رواية بين الفقر والطغيان الفصل الخامس والعشرون 25 - بقلم رونق

وجان انزل اجمل بارت لاجمل متابعين اتمنى لكم قراءه ممتعه

🌹🦋 البارت 27 🦋🌹

🌹🦋 بين الفقر والطغيان 🦋🌹

🌹🦋 للكاتبه رونق 🦋🌹

جان يكول غير داخله مستشفى شنو مو خبرتك

ها لا مخبرتني شبيها

شلون مخبرتك هي كالت خابرته

الطفل ميت ابطنها صارله 6 ايام

ودخلوها حتى يسقطونه

اني هنا دخت شنو طفل شنو ميت شنو اسقاط

منو وياها

بس امها واني هستوني اجيت منهن

باجر يطلعوها

معقوله حامل واني ماادري

زين ليش ماعندي علم

كتله عمي اني مااندل تكدر تروح ويايه

والله ياابني مااكدر اعوف البنات بوحدهن اخاف عليهن صار المغرب

خل ادز وياك تبارك

راح اتصل بامها توكفلكم اباب  المستشفى

ماشي عمي خل تجهز نفسها

اجتي تبارك وسلمت عليه

رادت تصعد وره

كتله لا تعاي هنا يمي

اجتي يمي ودلتني

وصلنه وجانت امها منتظرتنه

سلمت عليها ورحنه للغرفه

دخلت وجانت بالخاص مدخلينها الحمد لله

حتى اخذ راحتي وياها

اني اعلمها ع هاي سوايتها

دخلت وجانت نايمه

سالت خاله عليها

كالت سوينالها كرداش

لان الطفل طلع ميت من يوم الاجت بي النه

سويت نفسي اعرف كلشي

كتلها شوفي اذا يصير خليني اني ابات يمها

ماقبلت ابد

كالت ميجوز خاف تحتاج الحمام اله اني

لعد خل ادزج ترتاحين

لا ماما خليني هنا احسن

انقفلت بوجهي ردت فرصه حتى اخذ راحتي واحجي وياها

وره شويه كعدت وتصيح  من الالم

بس من شافتني كبالها سكتت

شلونج زنوبه

الحمد لله ع السلامه

الله يسلمك

اكيد جاوبتني لان امها هنا

ماما فدوه بطني موتتني شوفيلي الدكتوره

تعاي ماما بروكه ويايه

راحن

كعدت كبالها

اي زنوبه ليش مخبرتين حامل

وليش ماادري مسقطته الطفل

ادري بيج تكرهيني بس الطفل شنو ذنبه وتسقطي

رجاءآ ابو نور حاسب نفسك قبل لتحاسبني

شوف الداعي الي خلاك توكعني وتضربني شنو

اكيد انت الي متريده وتكرها للطفل ع كرهي

هاي انت شدتخربطين

هاي الحقيقه

بهالاثناء دخلت الدكتوره

طلعت بره

وره شويه طلعت

كالت امها هاي وصفه من بره راح اجيبها واجي

انطينياها اني اجيبها

تعاي بروكه ويايه

لان مااندل

طلعنه جبتلها وصفتها وجبت عشه ورجعت

اجتي الممرضه وضربتها الابر

بعدها كلت لخاله خل اوكلها

انطتني الاكل وبديت اسويلها

لفه صغيره واريد اوكلها

بس ادير وجها عني

زينب مو وكت عنادج اكلي بلا متشلعين كلبي

مااريد مااشتهي وخره عني

حجت امها

شلعت كلبنه من الصبح لهسه تبجي ومااكلت ولالكمه

لج ماما ميصير هيج تسوين بنفسج

الحياة طويله كدامج

وكل سنه عود جيبيلج طفل

قابل انت اول وحده يموت ابها

هاي اني الكدامج حبلت وتعبت وجبت وربيت وكبرت وبالتالي مات

احمدي الله واشكري مجبتي يله مات

هي هنا عيونها تجري

لج حبيبتي زنوبه ولايهمج يجوز الله سوه البي صالح

نظوري بعده زغير

وانت كاعد اتعبين ويا

ممتوازين ع الاطفال

خلي نتونس هو احنه شفنه من الدنيه

خل نسافر

بالعطله هاي اخذج انت ونور ونظوري لتركيا

هي ساكته بس الدموع تجري

مسحت دموعها بيدي

كافي حبيبتي لتبجين

لخاطر نظوري اكلي

يله هاج اكلي هاي اللفه لخاطري

اذا عندج خاطر الي

اكلتها والصراحه انصدمت بيها همزين

مااعرف هي هيج

لو لان كدام امها

كتلها يله خلي ناكل كلنه

صدك اكلنه وجانت هاي اول مره ناكل سويه

كملنه وخابرني عمي

كلي هذا نظوري يبجي حاول تجي حتى بلكي يسكت

اخذت تبارك ورجعنه

خطيه لكيته يبجي

الصراحه افور دم يمكن لو عندي علم بيها حامل مجان خليتها تطبخ

لا وفوكاها وحدها

جان لغيتها العزيمه كلها

ولو اني دااضحك ع نفسي

هو اني الضربتها واذيتها وبسببي مات الطفل

مراح اسامح نفسي هالمره صدك

شافني نظوري سكت شويه ورجع كام يبجي

كتله عمي خل اخذ البنات ونور ونظوري لمنتزه بي العاب

خلي اطلعه بلكي يسكت

كال اكو مدينة اللعاب هنا قريبه وديها الهم

خل البنات يجهزن نفسهن

فعلا اخذتهن اباوع ع لبسهن نازك ويجنن

اكيد زنوبه هم هيج جانت وضلمتها ويايه

بس الصراحه لو اموت مااخليها تلبس هيج لبس لو تذب العبايه

رحنه غيرنه جو وشفت البنات فرحانات

صعدن اللعاب وي نور ونظوري

صعدتهم بالسيارت اليداعمن

صعدتهن كلهن

الفرح واضح ع الجميع

اشتريتلهم

ولكيت واحد يرسم ع الوجه

نور كلتلي خل يرسملي

كلت خطيه

فعلا رسم ع جها

جان نظوري يبجي عود هم يريد

كتله ارسمله شي بسيط

اكو مطعم بي دخلتهم

وطلبت اكل

كملنه واخذتهم وكلتهم موطا

ها بنات اتونستن

اي شكرا الك

كالت رنا اذا اكول شي تزعل

لا ليش ازعل احجي

كالت جنت متوقعتك واحد مغرور وغثه

لان متحب تجينه ولا تبات يمنه

بس طلعت متوهمه

بالعكس طلعت حباب

ضحكت حباب لان طلعتجن

لا والله مو هذا قصدي

بس شفت معاملتك ويانه وي بابا ذاك اليوم جان فرحان

يكول الله اخذ سيوفي عوضني بزوج زينب

عبالك ابني

وتصرفك ذاك اليوم امام عمامي كبرت بعيونه حيل

تحجي والخجل واضح عليها

انتو اهلي وهذا السويته واجبي اكيد

بس اني ممرتاحه من ناحية اختي

شلون يعني

دائما اشوفها حزينه وشايله هموم الدنيه ع راسها

ومن تجي هنا ماالاحظ تتخابرون ولا احسها متلهفه عليك

لا بالعكس متوهمه علاقتي بيها زينه

ودائما نتخابر

بس اني اكثر المرات مشغول بس بالليل نتخابر

بعد مااعرف بس الي احسه اكو شي بينكم مو طبيعي

متوهمه اكيد

ماكو اي شي

ان شاء الله ماكو

تعرف زينب اكثر وحده بينه هادئه وكتومه بشكل

بس شايله كلب طيب متتوقعه ابد

مستعده تضحي بحياتها كلها ع مود الشخص التحبه

واكبر دليل زواجها بيك

شلون يعني

يعني ع مود الطلب مالت اخوك الله يرحمه

وافقت عليك

ع الرغم ما بابا رفض ومانعها

بس هي اصرت

رادت تخفف الحمل عن بابا

واذا اكولك شي مراح تصدكني

بابا لحد الان ياكل بنفسه

يكول دمرت بنتي ومستقبلها بيدي

وصلنه للبيت سكتت بعد مجاوبتها ابد

جان الوقت متاخر يمكن ب1 بالليل

بدلن لنظوري كتلهن جيبنه يمي انيمه

كالت رقيه لا متعود ينام يمي هو ونور

خلولي فراش بالاستقبال

رادوا يجيبولي جاي رفضت

كتله عمي بس سويلي طريق للحمام اسبح وابدل ملابسي حتى ارتاح شويه

فعلا سبحت وارتاحيت ورجعت

كعدنه نسولف شويه اني وابوها

بعدها اترخص وراح

بقيت بوحدي حسبه تاخذني وحسبه تجيبني

الي سويته بيها شنو معناها وشنواسمي

البنيه بعمر الورد ومثل الورده

وبيدي ذبلتها

طبعا فرق جبير بالعمر بيني وبينها

اكثر من 15 سنه

هاي زينب لو ماجنت اشك بيها

لو متعرف عليها قبل مروان

يمكن بالنسبه الي حلم وحلم بعيد

مستحيل احلم تكون زوجتي

بقيت حاير ياترى الاعتذار راح يكفي حتى تنسه

اكيد لا

اني فعلا اناني

اتصلت بيها رفعت خط باللحضه

اتفاجأت بيها

كالت الووو

الووو

ها نظوري يبجي عليه

لا نظوري نام

هم بجه عليه خطيه

لا طلعتهم هو والبنات

اخذتهم للالعاب

وقبل شويه يله رجعنه

اخذته رقيه ونيمته

اي عفيه خوش سويت

خطيه حتى ميبجي هواي

شعندج كاعده لهيج وقت

كاعد اتالم حيل

وبالي يم نظوري

شنو اليوجعج

بطني تكطع بيه تكطع

لعد ماكو دكتوره يمج وتشوفج

انطوني هواي مهدئات بس ميفيدن

ليش مخبرتيني بحملج

والله لو ادري جان لغيت العزيمه كلها ومجان صار الي صار

مخبرتك لان متاكده بس تعرف راح تضوج

لان اكيد ميشرفك يصير عندك طفل من وحده ساقطه وفكر بنت فكر

هاي انت مخبله اكيد

لج شتحجين انت يمكن لو سامع هذا الخبر يمكن اني اسعد واحد بالدنيه

اسف من كل كلبي لان اذيتج بس والله بدون قصد

مجان قصدي ااذيج هيج

والله من شفت الخروف بي فلفل اتخبلت

عيب من جماعتي وكلهم ضباط ورتبهم عاليه

فقدت وجنت متوقعج خبثتي وياي

اني لو اريد اخبث

جان مطبخت

بس ضغطت ع نفسي وع راحتي

في سبيل مااحرجك امامهم

اتوقعت راح اسمع كلمة شكر منك وعاشت ايدج

واكيد راح يروح التعب من اسمعك هيج

بس اتفاجأت بطريقة شكرك الي

هنتني كدام الكل وضربتني

وهذا جان هم يهون عليه واقبل بهذا الشكر

بس انت تعديت عليه وقتلت ابنك بيدك

وهذا ردك للجميل الي سويته الك مراح انسى مدى العمر

تحجي وتبجي

كافي زنوبه فدوه اروحلج كافي

بقت تبجي

تعرف دمرتوني انت واخوك

موتوا الانسانه الي بداخلي

من يوم العرفتكم لليوم نسيت الفرح

ونسيت الضحك

بعد حتى مااعرف شلون اضحك

زنوبه فدوه اروحلج اسكتي

بقت تبجي

والقران راح اجيج للمستشفى

اول مره اتخبل من اسمعها تبجي وتحجي

كمت كتلها راح ابدل واجي

لا ابقى يم نظوري

راح اطبكه وانام نعست

بدلت ع السريع واني احجي وياها

راح اشغل السياره

هاي شبيك والله ممنوع محد يدخلك والبيبان مقفله

مو مشكله ابقى بره لمن يفتحون البيبان

عفيه لا تشلع كلبي ابقى يم الجهال

لعد امسحي دموعج هسه واسكتي

هاي سكتت بعد ماابجي

والله راح اعوضج عن كلشي شفتي بحياتج

بس اني مااريدك تعوضني

اريدك تتركني بحالي ومتاذيني بعد

كلشي انفذلج بس طلاك مااطلك مااكدر

وهو اني هم مااريد اطلك

مااريد ابتعد عن نور ولا اكدر ابتعد عن نظوري ولا اكدر اخذه ويايه

واخلي بدون اب واهل هم مااكدر هيج اسوي

لعد شنو الي تردي

الي اريده منك تخليني خدامه ومربيه

مثل مكلت

بس مااريدك تتقرب عليه ابد

لتحسبني  زوجتك

احسبني وحده غريبه وكاعد تربي بجهالك

شنو الي تريده مني انفذه الك

بس مااحب تتقربلي بعد

والاهم من كلشي مااريدك تجبرني ع اي شي

هاي هي وعد مني الج ووعد شرف مراح المسج ابد

اله بموافتج وبارادتج ولا راح اجبرج ع شي

بس مالت خدامه لو مربيه لا مااقبل بهذا الشي ابد

انت امهم وانت الكل بالكل

اصلا بعد ممنوع تشتغلين وممنوع اطبخين

ومنو كلك اني مااريد اشتغل ولااريد اطبخ

اصلا هذا الشي يلهيني وينسيني همي

بس اوي راح اتاذه والقران مجان قصدي وحجيت هيج

اسف والله متندم اكثر من شعر راسي

زينب : من اجيت لاهلي الالم حيل زاد عليه

والدم منقطع عني

بس بقيت ساكته محجيت شي

راسلني حيدر وطلب مني يحجي وي ابني

ادري بي جذاب

بس ولا راسلته ولا اهتميت اله

بس كمت ادز صور اله تعبر عن حالتي

وراها اجاني اتصال من رقم مجهول

مجاوبت

بقه يلح هم مجاوبت

اجاني مسج

اني حنان افتحي خط

اتفاجأت شتريد مني حنان

رفعت خط وجانت تبجي

عبالي شو صاير عليهم

كالت قبل لااحجيلج شي

اريد اطلب السماح منج

ع شنو

اني الي خليت بهارات حاره

شكاعد تحجين

اي اني الي خليت

لويش شنو السويته الج

الغيره قاتله ومستعده كلشي اسوي ع مود يخرب الاكل حتى يعصب عليج حيدر

بس والله مجان قصدي يضربج ابد

متوقعته يضربج

وهسه عرف كلشي ويريد يطلكني

ضربني وهاني اكثر منج والله

وهم طردني من البيت

بس اروح ويسولف لاهلي ويطلكني

يلعبون بيه جوله

لعد اني شدخلني بالموضوع

فدوه حاجي حيدر انت وكليله اني مسامحتها

وثقي بالله ابد ماعليه بعد بيج

لا اخبث ولا عليه بيج

راح انجب واسكت وعد مني

اتمنى تسامحيني

الله كريم اني راح ادزله مسج

كامت تشكر مني

اني ماعندي عداوه وياها

بس هي يجوز اي ومااعرف ليش

اشو هي معززه مكرمه

وهي الزوجه المثاليه امام الناس

عكسي بالظبط

المفروض اني الي اغار منها

بس اني ولايهمني امرها ولا امر حيدر

فعلا دزيتله مسج

وفهمته

اكو شي واحد الي يخلني مااسامحه لحيدر ابد

هواي غلط بحقي بس ولا مره طلب مني السماح

ولا مره حاول يعتذر مني

بقه يوميه يراسلني

واني هاملته

وهو اصلا البيه مكفيني

الثلاثاء بعد مااتحمل وماما طاحت بعيني اله اخذج للدكتوره

دزيتله مسج والحمد لله معترض

بس مخبرته اني مريضه

اخذتني ماما وبابا

فحصتني وسوتلي سونار

كالت هذا الطفل ميت ابطنج

صار شكم يوم

ليش ساكته عن نفسج

احتمال يصير عندج تسمم

اني كمت ابجي حرامات خطيه مات بسبب ابو

هو الي قتله

كتلها مو من وكع عليه دم ضربت ابرة تثبيت

اي بس متكفي بس ابره

واحتمال باللحضه الي نزفتي بيها هو ميت

كالت راح انطيج علاج حتى يسقط الجنين

وباجر ان شاء الله ادخلين مستشفى حتى نسويلج كرداش

اني بوقتها مااعرف شنو كرداش

ولا اعرف ياذي لو لا

اخذنه العلاج وضربت الابر ورجعنه

بس زاد كرهي وحقدي لحيدر

لو يموت بعد ميلمسني ابد

يحلم بهذا الشي

بس اني اعترف

مااريد اطلك لعدة اسباب

نور خطيه حيل تعلقت بيه واني همين تعلقت بيها

وثانيه وبعد مااكدر اربي ابني بوحدي بدون اب بدون سند

خاصه بهذا وقتنه

لان اني لاعندي اخ اعتمد علي

واهلي الله ينطيهم الصحه وطولة العمر مدايملي والاعمار بيد الله

ماعندي سند حتى اعتمد علي

ومالت افكر بزواج ثاني لو اموت

هذا الشي من سابع المستحيلات

الافضل الي ابقى يم حيدر

بس لازم اخلي شروط لرجعتي

ملازم يعاملني هيج

ولايقيدني

واعترف الصراحه فقدت رغبتي لكلشي

لا احب اطلع

ولا احب اضحك

ولا احب اكعد بدون شغل

اتعودت ع هذا النظام

رجعت وجنت حيل ضايجه

ماما حاولت تهدئني ويخففون عني هي وبابا

طلبوا مني اخابر حيدر واكله

كتلهم خابرته وانطيتهم علم

اني ضايجه ومقهوره ع الي سواه بيه حيدر

اكول هيج يجازيني

فوك متعبت وطبخت بوحدي

بدة اعراض الاسقاط واضحه عليه

للصبح اني منمت

هم الم قوي وهم دم هواي يوكع عليه

شايله هم لابني خطيه اول مره راح اتركه وافاركه

عفته نايم وصيت رقاوي علي لان مراح اداوم

بس تبارك ورنا داومن

دخلوني وسويتها وخلصت

خطيه بابا مدخلني خاص بدون علمي

مااهون بي خطيه خاف ماعنده

ماخبرت اي احد

كلت اعتذر من اهلي واكول عنده شغل ومااجه

صعدوني كالت الدكتوره لازم ادخل يوم

ضربوني مهدئات بس الم فضيع

احس بنفسي اتكطع تكطع من الالم

ابد ماكدرت اكل من الالم

بالي كله يم ابني

كل شويه ونخابر ونطمأن علي

ماما هواي اتوسلت بيه اكل بس مااشتهي

طلبنه من بابا يرجع يبقى يم البنات وحدهن

رجع بابا وبقينه

وراها نمت ومااعرف شكد بقيت نايمه

كعدت ع الم فضيع

بس من شفت حيدر كبالي

انصدمت والالم راح بلحظتها

مااعرف منو كله وشمدري بيه

اتصرف طبيعي امام ماما

همزين جنت خايفه

بعدها اتصرفنه طبيعين اثنينه

وحجه ويايه والقهرني يكلي انت الي تعمدتي تسقطينه

اجتي الدكتوره وكتبتلي علاج

راح هو وتبارك

جابلي العلاج وضربتني الممرضه

هدأت شويه

طلب مني اكل وفوكاها بيده يريد يوكلني

رفضت بعدين اكلت لان احرجني

بعدها رجعوا

وصيت تبارك ع نظوري

بعدها نمت من المهدئات

بعدها مطولت كعدت

الصراحه الالم فضيع

مااعرف لان بقى الجنين ميت ابطني او هو هيج

فجاه دك جهازي

شفته حيدر

رفعت خط بدون تردد

اخاف ابني يبجي حتى يجيبه يمي

بس كلي طلعتهم وونستهم

حيل افرحت خطيه

حتى اخواتي ابد ميطلعن خطيه

صدفه بابا يطلعهن

بده يحجي ويايه واني فقدت مسيطرت ع نفسي

دموعي يجرن

بس اول مره احسه هيج خايف عليه

واول مره احسه يعاملني بحنيه

واول مره احسها انسان ثاني

شرطت علي شروط حتى ارجع ويا

مااكدر اطلك وصعب عليه

كل الاريده ابقى عايشه وياهم بس مااريده يجبرني ع شي

ولا احب يتقرب عليه

وافق وخلص

ماعندي شي بعد

ثاني يوم اجتي دكتورتي وفحصتني وكتبتلي خروج

اجه حيدر من الصبح

خبرته ماما وكال منتظر بره ممخلينه يدخل

بعدها طلعنه

رجعنه للبيت وجنت حيل مشتاقه لنظوري

اليوم تبارك ممداومه

لكينه بابا متسوك وراجع للدوام

ماما فرشتلي بالاستقبال كالت عيب من زوجج

معارضتها سكتت

نيمتني وراحت التهت بالغده

كتلها جيبيلي ابني

اجوي نور ومنتظر ويبوسون بيه خطيه

خليتهم بحضني

كل واحد بجها

شفت حيدر صافن علينه

بس محجه شي

اجتي ماما وجابت ريوك

كعدنه سويه اني والجهال وهو همين

اوكل بنظوري ونور تاكل بوحدها

كلي اكلي انت لان مو زين عليج تبقين بدون اكل

اخجل واني كاعده مقابيله

كوه كدرت اكل

بعدها كام غسل وكال راح اشرب جاي بالمطبخ

طلعوا الجهال ويا

اني ماادري بنفسي نمت

كعدت ع صوت نظوري

لكيت الساعه ب1

رحت للحمام وسبحت وبدلت ملابسي

كالت ماما همزين كعدتي حتى نتغده سويه

اليوم صادف خميس

اجه بابا من وكت ورنا همين

صبوا الغده

اتغدينه كلنه سويه

سال خاله كللها اكدر اخذها العصر

ماما مقبلت كالت ماما بعدهي مريضه وتحتاج راحه ومو زين عليها السفر

سكت هو

كله عمو شنو وراكم باجر جمعه وماكو دوام

مو ع مود نور امتحاناتها يوم الاحد تبدي

اريدها تقره

كالت رقيه

كملت مراجعت نور الكتب كلها

اني كتلها شلون قريتها ومنيلج كتب

كالت من النت طلعت كتب والله قريتها كلشي

ادري بيج مريضه ومتكدرين تقريها

كتله لعد خلينه لباجر ونروح

الله كريم

كملنه الغده

بابا طلب يفرشون لحيدر

رقيه اخذت نور ومنتظر

كالت ماما روحوا نامو وارتاحوا

اني هواي كاعد انام من العلاج

دخلت قبله وهو بقه يشرب جاي

رحت انام

قبل لا اغفه دخل هو

كال اني استحي باقي هنا عيب من اهلج قيدتهم من البارحه واليوم

ليش منروح العصر حتلو وره الصلاه

مااكدر والله خليني لباجر

ولا تتقيد من اهلي

اصلا فرحانين بيك والله

وامنيتهم جانت تبقى هنا يمهم

لعد خليهم طبيعي مااحب اكلفهم ابد

ليكلفون نفسهم ويسوون اشكال والوان ويعتبروني خطار

اي شي موجود ناكله مو مهم دجاج ولحم واشكال والوان

شكد ابوج منطي للمستشفى

مااعرف شكد

اسالي امج

حتى انت تنطيهيا لان اكيد مياخذ مني

حتى اني مياخذ مني ابد

والله بس نكله يكلب الدنيه ويزعل

اني هم مااقبل والله

لان خطيه شنو ذنبه

راح اسال ماما ولمن نطلع نخليهن بمكان ونص الطريق اخابرهم

هاي هي لعد

عندي طلب من امج بس استحي ياريت انت تكليلها

شنو شتريد

مشتهي خبز حار وجبن ع العشا

خبز اي سهله هي ماما مساع كالت اخبز خبز حار ع حسابك

بس الجبن مااعتقد تقبل

وداعت نظوري ونور مشتهي الجبن والجاي وي الخبز الحار

عود اذا جعت بعدين اطلب تسولي اكل

الله كريم راح اكللها لماما

راسلت ماما ومقبلت ابد

كتلها هو مشتهي ومن يجوع يكلكم

هو نام واني همين نمت

كعدت لكيته ماهو والدنيه ضلمه

من اجي لاهلي ابني صدفه اشوفه كله عند اخواتي

رحت يمهم لكيتهم يم التنور متجمعين

فارشين بالحديقه ومسوين جاي ع الفحم

ومخلين انواع الجبن

اباوع ع حيدر حسيته انسان ثاني

يسولف ويضحك ومندمج وي اهلي

انتبهولي

صاحني بابا كلي تعاي اتعشي ويانه

كل لرقاوي جيبيلها كرسي خل تكعد عليه

لا بابا مااريد مااشتهي

اخاف تردين غير الجبن

كال حيدر عوفوها اخلص واروح اجيبلها معلاك زين الها

لا ماكو داعي مااحبه ولا اكله

كال بابا لج فاتتنه هاي صدك نزفتي هواي دم

لازم شي يعوضج عن الدم

نخلص ونروح نجيبلج

فدوه بابا لتجيبها والله مااحبها ابد

حجه حيدر مو بكيفج

والله ياعمي هناك شالعه كلبنه ابد متاكل

دومها مااشتهي

من شفتها وشافتني مااشتهي

سكتت

كملو وراحو جابو وشواها هنا بالفحم

الظاهر يعشق الشوي

كوه اكلتها تلعب نفسي منها

اكلو كلهم ويايه ع الواهس

كلي جهزي نفسج من الصبح نروح

ان شاء الله

رقاوي حبيبتي حضريلي ملابس نظوري

مجهزتهن قبل لتكولين

شكرا حبيبتي

اخذت علاجي ورحت نمت قبلهم

ابد محسيت بي من نام

كعدت الصبح لكيت ماما خطيه خابزه كميه جبيره

كالت اخذيهن وياج لخالتج ولعمج

جهزت نفسي ولكيت البنات مجهزات نور ونظوري

نسيت اسال ماما ع التكاليف

سالني حيدر كتله نسيت

كال هاج هاي 6 اوراق خليهن بمكان ومن نوصل كليلهم

كافيات لو لا

لان مشايل هواي ماادري بيج

اصلا هواي والله هسه يزعلون بس يدرون

بس اطلب منج طلب

لتصعدين وره

عيب من اهلج والله راح يحسون بيج

واختج رنا كلبها حاس اكو شي مو طبيعي ابيناتنه

شمدريها

مااعرف بعدين اسولفلج

بس لتصعدين وره

وراح اثبتلج حجيي

راح تطلع رنا ورانه

وليش

لان شاكه بموضوعنه

معقوله صدك

رنا لليوم ممسولفين اني وياها بخصوصياتي

بوستهم وودعتهم وماما وصتني انتبه ع نفسي

وفعلا صعدت بالصدر وهاي اول مره طبعا

ولاحضت رنا تباوع ورانه

همزين صعدت

مشينه مسافه وكتله خل اصعد وره عفيه ممرتاحه

شنو الفرق بين هنا وهناك

اكو هواي فرق

وانت تعرف كلش زين

سكت

نور نامت ونظوري همين

عفيه لتحجي شي كدام الكل

ليش عود

استحي كدامهم والله

شنو تستحين اني زوجج قابل صاحبج

اي ادري بس انت ياما رفضتني كدام اهلك

وهمه متاكدين انت متريدني

هسه الي ابالهم اني الي غريتك  واني الي خليتك تتقرب عليه

هاي توهمات كلها

لج انت زوجتي ومن جنت رافضج عندي اسبابي

بس من عرفت الحقيقه الكل لاحظ عليه تغيرت

سولفلي ع رنا والصراحه انصدمت

مجنت متوقعه ملاحضتني

رجعنه ووصلنه قبل الغده

كال خلي ناخذ سمج مشوي من الطريق

لان اكيد الاكل مو طيب

وصلنه للبيت ولكيت عمو وخاله وفرحوا حيل بيه

سلمت عليهم وكاعد يسالوني عن اهلي

وره شويه وجان انصدم ........ راد كلبي يوكف من المنظر

توقعاتكم حبايبي شنو الي شافته زينب

وشتتوقعون راح تتغير معاملة حيدر وي زينب

لو هم راح يرجع لنفس المعامله

انتظروني في البارت القادم

شفت الكل متخبل من الجان 🙈🙈 تحبون الغيها

لو تشوفوها احلى ما بالقصه هي وحابين ابقيها 🙃🙃

القرار راجع الكم حبايبي