رواية بسمه مدفونه في خيالي~للكاتبة ضاقت انفاسي الفصل الثاني 2 - بقلم BlackButterfly002

السلام عليكم ...ملاحظه لمن يقرأ لي لاول مره ..اود التنبيه على ان هذه الرواية مرتبطه بروايتي الرابعه احكي غيابا مزق الوجدان ...ارجو الرجوع لها حتى تكون الأحداث والشخصيات واضحة للجميع ...
بالنسبة للتنزيل انا رح انزل البارتات شبه يوميا لكن بارتات قصيره ...هالمتابع إلي ما تشبع فضوله البارتات القصيره بعينه الله ينتظر لنهاية الاسبوع ويشوفها مره وحده :)

البارت الثاني

جالس بالصالة ويهز رجله بعصبيه ......ناظر الساعه وصك على أسنانه بقوة ...مسك الجوال واتصل فيهاوبنبره غاضبه : وينك للحين
ام فياض بهدوء: وش فيك معصب دقائق ونوصل
رد بقهر مكبوت من امه : صلينا المغرب وانتم تقولون الحين نرجع
ام فياض تقاطعه : طيب طيب دقائق ونوصل!
قفلت الخط وناظرت الجازي إلي الضيق باين بملامحها : وش قال !
ام فياض بلا اهتمام : يعجل فينا !
الجازي بضيق : والله تأخرنا اكيد ما اكل وهو ينتظرنا !
ام فياض :-قلت له ما ينتظرنا بالاكل بس ما ادري وش فيه عقله صاير كذا!
وبعدين ما تهتمي ولدي فياض متفهم وعارف انه لازم نزبط امور الزواج !
ليان ناظرت امها : لو ابوي ما عملت فيه كذا !
ام فياض بابتسامة: وش جاب ابوك العصبي لولدي حبيب قلبي الوديع!
الجازي قلبها ما هو مرتاح : متى نرجع !
ام فياض :،شوي نكمل الشغل كل يوم حنا طالعين !
الجازي باعتراض بس
ام فياض : خلينا نكمل اشغالنا وبعدها يصير خير !
جلست تنتظر عمتها ومتوتره، عفست ملامحها وهي تشوف اسم فياض يتصل فيها ...زفرت بقهر من عمتها أكيد الحين فياض زعلان منهم ...ما عندها القوة ترد عليه !
رجع اتصل مره ومرتين وثلاث !
اضطرت ترد عليه نطقت بتردد :،الو
تكلم بنبره حاده : انت وينك !
ردت بتوتر : لحظه ننتظر عمتي تكمل شعرها
قاطعها بقوة: بعدكم هناك !
اذن العشاء وصلينا !
انتم على مين تستهبلون ...اسمعيني مسافة الطريق وتكونوا منزرعات باب الزفت !،
ناظرت الجوال لما قفله بوجهها !
ناظرت ليان والغصة بحلقها : فياض على الطريق جاي يأخذنا !
ام فياض بضيق : وش فيه اليوم ؟!
كان تركنا نكمل !
الجازي تجهز أغراضها : يا عمتي خليها مره ثانيه !
ليان توافقها : وانا اقول كذا !
وقفوا برا ينتظرونه والجازي تحس الدموع تنذر بالنزول ...ما تعرف ليه متضايقة هالكثر!
تحس نفسها تعمل امور ما تبغاها عمتها تحرجها كثير !
وقفت سيارة فياض ركبت السياره بهدوء ....حرك السياره ويا دوب السلام طلع من حلقه !
باين انه معصب !
ناظرت من المراية تشوف ملامحه ........الصمت يغلفه ما تعرفين اذا هو معصب او لا !
ام فياض انشغلت تتكلم بالجوال وليان تطقطق بالجوال مع خطيبها !
صدت لجهة الشباك تناظر للخارج والهدوء يغلفها من الخارج !
اول ما وصلوا البيت ودخلوا الصالة تكلم فياض بملامح اول مره تشوفه كذا : هذه اول مره وآخر مره تطلعين يا جازي مع امي !
اانا مب طفل صغير تضحكون علي دقيقة دقيقه دقيقه !،
هذا حنا صلينا العشاء وانتم من صباح ربنا جالسين بالزفت !،
الجازي تبرر موقفها : ءءانا
رفع اصبعه بملامح مقهور : ما ابغى اسمع ولا حرف
تدري انها غلطانه وما تلومه على زعله نطقت : انا اسفه اجهز العشاء الحين
قاطعها بقهر : جعلني بالسم ان ذقته !
ناظرهم بقهر وطلع من البيت !
ام فياض واقفه تناظر الموقف بدهشه : هذا فياض !
اول مره اشوفه كذا معصب !
ليان بحق : والله معه حق يزعل كل شوي تقولون دقائق !
المفروض تقولوا حنا مطولين تبغى زوجتك تعال خذها
مب تسحبون عليه كذا !
ام فياض بندم : ما توقعته يزعل كذا !
الظاهر اني اصبته بالعين وصاير مثل أبوه !
الحين اتصل فيه واراضيه !
مسكت الجوال واتصلت فيه سرعان ما عفست ملامحها ...ناظرتهم : مغلق !
انا ما ادري ليه معصب كذا !
لو اخذنا الجازي بدون علمه معه حق يزعل بس دامها طالعه بإذنه وشهوله يزعل !
ليان تكتفت : اعطاها الاذن لوقت ما يرجع من الشركه تكون موجوده مب تنام هناك !
ام فياض تنرفزت منها : اقول انقلعي على غرفتك احسن لك بلا هذه الهذره الزايده !
ليان مطت شفتها وتوجهت للغرفتها وهي تردد: كلمة الحق ينزعل منها !
كشت عليها ام فياض ورجعت ناظرت الجازي : لا تتضايقي يا ابنتي ولدي وانا اعرفه ان زعل ساعة ساعتين ويرجع والوضع طبيعي !
هزت راسها الجازي بصمت والضيق ظاهر على ملامحها ما قدرت تخفيه : حصل خير !
استأذنت وتوجهت لجناحهاوهي تمسح دموعها بخفه-!
اول ما دخلت اخذت نفس عميق ..بلعت غصتها و الرؤية عندها ضبابيه من الدموع !
مسكت الجوال بتردد اتصلت عليه ..زفرت بضيق جواله مغلق وين راح !
ما تحب احد يزعل منها !
خاصة فياض ما قصر معها من اول زواجهم للحين ...ما تحب تكون هي الطرف المقصر !
جلست بالصالة تنتظره اكيد رح يرجع وتفهمه موقفها لعله يطيح الحطب إلي برأسه !
**
**
**
جالس مع ربعه والهدوء مخيم عليه ...ما يذكر متى اخر مره جلس معهم..من لما تزوج الجازي صار بيتوتي ما يطلع الا معها او مع اهله !
رفع حاجب وهو يشوف جواد يناظره ..من زمان ما التقى فيه اخر مره لما انكسرت رجله وبعدها انقطعت العلاقة!
مط شفته بسخريه من هالدنيا إمرأة فرقتهم !
جواد بنبره مبطونه : عاش من شافك !
ليردف واحد من الربع ببراءه : من شاف احبابه نسي اصحابه !
من لم تزوج ما عدنا نشوفك !
الله يرزقنا !
جواد كتم قهره وللحين بقلبه القهر تكلم بنغزه : اجل الظاهر مطرود من البيت دامه جالس هنا !
فياض زاد قهره من جواد مشكلته يغار عليها من نسمة الهواء رد وهو يحاول ما يظهر قهره وغيضه : مب انا إلي تطردني حرمة وتخليني مسخره للي يسوى وما يسوى !
اعطى جواد نظره يذكره لما كان يخبره وش كانت تعمل فيه الجازي
جواد شد قبضة يده قبل ما يقوم ويسددها بوجه فياض !
مط جواد شفته بنغزه : مب رجال إلي تمشي الحرمةرايها عليه وتعمل إلي تبغاه غصب عن خشمه!
ناظره واحد من الربع :احسك تضرب نغزات
هز كتوفه ببراءة جواد : انا !
ابدا بس اذكر انه واحد من معارفي سابقا كان يقول مستحيل يسمح لزوجته تعمل ولو تشوفه الحين زوجته تشتغل مع الرجال واختلاط و غصب عن خشمه !
تابع كلامه بابتسامه ساخره : والله حاله !
فياض يغلي غلي من جواد مسك نفسه لاخر لحظه ورد بهدوء :،-اكيد انه واثق منها لو حطها بين الف رجال ما نبض قلبها لغيره !
لانها ما تشوف رجال بالدنيا غيره !
وقف جواد والقهر واضح بعيونه وبنغزه: اروح اشوف عيالي افضل لي !
فياض فهم نغزته انه للحين ما حملت الجازي ...رد بخبث : إيه تطمن على عيالك وبالاخص مريوم هذه البنت احبها تذكرني بالغوالييييي هههههه
اعطاه جواد نظرات قاتله وطلع من المكان !
ناظره واحد من الربع : انتم وش فيكم !
اذكركم ربع واحباب وش إلي تغير!
فياض يستلقي على الارض وبنبره عميقه: كل شيء بالدنيا يتغير !
مافي شيء يبقى على حاله !
دنيا العجايب !
*
**
**
**
جالسه الصبح مع عمتها يشربون قهوة والصمت يخيم عليهم !-
دخل بخطوات هاديه ناظر امه ورد السلام بصوت منخفض !
رفعت حاجب وهي متأكده هالسلام لامه وبس !
حتى ما ناظرها !
ام فياض ما ردت السلام وصدت للجهة الثانيه !
عقد حواجبه : اشوف ام فياض زعلانه !
ام فياض بزعل: إيه زعلانه !
ما تكلمني
حضرتك تطلع من البيت وتقفل جوالك !
طول الليل وانا انتظرك!
والا تبغى تمشي طرق ابوك لما يعصب ويزعل !-
ابتسم بدون نفس : ترى يمه انا لي الحق ازعل !
ترى سالفتك ما تنقال!
جلس عند امه رضاها من رضا رب العالمين وما يقدر يزعلها !
الجازي بالرغم من ضيقها من تجاهله لها ..مشكلتها ما تعرف تزعل من احد ..صبت له القهوة ومدت له : تفضل !
اشر يده بالرفض : ما ابغى !
حست بالفشيله من تصرفه ..ناظرت عمتها إلي تكلمه : لا تشرب يا فياض لكن صدقني لساني ما يكلمك !
زفر بضيق وناظر يدها الممدوده له وبإكراه اخذها وضعها امامه !
رفعت عيونها للسقف تحاول تمنع الدموع تنزل !،
تحس سكاكين بحلقها !
ام فياض ناظرته : اليوم رايحه للصالون نكمل تجهيزات أختك باكر الزواج وما بقى وقت !
رد بحزم :الله معك بس الجازي لا
ناظرته الجازي وهو يكلم امه إلي يسمع يقول ميته على الطلعه !
ما تحب اسلوب التحكم هذا يذكرها بجواد !-
ام فياض مطت شفتها : مجنونه اخذها ما خليتني اخذ راحتي وينكم وينكم ! هذه زوجتك عندك !
مسكت فنجان القهوة تشغل نفسها فيه ...رفعت نظرها لعمتها وابتسمت بألم وهي تتكلم :-انا طالعه الحين ما اوصيك على البيت انتبهي على الشغاله وخليها تنظف زين !
ردت بهمس :ان شاء الله !
غادرت ام فياض المكان وعم الصمت للحظات ....تنهدت وهي تشوفه منشغل بالجوال وما ذاق القهوة !
تكلمت بصوت حاولت يكون هادي :اجهز لك الفطور !-
تجمعت الدموع بعيونها ما تحب احد يعاملها كذا ...ما عبرها ولا كأنها تتكلم !
عضت على شفتها ومسحت دمعه تسلسلت على خدها : فياض !
رفعت نظرها له لما وقف وغادر المكان بهدوء !
انقهرت من تصرفه على الاقل لو يصرخ يتكلم يعاتب ما هو كذا يتجاهلها بهذا الشكل !
رن جوالها شافت رقم ابوها ....اخذت نفس عميق وفتحت خط : الو !
وليد بحنان : مرحبا ..كيفك
ردت من خلف قلبها : بخير يبه ..وش اخباركم !
وليد بهدوء تكلم : الله يسلم حالك ..ءء اسمعيني زين ...انا تواصلت مع اهل امك وتوصلت انك تشوفين مريم كل اسبوع
غمضت عيونهاالجازي بألم من هالمريم إلي تكبر يوم بعد يوم بعيد عن عيونها !
مر تقريبا سنة على اخر مرة شافتها !
مشتاقه لها لكن بنفس الوقت خايفه !
ما تبغى تشوفها وتنكسر زياده برفضها لها !
وخاصه بهذا الوقت النفسية بالحضيض !،
وليد : جازي انت معي !،
ردت بمراره : ما ابغى اشوفها وترفضني وبعد
قطعت كلامها وهي تبكي خلاص ما فيها تتحمل اكثر
وليد بضيق : لا تخافين من هذه الناحية البنت متقبليتك لا تنسين انهاكبرت الحين سنة وعقلها تغير بس في مشكله
ردت وهي معقده حواجبها وبصوت باكي : وش هي !
وليد تنهد : ابوها رفض إنها-تزورك في بيتك يعني تشوفينها في بيتي !
غمضت عيونها بعجز فياض ما يكلمها كيف تقول له ....ويمكن يرفض ما تدري وش تعمل !
ردت بروح ميته :انتظر ينتهي زواج ليان وبعدها يصير خير
وليد : وانا قلت لخالك كذا نرتب الوضع بعد زواج ليان !
انهت المكالمه مع ابوها ..وبدأت دموعها تسقط معقول تنفتح لها الدنيا وترجع مريم لها !
راضيه يوم واحد بالاسبوع على الاقل تروي شوقها بشوفتها لو مره وحده بالاسبوع !
*•
•
**

ناظرت جدتها بضجر وهي شوي و تبكي : هو وش دخله حتى يقول لاااا !
ام مرعي ترتب البضاعه : اقول انكتمي يا حبك للحوم والطلعات!
مطت شفتها بطفوله : يرضيك يا جدتي اطلع قدام صديقاتي كذابه
قلت لهم رح نسافر للمدينة !
ام مرعي رفعت حاجب : ونسافر بعد !
عسى قلت لهم رح تسافرين بالطيارة !
يا حبك للمفاخرة !
رونق بقهر طفولي : جدتي لا تقهريني!
خلاص نروح انا وانت ومروان وبس !
ام مرعي بضجر : يا ربي من هالثرثاره !
انا يا دوب احفظ طريق من هنا لبيتي تبغين اروح للمدينه لوحدي
ردت وهي تدق على صدرها بثقه : انا يا جدتي معك !
هذاانا الف القريه شبر شبر
قاطعتها ام مرعي : لا حول ولا قوة الا بالله !
اسمعي من الاخر انا رايحه مع عمك وانت انطقي هنا مع بنات عمك لوقت رجوعك !

ضربت الارض برجلها : اكرهكم !
ايه قولي تبغين تروحين لمدينة الالعاب لوحدك انت وعمي تلعبون!
فتحت عيونها : انت وش عرفك بمدينه الالعاب!
مطت شفتها : اشوفها على تفزون « التليفزيون »
وش قلت يا جدتي نروح معك !
ام مرعي وهي تناظر حريم متوجهات لها : قفلي حلقي ويا ويلك لو نطقتي حرف واحد !
وانتبهي على اخوك شوفيه يا زينه دوم ساكت وهادي ماهو مثلك بالعه راديو
رونق ناظرت جدتها وضحكت بطفوله : حريم يقولون عنك حشى هذه دوم تنبح مثل الكلبة
تأوهت رونقمن مكان الضربه : يوجع
ام مرعي بقهر: والله ما احد كلب غيرك انت والكلبات إلي إلي تجلسي معهم !
بدل ما تدافعين عن جدتك يا الخايسه !
ضحكت رونق بطفوله : والله ادافع عنك اقول لهم والله صوتها يشبه صوت بق
ابتعدت عن جدتها لما خلعت النعال :لاااااا
ام مرعي لما وقفواالحريم عندها نزلت النعال وبتوعد : والله والله الا تجلسين في بيت عمك مع لجين الخايسه !،
فتحت عيونها بطفوله مستنكره : لااااا جده
سكتت بقهروهي تشوف جدتها انشغلت مع الحريم !
ما تبغى تجلس مع لجين عفست ملامحها بقهر وهي تتوعد ....والله الااسافر للمدينه وبالطيارة
بعد !

ام مرعي ناظرت زوجة ولدها بتحريص : اانتبهي على رونق واخوها !
ردت بابتسامه : بعيوني يا خالتي!
مثل عيالي !
مرعي بضجر : خلصيني يمه فكينا من هالمسلسل تراها هالرونق جنيه !/
ام مرعي تنهدت : خلها كذا قويه تأخذ حقها وما تكون خبلة مثل بناتك تراهم باطات كبدي !
مسك يد امه للخارج : الحين اذا فتحت هالسيره وش ينهيها !
ام مرعي بغت تودع رونق لانها متاكده انها زعلانه منها بس من عصبيه مرعي سكتت وطلعت معه للخارج وهي تدعي ربها يحفظهم لها !
ناظرت البكم ولدها له مقعد من الامام ومن الخلف صندوق يبيع فيه احيانا خضار !
ركبت وهي تردد الاذكارانه ربها يحفظها من كل مكروه !متكورة تحت أغراض بالصندوق حتى عمها ما يحس عليها ويرجعها البيت ..رح تنتظر حتى يبعدون عن المنطقه !-
تأففت وهي تحس الحر ذبحها !
متى يوصلون !
بعد مسافه رفعت راسها بشويش ناظرت عمها يناظر للامام وجدتها نايمه !
تنهدت اكيد ا رح ينتبه لها ورح يظنها من كوم الاغراض إلي بالسيارة !
ناظرت حولها صحراء وما في شيء !
ياااااه متى توصل المدينة !
فرحانه حيل ما هي مصدقة انها رح تعيش بالمدينه لو ليوم واحد ! وقفت لما شافت سيارة كشخه كبيره تلمع لمع ..لوحت بيدها بطفوله : مرحبااااااااا
سكتت وتمسكت بقوة لما وقف عمها السياره ..نزل بغضب وهو يصرخ : انت وش تعملين هنا !
حست نفسها تورطت ناظرت جدتها إلي نزلت من السيارة وتكلمت بغضب : انا بحياتي ما شفت بنت مثلك!
مب قلتلك انطقي في بيت عمك !
مرعي بغضب : وش تعملين عندك يا زفتة !
مطت شفتها بتورط وبترقيع: ءءء عمي انا كنت العب هنا ونمت بالصندوق صحيت لقيت نفسي هنا !
سحبها بقوة ونزلها :،يالكذووووب !
هذا راسك العنيد ما احد يكسره غيري !
الحين رح ارجع
قاطعت اممرعي :وين ترجع ما بقى شيء ونوصل اتركها الحين!
ضربها بيده على راسها : انقلعي اركبي عند امي !
اوجعتها الضربه بس مستعده تتحمل من اجل انها تشوف المدينه !
توجهت وركبت مع جدتهاإلي قرصتها بقوة :يا قو راسك !،
مسحت مكان القرصة و لمعت عيونها بالدموع لكن متحمله من اجل تحقيق هدفها : خلاااص يا جدتي !
ترى ازعل الحين
مرعي رجع ضربها على راسها بيده :والله قلبي مليان عليك ..انا بزر تكسر كلمتي !
ام مرعي بنهر :اتركها يا مرعي لا تضربها ،
لا تنسى انها يتيمه!
مرعي هز راسه بتوعد : يصير خير !
مسحت دمعه نزلت على خدها ..اشرت بيدها بضحكه طفوليه: جدتي ذيك بيوت حلوة !
وصلنا المدينه؟!
ام مرعي مسحت على راسها : ايه وصلنا !
طلعت رأسها من الشباك بفرح وهي تؤشر بيدها : مرحباااااا
حست بشعرها ينسحب للداخل وصوته يرعد : دخلي راسك فضحتينا!-
عفست ملامحها بعد ما ترك شعرها !
ناظرت جدتها بقهر : جدتي
ام مرعي طنشتها وبهدوء تكلم ابنها: الحين وين نروح !-
ناظر ساعته :أكيد على المستشفى والا برايك على فندق خمس نجوم !
والله حاله !
ام مرعي مطت شفتها وما ردت عليه احيانا ما تلومه ةلا تعتب عليه عنده 16 وغير أحفاده وكل يوم وحده من البنات زعلانه ....وعياله ما كأنهم شافوا الخير مثل المفاشيح ما يشبعون !
مسكين من صباح ربنا يطلع يراكض حتى يحصل لقمة العيش !
كل حياته شقى بشقى !
تنهدت بضيق وهيتدعي ربها يفرجها عليهم من الفقر إلي محاصرهم !-
رونق تطالع من الشباك وكأنها مسحورة : شوفي يا جدتي تجننننننن !
احس نفسي بحلم !
جدتي شوفي ذاك البيت تخيلي نسكن في بيت مثله !
مرعي : استعفر الله!،
مطت شفتها بقهر من هالعم مثل الشوكة بالبلعوم!
فتحت فمها بانبهار لما وقفوا عند المستشفى:جدتي رح نعيش هنا !،
وبتذكر :،يممممه نسيت مروان مااخذناه!-
عمي خلينا نرجع ونجيب
قاطعها بصرخة:انكتمي!
جلست بصمت وقلبها يدق خوف من صرخته العاليه !
وقف السيارة بالمواقف ونزل وهو ينتظر امه تنزل !
*
**
*•
**
ام فياض طالعتها : مب على كيفك !
كيف ما تروحين للصالون!
ترى اليوم الزواج !
الجازي عفست ملامحها بألم : تعبانه يا عمتي وما لي خلق لشيء !
ام فياض باهتمام : وش يوجعك !
هزت راسها بالرفض واشرت بعيونها تسكت لما دخل فياض الصالة !
سكتت ام فياض وهي شاكه انه فياض إلي مانعها رح تعرف بطريقتها : هلا يمه !
فياض بهدوء:هلا فيك!
ام فياض تحس نبضه: وش رايك تأخذني للصالون
قاطعها بهدوء : ان شاء الله !
وناظرت الجازي ؛ للحين مصممه انك تروحين !
الجازي ذبحها مغص بطنها هي شاكه بالحمل بس خايفه تكون حساباتها غلط !
ناظرت عمتها بتعب : ابغى اروح للمستشفى !،
ام فياض باهتمام: وش يوجعك!
شدت على بطنها وهي تتكور : بطني حاسه انه يتمزق
فياض وقف وهو يناظر امه والقلق باين عليه :
خليها تجهز وانا رح اشغل السياره بسرعه
تناظر انحاء المستشفى بانبهار : واووووو
جدة ليه ما نعيش في المستشفى هنا يجنن !
ام مرعي منشغله مع حرمه جالسة معها بصالة الانتظار : ايه ايه فهمت وزوجك ليه ما وقف ضد اهله !
رونق بضجر هزت جدتها : جدتي ردي علي خلينا نسكن هنا !
ناظرتهاام مرعي ثواني ورجعت تكمل السالفة مع الحرمة
مطت شفتها بضجر من تطنيش جدتها لها
وقفت وهي تناظر صالة الانتظار مزدحمه من كثرة المراجعين ...قررت تستكشف المكان !
ابتسمت لنفسها وبدأت تتجول في المكان وعيونها تتأمل المكان بانبهار !
شافت طفل واقف ومعه علبة بيبسي حست لعابها نزل....لو تموت جدتها ما اشترت لهم بحجة انه مضر بالصحة وهي متأكده حتى ما تدفع لهم ...تقدمت منه بابتسامة جميله ...سحبت العلبة من يده بشويش : اعطيني اذوقها لك قبل ما تشرب منها يمكن طعمها خايس
شربت منها باستمتاع ياااااه طعم لا يقاوم !
مدت له العلبة : خذ !
ناظرها بانقراف : يع ما ابغاها !
تركها وغادر! مطت شفتها باستغراب ما يهمها الاهم انها حصلت على كنز ثمين : بيبسي !
بنظرها يا حلاة المدينه كل شيء فيها متوفر!
ضمت يدينها حول العلبه بحرص كبير وكأنه ذهب بيدينها !
سمعت صوت جدتها تنادي عليها بين هالزحام ...هزت راسها بعفويه وكأنها تشوفها ....ركضت بسرعه لما تذكرت عمها مرعي ان رجع وهي مب موجوده رح يضربها لانه حرص عليها ما تقوم من مكانها !
ركضت وبالغلط ارتطمت بشخص كبير ....ما همها شيء كل عيونهاعلى علبة البيبسي لما طارت من يدها وانسكبت على الارض !
جواد يمشي مستعجل بعد ما خبروه انه جده تدهورت حالته الصحيه !
حس شيء صغير اصطدم به !
جن جنونه وهو يشوف البيبسي على بنطاله !
ما ركز مضبوط ما لمح الا طفله صغيره و ملابسها القديمه دفها بقوة من امامها والغضب وصل الف وعيونه بس مركزه على البيبسي الي على البنطال نطق بغضب : الله يأخذ ابوك يا بنت الحمار! حثاله !
ترك المكان بدون ما يلتفت للخلف ويشوف الطفلة إلي تحطمت كل فرحتها بعد ما انسكبت العلبة كلها على الارض !
ما اهتمت لما دفها على ا الارض كل همها العلبه اهم شيء العلبة ما يصيبها شيء !
رفعت العلبة عن الأرض وناظرتها وهي فاضيه !
حست كل آمالها تحطمت !
وقفت بقهر وناظرت الشخص إلي ابتعد عنها ....ركضت خلفه بغضب ..اقتربت منه وبسرعه ضربته بالعلبه واستدارت هاربه منه !
حس بالضربه ...ناظر العلبه على الارض بعد ما اصطدمت فيه ...التفت شاف الطفله تركض بسرعه بملابسها القديمة بدون ما تناظر للخلف ! ما له خلق للبزران
ما رح يحط عقله بعقل طفله بعمر عياله !
اقتربت من جدتها وهي تركض ....اخذت نفس عميق لما التفتت للخلف وما شافت احد خلفها !
سرعان ما تأوهت لما شد شعرها مرعي : مب قلت لك لا تتركين جدتك !
ام مرعي فكت يده : اتركها!
متى دورنا !
مرعي بضجر : حتى تكملين تحقيق مع كل الحريم بالقاعه ما تركت حرمه الافتحت معها سيرة جدها الاول !
ام مرعي جلست بضيق : وش رايك اجلس منخرسه الف سنة حتى يطلع دوري!
مرعي : على الاقل انتبهي على البزر إلي معك!
ام مرعي شدت رونق من اذنها : اجلسي هنا يا ويلك اذا تحركت !
رونق تحس امور تجمعت عليها لما دفها الرجال و البيبسي إلي فقدته وعمها إلي شد شعرها !
وبدون سابق انذار بدأت تبكي بصوت منخفض !
اكثر شيء احزنها فقدانها للبيبسي !
ام مرعي حست بالذنب :مسحت على راسها لا تبكين !خلص انا رح ا شتري لك إلي تبغينه !
روزنق وهي تمسح دموعها : ابغى بيبسي
ام مرعي مطت شفتها : يا زين البكاء والدموع يغسل العين ..ابكي يا قلبي الحين ترتاحين !
رونق ببكاء : ل ابوي عايش كان اشترى لي !
ام مرعي مطت شفتها :،يا رونق تراه مضر
ابو مرعي وهو يجلس : اشتري لها بلاه يكون بنفسها وتموت علينا !
ام مرعي مطت شفتها: لو الفلوس منك ماقلت هالكلام !
مرعي بضجر: يا كلمة ردي مكانك !
متى يطلع دورك وارتاح !
**
**
••
جالسة مستلقيةعلى السرير بتعب بعد ما اعطوها ابره تثبيت الحمل !
تحسست بطنها بشويش ..ما تبغى تفرح وبعدها تنتكس،!
ام فياض والجوال على اذنها ما تركت اح د من معارفها الا خبرته !
حنين بفرح تناظر الجازي: الحمد لله الحمد لله !
مب مصدق ياااه واخيرا!
الجازي ببرود:-ربك كريم !
حنين بحرص : انتبهي تتحركي!
دوم كوني مرتاحه !،
دخل فياض بهدوء بملامح مريحه كان خايف من سالفة عدم حملها ..ناظر امه وابتسم : ما بقى وقت كنت مستعجله تجهزي نفسك للحفلة !
ام فياض بفرح : والله من الفرحة نسيت !
كملت الاجراءات
هز راسه بتأكيد : كل شيء جاهز
ناظر الجازي وابتسم : هاه يا ام وسيم مرتاحه!
الجازي ابتسمت بضيق : الحمد لله !
مد يده يسندها : بشويش ترى الحمل ضعيف انتبهي!
حنين بابتسامة وهي تشوف فرحة فياض : ان شاء الله ربنا يتمم على خير ويجيكم وسيم !
الجازي من قلبها امنيتها يكون عندها طفل وتربيه تحت يدينها : امين !
مسحت دمعه تسللت من طرف عينها !
فياض بضحكة : بدت الدموع !
دفته بيدها بخفه : اسكت !
مسك يدها وهو ما زال يضحك : اهون عليك يا جازي !
ام فياض بعجله لما ناظرت ساعتها : ما بقى وقت خلصوني انا ام العروس ولازم اكون اول الحضور !
يلا يا جازي على الصالون
قاطع امه بحزم : لهنا وكافي بلا زفت وخرابيط !
حنين بتأكيد : خليها ترجع للبيت وترتاح ما له داعي تحضر !
ام فياض : كيف ما تحضر ابناس تسألني وين زوجة ولدي الوحيد
فياض بضيق : ما خرب عقولكم الا الناس وش تقول !
انا وقت الحفلة اجيبها
قاطعته الجازي بعبوس : تعبانه ما لي حيل احضر شيء
ام فياض بتفهم : على راحتك اهم شيء صحتك !
ابتسم لها وتوجه لخارج الغرفة وهو يهمس لها بكلام والجازي تبتسم !
ام فياض وحنين مندمجات بالكلام عن امور الحفلة !
فياض وهو يعدل لها نقابها حتى ما تبان عيونها : غزال وربي عيون غزال!
قطع كلامه لما وقفتهم حرمه كبيره بالسن : شفت يمه بطريقك قردة صغيره هنا !
عقد حواجبه : قردة !
ام مرعي وهي تناظر حولها : اقصد بنت صغيرة لابسه فستان احمر
قاطعها : ما شفت احد
ناظر جهة المصعد لما انفتح لمح بنت لابسه فستان احمر منشغله بالمصعد والظاهر انها تلعب!
اشر بيده : ذيك !
لمحتها ام مرعي قبل ما يقفل المصعد : روناااااق
الله يأخذ عدوها !
هذه كيف احصلها!
عز الله الا يدفنها مرعي هنا !
اخخخ يا رجولي ما لي حيل اراكض خلفها !
الجازي ناظرت الحرمه وحزنت عليها...فياض تنهد بضيق اكره ما عليه الطفل المشاكس : انتظري هنا انا الحين اجيبها لك !
ام مرعي بفرحه : الله يفرجها عليك ويرزقك من حيث لا تحتسب !
هز راسه وتركهم !
ام مرعي ناظرت الجازي : اخخخ اخر عمري اراكض خلف البزران !
الجازي ناظرت امها وعمتها إلي وقفوا جنبها وبعدها سالت الحرمه : هي حفيدتك !
ام مرعي بحزن : هذه ابنة ولدي الله يرحمه مات وهو وزوجته وترك خلفه هالقرده واخوها !
شيبتني هالبنت !
ما تعرف تسكت لسانها وش طوله !
اعوذ بالله استغرب انه بنت بعمرها هذا تتكلم كذا !
تعرف كل شيء هذه جنيه!
دوبه عمها ضاربها ومحرص عليها ما تتركني !
غافلتني الحيوانه الحين وش اقول لعمها !
حنين بهدوء: الحين يلاقيها !
ام مرعي : نسيت اعرفكم بنفسي انا ام مرعي !،
ام فياض بلااهتمام وعقلها بالحفله : حياك الله !
وبدات ام مرعي بعادتها ولقافتها ما تترك شيء والا تسآل عنه !
***
***
***
طلعت من المصعد ووقفت قباله وهي ناويه ترجع تركب فيه ...ناظرت علبة المثلجات إلي بيدها ...ورفعت لفمها وهي تأكل فيها وكأنها تشرب مويه !
خلصت العلبه وهي مستمره حاطيتها بفمها حتى تتأكد انه ما بقى فيها !
بدأت تحط اصبعها بالعلبه وتلحس فيها بحياتها ما ذاقت بطعم هالبوظه ما هي مثل البوظه إلي عندهم بالقرية طعمها خايس !
تقدمت من المصعد وضغطت عليها حتى يفتح وترجع تركبه عجبتها ذي اللعبه !
حست بيد كبيره مسكت يدها بقوة : انت وش تعملي هنا !

انتهى البارت انتظروني غدا الاثنين بإذن الله ..دمتم بخير