل كلام فصل الخط قال لي اسف بس برتب مع اخوي في خطة نقبض بيها شاهندا و جماعتها اتفضلي جوا ، قلت ليه لا ح امشي و كل العندي قلتو ، قال لي شكلنا ح نتلاقى كتير تاني ، قلت ليه كلها احتمالات ، ابتسم شوية و بعدها قال طيب لو طلعت م مشتركة معاهم ، قلت ليه قصدك مرت ابوك ، هزا راسه ب اي قلت ليه نخطف مرت ابوك و نجبرها تعترف مع اني م عارفة تفاصيل الجريمة بس مستحيل زول يكتل زول و م يكون في زول عارف الحقيقة اكيد ح يكون في شخص عارف و مشترك في الجر'يمة ، قال لي فعلا اتمنى م نضطر نصل مرحلة الخطف دي لانو لو فاض بي ح اخطفها و م ح اتردد ، ابتسمت و قلت ان شاءالله بس مرت ابوك دي ولا زعلانة على موته و دا براهو موضع شك يلا سلام ، مشيت بخطوات بطيئة لاني لقيت نفسي م شايلة قروش ترجعني و مستنية يعرض علي توصيلة بس م حصل اتصلت على امي م ردت تلقاها مشغولة بالودع طوالي لفيت رجعت لقيتو بتكلم تلفون ، عاين لي ب استغراب فصل و قال لي نسيتي شي ، قلت لي قروشي ..احم قروشي وقعت مني و م لقيتها قلت يمكن وقعت هنا. قال لي م ح تلقيها بعد دا تعالي اوصلك، قلت ليه ياريت ، وصلني للصالة لانو لسه مراسم العرس م انتهت شكرتو و نزلت بعد الفطور و لحد م عملو الزفاف و الجرتك و زفو العروس و شالوها كنا قاعدين بعدها رجعنا البيت شلت عفشي و ح ارجع لانو ابوي محذرني ارجع يوم الجمعة و الا م يحصل خير يكون الغسيل اتردم جبال بس كانو احلا تلاتة ايام بدون غسيل ، ودعت ناس البيت و شلت فريع الوردة معاي لقيتو نبت و عمل حبة جذور ابتسمت و طلعت لقيت عادل في الشارع و حلف الا يوصلني و انا حاسة التوصيلة دي م لخير نهائي

الفصل الحادي عشر من هنا