رواية بتندمين يا بنت والسبب نظرتك هذى الفصل الثامن عشر 18 - بقلم غير معروف

وصلـت روضـه المستشـفى ..
.
ونـزلت بـ سرعه وهي متوجـه لـ مكتب الدكتور هزاع ..
.
دقت الباب وهي مثبتـه نظرها للارض ..وحدرت : السلام عليـكم ..
د.هزاع و ........ : وعليكم السلام والرحمـه ..
.
اول ماسمعت الصـوت بـ سرعه البرق رفـعت رأسها وانصدمت من اللي
جدامـها .. وبنبره صدمـه : هذا شو يسوي هنـي ..؟
وهي تـأشر ع الريـال اللي قاعد بـ الكرسي ويرمس الدكتور هزاع ..
الدكتـور هزاع : مم تفضلـي روضـه ( وهو يأشر ع الكرسـي) ..
روضـه بـ عصبيه : لا مابتفضـل .. اول قولي هذا ( وتأشر عليه بأشمئزاز ) : شو يسوي هنـي ..؟
د . هزاع : روضـه بلاج .. هذا ولـد عمج وهو ياني وقالـي انج انتي بـ نفسج
قلتي له عن كل موضوع مرضـج .. وانا بـأمانه مـا صدقته فـ البدايه بس
ظمنته يوم قالــي عن سالفـه مرضج كــامل .. يعني محد غيرج مفهمنـه ..
روضـه وهي تطالع ع الشخص الي قاعد بـ الكرسي ومنرسمه بـ شفايفه
ابتسامه جانبيـه : روضـه بلااج .. فقدتي الذاكره ..؟!
روضـه ماحبت توضح لـ دكتور هزاع انـه اللي جدامه مب ولد عمها وهذا
واحد جذاب ..
لانه اكيـد انه راح يفهم الموضوع غلـط وبـ يقول مرابـعه شباب ..وهذا اكيـد ربيعها ..
قعدت روضـه بـ الكرسي وقـالت وهي عيونها ع الارض : هـيه تذكرت ..
وصح انا قلت لـه عن الموضوع لانه وايد جريب منيـه ووانا اعتبره شرات اخويـه .. ( وابتسمت بـ خبث )
انقـهر منهـا الفيصـل وبـ القو بـعد وقـال : المهم دكــتور طمني احيـن ع روضـه ..؟!
فزت روضـه وقالت بـ خووف : الفيـصل معليـه خلاص انت فهمت الموضوع ..
ممكن تودرني شووي ويـا الدكتوور هزاع ..
.
الفيصـل وحس بـ احساس داخله يكوويه ..مايدري شو هـ الاحساس ..
بس كل اللي قدر يفهمه انه مستحيل يودرهـا ويـا واحد بروحهم ..
الفيصـل يـعارض : لا انا بتم هني واللي فـ خاطرج قوليـه ..
كتمت روضـه قهرها لاتفضح عمرها جدام الدكتور هزاع ..
وقـالت : برايـك تم .. انت شرات اخوويه ..
( ام عن د . هزاع فـ هو مستغرب بلاهم جيـه يتضاروبوون .. مب جنهم اولاد عم ) ..
ابتسم الفيصـل بـ خبث .. كان متأكد انه بـ هالطريقه راح يجبر روضـه
توافق يتم .. لانها اذا ما وافقت راح تكشـف عمرها .. يعني شرات
مايقولون زخها من ايدها اللي تعورهـا ) ..
.
رفـعت رأسها وطالعت لمده ثواني ع الفيصل وعقب حولت نظرها لـ
د.هزاع : مم اوك ..ليش طلبتووني ..؟!
د.هزاع : لانه بـ صدق ودون مقدمات ..تحاليلج ما تســــر ..
بـعلت روضـه ريجها بـ خوف من اللي راح يقوله وقالت : ليش شو استوى ..؟!
د.هزاع : انتي تدرين انا نحن طرشـنا تحاليـلج لـ ألمــانيـا .. وعقب فتره قصيره وصلتنا التحـالليل ..
روضـه انا مابجذب عليـج انتـي مريضـه بـ الثلاسيميـا ..
رفعت روضـه رأسها بـ خوف .. هي تدري انها مريضه بـ الانيـميا بس مب
عاد مره وحده ثلاسيميــا ..
وقالت بـ خوف : اي نووع من الثلاسيميــا اكيد انه اخف شي مب جيـه ..!؟
د.هزاع: مم الحمدالله انـج فيج ثلاسيميـا السـاكته .. لو كنتي مصـابه بـ
الهيموجلوبين اتش كنتي تبـ حتاين لـ توصيل دم .. لاسمح الله
طـالعت ع الارض بـ خيبـه وقالت بـ خاطرها : ياربيه ليش انحطيت بـ
هالموقف ..
ليش بـ الذذات الفيصل اللي قاعد يستمتع بـ سماع خبر شرات هـ الخبر ..
الفيــصل بـ هدوء : مم اوك ممكن نعرف شو اسبـاب تتطور المرض وشو هاي الثلاسيميا السـاكته ..؟!
طالعت عليـه روضـه بـ قهر " على انه انت شو لك ترمس هااه "
.
د.هزاع : فإذا أصابت الطفرة لاسمح الله مورث واحد فقط فأن الشخص لا
يصاب بأي مشكلة صحية و تسمى هذه الحالة بالألفا ثلاسيميا الساكتة
Silent alpha Thalassemia ..وفي العادة مايعرف الشخص انه حامل
لمورث معطوب وقد يصعب التعرف على هاي الحالة حتى عند إجراء تحليل
دم عادي وما يمكن الكشف علية إلا بعمل فحص لحركة الهيموجلوبين
الإلكتروني في الأشهر الأولى من العمر أما بعد هذا السن اللي هي فيـه
فـ يصعب اكتشاف ها الأمر إلا بالكشف على المورثات مباشرة،وهذه غير
متوفرة في الكثير من المراكز الطبية عسب جيـه كان عين العقل
يوم وديناها تحاليلها لـ ألمانيـا ..
لانه هناك الطب واايد متقدم ..
و روضـه بـ الفتره الاخيـره وايد هملت عمرها ..
( اول ماقال جيـه بسرعه رفعت نظرها عليــه ..)
وهو يكمــل : والظاهر ما التزمـت بـ اللي نحن موصينها عليـه ..
وفوق كل هـا واللي صج قهرني ..
الفيصـل بـ لهفه : شو دكتوور ..؟
روضـه كانت بتنش تجتلـه .. شو هـ الوقاحه شو يبا فيـها ..
د.هزاع: سمعت انها بـ الفتره االاخيـره ابتعدت عن العلاج اللي متعوده تشـربه ..
مما ادى الـى تسببها فـ مضاعفات .. لانه جسمها تعود ع العلاج ..
وتيي فـجأه وتقطعه هذا اخـطر شيء ..
.
( رمسـه الدكتوور كانت صـح روضـه بـ الفتره الاخيـره ابتعدت عن علاجـها ..
كل الابــتعاد والسبب الاول والاخيـر هو الفيـصل ..
لانه من ظهر لها وهي تركت كـل شي واستوى كل همهـا وتفكيرها بـ مشاكل الفيصـل ..
وردت لـه بعد مارد نــايف .. لانه هو كـان بـ روحـه واقف لها وقـفه .. وبـ شكارتها اللي موصيها عليـها ..)
.
الفيـصل مايدري ليـش حس بـ الذنب ..
كان بـ داخله احساس يقوله انه روضـه واللي فيـه هو سببه..
بس مسرع مابعد الفـكره عن بـاله ..
.
الفيصـل بتســاؤل : انـ ...... (قطعت عليـه روضـه ) ..!
روضـه بتغير الموضوع :مم اوك دكتور هزاع مشـكور ..
وحولت نظرها لـ الفيصل .. وقالت : الفيصل يلا ابا ارد البيــت ..!
( الفيصل ود.هزاع مصددوميـن لــحد آحيــن ..)
.
نشت روضـه عسب تووقف الحوار اللي كل ماله ويحد أكثر..
وقالت : الفيصل يلاااااا ..
نش الفيصل لآ اراديـا ومايدري ليش سمع رمستها ونش ..
وسار جدامها وهي تمشي وراءه ..
لفت بسرعه على وراء وسوت بـ ايدها حركه لـ دكتور هزاع على اني بدق عليك عقب ..
ظهرو الفيصل وروضـه .. وصكت روضـه الباب وراءهــا ..
وتجدمت الفيصــل وتركتـه بروحـه ..
وهي تمشـي بـ ممر المستشـفى بـ كل ثقه وشمووخ ..
.
الفيصـل اتيبس بـ مكأنه من الصــدمه ..
وتووه بس ينتبـه لـ للحركه اللي سوتها فيـه ..
امرتـه انه يظهر من المكـتب وعقبها تركـته جنه حتى مب كان ويـاها ..!
.
كــان بيرد وبيحدر المكتـب ..ويجسر كلمتـها ..
بس حس على نفسـه وقال : هذا هي اللي تبـاه تبـا تشوه سمعتيـه جدام الريـال ..
هي كانت متأكده انها من راح تظهر وانا ظاهر جدامها اني مستحيل ارد ..
لاني اذا رديت بيشك وبـ يقول هذا مستحيل ولاد عمهـا ..
يتركـها تتمشـى بروحـها وتيي بروحهـا ..
وماشاء الله انا معرووف والكل يعرفنـي وااكيد بيفهم الموضوع غلـط ..!
بس هـ الحيووانه شقايل رتبتـها ..
صج انها مب هيـنه ..
.
.
آمــا عن روضـه ..
اللي تمشـى بـ الممر وهـي متوجهه لـ لبوابـه ..!
.
قالت بـ خاطرها : اكيد انه تووه بس ينتبه للحركـه اللي حطيـته فيها
هههههههه يستـاهل هـ الزبــاله ..
عيل انا روضـه بنت أحمد جيه يسوي فيـه ..
والله يا فصيلآلآلآلآن لا اووريك النجوم بعز الظهر وانا روضـه بنت أحمد ..!
.
.
مشـى بـ سرعه عسب يتبعها ويأدبها ع الحركه اللي سوتها فيـه
وخلته يتعبها ويظهررر من المكتب جنه صــخل .. مب ريال..
.
.
دق فوون روآآَضــي بـ نغمه نــايف ..
" أحبــك واعشـقك وأهواءك وابقـى لك على ذكرآك "
" آدمنت حبكـ " يتصل بـكـ ..
.
من سمعت الاغنيــه بسرعه رفعت فوونها وردت بدون ووعي..
وبدون ماتنتبه انها هـي فـ المستشفـى ..
روضـه بـ لهفه وبـ همس : هلا واللللللللله هلااا .. مرحبـا الملاين ولايسدن فذمتـيه .. تو مانورت اذنـــــيه
نــايف :هههههههههههههه اول مره بـ حياتيه اسمع بها هاي نورت اذنيه ..؟!
روضـه : كل شي وياك يستووي ..
نـايف :هيه صح وانتي هـ المدح نسيت السـالفه ..؟!
.
توها بس تنتبه لـ نفسها انها ردت على نـايف ..
لانها لو تجذب على كل الناس الوحيد اللي يقدر يكتشفها " نـــايف " ..
.
روضـه بـ خووف : شوو ..؟!
نــايف : ووين انتـي اوول ..؟!
روضـه بـ تمثيـل : انا .. ممم بشبريتـيه خخخ
.
.
الفيصــل كان يمشي بـ سرعه عسب يلحق بـ روضـه ..
بس وقف وهو يسمع روضـه ترمس واحد ..
وظل يمشي بـ هدووء وراءها ..
وزادت عصبيته وغيضه وهو يسمع روضـه شو تقول حق اللي ترمسـه ...
وقال فـ خاطره : وصلت المواصيل فيج يا روضـه لـ هالحقـاره ..
وصلتــي لحد هـ السوالف .. استغفر الله ..كنت متوقعج سوالف ويا الشباب وبس مب .... استغفر الله ..
.
.
.
روضـه بـ تمثيـل : انا .. ممم بشبريتـيه خخخ
نـايف يتمصخـر : اها صدقتج ..
روضـه بـ دلع ربـاني :افا .. ليــــــش .؟!
نــايف بـ عصبيه مصطنعه : جم مره قلتلج لاتقولي لـــي ليش ..؟!
روضـه بـ غباء : ليـــــش ..؟!
نايف : يااربيه .. ماتفهميــن ... (وبـ همس ) لاني اذووووووووب ..
روضـه ضحكه بـ خفه : هههههههه تحريت وياك شيء والله .. دب واحد..
نــايف بـ همس : واحلــــى دب ..
.
الفيصــل ماقدر يتحمل اكثــر عن جيـه خلاص ..
مشــى بسرعه وتجدمهـا وسار لـلبوابه ..
وتوجهه على موتره ..
.
ركب المووتر وصك الباب بـ قووه ..
مــايدري ليش يحس بـ هالـعصبيه ..
الفيصـل ويتنفس بـ قوو : وانا ليش محرج .. وحالتي حـاله..
خلها بـ الطقاق راعيـه الشبــاب .. اوووه شو هـ الرمسـه ..
اصلا انا لـما ابا انتقم ..ابا الشي يكون ملـكي ..
واحيـن روضـه ملــكي انـــــــــــا وبس << يوهم عمره ..
.
مسك فوونه وبـ سرعه دق على رقم ربيـعه " عبدالله " ..
وهو متعود لـ روضه ..انه هـ الانتقـام راح يكوون صج حلوووو ..
ومب بس من جهته هوو من جهه ثــانيه ..
.
.
.
.
نــايف بـ همس : واحلــــى دب ..
روضــه بـ عصبيه : اييييييه انا بديت اشك انك خاليـه شو هـ الرمسه بعد
انفجر نايف من الضحك ع عصبيه روضـه ..
احلى مافيها ماتحب اي شخص يتغزل فيــها ..!
نايف :تدري شو يعيبني فيج ..؟!
روضـه بـ ثقه : اصلا كل شي حلوو فيـه ..!
نايف : لاحووول .. اقول ولا مااقوول وبتودرين هـ الثقه ..
روضـه : ترا الثقه يبتها منك ..قول وفكـني ..
نايف بـ عصبيه مصطنعه :عيب شو فكني انا خالج ..
وبعدين جنيه طوولت بقول وبخلصج يلاا .. انج ماتحببين حد يتغزل فيج ..
يعني بدوويه صدق خخخخ ..
روضـه تنفخ عمرها :افا عليـك ..
( وهي متوجه لـ موترها .. عسب ترد المزرعــه ) ..
نــايف وجنه تذكر شي :صح يالسباله نسيتيني انتي وين هاه ..؟!
بلعت روضـه ريجها بـ خووف وقالت : فـ البيت
نايف : عن الجذب .. اسمعج ترانيه انه حذالج اصوات سيارات ..
روضـه درت انها ماراح يسكت عنها الا اذا اعترفت : انا بـ المستشفـى ..
نــايف بـ خوف حقيقـي : شوووووووووووووو .. ( وبـ عصبيه ) : وانا اخر من يعلم ...؟!
روضـه وهي تغمض عيونها : نايف هدا اعصابك .. والله محد يدري
بـ السالفه غيريه انا .. واحين انت .. وبـعدين بقولك .. ليش معصب >>الادب خخ
نــايف وهو يهدي عمره : انزين شو مستوي قوولي ..
.
ركبت موترها وهي تقوله السـالفه من بدايتها لـحد نهايتـها مع استبعاد فكرره اهمالها لـ علاجها بسبب الفــيصل ..!

.

نـــايف بـ عصبيه :انا جم مره قلتلج لاتودرين علاجج .. هذا دواءج احين

تستاهلين يوم جيه استوى فيج .. عسب توبين تهملين عممرج ..

روضـه تضحك بـ همس :ههههههه صج معصب

نــايف بـ عصبيه : وتضكين بعد ..

(وفجأه صرخ نـايف ) : ايييييييييييييه انتي تسووووقي هاه ...؟!

.

حطت ايدها ع اذوونها وايد وحده ع الـسكـان وصرخت : اذووووووني ايييييييييه

وبعدين هيه انا اسووق مب اول مره ولا اخر مره ..

.

.

.

ويـــا الشباب ..

.

هزاع خلااص وصـل حده .. من يوم وهو يطالع روضـه تظهر من الفله

ولحد احين وهو يفكر وين تكون سارت ..

هزاع بـ خاطره: لاحووووول وانا شو ابا فيـها .. شو بعد تبا فيها

هاي بنت عمك .. وبعدين شقايل هاي النتفه تسووق وسنها مب واصل السن القانووني ..؟!

شكلها تسوق بدون ليسن .. بس ليش جيه شردت ومحد انتبه لها ..

ووين تكون سارت ... مم يمكن سارت الجمعيـه ..

شو الجمعيـه بعد انت .. لا لا مستحيل تكون تسوي الغلط ..

هاي شكلها عقلها يوزن بـلد .. ما طالعت حركـتها ..

.

قطع عليـه تفكيره ايد محمد اللي انحططت بـ خفه ع جتفه : خير هزاع .. عسى ما شر ...؟!

هزاع بـ ابتسامته تغطيـه : مـاشي .. بس افكر ..

محمد : انزين ماسمعت على شو اتفقنـا ..؟!

هزاع : واخيرا اتفقتوا .. اصلا انتو اتفقتوا على ان لاتتفقوا..

محمد : لاااا شو هـ الرمسه الخطيره ..

يـاخي احسك محلل سياسي لاترمس جيه ..دخيلك ..

.

هززاع : ههههههههه .. انزين عن الهذره وقول شو اتفقتوا ..

حمد : لااااا احسن جيه فـ الهواء الطلق نرقـد ..

منصوور : لا مانبــا .. شو هواء طلق ما طلـق .. احسن الخيـمه ..

سيـف : انزين جم يوم بنقعد ..
عبدالباسط : بعد جم ترا الا يومين .. لانه عقب يوميين بـ يرد كل واحد بيته ..

ولا نست انه اجازات الشيوبه خلصــت ..

سيف: هيه والله صـح ..

مـــايد بـ لقافه : انا اكيد اني اول واحد بكون بـ الرحله ..

.

الكـــل طالعوا على مـــايد .. ونظراتهم تدل على انه

" من وين ظهر هذاااا خخخخخخخخ "

هزاع بـ لطف : لاحبيب مانقدر نشلك ويانا .. نحن بنسير البر..

مـايد بـ مزاعج:وانا ريــــــال

سيف يلوي بووزه : انزين انت ريال ونعم والله .. بس مايستووي ..

مـايد : اونهم مايستوي قالو .. بسير يعني بسير ..

.

حدروا الشيووبه الميلس ونشوا كل الشباب ..

بو عبدالباسط : هاه بلاكم جيه تزاعجوون .. وشو هـ التجمع

شو مستووي .. وعلى شو تتفقوون ...!؟

كل الشبــاب طالعوا على بـعض ..

وعقب قال عبدالباسط : هــيه نحن منسير البر هـ اليومين ..

تدري يعني عسب البنات يأخذن راحتهن ومنها نحن نغير جوو

.

بوراسد : قالوا البنات قال .. قولوا انكم تبون تسيرون وماتعقوها ع البنات

.

الكل الضـحك ..

بو راشد يكمل : الا شو رايكم يا بو هزاع نسير وياهم .. منها تمشيـه

.

الكل شباب طالعوا بـ بعض .. على انهم " نحن نبا نسويها شبابيه ."

بو سالم ضحك وهو يطالع نظراتهم وفهم قصدهم : هيـه والله .. زين نغير جوو ..

الا اقوول شباب على منو المصـاريــف ..

حمد : شو بعد صاريف .. ترا كل واحد يدفع شي ..

بو سالم : رحلتكم محموله من حد ماتظهرون من الباب لحد ماتردون سالمين ان شاء الله ..

كل الشباب طالعوا فـ بعض بـ ونااسه ..

بوراشد : الا مـتى ان شاء الله بـ نظهر من هني ..؟!

بو هزاع : الشباب بيرتبوها ..

مــايد : انا ابا اسيـــر

بو هزاع بـ حب صادق : برايك غلايـه انت بتم هني عسب تكون ريال البيت

وبعدين مايستوي نودر الحريم بـ روحهن ..

وبـ امانه انا اخاف علييك يا ابوويه ..

مايد ماعيبته فكرت يكون ريال البيت ..لانه حس فيها هاي مقصــه

يعني يقصوا عليـه ..<<خبيث يفهم كل شي خخ

.

بس سكت احتراما لـ بو هزاع ..

وقرر يتم هنـي .. وينغس عيشه روضــه او بـ الاحرى " خطيبته "

شرات ماسماها ..!

.

الشبـاب وكل واحد من صوب يرمس :هيه صح .. لا احسن العصر .. لا مانبا

.

محمد : ايييييه اسكتووا ..اقول ترا اهم شي نشل البانشيات

هزاع : هيه والله ..

حمد : والله يا هزاع من يوم ابويه قال مكفل ..

يعني التخيم بيكون فايف ســــتار ..

هزاع : شقايل ..؟

منصور يكمل : يعني يالحبيب .. بييب الهنود يرتبون .. شرات اخر مره

حتى الشبريات والحمامات والتلفززيوون وغيره يابوهن .. وسولنا كره طايره وحركات ..

اقولك فاايف ستار ..

ابتسم هزاع .. لانه بوسالم شكله ما ناوي يعديها الا وهم فالينها ..

.

اتفقوا الشبــاب والشيووبه انهم يظهرون عقــب الغداء عسب

يوصلوون مبجر .. عسب الترتيبات والخيام وجيـه ..

لانه بوسالم شكلـه ناووي يخليهم يفلونها فـــــــل ..

يعني صج وناسه ..

.

الســاعه 2:21 م

.

وصــلت روضـه الفلـه وهي تحدر من الباب الخلفـي لمزرعه عسب محد ينتبه لها ..

وقفت المووتر بعيد ونزلت بسرعه وهي متوجهه للباب الخلفي لفله ..

فسخت العبايه وخلت الشيـله السوده ع رأسها ..

ورقت الدري بسرعه لـ جناحها ..

.

حدرت الجناح وهي تتنفس بـ قوه ..وماسكه العبايه بـ ايدها

.

وقالت : اناااااااااااا ييتتتتتتتتتتتتتت

.

جربن يزوي وحمدوه من روضـه وبدن يأخذن منها العلـوم ..

لحد ماتذكرت حمدوه وقالت لها تقولهن السـالفه اللي قبل ماتظهر قالت بـ تقولهن يوم ترد ..

.

قالت لهن روضـه سالفه مرضـها وحلفتهن محد يعرف وبـ الاخص ابوها ..

عسب مايغصبها تسـافر تعالـج ..

.

عصبن البنات فـ البدايه بس عقب تفهمن وضـع روضـه ..

.

.

على حدود الســاعه 3:31 م ..

كــان الشباب يركبوون هم والدريوليـه الاغراض والبانشيات وغيـره ..

لانهم بينطلقون احيــن ..

عقب دقــايق ..

ودعن البنات اعمامهن .. واخوانهن و اولاد عمهن وخوالهن ..

.

وانطلقوا الشباب والشيوبه لـ البـــر ..

.

حدرن البنات داخل لانه الجو بـارد شووي ..

واول ماحدرن صرخت رووضــه :ونــــــــــاسه تفسخووووووا

الكل ضحك على روضـه وقالت ام سالم : رواض عيب استحي

الكل ضحك :هههههههههه

روضـه:امايه والله يعني صج .. طالعي خلاص احين كلهن بيفسخن الشيل ..وبنقدر نلبس بنطلونات وجيـه ..وحركات ..

.

البنات فـ البدايه مافكرن تفكير روضـه بس عقب عيبهن ..

.

قعدن البــنات بـ جهه فـ الصال بـ روحهن بعيد شوي عن امهاتهن ..

ومــايد كان يطالع الـ tv وهو مقهووووووور للآخر ويفكر شقايل يأدب روضـه..

.

روضــه بـ فضوول :طالعن طالعن شقايل يطالع وساكت والله مرات احسه 

ريال عووود شيبه ..مب يهال ..

امل بـ خوف : هذا يـاهل .. اصلا لو تدرين بـ فعايله بتنجلطين ..

روضـه :خيــــــــبه ...

يزوي تتمصخر : مثلا مفجر طــايره هههههههه

حمدوه ويزوي ورواضي وعواش : ههههههههههههههههههه

اما عن شوق / مـي / أمل .. [ فـ كانً سـاكتتات ] ..

حمدوه : ايــه بلاااكن ..؟!

شوق:شقايل عرفتي انه كان على وشك تفجير طايره ..

شهقن البنات بـ عدم تصديق وقالت يزوي : مســتتتحيل مااصدق ..

مي ترمس بـ هدوء عسب مايسمعها ويورطها : والله العظيم كان يبا يحرق الطايره ..

بس الحمدالله زخوووه قبل لايفعلهــا ..

روضـه بـ عدمم تصديـق .: يعني معقوله مب مفتش قبل لايركب الطـايره ..

مي بـ همس :الاخ محطي الولاعه بـ البانتي مـاله ..

ورفعت ايدها (تأشر على روضـه) :وبعدين تعالي ليش مب مصدقات ..

امل:انزين قولي لي سبب واحد امه تودره وتــسافر بروحها

شهقن البنات ويـا بعض .. لانه صج امه مسافره ومودرتنه هني ..

.

امل بـ قهر : نحن مسمينه بو ولاعــه وحريج ..!

روضـه : ليش انه يحب يحرق الطايرات ولا ..

شووق بـ همس :لاااااااا .. اي شي جدامه يحرقه ..

.

امل وهي تنزل شيلتها اللي كانت على رأسها ..

وتمسح على شعرها القصيـر اللي يوصل لحد الجتف وبـ قهر : واول

المتضررين ..(وتأشر على نفسها ) :انـــــــــــا ... 

تخيلي انا اللي شعري 

يوصل لحد الركب ..

( وهي تغمض عيوونها ) :احتـــــــــــــــــــــــــرق..تخيلي القساووه ..

.

بـ حركه سريعه وبـ خوف مسكت يزوي شعرها ..

لانه يوصل لحد ركبــها .. فـ خافت يستوي لها شرات مامستوي لـ امل

.

مي تكمل : مب بس جيه هاك اليوم قاعدين ندور ساعه عليـه 

( وتتمصـخر) : خيفانين لايحرق شي ونحن ماندري ..

لحد ما لقيناه بـ الستـور مال المطبـخ قاعد يولع بـ السلل والاجيــاس ..

والله يابنات انه النار واصلـه لحد السقف ..

ولو مالحقنا عليــه .. نحن مستوين احيـن دياي بـ الفحم ..

ضحكن البنات على تعليـق مي .. 

مع بعض الخوف من هاك الطفل الصغير او بـ الاصح الشيطان اللي يطالع الـ tv

.

حمدوه بـ صدمه :يعني قصدكن نحذر من بو ولاعه ..؟!

مي / شووق / امل : اكيـــــــــــد ..

.

روضـه بـ خووف وحاسه بـ شي بداخلها بييها من هـ النتفه بس كتمته :غيرن الســالفه ..

.

امل :هيه والله ..

عواش :الله ينطبكن خوفتنا ..

شووق بـ لقافه : رواض قولي لنا .. شقايل قدرتي تعيشن بـ فرنسـا بروحج

وشقايل درســتي هنااك ..؟! 

مب صعبه عليـج ..!

امل تأيد على رمسه اختها : هيه والله خاطريـه اعرف ..!

يزوي : تصدقن لحد احين مااعرف شي عن هـ السوالف ..

روضـه :جذاااااابه ..كنتي دايم تدقين واقولج كل شي

.

امل :يلااااااااا قوولي ..

روضـه : ممم شو اقول ..

حياتيه هناك كانت غيـر ..كانت حلووه وصعبـه ..

فـ البدايه لما قلت لـ ابويه الفكره ماتقبلها بس عقب تقبلها ..

بس كان بشرط ..

مي : وشو شرطه ..؟!

امل : خليها تكمل ..

روضـه : اني اسافر وانا ويايه بدقارديه .. وانا هـ الفكره من يوم كنت صغيره

مستبعدتها .. لاني احس اللي يمشون وراهم جنهم المافيـا ..

بس عقب وافقت لاني كنت مضطره .. بس كانً مب فـ كل الاوقات يكونً ويايه ..

شووق :كانً .. وبدقارديـه ..!؟

روضـه تبتسم : هيه كانً .. هن حريــم .. مم يابانيـات ..

بس كانً كل وحده منهن عن عشر ريايل ..

كنت مب متقبلتهن ..ومااسمح لهن يتبعنيه بـ كل مكان ..

لانهن يجبرن الكل يطالع عليــه ..حتى لو مايبوون يطالعون ..

يعني كانً .. يراقبني من بعيد لـ بعيد ..

بس فـ يوم من الايام كنت ظاهره من الفله السـاعه 12 تقريبا ..

ونحن هناك نسوي حضر التجول الساعه 12 لانه السكيرين والحراميه

وغيرهم يظهرون او يكثرون بـهالوقت ..

.

وانا كنت امشـي ما اطالع جدامي غير واحد يصكني ع اليدار 

بـ قووه وهو يسحب منيه الجنطه اللي بـ ايديه..

وعقبـها كان يبااا .......( وسكتت ) ..

احم .. لو ما ين هن بـ الوقت الـضايع ..كنت انا بـ خبر كان ..

ومن عقبها ابوويه عرف بـ السالفه واجبرني انهن يتبعني ورايه بينهن وبيني شبر واحد بس..

عسب الكل يطالع انه حد ويايه ويحميني ..

وبـ امانه كان ابويه صادق .. بـ فرنسا ماتقدرين تعيشين بروحج ..

وهن واايد ساعدني , .. فديتهن اشتقتلهن ..

مــي : وييييه يزيغ .. انزين وودراستـج ..

.

ردت روضـه ع الغنفه وتكت ..ورفعت اصبوعها وهي تلعب بـ شعرها :

دراسـتتي .. مممم دراستي كانت ووايد حلووه ..

وكنت شرات الاميره ..ههههههههه

شووق :شقايل ..!؟

روضـه : مم شو اقولكن ..

السكول اللي انا كنت فيها كانت خــاصـه ..

ومحد يقدر يحدرها غير اللي صج وياهم بيزات ..لانها مكلفه وايد ..

واغلبهن كانو يحصلو ع منح ..و الاغلبيه او الكـل بـ بيزاتهم ..

يعني سكوول جدا رايقه ..

كنت اذكر لما البس على كيفي .. يعني لبس بيت مب لازم البس شراتهم ..

وكنت انا الوحيده اللي البس على كيــفي ..

مــي : شقايل.؟!

روضـه : صاحب السكوول .. كان ويـا ابويه بـ العمل ..يعني صفقات وغيرها ..

وابويه دخلني هـ السكول لانه يعرف انها لـ صاحبه واكيد بيـهتم فيه ..

عسب جيه كنت انا الكل بـ الكل بـ هالسكول ..وكنت اي شي بخاطريه اسويه ..

وكان الكل مقهور منيه او البنات كانً مقهورات منيه ليش انا البس على كيفــي وهوايه ..!

واذكر كنت من صباح الله خير انش عسب اتلبـس واترتب وجيه ..

وكنت كل يوم اسوي شكل بـ شعري وكنت احلى البنات بـ السكول كلـها ..

لانه جمالي كان عربـــي ..

شهقت امل :يعني كنتي ماتلبسي شيـله ..؟

.

ضحكت روضـه ووياها حمدوه ويزووي ..

وقالت روضـه : كنت بعدني صغيــره ..

مي : قبل جم سنه هـ السوالف مستويه ...

روضـه :السنه الفايته واللي قبلـها ..

مي بـ صدمه :وكنــــــتي صغيره الســنه الفـايته ...؟!

روضـه ضحكت بـ خجل وقالت :هيه صغيـره ..

البنات مافهمــن شو تقصد بـس حمدوه النزغه قالت : البنت كانت بعدها 

مب واصلـه لمرحله لبس الشيله والتستر ..

امل بـ عصبيه : والشيله تبا مرحله بعد ..حرااااااام يابنت حرام

يزووي بـ طفش : اووه طولتنها يا روضه وحمدوه وهي قصيره ..

( وتطالع على شوق / ومي / وامل ) :روضـه بعدها ما كانت واصله لسن البلوغ .. 

غطت روضـه ويها بـ ايدينها الثنتين ..مستحيه من رمسـه يزوي ..

.

( وتطالع يزوي على روضه وحمدوه ) وقالت : الناس جيه تفهم ..

الكل ضحك على يزوي اللي ماتستحي خخخ ..

امل بـ وناسه :الللله حظج يهعني بس كبرتيي جريب ..

روضـه مستحيه : هيه هيه غيري هـ السالفه ..

شوق:يعني لما كنتي بـ فرنسا ماتلبسي شيله ..؟!

روضـه : لا ما البـس ..

وبعدين انا ما لبست الشيـله غير قبل 6 اشهر تقريبا لاني كبرت خلاص ..

.

مي :وييييييييه يعني انتي مب من زمان .. توج 

روضـه تغير السـالفه : وماتبن تعرفن الباجي من القصـه ..؟!

شوق بـ لهفه : لااااااااا كملي دخيلج ..!

روضـه وترد ذاكرتها لـ وراء ..: كنت محط انظار الجميـع ..

ليش اني انا كنت البس غير عنهم ومب ملتزمه .. 

والبنات كانً وايد يكرهني .. ليش انه كل الشباب اللي بـ السكول يمووتون عليـه 

مع انه مااجذب عليكن .. كانً البنات فـ قمه الجمـال ..

بس هم جذبهم جمالي العربي .. او بالاصـح رقي وأدبي

لاني كنت ماارمس ولا واحد فيهم ..يعني فقيره الله بـ حالي ..

وفيـه كان واحد بـ السكوول اللللله واكبر من جمال عليـه .. 

بعد فرنسي يعني شو بيكون .. كانً كل بنات السكول يتمننه ..

بس هو كان يغثني انا .. ليش,.؟!!

لاني كنت صج رززيــنه ..وانتن تدرن بـ الشباب يحبون الوحده الرزينه ..

وكنت دايم الفت نظره .. بـ تسريحاتي وشكلي المتجدد ..

يعني كنت جني وحده منهن .. لانها كشختي تطغي عليـهن ..

كان وايد مضايجني .. مول مايودرني بـ حالي ..

لحد مايوم فـ الايام تبعني لفلتـنا .. 

وحاول يرمسني بأي طريـقه ما قدر ..

واخذ رقم فووني من ربيعاتيه .. وغيرته رقميه ..

يعني ظل متابعني لطوول الثلاث سنوات ..

لانه السنه الاولى كنت بعدني يديده ..وهو مب موجود ..

امل بـ لقافه :اوصفي لنا شكلــه ..!؟

من قالت امل اوصفي لنا شكله طاحت يزوي بـ حظن حمدوه بـ حركه تمثيليه .. 

على انه يطيح من حلاته ..

مي :خيبه بلاها ..؟!

روضـه : صدقهــــــــــا ..(وهي تأشر على يزوي ).. اه شقايل كان مزززيون وذبوحي ..

كان عليـه شعر بني فااااتح ومسويه قصـه ايموو وياي شكله عذااااب ..

وعيوونه كانً رصاصيات .. وابيضــاني واحمر .. وكان وااااايد طوويل ..

تقريبا اطول عنيـه .. مم شو بعد .. وشوي نحيــف مع عضلات بارزات وبـ القوه بعد ..

كان الكل يمتدح بـ شكله وجمـاله .. كان منى كل بنت بـ السكول ..

بس طبعا ما عداي انا خخ ..

مي : وشقايل هـ الخبله عرفته انه حليو عسب تنجلب فوق البنت جيه

روضه بتسـاؤل: تقصدين يزوي ..؟

مي : هيه 

روضه اسمعي يا بوج ، يوم وصفته لهن قالن الا تصورينه لنا 

وان ما صورتينه مابتردي البلاد .. عاد انا متى لقيتها فرصه 

يوم التخرج ، كنا متخرجين من كلاس 10 سرت وسرقت صورته

من دون لحد يدري بس عشان خاطر هـ الطفره ( وتأشر على حمدوه ويزوي )

. 

.

شوق :وه وه ذبت

امل :اييييييه حقي انا مب لج

مي :هيه تضاربن يالخبلات تضاربن ..

يزوي : اييييييه انتي وياها مالكن خص هذا مالي ..

حمدوه وهي تجرب اذونها من البنات : لاوالللللللللله ماسمعت عيدن 

هذا حقي انا وبس لا انتي ولا غيرها ..

.

امل بـ لقافه :ونسيتيهم رربعج خلاص ..؟!

روضه :منو قالج اصلا انا متواصله وياهن ربيعاتيه كلهن ..

وبالآخـص لا غران مَير نانا ..

مي : شو ها بعد لاغران مرا نانا

ضحكه روضـه لانه مي خبصتها فوق حدر : قصدج لاغران مَير نانا ..

يعني الجده نانا ..اسمها نانا ..

كنت دايم لما اتمشـى بـ حدييقه برج ايفل .. 

القاها قاعده بـ واحد من الكراسي ..لحد مااستوينا ربع ..

وبـ امانه واااايد طيووبه ..

.

مي:وماتحسين هناك بـ ملل ..

روضـه : منو قالج مااحس ..الاحسيت ونص ..

ووكنت من الملل اسير المطبخ ويا الطباخيـن ..

وطبعا كانو الطباخين كلهم فرنسين ماعدا رئيسه الخدمه لبنانيـه ..

وكنت دايم اقعد وياهم من الملل لحد مااستويت اطبـخ طبخ فرنســي

لا صار ولا استووى ..

مي بـ صدمه : معقوله انتي تطبخـي ..

طالعت روضـه بـ حمدوه ويزوي وقالت : ليش كلهم جيه يقولون ..!؟

يزوي : كل من يسمعها جيـه يقوول ..

اصلا اباج تذوقين طبخ روضـه بس ..

والله تأكلين اصابعج وراه ..

امل :انزين ليش ماتطبخين لنا ..

روضـه : افاعليج بسويلكن حلوى التويـل الفرنسيـه ..

صررخ حمدوه ويزوي بـ وناسه :واخيـــــــــــرا بـ تسويها

ضحكت روضـه :ههههههه هيه واخيـرا بس مب احيـن

.

.

يزوي وهـي تنش : عيـل انا اترخص بسير ارقـد ..

حمدوه وهي ترمس البنـات : ترا يزووي لـحد احين مواصلـه مب راقده

يزووي وهي تأشر ع حمدوه :هاها حتى انتي مواصلـه رويتر وحده

روضـه :هههههههه هدن اعصـابكن كل وحده تنشر غسيل الثـانيه

يزوي وتأشر ع روضـه :عيبتني هـ الحكمـه خخ

غطت روضـه عيونها اونها مسـتحيه : وجان اثتحـي

حمدوه وهي تمشـي صوب الدري :اشـك فـ هالمعلومه

تبعتهـا يزوي وهي تضحك :حتـى انا هههههههههههههه

روضـه بـ عصبيه :حيوووانات معليـه بنتقم منكن ..<<كل حياتها انتقام

.نشت مـي وقالت : يلا بنـات انا اترخص بسيـر جناحنـا اريـح شوي

روضـه :حتى انتي ..؟!

مي :هيه تعبـانه والله ..

نشت مي وتبعنهـا امل وشوق ..

وبقت روضـه بـ روحها .. نششت رواضي وسارت صوب الـ tv ويـا بو ولاعه

روضـه : اييه انت حط قناه tv5 (القــناه الفرنسيـه )

مـايد بـ لعانه : لا والله وانا من وين افهم فرنسي بـ الله ..؟!

روضـه : لاحوووول شو هـ البلشـه وحشى شقايل عرفت انها هـ القناه فرنسيـه..(وسكتت)..

عطـها نظره ممدوه بـ الغرور والثـقه ( على انه انا كل شي اعرف ) 

..ونش وفر الريموت فـ ويه روضـه ..

ووروضه من الزيـغه صرخت بـ القو ..

مشـى وهو يضحك متوجهه لـ ام هززاع وحط ركبـه بـ الارض وعيونه مركزه فيـها وبنبره حزن : خالووووه دخيلــــــج قووولي تم .. طلبتج ..!

.

وروضــه فاجه حلجها وعيونها مطيـره عليـه وقالت بـ صوت مسموع : اؤؤؤؤؤؤللله عاد ما يـاهل ..!

ام هزاع : امر غلايـه ..عطيتك تدلل انت ..!؟

مـايد بـ حزن :خالووه انا بـ مووت من الملل وخـاطريـه اسير الحديـقه العب ..

دخيـلج دخيــــــــــلج قولي حق ( التفتت وأشر على روضـه ) رواضي حبيبه قلبي توديني الحديـقه دخيـــــــــــــــــلج ..!

.

رواضي لحد احين بـ صدمه معقوووووووله هذا ميود النحيــــس ..؟!

ضحكت ام هزاع .. والتفتت على روضـه .. وقالت : روضـه غلايـه طلبتج ترومين توديـنه ..؟!

استحت روضـه من طلب ام هزاع .. وماقدرت تقولها مابا ..وما اروم اسير ويـا هـ النحيس ..

وقـالت بـ صوت شووي مسموع وبـ حمق من اللي جدامها : من عيووني خالوه انتي تأمرين ..!

( وعطت مايد نظــــــره فتاكه ظاهر منها الحقــد ..)